Budur, dünən gecə saatlarında 10 gün ərzində Baş mükafat uğrunda 24 kinolentin mübarizə apardığı Kann kinofestivalı sona çatdı. Fransalı qadın rejissor və ssenarist Culiya Dyükorno festivalın ən ağlasığmazı adlandırılan “Titan” (Titane) dramına görə (“Ədəbiyyat və incəsənət” portalında bu haqda  bəhs edilmişdi) qalib elan olundu.
Bu barədə festivalın münsiflər heyətinin qərarını ünlü amerikalı aktrisa Şeron Stoun elan elədi.
37 yaşlı Dyükorno festivalın tarixində filminə görə ən yüksək mükafata layiq görülən ikinci qadın oldu. Rejissor mükafat alarkən həyəcanını güclə gizlədirdi. O, Festival sarayının səhnəsindən onunla birlikdə film üzərində işləyən çəkiliş qrupuna təşəkkür etdi. "Mən bu qiymətləndirməyə görə çox minnətdaram", - deyə Dyükorno müsabiqənin münsiflər heyətinə müraciət elədi.
“Titan” nə barədədir, niyə onu ağlasığmaz adlandırırlar? Uşaqlıq dövründə baş qəhrəman Aleksiya başından ağır yaralanır, buna görə də kəlləsinin bir hissəsi titan plitəsi ilə əvəz edilir. O, böyüyür, rəqqasə kimi çalışır və çoxsaylı pərəstişkarlarını səmimi rəqsləri ilə cəlb edir. Onlardan biri işdən sonra qızı avtomobilinədək təqib edir və israrla onunla əlaqə qurmağı tələb edir. Aleksiya saç sançağını qulağına sancmaqla bu şəxsi öldürür, meyiti gizlədir, işə qayıdır, cinayətin izlərini yuyur. Başındakı metal kütlə onun beynini də əsarətə saldığından bu epizod  Aleksiyanı cızığından çıxarır, o evə qayıdanda valideynlərini də yandırır və sevimli avtomobili ilə şəhərdən qaçır...
Süjet güman ki, sizə qəribə görünəcək və bu, həqiqətən belədir. Film sərt ritm rejimini axıradək saxlayır - bir qəddar qanlı səhnə başqa biri ilə əvəz olunur.
Bəs niyə belə bir dəhşət, mistika filmi qalib oldu? Məgər cəmiyyət qana susayıb? Kinematoqrafiya niyə daha ağıllı, maarifləndirici, tərbiyələndirici filmləri üstün bilmədi? Kann Fransa şəhəri olduğu üçün bəlkə də burda yerlipərəstlik motivləri rol oynadı.
Mükafatlandırma mərasimi insidentsiz də ötüşmədi. Onun lap əvvəlində münsiflər heyətinin rəhbəri Spayk Li səhvən qalib filmin adını çəkdi, bütün ssenari və mərasim xronologiyasını pozdu. Laureatların Siyahısı dərhal onun əlindən alındı. Zalda çaşqınlıq yarandı. Spaykın bəyanatı isə ali mükafata layiq görülmüş əsərin rəsmi elan edilməsi ilə yalnız bir saatdan artıq davam edən mərasimin sonunda təsdiq edildi.
Finlandiyalı rejissor Yuxo Kuosmanenin “6 nömrəli kupe” filmi (çox maraqlıdır ki, bu film Rusiya Mədəniyyət Nazirliyinin sifarişi ilə çəkilib), habelə iranlı rejissor Əsgər Fərhadinin “Qəhrəman” filmi Qran-pri mükafatına layiq görüldülər. Leos Karaks “Annett” filminə görə ən yaxşı rejissor, Rusuke Xamaquti “Mənim maşınımın sükanı arxasına keç” filminə görə ən yaxşı ssenarist elan olundular.
İtalyan kinorejissoru Marko Bellokkyo isə Kann kinofestivalının fəxri "Qızıl palma budağı" na layiq görüldü. O, bu mükafata Təşkilat Komitəsinin qərarı ilə "müasir kinematoqrafa güc və azadlıq verən nadir yaradıcılığına" görə layiq görüldü.
Bellokkyo mükafatını italyan rejissoru Paolo Sorrentinonun əlindən aldı.
Bellokkyonun debüt işi 1960-cı illərin sonlarında sosial etirazları qabaqcadan duyan "Cibində yumruqlar" (I Pugni in Tasca) filmi ilə olub. Ümumilikdə, İtalyan ustasının hesabında 32 film var ki, onların çoxu tənqidçilər və tamaşaçılar tərəfindən yüksək qiymətləndirilir.
Bellokkyo Kann kinofestivalının ən yüksək fəxri mükafatının onuncu laureatı oldu. Müxtəlif illərdə fəxri "Qızıl palma budağı"na adları dünya kinematoqrafiyasının Şöhrət Zalına çoxdan daxil olmuş sənətkarlar layiq görülürdü: Janna Moro, Bernardo Bertoluççi, Ceyn Fondu, Jan-Pol Belmondo, Manuel de Oliveyra, Jan-Pyer Leo, Aniyes Varda, Alen Delon. Xatırladaq ki, 74-cü Kann kinofestivalının açılış mərasimi zamanı - iyulun 6-da
daha bir fəxri “Qızıl palma budağı
Amerika kinoaktrisa Codi Fosterə "parlaq və istedadlı xidmətinə"ə görə təqdim edilmişdi.

