Azərbaycan Respublikasının Mədəniyyət Nazirliyi yanında İctimai Şuranın payız mövsümündə ilk iclası keçirilib. 

“Ədəbiyyat və incəsənət” portalı xəbər verir ki, sentyabrın 21-də C.Cabbarlı adına Respublika Gənclər Kitabxanasında keçirilən iclası giriş sözü ilə açan Şura sədri, Bakı Atatürk Mərkəzinin direktoru, Vl çağırış Milli Məclisin üzvü, akademik Nizami Cəfərov ölkənin mədəni həyatı, dövlət mədəniyyət strategiyası, çağdaş beynəlxalq çağırışlar və s. barədə fikirlərini bölüşüb. 

İctimai Şuranın sədr müavini Əkbər Qoşalı indiyədək həyata keçirilən tədbirlər və görüləcək işlər barədə, o cümlədən Bakı və Mil-Muğan üzrə keçirilən geniştərkibli ictimai dinləmələr, uşaq ədəbiyyatının, özəl nəşriyyatların mövcud durumu ilə bağlı dinləmələr, media çıxışları, müxtəlif beynəlxalq və yerli tədbirlərdə iştirakla bağlı ətraflı məlumat verib. 

İctimai Şuranın sədr müavini Vüqar Qədirov, Şura üzvləri - Əməkdar incəsənət xadimi Ayaz Salayev, Ülviyyə Bəbirli, Samirə Mustafayeva və Xanoğlan Əhmədov çıxış edərək, Şuraya edilən müraciətlər, qaldırılan problemlər və təkliflər barədə danışıblar.

Şuraya edilmiş bəzi müraciətlər üzrə əlaqədar yetkili şəxslərlə yerindəcə telefon bağlantısı qurulub, kömək göstərilməsi imkanları araşdırılıb.

İclasa yekun vuran akademik Nizami Cəfərov Şuranın fəaliyyəti ilə bağlı ötən müddətdə qarşıya çıxan bəzi məsələlər barədə fikirlərini bölüşüb, qarşıdakı dönəmdə fəaliyyətə dair tövsiyyələrini verib. 

Qərara alınıb ki, Gəncə, Quba, Şəki, Lənkəran şəhərlərini, Qarabağı, Şərqi Zəngəzuru əhatə edən regional mədəniyyət idarələri öndə olmaqla, indiyədək ictimai dinləmə keçirilməmiş bütün regionalarda ictimai dinləmələr təşkil olunsun. Qarşıdakı ilk ictimai dinləmənin oktyabr ayında keçirilməsi məqsədəuyğun hesab edilib. 

İclasda, həmçinin mədəniyyətyönümlü fəaliyyəti ilə seçilən QHT-lər, mədəniyyət yazarları ilə ayrıca görüşlərin keçirilməsi, müzakirələrin aparılması qərara alınıb.

“Ədəbiyyat və incəsənət”

(23.09.2024)

Habil Yaşar, “Ədəbiyyat və incəsənət”

Noyabrda Sumqayıt şəhəri öz 75 illiyini qeyd edəcək. Sumqayıtı bizlərə sevdirən nəsnələr çoxdur. O cümlədən, bu sırada Sumqayıt bulvarı dayanır! 

Azərbaycanımız hər zaman öz gözəlliyi, ecazkarlığı ilə dünyanın diqqətini çəkməkdədir. O, gündən-günə daha da inkişaf edir, çiçəklənir. 

