Bilman İsaq, “Ədəbiyyat və incəsənət” üçün

Bu gün müstəqilliyimizin inkişafına doğru atılan hər bir addım, yazılan hər bir əsər müasir Azərbaycan ədəbiyyatı tariximiz üçün sanballı töhfədir. Şair-dramaturq Həsənəli Eyvazlı da «Türkmənçay qətli», «Araz sahilində doğan Günəş», «Qurtuluşa gedən yol» tarixi dramlarında, «Ərtoğrul Cavid, yaxud bir ailənin dramı» mənzum faciəsində, “Vəzifə hərisi”, “Yasda toy əhvalatı”, “Ruhların görüşü” və digər  pyeslərində müxtəlif dövrləri əhatə edən hadisə və əhvalatlara öz müəllif münasibətini bildirməklə qalmamış, tarixi keçmişimizin bir sıra qaranlıq məqamlarına aydınlıq gətirməyə çalışmış və buna nail olmuşdur. 

Həsənəli Eyvazlının əsərlərində  qarşıya qoyduğu yüksək əxlaqi-mənəvi keyfiyyətlərin bədii şərhi bir daha göstərir ki, zaman keçsə də bu əsərlər öz aktuallığını və əhəmiyyətini itirməmiş və itirməyəcəkdir.

2024-cü il 9 fevral tarixində  Naxçıvana Muxtariyyət verilməsinin 100 illiyi tamam olur. Azərbaycan Respublikası Prezidenti İlham Əliyev Muxtariyyətin 100 illiyinin təntənəli keçirilməsi haqqında sərəncam imzalanmışdır.

Bu günlərdə məlim oldu ki, Sərəncama uyğun olaraq Naxçıvan MR Mədəniyyət Nazirliyi bir sıra tədbirlərlə yanaşı şair-dramaturq Həsənəli Eyvazlının «Araz sahilində doğan günəş» əsərinin də yenidən Naxçıvan Milli Dram Teatrında tamaşaya hazırlanmasını məsləhət bilmişdir.

«Araz sahilində doğan günəş» tarixi dramının gənclərə vətənpərvərlik duyğularının aşılanması baxımından özünəməxsus yeri vardır. Əsər 10 aprel 2008-ci il tarixdə  Naxçıvan Dövlət Musiqili  Dram Teatrında  tamaşaya qoyulmuşdur. Daha sonra isə 2014-cü ildə  yenidən bərpa edilərək səhnə həllini tapmışdır.

Pyesdə Naxçıvana Azərbaycan Respublikasının tərkibində Muxtariyyət verilməsi ilə bağlı aparılan siyasi mübarizədən bəhs edilir. 1921-ci ildə bağlanmış “Moskva” və “Qars” müqavilələrinin mahiyyəti bədii dillə işıqlandırılmışdır. Əsərdə o dövrü əhatə edən tarixi faktlara, bədii, sənədli və mətbu materiallara və bir çox mənbələrə istinad edilmişdir. Əsərdə N. Nərimanov, Mustafa Kamal Atatürk, Heydər Əliyev, Mirzə Davud Hüseynov, Behbud ağa Şahtaxtinski, İbrahim Əbilov, Yusif Kamal, Veysəl Ünüvar, Bahadur Vəlibəyov, Georgi Çiçerin, İosif Stalin, Abbas Qədimov, Tağı bəy Səfiyev və s. kimi tarixi şəxsiyyətlər müasir tamaşaçının baxışları nöqteyi-nəzərincə dəyərləndirilmişdir. 

Əsərdə, Azərbaycanın ayrılmaz hissəsi olan Naxçıvanda yaşayan insanların real həqiqətləri əks etdirən müasir düşüncə tərzinə uyğun fikirləri bədii həllini tapmışdır.

Tarixi faktlara əsaslanan müəllif Naxçıvanın ermənilərə verilməsinə qarşı çıxan naxçıvanlıların əzmi, vətənpərvərliyi, bu işdə naxçıvanlılara tarixi köməyini əsirgəməyən qardaş Türkiyənin hərbi-mənəvi yardımını da əsərdə səmimi şəkildə işıqlandırmışdır.

Pyesdə adı çəkilən insanların fəaliyyəti haqqında arxiv materiallarından, eləcə də başqa mötəbər mənbələrin materiallarından istifadə edilmişdir. 

