Super User
Filarmoniyada Azərbaycan Dövlət Xalq Çalğı Alətləri Orkestrinin konserti olacaq
Sabah Mədəniyyət Nazirliyinin dəstəyi ilə Müslüm Maqomayev adına Azərbaycan Dövlət Akademik Filarmoniyasında Azərbaycan Dövlət Xalq Çalğı Alətləri Orkestrinin konserti təşkil olunacaq.
Solistləri dirijor Mustafa Aşurovun rəhbərliyi altında Azərbaycan Dövlət Xalq Çalğı Alətləri Orkestri müşayiət edəcək. Konsertdə Xalq artisti Gülyanaq Məmmədova, Əməkdar artistlər Almaz Orucova, Zakir Əliyev, ifaçılar Vəfa Vəzirova, Rəvan Qaçayev, Zabitə Əliyeva, Nurlana Abdullayeva, Samir Piriyev və Taleh Yəhyayev çıxış edəcəklər.
Biletləri iTicket.az saytı və şəhərin kassalarından əldə etmək mümkündür.
“Ədəbiyyat və incəsənət”
(03.04.2023)
Söhbət “sosiskadan” getmir, “vnimaniyadan” gedir…
“Ədəbiyyat və incəsənət” portalı yazıçı Cavid Zeynallının SSRİ-nin siyasi elitasında yer alan Mixail Suslov barədə qeydlərini təqdim edir.
SSRİ-nin məşhur kitab seriyası olan ЖЗЛ (Жизнь Замечательных Людей) - "Görkəmli adamların həyatı" seriyası haqqında yazı oxuyurdum. Boz kardinal Suslovun adı keçirdi. Sonra onun haqqında olan xatirələrin bəzilərinə göz gəzdirdim.
Deyirdilər ki, Suslov SSRİ-nin ən hiyləgər siyasətçisi idi. Rəhbərlərlə dil tapıb yerini yaxşı salmağı heç kim onun qədər yaxşı bacarmırdı. Təsəvvür edin, Stalin onunla məsləhətləşirmiş. Xruşov üçün əvəzolunmaz kadr olub. Brejnevin isə sağ əli idi. Hətta Brejnevin kürəkəni Çurbanov deyirmiş ki, qayınatam ondan çəkinirdi. Hərçənd, buna inanmıram, amma Çurbanov onu da deyirmiş ki, Brejnev ona Mixail Andreyeviç deyə mürəciət edirmiş. Suslov isə Baş katibi sadəcə Leonid çağırırmış.
Bu şəxs Saratovda kasıb ailədə anadan olmuşdu. Atası uzun illər Bakıda - neft mədənlərində işləmişdi. Demək, Suslovun formalaşmasında Bakı mühiti də rol oynayıb.
İçki məclislərini sevməzmiş, oturmağa məcbur olanda onun qədəhinə adi su süzülərmiş. Brejnevlə ova getmirmiş. Brejnev ovdan qayıdanda deyirmiş ki, Suslov bizim hamımızdan çox işləyir, onun ov payını artıq edin.
Hədiyyə qəbul etməyib. Ən yaxşı halda kitab alıb. O da müəllifin imzası ilə. Şəxsi mülkü olmayıb. Partiyanın ayırdığı mənzildə yaşayıb. Mebellərin arxasında da möhür və bu cümlə: "Sov.İKP MK-nın işlər idarəsi”.
Kreml yeməkxanasında onun üçün sosiska və kartof püresi saxlanılırmış. İnanırmış ki, kommunizm olacaq. Sadə geyinirmiş. Bir dəfə Brejnev iclasda məsələ qaldırıb ki, hörmətli büro üzvləri, gəlin köməkləşib Mixail Suslova təzə palto alaq.
Xruşovun devrilməsinin ideya müəllifi olub. Məşhur cümləsi var: İdeologiyaya qənaət etmək olmaz.
35 il Mərkəzi Komitənin katibi işləyib. Hamıya "siz" deyə müraciət edib. O cümlədən, sürücüsünə də. Sürəti 60-dan yuxarı qaldırmağa icazə verməzmiş. Hamı ilə məsafəli davrandığına görə, heç kim onu yaxından tanımayıb.
