Super User
Bu gün Növbədənkənar prezident seçkiləri günüdür və ölkədə qeyri-iş günüdür
Bu gün Azərbaycanda Növbədənkənar prezident seçkiləri günüdür. Seçki Məcəlləsinə əsasən, səsvermə günü seçki (referendum) keçirilən ərazidə iş günü hesab olunmur.
“Ədəbiyyat və incəsənət” portalı xəbər verir ki, səsvermə günü Azərbaycan Respublikasının Əmək Məcəlləsinə görə ümumxalq hüzn və ya iş günü hesab edilməyən bayram gününə düşərsə (Azərbaycan Respublikası Konstitusiyasının 84-cü maddəsinin II hissəsində nəzərdə tutulan hal istisna olmaqla), səsvermə səsvermənin keçirilməli olduğu ayın başqa iş gününə təyin edilir.
“Ədəbiyyat və incəsənət”
(07.02.2024)
ARKA fəaliyyətini genişləndirir
Azərbaycan Respublikasının Kino Agentliyinin baş direktoru vəzifəsini icra edən Orxan Fikrətoğlunun sədrliyi ilə 2023-cü ildə keçirilmiş Film layihələri müsabiqəsinin qalib kino şirkətlərinin nümayəndələri ilə görüş keçirilmişdir.
“Ədəbiyyat və incəsənət” portalı xəbər verir ki, qalib şirkətlərlə yeni hədəflərin müəyyən olunması, dövlət sifarişi ilə filmlərin istehsalı, Kino agentliyi və həmin şirkətlərlə istehsal prosesinin hüquqi tənzimlənməsi yolları müzakirə edilmişdir.
Kinoşünsaların, kino tənqidçilərinin proseslərə cəlb olunması məqsədi ilə Kino Agentliyi nəzdində Analitik təhlil mərkəzinin yaradılması qərara alınmışdır. Mövcud vəziyyətin Agentliyin saytında, sosial şəbəkə hesablarında, həmçinin, elektron kinojurnallarda analizi, təhlili və onların yayımlanmasının vacibliyi vurğulanmışdır. Bədii şuranın üzvü, kinorejissor Elxan Cəfərov, kino tənqidçiləri Nadir Bədəlov və Nəriman Əbdürrəhmanlı, yazıçılar Varis və Şərif Ağayar təkliflərlə çıxış etmişlər.
Sonda qalib şirkətlərlə istehsal proseslərinin tənzimlənməsi ilə bağlı fikir mübadiləsi aparılmışdır
“Ədəbiyyat və incəsənət”
(06.02.2024)
“YAŞAT” Fondu tərəfindən dəstək tədbirləri davam edir
Vətən müharibəsində iştirak edən qazimiz Arif Yusubov Əli oğlu ölkəmizin suverenliyi uğrunda vuruşub və ağır yaralanıb. Arif "Suqovuşanın azad olunmasına görə", “Cəsur döyüşçü” medalları ilə və 3-cü dərəcəli "Qüsursuz xidmətə görə", 3-cü dərəcəli “Vətənə xidmətə görə” ordeni ilə təltif olunub. Onun tibbi xərcləri “YAŞAT” Fondu tərəfindən qarşılanıb. Bu barədə “Ədəbiyyat və incəsənət” portalına “YAŞAT” Fondundan məlumat verilib.
Allah şəfa versin!
“YAŞAT” Fondunun hesabatları və xərclənən vəsaitlərlə bağlı ətraflı məlumatı yashat.gov.az rəsmi internet saytının “Hesabatlar” (https://yashat.gov.az/report/tableau) bölməsindən əldə edə bilərsiniz.
"Youtube" video: https://www.youtube.com/watch?v=akjFBo0RFM0
Yüksək keyfiyyətli formada videolink: https://we.tl/t-c9koKkFhyO
“Ədəbiyyat və incəsənət”
(06.02.2024)
Türk dünyasının mediatorları “ASAN xidmət”də
Türk Dünyası Mediatorlar Birliyinin rəhbəri, Türkiyə Ədliyyə Nazirliyinin Mediasiya Şurasının İdarə Heyətinin üzvü Yakup Erikelin başçılıq etdiyi nümayəndə heyəti Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan “ASAN xidmət” mərkəzinin fəaliyyəti ilə tanış olub. Bu barədə “Ədəbiyyat və incəsənət” portalına “ASAN xidmət”dən məlumat verilib.