Müəllif böyük uzaqgörənliklə 1921-ci ildən 1992-ci ilə körpü salır. Əsrin əvvəllərində Naxçıvanın taleyi ilə bağlı ciddi narahatçılıq keçirən Nəriman Nərimanov, Mustafa Kamal Atatürk kimi  tarixi şəxsiyyətlərin Naxçıvanla bağlı narahatçılığına, sonsuz sevgisinə, bu torpağın böyük oğlu, dünya şöhrətli siyasi xadim Heydər Əliyevin də övlad sevgisini, yurd sevgisini qatır.

Müəllif tarixilik prinsipini gözləyərək süjeti tarixi bir ardıcıllıqla inkişaf etdirərək, müasir günümüzə qədər gətirib çıxarır. Əsərdən belə bir ideya ortaya çıxır ki, bu torpaq bizə ata-baba əmanətidir. Onu qorumaq, gələcək nəsillərə çatdırmaq isə torpaq üzərində gəzən oğulların vətəndaşlıq borcudur. Nəriman Nərimanovun, Mustafa Kamal Atatürkün düşmən pəncəsindən saldırdıqları Naxçıvan torpağını onların şərəfli yolunu ləyaqətlə davam etdirən ulu öndər Heydər Əliyev də bir övlad kimi üzərinə düşən şərəfli missiyanı uğurla sona çatdıraraq bu yurdun övladları üçün qoruyur, onu ata-baba əmanəti kimi Vətənin övladlarına tapşırır.

Əsərdə ermənilərin torpaq iddiaları, Stalinin, Çiçerinin onlara havadarlıq etmələri real tarixi faktlar əsasında təsvir olunur. Həmin dövrdə Azərbaycan SSR Xalq Komissarları Sovetinin Sədri Nəriman Nərimanovun və Azərbaycan SSR Ədliyyə Komissarı işləyən Behbud Şahtaxtinskinin Naxçıvanla bağlı nigarançılığı daha geniş, daha dolğun verilir.

Azərbaycan Yazıçılar və Jurnalistlər birliyinin üzvü, Naxçıvan MR-in Əməkdar mədəniyyət işçisi, Tərəqqi medallı, Prezident mükafatçısı Şair-dramaturq Həsənəli Eyvazlını «Araz sahilində doğan günəş» əsərinin  yenidən Naxçıvan Milli Dram Teatrında tamaşaya hazırlanması münasibəti ilə təbrik edir, yeni-yeni uğurlar arzulayırıq.

“Ədəbiyyat və incəsənət”

(08.02.2026)

Sərtyel, “Ədəbiyyat və incəsənət”

1.

Zəng.

-Salam. Siz şeytan ritualları keçirirsiz?

-Yox.

-Vəs vudu ritualları? 

-O da yox.

-Bəs hindusların təmizləyici Açaman ritualını?

-Əşi, yox.

-Onda heç olmasa zərdüştlikdən Navcot ritualı?

-Cavan oğlan, siz hara zəng etmisiz? Biz belə şeylərlə məşğul olmuruq.

-Bəs onda nə səbəbə adınızı Ritual xidmətlər agentıiyi qoymusuz? 

2.

Xüsusən nazirlər, icra başçıları evlərini, kabinetlərini təmiz saxlamalıdırlar, DTX çəkilişlə birgə gələndə içəri göz oxşamalıdır. Yoxsa içəri tör-töküntü olsa çəkilişdən sonra rüsvay olarlar.

3.

-indiki gəncliyin axırı necə olacaq?

-Heç nə, qocalacaqlar və deyəcəklər ki, indiki gəncliyin axırı necə olacaq?

4

Avropalı fermerlər tətil edərək avtomobil yollarını bağlayıblar ki, ötən il tətil nəticəsində avtomobil yollarının bağlanması zamanı onlara dəyən ziyan ödənilsin. 

5.

Cənnətlə cəhənnəmin fərqi nədir?

Odur ki, cəhənnəmdə biz etdiklərikizə görə ödəniş edirik, cənnətdə isə ödəniş etdiklərimizə görə edirik. 

“Ədəbiyyat və incəsənət”

(08.02.2024)

“Ədəbiyyat və incəsənət” portalı Zahirə Cabirin nağıllarını, əfsanələrini ardıcıl təqdim etməkdədir. Nağıllar uşaqlar üçün yaradılır. Amma bu nağılları böyüklər də məmnuniyyətlə oxuyurlar və bəyənirlər. Əfsanələr isə yurdumuzun qədim tarixi, toponimləri barədə hamı üçün bir mənbədir.

