“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə İftixarın şeirləri təqdim edilir. 

 

Sarışın qız sevirdim,

Qıvrım saçlı - Gülxanım...

Bütün ruhumla yalnız

Ona bağlıydı canım.

 

Bakıya ilk gələndə,

Abituriyent olanda...

Gənclik ləpirlərimiz

Bulvara iz salanda...

 

On yeddi yaşımızda,

Burnumuz başımızda...

Durmadan oynayırdı

Gözümüz-qaşımız da...

 

Hər gün, xoşbəxtlər kimi,

Eşq ilə görüşəndə...

Mən onu ötürəndə,

O, duraqda düşəndə...

 

Başım havalanırdı

Mən ondan ayrılanda.

Sabahı zor açırdım

Ondan ayrı qalanda.

 

Allaha yalvarırdım

Gecə heç vaxt gəlməsin.

Gözüm tək onu görsün,

Ayrı heç nə görməsin...

 

Çünki mənim Günəşim

Sarışın Gülxanımdı.

Qızılı saçlarıyla

O qız mənim canımdı...

 

İndi, ahıl çağımda

Mən onu axtarıram.

Gəncliyimdəki kimi,

Onsuzluqdan yanıram!..

 

Kaş zaman qayıdaydı,

Yenə yağış yağaydı...

Sonra yenə yenidən,

Qızıl Günəş doğaydı.

 

Salxım söyüd həsrətlə

Hey bizi gözləyəydi...

"Yarpaqlar" öpüşdükcə,

Söyüd boynun əyəydi...

 

Biz qısılıb qalaydıq

Söyüdün kölgəsində...

Bir də havalanaydıq

Həmən eşqin səsində.

 

Huşumuz qeyb olaydı

Gənclik ehtirasıyla...

Sən məni öldürəydin

O qızın qisasıyla...

 

Mənə sual verməyin,

Suallardan qorxuram...

Cavabsız suallara

Mən, kəmfürsət baxıram...

 

Məndən soruşmayın ki,

Hanı sənin gəncliyin?

Hara getdi o günlər,

Harda qaldı dincliyin?

 

Kimə qurban göndərdin

Qızıllı qəhrəmanı?

Onu harda öldürdün,

O gözəl günlər hanı?

 

Gözlərimin önündən

Gülər üzün heç getmir.

Könlümü kiritməyə

Vallah, bu da heç yetmir.

 

Buludlar arasından

Yenə şaxı, Gülxanım...

Qızılı tellərinlə

Doğ sabahı, Gülxanım!..

 

Eşqin gözü kor deyil,

Kor - eşqi görməyəndi.

Ömrü eşqlə yaşayıb,

Eşq ilə ölməyəndi.

 

*

Allah, məni öldürmə,

Öldürsən də, üz, öldür...

Gecə yuxum gələcək,

Öldürsən, gündüz öldür...

 

Bu həlləhüş dünyada

Əsir etmə canımı.

İlk dəfə yalvarıram,

İmzala fərmanımı...

 

İntizarda buraxma,

Mən də sənin bəndənəm...

Sənə ən çox inanan,

Pənah gətirən, mənəm.

 

Çıx dünyanın heyfini,

Mən hər dərdə dözənəm.

Özgəsinin yerinə

Öz-özümü üzənəm.

 

Neçə vaxtdır yığıram,

Qılammıram qəzamı.

Mənə insaf eləmə,

Göndər, gəlsin cəzamı.

 

Yolum haqqın yoludu,

Haqqın yolu darısqal...

Yolumu şaşırmamış,

Azmamış, canımı al.

 

Çox da humanist olma,

İnsaf etmə bəndənə.

Heç təxirə salmadan,

Ölüm göndər Sən, mənə..

 

Ruhu sağlam olanlar

Mərdanədir, mətindir...

Haqsızlar arasında

Ömür sürmək çətindir...

 

Allah, məni öldürmə,

Öldürsən də, üz, öldür...