Bu tərəqqidə digər şəhərlər kimi Sumqayıtımızın da böyük payı vardır. 1949-ci ildə yaradılan Sumqayıt hər ötən gün daha da gözəlləşməkdə, daha da inkişaf etməkdədir. Bu şəhərin digər adı isə “Gənclik şəhəri” dir. Mənzərələri, parkları, abidələri ilə yanaşı müasir tikililəri də göz oxşayır, sevilir. Onun ən gözəl məkanlarından biri də şübhəsiz ki, Sumqayıt Bulvarıdır. Xəzər dənizinin sahilində yerləşən bulvar 2016-cı ildə yaradılmışdır. Ümumi sahəsi 106 hektar, uzunluğu 4,2 kilometrdir. Nəsimi adına Dənizkənarı Mədəniyyət və İstirahət Parkı da bulvarın əsas hissələrindən birini təşkil edir. Bulvarda kiçikölçülü avtobuslar, elektromobillər və velosipedlərdə sahilboyu xüsusi hərəkət zolağı ilə gəzintiyə çıxmaq da mümkündür. Ərazidə 200 mindən çox ağac və dekorativ kol, 2 milyondan artıq gül və çiçək əkilməklə yanaşı müasir işıqlandırma sistemi də quraşdırılmışdır. Həmçinin burada istirahət obyektləri, attraksionlar, ticarət və əyləncə mərkəzləri, kinoklub, idman infrastrukturu da mövcuddur. “Bayraq muzeyi” bulvara səyahətə çıxanların maraqla qarşıladığı məkanlardan biridir. Əməkdaşlar türkün müzəffər bayraqlarını açıq havaya çıxardaraq  musiqi sədaları altında bulvarın daxilində gəzdirir və məlumat verirlər. Bulvarda vaxtaşırı kitab sərgiləri də təşkil edilməkdədir. Həmçinin hər həftənin şənbə günü bulvarda mətbəx sərgisi keçirilir və mətbəximizin ləziz nemətləri nümayiş etdirilir. İlham Əliyevin cənablarının möcüzə adlandırdığı Sumqayıt Bulvarının 2017-ci il iyulun 3-də İspaniyanın paytaxtı Madrid şəhərində, ardlnca da növbəti ildə Fransanın paytaxtı Paris şəhərində “İnternational Award for Excellence & Lidership” mükafatına layiq görülməsi də xüsusi qeyd olunmalıdır. 

 Sumqayıtla yanaşı, Sumqayıt Bulvarı da hər il yenilənməkdə, daha da abadlaşmaqdadır. 

“Ədəbiyyat və incəsənət”

(21.09.2024)

Elman Eldaroğlu, “Ədəbiyyat və incəsənət”

Güclü analitik düşüncə tərzi var. Problemləri tez bir zamanda müəyyənləşdirə və bu problemləri həll etmək üçün səmərəli yollar tapa bilir. Səmimi və etibarlı dostdur. 

Başqalarına kömək etməkdən xoşlanır və bu səbəbdən də onu etibarlı məsləhətçi, doğru yol göstərən kimi tanıyırlar. Özünütəkmilləşdirmə və öyrənmək qabiliyyəti yüksək səviyyədədir. Yeni biliklər əldə etmək və öz bacarıqlarını inkişaf etdirmək üçün daim çalışmaqdadır. Sağlam həyat tərzinə və fiziki rifaha böyük önəm verir.

Dekanlığı cavan vaxtına düşüb. Rəbərlik etdiyi kollektivdə hamı ondan yaşca böyük olsa da, əksəriyyəti nə vaxtsa ona dərs dediyindən, müəllimlərə hörmətlə yanaşıb, necə deyərlər, arada pərdə saxlayıb. Ona görə də daha çox tələbələrlə təmasda olub. Tələbələrinin dediklərinə görə isə, dekan işlədiyi zamanlarda sadəliyi ilə hamıya örnək göstərilib. Həm də söyləyirlər ki, deputat olandan sonra çox dəyişib...

Deyir ki,- “Əslində xarakter dəyişmir, imkanlar dəyişir. Nə bilim, bəlkə də dəyişmişəm. Mən çalışıram ki, dəyişməyim. Çox vaxt da dəyişmədiyimi deyirlər, bu da mənim xoşuma gəlmir. Bütün ömrün boyu dəyişməmək də bir şey deyil. Ola bilsin ki, deputatlıq yaşlı vaxtıma düşdüyü üçün, insanlarla cavanlığımdakı kimi çox ünsiyyətdə olmuram...”

Haqqında söhbət açdığım Nizami Cəfərov 1959-cu ildə Ağstafa rayonunun Zəlimxan kəndində anadan olub. Azərbaycan Dövlət Universitetinin filologiya fakültəsini fərqlənmə diplomu ilə bitirib. Hazırda Azərbaycanda Atatürk Mərkəzinin direktoru vəzifəsində çalışır. Azərbaycan Respublikası Milli Məclisinin deputatı, filologiya elmləri doktoru, professor, əməkdar elm xadimi, AMEA-nın həqiqi üzvüdür. 2019-cu ildən BDU-nun Ümumi dilçilik kafedrasının müdiri, 2022-ci ildən isə "ADA" Universitetində "Azərbaycançılıq" kursunu tədris edir. Bir sıra orden və medallara layiq görülüb...

Bəzən çox tələbkar və tənqidçi kimi görünür. Bu onun mükəmməllik axtarışı, bəzən özünə və başqalarına qarşı həddindən artıq tələbkar olmasından irəli gəlir. Qüsurları tez görmək xüsusiyyəti var...