M.F.Axundzadə adına Azərbaycan Milli Kitabxanasında Türkiyə Elm və Ədəbi Əsər Sahibləri Birliyi (İLESAM) tərəfindən gətirilmiş  10 min nüsxə kitabın Azərbaycana hədiyyə edilməsi mərasimi keçirildi.
Tədbir Mədəniyyət Nazirliyinin Milli Kitabxana ilə birgə həyata keçirdiyi “Qarabağa kitabla gedək” layihəsi çərçivəsində reallaşdı. Təqdim olunan kitablar Qarabağda fəaliyyəti bərpa ediləcək kitabxanaların fonduna veriləcək.

Tədbirdə çıxış edən Azərbaycan Milli Kitabxanasının direktoru, professor Kərim Tahirov bildirdi:
-Prezident İlham Əliyev Füzuliyə səfər edəndən sonra biz qərara aldıq ki, kitabtoplama kampaniyasına başlayaq. Məqsəd Prezidentə dəstək olmaq və işğaldan azad edilən torpaqlarda kitabxanaları bərpa etmək idi. Bu kampaniyaya ilk olaraq Azərbaycan Yazıçılar Birliyi qoşuldu, sonradan Xalq yazıçısı Elçin Əfəndiyev kitabxanaya 500 kitab hədiyyə etdi. Bu gün isə “İLESAM” təşkilatı kitabxanaya 10 min kitab bağışlayır. Bizim “İLESAM” təşkilatı ilə əməkdaşlığımız 2017-ci ildə başlayıb. Ümid edirəm, yaxın gələcəkdə topladığımız kitabları Qarabağdakı kitabxanaların fondlarına təqdim edəcəyik.

Mədəniyyət naziri Anar Kərimov söylədi:
-Türkiyənin Azərbaycana çox isti münasibəti var. Bizə qardaş ölkə həm müharibə dövründə, həm də dağıdılmış şəhərlərin yenidən qurulmasında, tarixi-mədəni abidələrin bərpa edilməsində dəstəyini əsirgəmir. Qarabağda 900 kitabxana dağılıb, bu, ən çox ziyan çəkən mədəni abidələrimizdir. Ölkə  rəhbərinin çağırışına qoşulmaq üçün Mədəniyyət Nazirliyi bu dəfə “Qarabağa kitabla gedək” layihəsinə başlayıb. Hər bir vətəndaş bu layihəyə qoşularaq özü ilə kitab gətirə bilər. Artıq bir çox ziyalılarımız bundan əvvəlki kitabtoplama kampaniyasında iştirak edib. Qardaş Türkiyənin kitabxanaya verdiyi kitablar bizim üçün böyük hadisədir.