Qarqar dağı və Qarqar çayı (Xocalı)

Çox qədimlərdə ucadan-uca bir dağ vardı. Bu dağ qara yağışlı buludlardan yapıncı geyərdi. Qışın qarlı, şaxtalı günlərində belə başında ildırımlar çaxardı. Bu dağa kim pənah aparardısa əli boşa çıxardı. Dağdan aralı bir çay axardı. Novruzun on dördüncü günündə elin qız-gəlinləri evlərindəki səməniləri bu axar çaya atar, niyyət edərdilər. Bu məmləkətin şahı çox zalım və qaniçən idi. Aman-zaman, gözünün ağı-qarası bir qızı vardı. Qızını vəzirin bivec oğluna vermək istəyirdi. Şahın qızı isə çobanın oğlunu sevirdi. Bir gün şahın qızı sevdiyi çobanın oğlu ilə əhd- peyman bağlayır ki, bu diyardan qaçıb getsinlər. Bundan vəzir duyuq düşür, şaha qızının çobanın oğlu ilə qaçdığı xəbərini verir. Şah onların dalınca cadugün küp qarısını və atlılarını göndərir ki, ya ölülərini, ya da dirilərini tapıb gətirsinlər. Çobanın oğlu sevgilisini dağın ətəyində gözləyirdi. Qız gəlib çaya çatanda onların dalınca gələn şahın küp qarısı, cadugün çayı kükrədir, qız çayı keçə bilmir. Az qalır ki, batsın. Allaha yalvarır ki, onu quşa döndərsin. Həmin an qız qarğa olub uçmaq istəyəndə, cadugün bir naqqa balığı olub qarğanın ayaqlarından yapışır, suya çəkir. Qarğa “Qarrr”, “Qarrr” qışqırır, naqqa onu udur. Şahın adamları isə dağın ətəyində sevgilisini gözləyən çobanın oğlunu zəhərli oxla vurub öldürürlər. Həmin vaxtdan o çayın və dağın adı Qarqar qalır. Hər yazın əvvəlndə donan çayın buzu əriyir, sevən çay öz suları ilə dağa çırpılır, sevgilisini axtarır.

“Ədəbiyyat və incəsənət”

(08.02.2024)

Elman Eldaroğlu, “Ədəbiyyat və incəsənət”

Qadınlar güllər kimidirlər. Hər birinin öz gözəlliyi, öz təravəti olur. Nahaq yerə el arasında kimisə tərifləyəndə “gül kimidir” ifadəsini söyləmirlər ki... Bəli, güllərin hamısı gözəldir, amma aralarında ən gözəli QIZILGÜL sayılır…

Qəribə xanımdır, həyatından nə razılıq, nə də narazılıq edir. Acılı, şirinli yaşadığı bütün məqamları özünə doğma bilir. Taleyə, alın yazısına inansa da, ömür yolunu, həyat tərzini hər kəsin özü seçdiyini dilə gətirir. Kamal Abdulla, Anar, Vaqif Səmədoğlu, Rüstəm Behrudi, Ramiz Rövşən, Musa Yaqub, Sabir Rüstəmxanlı, Salam Sarvan, Pərviz Cəbrayıl, Qulu Ağsəs, Xanəmir kimi yazıçı və şairləri mütaliə etməkdən zövq alır. Gənclərin də yaradıcılığına biganə deyil, Aqşin Yeniseyin, Şərif Ağayarın, Varisin, Seymur Baycanın yaradıcılığına önəm verir. “Azərbaycanda iki zümrə yazar var: ya istedadının, ya da mütaliəsinin gücünə yazanlar. İkisi bir arada olanlar barmaqla sayılacaq qədərdir”, -söyləyir...