Gecə yuxum gələcək,

Öldürsən, gündüz öldür...

 

*

Səni sahil yaratdı

Allahım,

Dəniz yaratdı məni.

Sən dənizi sevdin,

Sahilim,

Mənsə, səni...

 

Səni yelkən yaratdı

Allahım,

Külək yaratdı, məni.

Sən küləyi sevdin,

Yelkənim,

Mənsə, səni...

 

Səni Günəş yaratdı

Allahım,

Bulud yaratdı məni.

Sən yağışı sevdin,

Günəşim,

Mənsə, səni...

 

Səni Həvva yaratdı

Allahım,

Adəm yaratdı məni.

Sən Adəmi sevdin,

Ey Həvvam,

Mənsə, səni...

 

Səni sevgi yaratdı

Allahım,

Eşq yaratdı məni.

Sən eşqini duymadın,

Sevgilim,

Mənsə, səni...

 

Atamın ruhu ilə söhbət

 

Ata, məni böyüdəndə,

Oğul, hər vaxt mərd ol, - dedin.

Sənə namərd olanlara

Sən həmişə sərt ol, - dedin.

 

Ömrün boyu, heç kimsəyə

Heç vaxt tələ qurma, - dedin.

Düşmən olsa, düşməni də

Arxasından vurma, - dedin.

 

Allahdan başqa kimsəyə

Heç vaxt boyun əymə, - dedin.

Zalımlara zülüm elə,

Sən fağıra dəymə, - dedin.

 

Haqsız yerə, heç kimsənin

Heç qəsdinə durma, - dedin.

Öz yolunu, nahaqq olan

Heç kimsədən sorma, - dedin.

 

Əqidənin uğrunda sən

Ölümdən də qorxma, - dedin.

Səbirli ol, hər boş küyə

Sən yerindən qalxma, - dedin.

 

Onun-bunun kölgəsində

Çaqqal kimi yatma, - dedin.

Şərəfini, mənliyini

Heç bir zaman satma, - dedin.

 

Namərd olan alçaqlara

Zərbə vursan, sinədən vur.

Döyüş vaxtı səngərində

Möhtəşəm ol, möhtəşəm dur.

 

Tərbiyəndən çıxar olsam,

Haqqın mənə haram olsun.

Ömrüm boyu zəlil olum,

Gözlərimə güllə dolsun.

 

Hey savaşdım, dost uğrunda,

Dost yolunda mən can verdim.

Ömrüm boyu mən özümü

Dost uğrunda qurban verdim.

 

Şərəfsizin şanı olmaz! -

Demədinmi, mənim atam?!.

Şərəfsiz "şanlıyam" deyir...

Mən nə edim, canım, atam?!.

 

Mərdi namərd eləməyə

Çalışırlar, canım, atam.

Mənsə, haqqın peşindəyəm,

Çalışıram, haqqa çatam.

 

Mərdi qovan namərdlərin

Cəzasını verməyimmi?

Namərdin son nəfəsini

Gözlərimlə görməyimmi?

 

Yolumda min cür tələ var,

Necə çıxım, hardan gedim?

Tələlərdən çıxmaq üçün

Savaşmayım, mən nə edim?

 

Ədalətli ol! - söylədin,

Ədalətlə çıxdım yola.

Addımbaşı zərbə gördüm

Ədalətli ola-ola.

 

Mən ədalət axtardım, hey,

Ədalət min dona girdi.

Ədalət libası geymiş

İblis buldum, bu nə sirdi?

 

Ruhun məni bağışlamaz,

Mən namərdi bağışlasam.

Yarı yoldan geri dönsəm,

Sona qədər boğuşmasam.

 

Kimsə məndən inciməsin,

Haqq uğrunda ölməliyəm! -

Ədalətsiz hər iblisin

Cəzasını verməliyəm!

