Super User
Mühacir günü, Spilberq, Stradivari
Kənan Məmmədli, “Ədəbiyyat və incəsənət”
Bu günə təsadüf edən əsas əlamətdar hadisələri diqqətinizə çatdırırıq:
18 dekabr.
Beynəlxalq mühacir günü
İnternational Migrants Day 2000-ci ildən qeyd olunur. 1990-cı ilin həmin günündə mühacirlərin və onların ailələrinin hüquqlarının müdafiəsi Konvensiyası qüvvəyə minib. BMT-nin Baş Assambleyası bu zümrədən olan insanların müdafiəsinə qalxmaqla onlara qarşı tətbiq edilən ayrı-seçkiliyə son qoymağa cəhddə bulunub. Son hesablamalara görə, planetin hər 35-ci sakini mühacirdir.
Hazırda öz ölkələrindəki zülm və istibdaddan, müharibələrdən kütləvi şəkildə qaçan əfqanlar, suriyalılar dünya sərhədlərini didib-dağıtmaqdadırlar. Təbii ki, azərbaycanlılar da çoxsaylı mühacirləri ilə diqqət mərkəzində olmalıdırlar. Xüsusən, Rusiyada mühacirlərimizin sayı çoxdur, qeyri-rəsmi məlumatlara görə hətta iki milyon civarındadır. Ardınca Türkiyə gəlir. Güzəran dalınca qürbətə üz tutanlarımız əfsus ki milyonlarladır. Ən çox adamı ağrıdan da xaricə olan “beyin axınıdır”.
Beynəlxalq ərəb dili günü
BMT bu günü təqvimə salmaqla yanaşı, həm də ərəb dilini Baş Assambleyanın və onun komitələrinin rəsmi dilləri sırasına da aid edib. Dinimizin dilinin bu qədər ucalması əlbəttə ki, mütərəqqi haldır. İstəyərdim ki, başında zat aliləri Allahşükür Paşazadə dayanan dini qurumlarımız bu fakta diqqət yetirsinlər, ucdantutma ərəbcə bilməyən mollaların peyda olmasına göz yummasınlar. Yazıçı Varis bir əhvalat danışıb. Tələbəlik vaxtı bir dəfə Qazaxın Yuxarı Salahlı kəndinə gedibmiş, yas mərasimi idi, bir molla əlində tutduğu kağızdan “Quran” kəlmələrini izhar edirdi, camaat da kirimişcə onu dinləyirdi. Təsadüfən gözü mollanın “şparqalkasına” sataşıb, görüb ki, orda ərəb əlifbası (yəni bizim əski əlifba) ilə Səməd Vurğunun şeiri yazılıb : “El bilir ki sən mənimsən, Yurdum yuvam məkənimsən...” Ehmalca mollanın qoluna toxunub qulağına pıçıldayıb ki, əlindəki vərəqdə şeir yazılıb. Molla da yalvar-yaxar eləyib ki, bəs qadan alım, çörəyimə bais olma.
Qətərin milli günü
Nefti və qazı ilə xalqını xoşbəxt edən Qətər dövlətinin bu gün bayramıdır, müstəqilliklərinin ildönümüdür. 1878-ci ilin 18 dekabr günü müstəqil Qətərin qurulduğu gündür. Qətər dövləti quruluşca monarxiyadır. Ərazisi tamamilə səhralıq olan Qətərdə neft və qaz pulları ilə əsl cənnət yaradılıb. Neft və qaz Qətəri Ümumi Daxili Məhsula görə dünyanın lider dövlətinə şevirib. Qətər adambaşına düşən gəlirə görə də dünya lideridir, bu rəqəm bizlərin yuxusuna belə girməyən həddədir – 88222 ABŞ dolları!!! Orada yerli əhali məmurları və biznes sahiblərini çıxmaq şərti ilə demək olar ki işləmir, neft və qazdan adambaşına hesablanan aylıq gəlirlə bəy balası kimi yaşayır, bütün qara işləri gəlmə qasrtobayterlər görürlər.
Əslində Qətər barədə çox danışmaq olar, amma qibtə və paxıllıqdan susmağa üstünlük verirəm.
