Super User
Xalqımızın sevimlisi və “düşməni”
BU GÜN ABBAS MİRZƏ ŞƏRİFZADƏNİN 130 İLLİYİDİR
Könül, “Ədəbiyyat və incəsənət”
Mən nə teatr-kino aktyoru, rejissoru, …şünasıyam, nə də tənqidçisi. Amma bir təklifim var. Sovetdən çıxsaq, rusdan qopma üzrə olsaq belə yenə də kimi dindirirsən, Stanislavski məktəbindən danışır. Gəlin leksikonumuza Şərifzadə məktəbi terminini daxil edək.
Bu gün Azərbaycanın Xalq artisti Abbas Mirzə Şərifzadənin anadan olmasının 130-cu ildönümü tamam olur. A.M.Şərifzadə 1893-cü il dekabrın 12-də Şamaxının Yuxarı Qala məhəlləsində, ziyalı ailəsində anadan olub. O, aktrisa Mərziyyə Davudovanın həyat yoldaşı, aktrisa Firəngiz Şərifovanın atasıdır. Yeri gəlmişkən, “Eurovision– 2011” mahnı müsabiqəsində Azərbaycana 1-cilik qazandırmış Eldar Qasımov isə görkəmli səhnə ustasının nəticəsidir.
Abbas Mirzə Şərifzadə Azərbaycan xalqının dünya mədəniyyətinə bəxş etdiyi nadir istedadlardandır. Və onun faciəli taleyi hamımızın ürəyini ağrıdır.
1935-ci ildə Xalq artisti adına layiq görülən Azərbaycan teatrının korifeylərindən olan, görkəmli kino və teatr rejissoru iki ildən sonra 1937-ci ildə xalq düşməni kimi ən ağır cəzaya - ölüm hökmünə məhkum edilib. “Ümumiyyətlə, mən teatr, kino, səhnə-sənətdən başqa bir şey bilmirəm, vəssalam!”, - deyən aktyorun son sözləri belə olub. Ömrünün və sənətinin çiçəklənən dövründə - 44 yaşında güllələnən Şərifzadəni Sovet rejimi, rus-erməni cəllad aparatı unutdurmağa, yaddaşlardan silməyə çalışıb, təbii ki, buna nail ola bilməyib.
İlk gənclik illərindən aktyorluq sənətinə yiyələnmiş, sonralar həm də rejissor kimi püxtələşmişdi. A.M.Şərifzadə orijinal siması olan sənətkarlardan idi. Teatra yüksək ideya-tərbiyəvi əhəmiyyəti olan məktəb kimi baxırdı. Böyük ideyalarla yaşayırdı. Yaradıcılığında həmişə ciddi məsuliyyət hiss edirdi. Təbii ki, xalqın yüksəlişinə çalışan bir sənətkar dövrün sərt rejimi tərəfindən təqib olunmaya, ədalətsiz hücumlara məruz qalmaya bilməzdi. Bütün bunlara rəğmən isə Şərifzadə yeni ruhlu novatorluq cəbhəsində əzmlə irəliləməyi bacarırdı.
Abbas Mirzənin atası Mirzə Rəsul geniş dünyagörüşünə, yeni ruhlu mədəniyyətə malik insan idi. Seyid Əzim Şirvaninin “Üsuli-Cədid” məktəbində dərs deyirdi və Şamaxının ən mötəbər müəllimlərindən biri kimi dərin hörmət qazanmışdı.
1902-ci ildə Şamaxıda dəhşətli zəlzələ baş verir. Ailə Bakıya köçmək məcburiyyətində qalır. Beləliklə, yeniyetmə Abbas Mirzənin həyatında sərt bir dönüş yaranır, bütün sonrakı fəaliyyəti Bakı ilə bağlı olur.
1908-ci ildə Abbas Mirzə Molyerin “Zorən təbib” əsərindəki epizodik rolla ilk dəfə səhnəyə çıxır. İki il sonra “Maarif” cəmiyyəti nəzdində yaradılmış teatr kollektivinə qəbul olunur. Qısa müddət ərzində bir-birinin ardınca yeni rollarda çıxış edir. 1911-ci ildə Əbdürrəhim bəy Haqverdiyevin “Ağa Məhəmməd şah Qacar” faciəsinin əsas qəhrəmanı olan Qacarın obrazını yaratmaqla özünü artıq peşəkar aktyor kimi təsdiq edir. Cəfər Cabbarlı Abbas Mirzənin o dövrdəki fəaliyyəti barədə yazırdı ki, bu çəlimsiz, arıq, zahirən zəif görünən gəncin içində çox güclü, odlu mənəvi bir qüdrət aşıb-daşmaqdadır. Əsərin müəllifi Ə.Haqverdiyev onu “Şah Qacarın padşah yaradıcısı” adlandırırdı.
