Azərbaycan Respublikasının Mədəniyyət Nazirliyi və Teatro.az sənət portalının təşkilatçılığı ilə keçirilən “4.4 Qısa Tamaşalar Festivalı” (QTF) davam edib. Akademik Musiqili Teatrında baş tutan festivalın ikinci günü 5 tamaşa təqdim edilib.
Mədəniyyət Nazirliyinin məlumatına görə, tamaşaların nümayişindən öncə ötən günün qısa videoicmalı nümayiş olunub.
44 günlük Vətən müharibəsində qazandığımız Zəfərə həsr olunan “4.4 Qısa Tamaşalar Festivalı”nın direktoru Elçin Cəfərov çıxış edərək, qonaqları salamlayıb, iştirakçılara uğurlar arzulayıb.
Sonra proqramda olan tamaşaların rejissorları səhnəyə dəvət olunub, Müstəqil Human teatrının “Storyboard” (müəllif Abdulla Elşadlı, rejissor Elvin Rüstəmzadə, Abdulla Elşadlı), Azərbaycan Dövlət Gənc Tamaşaçılar Teatrının “Zəfər yolu” (müəllif və rej. İsa Əsədov), Samir Qulamovun müəllifi və rejissoru olduğu “Bir nəfəs qədər”, Füzuli Dövlət Dram Teatrının “Dönüş” (müəllif və rej. Nicat Mirzəzadə) və Şamaxı teatrının “Ocaq” (müəllif və rejissor Ruslan Adıgözəlov) tamaşaları nümayiş olunub.
Sonda münsiflərin və tamaşaların yaradıcı heyətinin iştirakı ilə maraqlı müzakirə keçirilib. Müzakirədə münsiflər heyətinin sədri Əməkdar incəsənət xadimi, professor İsrafil İsrafilov, münsiflər Əməkdar incəsənət xadimi, professor Aydın Talıbzadə, Əməkdar incəsənət xadimi, professor Əli Əmirli, Əməkdar incəsənət xadimi Mehriban Ələkbərzadə və Xalq artisti Pərviz Məmmədrzayev çıxış edərək, tamaşalar barəsində fikirlərini iştirakçılarla bölüşüblər. Daha sonra söz iştirakçılara verilib və onlar festival haqqında öz fikirlərini bölüşüblər.
Günün sonunda Xalq artisti Pərviz Məmmədrzayevin iştirakı ilə “Bədən dili” adlı vörkşop keçirilib. Vörkşopda Mədəniyyət və İncəsənət Universitetinin tələbələri iştirak edib.
Xatırladaq ki, 4.4 Qısa Tamaşalar Festivalı” noyabrın 5-dək davam edəcək.

Azərbaycan Respublikası Mədəniyyət Nazirliyinin dəstəyi ilə “Bakı Media Mərkəzi” və “Salnaməfilm” studiyasının birgə istehsalı olan “Şuşa, sən azadsan!” sənədli filmi Zəfər bayramı ərəfəsində geniş auditoriyaya təqdim olunacaq.
AzərTAC xəbər verir ki, müasir hərb tarixinin ən parlaq səhifələrindən olan Şuşa əməliyyatının maraqlı detalları izləyicilərə ilk dəfə bu filmdə təqdim ediləcək. Filmdə Şuşa əməliyyatını həyata keçirən cəsur əsgər və zabitlərimizin müsahibələri, əməliyyat zamanı çəkilmiş eksklüziv kadrlar yer alır.

Rusiya Dövlət Tretyakov Qalereyasında SSRİ-nin və Azərbaycanın Xalq rəssamı Tahir Salahovun sərgisi açılıb.
Bu sərgi görkəmli rəssamın doğum gününə həsr olunub. Ziyarətçilərə Tahir Salahovun natürmort, peyzaj, portret janrında çəkilmiş 11 əsəri təqdim olunur. Ekspozisiyanı rəssamın məşhur “Qladioluslar”, eləcə də “Qara Qarayevin portreti” əsərləri açır.
Sərgi 2022-ci il yanvarın 22-dək davam edəcək.

