Super User
Dezdemonanı boğmaq istəyən tələbə
“Ədəbiyyat və incəsənət” portalı yazıçı-dramaturq Əyyub Qiyasın tanınmış teatr və kino xadimlərinin həyatlarından qələmə aldığı maraqlı anları təqdim edir.
MEHDİ MƏMMƏDOV
(1918-1985)
***
Sovet teatrı Stanislavski məktəbi ilə formaşalmışdı. Yaşama sənəti teatrda aktyorların əsas vəzifəsi, rejissorların tələbi idi. Bir dəfə aşağı kurs aktyorluq fakültəsindən bir tələbə məşq otağında tək olduğumu görüb mənə yaxınlaşdı.
– Mehdi müəllim, axı mən oynadığım rolu yaşaya bilmirəm.
Tələbəyə baxanda, doğrudan da onun həyəcan keçirdiyini gördüm.
– Necə yəni yaşaya bilmirsən? Yəni bunu necə izah edə bilərsən? –xəbər aldım.
– Mehdi müəllim, baxın, biz kurs imtahanı üçün “Otello”dan bir parça hazırlamışıq, Dezdemona ilə Otellonun dəsmal yerini. İndi məlum məsələdir ki, Otello Dezdemonaya qısqanır. Əgər söhbət mənim qısqanmağı yaşamağımdan gedirsə, mən Dezdemonanı boğaram.
Əlimi onun çiyninə qoyub gülümsündüm:
– Əzizim, – dedim, – sən boğmaq yerinə qədər hər şeyi necə lazımdırsa elə də yaşa, ancaq boğmaq yerində, bir az teatral yaşa, gerçəkdən boğma…
İmtahan çox uğurla keçdi, həmin tələbə yüksək qiymət aldı. Amma təəssüf ki, sənətin arxasınca getmədi…
“Ədəbiyyat və incəsənət”
(28.12.2022)
25 yaşında 58 (!!!) fantastik roman qələmə almış Elvin Məmmədov
“Ədəbiyyat və incəsənət” portalına Elvin Məmmədov danışır:
-Adım Elvin Məmmədovdu. 1997-ci ildə Bakı şəhərində dünyaya gəlmişəm. 2004-2013-cü illərdə 299 nömrəli məktəb-liseyini bitirmişəm. 2013-2016-i illərdə Bakı qida sənayə kollecinin turizm fakultəsini qurtarmışam. 2007-ci ilin mart ayının 3-dən etibarən romanlarımı qələmə almağa başlamışam. “Marvel” “DC” və J.R.R Tolkenin “Orta Dünya” böyük kainatları ilə tanış olduqdan sonra böyük kainat yaratmağı qərara aldım. Bu hədəfdə Stel Linin və Jül Verni özümə müəllim sayaraq onların düşüncələri ilə getməyə çalışdım. Romanlarımın əsas dayağı elmi-fantastik janr oldu. Bu janrda romanlar yazmağa və oxumağa başladım. 15 il ərzində 15 paralel kainat və 58 roman qələmə aldım. Hal-hazırda 15 paralel kainatda baş verən hadisələrdən bəhs edən romanımın üzərində işləyirəm. 2017-ci ildə çap edilən “Sonuncu əsrin hekayələri” hekayələr toplusunda və 2019-cu ildə “İki fəsilin hekayəsi” hekayələr toplasında “Tənhalığın tarixində” romanımın birinci bölümü çap edilib. 2020-ci ilin ortalarına qədər bir saytda romanlarımı hissə-hissə paylaşmışam. Maddi çatışmazlıqlar görə kitab çap etdirə bilməmişəm. Amma 2023-ci ilin ortalarında çap ediləcək kitabımla 15 ildə yaratdığım kainatı addım-addım oxucularla tanış etməyi düşünürəm.
(Növbəti buraxılışımızda Elvin Məmmədovun yaradıcılığı ilə sizləri tanış edəcəyik).
