Super User
İlham Hüseynovun eyvandan atılma təhlükəsi
“Ədəbiyyat və incəsənət” portalı yazıçı-dramaturq Əyyub Qiyasın tanınmış teatr və kino xadimlərinin həyatlarından qələmə aldığı maraqlı anları təqdim edir. Növbəti təqdim edilən İlham Hüseynovdur.
İLHAM HÜSEYNOV
(1967)
***
Serial çəkilişlərinin birində möhkəm soyuqlamışdım, bir gün ofisə gələndə ssenari müəllifini eyvanda oturub tək işlədiyini gördüm. Dedim:
– Yaxşı ki, təksən, dur belimi qır, sümüklərim quruyub.
Müəllif ayağa qalxanda, nədənsə onu dilxor gördüm. Məndən yapışıb sümüklərimi “qırmağa” başladı.
– Nə olub, niyə dilxorsan? – xəbər aldım.
– Dilxor yox ey, eləyəm ki, özümü az qala eyvandan atmaq istəyirəm.
Halımı pozmadan:
– Problem yoxdur, – dedim, – amma əvvəlcə məni yerə qoy, sonra at. Mənim axşam çəkilişim var, yoxsa Rövşən aləmi qatar bir-birinə.
Adam məni yerə qoyub üzümə baxdı, ikimiz də o ki var güldük.
“Ədəbiyyat və incəsənət”
(16.03.2023)
Arif Buzovnalı ilə görüş keçiriləcək
Martın 25-də tanınmış şair-qəzəlxan Arif Bizovnalı ilə görüş keçiriləcək.
“Ədəbiyyat və incəsənət” portalı z
xəbər verir ki, görüşün təşkilatçısı Mərdəkan Mədəniyyət Sarayıdır.
Elə adıçəkilən ünvanda düzənlənəcək görüş saat 15-də başlayacaq.
Qeyd edək ki, Mərdəkan Mədəniyyət Sarayı Sergey Yesenin küçəsi, 2 ünvanında yerləşir.
Əlavə məlumatları bu nömrələrə zəng vurmaqla almaq olar:
+99412 4543325, 4547482.
Giriş sərbəst olacaq.
Arif Buzovnalı
"Bəhri təvil"
Mənim, ey ruhi-rəvanım, bu qərib
cismdə canım, sənə tək gəldi
gümanım, nola bir yanıma
gəlsən, nola bir halımı bilsən,
nola bir dərdimi bölsən, neçə
müddətdi qalıb tək, çəkirəm hicr
cəfasın, gəzirəm bəndə vəfasın,
budu gerçək ki mənə yoxdu
verən hay, eləyib aləmə rüsvay
məni bu naləvü ahım, nədir, ey
dost, günahım? Sən əzəldən
mənə biganə deyilsən, nə də
əfsanə deyilsən, sənə yad gözlə
nəzər salmamışam mən, səni hər
xoş sözə qurban eləyən
olmamışam mən, sən şəm
görürkən məni pərvanəyə
döndün, məstanə görürkən məni
peymanəyə döndün, sən dərdimi
çəkdin, gecələr göz yaşı tökdün,
səni mən hər dəfə atəşlərə atdım,
səni odlarda yaşatdım, qəmə
batdımsa batırdım səni əvvəl,
səni verdim qabağa çıxdı əgər
qarşıma əngəl, hara dər üstünə
getdimsə, dedim gəl, Həq-Təala
səni verdi mənə azad eləməkçün
məni məndən, məni mənsiz
görüb ayrılma bu biçarə
bədəndən, eləyim son dəfə son
xahişi səndən, keçəcək bir neçə
müddət, görünüb xeyli əlamət,
düşəcək nuri-imamət, necə nur,
nurünəlanur, gəlməmişdən adı
məşhur, elə bir zat, elə bir əhli-
müəllat, elə bir natiqi-Quran, elə
bir sahibi ürfan, elə bir
vaqifüləsrar, sanasan Heydəri-
Kərrar özü qoydu qədəmin
mülki-cahana, adı Mehdi ki
həmin "mim"-ə Məhəmməddi
nişanə, gözə bax Şahi-Şəhidan
üzünün xətti üzündə, bir ədalətli,
ləyaqətli səxavətli hünərmənd ki
kəmalinə, cəmalinə nə kim var
olacaq bənd, çəkərək zalimə
şəmşir, yazacaqdır "zəbər"-ü
"zir", yetəcək vəsli-cəhimə hamı
kafir, yetişərsən o zamanda ona,
ey can, əyərək baş qabağında
onun əlan, yetirərsən ona ərzim
ki edib Arifi-nalan məni qurban
sənə çoxdan, qəbul et töhfəsin,
ey Höccəti-Yəzdan!
