Super User
Günün fotosu: NATO rəhbərindən Putinə ismarıc
Günün fotosu: NATO rəhbərindən Putinə ismarıc
NATO-nun baş katibi Stoltenberq Brüsseldə çıxıç edərkən söyləyib: Bu müharibəni Putin başlayıb. Putin də bitirməlidir.
Foto: Euronews
Ayda 91 min manat qazanan aparıcı
Türkiyəli aparıcı Burcu Əsmərsoyun aylıq gəliri ortaya çıxıb.
“Ədəbiyyat və incəsənət” axşam.az-a istinadən xəbər verir ki, aparıcı İnstaqramda reklam etdiyi markanın geyimlərini 30 gün ərzində 7 dəfə paylaşır. O, bunun müqabilində milyon lirə (təxminən 91 min 500 manat) məvacib alır.
Əsmərsoy bundan əlavə rol aldığı reklam çəkilişləri və aparıcılığını etdiyi dəvətlərdən aldığı qonorar ilə ümumi olaraq aylıq 4 milyon lirə (təxminən 366 min manat) qazanır
Küçə söyüşləri və məktəbə yol açan zorakılıq
“Ədəbiyyat və incəsənət” portalı Oxu.az-da çıxmış çox aktual bir yazını öz oxucularına təqdim edir. Yazıçılar Seyran Səxavət və Varis, habelə təhsil eksperti Nadir İsrafilov dilə vulqar sözlərin müdaxilə etmələri və bununla mübarizə ilə bağlı dəyərli fikirlər söyləyirlər.
Yeni tədris ili başlayar-başlamaz məktəblərlə bağlı problemlər yenidən aktuallaşdı. Şagirdlərin bir-birinə olan aqressiv münasibətinin tez-tez şahidi oluruq. Vəziyyət o həddə çatıb ki, məktəblilərin öz aralarındakı zarafatları qanla nəticələnir.
Ümumiyyətlə, müşahidələrdən aydın olur ki, yetkinlik yaşına çatmayan uşaqlar arasında küçə leksikonu geniş yayılıb. Bu gün məktəblilərin tədris müəssisələrində bu tərz danışığı gözdən yayınmır.
Bununla yanaşı, sosial şəbəkələrdə Azərbaycan dili dərsliklərində vulqarizmin izahı üçün gətirilən sitatlardan da narazılıq edilir. Valideynlər vurğulayırlar ki, belə sitatların gətirilməsi uşaqların tərbiyəsini pozur, onlar küçə leksikonuna meyil edirlər.
Bəs görəsən, burada günahkar kimdir? Valideyn, ədəbiyyat, yoxsa təlim-tərbiyə ocağı?
Mövzu ilə bağlı Oxu.Az-a açıqlama verən təhsil eksperti Nadir İsrafilovun sözlərinə görə, bunu məktəb və ya sırf valideynlə əlaqələndirmək olmaz:
“Yüksək texnologiyalar əsrində yaşayırıq. Virtual aləm uşaqlara daha çox təsir edir. Bu saat yeniyetmələrimizin əksəriyyəti gününün müəyyən hissəsini kompüter arxasında keçirir. Televiziyalarımızda bəzən bayağı anlayışlar səslənir, məhəllə ləhcələrinə yol verilir. Nə qədər valideyn, məktəb tərbiyəsi olsa belə, yeniyetmə və gənclərimizə sosial mühit daha çox təsir edir”.
Təhsil eksperti qeyd edib ki, uşaqları bu mühitin öhdəsinə buraxmaq olmaz:
“Sosial mühit nə qədər üstünlüyə malik olsa da, bu, məktəb və valideynin məsuliyyətini heç də azaltmır. İstəsək də, istəməsək də məktəb və valideyn əsas tərbiyə mərkəzləri sayılırlar. Mühitin öhdəsinə qoysaq, müsbət nəticə ilə qarşılaşmarıq. Bu cür məsələlərin məktəbdə qarşısı alınmalıdır. Əgər valideyn, məktəb məsuliyyəti yoxdursa, sosial mühitin təsirinə buraxsaq, o zaman küçə uşağı olacaqlar.