 

“Ədəbiyyat və incəsənət”

(24.09.2024)

Rubrikanı aparır: Könül, “Ədəbiyyat və incəsənət”

  

İnişil bu gün bu xəbərə sevindik: Azərbaycan filmi Kanadada keçirilən ”Beynəlxalq Toronto Film for Peace Film” beynəlxalq festivalında qalib olmuş filmlər sırasında yer alıb.

Bu barədə filmin ssenari müəllifi və rejissoru Cəlaləddin Qasımov aşağıdakıları söyləmişdi:

-Bu gün mənim üçün çox sevindirici bir hadisə baş verib. “Acı xatirə” bədii-sənədli filmin ilk uğuru”Beynəlxalq Toronto Film for Peace Film” festivalnda ölkəmizi təmsil edərək finala vəsiqə qazanıb. Eyni zamanda, “Edam günü” bədii filmi isə, beynəlxalq festivalda “Ən yaxşı prodüsser” kateqoriyaları üzrə qalib oldu.

Kanadanın Toronto şəhərində  “Beynəlxalq Toronto Film for Peace Film” festivalının 2022-ci ilin 24 sentyabrında açılışı oldu və beş gün ərzində davam etdi. Bu Festivalda incəsənət, musiqi, kino sahəsində dünyada tanınmış ən böyük adların iştiraki ilə xüsusi tədbirlər keçirilir, film, musiqi, rəsm əsərləri İPF-nin tərəfdaşlarına nümayiş etdirilir və bunula da Festival iştirakçılarına əsas mesajlar çatdırılır.

“Acıxatirə” bədii-sənədli filmi son vaxtlar fəlakət həddinə çatan yol-nəqliyyat hadisələrinə diqqəti cəlb etmək məqsədilə yol polisi və həkimin dostluğundan bəhs edir. Film yol polisi əməkdaşı ilə həkim arasındakı münasibətlərin yol hərəkəti qaydalarına riayət olunmasına necə təsir göstərdiyi barədə çəkilib. Ekran əsəri həkimlərlə birlikdə, öz həyatını təhlükəyə atan polislərin və müxbirlərin cəsarətinin geniş kütləyə çatdırılması məqsədilə çəkilib.

“Acı xatirə” bədii-sənədli filmini Azərbaycan ilə Avropa arasındakı mədəni əlaqələrdə çox mühüm yeri olan bir sənət əsəri kimi dəyərləndirən rejissor daha sonra demişdi:

-Biz şəxsi mənafelərimiz və kommersiya  məqsədi üçün yox, Azərbaycanı dünyada tanıtmaq üçün filmlər çəkirik və istəyimizə də nail oluruq. Çəkdiyimiz filmlərDünya distribütorları tərəfindən filmlərimiz 17 platformaya yerləşdirilib.  dünya film bazarında özünə layiqli yer tutub. Dünya mediasında bu ekran əsəri barədə geniş məlumatlar yazılıb. Dövlət dəstəyi olsa, biz daha da böyük uğurlar əldə edə bilərik, mədəniyyətimizi daha geniş şəkildə dünyaya tanıtdıra bilərik. Ərsəyə gətirdiyimiz filmlərin çəkilişlərini heç bir maddi dəstək olmadan öz hesabımıza aparmışıq”,- deyə, C.Qasımov sözünün sonunda vurğulayıb.

Qeyd edək ki, “Acı xatirə” bədii-sənədli filmində rolları Xalq artisti Sabir Məmmədov, aktyorlar Əjdər Zeynalov və Rövşən Məmmədov ifa ediblər. Ekran əsərinin redaktoru Əkbər Qoşalıdır, montaj Elnur Tarverdiyevə məxsusdur.

  “Edam günü” bədii filmindəki hadisələr sovet dövrünün son illərində həbsxanada cərəyan edir..

“Ekran əsərində məhkum olunmuş bir dustağın kamerada yaşadığı həyəcanlı anlar əks olunub. Filmin ssenarisini yazarkən Bayıl həbsxanasında keçmiş sovet dövründə işləmiş işçilərlə görüşüb maraqlı məlumatlar toplamışam”, - deyə ssenari müəllifi film haqqında danışarkən daha sonra bildirmişdi.