A.M.Şərifzadə Azərbaycanın ozamankı teatr həyatının məhvəri sayılırdı. O, mahir aktyor olmaqla yanaşı, həm də təşkilatçılıq bacarığı ilə fərqlənirdi.
Şərifzadənin obrazlar qalereyasına ötəri nəzər salaq: Otello, Şeyx Sənan, Oqtay, Karl, Aydın, Don Kixot, Maqbet, Teymur Ağa, Səyavuş, Eyvaz, Dəli Knyaz, Hamlet, İblis... Bunlar bir-birindən tam fərqlənən obrazlardır. O, bunların hər birini fərdi yanaşma ilə yaradırdı. Lakin bütün bu müxtəlifliyi birləşdirən yeganə oxşarlıq aktyor oyunundakı təbiilik idi. Başqa sözlə desək, Abbas Mirzə səhnədə özünü unudaraq gah şeyxə, gah ağaya, gah da sevən gəncə çevrilirdi.
A.M.Şərifzadə Azərbaycan teatrı tarixinə Hamleti oynayan ilk aktyor kimi daxil olub. Əsər 1926-cı ildə Dram Teatrının səhnəsində qoyulmuşdu. Tamaşanı Cəfər Cabbarlının tərcüməsi əsasında A.A.Tuqanov səhnələşdirmişdi.
Ümumiyyətlə, C.Cabbarlı yaradıcılığı Abbas Mirzə sənətindən qırmızı xətlə keçir. Aktyorun fəaliyyətinin 20 illik yubileyində Cabbarlı ona “Oqtay Eloğlu” əsərini təqdim edir. Yazır ki, burada yaratdığım obraz sənin obrazındır. Fərqli odur ki, onun adı Oqtay, sənin adın Abbasdır. İkinizin həyatda qayəsi birdir.
Abbas Mirzənin yaradıcılıq imkanları çox geniş idi. Məhz bunun sayəsində o, Azərbaycanın mədəniyyət tarixinə təkcə aktyor deyil, həm də rejissor kimi daxil olub. Görkəmli sənətkar “Şeyx Sənan”, “Oqtay Eloğlu”, “Aydın”, “Ağa Məhəmməd şah Qacar”, “Qaçaq Kərəm” kimi tamaşalara rejissorluq edib, “Leyli və Məcnun”, “Əsli və Kərəm”, “Aşıq Qərib”, “Şah İsmayıl” operalarına quruluş verib. O, çox ilklərə imza atıb. İlk kino rejissorumuz olub. “Bismillah”, “Hacı Qara”, “Gilan qızı”, “Məhəbbət oyunu” filmlərini çəkib.
Beləliklə, qısa bir ömürdə çox böyük, çox zəngin sənət yolu keçən, təkrarsız obrazlar yaradan, monoloqları ilə teatr salonlarını lərzəyə gətirən Abbas Mirzə həqiqətən də aktyorluqda və rejissorluqda bir məktəb yaradıb.
Stanislavski məktəbi yox! Şərifzadə məktəbi!
“Ədəbiyyat və incəsənət”
(12.12.2023)
REDAKSİYANIN POÇTUNDAN - “Qadın haçan xoşbəxt olar?”
“Ədəbiyyat və incəsənət” portalının poçtundan bu gün yenə sizə bir şeir yönləndirmək istəyirik. Oxucuların yaradıcılığı ilə tanışlıq, düşünürük ki, sizlərçün də maraqlıdır. Şeirin müəllifi Xatirə Səfərovadır.
Qadın
Bilinmir, gülürsən, ya ağlayırsan,
Gülüşü üzünə sığmayan qadın.
Həyat bağçasında illər qət etdin,
Bir dəfə xoşbəxtlik yığmayan qadın..
Qəlbində gizlidir bütün dərdlərin,
Evinə xosbəxtlik saçan qadınsan.
Bircə damla sevgi, məhəbbət olsa,
O gün çiçək kimi açan qadınsan.
Gəzirəm gün boyu səndən ötəri
Mən əli dualı, dili dualı
Görəsən, kim bilir cavabın, Allah
"Haçan xosbəxt olar qadın?" sualın.
“Ədəbiyyat və incəsənət”
(12.12.2023)
Bakıda “Avropa qəsrləri” adlı fotosərgi açılıb
“NUR Art House” qalereyasında "FantazEU" Mədəni İrs Festivalı çərçivəsində “Avropa qəsrləri” adlı fotosərginin açılış mərasimi keçirilib.