Agentliyin Aparat rəhbəri Fuad Qarayev qonaqlara “ASAN xidmət” mərkəzlərinin yaradılması məqsədləri və həyata keçirilən fəaliyyət barədə ətraflı məlumat verib. Şəffaflığın artırılması və müasir innovasiyaların tətbiqi baxımından səmərəli dövlət idarəçiliyinin təmin edilməsi sahəsində ciddi nailiyyətlər əldə olunduğu diqqətə çatdırılıb.
2015-ci ildə Birləşmiş Millətlər Təşkilatının (BMT) Dövlət Xidmətləri Mükafatına, 2019-cu ildə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatına və 2023-cü ildə “Qlobal Hökumət Mükəmməlliyi Mükafatı” Proqramı çərçivəsində “Dünyanın Ən Qabaqcıl Dövlət Xidməti” seçilərək xüsusi mükafata layiq görüldüyü bildirilib.
Hazırda “ASAN xidmət” təcrübəsinin paylaşılması istiqamətində 20-dən çox ölkə və beynəlxalq təşkilatla əməkdaşlıq edildiyi barədə məlumat verilib.
Qonaqlar “ASAN xidmət” konsepsiyası, eləcə də Dövlət Agentliyi tərəfindən müxtəlif istiqamətlər üzrə həyata keçirilən fəaliyyətin onlarda yüksək təəssürat yaratdığını bildirib.
Nümayəndə heyəti “Bilim Bakı” mərkəzi, ASAN İnnovativ İnkişaf Mərkəzi, "INNOLAND" İnkubasiya və Akselerasiya Mərkəzi və “ABAD”ın fəaliyyəti ilə tanış olub.
“Ədəbiyyat və incəsənət”
(06.02.2024)
Bu günün duası
Sadiq Qarayev, “Ədəbiyyat və incəsənət” üçün
Fe-dəmir, özü oksigeni axtarır, onunla birləşir, paslanır;
Cu-mis, istilik verəndə (qızışdıranda) oksigenlə birləşir, paslanır;
Au- qızıl, heç bir şəraitdə oksigenlə birləşmir, keyfiyyətini itirmir, paslanmır...
İnsanlar da belədir:
Paslanan insanlar- əqidəsinə, vətəninə, namusuna xəyanət etmək üçün özü axtarır, tapır;
Mis insanlar- qıraq təsirlərdən (qızışıdırmaqdan) xəyanət , yaltaqlıq edir, namusunu itirib, paslanırlar... Ən təhlükəli kateqoriyadılar.
Qızıl insanlar- heç bir təsirdən mənliklərini itirmirlər, dəyişmirlər, paslanmırlar.
ALLAH bizləri paslanmaqdan hifz etsin. Satqınlardan, qəzəbinə gəldiklərindən və yolunu azmışlardan olmayaq. Hidayət edib, doğru yola yönəltdiklərindən, nemət verdiklərindən, dost bəndələrindən, elm, hikimət, əxlaq nəsib etdiklərindən olaq. Qarabağlı, Şuşalı, Naxçıvanlı, Bakılı- Qüdrətli Azərbaycanlı olaq.
Dünyanın harasında olursa olsun, hansı dindən, hansı xalqdan olmasından asılı olmyaraq köməyə ehtiyacı olanlara dua etmək əqidəsi, yardım etmək iqdidarı versin.
ALLAH acından, suzundan can verən, didərgin düşən müsəlmanlara kömək olsun, onlara güclü, demokratik dövlətlər nəsib etsin ki, əllərində olan nefti, qızılı almaq üçün şeytanın övladları, kapital sahibləri başlarına bombalar tökə bilməsinlər.
ALLAH məzlumların əzilə bilmədiyi, zalımların əzə bilmədiyi aləmlə, ictimai qurluşla bəşəriyyətə nicat nəsib etsin.
BUNLAR DA OLSUN BU
GÜNÜN DUASI.