Spilberqdən Stalinə qədər
Ruslarda “ZAQS” işçiləri, yəni kəbinkəsənlər günüdür. Moldovanlarda polis günü, anqolalılarda mədəniyyət festivalı günləridir. Britaniyalılar Milli Stilton pendiri gününü qeyd edəcəklər. Amerikalılar isə onların açığına Milli Peçenyebişirmə gününü qeyd edəcəklər, üstəlik, “Mən bal sevirəm” gününü qeyd edəcəklər, hələ üstəlik Milli qızartma çoşka gününü də qeyd edəcəklər.
Vyetnamlıların bu gün matəm günüdür, 1972-ci ildə ABŞ prezidenti Nikson Şimali Vyetnamın bombalanması əmrini verib, 1600 vətəndaş həlak olub; 1940-cı ildə 3-cü reyx məşhur Barbarossa planını təsdiqləyib; 1963-cü ilin bu günündə dünyaca məşhur Amerika aktyoru Bred Pitt dünyaya gəlib. Onunla eyni gündə ad gününü dünyaca məşhur Amerika rejissoru Stiven Spilberq də qeyd edir. Stiven Breddən 17 yaş böyükdür. 1921-ci ilin bu günündə komedik filmlərinə günü bu gün də sevə-sevə baxdığımız məşhur sovet aktyoru Yuri Nikulin doğulub. 1878-ci ilin 18 dekabrı isə dünyaya İosif Stalin adlı tarixin ən qəddar diktatorlarından birini bəxş edib.
18 dekabrda dünyadan köçənlərdən isə çex prezidenti, həm də dramaturqu Vaslav Qaveli (2011), island şairi, island himninin müəllifi Mattias Yokumsonu (1920) və dünyaşöhrətli İtaliya skripka ustası, 1200 skripka düzəltmiş Antonio Stradivarini (1737) göstərə bilərik.
“Ədəbiyyat və incəsənət”
(18.12.2024)
GÖZƏL XƏBƏR - Kitabçılığa töhfə verən ziyalılar mükafatlandırılacaqlar
Hər zaman kitabçılığın və kitabın dostu olan Azərbaycan Nəşriyyatları Assosiasiyası (ANAİB) kitab sənayesinin inkişafı və təbliği ilə bağlı 3 mükafat təsis edib.
“Ədəbiyyat və incəsənət” portalına ANAİB-dən verilən məlumata görə, bu mükafatlar aşağıdakılardır:
Daş kitabə – Azərbaycanda mütaliə mədəniyyətinin inkişafındakı xidmətlərinə görə;
Kitabın səfiri – Azərbaycanda kitabçılıq işinin inkişafı və kitaba marağın artırılması istiqamətində ardıcıl fəaliyyətinə görə;
ANAİB-in dostu – Azərbaycan Nəşriyyatları Assosiasiyası İctimai Birliyinin (ANAİB) təşkilatçılığı ilə keçirilən tədbirlərdə fəal iştirakına, maddi və mənəvi dəstəyinə görə.
ANAİB sədri Şəmil Sadiqin sözlərinə görə, mükafat sahibləri hər ilin sonunda rəhbərlik etdiyi qurumun idarə heyəti tərəfindən müəyyənləşdirilərək sahiblərinə təqdim ediləcək. Sədr onu da bildirib ki, 2024-cü il üzrə mükafatın sahibləri artıq məlumdur.
Mükafatlar öz sahiblərinə 19 – 22 dekabr tarixlərində keçiriləcək ANAİB I Bakı Kitab Festivalında təqdim olunacaq. Təqdimetmə mərasimi hər ilin sonunda ANAİB-in təşkil etdiyi Bakı Kitab Festivalında keçiriləcək.
Mükafatlandırılanların siyahısını təqdim edirik:
“Daş kitabə” nominasiyasının qalibi:
- Fazil Mustafa, Milli Məclisin İctimai birliklər və dini qurumlar komitəsinin sədri.
Kitabın səfiri nominasiyası ilə təltif edilənlər:
- Fərid Cəfərov, mədəniyyət nazirinin müavini;
- Bahar Muradova, Ailə Qadın və Uşaq Problemləriüzrə Dövlət Komitəsinin sədri;
- Elnur Nəsibov, Təhsilin İnkişafı Fondunun sədri;
- Rəşad Məcid, Mətbuat Şurasının sədri;
- Rafiq Həşimov, Əməkdar artist.