“Ədəbiyyat və incəsənət”
(28.12.2022)
Bakıda “Bizim həyət” layihəsi çərçivəsində növbəti həyətin açılışını Leyla Əliyeva edib
Bakıda IDEA İctimai Birliyinin təmirə ehtiyacı olan həyətlərin abadlaşdırılmasına yönəlmiş "Bizim həyət" layihəsi çərçivəsində yenilənən növbəti həyət sakinlərin istifadəsinə verilib.
“Ədəbiyyat və incəsənət” portalı AzərTAC-a istinadən xəbər verir ki, Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva həyətin açılışında, o cümlədən tədbir çərçivəsində keçirilən kütləvi ağacəkmə aksiyasında iştirak edib.
Yeni il bayramı ərəfəsinə təsadüf edən tədbir zamanı abadlaşdırılan həyətin kiçik sakinləri üçün xüsusi bayram şənliyi təşkil olunub, uşaqlara bayram hədiyyələri təqdim edilib. Musiqili əyləncə proqramları ilə zəngin şənlik uşaqlarda xoş bayram əhvali-ruhiyyəsi yaradıb, onlara sevinc dolu anlar bəxş edib.
Yenilənmiş həyət Xətai rayonu, 8 Noyabr prospektində, Cavanşir və Xaliq Əzizzadə küçələrində 8 hektar ərazidə 3 min 145 nəfər sakinin yaşadığı çoxmərtəbəli 10 binanı əhatə edir.
“Bizim həyət” layihəsinin əsas məqsədi paytaxt ərazisində həyətlərin ekoloji cəhətdən təmiz və abad olması, yaşıllıqların bərpası, mənalı istirahət mühitinin formalaşdırılması, sakinlər üçün təhlükəsiz və rahat yaşam şəraitinin yaradılmasıdır.
Abadlaşdırılan növbəti həyətdə sağlamlıq imkanları məhdud insanların rahat hərəkəti nəzərə alınıb, bütün yaş qrupları üzrə uşaqların inkişafı üçün əlverişli şəraitin yaradılması, gənclərin asudə vaxtlarının səmərəli təşkili və onlarda idmanla məşğul olmaq həvəsinin yaradılması məqsədilə ərazidə süni örtüklü 2 mini futbol stadionu, 2 şahmat meydançası, müxtəlif idman qurğuları, uşaq meydançaları salınıb. Eyni zamanda, ərazidə 12 söhbətgah, çoxsaylı oturacaqlar, tullantılar üçün qutular, quş yuvaları və pişik evləri quraşdırılıb.
Sakinlərin istək və maraqları nəzərə alınaraq, həyətdə yeni işıqlandırma dirəkləri, müşahidə kameraları quraşdırılıb, binaların fasad və blokları tam təmir olunub, asfalt və dam örtüyü yenilənib, elektrik sistemi yenidən qurulub.
Həyətin ərazisindəki mövcud yaşıllıqların bərpası ilə yanaşı, 2 min 650 ədəd müxtəlif cinsli ağac və kollar əkilib, 4 min kvadratmetr ərazidə yaşıllıq zolağı salınıb. Bununla yanaşı, həyətin ətraflarında sıx bitən və havanın çirklənməsini səmərəli şəkildə azalda bilən adi daşsarmaşığı və digər sarmaşan bitkilər əkməklə “yaşıl sədlər” yaradılıb.
Sözügedən layihə çərçivəsində ümumi yaşayış sahələrinin həyətlərinin abadlaşdırılmasına dair məlumat və tövsiyələrin IDEA İctimai Birliyinə təqdim edilməsi xahiş olunur.