Tədbirə qoşulmuş Türkiyənin Azərbaycandakı səfiri Cahid Bağçı dedi:
-Bu gün bizim Milli Kitabxanaya kitab hədiyyə etməyimiz Türkiyənin Azərbaycanla olan sıx əlaqələrinin daha bir göstəricisidir. Bu əməkdaşlığı möhkəmləndirmək üçün kitab ən gözəl vasitədir.

“İLESAM”ın rəhbəri Mehmet Nuri Parmaksız söylədi:
-Əgər təmsil etdiyim təşkilatı dəstəkləyən qurumlar olmasaydı belə bir tədbiri keçirmək mümkün olmazdı. “İLESAM”ı dünyanın aparıcı qurumları dəstəkləyir. Təşkilat nəinki türkdilli ölkələrə, eyni zamanda bütün müsəlman dünyasına kitablar hədiyyə edir. Biz, həmçinin Azərbaycandan da Türkiyəyə kitab aparmaq istəyirik. Bizim türkiyəli oxucular Azərbaycanı daha yaxından tanımaq üçün qardaş ölkənin tarixini bilməli və yazıçılarını oxumalıdırlar.

Çıxışının sonunda Mehmet Nuri Parmaksız mədəniyyət naziri Anar Kərimova “Alim, şair, yazar və sənətçilər ensiklopediyası” kitabını hədiyyə etdi.
Tədbirin sonunda iştirakçılar Milli Kitabxanaya hədiyyə olunan kitabların sərgisi ilə tanış oldular. Bir daha xatırladaq ki, söhbət 10 min kitabdan gedir.

Qeyd: Türkiyə Cumhuriyyəti Dövlət Departamenti, Türkiyə Cumhuriyyəti Mədəniyyət və Turizm Nazirliyinin dəstəyi ilə “İLESAM” ümumilikdə 80 000 kitabı ianələr kimi Azərbaycan, Qazaxıstan, Qırğızıstan, Özbəkistan və Şimali Makedoniyaya hədiyyə edib.
Bu il həmin layihə çərçivəsində yenə təşkilat Azərbaycana (Bakı) və Kosovoya (Priştina) ümumilikdə 20 000 kitab hədiyyə edir.

İLESAMIN MƏNZİL-QƏRARGAHI
Ünvan: İzmir 1. Küçə nömrəsi: 33/16 aydın çoxmənzilli ev, mərtəbə: 4 qızıl / Ankara
Tel: 0312 419 49 38 / Faks: 0312 419 49 39
Web: www.ilesam.org.tr
E-mail : Этот адрес электронной почты защищен от спам-ботов. У вас должен быть включен JavaScript для просмотра.

“Ədəbiyyat və incəsənət” portalının bugünkü şənbə həmsöhbəti aktyor Ruslan Sabirlidir. “Sənə inanıram” teleserialından sonra məşhurlaşan Ruslan hazırda bir neçə cəbhədə fəaliyyət göstərir, onu ən müxtəlif tədbirlərdə görmək olur.

Aktyora bir neçə sual ünvanladıq və oxucularımız üçün onları maraqlandıran bu suallara cavab aldıq.

Beləliklə, buyurun, qəhrəmanınızın hazırkı gündəmi ilə tanış olun.

-Ruslan bəy, hər vaxtınız xeyir. Son fəaliyyətinizdən az-çox xəbərdarıq. Özünüzü necə təqdim edərdiniz? Sadəcə aktyormu?