Məktəbin geniş imkanları var. Valideyn də, şübhəsiz ki, ciddi yanaşmalıdır. Uşağın küçə ifadələrinə üstünlük verməsinin qarşısı alınmasa, gələcəkdə onu daha pis yerə aparacaq, zorakılıq hallarının artmasına gətirib çıxaracaq. Küçədə adi atmaca belə, bıçaqlanma ilə nəticələnə bilər. Qarşısı alınmalıdır”.
Yazıçı Varis isə əlavə edib ki, bu təkcə Azərbaycanın problemi deyil:
“Bütün dünyada hər yerdə məktəb, ailə və küçə var. Bunlar mütləq şəkildə mövcud olan problemlərdir. Bunlara heç cür qadağa qoymaq olmaz ki, uşaq həyətə getməsin, vulqar ifadələri eşitməsin. Söyüşləri, qarğışları, jarqon ifadələri uşaq istər-istəməz eşidir. Bunların nə olduğunu bilir. Yaşa dolduqca da leksikonu tam olaraq mənimsəyir”.
Varis qeyd edib ki, valideyn və müəllim özünə uyğun metodla uşağa izah etməlidir:
“Onlar izah etməlidirlər ki, bundan istifadə etsən, sən dostlarının gözündən düşərsən. Özünə uyğun yanaşmalısan. Hər bir dilin formalaşması üçün onlar öyrənilməlidir. Dili vulqar sözlərsiz təsəvvür etmək mümkün deyil. Uşaqların o sözlərə yaxın durmamaları çox vacibdir. Məktəblə valideyn bunları öyrədə bilər. Çox önəmli olan odur ki, tutaq ki, küçədə insanlar bir-birinə qarşı nümayişkaranə tərzdə təhqiredici sözlər işlədirlər. Onlara cəmiyyət irad bildirməlidir ki, bunları işlədib, uşaqların tərbiyəsini pozmayın”.
Nərimanov rayonu M.Şəhriyar adına 193 nömrəli tam orta məktəbin Azərbaycan dili və ədəbiyyatı müəllimi Jalə Rüstəmli uşağın tərbiyəsində valideynin əsas rol oynadığını söyləyib:
“Uşaq nə istəyirsə, valideyn onun üçün alır. Smartfon alıb verir, deyir ki, məktəbə get. Uşağa telefon verilməsinin tərəfdarı deyiləm. Çünki uşaq ailədə tərbiyə alır, məktəbdə formalaşır. Günahın 90 faizi valideyndədir. Uşağı valideyn tərbiyə etməlidir”.
J.Rüstəmli qeyd edib ki, uşaqların küçə leksikonundan istifadə etməsi vulqarizmlərlə bağlı deyil:
“Vulqarizmlərə gəldikdə onlar dərslikdə olan bölmədir. Uşaqlara tədris edilməlidir. Biz də o sözləri keçmişik. Tərbiyəsiz olmamışıq. Ya da geniş istifadə etməmişik.
Get-gedə vəziyyət pisləşir. Uşağın fikri dərsdə olmur. Hər nə gəldi, çəkib yayırlar. Gülünc vəziyyət yaradırlar. O telefonu valideyn alır. Azyaşlıların telefondan istifadəsinə normal baxmıram. Etik normalara əməl edib, başa salmağa çalışırıq. Nə qədər ki valideyn uşağın əməllərinə göz yumacaq, cəmiyyətimiz düzəlməyəcək. Ailələrdə bəzən daha pis sözlərdən istifadə edirlər. Müəllimin vulqarizm bölməsini proqrama əsasən keçməsi uşağı küçə leksikonuna alışdırmır”.