Noyabrın 2-də M.F.Axundzadə adına Azərbaycan Milli Kitabxanasında Mədəniyyət Nazirliyi yanında İctimai Şuranın növbəti iclası keçirilib.
“Ədəbiyyat və incəsənət” portalı məlumat verir ki, əvvəlcə İctimai Şuranın sədri Gəray Əlibəyov görülən işlər barədə məlumat verib. Şura sədri nazirliklə ictimaiyyət arasında səmərəli qarşılıqlı fəaliyyətin təşkili, şəffaflığın təmin olunması, dövlət siyasətinin formalaşması və qərarların qəbulu zamanı ictimai rəyin və vətəndaşların qanuni maraqlarının nəzərə alınması, əsas insan və vətəndaş hüquqlarının müdafiəsi kimi məqsədlərin həyata keçirilməsi istiqamətlərindəki fəaliyyətdən söz açıb.
Sonra QHT Forumunun prezidenti Rauf Zeyni İctimai Şuranın yaranma zərurəti, funksiyaları, görüləcək işlər və fəaliyyət prinsipi barədə ətraflı məlumat verib.
İclasda İctimai Şuranın üzvlərinin sahələr üzrə təhkim olunması qərara alınıb. Həmçinin iclas çərçivəsində Mədəniyyət Nazirliyinin saytında “İctimai Şura” bölməsinin yaradılmasının təqdimatı olub.
İctimai Şuranın ekspertləri qismində iclasa dəvət alanlardan Firuz Mustafa, Qəşəm Nəcəfzadə, Varis Yolçiyev, Şahbaz Xuduoğlu çıxış edərək bu və ya digər məsələlərə münasibətlərini bildiriblər.
Həvəskar teatr festivalının keçirilməsi, bəzi rayon mədəniyyət evlərinin problemləri, gənc rəssam və heykəltaraşların icra olunan layihələrdən kənarda qalması kimi məsələlər müzakorə mövzusu olunub.
Sonra İctimai Şuraya ünvanlanan məktublar müzakirə edilib.
İclasın yekununda İctimai Şuranın teatr, kino, fondlar, nəşriyyat və kitab işi, incəsənət sahəsi, beynəlxalq əməkdaşlıq, habelə muzey işi və mədəni sərvətlər üzrə işçi qrupları yaradılıb.
Eyni zamanda İctimai Şuranın səmərəli fəaliyyəti üçün ofisə ehtiyacı olması zərurəti vurğulanıb.

Noyabrın 2-də Heydər Əliyev Sarayında Zəfər Gününə həsr olunmuş “Qarabağ Azərbaycandır!” adlı konsert təşkil olunub.
AzərTAC xəbər verir ki, konsert Heydər Əliyev Fondu, Mədəniyyət Nazirliyi, Azərbaycan Bəstəkarlar İttifaqı, Heydər Əliyev Sarayı, Azərbaycan Dövlət Akademik Filarmoniyasının birgə təşkilatçılığı ilə gerçəkləşib.
İlk olaraq 44 günlük müharibədə canlarından keçmiş şəhidlərin əziz xatirəsi bir dəqiqəlik sükutla yad edilib.
Sonra mədəniyyət naziri Anar Kərimov bütün qazi və qonaqları Zəfər Günü münasibətilə təbrik edib və bu günün Azərbaycanın tarixində ən şanlı səhifələrdən biri olduğunu vurğulayıb. Qeyd edib ki, Prezident İlham Əliyevin müdrik siyasəti nəticəsində müzəffər Ordumuz bu Qələbəni qazandı və Azərbaycan xalqına sevinc bəxş etdi. İndi Azərbaycan gələcəyə şərəflə irəliləyəcək. Qarabağda irimiqyaslı layihələrin başlandığını deyən nazir bildirib ki, onların arasında mədəniyyət sahəsinə də xüsusi yer verilib. Prezident İlham Əliyevin və birinci xanım Mehriban Əliyevanın təşəbbüsü ilə Şuşada Xarıbülbül festivalı, Vaqif Poeziya günləri keçirilib, Milli Musiqi günü münasibətilə dahi bəstəkar Üzeyir Hacıbəylinin ev-muzeyi tam bərpa olunaraq qarşısında tədbir reallaşdırılıb. “Bütün dünya ictimaiyyəti bizim Qarabağa qayıdışımızı görür. Biz həm də musiqimizi öz musiqisi kimi tanıtmaq istəyən erməni xalqının üzərində mədəniyyətimizlə qələbə çalmışıq,” - deyə Anar Kərimov bildirib.
Əməkdar incəsənət xadimi, musiqişünas, sənətşünaslıq üzrə fəlsəfə doktoru Zemfira Qafarova bildirib ki, müharibə başlayan gündən azərbaycanlı bəstəkarlar yeni-yeni marşlar, xorlar bəstələyirdilər. Lakin bugünkü konsertdə onlar 18 simfonik musiqi əsəri ilə dinləyicilərin qarşısında çıxış edirlər. Onlar sırasında Azər Dadaşovun “Zəfər çələngi”, Mobil Babayevin “Şanlı Qələbə”, Ceyhun Allahverdiyevin “Qələbə uvertürası” və digər mahnıların adlarını çəkmək olar. Firəngiz Əlizadənin xor və simfonik orkestr üçün bəstələdiyi “Zəfər marşı” da maraqlı nümunələrdəndir. Bildirib ki, Azərbaycan bəstəkarları hələ çox əsərlər ortaya qoyacaqlar, çünki onlar xalqın igid oğullarından ilhamlanırlar.
Konsertin bədii hissəsində Xalq artisti Fəxrəddin Kərimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri, Azərbaycan Dövlət Xor Kapellası (bədii rəhbər Xalq artisti Gülbacı İmanova) və Azərbaycan Milli Konservatoriyasının Tələbə xoru (bədii rəhbər Leyla Zalıyeva) çıxış ediblər.
Proqram Cəlal Abbasovun xor və simfonik orkestr üçün bəstələdiyi “Şanlı Azərbaycan” əsəri ilə başlayıb.
Konsert azərbaycanlı bəstəkarların vətənpərvər ruhda bəstələdikləri simfonik mahnıları ilə davam edib. Çıxışlar dinləyicilər tərəfindən alqışlarla qarşılanıb.