ANAİB-in Fəxri üzvü nominasiyası ilə təltif edilənlər:
- Əkbər Qoşalı, Mədəniyyət Nazirliyi yanında İctimai Şuranın sədr müavini;
- Mikayıl Yusifov, “İnci” Şirkətlər Qrupunun idarə heyəti sədri;
- Nüşabə Hüseynli, Əməkdar jurnalist;
- Tahir Əliyev (Tahiroviç), Azərbaycan Kinematoqrafçılar İttifaqının katibi;
- Hüseyn Hüseynov, AMEA Mərkəzi Elmi Kitabxanasının direktoru.
“Ədəbiyyat və incəsənət”
(18.12.2024)
Gəncəlilər “Qadınım”a baxıblar
Fikrət Əmirov adına Gəncə Dövlət Filarmoniyasında Azərbaycan Dövlət Akademik Musiqili Teatrının ifasında türk dünyasının tanınmış yazıçı-dramaturqu Tuncər Çücənoğlunun “Matryoşka” pyesi əsasında hazırlanan “Qadınım” tamaşası nümayiş etdirilib.
“Ədəbiyyat və incəsənət” portalına Filarmoniyadan verilən məlumata görə, türk retro musiqilərinin canlı ifa olunduğu tamaşanın süjet xəttində sevgi və ehtiras dolu iki aşiqdən bəhs olunur.
Tamaşada Əməkdar artist Nigar Şahmuradova, gənc aktyorlar Əmrah Dadaşov və Gültac Əlili, teatrın xor və balet heyəti iştirak ediblər.
“Qadınım” tamaşasının quruluşçu rejissoru İradə Gözəlova, quruluşçu rəssamı Vüsal Rəhim, xormeysteri Məlahət Qasımova, musiqi tərtibatçısı Əmrah Dadaşovdur.
Tamaşa Gəncə sakinləri tərəfindən böyük rəğbətlə qarşılanıb.
“Ədəbiyyat və incəsənət”
(18.12.2024)
Gürcüstanda Ulu Öndər Heydər Əliyevin xatirəsi yad edilib
Ümummilli Lider Heydər Əliyevin əziz xatirəsi Gürcüstanın müxtəlif bölgələrində yad edilib. Bu barədə “Ədəbiyyat və incəsənət” portalına Diasporla İş Üzrə Dövlət Komitəsindən məlumat verilib.
Rustavi Təhsil və Mədəniyyət Mərkəzində Azərbaycan xalqının Ümummilli Lideri Heydər Əliyevin anım gününə həsr olunmuş açıq dərs keçirilib.
18 saylı ictimai məktəbin tarix müəllimi Savalan Osmanlı Mərkəzin nəzdindəki dil kurslarında təhsil alan şagirdlərə Heydər Əliyevin həyat və fəaliyyəti haqqında məlumat verib. Daha sonra Mərkəzin üzvləri və şagirdlər Rustavi şəhərində Ulu Öndərin abidəsini ziyarət edərək önünə əklil və gül dəstələri qoyublar.
Marneulidə Gürcüstan Azərbaycanlılarının İnteqrasiya Mərkəzində (GAİM) keçirilən anım tədbiri Ulu Öndərin xatirəsinin bir dəqiqəlik sükutla yad edilməsi ilə başlayıb. Sonra GAİM-nin icraçı direktoru Murad Muradov gənclərə Ulu Öndərin həyat və fəaliyyəti, Gürcüstan-Azərbaycan münasibətlərinin inkişafındakı rolu, Gürcüstanda yaşayan soydaşlarımıza doğma münasibəti barədə məlumat verib. Ümummilli Lider Heydər Əliyevin həyatından bəhs edən sənədli film nümayiş olunub.