-Hər vaxtınız xeyir. Tamaşaçılar məni əvvəlcə aktyor kimi tanıdılar, düzdür, amma sonra “Buktreyler” Festivalının rəhbəri kimi gündəmdə oldum, hazırda prodüser, rejissor və mentalist kimi fəaliyyətimi davam etdirirəm. Necə deyərlər, istedadlı insan hər sahədə istedadlıdır. Amma hər halda, düşünürəm ki, kinoaktyor Ruslan Sabirli kimi təqdimat daha uyğundur, çünki, geniş auditoriya məni məhz belə tanıyır.

- Hal-hazırda nə ilə məşğulsunuz?

-Bir ssenari üzərində çalışıram, hazır olanda çəkməyi düşünürəm. Çox danışa bilməyəcəyəm bu barədə, amma onu deyim ki, qısametrajlı bir film olacaq və bu, bir sinema hadisəsinə çevriləcək. Bundan əlavə “Buktreyler” Festivalı və CineMo Mobil Film Festivalını reallaşdırmaq istiqamətində işlər aparılır.

Daha çox zamanımı mentalizmə ayırıram desəm, yanılmaram, çox vaxtımı ona həsr edirəm. Yəqin oxucularda sual yaranacaq ki, mentalizm nədir? Ona görə də bu suala da yerində cavab verməyi düzgün hesab edirəm. Mentalizm sözünün kökü ingilis dilindən olan “mental” sözüdür. Yəni, beyin, fikir, zehin. Yəni, bunun mahiyyəti bir insanın fikirlərini oxumaq, onun fikirlərinə təsir etmək kimi bacarıqlardan ibarətdir. Yeri gəlmişkən, mən mentalizm seanslarımı YouTube kanalımda yerləşdirirəm, üstəlik, orda mən mentalizmin sirlərini açan master-klasslar da keçirirəm.

-Demək, siz insanların fikirlərini oxuya bilirsiniz. Bunu necə edirsiniz?

-Texnikası var bunun. Ən elememtarını deyim, insanların gözlərindən, əşyaların energetikasından. Məsələn, kartlarla, Rubik kubiki ilə maraqlı seanslar həyata keçirirəm.

-Çox maraqlıdır. Ən maraqlı seanslarınız kimlərlə olub?

-Mən bir neçə teleproqramda canlı seanslar göstərmişəm. Eldar Qasımov, Nigar Camal, Afaq Gəncəli, Oksana Rəsulova və sair, və illaxır. Çoxdur.

-Hamı mentalist ola bilərmi?

-Bunun üçün xüsusi istedad lazımdır, telepatik qabiliyyət, intuisiya lazımdır.

-Mentalist kimi perspektivləriniz varmı?

-Bəli. Hal-hazırda Dünya Mentalistlərinin Gizli Birliyinə dəvət almışam. Qeyd edim ki, birliyə daxil olmaq açıq deyil. Birlik özü dünyada olan mentalistləri tapır və  üzvlüyə dəvət edir. Qəbul üçün isə müəyyən bacarıq tələbləri var, yəni sınaq imtahanı keçmək var. Onları vermişəm, hal-hazırda cavab gözləyirəm, göstəricilərim yüksəkdir, özümə inanıram, inanıram ki, “mentalist” titulunu almış olacağam.

-İnanmaqdan söz düşmüşkən, siz ”Sənə inanıram” serialı ilə məşhurlaşdınız. Hazırda bu sahədə fəaliyyət davam edirmi, hansısa yeni serialda rol almısınızmı?

-Bəli elədir, həmin serialla məşhurlaşdım. Onu da qeyd etmək lazımdır ki, ”Sənə inanıram” serialındakı Həmid obrazı 5-ci baş rolum idi. Ondan sonra Almaniyaya köçdüm, bir müddət aktyorluq və rejissorluq üzrə təhsil aldım, sonra Azərbaycana qayıdar-qayıtmaz biznes layihə təklifi gəldi və bu dəfə Gürcüstana köçməli oldum. 3 il Tiflisdə yaşadıqdan sonra geri – vətənə döndüm. Serial çəkilişlərinə təkliflər təbii ki, gəldi və gəlir, amma hər layihəyə razılaşmıram. Ən son, keçən ilin sonunda dostum Oksana Rəsulovanın “Yalan həqiqət” serialında kiçik bir obraz canlandırmışam. Hazırda yenə bir neçə təklif var, düşünürəm, götür-qoy edirəm, hələ nəsə demək tezdir.