“Ədəbiyyat və incəsənət”
(28.12.2022)
Heydər Əliyev “Qaya” qrupunun çıxışını istəyib və Cavan Zeynallının bəxti açılıb
“Qaya” qrupunda bir yəhudi var idi. O, 1979-cu ildə ərizə yazdı və getdi. “Qaya”da bir ifaçı olmayanda digərləri oxuya bilmirdilər. Qrup fəaliyyətini dayandırdı. Amma Heydər Əliyev müşavirədə “Qaya” qrupunu soruşmuşdu və Respublika Sarayında oxumalarını istəmişdi. Mənə zəng etdilər ki, gəl, məşq edək. Beləcə, mən 4-cü oldum və “Qaya” bərpa olundu.”
“Cavanlıqda hər gün olmasa da, toylara gedirdim. Mən normal mahnı oxumaq istəyirəm. Amma toydur axı. O qədər mahnılarım var ki, bilmirəm, hansını oxuyum”.
Sitat Baku TV-də yayımlanan “Afaq Hüseynova ilə səmimi söhbət” verilişinin qonağı, Xalq artisti, cazmen Cavan Zeynallıdandır.
“Ədəbiyyat və incəsənət”
(28.12.2022)
“Forbes” haqqında ən çox danışılan müğənnilərin adlarını açıqlayıb
Manş“Forbes" dərgisi bu ilin ən çox müzakirə edilən müğənnilərin adlarını açıqlayıb.
“Ədəbiyyat və incəsənət” list.ru-ya istinadən xəbər verir ki, ilk sırada gözlənilmədən mərhum sənətçi Maykl Cekson yer alıb. İlk yeddiliyin sıralaması isə belədir:
1. Maykl Cekson.
2. Britni Spirs
3. Beyons
4. Eminem
5. Meray Kerri
6. Elvis Presli
7. Castin Biber
“Ədəbiyyat və incəsənət”
(28.12.2022)
Günün fotosu: Amerika qar fırtınalarının əsirliyində
Günün fotosu: Amerika qar fırtınalarının əsirliyində
Təbii fəlakətin mərkəzinə çevrilən Nyu-York ştatında qurbanların sayı 28-ə yüksəlib.
ABŞ-ın şimal-şərqində soyuq temperaturla müşayiət olunan qar fırtınaları davam edir. Son günlərdə baş verən ekstremal hava şəraiti elektrik enerjisinin kəsilməsinə, nəqliyyatın çökməsinə və ölkə daxilində ən azı 57 ölümə səbəb olub.
Foto: Euronews
“Ədəbiyyat və incəsənət”
(28.12.2022)
Kitabxanaçılıq sahəsində beynəlxalq əməkdaşlıq
Birləşmiş Ərəb Əmirliyinin Dubay Şəhər Kitabxana Fondunun sədri Məhəmməd Əhməd Almur Azərbaycan Milli Kitabxanasında olub. Bu barədə Milli Kitabxana məlumat yayıb.
“Ədəbiyyat və incəsənət” portalı sözügedən məlumata istinadən xəbər verir ki, kitabxananın direktoru Kərim Tahirov qonağı kitabxanada görməkdən şad olduğunu bildirib, ona kitabxana haqqında ümumi məlumat verib. O, Milli Kitabxananın fondu, oxucuların sayı, kitabxanada həyata keçirilən avtomatlaşdırma prosesləri, pandemiya dönəmində Milli Kitabxananın onlayn xidmətlərindən, eləcə də beynəlxalq layihələr haqqında danışıb. K.Tahirov kitabxananın beynəlxalq əlaqələrindən bəhs edərək söyləyib ki, Azərbaycan Milli Kitabxanası dünyanın 60-dan artıq kitabxanası ilə əməkdaşlıq edir. Direktor danışıq zamanı gələcəkdə iki ölkənin kitabxanaları arasında qarşılıqlı anlaşma memorandumunun imzalanmasını təklif edib.
Söhbət zamanı Məhəmməd Əhməd Almur da Milli Kitabxanada olmasından məmnunluğunu ifadə edərək, Azərbaycan Milli Kitabxanası ilə gələcəkdə beynəlxalq kitab mübadiləsi işini həyata keçirməyi planlaşdırdığını qeyd edib. Qonaq kitabxanada həyata keçirilən avtomatlaşdırma proseslərini və onlayn xidmətləri yüksək qiymətləndirib.
