Super User
Sabah Opera və Balet Teatrına təşrif buyurun
Sabah - yanvarın 14-də Azərbaycan Dövlət Akademik Opera və Balet Teatrında italyan bəstəkarı Pyetro Maskanyinin “Kənd namusu” operası nümayiş olunacaq.
Bu operanı Əməkdar incəsənət xadimi Sevil Hacıyevanın rəhbərliyi altında xor kollektivi və Xalq artisti, professor Yalçın Adıgözəlovun idarə etdiyi simfonik orkestri müşayiət edəcək.
Xronometrajı 1 saat 50 dəqiqə olan səhnə əsərinin əsas qəhrəmanları öz məhəbbətinə hədsiz dərəcədə sədaqətli olan Santutsa, yüngül xasiyyətli, şıltaq Lola, ehtiraslı Turiddu və öz rəqibindən amansız qisas alan Alfiodur. Operanın İtaliya xalq mahnılarının əsasında qələmə alınmış musiqisi əsərin kəskin süjet xəttinə uyğun olub, qəhrəmanların xarakterinin daha aydın şəkildə açılmasına yardım edir.
Qeyd edək ki, “Kənd namusu” operasının ilk tamaşası 1890-cı ildə Romanın “Konstants” teatrında keçirilib. Bu opera son dərəcə gözəl musiqisi, eləcə də kəskin dramatik süjeti ilə fərqlənir və P.Maskanyi yaradıcılığının ən uğurlu əsərlərindən biri hesab edilir. Səhnə əsəri bu günə kimi bir çox dünya teatrlarının repertuarını bəzəyir.
Azərbaycan Dövlət Akademik Opera və Balet Teatrında “Kənd namusu” operası 2015-ci ildə almaniyalı rejissor Lüdviq Bauman və dirijor Korneliya fon Kerssenbrok tərəfindən səhnəyə qoyularaq, repertuara daxil edilib.
“Ədəbiyyat və incəsənət”
(13.01.2023)
Fəzail Bayramov: “Memarlarımızın əsas vəzifələrindən biri də Qarabağın bərpasında yaxından iştirak etməkdir”
Azərbaycanda memarlıq və inşaat sahəsi böyük və uğurlu inkişaf yolu keçib. Tikinti və yenidənqurma işləri, abadlaşdırma regionlarda da sürətlə aparılır. Respublikanın bütün kənd və qəsəbələri, şəhərləri bu müddət ərzində öz simasını dəyişib, iri infrastruktur layihələri həyata keçirilib. Bu sahədə layiqli töhfəsini verən memarlardan biri də Azərbaycan Memarlar İttifaqının üzvü Fəzail Bayramovdur.
“Ədəbiyyat və incəsənət” portalı tanınmış memarın AzərTAC-a müsahibəsinin maraqlı məqamlarını oxucularına təqdim edir.
- Bu gün Azərbaycan memarlığının qarşısında əsas hansı vəzifələr durur?
- Memarlıq sənəti dünyanın inkişafını göstərən bir dəyərdir. Azərbaycan memarlıq sənəti ölkəmizdə inkişaf etmiş sivilizasiyanın mövcud olduğunu göstərir. Azərbaycan memarlıq sənəti bu gün də uğurla davam edir. Hazırkı dövrdə Azərbaycan memarlığının qarşısında duran əsas vəzifə işğaldan azad edilmiş ərazilərin, eyni zamanda abidələrin bərpasında aktiv iştirak etməkdir. Ümumilikdə isə respublika özünün yüksək inkişaf dövrünü yaşayır və biz memarlar da çalışmalıyıq ki, bu sahədə öz layiqli töhfələrimizi verək. Bu mənada Memarlar İttifaqının da üzərinə böyük məsuliyyət düşür. Biz memarlar şəhər və kəndlərimizi müasir dövrə uyğun qurmalıyıq. Sevindirici haldır ki, artıq bu gün Azərbaycan memarlığında qabaqcıl dünya təcrübəsindən, yeni texnologiyalardan istifadə edilir.
Qeyd edim ki, Ulu Öndərin müdrik siyasətinin layiqli davamçısı, Prezident İlham Əliyevin xüsusi diqqəti və qayğısı nəticəsində ölkəmizdə tikinti-quruculuq və abadlaşdırma işləri böyük vüsət alıb. Tikinti sahəsində beynəlxalq normalara uyğun normativ-hüquqi bazanın formalaşdığı və nəticədə nəhəng tikinti meydançasına çevrilmiş ölkəmizdə keyfiyyət dəyişiklikləri baş verib.