-Ruslan bəy, ölkənin serial bazarının hazırkı durumunu necə qiymətləndirərdiniz?

-Əfsuslar olsun ki, tərbiyəm BƏRBAD sözündən də bərbadını deməyə imkan vermir, yoxsa səsləndirərdim. Səviyyəsiz və cılız məişət mövzuları ilə doldurulub seriallar. Nə deyəsən.

-Amma bu arada dünyanın, elə qardaş Türkiyənin serial industriyasında ardıcıl şedevrlər ortaya çıxarılır. Budur, bu günlərdə ABŞ-ın ən nüfuzlu Emmy mükafatı nominantları da elan edildi. Bu hadisəyə necə şərh verərdiniz?

-Bəli, bu xəbəri izlədim. "Tac" (The Crown) və "Mandalorian" (The Mandalorian) serialları bu il 73-cü dəfə veriləcək Emmy televiziya mükafatına  əsas namizəddirlər. Uğur siyahısına düşən digər gözəl işlərin də adlarını qeyd edərdim, "Oğlanlar" (The Boys), "Bridcertonlar" (Bridgerton), "Qulluqçu hekayəsi" (The Handmaid's Tale), "Lavkraft ölkəsi" (Lovecraft Country), "Poza" (Pose) və “Bu bizik” (This) serialları da diqqətçəkəndir. Bilirsiniz, hazırda serial industriyası yüngül macəra dalınca getmir, sabun operalarının zamanı arxada qalıb. Seriallar əksərən psixoloji trillerlərdən mövzu alır. Onlarda bol informasiya, maarifləndirici bilgilər yer alır, didaktika da öz yerində. Yəni, bizdəki kimi, cinayət-xəyanət manipulyasiyası meydanda at oynatmır.

-Ruslan bəy, sizin ideyanızla ortaya qoyulan “Buktreyler” Festivalı qısa müddətdə ölkədə çox populyarlaşdı. Bu layihə ona görə əlamətdar idi ki, birdən-birə iki sahəni – kinonu və ədəbiyyatı gündəmə gətirirdi. Neçə-neçə parlaq istedadlı gənci də ortaya çıxardınız. Festivala Mədəniyyət Nazirliyinin dəstək olması onun nüfuzunu xeyli artırmış oldu. Nazirlikdə kadr dəyişikliyi oldu, bəs festivalın necə, davamı olacaqmı?

-Təbii ki olacaq. Nə qədər ki, tələb var, bu festivalı keçirmək niyyətindəyəm.

Buktreyleri həm anlayış, termin olaraq həm də Festival olaraq Azərbaycana 2016-cı ildə gətirdim və uğurla 5 il keçirdim. Buktreyler – ingilis sözü olub Book (kitab) və trailer (anons) sözlərindən ibarətdir, kitabın video anonsu deməkdir. Hal-hazırda Festivalın facebook, instagram səhifələrinə və email ünvanına suallar gəlir, növbəti festival nə vaxtdır və s. Bildiyiniz kimi biz festivala hər il 2 Fevral – Gənclər Günündən start verib onu 23 aprel – Beynəlxalq Kitab Günündə bitirirdik. Keçən il pandemiya ilində 5 illik yubiley Festivalını keçirdik, ondan sonra gözləmə rejimindəyik. Mədəniyyət Nazirliyindən təşkilati dəstək barədə məlumat gələcəyini gözləyirik. Ümid edirəm ki, tezliklə müsbət cavab alacağıq və gec də olsa bu il 6-cı “Buktreyler”  Festivalını keçirəcəyik.