Bolnisidə fəaliyyət göstərən “Qafqaz Hüquq və İnteqrasiya Mərkəzi”nin təşkilatçılığı ilə “Dahi Şəxsiyyət Qəlblərdə” adlı anım tədbiri keçirilib. İlk olaraq Ulu Öndərin xatirəsi bir dəqiqəlik sükutla yad edilib. Mərkəzin rəhbəri Rezo Həsənov Ulu Öndər Heydər Əliyevin həyat və fəaliyyətindən danışıb. Sonda “Xalq Heydər Deyəcək” adlı video çarx göstərilib.
“Qardabani Təhsil və İnteqrasiya Mərkəzi”ndə də Azərbaycan xalqının Ümummilli Lideri Heydər Əliyevin xatirəsi anılıb. Mərkəzin Azərbaycan dili və ədəbiyyat müəllimi Sevda Şahverdiyeva mərkəzin şagirdlərinə müstəqil Azərbaycan dövlətinin qurucusu və memarı, dünyaşöhrətli siyasətçi Ümummilli Lider Heydər Əliyevin Azərbaycana rəhbərliyinin bütün dövrlərində vətən və xalq qarşısındakı misilsiz xidmətlərindən danışıb. Tədbirin sonunda mərkəzin üzvləri Ümummilli Liderin abidəsini ziyarət edərək önünə gül dəstələri düzüblər.
“Ədəbiyyat və incəsənət”
(18.12.2024)
Dünən onun günü idi
Elman Eldaroğlu, “Ədəbiyyat və incəsənət”
Dünən onun 100 illiyi idi. Gün ərzində hamı ondan yazdı deyə mənim yazım bu günə qaldı.
Deyirdi ki:- “Mənim dünyagörüşüm, həyata baxışım iki zəmində formalaşıb. Biri məktəb mühiti, digəri ailə. Məktəb, istər şagirdkən, istər tələbə ikən kommunist ideallarına sədaqət ruhunda tərbiyələndirirdi. Ailəmizdə isə bəzəksiz, hay-küysüz mühit hökm sürürdü. Dayılarım cəmiyyətin iyrəncliyini bütün çılpaqlığı ilə söyləyir, nifrətlərini gizlətmirdilər. Onların sualları təbii ki, məni də düşündürürdü: Namuslu filankəsi gecə ikən niyə apardılar? Namussuz filankəs isə öz keyfindədir, niyə? Bir sözlə, ailəmiz qapalı, məhdud çərçivədə cəmiyyətin müxalif qüvvəsi idi. Bax, özüm də müəllim ikən çalışmışam ki, tələbələrim sərbəst düşünsün, ətrafda baş verən hadisələri açıq gözlə götür-qoy etsinlər, özləri düzgün nəticə çıxarsınlar.”
1924-cü ildə Şəkidə anadan olmuşdu. 3 yaşında ikən atasını itirmişdi. Bakı Dövlət Universitetinin Jurnalistika şöbəsini bitirdikdən sonra Moskvada aspiranturaya daxil olmuş, 1954 –cü ildə “1917-1918-ci illərdə Azərbaycan mətbuatı” mövzusunda namizədlik dissertasiyasını müdafiə etmişdi. Elə həmin ildən də Bakı Dövlət Universitetində pedaqoji və elmi fəaliyyətlə məşğul idi. Jurnalistika fakültəsində təhsil alan tələbələr üçün yazdığı dərsliklərə, çoxillik elmi-pedaqoji fəaliyyəti üçün, o professor adına layiq görülmüşdü. Xidmətlərinə görə “Şərəf” ordeni ilə təltif olunmuşdu...