“Ədəbiyyat və incəsənət” portalı AzərTAC-a istinadən xəbər verir ki, tədbirdə çıxış edən Avropa İttifaqının (Aİ) Azərbaycandakı nümayəndəliyinin rəhbəri Peter Mixalko mədəniyyətin inam və qarşılıqlı anlaşma qurmağa və ölkələr arasında əlaqələri qorumağa, yaxşı münasibətləri təşviq etməyə yardım etdiyini bildirib.
Mədəniyyət və təhsil sahəsində əlaqələrin genişləndirilməsinin vacibliyini vurğulayan diplomat deyib: "Dördüncü dəfə təşkil olunan “FantazEU” Mədəni İrs Festivalının məqsədi Azərbaycanda Avropanın mədəni müxtəlifliyini təbliğ etmək və Aİ ilə Azərbaycan arasında mədəniyyət sahəsində əlaqələr qurmaqdır. Aİ və ona üzv dövlətlərin mədəni müxtəlifliyi dəstəkləmək və onu qorumaq öhdəliyinə sadiq qalmaları təsadüfi deyildir. “FantazEU” Festivalı Avropanın mədəni müxtəlifliyini nümayiş etdirmək və Azərbaycan vətəndaşlarına təqdim etmək fürsəti verəcək. Bu, həmçinin Aİ ilə Azərbaycan arasında güclü tərəfdaşlıq kimi də vacibdir.
Sonda sərgi ilə tanışlıq olub.
Dekabrın 16-dək davam edəcək “Avropanın qəsrləri" adlı sərgidə Avropa İttifaqının on altı ölkəsində yerləşən Avropa qala və qəsrlərinin fotoşəkilləri nümayiş olunacaq.
“Ədəbiyyat və incəsənət”
(12.12.2023)
POEZİYAMIZIN QIZIL FONDUNDAN: - Nüsrət Kəsəmənli, “Sən demə təzədən sevmək olarmış…”
Könül, “Ədəbiyyat və incəsənət”
Rubrikamızda Azərbaycan poeziyasının ən çox səs salmış, ən çox oxunan və əzbərlənən şeirlərini təqdim etməkdəyik. Unudulmaz sevgi şairimiz Nüsrət Kəsəmənlinin “Sən demə təzədən sevmək olarmış” şeirinin növbəsidir. Heç sevginiz daşa dəyəndən sonra yenidən sevmisinizmi? Bu hisslər sizə tanışdımı?
Sən demə təzədən sevmək olarmış,
Tale də təzədən gülə bilərmiş,
Küsüb gözüyaşlı gedən məhəbbət
Peşiman-peşiman dönə bilərmiş.
Ürək bulud kimi boşalırsa da
Demək bulud kimi təzədən dolur.
Sonuncu şöləsi titrəyən şamdan
Ayrı bir şamı da yandırmaq olur.
Sən demə təzədən sevmək olarmış,
Köhnə yaraları vaxt, zaman silir,
Kəsilən budaqla ölən ağaclar
Təzə pöhrələrlə dirilə bilir.
Ağlaya-ağlaya dünyaya gəlib
Biz ana südüylə gülməmişikmi?!
Hər axşam sapsarı batan günəşi
Hər səhər təzə-tər görməmişikmi?
Sən demə təzədən sevmək olarmış,
Sevgi fürsət deyil quş kimi uça.
Nə də kölgədir ki,
Qaçasan qova,
Ya da sən qovasan
O səndən qaça...
Çıxarsan qəlbindən ötən sevgini,
Bir gün də tənhalıq sıxacaq səni.
Kiməsə etdiyin yaxşılıq kimi
Məhəbbət qarşına çıxacaq sənin.
İlk sevgi yuvadan düşən quşcuğaz,
Körpə qanadları pöhrələnməyib.
Məcnunun ahıyla uçan məhəbbət
Min hiylə əliylə yerə enməyib...
Mən ki görməmişəm sevgini susan,
Məhəbbət zirvədə bəslənən qarmış.
Kim deyir bir dəfə sevilir insan,
Sən demə hər zaman sevmək olarmış...
“Ədəbiyyat və incəsənət”
(12.12.2023)
GÜNEY AZƏRBAYCAN POEZİYASI ANTOLOGİYASInda Zaman Paşazadənin “Klaustrofobiya” şeiri
“Ədəbiyyat və incəsənət” portalının Güney Azərbaycan Poeziyası Antologiyası layihəsində portalımızın Güney təmsilçisi Əli Çağla bu dəfə sizlərə Zaman Paşazadənin şeirlərini təqdim edir.