“Ədəbiyyat və incəsənət”
(16.03.2023)
“Çökən müəssisədən vaxtında çıxmağa çalışın!” - Uorren Baffetdən 13 Uğur qazanmaq qaydası
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir. Bu dəfəki mövzumuz böyük uğrlar sərgiləmiş Uorren Baffetin uğur qazanmaq qaydalarıdır. Qaydalar 13-dür. Hər buraxılışımızda sizlərə 1 yeni qayda verərək əvvəlkiləri də təkrarən saxlayırıq ki, biliyiniz daha təkmil və mükəmməl olsun.
Beləliklə 11-ci qayda.
Çökən müəssisədən vaxtında çıxmağa çalışın!
«Gəncliyimdə mən bir dəfə qaçış yarışlarına pul qoymuşdum, uduzdum, pulumu qaytarmaqçün yenə qoydum, yenə uduzdum. Bundan sonra mən fikrimi toplamağı bacardım. Sonralar mənə yalnız ziyan gətirən biznesdən dərhal çıxmağa başladım».
Əvvəlki qaydalar bunlar idi:
Unutmayın – həmişə özünə investisiya qoymaq lazımdır!
«Hər gün öz xarakterinzin zəif cəhətləri üzərində çalışın, onları daha yaxşı edin, öz qabiliyyət və bacarıqlarınızı inkişaf etdirin. Özünə investisiya qoymaq həmişə universitetlərə təhsil haqqı ödəmək anlamında deyil. Mənim iki diplomum var, amma mən onları çərçivəyə salıb divardan asmıram. Mən hətta bilmirəm ki, onları hara qoymuşam».
«Yox!» deməyi öyrənin
«Siz «yox» deməyi öyrənməsəniz, heç vaxt öz zamanınızı tam olaraq idarə edə, ona nəzarət edə bilməyəcəksiniz».
Heç vaxt başqalarına qulaq asmayın
«Çalışın, başqalarının düşüncəsinə əsaslanan qərar qəbul etməyəsiniz. Karyeramın əvvəlində mənə yalnız uğursuzluq vəd edirdilər. Hətta mən investorlardan 100 min dollar toplamağı bacaranda da həmin şəxslərin fikirləri dəyişməmişdi. Təsəvvür edin, 10 ildən sonra bu pullar mənə 100 milyon dollar gətirəndə onların sifətlərinin ifadələri nə cür oldu.
Özünüzə yalnız öz daxili şkalanız ilə qiymət verin!»
Cəld və məhsuldar hərəkət edin
«Qərarı çox uzadıb çox düşünməyin. Həmişə çalışın, hər şeyin məğzini cəld, zamanında anlayasınız. Sonradan başa düşəcəksiniz ki, bu, pul qazanmağın yeganə vasitəsidir».
Çalışın, öz gəlirlərinizi təkrar investisiyaya qoyasınız
«Öz ilk biznesinizlə qazandığınız pulu çalışın xərcləməyəsiniz, işin inkişafına qoyasınız. Haçansa mən dostumla bərbərxanada oyun avtomatı quraşdırıb bir qədər pul qazanmışdım. Amma bu pulu digər yeniyetmələr kimi xərcləmədik, dövriyyəyə buraxdıq. Nəticədə, 26 yaşda artıq mənim 1,4 milyon dollarım var idi».
Hər şey barədə əvvəlcədən razılaşın
«İstənilən işi başlayanda dərhal maliyyə məsələsində razılaşın. Bunu etməsəniz, böyük ehtimalla siz aldadılacaqsınız. Bu dərsi mən yeniyetməlik vaxtımda əxz eləmişəm. Necəsə, mənim babam məndən və dostumdan mağazasını təmizləməyi xahiş etmişdi. Biz 5 saat ərzində süpürgələrlə işlədik, yeşikləri daşıdıq. İş qurtaranda babam bizim ikimizə cəmi 90 sent ödədi. Həmin anda şəraitin ədalətsizliyindən mən çox sarsılmışdım».
Ən xırda şeylərə belə diqqət edin və onlardan öz maraqlarınız üçün istifadə eləyin
«Həmişə xırda şeylərə diqqət etsəniz yaxşıca qənaət etmiş olacaqsınız. Bir yaxşı nümunə gətirim: Mənim bir tanışım evinin küçə divarlarını rəngləmək qərarına gəlmişdi, o bunu çox ağılla etdi. 4 divarın hamısını yox, yalnız əsas küçəyə baxan divarı rənglədi».