Deyir ki,- “Bütün uğurlu qadınların arxasında Allah dayanır. Uğur insanın çabası, fəaliyyəti ilə bağlı olsa da, burada şansın da çox böyük önəmi var. Allahın bizə verdiyi şanslar bəzən həyatımızı çox dəyişdirir. “Hər uğurlu kişinin arxasında bir qadın dayanır” sözünü mən də çox bəyənirəm. Dediyim kimi, hər uğurlu qadının arxasında da Allah dayanır. Yolumuzu müəyyənləşdirməkdə, çətinlikləri aşmaqda bizə doğrudan da gözə görünməz qüvvə kömək edir. Mən öz işimi çox sevirəm. İşləməsəydim bəlkə də çox yaxşı evdar qadın ola bilərdim. Amma təəssüf ki, özümdən asılı olmayan səbəblərdən buna kifayət qədər vaxt ayıra bilmirəm. Həftə sonları imkan düşdükcə çalışıram ki, yeməyi, səhər süfrəsini özüm hazırlayım. Uşaqları özüm yedirdim, onları gəzməyə çıxardım. Lakin bu, hər zaman alınmır...”

Haqqında söhbət açdığım xanım bir vaxtlar Milli Məclisdə təmsil olunan sabiq deputat, jurnalist, yazıçı, "Gündəlik Teleqraf" MMC-nin direktoru, publika. az, teleqraf. com və axar. az saytlarının rəhbəri Aynur Camalqızıdır. O, 1975-ci ildə Tərtər rayonunun Mamırlı kəndində anadan olub. Orta məktəbi bitirdikdən sonra Bakı Sosial İdarəetmə və Politologiya İnstitutunun (BSİPİ) Politologiya fakültəsində ali təhsilə yiyələnib. 1996–2000-ci illərdə "Azərbaycan Ordusu", "Xalq qəzeti", "Şans", "Ulus", "Millətin səsi", "Yeni Yüzil" qəzetlərinin müxbiri olub. 2001–2005-ci illərdə isə "Yeni Müsavat" qəzetində çalışıb. 2005-2010-cu illərdə parlamentdə Tərtər rayon 95 saylı dairənin seçicilərini təmsil edib. 2010-cu ildən bir neçə saytın rəhbəridir. Xidmətlərinə görə “Azərbaycan Respublikanın əməkdar jurnalisti” fəxri adı və “Tərəqqi” medalı ilə təltif olunub...

İşgüzar, qorxmaz, cəsarətli adamdır. Qarşısına qoyduğu məqsədə doğru inamla və inadla irəliləməyi bacarır. Onu nə dedi-qodu, nə məkirli niyyətlər yolundan saxlaya bilməz. İdarəetməni, təşkilatçılığı gözəl bildiyindən çoxdandır ki, rəhbərlik etdiyi kollektivin sevimlisinə çevrilib. Evinə-ocağına bağlı xanımdır. Ailədə həm ana və həm də həyat yoldaşı kimi, çox mehriban və səmimidir. Ötən gün - fevralın 7-si onun növbəti ad günüydü. Bir gün ötsə də bu münasibətlə onu təbrik edir, möhkəm can sağlığı, yaradıcılıq uğurları arzulayırıq. 

“Bütün yaşları sevirəm. Nə yaxşı ki, yaş üstünə yaş gəldikcə insan dəyişir. Bu təbiətin işidir və ömrünün sonuna kimi heç kim gənc qala bilməz. Hər yaşın öz gözəlliyi olur. Düşünürəm ki, qadınlar yaşlaşdıqca, daha da gözəlləşirlər. Mən hər bir qadına yaşlanmağı arzulayıram. Düzdür, öz şəxsi həyatımda doğmalarımı erkən yaşlarında itirmişəm. Bunun nə demək olduğunu bəlkə də mənim qədər heç kim anlaya bilməz. Amma yaşlanmaq, qocalmaq Allahın lütfüdür. Arzu edirəm ki, Allah bütün yaxşı, dəyərli insanlara 80, 100 il yaşamağı qismət etsin.”- söyləyir.

...Bəli, qadınlar güllərə bənzəyirlər, hər birinin öz gözəlliyi, təravəti olur. Bu güllərin arasında, nə qədər tikanlı olsa da, ən gözəli QIZILGÜL sayılır...

“Ədəbiyyat və incəsənət”

(08.02.2024)

Heyran Zöhrabova, "Ədəbiyyat və incəsənət"  

https://youtu.be/w6FLJgTax10?si=N3vlVxl6FyG53YET 

Gözlərin aldı məni

Kəməndə saldı məni

Getmə, getmə, gəl, gözəl yar

Getmə, getmə, gəl 

Amandır, qoymayın

Yar gözdən saldı məni

Getmə, getmə, gəl, gözəl yar

Getmə, getmə, gəl 

Qurbanam xan gözünə

Nazla baxan gözünə, yar

Qurbanam xan gözünə

Nazla baxan gözünə, yar 

Yenə sürmə çəkmisən

Evlər yıxan gözünə, yar

Getmə, getmə, gəl 

Elə bil qəsdi nədir

Gözlərin məsti nədir?