Zaman Paşazadə 1979-cu ildə Kərəc şəhərində dünyaya göz açmış, elə uşaq çağlarında atasının işdən təqaüdə çıxdığına görə Xiyav şəhərinə dönmüşlər. Zaman 2005-ci ildə işi ilə bağlı Muğanln Parsabad şəhərinə köçmüşdür.
O, Muğanda bir neçə dövrə Şəhriyar ədəbi dərnəyinin mərkəzi şurasının üzvü olaraq dərnəyin müdərrisi vəzifəsində çalışmış, bir neçə ədəbi yarışma, o cümlədən Mələkan şəhərində qurulan Yaylıq nəşriyyatının ədəbi yarışmasında seçilmişdir. Sonralar isə bir neçə ədəbi yarışmanın juri heyəti çərçivəsində öz ədəbi çalışmalarını davam etdirmişdir.
2020-ci ildə Zaman Paşazadənin ilk şeirlər toplusu “Aynada öl-dirilmək” ünvanıyla ışıq üzü görmüşdür.
KLAUSTROFOBİYA
Qapıdan içəri keçən əşyaları alkollayıramsa
Pəncərədən sızan hər bir şeyi
Quşların səsini
Çiçəklərin qoxusunu
Havanı
Və uzaq keçmişdə öpüşdüyümü xatırlayıb alkollayıramsa
Fikir vasvasılığı deyil
Ardı kəsilməyən faciələrin normal qorxularıdır.
Hələ ayaqla görüşmək nədir ki,
Plastic geyimlə izolə sevişmək ehtimalı da var.
Bütün gücsüzləşdirən ölümcül viruslardan
Öldürməyib də gücləndirən kabuslara qədər
Dünya sonu sinemasının ssenari qaynağıdır qorxularımız.
Biz möcüzələrə inandığımız yerdə
Tanrının şapkasından bir dovşan çıxıb dişlərini ağardır
Acizliyimiz möcüzələrdən daha böyük
İnanmaq kələməsi daha kiçikdir.
Biz qum saatının boğazında ilişən nisbilik nəzəriyyəsiyik
Biz hər səhər tanrının ümidi ilə yuxudan durub, hər gecə ateist giririk yatağımıza
Bütün günü yuxuda gördüyümüz dörd divarı unutmağa çalışırıq.
İndi gəl “Evdə qal” çağırışına ləbbeyk de
İndi gəl qərəntinə trendinə qoşul
İndi gəl klaustrofobiyanı açıqla polislərə
Çörək klaustrofobiyası
Ev kirası klaustrofobiyası
Leylanın gözlərinin klaustrofobiyası
İndi gəl evdə qal və bütün fobiyalara yolux.
Gəlin tanınmaq üçün maskalarımızı taxaq əziz vətəndaşlar
Çünki “taclı adam yeyənlər” əli silahlı gəzir şəhərdə
Çünki ölüm maskalılara toxunmur.
Bir gün tanrı da yer kürəsini billiard topu kimi qara dəliyə salıb
Maskasını götürəcək üzündən
Biz o zaman tanıyacağıq tanrını
Və oyun bitəcək.
“Ədəbiyyat və incəsənət”
(12.12.2023)
Ətirlidir, dadlıdır, çay, çay, çay…
Nigar Həsənzadə, “Ədəbiyyat və incəsənət”
“Bir fincan çay içim, yorğunluğum keçsin". Biz Azərbaycanlıların ən çox işlətdiyi cümlələrdəndir və çoxumuzun da sevdiyi içki növü çaydır. Ən çox da yaşlı nəsillərin. Bəli, bəzən çayın funksiyasını qəhvə də əvəz edə bilir, ən çox da gənclər üçün. Amma bir çox gənclərimiz hələ də çayı qəhvədən üstün tuturlar. Bəs elmi əsaslarla da çayın yorğunluğa təsir etməsi düzgündürmü?
Elmi əsaslarla çayın xeyirlərindən məlumatlanaq. Çayın yaşıl, qara və ağ növləri var və onu düzgün qəbul etmədikdə faydasından çox zərəri olur. Qida təhlükəsizliyi mütəxəssisləri hər gün insanın 400-600 milliqram, yaxud 4 stəkan yaşıl çay içməsinin vacibliyini bildirirlər. Hər gün içilən 1 stəkan qara çay isə zehni qüvvətləndirir. Çay içərkən onun miqdarına və şəkərsiz içilməsinə diqqət yetirilməlidir.