Deyir ki,- “Dilin qaydalarının hər cür pozulmalarına qarşı mübarizə aparmaq vacibdir. Biz o zaman "Dövlət dili haqqında" qanunu müzakirə edəndə dil polisinin yaradılması haqqında məsələ qaldırılmışdı. Düzdür, ona getmədik, ancaq bununla yanaşı, cərimələr tətbiq olunmalıdır. Bakı şəhərinin reklam örtüyündə və ya küçə adında hansısa hərf səhv yazılıbsa, buna görə həmin rayonun icra hakimiyyəti cavabdehdir. İcra hakimiyyətində bu məsələlərə baxan qorum var. Onlar onu yazan şirkətə dərhal xəbərdarlıq etməlidirlər. Əgər xəbərdarlıqdan sonra da səhvlər düzəlməsə, o zaman cərimə tətbiq olunmalıdır. Burada söhbət hansısa qurumun cərimələnməsindən getmir, əsas odur ki, dilimizin qaydaları pozulmasın...”

Görəcəyi işləri planlaşdırmağa və idarə etməyə çalışır, bu da onda narahatlıq hissi yaradır. Hər şeyi ölçüb biçməmiş addım atmır, risklərdən çəkinir...

“Dil elə şeydir ki, onu gərək orta məktəbdən öyrənəsən. Mən inana bilmirəm ki, sonradan jurnalistləri yığıb onlarla orfoqrafiya qaydalarını öyrətmək olar. Bu ona bənzəyir ki, danışıq tərzi oturuşmuş adama təzədən danışmağı öyrədirsən.”- söyləyir...

Dediyinə görə, daha çox müasir ədəbiyyatın klassikasını oxuyur: Nəriman Həsənzadə, Anar, Elçin, Fikrət Qoca, Afaq Məsud, Ramiz Rövşən, Vaqif Cəbrayılzadə, Çingiz Əlioğlu, Mövlud Süleymanlı, Yunus Oğuz onun mütaliə etdiyi müəlliflər sırasındadır.

Deyir ki,- “Yunus Oğuz mənim dostumdur, ona görə hər cümləsini oxuyuram və yazdıqlarını çox bəyənirəm, deyim niyə? Yunus Oğuz modernist deyil, amma tariximizin bütün mərhələlərini dövrün xarakteri ilə, həm də yüksək etnoqrafik-siyasi mükəmməlliyi ilə verir. Onun əsərlərində fundamentalizm var. Öz vətənini, xalqını sevən hər bir azərbaycanlı o fundamentalizmdən keçməlidir.”

Qəribə adamdır, hər şeyin rəvan getməsi üçün onun xüsusi üsulları var. Yatacağı yer mükəmməl olmadıqda yatmamağa üstünlük verir. Ondan stəkanının yarısı dolu, yoxsa yarısı boş olduğunu soruşmağa ehtiyac yoxdur, çünki onun üçün stəkan həmişə çirklidir. İlk görüşdə soyuq adam təəssüratı yarada bilər, isinmək üçün bir az vaxt lazımdır...

Bəli, Nizami Cəfərov təkcə elmdə AKADEMİK deyil, həm də insanlığın AKADEMİKlərindən biridir. Sentyabrın 21-də 65 yaşı tamam olur. Onu ad günü münasibətilə təbrik edir, möhkəm can sağlığı arzulayıram.

Çox yaşasın!

“Ədəbiyyat və incəsənət”

(21.09.2024)

Elm və Ali Təhsil üzrə Dövlət Agentliyinin müvafiq əmri ilə Neymət Rüstəmli Ağdam Dövlət Sosial-İqtisadi Kollecinə direktor vəzifəsinə təyin edilib.

Neymət Rüstəmli “Ədəbiyyat və incəsənət” portalının Qarabağ bölməsinə rəhbərlik edir. 

O, bakalavriat təhsilini Sumqayıt Dövlət Universitetində almış, magistratura səviyyəsini isə "ADA" Universitetində "Təhsilin təşkili və idarə olunması" ixtisası üzrə bitirmişdir. 2011-2019-cu illərdə Ağdam rayon 91 saylı köçkün tam orta məktəbi və I Sarıcalı kənd tam orta məktəbində müəllim kimi çalışmışdır. O, bu təyinatadək Ağdam rayon 91 nömrəli tam orta məktəbin direktoru vəzifəsini icra etmişdir. N. Rüstəmli I Yüksəliş müsabiqəsinin yarımfilançısıdır.