“Ədəbiyyat və incəsənət”
(06.02.2024)
Unudulmaz sevgi şeirləri: Cabir Novruz, “Gecikmiş məhəbbət”
Rubrikanı aparır: Könül, “Ədəbiyyat və incəsənət”
Bir vaxtlar sovet gənclərinin ən sevdikləri, əzbər bildikləri bir şeir idi, Cabir Novruzun “Gecikmiş məhəbbət” şeiri. Bu şeirin sözlərinə Şəbnəm Tapdıqova bir başqa, Sərxan Sərxan bir başqa mahnı oxuyurdular.
Hər günü adınla başlayacağam,
Hər günü adınla bitirəcəyəm.
Səni röyalarda oxşayacağam,
Səni xəyallarda itirəcəyəm.
Doğrudan da möhtəşəmdir!!!
Sən gizli gəlmisən ömrümə, inan,
Bu gizli eşq ilə yaşayacağam.
Dünyanın ən ağır yükü sayılan,
Gecikmiş məhəbbət yaşayacağam.
Sən mənim ömrümdə açan çiçəksən,
Onu ürəyimdə bəsləyəcəyəm.
Sən məni heç zaman görməyəcəksən,
Mən səni hər zaman gözləyəcəyəm.
Uzaqdan göz qoyub gözünə sənin,
Sankı görəcəyəm allahımı mən.
Düşüb qarış-qarış izinə sənin,
Əzbərləyəcəyəm yollarını mən.
Səni zərrə-zərrə kəşf edəcəyəm,
Səni milyon kərə kəşf edəcəyəm.
Ərini oğlunu öyrənəcəyəm,
Rəngini, qoxunu öyrənəcəyəm.
Hər günü adınla başlayacağam,
Hər günü adınla bitirəcəyəm.
Səni röyalarda oxşayacağam,
Səni xəyallarda itirəcəyəm.
Sən məni heç zaman duymayacaqsan,
Mən bütün ömrünü izləyəcəyəm.
Sən mənə məhəl də qoymayacaqsan,
Mən səni həmişə səsləyəcəyəm.
Hər gün mənim üçün doğulacaqsan,
Hər gün mənim üçün yox olacaqsan.
Mənim sevincim də sən olacaqsan,
Mənim kədərim də sən olacaqsan.
Mən sənin adına hər saat, hər an
Qəlbimdə məktublar yollayacağam.
Sən heç vaxt fikrimdən çıxmayacaqsan,
Mən heç vaxt yadında qalmayacağam.
Beləcə həsrətlə qocalacağam,
Belə enəcəyəm, ucalacağam.
Keçib hər alovdan, keçib hər oddan.
Böyük əzabından şad olacağam.
Sən mənə həyatda ən doğma adam,
Mən sənə yaddan da yad olacağam
Sən ömr edəcəksən ayrı adamla,
Mən kiməm, nəçiyəm bilməyəcəksən.
Bir gün bu dünyadan sənin adınla
Köçüb gedəcəyəm bilməyəcəksən.
“Ədəbiyyat və incəsənət”
(06.02.2024)
Sumqayıtda o çox məşhur idi
Elman Eldaroğlu, “Ədəbiyyat və incəsənət”
"Qədeş, bəlkə gedib xəngəl yeyək"- hər dəfə görüşəndə zarafata salıb təklif edərdi. Çox mehriban, səmimi adam idi. Sumqayıtda, qonşu binalarda yaşayırdıq. Gah mağazada, gah avtobus dayanacağında, gah da məhlədə tez-tez rastlaşırdıq. Hər dəfə də görüşəndə, əhvalının necə olmasından asılı olmayaraq, adamı güldürür, keyfini açırdı...
Bəli, Xanlar Muradov yaxşı aktyor idi. Onu sizlərə xatırlatdım, çünki dünən vəfatının növbəti ildönümü idi.
