Super User
Kasıblara yardım günü , “Titanik”, Maleviç
Kənan Məmmədli, “Ədəbiyyat və incəsənət”
Bu günə olan əsas əlamətdar hadisələri diqqətinizə çatdırırıq:
19 dekabr.
Ümumdünya kasıblara yardım günü
Statistikaya görə, 20-ci əsrin sonlarında planet əhalisinin dörddə biri – milyard yarım insan yoxsulluq, dilənçilik həddində olub. Yoxsulluğun ləğvi barədə proqramların genişmiqyaslı icrasına isə BMT 10 il əvvəl başlayıb. Yoxsulluq deyiləndə bura təkcə boş ciblər, boş qazanlar aid edilmir, işsizlik, mənzilsizlik, yaxşı təhsilə və müalicəyə imkanın olmaması da özündə yoxsulluğu ehtiva edir.
Azərbaycanda rəsmi statistikaya görə yoxsul adam demək olar ki yoxdur, hamı yağ-bal içində yaşayır. Təsadüfən, kiminsə beləsi rastına çıxsa, Allahın və BMT-nin xatirinə, lütfən bu gün ona yardım etsin.
Həmişəyaşıl bitkilər günü
Həmişəyaşıl bitkilər günüdürsə, nəzərə almalıyıq ki, ölkəmizdə həmişəyaşıl şam və küknar ağacları yetəri qədərdir. Yarpaq tökməyən sitrus bitkiləri də çoxdur. Xüsusən, subtropik cənub zonamız həmişəyaşıl bitkilər üçün vətəndir. Talış dağlarının qoynundakı Hirkan meşələri sözügedən bitkilərin ən unikallarını öz qoynunda bəsləməkdədir. Üstəlik, Azərbaycanda çox nadir Eldar şamı da yetişməkdədir. Odur ki, bu bayram bizlərə xüsusən düşərlidir.
Bakıda tez-tez ağacəkmə kampaniyası keçirilir, ən müxtəlif əlamətdar hadisələrə həsr edilən bu aksiyalarda minlərlə həmişəyaşıl ağac əkilir. Bu gün də bir aksiya keçirmək, düşünürəm ki, yerində olardı.
Brejnev və “Titanik”
BMT bu günə daha bir bayram düzənləyib – Təminat günü. Bu günün məğzi odur ki, insan yaranışından bəri özünü bütün zəruri şeylərlə vaxtında təmin etməlidir. Qida, mənzil, istilik, tibbi ləvazimatlar, nəqliyyat və sair bu qəbildəndir. Burada informasiya təminatı da başlıca rol oynayır. Amerikalılarda isə başlıca məsələ ilin hər bir günündə mətbəx bayramlarına sevinməkdir, bu gün Milli şüşə konfet günüdür, üstəlik, Milli yulaf keksi günüdür.
1997-ci ilin bu günündə məşhur “Titanik” filmi ekranlara çıxıb, prokatın 25-ci günündə artıq öz büdcəsinə 200 milyon dollar toplamaqla rekorda imza atıb; 1941-ci ildə 15 yaşlı İngiltərə şahzadəsi Yelizaveta “Zoluşka” tamaşasında baş rol alaraq əsgərlər qarşısında çıxış edib, onları qələbəyə ruhlandırıb; 1917-ci ildə Monreal və Toronto arasındakı matçla Milli Hokkey Liqası fəaliyyətə başlayıb.
19 dekabrda dünyaya gələn tanınmışların siyahısına da bir nəzər salaq: 1969-cu ilin bu günündə əfsanəvi cazmen Vaqif Mustafazadənin yadigarı, tanınmış caz ifaçısı Əzizə Cəfərzadə; 1962-ci ildə detektiv romanları ilə ölkədə xeyli populyar olan yazıçı Elxan Elatlı, 1927-ci ildə görkəmli ədəbiyyatşünas alim İmamverdi Əbilov, 1915-ci ildə dünyaşöhrətli fransız müğənni Edit Piaf; 1906-cı ildə “Şiroko şaqaet Azebidjan” deyərək Azərbaycanı faciələrə sürükləyən sovet rəhbəri Leonid Brejnev doğulublar.