1982-ci ildə, 79 yaşında vəfat edib. Qızıl Meydanda dəfn olunub. Yalan-doğru, ölümündən sonra məlum olub ki, maaşının çox hissəsini Sülh Fonduna köçürürmüş.
Yəqin ki, bu deyilənlərdə bir az da şişirtmə var. Bəlkə də, heç yoxdur.
“Ədəbiyyat və incəsənət”
(03.04.2023)
Teatr forumunun onlayn qeydiyyatı da bu gün bitir
Mədəniyyət Nazirliyi və Heydər Əliyev Mərkəzinin təşkilatçılığı ilə Ümummilli lider Heydər Əliyevin 100 illik yubiley tədbirləri çərçivəsində 10-11 aprel 2023-cü il tarixlərində “Azərbaycan teatrı – 150: İnkişaf Perspektivləri” mövzusunda Teatr forumu keçiriləcək. Forum Heydər Əliyev Mərkəzində baş tutacaq.
“Ədəbiyyat və incəsənət” portalı xəbər verir ki, Forumda iştirak üçün nazirliyin rəsmi internet resursu olan “culture.gov.az” saytında yerləşdirilən onlayn forma üzrə qeydiyyatdan keçmək mümkündür. Onlayn qeydiyyat bu gün bitəcək.
Tədbirdə iştirakla bağlı təsdiq e-poçt vasitəsilə gəlir.
“Ədəbiyyat və incəsənət”
(03.04.2023)
Mədəniyyət Nazirliyi və Heydər Əliyev Mərkəzinin kino forumunda iştirakçün onlayn qeydiyyat bu gün bitir
Mədəniyyət Nazirliyi və Heydər Əliyev Mərkəzinin təşkilatçılığı ilə Ümummilli lider Heydər Əliyevin 100 illik yubiley tədbirləri çərçivəsində 20-21 aprel 2023-cü il tarixlərində “Azərbaycan Kinosu - 125: Reallıq, Çağırışlar və Hədəflər” mövzusuna həsr olunmuş kino forumu keçirilməsi ilə bağlı sizlərə xəbər çatdırmışdıq. Forum Heydər Əliyev Mərkəzində baş tutacaq.
“Ədəbiyyat və incəsənət” portalı xəbər verir ki, forumda iştirak üçün nazirliyin rəsmi internet resursu olan “culture.gov.az” saytında yerləşdirilən onlayn forma üzrə qeydiyyatdan keçmək mümkündür və onlayn qeydiyyat bu gün başa çatır. Tədbirdə iştirakla bağlı təsdiq e-poçt vasitəsilə bildirilir.
“Ədəbiyyat və incəsənət”
(03.04.2023)
Milli Dram Teatrında aprelin 6-dan 9-dək 4 gün dalbadal tamaşalar göstəriləcək
Azərbaycan Dövlət Akademik Milli Dram Teatrı aprel ayında klassik əsərlər əsasında səhnələşdirilmiş maraqlı tamaşalarla çıxış edəcək.
Sənət ocağı aprelin 6-dan 9-dək - dalbadal 4 gün tamaşaçılarını sevindirəcək.
6 aprel-“Manqurt”
7 aprel-“Filumena Marturano”
8 aprel- “Cəhənnəm sakinləri”
9 aprel-“Ölülər”
Növbəti günlərdə isə bu tamaşalar nümayiş olunacaq:
14 aprel - “Dəli yığıncağı”
15 aprel -“Qətibə İnanc”
16 aprel -“Ah, bu uzun sevda yolu”
21 aprel -“Xurşidbanu Natəvan”
22 aprel -“Zorən şorgöz”
23 aprel -“Mənim günahım”
28 aprel -“Şah Qacar”
29 aprel -“Qürbətdən gələn məktublar”
30 aprel -“Xanuma”
Şəkildə: “Manqurt” tamaşası nümayiş olunur.