Bu günə təsadüf edən əlamətdar hadisələri diqqətinizə çatdırırıq:

3 noyabr. Ümumdünya hüquqşunaslara xoş münasibət günüdür

Xahiş edirik, bu gün hamı qaydalara əməl eləsin, hüquqşünaslara xoş münasibət göstərsin. Düzdür, onların sayı normadan xeyli çoxdur, belə ki, Sovetin dönəmində hüquqşunas yetişdirən bircə ocaq var idi, yurfak. BDU-nun hüquq fakültəsi yəni. İndi əksər universitetlər, özəllərin isə demək olar, hamısı bir ucdan konveyerdən hüquqşunas istehsal eləyir, hələ Rusiyanın (Dağıstanın), Ukraynanın, Türkiyənin distant təhsilli universitetlərindən ölkəmizə axın edən hüquqşunas diplomlarını demirəm. Nə etmək olar, olanımız budur, American Lawyers Public Image Association təsisatının təşəbbüsü ilə qeyd edilən bu gündə hüquqşunasların xətrinə dəyə bilmərik.

3 noyabr. Müstəqillik və ayrılıq günü

Bu günü Panama dövləti keçirir. Təzadlı bir gündür. 1903-cü ildə Panama Kolumbiyadan ayrılaraq müstəqil olub. Hər ilin 3 noyabrında panamalılar küçələrə axışır, təmtəraqla bu bayramı qeyd edirlər. Bayraqlarla, transporantlarla, musiqiylə, gül-çiçəklə küçələr boyu irəliləyir, şüarlar səsləndirirlər. Amma hər kəsin bir gözü gülür, biri ağlayır. Müstəqilliyə sevinsələr də panamalılar Kolumbiyadan ayrıldıqlarına üzülürlər. Bu cəhətdən, Panama dünyada yeganə dövlətdir ki, müstəqillik gününün yanına ayrılma sözünü də əlavə edərək yaslı bayram keçirir.

Panamanın qeyri-adilikləri çoxdur. Məsələn, dünyada yeganə yerdir ki, burada iki okeanı görmək mümkündür, Sakit Okeanda günəşi qarşıla, otur maşına, cəmi 80 kilometrdən sonra Atlantik okeanına yetişəcəksən. Burda həmişə isti olur, qasırğa və tufanlar əsla olmur. Panamanın paytaxtı olan Panama şəhəri dünyada yeganə şəhərdir ki, tropik meşə şəhər ərazisinə düşür. Panama flora və fauna müxtəlifliyinə görə də dünyada liderlik mövqeyindədir. Bura 10000 müxtəlif bitkinin evidir, təkcə orxideyanın burada 1400 növü vardır. 1500 müxtəlif ağacın olması Panama təbiətinə xüsusi status verir. 976 cür quş yaşayır burda, digər Amerika ölkələrində cəm halda bu qədər quş növünə rast gəlinmir. Və bir də, Panama – dünyada ərazisinin plyaj sahəsinin nisbətinə görə də lider dövlətdir. Burada plyajların uzunluğu 2490 kilometrə çatır.