Filmdə rolları Rövşən Kərimduxt, Sabir Məmmədov, Məmməd Əliyev, Nazil Ağalarov, Ramin Şıxəliyev, Soltan Qasımov, Hikmət Məmmədov, Vüqar Qurbanov və digərləri canlandırıblar. Filmin quruluşçu operatoru Mehdi Yaqubovdur.

“SPP Production” tərəfindən istehsal edilən ekran əsərinin xronometrajı 95 dəqiqədir.

 

“Ədəbiyyat və incəsənət”

(24.09.2024)

 

 

  

 

 

“Ədəbiyyat və incəsənət” portalının Güney Azərbaycan Poeziyası Antologiyası layihəsində Təbriz təmsilçimiz Əli Çağla Təbrizdə yaşayıb yaradan Əli Cavadpurun şeirlərini təqdim edir.

 

Əli Cavadpur

Təbriz

 

 

YOL ADAMI

 

Başının üstündə qaralar bulud

Başının üstündə çaxmaq daşı, od

Başının üstünü sən unut, unut...

Yol adamı.

 

Üzü uzaqlara yol gedən adam

Keçər neçə gündən, kölgədən adam...

Yollar quş dimdiyi

Sən də dən adam

Yol adamı.

 

Yolda ay işığı, qaranlıq da var

İşıqda olmayan qaranlıqda var

Yürü saçlarını darasın rüzgar

Yol adamı.

 

Yeri öz yolunu it hürsün səni

Korlar kərməlikdə itirsin səni

Uzaq işıqlara yetirsin səni

Yol adamı.

 

Hay-haraydan boyu uca bir sükut -

Yol yoldaşın, birdə yolun özün tut

Get...

Get...

Qalan nə var

Unut, sən unut...

Yol adamı.

 

“Ədəbiyyat və incəsənət”

(24.09.2024)

 

Rubrikanı aparır: Nihad Alimoğlu, “Ədəbiyyat və incəsənət”

 

 Oxucularımız üçün dünyaşöhrətli sosioloq və kouç Nassim Talebin «Qara qu quşu» kitabından geniş bəhs edəcəyəm. O, ərəb əsilli amerikalıdır.

 

Ümumi tirajı 10 milyon nüsxəyə çatan, artıq 32 dildə oxunan «Qara qu quşu»nda ən əsas bizim qəfil baş verənlərə, xüsusən iri masştablı hadisələrə qarşı korluğunuz barədə danışılır. Səbəbi araşdırılır ki, niyə bəşəriyyət diqqətini qloballara deyil, lokallara ayırır, niyə alimlər və qeyri-alimlər, dühalar və qeyri-dühalar milyonları unudub qəpik-quruşları sayırlar? Niyə biz nəhəng təsirlərə malik mümkün ola biləcək əhəmiyyətli hadisələrə deyil, xırda-xuruş işlərə səfərbər oluruq? Yeri gəlmişkən, hədəfi düz seçməməkdən qaynaqlanan uğursuzluğun kökündə həm də bunlar dayanır axı.

Nassim Talebin maraqlı və düşündürücü fikirlərindən seçdiklərimdən hər gün 5-ni sizlərin ixtiyarına çatdıracağam. Beləliklə, növbəti 5-lik:

- Tarix və cəmiyyətin irəli hərəkəti sürünməklə deyil, çapmaqla baş verir.

 - Mən qəfil dərk etdim və indi də bu təəssüratla yaşayıram ki, biz hamımız retrospeksiya üçün əla bir maşınıq, insanlar hamısı isə özünüaldanışın böyük ustalarıdır.

 - İnsanları kateqoriyalara bölmək vacibdir, amma vacib olduğu qədər də iki kateqoriyanın sərhədində mövcud olanların yerləşdirilməsi üçün problemlidir.