“Ədəbiyyat və incəsənət”

(20.09.2024)

Əkbər Qoşalı, “Ədəbiyyat və incəsənət” üçün 

Bundan tam bir il öncə idi. İşdəydim. İş-gücün elə vaxtıydı, elə vaxtıydı, necə deyərlər, baş qaşımağa macal yox idi. Bir də “xəbər lenti”ndə antiterror tədbirlərinin başlanması ilə bağlı rəsmi xəbər keçdi. Bu barədə müxtəlif ehtimallar yayılır, qeyri-rəsmi informasiyalar dolaşırdı amma rəsmi xəbər başqa, ehtimallar başqa! Gözüm bu xəbəri alar-almaz Qənirə xanımın kabinetinə cumdum. – Bəli, bu cümləni qurarkən “keçdim”, “getdim”, “qapını döydüm” və s. sözlərinə doğrudan ehtiyac duymadım – çün, çoxdan gözlədiyimiz xəbəri bölüşmək istəyi digər nəzakət və yeriş qaydalarını tam arxa plana keçirmişdi. Qənirə xanımı müjdələdim, dərhal o biri iş yoldaşlarımız da başımıza yığışdı, sevincimizi bölüşdük. Doğrudur, rəsmi xəbər 2-3 dəqiqə öncə yayınlanmışdı, bununla belə, biz, antiterror tədbirlərinin arzuolunan sonuca varacağına, Zəfərimizə yeni – bənzərsiz rəng qatılacağına, brilyant qaş qoyulacağına qətiyyən şübhə etmirdik! Başlayıbsa, deməli, müsbət sonluq mütləqiydi! – Haqlı olaraq, belə inanırdıq.

Çün, bizim işimiz haqq işiydi.

Çün, bizim Ali Baş Komandanımız İlham Əliyevdir!

Çün bizim xalq dövlətcanlı, cavanlarımız vətəncanlıdır!

Üç onillik sürən ağır  işğala 44 gün kimi qısa müddətdə son verən şanlı ordunun yığcam antiterror tədbirlərində qələbə qazanmaması mümkünmüydü? Əsla! Söhbət Azərbaycan Ordusundan gedirdi! Əcdadın hərb gələnəyini öyrənən, onu vicdanla davam və inkişaf etdirən, unikal təcrübəyə malik Silahlı Qüvvələrimizin ən yeni çağırışlara cavab vermə gücündə olduğunu bilirdik.

Sonra zəng zəngə calandı, Qənirə xanımı televiziyaya müsahibəyə çağırdılar. Antiterror tədbirləri bölgəsindən ard-arda xoş xəbərlər gəlməyə başladı və işçi günümüz öncə planlaşdırılan axarından çıxdı... – Elə gün hələm-hələm yaşanmır axı! Məğlubiyyətləri ard-arda düzülən, belbükən ağır illərin ardından qələbəyə elə susamış, elə öyrəşmişdik, heç bir beynəlxalq konyunkturanı, yersiz hədəni, məzmunsuz iddianı qəbullana bilməzdik. Ümummilli işimiz yarımçıq qalmışdı, suverenliyimiz tam bərpa olunmamışdı. – Xankəndi, Xocalı, Ağdərə, Əsgəran... yönündən bizim o səmtlərdə - işğaldan qurtulmuş torpaqlarımızdakı əsgərlərimizin mövqelərinə müəyyən həmlələr olurdu. Min bir alçaqlığa əl atan işğalçı tör-töküntüləri əvəzçıxma şakərindən bir turlu qurtulmuş deyildi. Az qala iki gündən bir, kənd təsərrüfatı adı altında “fortifikasiya” hoqqası verən haylar özlərini sülhməramsızların əhatəsində qorxusuz hiss edirdi. Tam da antiterror tədbirlərindən saatlar öncə iki yeni terror aktı törətmişdilər, mülki şəxslərimiz, asayiş keşikçilərimiz həlak olmuşdu.

Bizim Həkəri körpüsü üzərində Laçın Sərhəd Keçid məntəqəsi qurmağımız adıyaman gedişatın qarşısını önəmli dərəcədə almış olsa da, haylar illər uzunu yığdıqları silah-sursatla təxribatlar törətməkdə davam edirdi. Minalar isə... ayrı söhbətdir – addımbaşı mina, mina, mina – bədbəxt uşaqları elə bil, illərlə mina doğub-törəmişdi; bu da azmış kimi, bəlli “10 noyabr Bəyanatı”ndan sonrakı tarixlərə aid, “Made in Armenia” bekara “marka”lı minalar sülhməramsızların “məsuliyyət zonası” həndəvərində üst-üstə qalaqlanmaqdaydı... Bizim buna dözəcək halımız yoxuydu... Qalib ölkə, qalib xalq, qalib ordu şərtmi qəbul edəcəkdi məgər?..