Panama – yəni başa qoyulan o qəribə papaq dövlətin adında yer alsa da, əslində panamanı Panamada yox, Ekvadorda kəşf ediblər. Və ən qəribəsi - Panamanın büdcəsini dolduran əsas mənbə bilirsiniz nədir? Panama kanalından keçən əcnəbi gəmilərdən alınan rüsumlar. Məsələn, burdan keçən Norveç kruiz layneri 376 min dollar rüsum ödəyib. Bu rüsumlar üst-üstə dövlət idarə və müəssisələrində əmək haqlarını, sosial xərcləri təmin edir. Bu cəhətdən, zəngin təbii sərvətləri ilə bu sayaq xərcləri ödəməkdə aciz olan dövlətlər Panamadan nümunə götürə bilərlər.

3 noyabr. Laykaya ithafı pisləməli, Bestujev-Marlinskini sevməli

Yaponlar Bunka-no-xi günü keçirirlər, bu günün bir adı da mədəniyyət günüdür. Oğulsan, Bunka-no-xi günündə teatr, konsert salonlarına, kinoteatra, muzeyə getmə, yaxud kitab oxuma. İctimai qınaq filan olan deyil, yox. Yaponlar heç nədən, heç kimdən çəkinməzlər. Amma qanunlardan çəkinərlər. Odur ki, orda hamı qanunlara riayət edir, bu günkü gündə mədəniyyətə sığınmaq da ənənə şəklini alıb artıq.

Dubaya gedib-gəlməyi sevən həmyerlilərimiz, bu gün orda bayraq günü qeyd ediləcək, biləsiniz. Amerikada isə milli sendviç günüdür. Dünyada ən çox fəst-fudu amerikalılar yeyir, özəl günlərdə bu fəst-fudyemə iki dəfə intensiv hal alır. Bir indi təsəvvür edin, bu gün nə qədər sendviç satılacaq orada.

1992-ci ildə Bill Klinton ABŞ prezidenti seçilib, 1988-ci ildə SSRİ-də ivrit dilinin məktəblərdə keçilməsi qadağası aradan götürülüb, 1943-cü ildə Lyublyanada almanlar 17 min polyakı və yəhudini güllələyiblər. 1918-ci ildə Avstriya və Macarıstan bir-birindən ayrılıb. 1905-ci ildə Rusiya İmperiyasında ilk dəfə olaraq Finlandiya muxtariyyat alıb. 1900-cü ildə alman biznesmeni, “Adidas” firmasının qurucusu Dassler Adolf doğulub. 1888-ci ildə Cek Potreşitel sonuncu qətlini həyata keçirib. 1493-cü ildə Kolumb Dominikanı kəşf edib.

3 noyabrda doğulan digər məşhurlardan Mark Tvenin, Samuel Marşakın, Gerd Müllerin, Lotu Hikmətin, hətta Araz Əlizadənin adlarını çəkə bilərəm. O cümlədən də Bestujev-Marlinskinin. Çar tərəfindən Qafqaza sürgün edilən bu rus ədibi Azərbaycan sevdalısı olub, dilimizi öyrənib, Azərbaycanı vəsf edən əsərlər yazıb, xalqımızın çarizm əleyhinə milli azadlıq mübarizəsinə töhfə verib. Beləsinə heykəl qoymaq da azdır. (Amma biz Şaumyanlara, Kirovlara heykəl qoymuşuq təəssüf ki).

3 noyabra təsadüf edən tarixi hadisələrdən biri də var, 1957-ci ildə SSRİ kosmosa Sputnik süni peykini buraxıb, içində də Layka adlı bir it olub. Yadınızdadırsa, bir Azərbaycan Sovet şairi buna dillər əzbəri olan şeir də yazmışdı:

Layka uçur göyə, eyləyir ham-ham. Mən də baxıb ona alıram ilham.

Bəli, o vaxt belə idi, kommunist ideologiyası cəmiyyətdə dominantlıq təşkil edirdi, mədhiyyəçiliyin həddi-hüdudu yox idi. O vaxt bunlar məcburi idi əlbəttə. Bax indi zorən nəyisə təbliğ etmək heç kəsdən tələb olunmur, amma köhnə fikirlə yaşayanlar hələ də az deyil. Bu yaxınlarda prezident bir pişiyin başını sığallamışdı deyə həmin pişiyə azmı şeir ithaf edənlər oldu?