Yazıçı Seyran Səxavət isə uşaqların tərbiyəsinin cəmiyyətlə bağlı olduğunu əlavə edib:
“Bunun çox qısa cavabı var. Heç vaxt o leksikondan istifadə olunmur. 100 faiz belədir. On ailədən ikisi ola bilər ki, bu sözlərdən istifadə etsin. Bu, cəmiyyətlə, məktəblə evin arasındakı yol ilə bağlıdır. Bu yolu təmizləmək, nəzarət etmək lazımdır. Uzun-uzadı danışmağa ehtiyac yoxdur. Valideyn də, müəllim də küçə sözlərini dilinə gətirməz. Ancaq uşaq məktəblə ev arasındakı məsafədə eşitdiklərini təkrar edir. Bu da çox ağır və çətin məsələdir. Ona diqqət vermək lazımdır”.
Nəzrin Vahid
Ağdamın fotoelegiyası - Rəşad Məcid yazır
Ağdamda gözüyumulu hər yeri tapa bilərəm, amma gözüaçıq mümkün deyil.
Bunu işğaldan azad olunandan sonra Ağdama ilk dəfə gedəndə demişdim. Amma indi, ikinci dəfə gedəndə əzbər bildiyim , səkisinin, asfaltının hər çökəyinə, hər döngəsinə , tininə bələd olduğum küçələrdən əsər- əlamət qalmadığını görəndə düşündüm ki, heç gözüyumulu da tapa bilmərəm.
Küçələr büzüşüb kol basmış cığıra dönüb , səkiləri dəmir boruları çıxartmaqdan ötrü qazıq-qazıq edib yarğana çeviriblər.
Uşaqlığımız keçən dörtmərtəbənin yerində ancaq daş qırıntıları qalıb.
Vaxtilə Köhnə hamam məhləsi deyilən , Əli İbrahimov küçəsi adlanan , indi kol- kos içində itib batan çöllükdən fəhmlə tapdığımız çığırla yaşadığımız döngəyə burularkən birdən hiss etdim ki, dünyada cəngəl basmış küçəylə gedib öz evini tapa bilməmək qorxusu da varmış. Bir nişanəsi qalırmı görəsən?
Evimizi qalın divarlarının qalıqlarından tanıdım. Köhnə , pas tutmuş əşyalar xatirələri canlandırdı.
Dostum Vaqifgilin evi isə əksər evlər kimi yerlə birdi. Nə divarı , nə başqa nişanəsi var. Vaqif evlərini kafel qırıntılarından tanıdı…
Sarsıntı içində , düşmənə lənət oxuya-oxuya dolaşdıq doğma şəhərimizin uçuqlarını. Oxuduğumuz məşhur Ağdam şəhər 1 nömrəli orta məktəbin uçuqları arasında gəzib dolaşdıq, keçmişi , uşaqlığımızı, sinif yoldaşlarımızı, müəllimlərimizi yada saldıq, gələcək Ağdamı xəyal etdik.
“Dünyanın ən varlı şəhəri!”
“Ağam şəhərim! Adam şəhərim! Ağdam şəhərim!”
“Ruhlar şəhəri”
Əməkdar artist Suğra Bağırzadənin fərdi sərgisi açılıb
Oktyabrın 11-də Azərbaycan Rəssamlar İttifaqının V.Səmədova adına sərgi salonunda Əməkdar artist, aktrisa və rəssam Suğra Bağırzadənin sənət əsərlərindən ibarət fərdi sərgisi açılıb.
“Ədəbiyyat və incəsənət” portalı AzərTAC-a istinadən xəbər verir ki, Xalq rəssamı, Azərbaycan Rəssamlar İttifaqının sədri Fərhad Xəlilov Suğra Bağırzadə və onun sərgisi haqqında iştirakçılara geniş məlumat verib. O deyib: “Bu gün bizim əzizimiz, dostumuz, gözəl insan Suğra xanımın sərgisinə yığışmışıq. Suğra xanım bizim kinomuzda, ümumiyyətlə, ictimai həyatımızda özünəməxsus yer tutur. Bununla bərabər o, həm də Rəssamlar İttifaqının fəal üzvüdür. Sənətkar kimi mütəmadi olaraq öz gözəl əsərlərdən ibarət fərdi sərgilərini açır. Bugünkü sərgi onu göstərir ki, Suğra xanım passiv yox, aktiv şəkildə sənəti ilə məşğuldur və bizi belə sərgilərlə sevindirir. Qeyd etmək istərdim ki, bu sənət Suğra xanımın gözəlliyinə, onun daxili zənginliyinə yaraşan bir sənətdir. Suğra xanım bir çox mükafata, fəxri ada layiq görülüb və onun əsərləri dünya ölkələrində nümayiş olunub. Bütün bunlar onu göstərir ki, Suğra xanım insan kimi, sənət fədaisi kimi, eyni zamanda, layiqli vətəndaş kimi xoş sözlərə layiqdir”.