94 il ömür sürdü. Ömrünün son illərində:
“Azərbaycan tarixi hələ sovet dövrünün təsiri altından çıxmayıb. Bizim tarixçilərin başı sovet ideologiyası ilə yoğrulub. İstəsələr də istəməsələr də, adların nə qoysalar da aldıqları təhsil, düşüncə tərzi Müsavat düşmənçiliyində bu özünü göstərir. Vaxtilə Çingiz Aytmatovla söhbətimiz olmuşdu ki, bizdə həqiqi müstəqillik dövrü vətəndaşının yetişməsi üçün bir neçə nəsil dəyişməlidir. Bunu bilirsənmi, oğul?! İndi bu kitabı da işləyəcəyəm. 128 səhifəlik bir kitabdır. Elə də böyük bir problem deyil. Dil ayrıdır, sadəcə çevirmək qalır. Bir başqa fəaliyyətim də var. Rəsulzadə parlamentdə Müsavat fraksiyasının rəhbəri olub. Bizim parlamentdə 1918-ci il dekabr 7-dən 1920-ci il aprelin 27-dək 143 iclas olub. Bunların əksəriyyətində Rəsulzadənin çıxışları, replikaları olub. Onu yığıb bir kitab şəklində türklər buraxıblar, amma biz buraxmamışıq. O kitab parlamentin iki cildlik stenoqramı əsasındadır. Mən indi o stenoqramı orijinalla yoxlayıram. Görürəm ki, çox ciddi səhvlər var. Sağ olsunlar çap ediblər, əməklərini qiymətləndirmək lazımdı, amma gərək orijinalla da yoxlanıla. Onu vaxtilə riyaziyyat müəllimi Səhənd İbrahimov köçürüb. Mən yenidən yoxlayıram və görürəm ki, yenidən çap etmək lazımdı. Mən təxminən 40 iclasın protokolunu orijinalla yoxlayıb hazırlamışam. İlk parlamentimizin sənədləri 3 cilddə çap olunacaq. Bilirsiz, yaşıma görə bu gün mən çox tələsirəm. Ayrı vaxtlar 6 saat işləyirdimsə bu gün 10 saat işləyirəm.”- söyləyirdi...
Çox baməzə insan idi. Dərs zamanı auditoriyada adətən müəllim masasında əyləşməzdi, tələbələrin arasında olardı. Soruşanda ki, niyə müəllim masasında əyləşmirsiniz, cavabı məzəli olurdu. Yaşım çoxdur, gənclərin arasında oluram ki, Əzrail məni tapa bilməsin...
Bir dəfə də mərhumlrdan kiminsə dəfn mərasimində niyə iştirak etmədiyini ondan soruşanda- “Bu yaşımda qəbirsitanlığa gedib geri dönmək mənim üçün çox ağırdır.”- :deyə cavab vermişdi...
Bəli, dünən haqqında söhbət açdığım professor Şirməmməd Hüseynovun 100 illiyi idi.
Azərbaycan Demokratik Respublikasının, eləcə də qurucu babalarımızın fəaliyyətinin, o cümlədən milli mətbuat tariximizin araşdırılmasında onun misilsiz xidmətləri olub. İllər ötəcək, nəsillər bir-birini əvəz edəcək, hər dəfə cümhuriyyət tariximizdən söhbət düşəndə Şirməmməd Hüseynovun adı ehtiramla yad olunacaq və onun ölməz əsərlərinə istinad ediləcək...
Ruhu şad olsun!
“Ədəbiyyat və incəsənət”
(18.12.2024)
Son ay… Yeni həftə… Birinci gün…
Əkbər Qoşalı, “Ədəbiyyat və incəsənət” üçün
Dünən yeni iş həftəsi başladı. Hər başlanğıc bir çağırışdır, bir ümiddir, eləcə də, məsuliyyətdir. Biz bu başlanğıca “qutlu olsun” deyirik, amma bu qutluluq yalnız bir yerigəlmiş söz deyil, əməyin, niyyətin təcəssümündə tapılacaq həqiqət kimi gəlir mənə…
İşə, əməyə münasibət həmişə fərqli yanaşmalarla, hətta ideoloji “süsləmə”lərlə müşayiət olunub. Tarixin müxtəlif dönəmlərində əmək insan üçün həm bir zərurət, həm də yaradıcılığın ifadəsi - özünüifadə forma və məzmununda təcalla edib. Bu gün isə əmək anlayışı yeni trendlərlə, yeni çağırışlarla çevrələnib. Bir tərəfdə sürətli texnologiyalar, avtomatlaşdırma, virtuallaşma… digər tərəfdə insanın daxili axtarışları, mənəvi məmnuniyyət arzusu və ehtiyacı!.. Bu şəkillənməni “vəhdəti-vücud” misalı qəbullanmaq çətindir və bəlkə də, bir təzad söz konusudur… Bəzən bizi yanılqıya uğradar bəlkə, amma hər bir başlanğıcda bu ziddiyyətlərdən yeni bir harmoniya yaratmaq mümkündür deyə ümidlənmək haqqımız vardır…
Hələ-hələ ilin son ayının həftələri, günləri bir başqadır. Həm təqvimin sonu, həm də yeni bir gün, həftə başlanğıcı (zaman dilimi içində) təzadlı da görünür, ilhamverici də… - Cilvəsi, ricəti və bir başqa halı var son içindəki ilklərin... Sanki bir tərəfdən yekunların ağırlığı çiyinlərimizə düşür, digər tərəfdən isə qarşıdan bir əl eləyən, irəli çağıran var…
Deyirəm, gör, necə də qəribədir:
bir tərəfdə başa çatmaqda olan təqvim ilinin hesabatlılığı, o bir tərəfdə isə yeni ilin diləkləri, gözləntiləri... Bu təzadlar, əslində, bizə həyatın mahiyyətini xatırladır: hər son yeni bir başlanğıcdır. Keçmişin yükünü dərk etmək bizi irəliyə daha inamla addımlamağa hazırlamalı...