Həm də, yaxşı insan idi. Necə deyərlər, yeyib içən, deyib güləndi. Axtarsaydın, məhlədə xətrini istəməyən adam tapılmazdı. Uşaqla uşaq, böyüklə böyüklük edərdi. Aktyorluğuna da söz ola bilməzdi. Onu Bəşir Səfəroğluna bənzədənlər də az deyildi. Arada zarafat edib, hansısa tamaşada dediyi kimi, ona "vur, vurum..." deyə müraciət edirdim. Deyirdi: "Qədeş, deyirsən vuruşaq, vuruşaq da, amma gəl birinci badələri vuruşduraq..."
Xanlar Muradov 1946-cı ildə Qaradağ rayonunun Lökbatan qəsəbəsində anadan olub. Əmək fəaliyyətinə H.Ərəblinski adına Sumqayıt Dövlət Dram Teatrında başlayıb və bu teatrda o, 50-yə yaxın rol oynayıb. Sonra 1975-ci ildən Azərbaycan Dövlət Musiqili Komediya Teatrında aktyor işləyib. Orada "Danabaş kəndinin əhvalatları"nda Xudayar bəy, "Qızıl toy"da Rəhim, "Subaylarınızdan görısiniz"də Seyfi, "Səhnədə məhəbbət"də Milyonçu, "Məhəbbət oyunu"nda Daşdəmirov, "Nəğməli Könül"də Fərrux və s. yaddaqalan obrazları yaradıb.
2000-ci ildə Respublikanın Əməkdar artisti fəxri adına layiq görülüb...
5 fevral 2005-ci ildə 58 yaşında ikən vəfat edib.
Ruhu şad olsun!
“Ədəbiyyat və incəsənət”
(06.02.2024)
Azdrama bizlərə martda “Əsrə bərabər gün” yaşadacaq
Könül, “Ədəbiyyat və incəsənət”
Türk dünyasının ən görkəmli yazarları sırasında yer alan dahi qırğız yazıçısı Çingiz Aytmatovun məşhur “Əsrə bərabər gün” romanını yəqin ki, çoxlarınız oxuyub. “Bu yerlərdə qatarlar elədən-elə gedir, belədən-belə” cümlələri ilə başlayan roman insan və Yaradan, insan və cəmiyyət, insan və təbiət ünsiyyətini, eləcə də qarşıdurmasını ustalıqla açır, mənəvi zənginliklər aşılayır.
Səhv etmirəmsə, ötən ilin noyabrında ilk dəfə xəbər tutduq ki, Azərbaycan Dövlət Akademik Milli Dram Teatrında bu romanın
əsasında eyniadlı tamaşa hazırlanacaq. Tamaşanın dekabrda nümayiş olunacağı da elan edilmişdi. Amma müəyyən səbəblər üzündən planlar dəyişdi, məşqlər təxirə salındı. Və budur, teatrdan gələn xəbərə görə, artıq tamaşanın məşqlərinə başlanılıb.
Xatırladım ki, səhnə əsərinin quruluşçu rejissoru teatrın bədii rəhbəri, Əməkdar incəsənət xadimi Mehriban Ələkbərzadədir. Elə bu ad bizə bəs edir söyləyək ki, möhtəşəm bir tamaşa görəcəyik - Çingiz Aytmatovun adına layiq!
Tamaşada altmış aktyorun rol aldığı bildirilir.