Öz pullarınızdan düzgün istifadə edin
«Birinci yarımqayda: heç vaxt pulunuzu itirməyin. İkinci yarımqayda: heç vaxt birinci qaydanı unutmayın.
Foreks bazarında ticarətlə məşğulsunuzsa həmişə məntiqsiz risklərdən qaçın. Ticarətlə necəgəldi məşğul olmayın. Həmişə pula qənaət metodundan yararlanın ki, nəticədə kapitalınız qorunsun və artsın».
Öz vəsaitinizlə yaşayın!
«Çalışın, heç vaxit borca pul göitürməyin. Götürsəniz, heç cür inkişaf edə bilməyəcək, bütün həyatınızı yoxsulluq içində keçirəcəksiniz. Cəld borclarınızı qaytarın və dövriyyəyə buraxmaq üçün azacıq kapital toplayın».
Qətiyyətli olun!
«Qətiyyətsizliklə siz heç nəyə nail ola bilməyəcəksiniz. 1984-cü ildə mən bir kompaniya almışdım. Bu kompaniyada bir qadından – kompaniyanın qurucusundan çox xoşum gəlirdi. İş onda idi ki, böyük maliyyəsi olmayan və olduqca qətiyyətli olan bu xanım yalnız qətiyyəti hesabına mebel satışı ilə məşğul olan böyük bir mağazalar şəbəkəsi aça bilmişdi».
12-ci qayda “Həmişə hər şeyin perspektivinə diqqət edin” olacaq.
“Ədəbiyyat və incəsənət”
(16.03.2023)
Bakı Dövlət Sirkinin “DZİVA”sı davam edir
Xəbər verdiyimiz kimi, Bakı Dövlət Sirkində yaz mövsümü martın 3-də “DZİVA” adlı şou proqramla açılıb. Və şounun təşkilatçısı olan Monte Karloda keçirilən beynəlxalq sirk festivalının laureatı Allahverdi İsrafilov şouya olduqca maraqlı beynəlxalq heyət qatıb.
Proqramda Monte Karlo festivalının iştirakçıları, eləcə də “Cirque du Soleil”in səhnəsini fəth etmiş müxtəlif ölkələrin peşəkar sirk artistləri çıxış edirlər. Parisdə sirk festivalında bürünc medal qazanmış jonqlyor Pavel Rujilo, kloun sənətinin tanınmış simaları – Oleq fon Suvoroff və Andrey Jiqalovun duetləri, tədbirin süjet xəttinin əsasını təşkil edən təlimçi Rostislav Qavrilovun şir və pələnglərinin unikal çıxışları proqramın bənzərsiz nömrələrdir.
Hava gimnastları qrupunun qeyri-adi fəndləri, təşkilatçı Allahverdi İsrafilovun məhz bu proqram üçün hazırladığı “Inna&Darya” duet nömrəsi də şouya xüsusi rəng qatır. Bakı Dövlət Sirkinin artisti Günay Nuriyevanın “Kauçuk qız” nömrəsi də xüsusi maraqla qarşılanır.
“Ədəbiyyat və incənət” portalı xəbər verir ki, azyaşlı tamaşaçılara ünvanlanan şou hər buraxılışında anşlaq yaradır. Yaz tətilində isə, necə deyərlər, iynə atsan yerə düşməyəcəyi şəksizdir.
Əməkdaşımız balacaların fikrini də alıb. Şübhəsiz, hamısı şoudan razı qalıblar. Uşaqların ekspress sorğusu ayrıca dərc ediləcək.
Qeyd edək ki, Bakı Dövlət Sirkində yaz proqramı aprel ayının 30-dək həftənin şənbə və bazar günləri tamaşaçıların ixtiyarında olacaq.
“Ədəbiyyat və incəsənət”
(16.03.2023)
Aysel və Nəfəs: iki bir-birinə zidd davranış
“Ədəbiyyat və incəsənət” portalının əməkdaşı Könül iki xanım müğənnimizin iki fərqli hadisəyə iki fərqli reaksiyasına münasibət bildirir. Və hamımızı düşünməyə vadar edir.
Son günlər "ON" albomu ilə yenidən gündəmdə olan "Avroviziya" təmsilçimiz Aysel MTV-də yayımlanan "Səhərin səsi" proqramında maraqlı bir açıqlama verdi,
küçə itlərinə görə 13 min manat kredit götürdüyünü bildirdi.