Dünyaşöhrətli energetik alimimiz
19 dekabrda tanınmış azərbaycanlı alim Kamal Abdullayevin də doğum günüdür. Yüksək minerallı və çirkab suların emalı və sənayedə istifadəsi, dəniz suyunun istilik elektrik stansiyalarında kompleks emalı kimi qiymətli tədqiqatlar müəllifi olan Kamal Abdullayev 50-dən artıq elmlər namizədi və 4 elmlər doktoru yetişdirib, 4 monoqrafiyanın və 300-dən artıq elmi əsərin, 20-dən artıq ixtiranın müəllifidir. O, 1981-ci ildə Azərbaycan SSR Ali Sovetinin fəxri fərmanı və keçmiş İttifaqın “Əlaçı fəxri energetik” adı, elmi nəticələrinə görə isə keçmiş SSRİ Xalq Təsərrüfatı Nailiyyətləri Sərgisinin qızıl və gümüş medalları ilə təltif olunub. 2000-ci ildə ekologiya sahəsindəki elmi işlərinə görə “M.Lomonosov” adına və “Y.Məmmədəliyev” adına medallara, “Əməkdar elm xadimi” fəxri adına layiq görülüb, 2010-cu ildə isə “Şöhrət” ordeni ilə təltif olunub. Kamal Abdullayevin adı Amerikada çap olunmuş “XX əsrin məşhur alimləri” ensiklopediyasına düşüb və eyni zamanda o, 2012-ci ildə ABŞ-ın Bioqrafiya İnstitutunun “Elmin açarı” mükafatına layiq görülüb. 2017-ci ildən Azərbaycan Respublikası Prezidentinin fərdi təqaüdçüsüdür.
“Qara kvadrat”ın doğuluşu
Ən nəhayət, 1915-ci ilin 19 dekabrında ünlü rəssam, abstraksizmin bir qolu olan suprematizmin banisi Kazemir Maleviç Petroqradda 39 iş ortaya qoyub ki, bunlardan biri də məşhur “Qara kvadrat” olub. Bilirsinizmi, fitri istedadı olan bu Rusiyada yaşayan polyak rəssamı gənc ikən Moskva rəngkarlıq məktəbində oxumaq istəyib, onu “istedadsızsan” deyə ora qoymayıblar. Gedib işləyib, səfalət içində yaşayaraq rəsmlər çəkməkdə davam edib, inadla yenidən həmin məktəbin qapısını açıb, yenə də onu qəbul etməyiblər. Gedib teatrda dekorasiyalar çəkən, sərgilərə qatılan Kazemir tədricən rəssam kimi tanınıb, vaxt gəlib, “Qara kvadrat” rəsmini çəkərək dünyaca şöhrətlənib, varlanıb. Onun məşhur ikən sərgisinə bir vaxtlar məktəbə girməsinə imkan verməyən müəllimlər də gəlib təzim edərək əl çalıblar.
Baxın, həyat budur. Sən zəif ikən üstünə yeriyənlər sən güclənəndə qarşında təzim edirlər. Tanrı sizləri həmişə güclü etsin!
“Ədəbiyyat və incəsnət”
(19.12.2024)
Komitə sədri İtaliyada tanınmış soydaşlarımızla görüşüb
Diasporla İş üzrə Dövlət Komitəsinin sədri Fuad Muradov İtaliyaya səfəri çərçivəsində tanınmış soydaşlarımız, həkim-kardioloq Bahar Yusifzadə və xoreoqraf, Əməkdar artist Mais Nuriyevlə görüşüb.
“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, İtaliya Azərbaycanlıları Koordinasiya Şurasının Milan şəhəri üzrə sabiq koordinatoru, həkim-kardioloq Bahar Yusifzadə ilə görüşdə Azərbaycan diasporunun fəaliyyətinə verdiyi mühüm töhfəyə görə ona “Diaspor fəaliyyətində xidmətə görə” Azərbaycan Respublikasının medalı təqdim edilib. Pandemiya zamanı Bahar Yusifzadənin İtaliyada yaşayan soydaşlarımıza göstərdiyi qayğı, ümumilikdə Azərbaycanın təbliğində rolu yüksək qiymətləndirilib, ona uğurlar arzulanıb. Bahar Yusifzadə verilən yüksək qiymətə görə Azərbaycan dövlətinə dərin minnətdarlığını bildirib.