Dövlətimizin başçısının təşəbbüsü ilə həyata keçirilən “Ağıllı kənd” və şəhər ideyasının Qarabağda tətbiqi də bunun bariz nümunəsidir.
-Son illər ölkəmizdə, əsasən də paytaxtda çoxmərtəbəli binaların sayı sürətlə artır. Bir mütəxəssis olaraq bu binaların zəlzələyə davamiyyəti barədə nə deyə bilərsiniz?
- Bilirsiniz, müasir dövrdə inşaat sahəsində dəmir-beton öz yerini metal konstruksiyaya verib. Məsələn, sovet dövründə 9 və 10 mərtəbəli binaların tikintisində başlıca olaraq dəmir–betondan istifadə olunub. İndi isə çoxmərtəbəli binaların inşasında əsas tikinti materialı metal konstruksiyalardır. Belə ki, metal konstruksiya çox dayanıqlı, möhkəm və elastik olduğu üçün müasir memarlıqda daha çox tətbiq olunur. Məhz bu səbəbdən Bakının özündə çoxmərtəbəli binalar 8-9 bal zəlzələyə davamlıdır.
Nəzərə çatdırım ki, Azərbaycan ərazilərindən İsmayıllı rayonunun dağ hissələri xeyli seysmo aktiv olduğundan orada çoxmərtəbəli deyil, xüsusi tikinti materiallarından yalnız 1 mərtəbəli evlərin tikintisi məqsədəuyğundur. Çünki bu yerlərdə 9-10 bal gücündə zəlzələ olması mümkündür. Odur ki, hər hansı bir ərazidə bina tikilərkən, yaşayış məskəni salınarkən, həmin ərazilərin, torpağın qruntu, geoloji xüsusiyyətləri öyrənilməlidir. Həmçinin layihə hazırlanarkən qanunvericilikdə nəzərdə tutulmuş müvafiq normalara əməl edilməlidir.
-Şəhərlərin Baş planı hazırlanarkən əsas hansı məsələlərə diqqət yetirilir?
- Bu çox ciddi bir məsələdir. Əvvəlcə həmin ərazidə şəhərin və ya qəsəbənin salınması əsaslandırılmalıdır. Bunun üçün zəruri sənədlər olmalıdır.
Nəzərə alınmalıdır ki, bu zona yaşayış məskənidir. Deməli, əhalinin sayı, demoqrafiq xüsusiyyətləri əsas götürülməlidir. Bu istiqamətdə müfəssəl eskizlər hazırlanmalıdır ki, buraya müəssisələrin tikintisi, təhsil və tibbi müəssisələri, uşaq bağçası, ictimai binalar, xidmət mərkəzlərinin yaradılması və s. daxildir. Daha sonra ərazidə mənzil kommunikasiya xətlərinin çəkilməsi vacib şərtlərdən biridir.
Əsas göstəricilərdən biri də şəhərdə yaşayacaq əhalinin sayıdır. Mövcud şəhərsalmada hər 5 və ya 10 ildən bir detal planlaşdırma vasitəsilə şəhərin genişləndirilməsi mümkündür. Bir sözlə, şəhərlərin Baş planı iqtisadi hesablamalara əsasən hazırlanır.
- Azərbaycan dövləti Qarabağın işğaldan azad edilmiş ərazilərində nəhəng tikinti-quruculuq işləri aparır. Sizin bir təcrübəli memar kimi Qarabağın bərpası sahəsində layihələriniz varmı?
- Qarabağda əvvəlki dövrlərdə də bir sıra layihələrim olub. Hazırda isə Füzuli rayonunda iki kəndin Baş planı layihəsi, eləcə də Kəlbəcər rayonunda iki kəndin Baş planı layihəsi ilə bağlı işlərimi artıq yekunlaşdırmışam. Layihələr Dövlət Şəhərsalma və Arxitektura Komitəsinin təsdiqinə verilib. Digərlərinə isə hələ baxılır.
“Ədəbiyyat və incəsənət”
(13.01.2023)
“Fəxri adları çox vaxt layiq olmayan adamlara verirlər” - Siyavuş Aslan
Bəzən jurnalist müsahibindən söz ala bilmir. Necə edəsən ki, müsahibin danışsın? “Ədəbiyyat və incəsənət” portalı tanınmış tənqidçi Əsəd Cahangirlə “Ustad dərsləri” rubrikasını təqdim edir. Burada Əsəd Cahangirin müxtəlif illərdə götürdüyü ən maraqlı müsahibələr tarixi ardıcıllıqla təqdim olunur.