 - Müəyyən hissə kapital bizi varlıya çevirə bilməz, düzdür, amma güzəranı düşünmək qayğısına qalmadan bir işlə rahat məşğul olmağa imkan yaradır. O, bizi beyin fahişəliyindən, daxili təzyiqlərdən azad edir.

 

“Ədəbiyyat və incəsənət”

(24.09.2024)

 

Ülviyyə Əbülfəzqızı, “Ədəbiyyat və incəsənət”

 

Bu dəfə " Bir şeirin hekayəti" adlı rubrikamızın qonağı:

Bu şeiri də yazdım əlvida kimi,

Bax elə bu sətrim son vida kimi.

Mən ölsəm, misra tək, sən nida kimi,

Başımın üstündə dayan, nə olar, - söləyən dəyərli şairimiz Qəşəm Nəcəfzadədir.

 

-Xoş gördük, əziz şairimiz. Qəşəm bəy, dəfələrlə nitqinizi dinləyərkən bəzi şeirləriniz haqqında gözəl izahlarınızı eşitmişik.

Şair həqiqəti sübut etmir, o onu göstərir. (Vissarion Belinski). Qəşəm bəyin şeirlərini oxuyarkən misralar bizimlə səmimi ünsiyyət qurub daxilimizdəki gizli duyğulara çox rahat toxunur. 

 Əziz Qəşəm bəy, rubrikamızın şərtlərinə görə şeirlərinizdən birinin yaranma tarixinə nəzər salmalıyıq. Beləliklə, sevimli şairimiz, oxucularınıza " Bir şeirin hekayəti"ni söyləyin.

 

-Salam Ülviyyə xanım, yeni rubrikanızın ömrü uzun olsun, dəvət üçün təşəkkür edirəm.

Haqqında danışacağım şeiri Siz də səsləndirmisiniz.

Bəli, "Sənin dərsin" adlı şeirimin yazılma tarixinə nəzər salaq.

Deməli, belə: 1984-cü il idi, həyat yoldaşım Tabəs xanımla nişanlı idik. Tabəs xanım ibtidai sinif müəllimi idi. Həmin vaxt bir- birimizdən küsmüşdük. Tabəs xanım mənimlə barışmayacağını və işlərimə qarışmayacağını söyləyib getdi.

Biz İmişlidə idik. Mən də Tabəs xanımın arxasınca getdim. Tabəs xanım məktəbə daxil oldu,  şagirdləri 3-cü sinifdə oxuyurdular və birinci mərtəbə olduğu üçün mən Tabəs xanımı bayırdan izləyə bilirdim, elə o da mənim ona baxdığımı görürdü. Şagirdlər sinifdə səs edirdilər və Tabəs xanım buna görə məndən utanırdı ki, şagirdləri səs edir.

Mən isə bu səhnəni izləyib bədahətən "Sənin dərsin" şeirini söylədim. Elə bu şeir də küslülüyümüzə son qoydu.

 

Niyə şagirdlərin duymurlar səni,

Gül kimi dərsində səs eləyirlər.

Mən sevən əllərə, mən sevən gözə,

Mən sevən ürəyə qəsd eləyirlər.

 

Ağzı yanmışların yoxdu xəbəri,

Mən sənin önündə lal dayanıram.

Dəftərə qırmızı düzəliş kimi,

Varaq yanağımda al dayanıram.

 

Adın tək dərsimi əzbərləyirəm,

Sevgi baxışına boyanmaq üçün.

Ömrümü, günümü qurban verərəm,

Şagird tək önündə dayanmaq üçün.

 

Vaxt axır... şagirdlər duymurlar səni,

Gör necə qıyırlar kövrək səsinə.

Hardan bilsinlər ki, həsrət qalmışam

Qırx beş dəqiqənin bir dəqiqəsinə.

 

Səhvdi misalları, məsələləri,

Dərdini artırıb yüz eləyərlər.