Lenyano şəhərində yaşayan, “Azəri” Azərbaycan Mədəniyyət Assosiasiyasının prezidenti, xoreoqraf, Milanda "Aida" və "Orizon" Rəqs Akademiyasının və Milan Konservatoriyasının professoru, Əməkdar artist Mais Nuriyev evində ziyarət edilib. Tanınmış xoreoqraf Mais Nuriyevin və həyat yoldaşı Nəzakət Nuriyevanın Azərbaycan mədəniyyətinin beynəlxalq aləmdə təbliği, eləcə də İtaliyada diaspor fəaliyyətinin genişləndirilməsi istiqamətində mühüm xidmətləri qeyd olunub. “Azəri” Azərbaycan Mədəniyyət Assosiasiyasının gələcək planları ilə bağlı fikir mübadiləsi aparılıb.
Hər iki soydaşımız xaricdə yaşayan azərbaycanlıların Prezident İlham Əliyevin siyasətini daim dəstəklədiklərini vurğulayıb. Bundan sonra da İtaliya-Azərbaycan arasında ikitərəfli münasibətlərin və diasporumuzun inkişafına inam ifadə olunub.
“Ədəbiyyat və incəsənət”
(19.12.2024)
Sankt-Peterburqda Azərbaycan muğamı səslənib
Sankt-Peterburqda “Azərbaycan muğamı” adlı gecə təşkil olunub.
AzərTAC xəbər verir ki, Sankt-Peterburq hökumətinin, Azərbaycanın Baş konsulluğunun və Azərbaycan Milli-Mədəni Muxtariyyətinin birgə təşkilatçılığı ilə Sankt-Peterburq Dövlət Akademik Kapellasında baş tutan konsertdə Əməkdar artist Təyyar Bayramovun rəhbərliyi ilə Beynəlxalq Muğam Mərkəzinin nümayəndələri çıxış ediblər.
Gecədə Sankt-Peterburqun qubernatoru Aleksandr Beqlov, Azərbaycan və Rusiya Xarici işlər nazirliklərinin rəsmiləri, Sankt-Peterburq hökumətinin üzvləri, Rusiyanın Şimal paytaxtındakı diplomatik korpusun nümayəndələri, MDB Parlamentlərarası Assambleyası Şurasının Baş katibinin müavini Aydın Cəfərov, Sankt-Peterburqda Azərbaycan Milli-Mədəni Muxtariyyətinin sədri Vaqif Məmişov, Azərbaycan diasporunun nümayəndələri, azərbaycanlı kursantlar, doktorantlar və tələbələr iştirak ediblər.
Tədbiri giriş sözü ilə açan Azərbaycanın Sankt-Peterburqdakı baş konsulu vəzifəsini icra edən Anar Yusifzadə tədbirin təşkilində göstərdiyi dəstəyə görə qubernator Aleksandr Beqlova və Sankt-Peterburq hökumətinə təşəkkürünü bildirib, əsrlər boyu xalqımızın ruhunu və yaradıcılıq gücünü əks etdirən unikal sənət növü olan muğamın Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü və dəstəyi ilə 2008-ci ildə UNESCO-nun Qeyri-Maddi Mədəni İrs Siyahısına daxil edildiyini bildirib.
Anar Yusifzadə çıxışı zamanı muğamın təkcə Azərbaycan incəsənətinin deyil, ümumilikdə bəşəriyyətin musiqi xəzinəsinin incisi olduğunu, bu cür tədbirlərin Azərbaycan ilə Rusiya arasında, o cümlədən Azərbaycan ilə Sankt-Peterburq şəhəri arasında dostluq və mədəni əlaqələrin möhkəmləndirilməsində əhəmiyyətli rol oynadığını, xalqlarımız arasında daha sıx əlaqələrin qurulmasına və əməkdaşlığın inkişafına töhfə verəcəyini tədbir iştirakçılarının diqqətinə çatdırıb.
Konsert proqramına “Sarı gəlin”, “Küçələrə su səpmişəm”, “Sarı bülbül” xalq mahnıları, “Azərbaycan oğluyam”, “Qarabağ”, “Yaşa, mənim xalqım” və Azərbaycan musiqi sənətinə aid bir sıra digər mahnılar daxil edilib.
Beynəlxalq Muğam Mərkəzinin nümayəndələri Rusiyada Azərbaycan mədəniyyətinin təbliğində göstərdikləri xüsusi xidmətlərə görə Sankt-Peterburqda Azərbaycan Milli-Mədəni Muxtariyyətinin fəxri diplomu ilə təltif olunublar.