Xalq artisti Siyavuş Aslandan 28.05.1998 tarixində götürülmüş müsahibə.
“FƏXRİ ADLARI ÇOX VAXT LAYİQ OLMAYAN ADAMLARA VERİRLƏR”
Xalq artisti Səyavuş Aslanla dəniz kənarında Elçinin “Mənim sevimli dəlim” əsərinə daxili baxışın sabahı günü görüşdük. Axşam isə həmin tamaşanın premyerası idi. Həmişə qəzetlərdən qaçan, müsahibələrdən imtina edən Səyavuş Aslan bu tamaşada qəzetçi, baş redaktor rolunu oynayırdı.
- Səyavuş müəllim, hamı “ov”, “yev” familiyası ilə çıxış etdiyi bir vaxtdan siz Səyavuş Aslan kimi tanınırdınız. Bu orijinallıq nədən irəli gəlirdi?
- O vaxtlar Rəfiq Zəka Xəndan bizim teatra ədəbi hissə müdiri gəlmişdi. Belə təxəllüs götürməyi mənə o məsləhət gördü. “Pasportstolda” işləyən adam yaxın qohumum idi. Ona görə familiyimı dəyişə bildim. Yoxsa o vaxtlar bu o qədər də asan məsələ deyildi.
- Siz uzun müddət Musiqili Komediya Teatrında Nəsibə Zeynalova və Hacıbaba Bağırovla birlikdə işləmisiniz. Onlarla bağlı nə kimi xatirələriniz var?
- Bir dəfə Naxçıvanın Şahbuz rayonuna qastrola getmişdik. Nəsibə xanım da, Hacıbaba da, mən də dükan xəstəsi idik. Adətimiz üzrə getdik bir dükana. Nəsibə xanım bir “platya” götürdü, Hacıbaba bir pencək aldı, mən ha vurnuxdum, gördüm ki, xoşuma gələn heç nə yoxdur, birdən satıcı qıza qayıtdım ki, sizdə şinyon var? Satıcı da kənd yerində böyümüş qız, haradan bilsin ki şinyon nədi? Gördüm gözlərini döyə-döyə üzümə baxır, əl atdım Hacıbabanın şinyonuna, dartıb qopardım, qoydum qızın qabağına, vitrinin üstünə. Hacıbabanın ağappaq başını görən qız elə bildi ki, onun dərisini qoparmışam, bu il ölmüsən, bildir, getdi özündən... İndi həkim dalınca qaçan kim, su gətirən kim, aləm qarışdı bir-birinə.
- Niyə belə elədiniz ki?
- Hacıbabanın adəti idi, qızlara xoş gəlmək istəyirdi. Ona görə şinyon taxırdı. Gördüm ki, mağazada işləyən qızla göz-qaş edir. Şinyonu onun başından qəsdlə qopardım. Bu hadisədən sonra o, şinyon qoymağın daşını birdəfəlik atdı.
- Bəs, siz özünüz qızlara necə münasibət bəsləmisiniz?
- Mən qızlara qarşı çox ciddi olmuşam. Heç kimə “povod” verməmişəm. Namaz qılan, hacı adamam.
- Aktyorun, özü də sovet dövründə tərbiyə və təhsil almış aktyorun dinə qayıdışı çox ciddi məsələdir. Yəqin ki, buna hansısa daxili mənəvi silkələnmə səbəb olub.
- Hacıbabanı sənətə mən gətirmişəm, məni dinə gətirən isə Əlabbas Qədirov olub.
- Gəlin, bu tezisin birinci hissəsini açıqlayaq; Hacıbabanı sənətə gətirməyiniz necə olub?
- Günlərin bir günü “Vətən” kinoteatrının qabağından keçirdim. Gördüm Hacıbaba keçmiş arvadı Leyla xanım, oğlu və qızı ilə gedir. Soruşdum ki, indi harada işləyirsən? Dedi, heç yerdə işləmirəm. Mən Əjdər Sultanovun dram dərnəyində hazırlanmış “Durna” tamaşasında Hacıbabanı Dursun rolunda görmüşdüm və istedadlı bir aktyor kimi yadımda qalmışdı. Məsləhət gördüm ki, gəl Musiqili komediya teatrına. Dedi ki, mənim səsim yoxdur, axı, orada necə işləyə bilərəm? Səs o qədər də vacib deyil, dedim. Gətirdim onu teatrımızın o vaxtkı direktoru Şəmsi Bədəlbəylinin yanına. Onun ilk rolu Hacı Kərimin “Aya səyahətin”də Ay adamı oldu. “Özümüz bilərik” də onu mənə dublyor verdilər. Hər ikimiz İbişovu oynayırdıq. İndi qəzetlərə verdiyi müsahibələrdə deyir ki, məni teatra Şəmsi Bədəlbəyli gətirib. Bir dəfə dedim ki, səni teatra mən gətirmişəm, axı. Dedi, yadımdan çıxmışdı.