Həftənin ilk günü – bir başlanğıcın ən təmiz anı olsa gərək... Bu gün özümüz özümüzə suallar veririk… Suallar da adamlar, adamların ovqatı kimi dəyişimlər göstərir… Və düşüncə öz sual atını çapırdır, çapırdır: həftənin sonunda özümüzü hansı mənəvi zənginliklərlə görə biləcəyik?..
İkin son ayının gün, həftə başlanğıclarını həyatımızda kiçik bir fəslin açılışı kimi qəbul etsəkmi, əcaba?.. Bu kiçik fəsildə ilhamı, ümidləri, yaradıcılığı və həmrəyliyi bir araya gətirə bilərikmi?.. Həyatımızın hər ayı, həftəsi, günü… hətta bir anı, bizə fürsət kimi verilib - elə deyilmi?.. (Hələ orta məktəb illərində bir qəzetin poeziya səhifəsində oxumuşdum: “Son nəfəs də son fürsətdir”)… Fürsətləri dəyərləndirə bilsək, yaradıcı davransaq, gözəl düşünsək, xoşgörülü olsaq - bu, bizi bizdən üstün etməzmi?.. Yoxsa, hər fürsət qovalayan, fürsətkar olanlar bizdən deyil…
İlk günü ilə yeni başlayan həftə də, qarşıdan gələn yeni il də ulusumuz üçün xeyirli-uğurlu, düşərli və dəyərli olsun! Zamanın ayrıcından (sanki uçqun qırağındanmış kimi!) bir çiçək qoparmaq öz əlinizdədir - deyir arif... - O çiçəyi sevgi ilə sulayıb, ümidə bürümək çiçəyə çox şey verməz bəlkə - necə olsa da, çiçək çiçəkdir - ömrü illa qısadır; ancaq çiçəyə qulluq edən əllər də çiçəkləyər, ürəklər gül açar, çevrə gözəlmi-gözəl qoxulara qərq olar - dörd yanımız könül qoxuyar… - Elə deyilmi?..
Uca könüllərə salam olsun!
“Ədəbiyyat və incəsənət”
(17.12.2024)
Gənclər Kitabxanasında professor Şirməmməd Hüseynovun 100 illik yubileyi ilə əlaqədar olaraq elektron məlumat bazası hazırlanıb
Bu gün Azərbaycanın görkəmli alimi, professor Şirməmməd Hüseynovun 100 illik yubileyi tamam olur. Cəfər Cabbarlı adına Respublika Gənclər Kitabxanasında Azərbaycanın görkəmli alimi və mətbuat tədqiqatçısı Şirməmməd Hüseynovun həyat və fəaliyyətinə həsr edilmiş elektron məlumat bazası hazırlanıb.