Tədbir çərçivəsində Sankt-Peterburq Dövlət Akademik Kapellasının qalereyasında Azərbaycanın mədəniyyət paytaxtı Şuşa şəhərinin mədəni-tarixi abidələrinin və Bakı şəhərinin fotosərgisi keçirilib. Həmçinin Azərbaycan milli musiqi alətləri və xalçaları nümayiş olunub, milli mətbəximizin nümunələri təqdim edilib.
“Ədəbiyyat və incəsənət”
(19.12.2024)
Romada Azərbaycan Mədəniyyət Elçiləri Toplantısı keçirilib - ADİL KƏRİMLİ TOPLANTIDA İŞTİRAK EDİB
Dekabrın 18-də İtaliyanın Roma şəhərindəki Azərbaycan Mədəniyyət Mərkəzində Azərbaycan Mədəniyyət Elçiləri Toplantısı keçirilib. Tədbir Azərbaycanın Mədəniyyət Nazirliyinin təşkilatçılığı, ölkəmizin İtaliyadakı səfirliyinin və Diasporla İş üzrə Dövlət Komitəsinin dəstəyi ilə reallaşıb.
“Ədəbiyyat və incəsənət” portalı AzərTAC-a istinadən xəbər verir ki, toplantıda əvvəlcə beynəlxalq müsabiqələr laureatı, dirijor və bəstəkar Abuzər Manafzadə Azərbaycan Respublikasının Dövlət Himnini səsləndirib, sonra mövzu ilə bağlı videoçarx nümayiş etdirilib.
Toplantıda Azərbaycanın İtaliyadakı səfiri Rəşad Aslanov ölkəmizin incəsənət və mədəniyyət xadimlərini Romada görməkdən məmnunluğunu ifadə edib.
Azərbaycanın mədəniyyət naziri Adil Kərimli çıxışında tədbirdə iştirak edən şəxslərin hər birinin mədəniyyətimizin müxtəlif sahələri üzrə xüsusi nailiyyətləri ilə seçilən, onun təbliğinə töhfə verən, harada yaşamasından asılı olmayaraq, Azərbaycan milli kimliyinin daşıyıcıları olan dəyərli həmvətənlərimiz olduğunu bildirib.
Nazir qeyd edib ki, bu şəxslərin Azərbaycanın və zəngin mədəniyyətinin təbliğinə verdiyi töhfələr, Vətənə bağlılıqları təqdirəlayiqdir.
Diasporla İş üzrə Dövlət Komitəsinin sədri Fuad Muradov, Milli Məclisin Mədəniyyət komitəsinin sədr müavini Günay Əfəndiyeva toplantıda iştirak edən mədəniyyət elçilərinin Azərbaycanın zəngin mədəni irsinin təbliğində müstəsna xidmətlər göstərdiyini bildiriblər.
Daha sonra toplantıda Azərbaycan mədəniyyəti və incəsənətini xaricdə təbliğ edən görkəmli şəxslərin çıxışları dinlənilib.
“Ədəbiyyat və incəsənət”
(19.12.2024)
Virciniya ştatında yaşayan diaspor fəalları Şuşaya səfər ediblər
ABŞ-nin Virciniya ştatında yaşayan diaspor fəalları Şamama Məmmədova və qızı Mənsurə Məmmədova Şuşaya səfər ediblər.
Diasporla İş üzrə Dövlət Komitəsinin dəstəyi ilə baş tutan səfərdə soydaşlarımız ABŞ-də özlərinin tikib hazırladıqları 15 metr uzunluğunda üçrəngli Azərbaycan bayrağını Şuşa Yaradıcılıq Mərkəzinə hədiyyə veriblər.
“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, 2020-ci ildə Şuşanın işğaldan azad edilməsi münasibətilə paytaxt Vaşinqtonda keçirilən qələbə yürüşündə dalğalandırılan bu bayraq ABŞ-nin müxtəlif ştatlarında təşkil olunan digər tədbir və yürüşlərdə də istifadə olunub. Mərkəzdən verilən məlumata görə bayraq Şuşa şəhərində inşa olunacaq Zəfər muzeyi fəaliyyətə başladıqda ora təhvil veriləcək və muzeydə sərgilənəcək.
Şuşaya səfər zamanı soydaşlarımız aparılan yenidənqurma işləri ilə tanış olub, mədəniyyət paytaxtımızda “Güllələnmiş heykəllər”, Cıdır düzü, Şuşa qalası, Yuxarı Gövhər Ağa məscidi və digər tarixi məkanlara baş çəkiblər. Şamama Məmmədova illər əvvəl Şuşada olduğunu, Şuşanın işğaldan azad edilməsindən sonra ilk dəfə gəldiyini və qürur hissi keçirdiyini bildirib. Onlar bu zəfər sevincini yaşatdığına görə müzəffər Ali Baş Komandan İlham Əliyevə və şanlı ordumuza minnətdarlıq ifadə ediblər.