- Bəs, Əlabbas Qədirovun sizi dinə gətirməyi necə olub?
- Mənə özümü daxilən rahat hiss etmək, mənən təmizlənmək üçün namaz qılmağı o məsləhət görüb. Əvvəllər çətin idi, sözləri yadda saxlaya bilmir, zəng vurub, Əlabbasdan soruşurdum. Sonra o məni özü ilə birlikdə Məşhədə apardı, sonra Kərbəlaya, sonra isə Həcc ziyarətinə getdim. Bu yolu tutmaqda mənə ürək-dirək verən Əlabbas oldu.
- Siz aktyorsunuz, səhnədə istər-istəməz şəriət ehkamlarına zidd olan hərəkətlər etməli olursunuz. Namaz qılmaqla bunlar bir araya necə sığır?
- Səhnə mənim sənət həyatımla bağlıdır. Bunların bir-birinə dəxli yoxdur. Başqa hacılar kimi mən nə araq içirəm, nə də çəkirəm.
- İçki məclislərində Məşədi İbad vəziyyətində qalmırsınızmı?
- Ən yaxşı vəziyyət elə Məşədi İbad vəziyyətidir. Məşədi İbaddan yaxşı kişi var idi o məclisdə? Mən də dostların qəlbini qırmamaq üçün məclislərə gedirəm. Ancaq içməyənlər üçün ayrıca stol qoyurlar, orada otururam.
- Gənclik, şöhrət, dövlət - bunlardan hansını seçərdiniz?
- Gəncliyimi pis keçirməmişəm, şöhrət də qazanmışam. Bu yaşda dövlət istəyərdim.
- Varlı deyilsinizsə, bəs, Sahibkarlar
Partiyasına üzv olmağınız nə ilə bağlıdır?
- Sahibkarlıq fəaliyyətinə təzə başlamışam. Yeri gəlmişkən, bizim partiyanı istəməyənlər arada cəhd göstərdilər ki, partiya haqqında ölkə Prezidentində yanlış təsəvvür yaratsınlar. Ancaq buna nail ola bilmədilər. Hazırda Sahibkarlar Partiyası Prezidentin ən çox hörmət göstərdiyi partiyalardan biridir. Heydər Əliyevin bu günlərdə partiyamızın sədri Mahmud Məmmədovu qəbul etməsi də bunu sübut edir.
- 70-ci illər Azərbaycan teatrının iki ən məşhur komediya ustası Hacıbaba Bağırov və siz idiniz. Siz onu teatra gətirsəniz də etiraf edərsiniz ki, Hacıbaba Bağırov sizdən daha populyar idi. Amma bu gün hamı bu fikirdədir ki, guya o, yerində sayır, öz-özünü təqlid edir, siz isə inkişaf edib, irəli gedirsiniz. Ümumiyyətlə, 50 yaşdan sonra aktyorun yerində sayması fikrinə münasibətiniz necədir?
- Əgər kim 50 yaşdan sonra yerində sayırsa, demək, o, sənətə təsadüfən gəlib. Həqiqi aktyor mənim aləmimdə heç vaxt yerində saymamalıdır. Aktyorluq Allah vergisidir. Allah vergisi isə hüdud tanımır.
- Əgər elədirsə, niyə komik rollar hüdudundan kənara çıxmırsınız?
- Məncə, aktyorda amplua olmamalıdır. Mən Salamov rolunda Mirzəğa Əliyevi görmüşəm. O öləndən sonra rolu verdilər Ələsgər Ələkbərova. Otello, Vaqif, Fərhad, Cavanşir və birdən-birə Salamov. Amma Ələsgər Ələkbərov Salamovu elə oynadı ki, tamaşaçılar lərzəyə gəldi. Mənim komik rollar oynamağım uzun müddət Musiqili Komediya Teatrında işləməyimlə bağlıdır. Elə Milli Teatra gəlməkdə məqsədim də başqa profilə keçmək istəyimlə bağlı olub. İstəyirdim ki, Şekspirin, Ostrovskinin, Qoqolun əsərlərində oynayım.
- Nə əcəb, öz teatrınızı yaratmaq fikrinə düşməmisiniz?