“Ədəbiyyat və incəsənət” portalına Kitabxanadan verilən məlumata görə, kitabxananın rəsmi saytında yerləşdirilən elektron bazada alimin “Şərəf” ordeni ilə təltif edilməsi haqqında Azərbaycan Respublikası Prezidentinin Sərəncamı, layiq görüldüyü orden və mükafatlar, Şirməmməd Hüseynova həsr edilən Milli Məclisin sədrinin müavini, akademik Rəfael Hüseynovun “Millət yaddaşının keşikçisi”, AMEA-nın Nizami adına Ədəbiyyat İnstitutunun şöbə müdiri, filologiya elmləri doktoru, professor Asif Rüstəmlinin “Cümhuriyyət adamı” kimi məqalələrinin tam mətni, bir sıra görkəmli şəxslərin onun haqqında söylədikləri dəyərli fikirlər yer alır. Elektron məlumat bazasında alimin müəllifi və redaktoru olduğu, ön söz yazdığı kitabların, məqalələrin siyahısı təqdim edilir. Müəllif haqqında qələmə alınan kitab və məqalələrin yer aldığı elektron bazada alimin xatirəsinin əbədiləşdirilməsinə dair məlumatlar, virtual kitab sərgisi, video və foto qalereyası da sərgilənir.
“Ədəbiyyat və incəsənət”
(17.12.2024)
Praqada Böyük Azərbaycanlı anılıb
Praqada Azərbaycan Mədəniyyət Evinin təşkilatçılığı ilə Azərbaycan xalqının Ümummilli Lideri Heydər Əliyevə həsr olunmuş anım tədbiri keçirilib.
“Ədəbiyyat və incəsənət” portalına Diasporla İş Üzrə Dövlət Komitəesindən verilən məlumata görə, tədbirdə mədəniyyət nümayəndələri və Azərbaycan diasporunun fəalları görkəmli siyasi xadimin həyat və fəaliyyətindən, Azərbaycan üçün xidmətlərindən söz açıblar.
Azərbaycan Mədəniyyət Evinin rəhbəri, şair və dramaturq Leyla Cəfərova (Begim) Ulu Öndər haqqında danışarkən “Ümummilli Lider Heydər Əliyev yalnız müasir Azərbaycan dövlətinin siyasi lideri və memarı kimi deyil, həm də mədəniyyətimizin qoruyucusu kimi tarixə düşüb”, - deyə vurğulayıb.
Qlobal miqyaslı siyasətçi, dahi şəxsiyyət Heydər Əliyev haqqında dünya liderlərinin və mədəniyyət xadimlərinin çıxışlarını əks etdirən video çarx nümayiş olunub.
Tədbirdə Heydər Əliyev Fondunun vitse-prezidenti Leyla Əliyevanın “Elegiya”sı səsləndirilib.
Qeyd edək ki, Praqa şəhərində yerləşən Azərbaycan Mədəniyyət Evi Diasporla İş üzrə Dövlət Komitəsinin dəstəyi ilə cari ildə açılıb və aktiv fəaliyyət göstərir.
“Ədəbiyyat və incəsənət”
(17.12.2024)
CƏLİL XƏLİLOV: DTX cinayətlərin qarşısını planlaşdırma mərhələsində almaqla yüksək peşəkarlıq sərgiləyir
Məlum olduğu kimi, Dövlət Təhlükəsizliyi Xidməti tərəfindən təxribat və girov götürmə cinayətlərini planlaşdıran ekstremist qruplaşma ifşa edilib. Məlum olub ki, cinayət qruplaşmasının üzvləri mütəşəkkil dəstə halında ölkənin müdafiə qabiliyyətinə və iqtisadi təhlükəsizliyinə ziyan vurmaq məqsədilə Azərbaycan Respublikasının dövlət sərhədində yerləşən gömrük postunu ələ keçirmək, cinayətkar birliyin tələblərini irəli sürmək üçün orada xidmət aparan əməkdaşları və digər şəxsləri girov götürmək barədə təxribat planı hazırlayıb.
Mövzu ilə bağlı “Ədəbiyyat və incəsənət” portalına açıqlama verən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov Dövlət Təhlükəsizliyi Xidmətinin ekstremist qruplaşmanın zərərsizləşdirilməsi istiqamətində atdığı bu addımı yüksək qiymətləndirib:
“Dövlət Təhlükəsizliyi Xidməti tərəfindən təxribat və girov götürmə cinayətlərini planlaşdıran ekstremist qruplaşmanın ifşası dövlətçiliyimizin, onun əsaslarının müdafiəsi, vətəndaşlarımızın təhlükəsizliyinin etibarlı şəkildə təmini baxımından son dərəcə mühm əhəmiyyətə malikdir. Bu əməliyyat hər şeydən öncə Dövlət Təhlükəsizliyi Xidmətinin ayıq-sayıqlığından, hədsiz çevikliyindən xəbər verir.