Uzun sözün qısası,

20 Sentyabr 2023-cü iliydi. İşdəydik. Asiya Parlament Assambleyasının Bakı toplantısı, Gürcüstan parlamenti Mədəniyyət Komitəsi ilə Anlaşma Sənədinin imzalanması, Qazaxıstandan mötəbər heyətin Azərbaycana səfəri çərçivəsində tədbirlər, vətəndaş qəbulu günündən irəli gələn çoxsaylı məktublar, gündəmin digər təxirəsalınmaz məsələləri və s.  – yetərincə vacib işlərimiz vardı. Antiterror tədbirləri gündəmi elə tutdu, ağlımızı, sevdamızı elə qapsadı, gözümüz ekrana, qulağımız telefona kilidləndi. Ruhumuz isə əlbəttə, qələbəyə köklənmişdi!

Gün axşam oldu,

23 saat 43 dəqiqə sürmüş antiterror tədbirlərinin başa çatdığı rəsmən duyuruldu. Əslində, rəsmi sonluq üçün heç o qədər də çəkməzdi, lakin terrorçular sağ əlləri ilə ağ bayraq tuta-tuta, Allah qoymasa, ağızlarının sol tərəfi ilə hansısa “şərt”ləri də “diqtə etmək” istəyirdi. Hər iki qulaqlarını gen açıb son və qəti şəkildə dinlədilər ki, tək bir yol var:

terrorçuların bütün səngərlərdə, “kazarma”larda ağ bayraq qaldıraraq, təslim olması,

Ermənistan Respublikası silahlı qüvvələri mənsublarının Azərbaycan Respublikasının suveren ərazilərindən tam rədd olması,

Xankəndidəki qondarma rejimin özünü buraxması!

Yəni, keçmiş işğalçı Azərbaycana qarşı (el sözü ilə desək) bir daha çaşmamaq öhdəliyi götürməliydi!

Əlbəttə, biz deyən oldu!

Beləliklə, ən azı 200 illik bir qaramat sürəc Dəmir Yumruqla qapadıldı!

Tarix içrə tarix yazıldı!

Altun hərfli, unudulmaz tarix!

Hər xalq, hər dövlət belə tarix yaza bilmir!

Belə tarixə tanıqlıq etmək hər nəslə nəsib olmur!

Hər əsgərə nəsib olmur belə parlaq qələbəyə imza atmaq!

Qənirə xanımın Tanrıdan bir diləyi varmış – biz bunu onun vəfatından sonra eşitdik. – Türk Ədəbiyyatı Vəqfinin başqanı, dillər əzbəri olan “Bil, oğlum” şeirinin müəllifi Serhat Kabaklıya deyibmiş. Vəfalı Serhat xoca Qənirə xanım torpağa tapşırılarkən buradaydı və o sözləri də həmin gün söylədi: “Xocalı alınsın, ondan sonra Tanrı da mənim canımı alsın”! – Türk dünyasının sevilən qızı Qənirə Paşayeva (07.03.1975 - 28.09.2023) belə deyibmiş... İndi onun bizlərdən əbədi ayrılığının birinci ildönümü ərəfəsindəyik; Tanrı onun diləyini eşidib, geri çevrimədi... Hər kəs bir gün bu dünyadan köçəcək, əlbəttə; əziz bacımızın bu dünyaya əlvida demədən öncə, Xocalı, Xankəndi, Qarabağ... diləklərinin çin olduğunu görməsi indi ən böyük təsəllimizdir... Ruhu şad olsun!

“Sentyabrın 20-də başa çatmış əməliyyat nəticəsində rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirmişdir. Beləliklə, növbəti parlaq Qələbə nəticəsində Azərbaycan Respublikasının suverenliyi tam bərpa edilmişdir. Azərbaycan xalqının həyatında müstəsna əhəmiyyət kəsb edən şanlı Zəfər sayəsində bu gün Azərbaycan Respublikasının Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanmaqdadır”. – Xalqımızı qürurlandıran, köksümüzü qabardan bu sözlər Azərbaycan Prezidentinə aiddir.