Getmə, getmə, gəl, gözəl yar

Getmə, getmə, gəl 

Yar məni incitməkdə

Bilmirəm, qəsdi nədir

Getmə, getmə, gəl, gözəl yar

Getmə, getmə, gəl 

Qurbanam xan gözünə

Nazla baxan gözünə, yar

Qurbanam xan gözünə

Nazla baxan gözünə, yar 

Yenə sürmə çəkmisən

Evlər yıxan gözünə, yar

Getmə, getmə, gəl 

Sənin ala gözlərin

Canım ala gözlərin

Getmə, getmə, gəl, gözəl yar

Getmə, getmə, gəl 

Qorxuram, birdən öləm

Yada qala gözlərin

Getmə, getmə, gəl, gözəl yar

Getmə, getmə, gəl 

Qurbanam xan gözünə

Nazla baxan gözünə, yar

Qurbanam xan gözünə

Nazla baxan gözünə, yar 

Yenə sürmə çəkmisən

Evlər yıxan gözünə, yar

Getmə, getmə, gəl... 

Ötən gün retro sevərlərin ən sevimli müğənnilərindən biri olan, ölməz sənətkar, xalq artisti Şövkət Ələkbərovanın anım günü idi. 

Şövkət Ələkbərova 1922-ci il oktyabrın 20-də Bakıda dünyaya gəlib.

Atası milli musiqimizə bağlı olan Şövkət xanımın anası qızlar orkestrində tarda ifa etmişdir. Valideynləri Şövkət Ələkbərovanın musiqiçi olmasını istədikləri üçün onu kamança sinfinə yazdırmışlar. Sonralar Şövkət xanım Asəf Zeynallı adına Musiqi Məktəbində Hüseynqulu Sarabskidən dərs alıb. 

1937-ci ildə bədii özfəaliyyət kollektivlərinin müsabiqəsində Üzeyir Hacıbəyov, Səid Rüstəmov və Bülbül kimi böyük sənətkarların diqqətini çəkən Şövkət Ələkbərova yekun konsertdə Qarabağ şikəstəsini oxuyaraq Fatma Mehrəliyeva və  Gülağa Məmmədovla birlikdə ilk üçlükdə yer alır.

O, 1938-ci ildən Azərbaycan Dövlət Mahnı və Rəqs Ansamblının, 1945-ci ildən isə Azərbaycan Dövlət Filarmoniyasının solisti olmuşdur. 

Qısa bir zamanda məşhurlaşan Şövkət xanım dillər əzbərinə çevrilən "Qaş qaralır", "Bir könül sındırmışam", "Bakı", "Dərələr", "Neylərəm"; "Füzuli kontatası", "Vağzalı çalınır", "Hardasan", "Şirin dil", "Çay", "Getmə" kimi mahnıları ilə çox sevilir. 

İfaçılığı ilə yanaşı xanəndəliyi ilə də tanınan Şövkət xanım "Seygah",  "Mirzə Hüseyn seygahı" "Qatar", "Şahnaz" muğamlarını da böyük məharətlə ifa etmişdir.

O, həmçinin "Görüş", "Bəxtiyar", "Mahnı belə yaranır", "Qızmar günəş altında", "Ögey ana", "Onu bağışlamaq olarmı" kimi filmlərin mahnlarını ifa etmiş, "Doğma xalqıma", "Payız konserti", "Oxuyur Şövkət Ələkbərova", "Azərbaycan elləri", "Səs" filmlərində iştirak etmişdir. 

Səməd Vurğun "Oxu gözəl" şeirini məhz Şövkət xanım üçün yazmışdır. 

O, 1954-cü ildə Azərbaycanın əməkdar artisti, 1959-cu ildə isə xalq artisti fəxri adına layiq görülmüşdür. 