- Yeni yaranan teatrlar müvəqqəti şeylərdir. Mən bu teatrların əleyhinəyəm. Belə teatrları yaradanlar beş-on cavanı başlarına yığıb özlərini göstərirlər. Çünki cavanların içində nəzərə çarpmaq daha asandır. Mən güclü partnyorlarla işləməyə daha üstünlük verirəm. Bir də heç dövlət teatrlarını maaşla təmin etmək olmur. Təzə teatr yaratmağa nə ehtiyac var?
- Bu günlərdə bir çox aktyorlara fəxri adlar verildi. Bu adlara münasibətiniz necədir?
- Çox da yaxşı deyil. Bəzən elə adamlara ad verirlər ki, mən öz adımdan imtina etmək istəyirəm. Bir də görürsən ki, cavan bir aktyora ad verilir. Özünü səninlə bərabər tutmağa başlayır. Adları çox zaman layiq olmayan adamlara verirlər.
- Aktyorlarda bəzi qəribəliklər olur...
- Aktyorluq sənət xəstəliyidir. Maaş vaxtında verilmir, ac-yalavac rol oynamalısan. Bundan böyük qəribəlik...
- Bu, hamıya aid, ümumi söz oldu.
- Mənim tez-tez özümdən küsməyim var. Elə məclislər olur ki, ürəklə oturduğum yerdə, birdən başqalarına əhəmiyyətsiz görünən bir şey qəlbimə dəyir, dinməzcə durub gedirəm. Başqalarının götürdüyü çox şeyi mən götürə bilmirəm.
- Ürəyinizdə qalan rol varmı?
- Var, amma demirəm, oynasam, nə vaxtsa qismət olar, siz də bilərsiniz. Qismət olmasa, bu istəyim özümlə gedəcək.
- Təsəvvür edin ki, sehrli xalçaya minib gələcəyə gedirsiniz. Geri dönməyəcəksiniz. Özünlə bir şey götürməyə icazə verirlər. Nəyi götürərdiniz?
- Qrimimi götürərdim. Yəqin orada da teatr olacaq, qrimə ehtiyac duyulacaq.
“Ədəbiyyat və incəsənət”
(13.01.2023)
Məşhur aktrisa İranda edam edilən gənclərdən yazdı
Fransalı məşhur aktrisa Marion Kotillard yanvarın 7-də İranda edam edilən Mehdi Kərəmi və Məhəmməd Hüseynlə bağlı paylaşım edib.
“Ədəbiyyat və incəsənət” axşam.az-a istinadən xəbər verir ki, sənətçi "İranda edamı dayandır" həştəqindən istifadə edərək onların fotolarını izləyiciləriylə bölüşüb və bu sözləri yazıb:
"Onların çəkdiyi əzabları dünyaya çatdırmalıyıq. İranda fövqəladə vəziyyət yaranıb. İran rejimi tərəfindən ölümə məhkum edilmiş günahsız insanları xilas etmək üçün mübarizəmizi davam etdirməliyik".
Aktrisa Məhəmməd Mehdi Kərəminin atasına dediyi "Ata, bizə hökm verdilər, mənim hökmüm edamdır, amma anama demə" sözləri də sosial şəbəkədə paylaşıb.
Qeyd edək ki, Mehdi Kərəmi və Məhəmməd Hüseyn Kərəc şəhərində hakimiyyət əleyhinə nümayişlər zamanı Bəsic qüvvələrinin (Bəsic İranda birbaşa dini liderdən əmr alan yarım hərbi könüllü təhlükəsizlik qüvvələridir) bir üzvünü öldürməkdə təqsirli bilinərək edam ediliblər.
“Ədəbiyyat və incəsənət”
(13.01.2023)
Bir proqramdan doğan min sual - ölülərlə niyə işimiz olsun ki?
Bu dəfə sizə YouTube-da yayımlanan "AStar" proqramından danışacağıq. 1 saat 19 dəqiqə çəkən sonuncu buraxılışda aparıcı Ülvira Qarayevanın qonağı Xalq artisti Flora Kərimova oldu. Və Flora xanım bütün proqramı mərhum Xalq artisti İlamə Quliyevadan gileylənməyə yönəltdi. 81 yaşlı sənətkar bildirdi ki, heç zaman İlhamə Quliyevanı bağışlamayacaq.
Flora xanım bir yerdə belə dedi:
“İlhaməyə rəhmətlik də deməyə dilim gəlmir. Ona Allah rəhmət eləsin deyə bilmirəm. Allah ona elə bir xasiyyət vermişdi ki, Allah özü onu o xasiyyəti ilə qarğışlayıb. Ona 50 dəfə "Allah rəhmət eləsin" deməklə Allah onu bağışlamayacaq. Yaradan bir insana xasiyyət verəndə, onun qarğışını da verir. O, sözüməmi baxacaq?".