Varisin “Həftənin təqvimi” yazısından seçmələr

Parisdə, UNESCO-nun mənzil-qərargahında Azərbaycanın sədrliyi ilə II Seçki Qrupunun iclası keçirilib.
AzərTAC xəbər verir ki, ölkəmizin UNESCO yanında daimi nümayəndəsi, səfir Elman Abdullayevin sədrlik etdiyi iclasda qurumun baş direktorunun humanitar və sosial elmlər üzrə müavini Qabriela Ramos, eləcə də II Seçki Qrupunun üzv ölkələrinin nümayəndələri iştirak ediblər.
İclasın gündəliyi təsdiqləndikdən sonra Rusiya Federasiyasının UNESCO yanında daimi nümayəndəsi, səfir Aleksandr Kuznetsov UNESCO İcra Şurasının II Seçki Qrupundan vitse-prezidenti qismində İcra Şurasının 212-ci sessiyasının nəticələrinə dair məlumatla çıxış edib.
Sonra UNESCO baş direktorunun humanitar və sosial elmlər üzrə müavini Qabriela Ramos qurumun Baş Konfransı müddətində rəhbərlik etdiyi sektorun fəaliyyətindən və Baş Konfrans çərçivəsində keçiriləcək tədbirlər haqqında məlumat verib. Süni intellekt etikası üzrə UNESCO-nun tövsiyələrinin qarşıdan gələn Baş Konfransda qəbul ediləcəyinə ümid etdiyini deyən baş direktorun müavini bu tövsiyələrin qəbul edilməsi üçün ölkələri səs verməyə çağırıb.
Mədəniyyətlərarası dialoqa toxunan Qabriela Ramos Azərbaycana “Bakı Prosesi”nə görə təşəkkür edərək, ölkəmizin mədəniyyətlərarası dialoq sahəsində UNESCO-ya verdiyi dəstəkdən söz açıb.
İclasda II Seçki Qrupunun növbəti sədri 2022-ci ilin yanvarından Bolqarıstanın olması razılaşdırılıb.
İclas üzv ölkələrin nümayəndələrinin çıxışları, fikir mübadiləsi ilə davam edib.