“Çoxdan olub. Küçə itlərinə yem almaq üçün 13 min manat kredit götürmüşdüm. 2012-ci ildə itləri küçədən yığıb belə bir şey etmişdim. Yazığımız gələn itləri yığırdıq. Mən və dostlarım indiyədək bu işlə məşğuluq, amma indi itlər daha azdır, çünki çoxunun artıq ailəsi, sığınacağı var. 25-30 iti ödənişlə saxlatdırırdım. Uşaqlıqdan bu mövzuda kövrəyəm. Bağlanmaqdan qorxduğum üçün özüm saxlamıram. Həm də baxmağa vaxtım yoxdur. Avtomobilimdə isə heyvan yeməyi həmişə var, görəndə düşüb yedirdirəm".
İndi isə keçək müğənni Nəfəsə. O, "Maqazin plyus" verilişində bir müddət əvvəl 250 min manata sahibləndiyi bağ evindən danışaraq qürrələnib.
"Sponsorunuz kimdir?" sualına Nəfəsin cavabı belə olub:
"İstərdim ki sponsorumun kimliyinin adını çəkim, deyim. Bizim aləmdə sponsor deyəndə çox pis baxırlar. Əgər dırnaqarası "sponsor" deyilirsə, sponsorum yoxdur".
"O bağ evini mənə heç kim almayıb. Özüm almışam. Çox istərdim ki, deyim ki, o bağ evini mənə həyat yoldaşım alıb. İnanın, o qədər buna ehtiyacım var. Mən də bir xanımam, bir bəy tərəfindən qürurlanmaq istəyirəm. Bir bəyi ortalığa çıxarıb, bu da mənim "aşım"dır demək istəyirəm. Amma yoxdur".
Baxın, biri itləri yemləmək üçün kredit götürür, digəri isə nazirlərə məxsus dəbdəbəsi ilə öyünür.
Heç bir şey.
“Ədəbiyyat və incəsənət”
(16.03.2023)
O başqa havadır, başqa miqyasdır, başqa yoldur…
Şair, ictimai xadim, türkçü Əkbər Qoşalının üzümüzə gələn ay 50 yaşı tamam olur. Dünya Gənc Türk Yazarlar Birliyinin başqanı İntiqam Yaşar bu münasibətlə yazdığı “İşıq seli” adlı yazısını “Ədəbiyyat və incəsənət” portalına təqdim edib.
Əkbər Qoşalı... Haqqımda ilk dəfə o yazıb. 10 ildən çox vaxt keçib üzərindən o yazının.
İlk kitabım çap olunurdu. Tələbə idim, demək olar ki, ədəbi sferadan çox az adamla şəxsi tanışlığım vardı. Kitabımın ön sözünü yazdı. Təkcə, haqqımda ilk dəfə yazmayıb, mənim üçün çox ilklərə işıq salıb.
İnsan yaşa dolduqca ömründə yer almış kəslərin önəmini daha çox dərk edir, daha çox düşünür bu barədə. Əkbər Qoşalı ilə münasibətin yaşı və yeri olmur. Onunla hər salamının, hər sağ olunun yaşantısı olur.
Mən elə bu yazının əvvəlindən etiraf edirəm ki, onun haqqında düşüncələrimi heç bir yazıda tam ifadə edə bilmərəm. Əkbər Qoşalı bütün yazıların fövqündədir.
10 ildən bir az çox olan bu zaman ölçüsünü həm çox, həm də az hesab etmək olar. Amma mən daxilən onunla olan münasibətimizin yaşını real ölçüdən çox-çox artıq hesab edirəm. Əkbər Qoşalı başqa havadır, başqa miqyasdır, başqa yoldur. Daxilində hansı zənginlikdə MƏN olmalıdır ki, bütün bu başqaları bir nöqtədə bütövləşdirə biləsən?!
Onu tanıdığım gündən elə bir doğmalıq, elə bir böyük qardaşlıq hiss etmişəm ki, bu əziz münasibətin başqa rəngini, başqa formasını təsəvvür belə edə bilməmişəm.
İnsan oğlu bütün üst dəyərlərə hansı mərtəbəyəcən sevgisini daşıya bilərsə, Əkbər Qoşalı o nöqtəni ruhundakı işıq seli ilə fəth edib. İnsanlıq sevgisi, millət sevgisi, ədəbiyyat sevgisi...bütün sevgilərin səhifələri Qoşadan TƏK çıxmış bu insanda elə gözəl toplanıb ki... Onu tanıyan, bilən insanlar hər ünsiyyətdə bir az da durulur.
Hansı əzablar, hansı əziyyətlər onunla addımlayıb onu bir özü bilir, bir də özü kimi bildiyi az sayda dostları. Əkbər Qoşalı bu yolda nə xərcləyibsə, nə veribsə, ürəyindən verib...Kaş, ürəyi həmişə var olsun.