Milli Məclisin Mədəniyyət Komitəsinin sədri Qənirə Paşayeva sərginin açılışına görə təbriklərini çatdıraraq xoş arzularını ifadə edib. "Əslində, Suğra xanım barədə çox danışmaq olar. Onun haqqında illər öncə bir yazı yazmışdım. O yazı hətta mənim bir çox kitablarıma da daxil olub. Suğra xanım sənətini sevən çox gözəl sənətkardır. Həmin yazını yazarkən mən onun haqqında araşdırmalar da aparmışdım və çox şadam ki, bu sənətdə cığır açanların önündə məhz Suğra xanım gəlir. Xüsusən qeyd etmək istərdim ki, Suğra xanımın adı çəkiləndə ilk olaraq insanın gözləri önündə gözəllik canlanır. O, öz həyatında da, yaradıcılığında da gözəlliyi əks etdirir. O, yaratdığı əsərlərlə və yaradıcılığı ilə insana gözəl duyğu, həmçinin enerji bəxş edir. Çox şadam ki, mütəmadi olaraq belə gözəl və fərqli sərgilər açır, biz də gəlib həvəslə iştirak edir, bu cür gözəlliklərdən zövq alırıq", - deyə o bildirib.
Xalq rəssamı Aydın Rəcəbov isə qeyd edib ki, Suğra xanımın əsərlərindən çox danışmaq olar: “Onun bugünkü sərgisi də öz gözəlliyi və fərqliliyi ilə seçilir. Suğra xanım həm də Azərbaycan Kinematoqrafçılar İttifaqının, Azərbaycan Rəssamlar İttifaqının, Baltikyanı ölkələr və MDB Kinematoqrafçılar Konfederasiyasının üzvü, həmçinin 2003-cü ildən Dünya Floristika Şurasının Azərbaycandan olan ilk və yeganə üzvüdür".
Daha sonra çıxış edən Əməkdar incəsənət xadimi, professor Ziyadxan Əliyev və Azərbaycan Rəssamlar İttifaqının sədr müavini Rafiq Kərimov Suğra Bağırzadənin sənəti haqqında məlumat verərək bildiriblər ki, “Azərbaycanfilm” kinostudiyasında “Ulduz”, “Yollar və küçələrlə”, “Dünyaya insan gəlib”, “Alma almaya bənzər”, “Şir evdən getdi”, “Tələ”, “Güllələnmə təxirə salınıb” və s. filmlərdə çəkilmiş aktrisa rəssam kimi də tanınıb. Diqqətə çatdırılıb ki, sənətkar daxili aləmini, düşüncələrini, dünyaya baxışını güllərin ömrünü uzatmaqla, onlardan mürəkkəb kompozisiya yaratmaqla ifadə edir. Bu gün həm də Suğra Bağırzadə televiziya verilişlərində fəal iştirak edir, müxtəlif filmlərə çəkilir, zövq və məsuliyyət tələb edən bir işlə məşğul olaraq gözəl, eləcə də təravətli güllərin ömrünü uzadır. Məşhur “Cücələrim” mahnısı da Suğra Bağırzadənin ifasında dillər əzbərinə çevrilib və bu istedadı onu doğma Azərbaycanın hüdudlarından kənarda da tanıdıb. Bütün bunlarla yanaşı, aktrisanın əvvəllər güllərlə işləmək həvəsi kimi başlayan hobbisi tədricən daha bir peşəyə keçid alaraq, güllərdən yaratdığı kompozisiyalar ona floraçı-rəssam şöhrətini qazandırıb.