Müharibədən əvvəl hərbi həkimlə ailə həyatı quran Şövkət Ələkbərovanın bu izdivacdan Natella adlı bir qız övladı dünyaya gəlir. Lakin həyat yoldaşı hədsiz dərəcədə qısqanc olduğu üçün evlilikləri uzun sürmür və onlar ayrılırlar. İkinci dəfə rejesor Lətif Səfərovla ailə qurur və bu evlilikdən də onun Bəşir adlı oğlan övladı doğulur.

Müharibədən qayıtmayan qardaşı MirƏləkbərin Validə adlı körpə qızını də övladlığa götürərək öz doğma qızı kimi böyüdür. Validə Şövkət Ələkbərovanın qızı olmadığını yalnız 3-cu sinifdə oxuyarkən öyrənir. Digər qardaşının Sevda və Eldar adlı uşaqları da elə Şövkət xanımın yanında böyüyürlər. 

Şövkət xanım Asəf Zeynallı adına Musiqi Məktəbində muğam dərsləri demiş və eyni zamanda Azərbaycanın bölgələrini dolaşaraq istedadlı gəncləri tapıb Bakıya gətirərək onların musiqi təhsili almasına kömək etmişdir.

Aybəniz Haşımova, Aygün Bayramova, Mənsum İbrahimov, Almaz Orucova,  Könül Xasıyeva kimi tanınmış ifaçılar Şövkət Ələkbərovanın tələbələri olmuşdur. 

Şövkət xanımın qızı Natella xərçəng xəstəliyindən dünyasını dəyişir. Bu ağır itki ilə dərindən sarsılan Şövkət xanım bu hadisədən sonra bir də səhnəyə çıxmır. 

Özünə qapanıb doğmalardan başqa heç kimi görmək istəməyən sənətkar özünü yalnızca bütün günü nəvəsinə lay lay çalmaqla ovudur. 

Şövkət xanım 1993-cü il fevral ayının 7-də dünyasını dəyişmiş və Fəxri xiyabanda dəfn olunmuşdur.

Ruhu şad olsun!

“Ədəbiyyat və incəsənət”

(08.02.2024)

Əlibala Məhərrəmzadə, “Ədəbiyyat və incəsənət”

Uğur üçün lazım olan keyfiyyətlər arasında biz bol informasiya almağın, mütaliənin necə vacib olmasını da sadalamışdıq.

Statistik hesablamalara görə hər bir uğurlu insanın il ərzində orta hesabla 19 kitab oxuduğunu da sizin diqqətinizə çatdırmışdım.

Bu hissədə kitablar barədə danışacağam, sizə kitab oxumaqdan, mütaliə etməkdən ibarət ev tapşırığını məhz motivasiya kitablarına, uğur yolunu göstərən kitablara istinadən verəcəyəm. Uğur yolunu göstərən kitabların növbəti TOP-10-unu təqdim edirəm.                                       

İkinci Top 10

1.     Entoni Robbins «Özündə nəhəngi oyat».

2.     Robin Şarma. «Titulsuz lider».

3.     Bodo Şefer. «Qaliblərin qanunları».

4.     Tom Piters. «Özünü brendə çevir»

5.     Con Maksvell «Uğurlu insanlar necə düşünür»

6.     Marşal Qoldsmit. «Başından uca tullan»

7.     Brayan Treysi «Maksimuma çatmaq».

8.     Devid C.Şvarts «Masştablı düşünmək sənəti»

9.     Norman Vinsant Ril «Pozitiv düşüncənin gücü».

10.Kennet Blanşar «Bir dəqiqəyə menecer olmaq».

“Ədəbiyyat və incəsənət”

(08.02.2024)

Turunc Baxışlı, “Ədəbiyyat və incəsənət”

Mübarizin Vətən yolunda verdiyi mübarizə bir vətəndaşın vətəninə, dövlətinə, xalqına məhəbbətinin aliliyini nümayiş etdirdi

 “Canım atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə artıq ürəyim dözmür. Allaha xatir bunu etməliyəm. Ən azından ürəyim sərinlik tapar. Şəhid olanadək bu şərəfsizlərin üzərinə gedəcəyəm. Şəhid olsam – ağlamayın. Əksinə, sevinin ki, o mərtəbəyə yüksəldim. Allaha ibadətlərinizi dəqiq yerinə yetirin. Çoxlu sədəqə verin. Seyid nəvəsi olaraq bunu etməliyəm. Allah böyükdür. Vətən sağ olsun. Oğlunuz Mübariz. Haqqınızı halal edin”(Mübariz İbrahimovun ailəsinə yazdığı son məktubundan)