Görüşün sonunda Kərim Tahirov qonağa “Azərbaycan Milli Kitabxanası” fotoalbomunu, Milli Kitabxananın ərəb dilində nəşr etdiyi Mir Cəlal Paşayevin “Ədəbiyyatda romantizm”, “Yevgeniy Bertelsin “Böyük Azərbaycan şairi Nizami”, “Elçin Əhmədovun Şuşa – Azərbaycanın tarixi və strateji əhəmiyyətli mədəniyyət paytaxtı”, “Karabakh by the roads of victory” kitablarını və Azərbaycanın xəritəsini hədiyyə edib.
Sonda qonaq Milli Kitabxana ilə yaxından tanış olub. Kitabxananın “Heydər Əliyev guşəsi”, “Beynəlxalq əməkdaşlıq zalı”, “Uşaq bölməsi”, “Nadir kitablar və kitabxana muzeyi”, “Not nəşrləri və səsyazmaları” şöbələri ilə tanış olub. Not nəşrləri və səsyazmaları şöbəsində xüsusilə elektron musiqi bazasının yaranmasını, fondda mühafizə olunan qramplastinkaların yeni avadanlıqlar vasitəsilə DVD disklərə köçürülməsini və eləcə də 70-80-ci illərdə çap edilən not məcmuələrinin Milli Kitabxana tərəfindən yenidən nəşr olunmasını xüsusi qiymətləndirib.
“Ədəbiyyat və incəsənət”
(28.12.2022)
Henri Ford: «Mənim həyatım, mənim nailiyyətlərim» - Uğur yolunu göstərən ən yaxşı kitablar
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir
Uğur üçün lazım olan keyfiyyətlər arasında biz bol informasiya almağın, mütaliənin necə vacib olmasını da sadalamışdıq. Statistik hesablamalara görə hər bir uğurlu insanın il ərzində orta hesabla 19 kitab oxuduğunu da sizin diqqətinizə çatdırmışdım.
Əksər reytinq sıralamalarında yer alan «bizneçdə və peşəkar fəaliyyətdə uğur qazanmaq» mövzusunda ən populyar motivasiya bestsellerləri arasından sizinçün seçdiyim 10-luqdakı kitablara bir-bir şərh verəcəyəm.
Henri Ford. «Mənim həyatım, mənim nailiyyətlərim»
Bu kitab az qala bütün dünyanı dolaşıb. Bir çox dillərə tərcümə olunub, çoxmilyonlu tirajlarla çıxsa da kitab mağazalarının rəflərindən dərhal qeyb olub.
Kitaba bu cür öldürücü maraq heç də uğurlu reklam hay-küyündən doğmayıb, onun məzmununun doğrudan da faydalı olmasından şərtlənib. Burada dünya biznes tarixinə möhürünü vurmuş əfsanəvi şəxsin, avtomobillər kralı Henri Fordun həyatı, yaradıcılığı, milyardlar gətirən biznesinin praktik yolu göstərilir.
Henri Ford kitabında biznesin idarə edilməsi işinə öz baxışını, ideyalarını, menecment teoriyasını, ümumən iqtisadiyyat barədə bilgilərini bölüşür.
Maraqlısı budur ki, XX əsrin əvvəllərinə aid olan biznesin «Ford nəzəriyyəsi» yüz il keçməsinə baxmayaraq hələ də çox aktualdır, bu gün dünyada minlərlə kompaniya Fordun ideyaları əsasında fəaliyyət göstərməkdədir.
Henri Ford dillər əzbəri olan aforizmlərin də müəllifidir. Onlardan bəziləri mənim şüurumda əbədi həkk olunub.