20 Sentyabr! – ötən ilədək yalnız Neftçilər Günü idi! Qutlu olsun!

20 Sentyabr – bu il, bu ayın 18-indən etibarən rəsmən Xankəndi, Xocalı və Ağdərə şəhərləri günüdür!

20 Sentyabr – bu il, bu ayın 19-undan etibarən rəsmən Azərbaycan Respublikasında Dövlət Suverenliyi Günüdür!

20 Sentyabr xoşbəxt gündür! Bir günə bu qədər gözəllik qazandıran iradəyə, qüdrətə şükürlər olsun!

Şəhidlər ölmədi, Vətən bölünmədi!

Bəli,

“Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməmişdir. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir”. – Prezident İlham Əliyevin “Azərbaycan Respublikasında Dövlət Suverenliyi Gününün təsis edilməsi haqqında” Sərəncamında belə vurğulanır.

DÖVLƏTİMİZ ZAVAL GÖRMƏSİN!

“Ədəbiyyat və incəsənət”

(20.09.2024)

Fariz Əhmədov, “Ədəbiyyat və incəsənət”, Naxçıvan bölməsi

Bu gün Azərbaycanda Dövlət Suverenliyi Günüdür. Müzəffər Ali Baş Komandan 19 sentyabr 2024-cü ildə bu günün təsis edilməsi ilə bağlı Sərəncam imzaladı. Bu suverenlik öz-özünə bərpa edilmədi. Qəhrəmanlarımızın və şəhidlərimizin qanı bahasına əldə edilən ərazi bütövlüyümüz, suverenliyimiz xalqımızın milli sərvətinə çevrildi.

Əzəli torpaqlarımız işğaldan azad olunduqdan dərhal sonra Ermənistana davamlı sülh üçün çağırışlar edilsə də, hər dəfə danışıqlardan boyun qaçırır, suveren ərazilərimizdə silahlı təxribatlarını davam etdirirdi. Üçtərəfli Bəyanata əsasən 3 il əvvəl Azərbaycanın Qarabağ bölgəsində 10 mindən artıq Ermənistan silahlı qüvvələrinin birləşmələri və qeyri-qanuni erməni silahlı dəstələri tərk-silah edilməli idilər. Təəssüf ki, Azərbaycanın humanist çağırışlarına baxmayaraq, Qarabağda separatçılar müstəqillik iddialarından əl çəkmir, qüvvələrinin sayını artırır, yeni silahlar alıb təxribat törədir, sonra da Prezident İlham Əliyevin təbirincə desək: “Təlxək” prezidentlərini seçir, qondarma parlamentlərinin adından Azərbaycan əleyhinə bəyanatlar verirdilər. 

2023-cü il sentyabrn 19-da  Qarabağda Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minaların partlaması nəticəsində mülki şəxslər, o cümlədən gücstrukturlarımızın hərbi qulluqçuları şəhid oldu və yaralandı. Həmin gün Qarabağda qanunsuz yerləşdirilmiş separatçıların növbəti terror aktı nəticəsində Ağdam və Şuşa şəhərlərində müvafiq olaraq iki mülki əməkdaş həlak oldu. Və müşahidələr nəticəsində qeyri-qanuni erməni silahlı birləşmələrinin döyüş mövqelərini gücləndirməsi və bölmələrini yüksək döyüş hazırlığı vəziyyətinəgətirməsi təsbit edildi. Bununla da üçtərəfli Bəyanatın müddəalarının icrasının təmin olunması, Azərbaycan Respublikasının Konstitusiya quruluşunun bərpa edilməsi və bölgədə lokal xarakterli antiterror tədbirlərinə başlanılmasına əmr verildi. Bu əmrin icrası 23 saat 43 dəqiqə çəkdi. Separatçılar ağ bayraq qaldırmağa məcbur oldular. Qarabağın erməni sakinlərinin nümayəndələrinin vəsülhməramlıların müraciətini nəzərə alaraq tam atəşkəs haqqında razılaşma əldə olundu və sentyabrın 20-də saat 13:00-da lokal xarakterli antiterror tədbirləri dayandırıldı. Razılaşmaya əsasən Xunta rejimi silahı yerə qoymalı, döyüş mövqelərindən və hərbi postlardan çıxaraq tam şəkildə tərk-silah olundu. Azərbaycan tərəfi ilə görüşdən imtina edən icmanın nümayəndələri bir günlük qasırğadan sonra Yevlax şəhərində görüşə məcbur edildi. 

Görüşdə separatçı rejimin ləğvi, Qarabağda yaşayan erməni sakinlərin reinteqrasiya məsələsindən sonra sentyabrın 28-də Qarabağın separatçı rejimin rəhbəri Samvel Şahramanyan qondarma rejimin ləğvi ilə bağlı sənəd imzaladı.Azərbaycan dövləti öz suverenliyini Xankəndi, Xocalı, Ağdərə, Xocavənd, Əsgəranda üçrəngli bayrağımızın yüksəldilməsi ilə tam təmin etdi.Qələbənin möhtəşəm simvolu isə 2023-cü il noyabrın 8-də Xankəndi şəhərində təntənəli Zəfər hərbi paradın keçirilməsi oldu.