Qeyd edək ki, Şamama Məmmədova və Mənsurə Məmmədova Azərbaycan həqiqətlərinin təbliği istiqamətindəki fəallıqlarına görə komitə tərəfindən təşəkkürnamə ilə təltif olunublar.
“Ədəbiyyat və incəsənət”
(19.12.2024)
Mirzə Şəfi Vazehin 230 illiyinə həsr olunmuş ədəbi-musiqili gecə keçirilib
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının, Bakıdakı Rus Evinin və Yasamal rayon Heydər Əliyev Mərkəzinin birgə təşkilatçılığı ilə Azərbaycan ədəbiyyatının görkəmli nümayəndəsi, böyük şair, tanınmış maarifçi və pedaqoq Mirzə Şəfi Vazehin anadan olmasının 230 illiyi ilə əlaqədar tədbir keçirilib.
Kitabxanadan AzərTAC-a bildirilib ki, tədbirdə tarix üzrə fəlsəfə doktoru, Yasamal rayon MKS-nin direktoru Lətifə Məmmədova M.Ş.Vazehin yaradıcılığının əsas məqamlarına toxunub. Bildirib ki, şairin əsərlərinin əsas mövzusu romantik sevginin tərənnümü və həyatdan zövq almaq idi.
O, çıxışında rəhbəri olduğu kitabxanaya Mirzə Şəfi Vazehin adının verilməsinin qısa tarixçəsindən danışıb və qeyd edib ki, Ulu Öndər Heydər Əliyevin təşəbbüsü ilə kitabxanaya 45 il öncə böyük şairinin adı verilib.
Tədbirdə Azərbaycan Yazıçılar Birliyinin üzvləri, şairlər Lalə Həsənova, Səidə Sübh, yazıçı-publisist Reyhan Mirzəzadə, tarixçi-tədqiqatçı Rüstəm Hüseynov və başqaları Mirzə Şəfi Vazeh yaradıcılığının Azərbaycanın Avropa ilə ədəbi-mədəni əlaqələrinin inkişafında özünəməxsus yer tutduğunu diqqətə çatdırıblar. Qeyd edilib ki, Mirzə Şəfinin nəğmələri Avropa dillərinə dəfələrlə tərcümə edilsə də, şairin yaradıcılığının böyük bir hissəsi bizə gəlib çatmayıb.
Tədbir bədii hissə ilə davam edib.
“Ədəbiyyat və incəsənət”
(19.12.2024)
Günün fotosu: Türkiyə bir milyard qazandı
Kənan Məmmədli, “Ədəbiyyat və incəsənət”
Suriyadakı dövlət çevrilişindən sonra regionda yeni düzənin qurulması və Türkiyənin öz mövqelərini xeyli gücləndirməsi səbəbindən Avropa İttifaqının sədri Ursula fon der Lyayen Ankaraya səfər edib.
Euronews telekanalının süjetinə görə, Türkiyə prezidenti Rəcəb Tayyib Ərdoğanla görüşdə Ərdoğan Avropa İttifaqını qaçqınlarla bağlı siyasətini dəyişməyə çağırıb. Və bu çağırış effekt verib. Hazırda 3,2 milyon suriyalı qaçqına sığınacaq verən Türkiyəyə 1 milyard avro pul ayrılacaq.
Ərdoğan fürsətdən istifadə edib xanım Lyayendən Türkiyənin Avropa İttifaqına gəlişini əngəlləyən səbəblərin aradan götürülməsini də xahiş edib, sabah keçiriləcək Aİ-nin birgünlük sammitində Türkiyənin üzvlüyü ilə bağlı müsbət qərarın verilməsini vacib sayıb.
Ərdoğan deyib: “Türkiyənin taleyi niyə axı onunla əzəli konfliktdə olan Yunanıstan və Kiprin mövqeyi ilə həll edilsin?”
Foto: By Jorge Liboreiro
Fotonun hüquqları: European Union, 2024.