- Əgər mən insanlardan onların nə istədiklərini soruşsaydım, onlar belə cavab verərdilər: «daha sürətli olan atı!»
- İnsan o vaxt ölür ki, dəyişilməsi dayanır. Dəfn isə sadəcə formallıqdır.
- Uğursuzluqlar qorxu, rahatlıqaxtarma, məsuliyyətsizliklər səbəbindən baş verir. Qorxunu dəf etmək özünəinam yaradır!
- Əgər sən odunu öz təşəbbüsünlə doğrasan, onda bu odun səni iki dəfə qızdıracaq.
- Ən yaxşı dost bizə qəlbimizdəki ən yaxşı cəhətləri üzə çıxarmağa kömək eləyəndir.
- Keyfiyyət – hətta heç kim baxmadıqda belə nəyisə düzgün etməkdir.
- Pullu olmaq vacibdir, amma unutmayın ki, pulun məqsədi onu kefə-damağa sərf etmək deyil, onun faydalı xidmət üçün artırılmasıdır. Mənimçün həyatda kef-damaq qədər iyrənc şey yoxdur. Bizim heç birimizin ixtiyarı yoxdur ki, həyatını buna sərf etsin. Sivilizasiyada tüfeylilərə yer yoxdur.
- Əgər sizdə entuziazm varsa, siz hər şeyə nail ola biləcəksiniz. Entuziazm sizin gözlərinizin parıltısı, addımlarınızın qətiyyəti, ideyalarınızı həyata keçirməkçün bol enerji axınıdır. Entuziazm – bütün tərəqqinin istinad nöqtəsidir. Yalnız onunla uğur mümkündür. Onsuz, sizin sadəcə, imkanlarınız var.
“Ədəbiyyat və incəsənət”
(28.12.2022)
Azərbaycandan 3649 çeşiddə məhsul ixrac olunub
Cari ilin yanvar-noyabr aylarında Azərbaycandan 3649 çeşiddə məhsul ixrac edilib. Bu barədə Dövlət Gömrük Komitəsi məlumat yayıb.
Qeyd edək ki, on bir ayda Azərbaycanda ixrac əməliyyatlarının dəyəri 36 milyard 335,5 milyon ABŞ dolları olub.
“Ədəbiyyat və incəsənət”
(28.12.2022)
“Mən indi qızım və kürəkənimlə yaşayıram, Allaha şükür, acından ölmürəm…”
Bəzən jurnalist müsahibindən söz ala bilmir. Necə edəsən ki, müsahibin danışsın? “Ədəbiyyat və incəsənət” portalı tanınmış tənqidçi Əsəd Cahangirlə “Ustad dərsləri” rubrikasına başlayır. Burada Əsəd Cahangirin müxtəlif illərdə götürdüyü ən maraqlı müsahibələr tarixi ardıcıllıqla təqdim olunacaq.
“YENİDƏN DOĞULSAM,
YENƏ DƏ AKTYOR OLARDIM”
Rejissor Həsən Seyidbəylinin 1969-cu ildə ekranlara çıxan “Bizim Cəbiş müəllim” filmində belə bir kadr var: Makedon həyətdən tutduğu siçanı hamının gözü qarşısında neft töküb yandırır. Onun bu hərəkətini görən Namiq Makedonun üzünə bir sillə vurur. Hamı onların indicə dalaşacağını gözləyir. Bu vaxt hardansa peyda olan Cəbiş müəllim uşaqları bir-birindən aralayıb, Makedona üz tutur və deyir: “Əgər bir vaxt başa düşsən ki, səni nə üstündə vurdular, onda, bəlkə, səndən adam oldu.” Rus qızı Tanyanı qəfil öpsə də, siçanı yandırsa da, həyətdəki tualetin qapısını bağlayıb, qonşu kişini içəridə qoysa da, Makedon filmin sonunda doğrudan da adam olur –cəbhəyə yola düşür. Və onun adam olmasına Cəbiş müəllimin sözləri də təsir edir. Bu sadə, iddiasız, lakin xeyirxah, vətənpərvər müəllimin obrazını Azərbaycan kinosu və teatrının ustad aktyoru Süleyman Ələsgərov yaratmış, bu rola görə o, Ümumittifaq kinofestivalında “Ən yaxşı kişi rolunun ifaçısı” nominasıyası üzrə qalib olmuşdu.