Başqa yerdə belə dedi: "Ölüm heç bir hesabı bağlamır. Heç vaxt! Heç bir incikliyin üstündən getmir. Ölüm heç kimə bəraət qazandırmır. Ona görə ruslar deyirlər - "Həqiqətdən başqa...". Ömür boyu səhv etmək olar? İlhamənin səhvi elə mənə qalmışdı? Bir insan ki, baş sağlığına gəlib, deyə ki, sən məndən yaxşı oxumursan. Bu insana nə deyəsən? İlhamə içəri girib, yasıma gələnləri qışqıraraq qovmuşdu. İndiyə kimi də onun etdiklərini başa düşə bilmirəm. Evimdən cingiltili səs eşitdim.
Qızım Zümrüd qaça-qaça üstümə gəlib "Anacan, İlhaməni dayandır!" deyə-deyə qalmışdı. Qızım gördüklərini belə danışa bilmirdi. Sənə ayıb deyil? Qızımın onda səkkiz yaşı vardı. Onun niyə ürəyini paralayırdın? Gəlib görürəm ki, İlhamənin səsi bürüyüb evi".
Bir başqa yerdə isə belə deyib:
"İlhamə deyirdi ki, sən Faiqi (Flora Kərimovanın həyat yoldaşı - red.) mənə qısqanırdın. Elə şey de ki, insanın ağlına batsın. Bağışlamıram! Bağışlayarlar əhəmiyyətli, sayan insanı. Niyə mən onu bağışlamalıyam? Nəyə görə? Mənə sataşanlara başdan deyirəm "Mənə dəyməyin. Bağışlamıram!". Çünki bu millətin çiynində alnı açıq getməliyəm. Vəssalam!"
Söhbəti çox uzatmayacağıq. Bizcə, bütün mübahisələr, tənqid və təhdidlar insanlar qarşılıqlı şəkildə, üzbəüz olarkən ortaya çıxmalıdır. Belədə haqq və nahaq da dərhal bilinir. Amma ölənin dalınca gileylənmək, irad bildirmək sanki futbolda bir qapıya oynamaq kimidir.
Və ümumiyyətlə, musiqimizin iki korifeyi niyə bu qədər düşmənçilik həddində olsunlar ki?
“Ədəbiyyat və incəsənət”
(13.01.2023)
“1 milyon söhbətini eşidəndə dəhşətə gəldim”
“Ədəbiyyat və incəsənət”in daimi oxucusu Mirvarid Səmədli bu mövzuda giley-güzarını redaksiyamızla bölüşüb. O yazıb:
Sosial mediadan xəbər tutdum ki, Türkiyənin meqastarı Tarkan Bakıda keçiriləcək toylardan birinə dəvət alıb. Ona 1 saatlıq konsertinə görə 1 milyon AZN ödəniləcək. Toyun cari ilin mart ayında baş tutacağı qeyd olunub.
Bir milyon manatı müğənniyə hansı korrupsioner, hansı harın verəcəksə qoy versin. Amma mən yüz faiz əminəm ki, o insan hansısa şəhid və qazi ailəsinə 1 manatını belə qıymaz.
Həyat niyə belə ədalətsizdir? Yüz minlərlə insan bir tikə çörəklə sınağa çəkilir. Onların hamısının haqqını yeyən birisi isə bax bu cür harınlıq edir.
“Ədəbiyyat və incəsənət”
(13.01.2023)
Bakı və Sumqayıt şəhərləri, Abşeron rayonu üzrə yanvar ayının pensiyalarının ödənişinə başlanıb
Ötən il pensiyaçılara verilən maddi yardımlar bu ilin əvvəlindən onların pensiyalarına daxil edilərək artımla verilir
Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən Bakı və Sumqayıt şəhərləri, Abşeron rayonu üzrə yanvar ayının pensiyalarının ödənilməsinə başlanılıb və proses sabah tam yekunlaşacaq.
“Ədəbiyyat və incəsənət” AzərTAC-a istinadən xəbər verir ki, yaxın günlərdə respublikamızın digər bölgələri üzrə də pensiyalar, həmçinin güzəştli şərtlərlə pensiya hüququna malik şəxslərin pensiyaları da ödəniləcək.