Onun ən böyük amallarından biri də Azərbaycana dost qazandırmaqdır. Ədəbiyyatla, mədəniyyətlə, dəyərlərlə qazanılan dostlar əbədi olduğu üçün o gecəsini gündüzünə qatıb bu yolda.
Sərhədlərimizdən kənarda yaşayan o qədər ürəkdə Azərbaycan sevgisi var ki, onun sayəsində.
1998-ci ildə Dünya Gənc Türk Yazarlar Birliyini yaratmaq, o zamanlarda bu gün günəş kimi parlayan işığı görmək, ona doğru can atmaq da başqa bir sevgi idi. Bu təşkilatın sıralarında yer alan işıqlı insanlar, ədəbiyyatın, mədəniyyətin carçıları oldular. Türk dünyası ilə ədəbi bağların möhkəmlənməsində ürək qoydular. O ədəbi körpüdən keçib Azərbaycana gələn insanlar əbədi körpülər oldular. Azərbaycanı sevdilər, can Azərbaycan dedilər. Əkbər bəyin sözü olsun-
"Onların yanında Azərbaycan əleyhinə bir kəlmə də danışa bilməzlər".
Əkbər bəy könlündəki Təbriz, Tanrı dağları, Turan eşqinə qanad açıb 50 yaşa vardı. Yaşı qutlu olsun. Varlığından aldığımız gücə növbəti 50 ilinin başlanğıcında tükənməzlik arzu etməklə onu və onu özü bilənləri təbrik edirəm.
“Ədəbiyyat və incəsənət”
(16.03.2023)
Anar prezidentə təşəkkür edib
Anar Prezident İlham Əliyevə təşəkkür edib: “Əməyimi qiymətləndirib”
Xalq yazıçısı Anar Prezident İlham Əliyevə 1-ci dərəcəli “Əmək” ordeni ilə təltif edilməsinə görə təşəkkür edib.
“Ədəbiyyat və incəsənət” portalı xəbər verir ki, Anar Teleqraf.com-a açıqlamasında bu sözləri deyib:
“Cənab Prezident İlham Əliyevə təşəkkür edirəm. Çox sağ olsun, əməyimi qiymətləndirib”.
Qeyd edək ki, yazıçı Anarın 85 yaşı tamam olub.
“Ədəbiyyat və incəsənət”
(16.03.2023)
Anar Ələkbərov: “Bizim üçün böyük imkandır ki, belə gözəl və möhtəşəm sərgini Heydər Əliyev Mərkəzində təşkil edə bilmişik”
KRAL AİLƏSİNDƏN OLAN RƏSSAM
Heydər Əliyev Mərkəzi ölkə mədəniyyətinin nüvəsi olmaqda qalır və burada bəhreynli rəssam Raşid Al Xəlifənin “İlk qığılcım” (First light) adlı sərgisinin açılışı da fikirlərimizin bir sübutudur.
“Ədəbiyyat və incəsənət” portalı xəbər verir ki, sərgidə Raşid Al Xəlifənin ən son instalyasiyaları nümayiş etdirilir. Müəllifin “Balıq tələsi”, “Mozaika”, “Biz canlı olan hər şeyi sudan yaratdıq”, “Dairəvi əks-etmə” kimi əsərləri ilk dəfə Heydər Əliyev Mərkəzində təqdim edilir. Bu, həm də rəssamın Azərbaycandakı ilk sərgisidir.
ANAR ƏLƏKBƏROV
Heydər Əliyev Mərkəzinin direktoru Anar Ələkbərov bu sərginin paytaxtımızda təşkilinin əhəmiyyətini qeyd edib: “Bizim üçün böyük imkandır ki, belə gözəl və möhtəşəm sərgini Heydər Əliyev Mərkəzində təşkil edə bilmişik. Biz gələcəkdə Bəhreyndə gənc heykəltəraş və rəssamlarımızın birgə mübadilə sərgilərinin təşkilinə çalışacağıq. Düşünürəm ki, bizim gənc heykəltaraş və rəssamlarımız da bundan bəhrələnəcək”.
FƏQAN NOVRUZOV
Heydər Əliyev Mərkəzinin direktorunun birinci müavini Fərqan Novruzov çıxış edərək diqqətə çatdırıb ki, Mərkəz hər zaman dünya mədəniyyəti nümunələrinin təbliği istiqamətində fəaliyyət göstərir: “Bu gün müasir incəsənət nümunələrinin parlaq nümayəndələrindən olan Bəhreyn Kral ailəsinin üzvü , Bəhreyn Milli İncəsənət Şurasının sədri, İncəsənət Cəmiyyətinin ilk prezidenti və fəxri prezidenti Şeyx Raşid Al Xəlifənin sərgisinin Heydər Əliyev Mərkəzində təşkil olunması mühüm bir hadisədir. Ümid edirik ki, sərgidən zövq alacaqsınız və xoş təəssüratla ayrılacaqsınız”.