Qarşıdan görkəmli aktyorumuzun anadan olmasının 85 illik yubileyi gəlir. Bu münasibətlə, Süleyman müəllimlə görüşüb, söhbət etmək qərarına gəldik.
-Süleyman müəllim, qarşıdan 85 illik yubileyiniz gəlir. Nə kimi hazırlıq işləri görürsünüz?
-Heç bir hazırlıq işləri getmir. 80 illik yubileyimi harda qeyd etdilər ki, 85 illiyimi də qeyd etsinlər. 75 illiyim teatrda olmişdu. Odur ki, 80 illiyimin televiziyaya çəkilməsini istəyirdim. Mənə dedilər ki, Polad Bülbüloğluya müraciət etməlisən. Amma mənim belə xasiyyətim yoxdur. Kiməsə ağız açmaqdan xoşum gəlmir.
-Bu xasiyyətiniz bir aktyor kimi irəliləyişinizə mane olubmu?
-Yox. Mən bir teatr aktyoru kimi xoşbəxtəm. Teatrda 250 də çox rolum olub – Montanelle, Əzizbəyov, Səməd Vurğun, Hacı Qəmbər... Hansını deyim? Amma kinoda bəxtim gətirmədi.
-Bəxtiniz gətirməyib? Axı, siz “Bizim Cəbiş müəllim” filmində Cəbiş kimi unudulmaz kino obrazı yaratmısınız.
-Cəbiş mənim kinoda yarada biləcəyim obrazlardan ancaq biridir. İndiyədək 17 filmə çəkilmişəm. bunlardan ikisi baş roldu, beşi birinci dərəcəli, yerdə qalanları epizodik rollardır.
-“Bizim Cəbiş müəllim”ə dəvət almağınız necə oldu?
-Quruluşçu rejissor Həsən Seyidbəyli məni filmə sınaq çəkilişlərinə dəvət edəndə getmək istəmirdim. Çünki dəfələrlə məni baş rola sınaq çəkilişlərinə dəvət etmiş, sonra rolu başqalarına vermişdilər. Həsən Seyidbəyli məni sınaq çəkilişlərinə razı sala bildi. Sınaqdan keçdim. Eşitdim sınaqdan o qədər uğurlu keçmişəm ki, daha başqasını dəvət etməyəcəklər.
-Çəkiliş meydanı maraqlı hadisələr, gözlənilməzliklərlə dolu bir aləmdir. Filmin çəkilişi prosesindən yadınızda nələr qalıb?
-Film böyük sürətlə, yeddi aya çəkildi. Həsən Seyidbəyli həssas və alicənab insan idi. O heç vaxt adam arasında aktyoru pərt eləməzdi. Həsən müəllimin səyi nəticəsində çəkilişlər çox uğurlu keçdi, nəticə yaxşı alındı. Film Ümumittifaq kino festivalında nümayiş etdirildi və mən “Ən yaxşı kişi rolunun ifaçısı” kimi mükafata layiq görüldüm.
-Bu filmdə görkəmli aktrisamız Şəfiqə xanım Məmmədova sizin arvadınızı oynayır. O bir yöndaş kimi yadınızda necə qalıb?
-Çox sadə, mehriban, gözəl insandır Şəfiqə xanım. Yeddi ay kinoya çəkildik, bir dəfə də olsun mən ondan bir gül qədər incimədim. Bir dəfə küçədə rastlaşdıq, gördüm ki salam verməyib keçdi. Çox qəribə gəldi mənə. Zarafat etdim ki, mənə niyə salam vermirsiniz. Axı, mən sizin həyat yoldaşınızam. Dedi ki, bağışla, görməmişəm. Sən demə, gözlərini müalicə etdirirmiş, mənim də xəbərim yox. Dediyimə də peşman oldum.