Ölürəm mən sənin “üç”ündən ötrü,

Verdiyin “beş”lərə naz eləyərlər.

 

Təbaşir ləçəkli çiçək əllərin,

Lövhənin üzündə kəpənək olar.

Dəsmala bənzəyər göyçək əllərin,

Bir oğlan balanı bələmək olar.

 

Misra dodaqların yorular hərdən,

Saçların pırtdaşar, əllərin əsər.

Bir gözəl, bir göyçək oğlumuz olar,

Bu dəcəl qızların səsini kəsər.

 

Niyə şagirdlərin duymurlar səni,

Gül kimi dərsində səs eləyirlər.

Mən sevən əllərə, mən sevən gözə,

Mən sevən ürəyə qəsd eləyirlər.

 

“Ədəbiyyat və incəsənət”

(24.09.2024)

Nigar Həsənzadə, “Ədəbiyyat və incəsənət”

 

Gənclər Fondunun dəstəyi, Bakı Dövlət Universiteti və "BDU könüllüləri" təşkilatının birgə təşkilatçılığı ilə "Ümummilli Lider: Heydər Əliyev mühazirələri" layihəsinin üçüncü görüşü keçirilib. Layihənin növbəti qonağı Azərbaycan Atatürk Mərkəzinin direktoru, BDU-nun Ümumi dilçilik kafedrasının müdiri, Əməkdar elm xadimi, akademik Nizami Cəfərov olub.

 

Nizami Cəfərov "Ümummilli Lider və türk dünyası" mövzusunda məruzə ilə çıxış edib. O qeyd edib ki, Ulu Öndər Heydər Əliyevin türk dünyası ilə siyasi, diplomatik, iqtisadi, sosial, hərbi sahələri əhatə edən çoxcəhətli fəaliyyətində elm, təhsil, ədəbiyyat və incəsənət istiqamətlərinin də özünəməxsus yeri və əhəmiyyəti var. Ümummilli Liderin türk dünyası ilə əlaqələri ortaq köklərə malik olan xalqlar arasında siyasi etimad, qarşılıqlı əməkdaşlıq, ədəbiyyatlar və mədəniyyətlər arasında dialoqa böyük töhfə verib. Türk dünyasının birliyinin təməlini qoyan Ümummilli Liderin uzaqgörənliyinin nəticəsində ortaq kökə, tarixə, mədəniyyə malik qardaş xalqların əsrlərə dayanan bağları möhkəmləndirilib. Bu siyasət Ulu Öndərin layiqli davamçısı, Prezident İlham Əliyev tərəfindən uğurla davam etdirilir.

İnteraktiv formatda keçən görüşün sonunda tələbələrin mövzu ilə bağlı sualları cavablandırılıb.

Qeyd etmək istəyirəm ki, mən - "Ədəbiyyat və İncəsənət" portalının əməkdaşı, BDU tələbəsi, həmçinin öz fakültəm üzrə BDU könüllüləri təşkilatının idarə heyətinin üzvü Nigar Həsənzadə də şəxsən bu görüşdə iştirak edib, bu maraqlı mühazirəni dinləmişəm..

 

“Ədəbiyyat və incəsənət”

(24.09.2024)

Qazaxıstan paytaxtında sentyabrın 23-də Azərbaycan Mədəniyyət Günləri başlayıb və mədəniyyət günləri sentyabrın 26-dək davam edəcək. 

 

AzərTAC Qazaxıstan Mədəniyyət Nazirliyinin mətbuat xidmətinə istinadla xəbər verir ki, bu gün - sentyabrın 24-də “Füzuli-530” kitabının təqdimatı və etnocaz konserti olacaq. 

Sentyabrın 25-də isə Qazaxıstan və Azərbaycan milli kitabxanaları arasında əməkdaşlığa dair Memorandumun imzalanması mərasimi, Elmira Axundovanın kitabının təqdimatı, habelə “Azərbaycan mədəniyyətinin inciləri” sərgisinin açılışı və rəqs ansamblının konserti təşkil ediləcək. 