Əməkdar artist Suğra Bağırzadə sərginin təşkilatçılarına və iştirakçılarına minnətdarlığını bildirib.
Sonra Suğra Bağırzadənin orijinal kompozisiyalarının nümayiş etdirildiyi sərgiyə baxış keçirilib.
Fərqli “ginekoloji trillerlər” yazan Anni Ernonun Nobelə yolu hamarmı olub?
“Ədəbiyyat və incəsənət” portalının şərhçisi Kənan Məmmədli 2022-ci il Ədəbiyyat üzrə Nobel mükafatı laureatı Anni Ernonu trofeyə doğru aparan yollardan danışır.
İsveçin paytaxtı Stokholmda 2022-ci il Nobel həftəsi çərçivəsində ədəbiyyat üzrə mükafatın laureatı açıqlananda çoxları təəccübləndilər. Niyə? Əlbəttə ki, mükafata əsas namizəd fransalı yazıçı və şair –dünyaşöhrətli Mişel Uelbek idi. Laureat kimi də hamı məhz onu görürdü. Bu yandan başqa fransız - Anni Ernonun sanki göydən düşərək trofeyi aparması gözlənilməz oldu.
ANNİ ERNO KİMDİR?
82 yaşı var, ən məşhur əsərləri “Hadisələr”, "Boş şkaflar" və "Xarici həyat"dır. Xatırladaq ki, Nobel Akademiyasının təqdimatında deyilirdı: “ Anni Erno bu mükafatı “xatirələrinin mənşəyini, yadlaşma və kollektiv məhdudiyyətlərini aşkara çıxarmaqda göstərdiyi cəsarət və klinik dəqiqliyə görə” alıb. 1940-cı il təvəllüdlü Erno “Qadın”, “Hadisələr”, “İllər”, “Qızın yaddaşı” və s. əsərlərin müəllifi və bir çox ədəbi mükafatın laureatıdır”.
Beləliklə 10 milyon kron (təqribən 1 milyon dollar) Anni Ernoya qismət oldu.
Əvvəla ondan başlayaq, Anni Erno Azərbaycanda çox məhdud sayda oxuculara tanış olduğu kimi, elə dünyada da az tanınır. Yağlı tikə niyə çox tanınana deyil, az tanınana qismət olsun ki?
FEMİNİZM
Ən sadə məsələ - "Qadın", "İllər", "Adi ehtiras" kimi avtofiksional romanların müəllifinin laureatlığını yüksək bədii dəyərlərdə axtarmaq düzgün olmazdı, onun yaradıcılığının qızıl xətti ən yaxşı halda feminizm sayıla bilər, qadın mövzusuna vicdanlı yanaşma sayıla bilər. Nəzərə alaq ki, Anni Ernonun ən məşhur romanı – rejissor Odri Divan tərəfindən ekranlaşdırılmış “Hadisələr” romanı abortlar barədədir. Amma məsələ, əlbəttə ki, heç bunda da deyil.
ABORT QADAĞASI
Anni Erno ekzistensial, sərt, yaralayan və tamamilə qeyri-müəyyən nəsr yazır. Onun əsas qəhrəmanı - ənənəvi oriyentasiya və baxışları olan, gözəl Avropa qadınıdır, amma bu qadın sosial seçimin girovuna bənzəyir. Onun seçimi dəyişmək hüququ da yoxdur.
Məsələn, "Hadisələr" in əsas personajı Anna tələbədir, hamilədir və tam dalana dirənib: 1963-cü ildir, abortlar qadağan edilib, uşağın dünyaya gəlməsi onu təhsilini tərk etməyə məcbur edəcək, sonra isə çətin ki, təhsilə qayıtmaq mümkün olsun. Uşaqdan imtina üçün kifayət qədər gec müddətdə qız imalə və kanyulinin köməyi ilə gizli abortlar edən həkimin ünvanını ala bilir. Venesiyada sərəyan edən növbəti hadisələr Odri Divanın çəkdiyi filmdə xüsusən qabardılıb: qışqırmaq qadağandır, anesteziya yoxdur, hətta ağızda bir parça əski də yoxdur, sifət ağrdan deformasiyaya uğrayıb, ətrafda çoxlu qan var...