FƏRHAD XƏLİLOV
Azərbaycan Rəssamlar İttifaqının sədri, Xalq rəssamı Fərhad Xəlilov belə bir sərgini ziyarət etməyin onun üçün xoş olduğunu bildirib: "Dünyada ayrı-ayrı rəssamlarla görüşmək və onların yaradıcılıq dünyaları ilə tanış olmaq imkanları mənə nəsib olub. Ərəb mədəniyyəti və elminin dünyada özünəməxsus yeri var. Bu sərgi qeyri-adiliyi ilə fərqlənir. Sərgi bir rəssam kimi mənim üçün ən yüksək hisləri keçirdiyim sərgidir. Belə bir gözəl sərginin təşkilində əməyi keçən hər kəsə, xüsusən Heydər Əliyev Mərkəzinə təşəkkür edirəm".
STEFAN STOYANOV
Sərginin kuratoru Stefan Stoyanov çıxış edərək ən böyük arzusunun bu gün gerçəkləşdiyini dilə gətirib: “Mən Nəsimi İncəsənət Festivalı zamanı Bakıda olmuşdum. Həmin vaxt bu möhtəşəm Heydər Əliyev Mərkəzində də olmuşduq və bina mənə çox böyük təəssürat bağışlamışdı. Heydər Əliyev Mərkəzi yeni əsrin ən gözəl memarlıq nümunəsidir. Mənim üçün artıq arzusunda olduğum anın-Raşid Al Xəlifənin sərgisinin bu binada təşkil edilməsi xoşbəxtlik hissi yaradır”.
YASMİN ŞARABİ
Sərginin digər kuratoru Yasmin Şarabi çıxış edərək bildirib ki, sərgidə rəssamın olduqca maraqlı əsərləri var: "Ziyarətçilər burada qeyri-adi parametriyanı görmüş olacaqlar. Həmçinin Bəhreynin özünəməxsus memarlıq hissələrini tərənnüm edən əsərləri və ilahi naxışları özündə daşıyan həndəsi elementləri görə biləcəklər. Şeyx Raşid Al Xəlifə qədimliklə müasirliyi özündə ehtiva edən əsərləri ortaya qoyur. Əsərlər gələcəyə doğru nəzər salır, lakin keçmişi yaddan çıxarmır".
ŞEYX RAŞİD AL XƏLİFƏ
Şeyx Raşid Al Xəlifə hər kəsi salamlayıb və belə gözəl binada fərdi sərgisinin təşkilindən məmnun olduğunu qeyd edib: "Mən Bəhreynlə Azərbaycan arasında incəsənət sahəsində mübadilə proqramının daha da genişləndirilməsini arzu edərdim. Mənim sərgimi qəbul etdiyinə görə Heydər Əliyev Fonduna və onun rəhbərliyinə təşəkkür edirəm".
Qeyd edək ki, Raşid Al Xəlifə əsərlərini onu əhatə edən təbiətdən ilhamlanaraq yaradır. Rəssamın incəsənət nümunələri digərlərindən ənənəvi və müasir memarlığın ətraf mühitlə vəhdəti ilə fərqlənir.
“Ədəbiyyat və incəsənət” portalı xəbər verir ki, 1952-ci ildə Bəhreyn kral ailəsində anadan olan Raşid Al Xəlifə Böyük Britaniyanın Hastinqs Kollecində incəsənət və dizayn üzrə təhsil alıb. Karyerasına peyzaj rəngkarlığı ilə başlayan rəssamın həyatında və ətrafındakı dəyişikliklər seçdiyi sahəyə də təsir edib. Ötən əsrin 80-ci illərində Raşid Al Xəlifənin yaradıcılığında efemer incəsənət nümunələrinə daha çox rast gəlinirdisə, 90-cı illərdəki əsərlərində abstrakt formalar, digər materiallarla, xüsusən də onun yaradıcılığına xas olan “qabarıq kətan”la eksperimentlər üstünlük təşkil edir. 2000-ci illərdə isə alüminium rəssamın yaradıcılığının mərkəzinə çevrilir.