Azərbaycan Milli Ordusunun giziri Mübariz Ağakərim oğlu İbrahimov 1988-ci il fevral ayının 7-də Biləsuvar rayonu, Əliabad kəndində anadan olmuşdur. 1994-2005-ci illər ərzində orta təhsilini Əliabad kəndində başa vurduqdan sonra hərbi xidmətə yollanmışdır. Daxili Qoşunların “N” saylı hərbi hissəsinin Xüsusi Təyinatlı Bölüyündə xidmət edən İbrahimov 2007-ci ildə çavuş rütbəsində hərbi xidməti başa vurmuşdur. O, 2009-cu ildə yenidən öz istəyi ilə cəbhə bölgəsində gizir rütbəsində xidmət göstərməyə başlamışdır.

O, deyirdi, “Mən yolumu seçmişəm. Əgər mən düşməndən ürəyimcə qisas almasam, elə bilərəm ki, Allahım da, valideynlərim də məni heç bir zaman bağışlamaz. Vətənin azadlığı üçün qurban lazımdırsa, onun biri də mən olmalıyam…”

Şəhidlik yenilməzlik əlamətidir. Mübariz işğal altında olan Vətən torpaqlarımızın, boynu bükük dağlarımızın, məlul baxışlı meşələrimizin, dili kilidlənmiş bulaqlarımızın həsrətini çəkirdi. Sözünün əvvəli də, axırı da Vətən idi. O, öz vətənini qorumağı və şəhid olmağı bir övlad kimi şərəf borcu bilirdi.

Unudulmaz Qəhrəman 18 iyundan 19 iyuna keçən gecə məktub yazaraq, heç kimə xəbər vermədən Dağlıq Qarabağ təmas xəttinə doğru irəlləməyə başlamışdır.O Tərtər rayonun Çaylı kəndində yerləşən Ermənistan Silahlı Qüvvələrinin zastavasına basqın etmişdir və burada təqribən beş saat  əzmlə döyüşərək səhər saatlarında şəhid olmuşdur. Baş tutan döyüş zamanı İbrahimov, müxtəliv mənbələrə görə, ən azı 45, ən çoxu 145 erməni əsgərini öldürmüşdür.

Döyüşdən sonra İbrahimovun nəşi Ermənistan Silahlı Qüvvələrinin işağlı altındakı ərazilərdə qalmışdır, lakin Ermənistan tərəfi bunu uzun müddət təkzib etmişdir. Aylarla davam edən əsaslı danışıqlardan sonra oktyabrda Rusiyanın    

Vasitəçiliyi ilə Həştərxan şəhərində imzalanan bəyannaməyə əsasən Mübariz İbrahimovun nəşi 6 noyabrda Azərbaycan tərəfinə təhvil verilmişdir. O, İkinci Fəxri Xiyabanda dəfn edilmişdir.

İkinci Qarabağ müharibəsi zamanı, 4 oktyabr 2020- ci ildə Mübariz İbrahimovun şəhid olduğu yer Azərbaycan Silahlı Qüvvələri tərəfindən azad edilmiş və burada Azərbaycan bayrağı dalğalandırılmışdır.

Vətən sevgisinin bənzərsiz tərcümanları olanları ruhumuzla hiss edirik. Müqəddəs zirvəyə ucalanların ürəklərinin dərinliyində Vətən dərdlərinin hüznlü həsrəti olmasaydı, onlar böyük sevgi yolunun yolçularına çevrilə bilərdilərmi?!

Xalqımızın şanlı tarixi çoxlu sayda qəhrəmanlıq səhifələri ilə zəngindir. Şərait qəhrəmanlar yaradır, qəhrəmanlar isə tarix. Vətən sevgisiylə bizlərin qüruru, vüqarı, fəxri, ölməzliyi, örnəyi olan Mübariz İbrahimov kimi.

Cəsurluq, igidlik, mərdlik nümayiş etdirən Mübariz İbrahimov Azərbaycan əsgərinin qəhrəmanlıq rəmzidir.

 Bayraqları bayraq edən üstündəki qandır,

Torpaq uğrunda ölən varsa Vətəndir.

Ruhun şad olsun Qəhrəman!

“Ədəbiyyat və incəsənət”

(08.02.2024)