"Ginekoloji triller" janrında ənənəvi qadın romanlarından fərqli olaraq Erno soyuq intonasiyaya tərəfdardır. Anna yaxşı iş əldə etməyə və layiqli sosial statusa iddia etməyə imkan verən təhsil almaq, yaxud sadə qayğıların dövrəsinə məhkum edilmiş yoxsul fərd olmaq arasında seçim etməlidir. Əlbəttə ki, uşaq dünyaya gətirmək onu ikincilər sırasına yuvarladacaq. Seçim qəddardır, amma qız buna məhkumdur.
UELBEK HARA, ERNO HARA
"Qadın" romanının qəhrəmanı olan yazıçı qadınsa müti, səliqəli, zəhmətkeş və dərindən bədbəxtlik duyan evdar qadındır. Oxucu onu Paris ətrafındakı xəstəxananın geriatrik şöbəsində ölüm ayağında tapır. Amma "Hadisələr"ə qayıdaq. Gizli abort Annanı analıq şansından məhrum edəcək, amma təhsil almağın bədəli belə ağır olmalıdır.
Əslində, qismən də Uelbekin mesajlarını xatırladan Ernonun bədii mesajı məhz bundan ibarətdir. Bəli, söhbət Nobelə əsas iddiaçı olan Uelbekdən gedir. Mükafatsa ona deyil, ona oxşamaq istəyən Ernoya verildi. Təəssüf.
Müasir sosiallıq insanı tənhalığa, kökdən ayrılmaya, öz təbiəti və mənəviyyatı ilə qlobal münaqişəyə sürükləyən ağır patriarxal dünya düzəninin arxa tərəfidir. Feminizm - titanlı qabıqdır, ən azı səni yeməsinlər deyə lazımdır.
KÖHNƏ-YENİ TENDENSİYA
Ernonun mükafat alması, çox yəqin ki, Nobel komitəsinin diqqətini cəlb edən tendensiyadan xəbər verir. Dünya nə qədər sərsəm olsa da, ənənəvi burjua Avropası insan faciələrinin əsas səhnəsidir. Fransızlar müvəffəqiyyətli Anqlo-Sakson sxemini yenidən kodlaşdırırlar - onu qladiator arenasında, süngüyə keçirilən talelər və bədənlər şəklində göstərirlər. Mövzunun davamı 2021-ci ildə Kannda "Qızıl palma budağı" ilə taclanmış Cülya Dyukurnonun "Titan" əsəri sayıla bilər, orada cismanilik asta təsir edən bombadır, onu zərərsizləşdirmək də mümkünsüzdür.
SİYAHININ SUÇU
Ernonun qələbəsini proqnozlaşdırmaq çətin idi, təkrarlayırıq. Adı çəkili kateqoriyadan danışsaq, Erno daha çox mediada rəqiblərinin kölgəsində qalırdı. Yenə də Mişel Uelbekə qayıdaq. Qonkur mükafatı laureatı, ümumi vətənləri Fransada bir kult yaradan ədib. Hətta İslam dünyasının qatı düşməni Salman Ruşdi öz baxışlarına görə ciddi zərər çəkmişdisədə belə, Ernodan daha şanslı idi. Həmçinin siyahılarda dəhşət kralı Stiven Kinq və postmodernist-virtuoz Vladimir Sorokin də yer alırdı. Favoritlər arasında kanadalılar Enn Karson və Marqaret Etvudla Mariz Konde də var idilər. Sırada ən sonda 82 yaşlı Anni Erno dayanmışdı.
Deyəsən, münsiflər siyahını tərsinə tutub oxudular.