“Ədəbiyyat və incəsənət”
(18.12.2024)
ICESCO-da Məxdumqulu Fəraqinin 300 illik yubileyi qeyd olunacaq
Dekabrın 18-də İslam Dünyası Təhsil, Elm və Mədəniyyət Təşkilatının (ICESCO) Rabatda mənzil-qərargahında böyük türkmən şairi, ümumtürk ədəbiyyatının görkəmli nümayəndəsi Məxdumqulu Fəraqinin 300 illik yubileyi münasibətilə konfrans keçiriləcək.
Tədbir ICESCO tərəfindən TÜRKSOY və Türkmənistan XİN-lə əməkdaşlıq şəraitində təşkil olunacaq.
“Ədəbiyyat və incəsənət” portalı xəbər verir ki, bu barədə AzərTAC ICESCO-ya istinadla xəbər yayıb. Xəbərdə bildirilir ki, tədbirdə təşkilatın Baş direktoru, TÜRKSOY-un Baş katibi, Türkmənistanın nümayəndə heyəti, media və ictimaiyyət nümayəndələri iştirak edəcəklər.
Konfransda Fəraqinin həyat və yaradıcılığı, fəlsəfi fikirləri, mədəniyyətlərarası dialoqun möhkəmlənməsində rolu mövzuları müzakirə olunacaq. Konfrans çərçivəsində şairin həyatından bəhs edən sənədli film göstəriləcək. Tədbir qala-konsertlə yekunlaşacaq.
“Ədəbiyyat və incəsənət”
(18.12.2024)
Kitabxana və muzeylərin fəaliyyəti ilə bağlı qanunvericiliyə dəyişikliklər plenar iclasa tövsiyə olunub
Dekabrın 17-də Milli Məclisin Mədəniyyət komitəsinin iclası keçirilib.
AzərTAC xəbər verir ki, komitə sədri Polad Bülbüloğlu gündəliyə bir məsələnin - “Kitabxana işi haqqında” və “Muzeylər haqqında” qanunlarda dəyişiklik edilməsi barədə qanun layihəsinin (birinci oxunuş) daxil edildiyini bildirib.
Polad Bülbüloğlu diqqətə çatdırıb ki, mövcud qanunvericiliyə əsasən, kitabxana və muzeylər müəyyən olunmuş qaydada təsərrüfat fəaliyyəti ilə məşğul ola bilərlər və bu fəaliyyətdən əldə olunan vəsait onların sərəncamında qalır.
Komitə sədri bildirib ki, təklif olunan dəyişikliklərdə isə dövlət kitabxanalarının və muzeylərin bu fəaliyyətindən əldə edilən vəsaitdən müvafiq icra hakimiyyəti orqanının müəyyən etdiyi orqanın (qurumun) müəyyən etdiyi qaydaya uyğun olaraq istifadə ediləcək.
Qanun layihəsinin müzakirəsində çıxış edən deputatlar kitabxanaların və muzeylərin müasir dövrün tələblərinə uyğunlaşdırılması, kitabxana fondunun zənginləşdirilməsi, muzeylərin turizmlə əlaqələndirilməsi, bu sahələrdə dövlət-özəl tərəfdaşlığının tətbiq edilməsi kimi kitabxana və muzey işinin inkişafının bəzi aktual məsələləri ilə bağlı fikirlərini bölüşüblər, təklif olunan dəyişikliklər haqqında rəylərini və suallarını səsləndiriblər.
Milli Məclisin Mədəniyyət komitəsinin sədri Polad Bülbüloğlu və parlament Aparatının Sosial qanunvericilik şöbəsinin müdiri Adil Vəliyev deputatların qaldırdıqları məsələlərə münasibət bildiriblər, suallarına aydınlıq gətiriblər. Vurğulanıb ki, sənəd mədəniyyət müəssisləri tərəfindən büdcədənkənar fəaliyyətdən əldə edilən gəlirlərin idarə olunması ilə əlaqədar qanunvericilikdə mövcud ziddiyyətlərin aradan qaldırılması məqsədilə hazırlanıb.
Müzakirələrdən sonra qanun layihəsi birinci oxunuşda baxılmaq üçün Milli Məclisin plenar iclasına tövsiyə olunub.
“Ədəbiyyat və incəsənət”
(18.12.2024)
Rəsm qalereyası: Leonardo da Vinçi, “Mələk”
Məşhur italiyalı İntibah dövrü rəssamı Leonardo da Vinçinin London Milli Qalereyasında saxlanılan “Mələk” rəsmindən bir kompozisiya.