Xalq artistləri Nurəddin Mehdixanlı (Yedigey) Laləzar Mustafayeva (Ukubala), Cəfər Namiq Kamal (Müfəttiş), Bəsti Cəfərova (Nayman Ana), Rafiq Əzimov (Nayman tayfa başçısı), Əli Nur (Tansıkbayev-müstəntiq), Kazım Abdullayev (Konvensiya), Sabir Məmmədov (Mühəndis), Əməkdar artistlər Abbas Qəhrəmanov (Qazanqap), Anar Heybətov (Sabitcan), Elşən Rüstəmov (Abutalıb), Vəfa Rzayeva (Zərifə), Ayşad Məmmədov (Ədilbəy), Elxan Quliyev (Əbilov), Mirzə Ağabəyli (Cumaəli), Rövşən Kərimduxt (Juanjuan tayfa başçısı və Kospan), Rəşad Bəxtiyarov (Juanjuan), Məzahir Cəlilov (Qəbilə sakini), Kazım Həsənquliyev (Yolçu qonaq), Əlvida Cəfərov (Qəbilə sakini), Aslan Şirin (Osman və şagird), Əminə Babayeva (Bikə), Elşən Cəbrayılov (Baş mühəndis və hərbçi), Mətləb Abdullayev (Hərbçi), Elnar Qarayev (Kosmonavt), Almaz Amanova (Baş nəzarətçi), Cavidan Novruzov (Tansıkbayev), Şəhla Əliqızı (Ayzadə), İlyas Əhmədov (Ayzadənin əri), Rüstəm Rüstəmov (Qalibbəy), Vüsal Mustafayev, Elsevər Rəhimov, Corc Qafarov, Tural İbrahimov (Manqurtlar, əsgərlər və şagird), Cümşüd Zeynalov (Yolçu qonaq və trofim), Dilarə Nəzərova, Ləman İmanova, Firuzə Balayeva, (Naymanlar - qadınlar), Ramin Şıxəliyev (Maşinist və şagird), Elnur Qədirov (Konsmonavt), Elçin Əfəndi (Mühəndis), Rada Nəsibova, Afət Məmmədova (Paritet astronavtlar), Nəzrin Abdullayeva (Meşədöşlü), Aylin Həşimova (Şərafət) və Dəniz İmanlı (Səulə) - tamaşada iştirak edəcəklər.
İlk dəfəsində tanınmış aktyor Ramiz Məlik də heyətdə yer almışdı, Meşədöşlü rolunu oynayacaqdı. Amma dekabr ayında aktyor haqq dünyasına qovuşdu.
Yeni yaradıcılıq işinin quruluşçu rəssamı Əməkdar mədəniyyət işçisi İlham Əsgərovdur. Səhnə əsərinin bəstəkarı Azər Hacıəsgərli, geyim üzrə rəssamı Aygün Mahmudova, işıq üzrə rəssamı Rafael Həsənovdur. Plastik həll Ceyhun Dadaşova, qrafika və montaj işi Tərlan Əsgərli və Ruslan Kərimova məxsusdur.
Tamaşanın rejissor assistentləri Dilbər İsmayılova, Xanım Həsənova, Könül Kərimova, Vüqar Məmmədov və Nərmin Həsənovadır.
Qeyd edək ki, “Əsrə bərabər gün” tamaşası insanla yaradan arasındakı bağın mütləqliyi, yaradanın kamil insan gözləyişi konsepsiyası üzərində qurulub. Əcdadlarımızdan yaradana qədər gedən yol insan yaddaşından başlayır. Tarixi yaddaşı korlanmış, hafizəsini itirmiş xalq məhvə məhkumdur. Manqurtlaşmaq etnik təhlükənin son və sos siqnalıdır. Bu, həm də bəşəriyyətin iflasıdır.
SSRİ dağılan zamanlarda milli ideologiyalar arasında məhz manqurtlaşma ideologiyası öndə gedirdi ki, o da Çingiz Aytmatovun bu romanından götürülmüşdü.
Tamaşa Azərbaycan teatr tarixində yeni və ilk səhnə mühəndisliyi, rəssam işi, bədii tərtibatı ilə yadda qalacaq.
“Əsrə bərabər gün”ün premyerasının martda keçirilməsi planlaşdırılır.
Səbirsizliklə gözləyirik!
Şəkildə: tamaşanın quruluşçu rejissoru, teatrın bədii rəhbəri Mehriban Ələkbərzadə “Əsrə bərabər gün”lə bağlı yaradıcı heyət qarşısında çıxış edərkən.
“Ədəbiyyat və incəsənət”
(06.02.2024)
Sabah bəzi Bakıətrafı ərazilərdə havanın qısamüddətli yağıntılı olacağı ehtimalı var
Ekologiya və Təbii Sərvətlər Nazirliyinin Milli Hidrometeorologiya Xidməti sabaha - fevralın 7-nə gözlənilən hava proqnozunu açıqlayıb.
Prezident seçkiləri günündə Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gecə bəzi şəhərətrafı ərazilərdə havanın qısamüddətli az yağıntılı olacağı ehtimalı var. Mülayim cənub-qərb küləyi əsəcək. Havanın temperaturunun gecə 3-6°, gündüz 12-16° isti olacağı ehtimal edilir. Atmosfer təzyiqi normadan yuxarı - 762 millimetr civə sütunu, nisbi rütubət 65-75 faiz təşkil edəcək.