Emin Sabitoğlunun yazdığı mahnıların adını çəkmək bəs edir ki, söhbətin kimdən getdiyi aydın olsun: “Dərələr”, “Bakı, sabahın xeyir”, “Uzaq yaşıl ada”, “Dağlar”, “İnsaf da yaxşı şeydir”, “Payız gəldi”, “Kəpənək”... Amma təkcə bunlarmı? Bir simfoniya, üç simfonik poema, üç kantata, simli kvartet, skripka və fortepiano üçün poema... Bəs bəstəkarın musiqi çeşməsindən süzülən kino və komediyalar üçün yazdığı musiqilər? Əslində, bunlar da onun yaradıcılığının hamısı deyil...
Bu gün 600-dən çox mahnının, 9 musiqili komediyanın, 40-a yaxın film musiqisinin müəllifi olan Xalq artisti Emin Sabitoğlunun anadan olmasının 84-cü ildönümü tamam olur.
Özü aramızda olmasa da, “bəzən bir ümid, bəzən göz yaşı gətirən” nəğmələri həmişə bizimlə olan unudulmaz bəstəkarın 80 illik yubileyi dövlət səviyyəsində keçirilib. Bununla bağlı Prezident İlham Əliyev Sərəncam imzalayıb. Sərəncama əsasən hazırlanan tədbirlər planına uyğun olaraq sənətkarın 80 illik yubileyi ölkəmizin hər yerində silsilə tədbirlərlə qeyd edilib.
Bir payız axşamı görkəmli dramaturq Sabit Rəhmanın ailəsində dünyaya göz açan Emin sonralar məşhur mahnılarından birində söylədiyi kimi, “haradan gəlib hayana gedəcəyini” çox gözəl bilirdi. Belə olmasaydı, Üzeyir Hacıbəyli adına Azərbaycan Konservatoriyasının nəzdindəki orta musiqi məktəbində (indiki Bülbül adına məktəbdə) təhsil almazdı, 1954-cü ildə Konservatoriyada, Qara Qarayevin sinfinə daxil olmazdı, 1957-1961-ci illərdə təhsilini P.Çaykovski adına Moskva Dövlət Konservatoriyasında davam etdirməzdi.
Sonralar o, “Azərbaycanfilm” kinostudiyasında musiqi redaktoru vəzifəsində çalışıb. Sonrakı illərdə Dövlət Filarmoniyasında bədii rəhbər, Ü.Hacıbəyli adına Dövlət Konservatoriyasında (indiki Ü.Hacıbəyli adına Bakı Musiqi Akademiyası) müəllim işləyib.
Ötən yüzillikdə Azərbaycan musiqisi tarixində layiqli iz qoyub getmiş Emin Sabit oğlu Mahmudov milli bəstəkarlıq məktəbinin layiqli nümayəndələrindən biridir. Xalq artisti, Dövlət mükafatı laureatı, “Şöhrət” ordenli bəstəkarın kino və tamaşalarda səslənən musiqiləri dillər əzbəridir, ayrı-ayrı müğənnilərin repertuarında geniş yer tutur. Onun filmlərə yazdığı musiqilər yüksək mədəniyyət, zəngin dünyagörüşü və yaradıcı intellektin məhsuludur. Elə bunun nəticəsində də bədii əsərlərin təcəssümü olan zamanın ruhunu çox dəqiqliklə hiss etdirir, hadisələrin məğzini açır. Emin Sabitoğlu musiqisi emosional ekran poeziyası kimi baxımlıdır. Bəstəkarın kino musiqisi tamaşaçını filmlərdəki hadisələrə daha çox ürəkdən təmas etməyə, daxilən obrazlarla ünsiyyət qurmağa təkan verir, hətta film bitdikdən sonra da tamaşaçını özünün emosional təsirində saxlayır. Bəstəkar tanınmış rejissorlardan - Həsən Seyidbəyli, Şamil Mahmudbəyov, Arif Babayev, Tofiq Tağızadə, Rasim Ocaqov və Vaqif Mustafayevlə əməkdaşlıq edib, onların çəkdikləri filmlərə yaddaqalan musiqi bəstələyib.
Bu gün - noyabrın 2-si onun ad günüdür - özü aramızda olmasa da, mahnıları dilimizin əzbəri olan Emin Sabitoğlunun... O mahnılar, o musiqilər ki, hər dəfə ifa olunduqca qəlbimizdə romantik duyğular oyadır, bizi bizdən alıb çox-çox uzaqlara aparır. Elə uzaqlara ki, orada yaşıl ada var, “bir axşam taksidən payıza düşüb”, “bahar həsrəti ilə payız axşamında”, “yağışın əlindən qaçıb”, “üzü dənizə sarı dayanır”...
Lakin üz tutub getdiyi dənizdəki yaşıl ada, nə aradan ötüb keçən illər onu – bənzərsiz və qənirsiz musiqilərin bəstəçisi olan Emin Sabitoğlunu bizdən ayıra bilməz, çünki yadigar qoyub getdiyi həmin bəstələr hər gün evimizdə, ekran və efirimizdə və qəlbimizdə səslənir...
Bir də “Dədə Qorqud”da, “Beşmərtəbəli evin altıncı mərtəbəsi”ndə, “Evləri köndələn yar”da, “Özgə ömür”də, “Ad günü”ndə, “Gün keçdi”də, “Bəyin oğurlanması”nda, “Otel otağı”nda...
                                                   AzərTAC

Azərbaycan Dövlət Tərcümə Mərkəzi ölkədə dil və tərcümə işinin təkmilləşdirilməsi, yazılı, şifahi – ardıcıl tərcümə üzrə peşəkar mütəxəssislərin müəyyən edilməsi məqsədilə Seçim Turlarının növbəti mərhələsinə start verib.
Tərcümə Mərkəzindən AzərTAC-a bildirilib ki, turlar ingilis və digər dillər üzrə ictimai-siyasi, elmi sahələrdə ixtisaslaşmış tərcümə mütəxəssislərinin peşə qabiliyyətinin yoxlanılması və sertifikatlaşdırılması əsasında aparılır.
Turlarda iştirak üçün (Şəxsiyyət vəsiqəsinin surəti, CV) qeyd olunan sənədlərin bu ilin 30 noyabr tarixinədək mərkəzin Bu email ünvanı spambotlardan qorunur. Onu görmək üçün JavaScripti qoşmaq lazımdır. ünvanına göndərilməsi, yaxud kağız formatında Bakı şəhəri, Nəsimi rayonu, Əlimərdan bəy Topçubaşov küçəsi, 74 ünvanına təqdim edilməsi xahiş olunur.
Turlarda iştirak ödənişlidir.