Şəkildə: Mats Malm - İsveç Nobel Akademiyasının daimi katibi, habelə İsveç Akademiyasının üzvləri - ədəbiyyat Komitəsinin sədri Anders Olsson və ədəbiyyat Komitəsinin üzvü Ellen Matson Stokholmda Borshusete sarayında ədəbiyyat üzrə 2022-ci il Nobel mükafatçısını elan edərkən. Foto: REUTERS
“Açar” bədii filmimiz Fransada beynəlxalq festivalda iştirak edəcək
Azərbaycanın “OB Film” və “Epic Production” şirkətlərinin birgə istehsalı olan “Açar” qısametrajlı bədii filmi 29 noyabr – 3 dekabr tarixində Fransada keçiriləcək, Avropanın ən yaxşı qısa film festivallarından hesab olunan 40-cı “Festival Tous Courts” Beynəlxalq Qısa Film Festivalının “Beynəlxalq müsabiqə proqramı”na seçilmişdir.
“Ədəbiyyat və incəsənət” portalı xəbər verir ki, Qarabağda işğal olunmuş evinin sonuncu yadigarı və nişanəsi olan açarları 26 il qoruyub saxlayan Ümid kişinin hekayəsindən bəhs edən “Açar” filmi sözügedən festival çərçivəsində Fransanın Aix-en-Provence şəhərindəki kinoteatrlarda nümayiş olunacaq.
Qeyd edək ki, premyerası Niderland Krallığında “Oscar”, BEFTA və Avropa Film Mükafatlarına vəsiqə qazandıran “Go Short – International Short Film Festival Nijmegen”də baş tutan “Açar” filmi oktyabr ayı ərzində İsveçdə “SAMA International Film Festival”, Makedoniyada “KineNova Skopje International Film Festival”, Türkiyədə “Accessible Film Festival” və Hisdistanda “Goa Short Film Festival”da ölkəmizi təmsil edəcək.
Filmin ssenari müəllifi və quruluşçu rejissoru Elşad Əliyev (ELsevƏR), görüntü rejissoru Cavid Oruclu (Delee), quruluşçu rəssamı Arif Niftiyev, montaj rejissoru Elşad Rəhimov, səs rejissoru Mehman Nadirov, prodüserləri Orxan Behbid, Senur Əhədov və Mətin Ələkbərlidir.
Filmdə Qurban İsmayılov, Rasim Cəfər, Reyhan Cəfər, Hüseyn İsgəndərov, Yusif Şeyxov, Zemfira Əbdülsəmədova, Arif Kərimov, Rövşən Ağayev, Eldar Cəbrayıl, Selin Cəbrayıl və başqaları çəkiliblər.
Keçid linki: festivaltouscourts.com/festival-2022/films-selectionnes-en-competitions-internationales/
UNESCO-nun sessiyasında Azərbaycanın milli bəyanatı təqdim edilib
UNESCO İcraiyyə Şurasının 215-ci sessiyasında Azərbaycanın milli bəyanatı təqdim edilib.
Bəyanatda Azərbaycanın Ermənistanın ərazisində olan mədəni irsinin cari vəziyyətini qiymətləndirmək məqsədilə UNESCO missiyasının göndərilməsinə dair vətəndaş cəmiyyətlərinin, eləcə də QHT-lərin dəfələrlə müraciət etdiyi də xatırladılıb.
“Ədəbiyyat və incəsənət” portalı AzərTAC-a istinadən xəbər verir ki, Azərbaycanın UNESCO yanında daimi nümayəndəsi Elman Abdullayev qurumun İcraiyyə Şurasının 215-ci sessiyasında ölkəmizin milli bəyanatını təqdim edib. Bildirib ki, UNESCO-ya üzvlüyünün 30 illiyini qeyd edən Azərbaycan bu illər ərzində təşkilatın mandatına uyğun olaraq bütün sahələr üzrə öz töhfələrini verib.