Sentyabrın 26-da müasir Azərbaycan incəsənəti haqqında leksiya keçiriləcək. Azərbaycan Mədəniyyət Günlərinin əsas hadisəsi həmin gün K.Kuanışbayev adına Milli Musiqili Dram Teatrında olacaq. Buradakı qala-konsertdə Azərbaycanın tanınmış incəsənət ustaları çıxış edəcəklər. 

Qeyd edək ki, 2023-cü ilin dekabrında Bakıda Azərbaycan Respublikasında Qazaxıstan Respublikası Mədəniyyət Günləri keçirilib.

 

“Ədəbiyyat və incəsənət”

(24.09.2024)

Gülnarə Cəmaləddin, AYB Sumqayıt şöbəsinin sədri, “Ədəbiyyat və incəsənət” üçün

 

Sumqayıtın 75 illiyi münasibəti ilə şəhərin tanınmış qələm əhli ilə müsahibələrimi davam etdirirəm. Bu günkü müsahibimiz  əməkdar müəllim, ”Tərəqqi” medalı və “Şöhrət” ordeni laureatı, Prezidentin fərdi təqaüdçüsü, şair Ofelya Babayevadır.

 

-Necəsiniz, Ofelya xanım?

 

-Yaxşıyam, təşəkkür edirəm.

 

-Bu il doğma şəhərimiz Sumqayıtın 75 yaşı tamam olur. Əvvəlki və indiki Sumqayıt, hansı sizə daha doğmadır?

 

-Sumqayıt mənim doğma şəhərimdir. Əvvəlki şəhərdə uşaqlığım, gəncliyim, indi isə...

 

-Güclü qadın ifadəsinə münasibətiniz?

 

-Bu ifadəni sevmirəm. Qadın, kişi fərq etməz. Hər ikisinin zəif tərəfləri də var, güclü tərəfləri də...

 

-Siz uzun müddət rəhbər vəzifələrdə çalışmısınız. Çətin olmayıb ki sizinçün?

 

-Çətin olub, ancaq düşünəndə ki, sən kimlərəsə lazımsan, təsəlli tapırsan...

 

-Hal- hazırda da şəhərin ictimai- siyasi həyatında yaxından iştirak edirsiniz.Yorulmursunuz ki?

 

-Ümumiyyətlə, insan həyatını sevdiyi işə həsr edəndə maraqlı olur.

 

-Şeir sizinçün nədir? Ağrımayan adam ovuda bilərmi?

 

-Şeir mənim üçün həyatıma rəng qatan, ovudan, düşündürən anlamdır...

Mən bir Allah bəndəsiyəm,

Məndə günah axtarmayın.

Özü görür,

Mən bilirəm...

Nədir günah...

Sorğu onda,

Cavab məndə.

Nə olacaq,

Olmayacaq,

Bilinəcək

Yalnız sonda...

 

-Dünyayla yollaşa bilirsiz?

 

-Çalışıram...

Tənha anlarımda

Nədənsə hər vaxt,

Olub-keçənləri

Yuxu bilirəm.       

Sonra yuxuları

Yozub birtəhər,

İlahi ömrümü

Yaşamaq üçün,

Bu ömrün yükünü

Daşımaq üçün,

Eləcə piyada

Çıxıram yola...

Gəlir qulağıma

Çatır bir səda:

Təklik Allah ilə

Olmaq deməkdir.

Təklərə tək Allah

Özü köməkdir....

Fiziki cəhətdən tək olmasam da...

 

-Şəhər rəhbərliyinin ədəbiyyata diqqətindən razısınızmı?

 

-Razıyam. Məncə, gözəl bir ağ sarayın Poeziya Evinə verilməsi ədəbiyyata göstərilən diqqətin bariz nümunəsidir.

 

-Şairlər dünyadan nə istəyirlər?

 

-Dünən yoxdur,

Bu gün var.