Ümumi əsaslarla pensiya təyin olunmuş pensiyaçılara ötən il üzrə verilən maddi yardımın (200 manat) hər aya düşən məbləği (16,66 manat) də bu ilin əvvəlindən onların pensiyalarına daxil edilib və yanvar ayının pensiyaları həmin artımlarla birgə ödənilir.
Eyni zamanda, xüsusi şərtlərlə pensiya təyin olunmuş, qulluq stajına görə əlavələr alan pensiyaçılara (pensiyada olan hərbi və xüsusi rütbəli şəxslər, dövlət qulluqçuları və s.) ötən il hər ay pensiyalarının 10 faizi qədər ödənilmiş maddi yardım da artıq bu ayın əvvəlindən onların pensiyası tərkibinə daxil edilib.
Prezident İlham Əliyevin 5 yanvar 2023-cü il tarixli Sərəncamına əsasən, minimum aylıq pensiyanın da 280 manata çatdırılması nəzərdə tutulur və Sərəncamla Nazirlər Kabinetinə bu barədə təkliflərini 10 gün müddətində dövlət başçısına təqdim etmək tapşırılıb.
Həmçinin bütün növ pensiyalar orta aylıq nominal əməkhaqqının ötən il üzrə artımına dair rəsmi statistik göstərici əsasında bu ilin əvvəlindən indeksləşdirilərək artırılacaq. Həmin artım tətbiq edildikdə bu barədə ətraflı məlumat veriləcək.
“Ədəbiyyat və incəsənət”
(13.01.2023)
“Artım”da açılan SAFEZONE sərgisi davam edir
YARAT Müasir İncəsənət Məkanının təşkilatçılığı ilə “Artım” layihə məkanında açılmış gənc rəssamlar Lali Binyatova, Nadir Eminov, İslam Həsənəlizadə, Katya İqoşina, Pərviz Kazımlı, Leylaxanım Qənbərli, İlkin Quliyev, Maksim Tatarintsevin “SAFEZONE” (Təhlükəsiz zona) adlı qrup sərgisi davam edir.
Fevral ayınadək davam edəcək sərgi öz ilhamını fransız filosofu Mişel Fuko tərəfindən mühazirə üçün işlənib hazırlanmış “Digər məkanlar haqqında: Utopiya və heterotopiya” (1967) adlı konsepsiyadan götürüb. “Heterotopiya” (“hetero” - digər, “topos” - yerlər) bir məkan daxilində xüsusilə ziddiyyətli və dəyişən, fərqli sayılan bir məkan kimi təsvir edilir. Mişel Fukonun fikrincə, utopiyalar, prinsip etibarilə, gerçək yeri olmayan və cəmiyyəti ideal formada təmsil edən yerlərdir. Bununla yanaşı, bəzi yerlər utopiyalara ziddir: böyük ehtimalla, hər bir mədəniyyətdə, hər sivilizasiyada həqiqi yerlər — həqiqətən mövcud olan və cəmiyyətin təməl daşını formalaşdıran yerlər var; onları bir növ “əks-ərazilər”, haradasa, effektiv şəkildə həyata keçirilmiş utopiya adlandırmaq olar.
Konsepsiyanın prinsiplərindən biri, “böhran heterotopiyası” adlanır və böhran vəziyyətində ola bilən cəmiyyət üzvləri üçün ayrılmış yerlərdən bəhs edir. Bu kontekstdə, qalereya məkanı rəssamlar üçün “heterotopiya” kimi təqdim olunur. Mövcud böhranda dayaq nöqtəsini tapmaq üçün, rəssamlar öz hekayələrini araşdıraraq, bu günü bərpa etmək üçün xəyali görüntülər yaradırlar. Özlərini ifadə etmək, əks etdirmək və katarsis üçün bir vasitə kimi onlar bədii mühitdən istifadə edirlər.
Ümumi qeyri-müəyyənlik və get-gedə azalan təhlükəsizlik şəraitində “sığınacaq” və “ev” anlayışları efemerik xüsusiyyətlər əldə edib: insanlar bir göz qırpımında öz başlarının üzərində damı itirirlər. “SAFEZONE” — rəssamların yaddaş, yerdəyişmə, paklanma, virtual aləm və zaman kimi müxtəlif kontekstlərdə təfsir etdiyi reallıq və paralel utopiya arasındakı məkana istinad etməklə, “sığınacaq” və “ev” kimi ambivalent anlayışlarını araşdırır.
Rəssamlar istər fiziki məkanda, istərsə də onun hüdudlarından xeyli kənarda, onlar “təhlükəsiz zonalarda” vasitəçi qismində çıxış etməklə, müxtəlif sığınacaq formalarını təklif edirlər.