-Kann kinofestivalını izləyirsinizmi?

-Xeyr, izləmirəm. Çünki ölkədə medianın mədəniyyət tədbirlərinə münasibəti yanlışdır, heç bir möhtəşəm mədəniyyət hadisəsi bizim media üçün sıravi kriminal xəbərdən üstün ola bilməz. Xarici mediayla təmas imkanları isə çox məhduddur. Məhz belə bir məqamda ölkəmizdə ixtisaslaşdırılmış mədəniyyət portalının fəaliyyətə başlaması sevindiricidir. Fürsətdən istifadə edib “Ədəbiyyat və incəsənət”ə uğurlar arzulayıram.

-Çox sağ olun. Bəs ölkənin mədəniyyat həyatında yeni nazirin təyinatından sonra nə kimi dəyişikliklər hiss edirsiniz?

-Bu, mənimçün çətin sualdır. Amma mən ölkənin mədəni həyatında olan bir ictimai fiqur kimi öz layihələrimin timsalından çıxış etsəm, fikrimi aydın izah etmiş olaram. Məlumdur ki, keçən il pandemiyanın başlanması və ardınca yeni nazirin təyinatı kimi proseslər start vermiş olduğum 5-ci “Buktreyler” Festivalının işini dondurdu. Amma artıq payız aylarında nazirliyə müraciət etdim ki, festivalın yarımçıq saxlanılması düzgün deyil, iştirakçılar da, təşkilatçılar da gözləmə rejimindəyik, zəhmət olmasa bitirək başlanılmış işi. Yeni nazir də çox sağ olsun, sözümüzü dinlədi və lazımi dəstəyi verəcəyini bildirdi. Hərçənd, bu il bir neçə dəfə müraciət etsək də, nazirlik rəsmilərindən konkret cavab ala bilmirik. Amma yenə də müsbət cavab alacağıma ümidliyəm. Çünki, tanıdığım bəzi yoldaşlar yeni naziri çox tərifləyirlər, onun həqiqətən də lazımlı və gözlənilən kadr olmasını söyləyirlər. Onun ortaya qoyduğu işlər də göz önündədir. Bundan əlavə, CineMo Mobil Film Festival layihəm də var, onun üçün də Mədəniyyət Nazirliyində müvafiq əməkdaşlarla bəzi söhbətlərim olub, bu layihənin də gerçəkləşəcəyinə inamım böyükdür.

-Təşəkkür edirik suallarımızı cavablandırdığınız üçün, Ruslan bəy.

Şəkildə: “Sənə inanıram” teleserialından bir görüntü.

Qazaxıstanın Birinci Prezidenti, türk dünyasının görkəmli oğlu Nursultan Nazarbayev haqqında "Qazax: qızıl insanın tarixi" adlı sənədli filmin qapalı nümayişi cümə axşamı Moskvada keçirilib. Filmin rejissorları Oliver Stoun və İqor Lapatenokdur.

“Ədəbiyyat və incəsənət” portalı TASS agentliyinə istinadən məlumat verir ki, məşhur amerika rejissoru, ssenaristi və prodüsseri, 3 dəfə Oskar qazanmış, dəfələrlə “Qızıl qlobus”, BAFTA  kimi nüfuzlu ödüllərə layiq görülmüş Oliver Stounun cəlbedici qonorarın müqabilində ortaya qoyduğu bu iş heç də sıradan bir iş alınmayıb, yaradıcıların sözlərinə görə, film Roma kinofestivalında təqdim olunacaq. İyulun sonundan isə 8 seriyadan ibarət serial formatında Moskva televiziyası ilə filmin nümayişi başlanacaq.

Rejissor Lapatenokun verdiyi açıqlamaya görə, filmi çəkmək üçün pandemiya ciddi maneə törədib. Sərhədlərin bağlanması ilə bağlı çətinliklərdən əlavə, qrupun bir neçə üzvü koronavirusa yoluxub, buna görə əvvəlcədən hazırlanmış çəkilişləri ləğv etmək lazım gəlib.