“Ədəbiyyat və incəsənət”
(03.04.2023)
Xalq artisti Könül Xasıyevanın yaradıcılıq gecəsi keçiriləcək
Bu gün Beynəlxalq Muğam Mərkəzində Xalq artisti Könül Xasıyevanın yaradıcılıq gecəsi keçiriləcək.
Konsert proqramında xanəndənin ifasında muğamlarımızla yanaşı, xalq mahnılarımız da səslənəcək. Gecədə həmçinin xanəndənin sənət yoldaşlarının da çıxışları nəzərdə tutulur.
“Ədəbiyyat və incəsənət”
(03.04.2023)
Azərbaycanda Avropa Bədii Sənətlər Günləri başa çatdı
İllərdir ki, Avropada mədəniyyət sahəsində ən böyük hadisə Avropa Bədii Sənətlər Günlərin (Journées Européennes des Métiers d’Art, JEMA/EACD) hesab edilir. Artıq 16-cı dəfə keçirilən tədbir bu il 20 Avropa ölkəsində martın 28-dən keçirilməyə başladı və bu gün - aprelin 3-də yekunlaşır.
“Ədəbiyyat və incəsənət” portalı xəbər verir ki, 2002-ci ildə Fransada biennale formatında təsis edilən, özündə sərgilər, konfranslar və digər tədbirləri ehtiva edən bu forum 2011-ci ildən başlayaraq hər il keçirilir. Artıq 2012-ci ildə EACD təşəbbüsündə 20-yə yaxın ölkə iştirak edib. Sevindirici odur ki, Avropa xalqılarının ən zəngin mədəni sənətkarlıq nümunələrini yaşadıb təbliğ edən bu tədbirlərdə bu il ilk dəfədir ki, Azərbaycan da iştirak edir.
Və ölkəmizdə Avropa Bədii Sənətlər Günlərinin ilk tədbiri xalça sərgisindən ibarət olub. Sərginin təşkilindən məqsəd incəsənətin və Azərbaycanın zəngin mədəni irsinin, qədim xalq ənənələrinin tərkib hissəsi olan xalçaçılıq sənətinin təbliği olub ki, Avropada bu sənətə maraq hədsizdir.
Daimi sərgilər məkanında - “NUR Art House” qalereyasında Avropa İttifaqı, “World Crafts Council Europe” və “The Creative Europe Programme” təşkilatlarının dəstəyi ilə “Arts Council Azerbaijan” istehsalat birliyi ilə birgə təşkil olunmuş xalça sərgisinin açılış mərasimində çıxış edən “Arts Council Azerbaijan”ın rəhbəri Dadaş Məmmədov qeyd edib ki, Avropa Bədii Sənətlər Günləri baharda təşkil edilən Avropa Bədii Sənətlər Günləri iştirakçılara xalq sənətinin ecazkar dünyasını kəşf etmək, ustalarla görüşlər keçirmək, təlim mərkəzlərində onların peşəkar təcrübəsindən faydalanmaq, seminarlara və digər tədbirlərə qatılmaq imkanı verir.
Avropa İttifaqının Azərbaycandakı səfiri Peter Mixalko öz çıxışında sərginin təşkilinə görə Dadaş Məmmədova və “NUR Art House” qalereyasının direktoru Röya Tağıyevaya təşəkkürünü bildirib.
“NUR Art House” qalereyasının direktoru, Əməkdar mədəniyyət işçisi, sənətşünaslıq doktoru, professor Röya Tağıyeva çıxış edərək bildirib ki, günümüzdə incəsənət aləminə və xalq yaradıcılığının sirlərinə bələd olmaq üçün təkcə muzeyləri ziyarət etmək yetərli deyil. Qalereyada ilboyu təsviri incəsənətə, dizayna, fotoqrafiyaya və əlbəttə xalçalara həsr olunmuş çoxlu tədbirlər təşkil olunduğu vurğulayan natiq deyib ki, bizim üçün birgə parlaq emosiyalar yaşamaq, ən başlıcası – yaradıcı ideyaları həyatda təcəssüm etdirən insanlarla tanış olmaq üçün gözəl imkan yaranıb.