Ömür- xəzri, giləvar.

Sabah varmı, bilmirəm,

Sabaha bir ömür var...

 

-Sumqayıt ədəbi mühiti ilə əlaqələriniz? Güvəndiyiniz və inandığınız imzalar?

 

-Ədəbi mühitlə əlaqələr həmişə rəvan olmayıb. Ancaq təkcə ədəbi mühitdə deyil, hər yerdə daşlar altında gürzələr yatıb...

Zamanın ovcunda yüz yol sıxıldım,

Hamı elə bildi daha yıxıldım...

Sonra fərziyyələr, miflər dağıldı,

Mənə də taledən bu vüqar düşdü...

Ədəbi mühitin gözəl nümayəndələrinin bəziləri artıq bu dünyaya vida edib, bizə irs olaraq maraqlı əsərlər qoyub gediblər...

Ədəbiyyatı sevgiylə, inadla davam etdirənlərə uğur arzulayıram. Siyahı böyük alınar hamının adını çəksəm. Diqqətli oxucu, ədəbiyyatı izləyənlər o imzaları tanıyır.

 

-AYB Sumqayıt bölməsinin işindən razısınızmı?

 

-Razıyam. Poeziya Evi ilə birlikdə keçirdiyi maraqlı tədbirlərdə mən də iştirak edirəm. Uğurlar! İbrahim İlyaslı, Gülnarə Cəmaləddin bu missiyanın öhdəsindən bacarıqla gəlirlər.

 

-Qadın olaraq ədəbi mühitə gəlmək o dövr üçün çox böyük cəsarət tələb edirdi. Bu cəsarətli addımı atmaq, duyğularınızı şeirə çevirmək necə qarşılandı?

 

-O illərdə Sumqayıt ədəbi mühitinin ilk xanım şairi sayılırdım. Çox gənc idim, oxucular şeirlərimi maraqla qarşılayırdı. Hələ orta məktəbin (13 nömrəli məktəb) XI sinfində oxuyarkən ustad şairimiz Xasay Cahangirov “Sosialist Sumqayıtı” qəzetində mənə “Uğurlu yol” yazıb, şeirlərimi dərc etmişdi. Sonralar, böyük tənqidçilər Qulu Xəlilov “Ulduz” jurnalında, Əkbər Ağayev “Azərbaycan gəncləri” qəzetində məqalələr dərc etdirmişdilər. Şeirlərim müxtəlif ədəbi almanaxlara daxil edilmiş, müxtəlif dillərə tərcümə olunmuşdu.

 

-Ordan baxanda dünya necə görünür?

 

-Dünya mənə həmişə maraqlı olub. Bu marağı bütün oxucularımıza arzulayıram.

 

-75 yaşlı gənc şəhərimizə nə arzulayardınız? Şəhərimizin yubileyi ərəfəsində istək və təklifləriniz?

 

-Doğma şəhərimizə 750 illik yubileyini qeyd etməyi arzulayıram. Son illər yaşıllaşan, abadlaşan şəhərimizə hər birimizin qayğı ilə yanaşmasını istəyirəm...

Bu günlərdə cənab Prezidentimiz İlham Əliyevin xalq şairi, görkəmli ictimai xadim Nəbi Xəzrinin 100 illik yubileyinin qeyd edilməsi ilə bağlı sərəncamı sumqayıtlıların da sevincinə səbəb oldu. Nəbi Xəzri Sumqayıtın fəxri vətəndaşıdır. Bu şəhər haqqında ilk monumental əsər olan “Sumqayıt səhifələri” poeması isə Azərbaycan ədəbiyyatına layiqli töhfədir:

Sumqayıt, deyirəm gözlərin aydın,

Sənin hər addımın böyük hünərdir.

Deyirəm, bəlkə də sən olmasaydın,

Yer üzü nə qədər boş görünərdi.

 

“Ədəbiyyat və incəsənət”

(24.09.2024)