Qruplaşmanın cinayət əməlinin qarşısının planlaşdırma mərhələsində alınması da Dövlət Təhlükəsizliyi Xidmətinin peşəkarlığının göstəricisidir. Qeyd edək ki, bütün dünyada çox az sayda xüsusi xidmət orqanları var ki, onlar planlaşdırılan cinayətlərin qarşısını elə planlaşdırma mərhələsində ala, təhlkəni elə ilkin mərhələdə ortadan qaldıra bilir. Azərbaycanın Dövlət Təhlükəsizliyi Xidməti də bu cür peşəkar xüsusi xidmət orqanlarından biridir.
Mən bu uğuruna görə Dövlət Təhlükəsizliyi Xidmətini təbrik edir, ona bu çətin və şərəfli fəaliyyətində uğurlar arzulayıram. Eyni zamanda, bütün vətəndaşlarımızı ayıq-sayıq olmağa, onlarda şübhə doğuran istənilən məsələ ilə bağlı güc orqanlarımızı dərhal məlumatlandırmağa səsləyirəm.
Dövlət Təhlükəsizliyi Xidməti tərəfindən zərərsizləşdirilən ekstremist qruplaşma ilə bağlı baş verənlər bir daha göstərdi ki, bu gün də dövlətimizin təhlükəsizliyini, xalqımızın əmin-amanlığını pozmağa, ölkədə xaos, qarışıqlıq yaratmağa çalışan qüvvələr var. Doğrudur, onların bu cəhdlərinin qarşısı Dövlət Təhlükəsizliyi Xidməti və digər güc orqanalrı tərəfindən qətiyyətlə alınır, lakin bu məsələdə hər bir vətəndaşın hüquq-mühafizə orqanlarına informasiya dəstəyi verməsi, dövlət qurumları ilə sıx əməkdaşlıq həyata keçirməsi zəruridir. Yalnız bu halda biz bütün təhlükələrdən sığortalana bilərik”.
“Ədəbiyyat və incəsənət”
(17.12.2024)
Sabirabadda 10 ildə ASANlaşan 2 milyon müraciət
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan Sabirabad regional “ASAN xidmət” mərkəzinin açılışı Prezident İlham Əliyevin iştirakı ilə 15 dekabr 2014-cü il tarixində keçirilib.
Mərkəz Sabirabad şəhərinin Heydər Əliyev prospekti, 128 ünvanında yerləşir.
Sabirabad regional “ASAN xidmət” mərkəzi Sabirabad rayonu ilə bərabər Neftçala, Biləsuvar, Saatlı, İmişli, Kürdəmir, Hacıqabul, Şirvan, Salyan, Beyləqan və Füzuli rayonlarında qeydiyyatda olan vətəndaşlarla yanaşı ölkə üzrə ərazi məhdudiyyəti olmadan xidmət göstərir.
Mərkəzin fəaliyyəti operativlik, şəffaflıq, nəzakətlilik, məsuliyyət prinsiplərinə və vətəndaş rahatlığına hesablanıb.
Fəaliyyət göstərdiyi müddət ərzində Sabirabad “ASAN xidmət” mərkəzində 2 milyona yaxın vətəndaş müraciəti qeydə alınıb. Bu barədə “Ədəbiyyat və incəsənət” portalına “ASAN xidmət”dən məlumat verilib.
Ay ərzində mərkəzdə 20-25 nəfər könüllü çalışır. Mərkəzin fəaliyyətə başladığı müddətdən bu günə qədər ümumilikdə 2000-ə yaxın könüllü məzun olub.
Hazırda “ASAN xidmət” mərkəzlərində müxtəlif dövlət orqanları, həmçinin özəl şirkət və müəssisələr tərəfindən ümumilikdə 400-dən çox xidmət göstərilir və mərkəzlərdə gündəlik 40 min nəfərə yaxın vətəndaş qəbul edilir.
“Ədəbiyyat və incəsənət”
(17.12.2024)