Sərginin ekspozisiyalarında istər qədim, istərsə də müasir xalçaçılıq nümunələri təqdim edilir. Tədbir çərçivəsində xalçaçılıq sənəti üzrə ustad dərsləri də təşkil olunacaq.
Sərgi dünən - aprelin 2-də bağlanıb.
“Ədəbiyyat və incəsənət”
(03.04.2023)
İnsanlar işbazların əsarətində
MİLLƏT VƏKİLİ RÜFƏT QULİYEV ƏHALİNİN ƏRZAQ TƏHLÜKƏSİZLİYİNƏ DİQQƏT YÖNƏLDİR
Müəyyən sahələrdə qeyri-peşəkarların meydan sulamasına adət etmişik. Keyfiyyətsiz, necə deyərlər, “geydirmə” olan pal-paltar, ayaqqabı, məişət texnikasını da istismar etməkdən çəkinmirik. Amma ərzaq sahəsində keyfiyyətsizlərə, geydirmələrə meydan vermək olmaz. Çünki əks təqdirdə sağlamlığımıza və həyatımıza ciddi təhlükə yaranar. Və çox yaxşıdır ki, ölkəmizdə Qida Təhlükəsizliyi Agentliyi fəaliyyət göstərməkdədir və o, ərzaqla manipulyasiya edənlərə qarşı amansızdır. Agentlik bir neçə gün öncə Gəncədə aptekdə çaytikanı adı altında günəbaxan yağının satıldığını aşkarlayaraq cəmiyyəti xəbərdar etmişdir.
“AQTA-nın məlum addımını qətiyyətlə alqışlayır və dəstəkləyirəm". Bu sözləri “Ədəbiyyat və incəsənət” portalına millət vəkili Rüfət Quliyev Gəncədə aptekdə çaytikanı adı altında günəbaxan yağının satıldığının aşkarlanmasından danışarkən deyib. O vurğulayıb ki, AQTA-nın monitorinq siyasətini bəyənir: “Tək apteklər yox, bütün ticarət şəbəkələrində bu formada yoxlamalar həyata keçirilməlidir. Həm vaxtı keçmiş, həm də tərkibi müvafiq qaydalara uyğun olmayan saxta məhsulların istehsalçıları, satıcıları ilə mübarizə aparmaq lazımdır. Hüquq mühafizə orqanları da məsələyə müdaxilə etməlidir. Saxta qidaların satışını reallaşdıran istehsalçılar insanların həyatını təhlükə altında qoyurlar. Bu, böyük problemdir".
Millət vəkili portalımız vasitəsilə istehlakçılara da müraciət edib:
"Alıcılar istər aptek, istərsə də ticarət şəbəkələrində saxta qida məhsullarını gördükdə hüquq mühafizə orqanları, AQTA, İqtisadiyyat Nazirliyinin qaynar xəttinə zəng edib, xəbər verməlidirlər. Biganə qalmaq olmaz. Bu gün istehlakçılar analoji məhsulu görüb, almırlarsa, o demək deyil ki, sabah heç bir tanış, qohum, qonşuları həmin qidadan zəhərlənməyəcək. Xahiş edirəm ki, bütün alıcılar çox diqqətli olsunlar. İctimai nəzarət də buna deyirlər".
Gəlin elə bu yerdə oxucularımıza bildirək ki, insan orqanizmi üçün müstəsna əhəmiyyət kəsb edən orqanik bitki yağlarını yalnız tanınmış və sınanmış firmaların məhsulları arasından seçmək vacibdir. Bu sırada “Herba flora”, “Azərsun”, “Ataşah” kimi brendlər əsas yer alır.
Şəkildə: AQTA-nın aşkarladığı saxta yağlar, habelə “Ataşah” brendinə məxsus müxtəlif çeşidli keyfiyyətli yağlar.