İcraiyyə Şurasının 214-cü sessiyasından sonra Azərbaycan-UNESCO arasında əməkdaşlığın daha da dərinləşdiyi, ölkəmizin qurumun fəaliyyətinə verdiyi töhfələr qeyd edilərək, 2023-cü il mart ayında Bakının İdman Nazirlərinin 7-ci Beynəlxalq Konfransına (MINEPS VII) ev sahibliyi edəcəyinə dair məlumat verilib. Bəyanatda Azərbaycanın Qoşulmama Hərəkatının sədrliyi çərçivəsində fəaliyyətindən, verdiyi töhfələrdən bəhs edilib və ölkəmizin UNESCO-nun irqçilik və hər növ ayrı-seçkiliyə qarşı fəaliyyətini təqdir etdiyi diqqətə çatdırılıb.
Azərbaycanın 30 illər ərzində genişmiqyaslı təcavüzə məruz qaldığı xatırladılaraq bildirilib ki, işğal dövründə Azərbaycanın əraziləri tamamilə dağıdılıb, doğma torpaqlarından didərgin düşmüş yüz minlərlə insan öz mədəni hüquqlarından məhrum olublar. Bu illər ərzində Azərbaycan dəfələrlə UNESCO-ya bölgəyə texniki missiya göndərməyinə dair müraciət etsə də, Ermənistanın qeyri-konstruktiv mövqeyinə görə belə missiyaların reallaşması mümkün olmayıb.
Sonda Azərbaycanın 2008-ci ildə əsası qoyulmuş “Bakı Prosesi”nə, digəri isə MINEPS VII konfransına dair İcraiyyə Şurasının 215-ci sessiyasının gündəliyinə 2 qərar layihəsi təklif edildiyi diqqətə çatdırılıb.
“Polat Alemdar" ilk dəfə oğulları ilə FOTOlar paylaşdı
İstər obrazlarla, istərsə də replikalarla dillərə dastan olan və məşhur ekran işlərinin başında gələn "Kurtlar Vadisi" serialında baş rol ifaçılarından biri də Necati Şaşmazdır. O, bu serialdakı obrazı ilə tarixə düşüb desək, yanılmarıq.
“Ədəbiyyat və incəsənət” sfera.az-a istinadən xəbər verir ki, adı "Sarallar" cinayətkar qruplaşması ilə hallanan N. Şaşmaz kameralardan uzaq böyütdüyü uşaqları ilə ilk dəfə foto paylaşıb.
Şəxsi həyatı ilə gündəmə gəlmək istəməyən aktyorun oğulları ilə sosial şəbəkə hesabında paylaşdığı fotolara xeyli bəyənmə və şərh gəlib.
O, paylaşımına "Bu gün Ali Nadirin doğum gününü keçiririk. Yaxşı ki, doğuldun" - qeydini yazıb.
Xatırladaq ki, Necati Şaşmaz 2012-ci ildə Nagehan Kaşıkçı ilə evlənib və bu evlilikdən Ali Nadir və Yusuf Emir adlı oğulları dünyaya gəlib. Cütlük 2019-cu ildə boşanıb.
Ustad şair Ramiz Qusarçaylının şeirləri dərsliyə düşüb
Qubada yaşayıb yaradan ustad şair Ramiz Qusarçaylının yaradıcılığını izləyənlər və sevənlər üçün sevindirici xəbər var.
“Ədəbiyyat və incəsənət” portalı xəbər verir ki, şairin “Azərbaycan bayrağı” şeiri Azərbaycan Respublikası Təhsil nazirinin əmrinə əsasən ali məktəblərin bütün ixtisasları üçün təsdiqlənmiş “Azərbaycan dili və nitq mədəniyyəti” adlı dərslik kitabında, Dövlət İmtahan Mərkəzinin 9-cu siniflər üçün Azərbaycan dili Test kitabında və 8-ci siniflər üçün “Azərbaycan dili” dərslik kitabında dərc edilərək tələbə və şagirdlərə tədris edilir.
Bu ilin 7-ci sinif “Ədəbiyyat” dərslik kitabında isə şairin “Gözün aydın, Qarabağ” adlı şeiri dərc edilərək şagirdlərə tədris edilir.