Azərbaycanın əksər rayonlarında havanın əsasən yağmursuz keçəcəyi, lakin gecə və səhər bəzi şimal və qərb rayonlarında havanın arabir yağıntılı olacağı, dağlıq ərazilərdə qar yağacağı proqnozlaşdırılır. Arabir duman olacaq. Qərb küləyi əsəcək, ayrı-ayrı yerlərdə arabir güclənəcək. Havanın temperaturunun gecə 0-5°, gündüz 13-18° isti, dağlarda gecə 2-7° şaxta, gündüz 1° şaxtadan 4°-dək isti olacağı bildirilir.
“Ədəbiyyat və incəsənət”
(06.02.2024)
Türkan qəbristanlığı gül-çiçəyə qərq edilib - AĞAXAN ABDULLAYEVİN DOĞUM GÜNÜNƏ
Könül, “Ədəbiyyat və incəsənət”
Əlibaba Məmmədov və Ağaxan Abdullayev dünyasını dəyişəndən sonra korifey muğam ifaçılarımızdan cəmi biri qaldı - 86 yaşlı Arif Babayev. Gəlin ölənlərə rəhmət, qalanlara cansağlığı diləyək.
Bu gün görkəmli xanəndə, Xalq artisti Ağaxan Abdullayevin anadan olmasının 74-cü ildönümü tamam olur.
Ağaxan Abdullayev 1950-ci il fevralın 6-da Bakı şəhərinin Əmircan kəndində anadan olub. 1958-1968-ci illərdə 84 nömrəli orta məktəbdə, 1969-1973-cü illərdə isə A.Zeynallı adına orta ixtisas musiqi məktəbində təhsil alıb. 1973-cü ildə Əbilov adına Mədəniyyət evində muğam ixtisası üzrə müəllim vəzifəsinə dəvət olunub.
Ömrünün 40 ilini Azərbaycan musiqisinin inkişafı və təbliğinə həsr edən böyük sənətkar Ağaxan Abdullayev Azərbaycanı qarış-qarış gəzib-dolaşıb, dünyanın 20-dən çox ölkəsinə qastrol səfərlərinə çıxıb. Hər yerdə Azərbaycan muğamlarını, xalq və bəstəkar mahnılarını böyük şövqlə, əsl ustalıqla ifa edib. O, nə oxuyubsa ürəkdən oxuyub. Onun Azərbaycan musiqisinin inkişafı naminə gördüyü işlər hər zaman yüksək qiymətləndirilib və xanəndə fəxri adlar, orden və medallarla mükafatlandırılıb. Ağaxan Abdullayevin böyük məharətlə və ilhamla ifa etdiyi muğam dəsgahlarının audio və videoyazıları Azərbaycan Televiziyasının qızıl fondunda saxlanılır.
Xanəndə pedaqoji və maarifçilik fəaliyyətinə böyük önəm verib. O, 1977-ci ildən ömrünü sonunadək A.Zeynallı adına musiqi məktəbində muğamdan dərs deyib, gənc xanəndələr nəslinin yetişməsində böyük əmək sərf edib, bir çox tanınmış xanəndələrin ustadı kimi tanınır. O, dəfələrlə televiziya muğam müsabiqələrinin münsiflər heyətinin üzvü olub.
Ağaxan Abdullayev uzun sürən ağır xəstəlikdən sonra 2016-cı il dekabrın 25-də 66 yaşında Bakıda vəfat edib. Vəsiyyətinə əsasən, Türkan qəsəbəsi kənd qəbiristanlığında valideynlərinin yanında torpağa tapşırılıb.
Bu gün Türkan qəbristanlığı gəlimli-gedimlidir. Çoxları unudulmaz sənətkarı yad edirlər.
Ağaxan Abdullayevin sənəti əbədiyaşardır. Bu ecazkar səs, bu sənət daim yaşayacaq.
Ruhu şad olsun!
“Ədəbiyyat və incəsənət”
(06.02.2024)