Raşid Al Xəlifə müxtəlif beynəlxalq sərgilər, incəsənət yarmarkaları və biennalelərin iştirakçısıdır. Hazırda o, Bəhreyn İncəsənət Şurasının sədridir. Təsis etdiyi RAK Art Foundation isə həm də gənc rəssamlara dəstək göstərir.
Heydər Əliyev Mərkəzindəki sərgi sentyabrın 10-dək davam edəcək.
Kral ailəsinsən olan istedadlı rəssamın yatatdıqlarına siz də tamaşa edin.
“Ədəbiyyat və incəsənət”
(15.03.2023)
Rafiq Əzimovun qaşı necə zədələndi…
“Yeddi oğul istərəm” filmindəki Şahsuvar obrazını bir yada salıbın. Onun irili-xırdalı onlarca rolu olub, di gəl, yaddaşlara bu rolla həkk olunub. 85 illiyinin nailiyyət baqajında da əsas yük Şahsuvarındır.
Ötən gün Cəfər Cabbarlı adına Azərbaycan Dövlət Teatr Muzeyində Xalq artisti, teatr və kino aktyoru Rafiq Əzimovun anadan olmasının 85 illiyi qeyd edilib.
“Ədəbiyyat və incəsənət” portalı xəbər verir ki, Rafiq Əzimov 6 fevral 1938-ci ildə Bakıda anadan olub. 10 sentyabr 1962-ci ildə Azərbaycan Akademik Milli Dram Teatrının truppasına qəbul olunub. O, dövrdən fasiləsiz olaraq bu teatrın səhnəsində çalışır.
Azərbaycan Dövlət Televiziyasında hazırlanan "Dibdat bəy" (Dibdat bəy), "Göz həkimi" (İvanov), "Ordan-burdan" (İsmayıl) teletamaşalarında oynayıb. Eləcə də çoxsaylı film və tamaşalarda rol alıb.
Prezident təqaüdçüsüdür.
2013-cü ildə rejissor Sənan Sultanovun quruluşunda Azərbaycan Televiziyasında Rafiq Əzimovun həyat və yaradıcılığına həsr olunmuş "Sənət sevgisi" filmi çəkilib.
İndi də qayıdaq yubiley tədbirinə. Tədbiri giriş sözü ilə muzeyin direktoru Əməkdar mədəniyyət işçisi Sevinc Mikayılova açaraq, sənətkarı yubileyi münasibətilə təbrik edib, onun yaradıcılığı haqqında danışıb.
Xalq artistləri Hacı İsmayılov, Şeyx Əbdül Mahmudbəyov, Əli Nurzadə, kinoşünas, Əməkdar incəsənət xadimi Aydın Kazımzadə, Əməkdar artistlər Mətanət Atakişiyeva, Elşən Rüstəmov, Elxan Quliyev, Anar Heybətov, mədəniyyət yazarı Vasif Ayan çıxış edərək yubilyarla bağlı öz xatirələrini bölüşüb və onun kino və teatr mədəniyyətinin inkişafındakı xidmətlərindən söz açıblar.
Tədbir çərçivəsində Teatr Muzeyinin fondunda qorunan və aktyorun yaradıcılığını əks etdirən eksponatlardan hazırlanmış videoçarx, həmçinin oynadığı tamaşa və filmlərdən kadrlar nümayiş olunub.
Tədbir çərçivəsində Azərbaycan Dövlət Akademik Opera və Balet Teatrının solistləri konsert proqramı ilə çıxış ediblər.
Sonra Rafiq Əzimovun yubileyi münasibətilə çəkilmiş portret rəssam Vüsal Tərlanoğlu tərəfindən ona hədiyyə olunub.
Tədbirdə incəsənət xadimləri, aktyorun ailə və sənət dostları, muzey əməkdaşları və media nümayəndələri iştirak ediblər.
Yubilyar hamıya minnətdarlıq bildirib. 85 - ömrün çox ahıl və çox məsuliyyətli dövrüdür. Həm də hesabat dövrüdür.
Necə ki, Rafiq Əzimov öz hesabatını verdi.
Elə bu yerdə Rafiq Əzimovun Şahsuvar obrazını yaratması ilə bağlı xatirəsinə də nəzər yetirək. Ömründə at minməyən, buna baxmayaraq çəkilişdən əvvəl at çapmağı öyrənməklə filmdə peşəkarlıq nümayiş etdirən Rafiq Əzimov qeyd edir ki, Cıdır meydançasında ay yarım məşq edərək at üzərində dayanmağı, ümumiyyətlə atı idarə etməyi öyrəniblər: “Məşq prosesindən sonra Tofiq Tağızadə bizə göstəriş verdi ki, həmin atlar ilə Cıdır meydançasından kinostudiyaya gedək. Yeddimiz də atın belində şəhərin mərkəzi küçələri ilə gəlib kinostudiyanın həyətində cərgə ilə dayandıq. Sən demə, rejissor istəyirmiş təyin etsin, görsün ki, necə görünürük.