Prezident Xankəndidə xalqa müraciətində deyirdi: “Onlar Bakıya gəlmək istəyirdilər, onlar bizi hədələyirdilər, deyirdilər ki, onların tankları Bakı küçələrində olacaq, haqlı çıxdılar. Onların tankları Hərbi Qənimətlər Parkındadır. Onlar deyirdilər ki, Bakıya gəlib çay içəcəklər. Burada da haqlıdırlar. İndi çay içirlər, istintaq təcridxanasında”. 

Vətən müharibəsindən ötən illər ərzində rəsmi İrəvan Azərbaycan tərəfinin bütün səmimi sülh çağırışlarını ləngidir, qəbul etdiyi öhdəliklərin icrasını gecikdirir, gələcək revanşist iddialarının gerçəkləşəcəyi ümidi ilə sülh müqaviləsinin reallaşmamasına çalışır. Sülhün və sabitliyin yeganə yolu erməni silahlı qüvvələrinin ölkəmizin Qarabağ bölgəsindən qeyd-şərtsiz çıxarılması və qondarma rejimin buraxılması idi. Aprelin 23-də Laçın rayonunda Həkəri çayının üzərində “Laçın” sərhəd-buraxılış məntəqəsinin yaradılması və humanitar məqsədlə Ağdam-Xankəndi yolunun təklif edilməsi Ermənistan tərəfinin bütün xain planlarını alt-üst etdi. Öz məkrli niyyətlərinə çata bilməyən düşmən bölgədə erməni sakinlərinə qarşı “soyqırımı”, “blokada” və “humanitar böhran”ın aparılması barədə yalan və əsassız iddialarla bu prosesibeynəlxalq müstəvidə siyasiləşdirməyə, ölkəmizə qarşı qarayaxma kampaniyası aparmağa başladı.

İndi ölkəmizə qarşı qərəzli mövqedə dayanıb bizi qınayanlar anlamalıdırlar ki, 10 noyabr 2023-cü il tarixdə imzalanmış üçtərəfli Bəyanatın 4-cü bəndinin tələblərinin kobud şəkildə pozulmasının səbəbkarı Ermənistandır.  Həm antiterror tədbirləri çərçivəsində, həm də sonrakı dövrdə Azərbaycan Ordusu mülki əhali və infrastruktur obyektlərinin yaxınlığında məqsədli şəkildə yerləşdirilmiş legitim hərbi obyektləri hədəfə almadı. Mülki əhalinin təhlükəli ərazidən təxliyəsini təmin etmək üçün humanitar dəhliz və qəbul məntəqələri də yaradıldı.

Bir zamanlar bizi təhdid edərək, “Əgər bir daha hərbi əməliyyatlar başlarsa, biz Yevlağa kimi gedəcəyik”, – deyən, yaramazlar “dəmir yumruğ”u təkrar daddıqdan sonra Yevlax şəhərinə gələrək imdad dilədilər. Düşmənin bir zamanlar qurduğu “Arsax” adlı qondarma dövlət və müstəqillik xəyalları Zəfər savaşı zamanı özləri ilə dəyərli hesab edib apardıqları sanitar qovşağına atıldı. Dağlıq Qarabağ Muxtar Vilayətinin yaradılmasının 100-cü ildönümündə düşmən üzərində qazanılan şanlı qələbə xalqımızın Ermənistan üçün sabahkı milli bayramları olan Müstəqillik Gününə hədiyyə oldu. Yüz ildən bəri bizə “miras” qalan bu ağrılı-acılı problembirdəfəlik kökündən həll edildi. Təbii ki, bunun əsl səbəbkarı bizə azadlığı zərrə-zərrə, qram-qram bəxş edən igid oğullar və öz andından bir anda olsun dönməyən Müzəffər Ali Baş Komandandır.

Prezident İlham Əliyev Türkiyə Prezidenti Rəcəb Tayyib Ərdoğan ilə birgə ötən ilin sentyabrın 25-də Naxçıvan Muxtar Respublikasında keçirilən mətbuat konfransında bu sözlərlə ürəklərdə bir daha kök saldı: “...Əgər üç il bundan əvvəl İkinci Qarabağ müharibəsi nəticəsində biz işğala son qoymuşduqsa, bu il aprelin 23-də ərazi bütövlüyümüzü tam bərpa etmişdiksə, – Laçın istiqamətində Azərbaycan-Ermənistan sərhədində sərhəd-buraxılış məntəqəsini qoymaqla, – beş gün əvvəl biz suverenliyimizi tam təmin etdik, bərpa etdik”.