-Sənətdə qazandığınız uğurlara görə özünüzü kimə borclu hesab edirsiniz?
-Bizim ailədə incəsənət adamı olmayıb. Mənim sənətə gəlməyimə dolayısıyla Əlağa Ağayev səbəb olub. Bir dəfə o mənə dedi ki, gəl, teatr dərnəyinə gedək. O vaxt teatra çox həvəsli idim. Ona görə bu təklif mənim üçün göydəndüşmə oldu. Getdim teatr dərnəyinə. Teatr briqadası ilə üç il ərzində bütün respublikanı gəzdik. 1936-cı ildən Gənc tamaşaçılar Teatrında işləyirəm. Bu il artıq 62 ildir ki, bu teatrın səhnəsindəyəm.
-Sənət idealınız kim olub?
-O vaxtkı gənclərin hamısının idealı Abbasmirzə Şərifzadə idi. Bir dəfə gördüm küçə ilə gedir, düşdüm dalınca. Gördü onu izləyirəm, dedi ki, nə istəyirsən? Dedim, sizə baxmaq istəyirəm. Bir an sükut etdi, sonra gülümsəyib dedi: “Baxdın?” Dedim, hə. Dedi “sağ ol” və dönüb getdi. Bu mənim üçün çox böyük sevinc idi.
-Aktyor olmağınıza peşman deyilsiniz ki?
-Yox, yenidən doğulsam, yenə bu sənəti seçərəm. Mənə teatrın direktorluğu vəzifəsini təklif ediblər, razı olmamışam. Şıxəli Qurbanov bir dəfə məsləhət gördü ki, gəl, səni göndərək partiya məktəbinə. Oxu, qurtar, sonra rayonlardan birində katib işlə. Səhnənin xatirinə bütün bunlardan imtina etdim. Mən aktyor olmaq naminə Tibb İnstitutunu yarımçıq qoymuşam.
-Bütün bunların müqabilində sizin adınız fərdi təqaüd alanların siyahısına düşməyib.
-Mən indi qızım və kürəkənimlə yaşayıram. Allaha şükür, acından ölmürəm. Amma belə olmasaydı, görəsən nə etməliydim?
-Övladlarınız sənət yolunuzu davam etdirirmi?
-İki qızım var. Kiçik qızım Sevil mənim sənətimi davam etdirmək istədi. Razı olmadım. Bu sənətin yolu çox daşlı-kəsəklidir.
-Sənətinizi davam etdirən gəncləri özünüzə mənəvi varis hesab edirsinizmi?
-Niyə etməyim ki? Əlbəttə, edirəm. Mən öz qrim stolumu gənc və istedadlı aktyor Elşən Rüstəmova vermişəm. ondan çox razıyam. Bacarıqlı və tərbiyəli oğlandır. Böyüyün-kiçiyin yerini bilir. Teatrımızın belə cavanlara ehtiyacı böyükdür.
-Səhnədə olduğunuz 62 il ərzində 250-dən çox rol oynamısınız. Ürəyinizdə qalan rol varmı?
-Oynadığım bütün rollar ürəyimdədir.
-Tәsәvvür edin ki, seһrli xalçaya minib başqa planetә gedirsiniz. Sizә özünüzlə yalnız bir şey götürmәyә icazә verirlәr. Nәyi seçәrdiniz?
-Cəbiş müəllimin eynəyini...
-Maraqlı seçimdir. Elə nə üçün?
-Başqa planetdə də hər şeyə Cəbiş müəllimin dürüstlük, saflıq, məsumiyyət eynəyindən baxmaq istəyirəm.
07.04.1998
“Ədəbiyyat və incəsənət”
(28.12.2022)