“Ədəbiyyat və incəsənət”
(03.04.2023)
Dünya Gənc Türk Yazarlar Birliyi yeni kitab ərsəyə gətirib
Dünya Gənc Türk Yazarlar Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi "Cəbhədən cəmiyyətə - Müharibə iştirakçısı yazarlarla səngər yoldaşlarının görüşləri” adlı layihə çərçivəsində 44 günlük Vətən müharibəsi iştirakçısı olan yazarların müxtəlif janr və məzmunlu yaradıcılıq örnəklərindən ibarət yeni kitab nəşr olunub.
Bu barədə “Ədəbiyyat və incəsənət” portalına layihə rəhbəri, Dünya Gənc Türk Yazarlar Birliyinin başqanı İntiqam Yaşar məlumat verib. Kitabın redaktoru yazıçı-publisist Kənan Hacı, eksperti şair-publisist Milli Məclisin Mədəniyyət komitəsinin eksperti Əkbər Qoşalı, tərtibçiləri DGTYB üzvləri Həsən Kür və Ayşən Rəhim, dizayneri isə Əli Zeynalovdur. Onu da qeyd edək ki, adıçəkilən kitabın Sumqayıt şəhərində, Samux rayonunda, Mingəçevir şəhərində və Gədəbəy rayonunda 44 günlük Vətən müharibəsi iştirakçılarının, gənclərin və ictimaiyyət nümayəndələrinin iştirakı ilə geniş təqdimat törənləri təşkil olunacaq.
“Ədəbiyyat və incəsənət”
(03.04.2023)
VI “Animafilm” Beynəlxalq Animasiya Festivalına filmlərin qəbulu davam edir
Azərbaycan Animasiya Assosiasiyasının təşkilatçılığı ilə sentyabrın 6-dan 10-dək VI “Animafilm” Beynəlxalq Animasiya Festivalı keçiriləcək.
Festivalın təşkilat komitəsinin açıqlamasına görə, animasiya filmləri FilmFreeway platforması vasitəsilə qəbul edilir. Müraciətlər üçün ən son tarix iyulun 1-dir.
Əsərlər yerli və beynəlxalq kateqoriyalar üzrə qəbul olunur.
Qaliblər üçün aşağıda qeyd edilən mükafatlar nəzərdə tutulur:
• Yerli müsabiqənin “Ən yaxşı Azərbaycan qısametrajlı animasiya filmi” kateqoriyası üzrə mükafatı – 500 ABŞ dolları və 2024-cü ildə Annecy Beynəlxalq Animasiya Film Festivalına (Fransa) səyahət.
• Beynəlxalq müsabiqənin “Ən yaxşı qısametrajlı animasiya filmi - GRAND PRIX” kateqoriyası üzrə mükafatı – 1000 ABŞ dolları.
• Beynəlxalq müsabiqənin “Uşaqlar üçün ən yaxşı qısametrajlı animasiya filmi” kateqoriyası üzrə mükafatı – 500 ABŞ dolları.
• Tamaşaçı rəğbəti mükafatı.
• Tərəfdaşların xüsusi mükafatları.
Müsabiqənin şərtlərinə əsasən, filmlər 2020-ci il yanvarın 1-dən sonra çəkilmiş olmalıdır. Filmin
50 faizindən çoxu animasiya olmalıdır. Filmdə istifadə edilən animasiya texnikalarına məhdudiyyət qoyulmur. İştirakçı (rejissor, prodüser və ya digər səlahiyyətli şəxs) film üzərində hüququ olmasını və onun festivalda nümayişinə səlahiyyətli olduğunu bəyan etməlidir.
“Animafilm” Azərbaycanın ilk və tək animasiya festivalıdır. 2018-ci ildən başlayaraq təşkil olunan festival uşaq və gəncləri, animasiya rejissorlarını və studiyaları bir araya gətirərək onları beynəlxalq təcrübə ilə tanış edir, peşəkar yerli və xarici animasiya ustaları ilə görüşdürür, yüzlərlə animasiya filmləri nümayiş etdirir, ustad dərsləri, konfranslar, konsertlər, tamaşalar və sərgilər keçirir.
“Ədəbiyyat və incəsənət”
(03.04.2023)