Bu gün Ümummilli Lider Heydər Əliyevin “ Azərbaycan dünyaya günəş kimi doğacaqdır”ifadəsi tam reallaşıb. Bu şanlı Zəfər Prezident İlham Əliyevin 20 illik prezidentlik fəaliyyətinin ana xəttidir. Bu Zəfər Azərbaycan Ordusunun yenilməzlik dastanıdır. Bu Zəfəri bizə qazandırdıqlarına görə biz də əsgərindən zabitinə qədər bütöv Azərbaycan Ordusu ilə fəxr edir, qürur duyuruq. Onlar bizim qürur mənbəyimizdir. Təkcə Azərbaycan vətəndaşları yox, dünyada yaşayanbütün azərbaycanlılar öz əsgər və zabiti ilə qürur duyur. Onların bizə yaşatdığı bu qələbə əbədi bizimləqalaraq tariximizdə əbədi yaşayacaq. Gələcək nəsillər isə bizə bu qələbəni yaşadan Müzəffər Ali Baş Komandan İlham Əliyevin bu şüarını bayraq edəcəklər: “Nəyi necə, nə vaxt etmək lazımdır, onu mən bilirəm”. 

Azərbaycan əsgərinin öz ulu babası Pənahəli xanın qurub tikdiyi Xankəndiyə doğru atdığı addımların səsini Nyu-Yorkda eşitdirən Rəcəb Tayyib Ərdoğan sözlərini Vaşinqtonda BMT-nin Baş Assambleyasında bu cümlə ilə tamamladı: “Qarabağ Azərbaycan torpağıdır, bunun xaricində heç bir status qəbul edilməyəcək”.

Cəmi 23 saat 43 dəqiqəyə dövlət suverenliyi bərpa olundu. Bəlkə də, tarixdə belə bir qələbəyə kimsə nail olmayıb. İndi Qarabağ üçün canını fəda etmiş bütün qəhrəmanların ruhu şaddır. Bu qələbəni xalqımıza yaşatdılar. Elə xalqımıza da qələbə yaraşır, Zəfər yaraşır. Müzəffər Ali Baş Komandanın ötən il oktyabr 15-də Xankəndi şəhərində Azərbaycan Bayrağını qaldırarkən dediyi sözlər, bəlkə, yüzilliklər boyu el-el, oba-oba gəzərək azərbaycanlı qanı daşıyan hər kəsin dillər əzbəri olacaq. “…Azərbaycan xalqı bu Qələbəni öz qanı, canı bahasına əldə etmişdir. Bu gün burada qaldırdığım Bayraq burada əbədi dalğalanacaq və biz burada əbədi yaşayacağıq. Qarabağ bizimidir, Qarabağ Azərbaycandır!

Dövlət Suverenliyi Günümüz mübarək!

“Ədəbiyyat və incəsənət”

(20.09.2024)

Ülviyyə Əbülfəzqızı, “Ədəbiyyat və incəsənət”

SUAL

-Kimə gileylənim, kimə dərd yanım,

Bilməm kimi düşmən, kimi dost sanım.

Ay məni hamıdan tez anlayanım,

Nə tez unutdun məni?   (Aysel Nəsirzadə)

Aysel xanım, qarşı tərəf unudursa, deməli, biz heç onun üçün var olmamışıq. Varlığı ilə varlığımızı var edənlər bizi yox biləndə yoxluğumuza matəm tutmalıyıq, yoxsa, beynin sözünü dinləyib qəlbə anlatmaq lazımdır ki: " Anla, öz dəyərini bil, özünü çırpma sinədəki qəfəsinə, ritmlərini qaydaya sal."

CAVAB

-Mənə elə gəlir, heç bir insan unudulmağa məhkum edildiyini hiss edib unudulmamaq üçün əlindən gələni etməyə cəhd etməməlidir. Biz varıq! Kimsə bizi varlığıyla var edə bilməz, sadəcə, varlığımıza yoldaşlıq edə bilər sevgisiylə. Sevgi bitəndən sonra artıq o insanın varlığı, yoxluğu sənə maraqlı gəlmir, nə də sən ona maraqlı gəlirsən.

“Ədəbiyyat və incəsənət”

(20.09.2024)