"Təsəvvür edin, qrupumuzda üç simptomatik xəstə var. Heç bir test yoxdur, təyyarələr uçmur, yoluxmuş insanları daşımaq üçün humanitar təyyarə ala bilmirik.  Bununla belə, biz Nur-Sultan şəhərinə uçuruq. Bizim prodüser İqor Kobzev isə dərhal reanimasiyaya alınır", - deyə rejissor bildirib.

Kobzev filmin premyerası zamanı qazaxıstanlı həkimlərə ayrıca təşəkkür edib və həyatını xilas etdiklərinə görə bu insanlara ömür boyu borclu olacağını bildirib. Onun ağciyərlərinin buzlaşma dərəcəsi 84% - ə çatıbmış.

Sonradan, çəkilişlərin aparıldığı hava şəraiti də film istehsalçılarına ciddi problem yaradıb, həddindən artıq isti imiş, qumsal çöllərdə havanın temperaturu 55 dərəcə selsidən də çox imiş.

Rejissorun sözlərinə görə, filmin çəkilişlərində Nursultan Nazarbayev çəkiliş komandasına “tapşırıqları canla-başla yerinə yetirməsi səbəbi ilə” çox kömək edib. "Çəkiliş zamanı qəhrəmanımızı həqiqətən sevdik, çünki onun xalqı üçün nələr etdiyini öyrəndik", - deyə Lapatenok bildirib.

"Biz təcrübəli, xalqına hər şey vermiş görkəmli hökmdarın fenomenini görürük", - deyə o əlavə edib.

Filmdə Nazarbayevin həyatı uşaqlığından üzü bəri göstərilir. Qazaxıstanın gələcək ilk prezidentinin metallurgiya zavodu ilə başlayan əmək yolu təsvir edilir.

Bundan başqa, əsərin baş qəhrəmanı müstəqillik qazandıqdan sonra Qazaxıstanın tarixindən danışır və mühüm siyasi qərarların qəbul edilməsinin məntiqini izah edir, məsələn, SSRİ-nin dağılmasından sonra respublikada qalmış nüvə silahı arsenalından imtina etmələri barədə.

Nazarbayev həm də Ukraynada vəziyyətin nizamlanması üzrə Norman formatının yaradılmasında özünün müstəsna rolundan danışır.

Filmin nümayişində iştirak edən Qazaxıstanın Rusiyadakı səfiri Yermek Koşerbayev isə, öz növbəsində, ssenarinin, dialoqların və musiqinin təbiiliyini qeyd edib. "Mən həyəcanlandım, hər şey çox təbiidir. Bundan başqa, mən özüm  filmdə göstərilən hadisələrin əksəriyyətinin şahidiyəm", - deyə diplomat vurğulayıb.

Mövcud pandemiya şəraitinə görə Oliver Stoun özü təqdimetməyə qatılmayıb, Nursultan Nazarbayev də həmçinin. Qeyd etdiyimiz kimi, bu, dar çərçivədə qapalı bir təqdimat olub. Amma Stounun da, Nazarbayevin də iştirakıyla "Qazax: qızıl insanın tarixi" adlı sənədli filminin açıq geniş təqdimatının keçiriləcəyi də gündəmdədir.

Nazarbayev Qarabağ probleminin nizamlanmasında Azərbaycan meyilli fəaliyyəti ilə, habelə qüdrətli türk dünyasının təşəkkül tapmasında göstərdiyi səyləri ilə azərbaycanlılar arasında çox sevilir. Düzdür, filmdə onun Qarabağ problemi, türk dünyası ilə bağlı fəaliyyət spektrləri barədə söz açılıb-açılmaması haqda xəbərdar deyilik, bununla belə, qeyd etməliyik ki, bu 81 yaşlı qocaman türk oğlu barədə Oliver Stounun film çəkməsi çox böyük hadisədir.