“Ədəbiyyat və incəsənət”
(13.01.2023)
Stiven Kovi. “Yüksək effektli insanların yeddi vərdişi” - Uğur yolunu göstərən ən yaxşı kitablar
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir
Uğur üçün lazım olan keyfiyyətlər arasında biz bol informasiya almağın, mütaliənin necə vacib olmasını da sadalamışdıq. Statistik hesablamalara görə hər bir uğurlu insanın il ərzində orta hesabla 19 kitab oxuduğunu da sizin diqqətinizə çatdırmışdım.
Əksər reytinq sıralamalarında yer alan «bizneçdə və peşəkar fəaliyyətdə uğur qazanmaq» mövzusunda ən populyar motivasiya bestsellerləri arasından sizinçün seçdiyim 10-luqdakı kitablara bir-bir şərh verməyi davam edirəm.
Stiven Kovi. Yüksək effektli insanların yeddi vərdişi
19 il öncə çıxan bu kitabın dünya üzrə 15 milyondan artıq nüsxəsi satılmışdır. On illərdir ki, bu superbestseller dəbdən düşmək bilmir.
Motivasiya ədəbiyyatı yazan bir çox digər müəlliflərdən fərqli olaraq Stiven Kevi uğura gedən yolun qısa olduğunu iddia etmir, o, özünüinkişafın, həyatı dəyişmənin hətta bütöv bir ömür qədər çəkə biləcəyini söyləyir.
Stiven Kovi uğur qazanmağı arzulayan insanlara nəyi tövsiyə edir?
- Bilib eləməmək bilməməyə bərabərdir. Bacarıb eləməmək isə bacarmamağa.
- Hadisələrin bizə necə təsir etdiyini biz özümüz müəyyənləşdiririk.
- Effektiv adam problemləri ilə deyil, imkanları ilə düşünür.
- İnsana başqasının öz əzablarına son qoyub şəraitə qalib gəlməsini dərk etmək qədər güclü heç nə təsir edə bilməz.
- Yalnız yerinə yetirilməyən istək motivasiya edə bilər.
- Öz gücünü özünə investisiya qoymağa sərf elə.
- Problem – mahiyyətcə biz onu gördüyümüz kimidir.
- İnsanlar dünyanı olduğu kimi görürlər.
- Qızıl qaydalara görə, başqalarına qarşı elə hərəkət edin ki, onların da sizə qarşı o cür hərəkət etmələrini arzulayasınız.
Bu kitabı «Fortune 500» reytinqində yer alan əksər kompaniya rəhbərləri oxumaq üçün öz işçilərinə tövsiyə edirlər, bəzi kompaniyalarda isə işçilər üçün bu kitabı oxumaq məcburidir.
Stiven Kovinin kitabında olduqca faydalanacağınız aforizmlərə, ayrı-ayrı pritça və əhvalatlara da rast gəlmək mümkündür. Məsələn, onun Abraxam Masloudan gətirdiyi bu aforizmi çox bəyənirəm: «Əlində çəkic tutan ətrafın yalnız mismarlardan ibarət olmasını düşünməyə meyillidir».
Bu isə gözübağlı, uğursuz insanlara xitab edilən xırda bir ibrətamiz dialoqdur:
- Siz nə iş görürsünüz?
- Beş saatdır ki, bu ağacı mişarlayıram.
- Bəs niyə əl saxlayıb mişarınızı itiləmirsiniz?
- Vaxtım nə gəzir! Tez mişarlayıb qurtarmalıyam.
Sonda bir vacib detalı da deyim. Bu kitab, hətta Stiven Forbs, Larri Kinq, Bill Klinton kimi dünyaşöhrətlilərinin də həyatlarını dəyişib.
“Ədəbiyyat və incəsənət”
(13.01.2023)
Milli Kitabxanada yeni kitabların təqdimatı olacaq
Bu gün Milli Kitabxanada Mədəniyyət Nazirliyi ilə birgə Xalq yazıçısı, akademik Kamal Abdullanın və AMEA-nın müxbir üzvü, professor Rafiq Əliyevin müəllifləri olduğu “Kitabi-Dədə Qorqud və qeyri-səlis məntiq” kitabının təqdimatı keçiriləcək.
Bu gün eyni zamanda Milli Kitabxananın “Azərbaycanın görkəmli şəxsiyyətləri” layihəsi çərçivəsində nəşr etdiyi “Lütfi Zadə - Biblioqrafiya” kitabı da təqdim olunacaq.
“Ədəbiyyat və incəsənət”
(13.01.2023)