Şahsuvar obrazının ilk çəkilişi kinostudiyanın pavilyonunda oldu. Mən səməni ilə kadra daxil oluram. Deyirəm ki, ”kənddə bir gəlin verdi”. İndi təsəvvür edin ki, filmin çəkilişinə az qalıb, səməni qoymağı unudublar. Heç kimə bir söz demədən çıxdım həyətə, həyətdə ot var idi, yeri qazıb xeyli ot çıxartdım. Torpağını yuyub, qayçıladım, qəşəng bir səməni düzəldib, qoydum boşqaba. Beləcə səməni yerinə otla çəkilişə qatıldım”
Maraqlı məqamlardan biri də o olub ki, Bəxtiyarın Humayı döydüyü səhnənin çəkilişi zamanı at belində kənarda dayanıb səhnəni izləyən Şahsuvar-Rafiq Əzimov dözməyərək deyib ki, Tofiq müəllim, axı bu kişilikdən deyil ki, bir kişi günahsız qızı döyür, biz də durub baxırıq. Tofiq Tağızadə aktyorun nə təklif etdiyini soruşduqda, o, heç olmasa birimizdə bir qeyrət olsun , Bəxtiyara deyək ki, `Axı ayıbdır, niyə belə edirsən?` O, mənə qayıtdı ki, “motor” deyəndə sən Bəxtiyarı saxla. Beləliklə, çəkliş başlayanda atın üstündə çapıram və gəlib Bəxtiyara yaxınlaşıram, öz atımdan düşürəm, onun atının cilovun saxlayıram. Özümdən söz əlavə etdim: “Bəxtiyar, Bəxtiyar nə edirsən”. Bu dəmdə Bəxtiyarın atının cilovunu dartanda atın dişi qaşımın ortasına dəydi, zədələndi. Çəkiliş vaxtı belə hallar çox olduğu üçün artıq öyrənmişik”.
“Ədəbiyyat və incəsənət”
(15.03.2023)
Günay Əfəndiyeva Litvada tatar və karaim icmaları ilə görüşlər keçirib
Beynəlxalq Türk Mədəniyyəti və İrsi Fondunun prezidenti Günay Əfəndiyeva Litvaya səfəri çərçivəsində Trakai şəhərini ziyarət edib və orada əsrlər boyu yaşayan Litva karaimlərinin nümayəndələri ilə görüşüb.
Fonddan verilən məlumata görə, görüşdə karaimlərin tarixi və mədəni irsinin tanıdılması yönündə Fond tərəfindən Litva Respublikası ilə əməkdaşlıq çərçivəsində ölkə rəsmilərinin və icmanın təmsilçilərinin iştirakları ilə təşkil olunan silsilə tədbirlərdən bəhs edilib. Fondun prezidenti Litva karaimlərinin tanınmış nümayəndəsi, diplomat, tərcüməçi Halina Kobeckaiteyə türk xalqlarının bir-birinə daha da yaxınlaşmasında göstərdiyi xüsusi xidmətlərə görə təşkilatın təsis etdiyi “Dədə Qorqud” mükafatını təqdim edib.
Eyni zamanda Günay Əfəndiyeva Azərbaycanın Litvadakı səfirliyində tatar icmasının nümayəndələri ilə təşkil olunmuş görüşdə iştirak edib.
Görüşdə Litva tatarlarının dili, dini, folkloru, adət-ənənələrinə dair geniş fikir mübadilələri aparılıb, milli musiqiləri, mahnıları, mətbəx nümunələri nümayiş etdirilib.
Həmçinin, səfirlikdə çoxəsrlik türk xalqlarının milli-mənəvi dəyərlərini əks etdirən, qədim tarixə malik Novruz bayram süfrəsi açılıb, milli şirniyyatlar təqdim olunub.
Fondun prezidenti Şuşa şəhərinin 2023-cü il Türk dünyasının Mədəniyyət Paytaxtı elan olunmasını nəzərə alaraq, Azərbaycanın Litvadakı səfiri Tamerlan Qarayevə Fondun Şuşanın simvollarını əks etdirən xatirə hədiyyəsini təqdim edib.
Görüşlərdə Litvanın Azərbaycandakı səfiri Egidius Navikas iştirak edib.
“Ədəbiyyat və incəsənət”
(15.03.2023)