Keyfiyyətli və yaxşı dəmlənilmiş çay baş ağrılarını, fiziki və zehni yorğunluğu aradan qaldırır. Qara çayın tərkibində mərkəzi sinir sistemi üçün çox vacib olan kofein var.
Həmin maddə yorğunluğu aradan qaldırır, ürək döyüntülərinin sayını artırır, beyinin işini yaxşılaşdırır, yaddaşı möhkəmləndirir, əhvali-ruhiyyəni yaxşılaşdırır. Bununla yanaşı qara çayın tərkibindəki saponinlər iltihab əleyhinə təsir göstərir.
Çayın düzgün hazırlanması çox vacib məsələdir. Bunun üçün şüşə, saxsı və çini dəm çayniklərindən istifadə etmək lazımdır. Çayı dəmlədikdən sonra bir saat ərzində içmək məsləhət görülür.
Amma çox vacibi. Qiymətçə çox ucuz olan və boyaq maddələri ilə bol keyfiyyətsiz çaylar indi marketlərdə boldur. Çoxumuz da “çay çaydı da” deyib qənaət xətrinə bu ucuzlardan alırıq. Amma əsla çay çay deyil. Çay var ömür uzadar, çay var ömür qısaldar.
“Ədəbiyyat və incəsənət”
(12.12.2023)
Ho amato persino la pietra - İTALYANCADIR
Ülviyyə Əbülfəzqızı, “Ədəbiyyat və incəsənət”
"Ho amato persino la pietra"nın tərcüməsi bilirsiniz nədir? “Məndə daşa da sevgi var".
Tanınmış şair və ədəbiyyatşünas, filologiya üzrə fəlsəfə doktoru, dosent Təranə Turan Rəhimlinin italiyanca bu adda şeirlər kitabı yaxın vaxtlarda İtaliyada, Boloniya şəhərindəki "Cuscino di Stelle" nəşriyyatında nəşr edilib. Şeirləri italyan dilinə görkəmli çağdaş italyan şairi Klaudia Piççinno tərcümə edib.
Azərbaycanlı şairin uzun illərdir yaxın dostu olan, müxtəlif beynəlxalq ədəbi layihələrdə birgə iştirak etdiyi Klaudia Piççinno kitabın tərcüməsindən başqa, texniki tərtibatı və nəşrinə də böyük əmək vermiş, onu öz şəxsi vəsaiti ilə çap etdirmişdir. Kitaba tanınmış italyan şairi və psixoloqu Sergio Kamellini ön söz yazıb. Klaudia Piççinno ilə dostluq və qarşılıqlı əməkdaşlığın çağdaş Azərbaycan-italyan ədəbi əlaqələrinə önəmli qatqısından bəhs edən Təranə Turan Rəhimli qeyd edir:
-Mən bir daha özümçün təsdiqlədim ki, təmənnasız, ülvi dostluğun, qəlbdən gələn xeyirxahlığın haqqı əsla ödənməz. Həm şeirlərimin tərcüməsini, həm kitabın nəşrini (bütün xərcləri daxil) öz üzərinə götürən, qiymətli vaxtını böyük ürəklə yaradıcılığıma həsr edən əziz bacım Klaudiaya, poeziyama yüksək dəyər verən ön sözünə görə Sergio Kamelliniyə nə qədər təşəkkür etsəm azdır.
Klaudianı 2016-cı ildə İtaliyada tanıdım. İtaliyadakı Pablo Neruda Mədəniyyət Assosiasiyasının və Kıbrıs, Balkanlar, Avrasiya Türk Ədəbiyyatları Qurumunun birgə təşkilatçılığı ilə keçirilən beynəlxalq ədəbiyyat festivalının qala gecəsində bir-birimizə kitablarımızı bağışladıq. Beləcə təməli ədəbiyyatla, şeirlə başlayan dostluğumuz bu günlərə gəldi. Bir-birini şeirindən, sözündən, sənət sevgisindən tanıdıq, bir-birinin əsərlərini tərcümə etdik, ölkələrimizdə tanıtdıq. Sənət əlaqələrinin yaradıcı şəxslərin həyatında nə qədər önəmli olduğuna dönə-dönə əmin olduq. Dünyanı bizim şair qəlblərimizin, söz dünyamızın xilas edəcəyinə inandıq... inanırıq... Allah gözəl dostluqları qorusun!
Azərbaycanlı şairin sayca 9-cu olan bu yeni kitabı onun italyan oxucuları ilə ilk görüşü deyil. "Ho amato persino la pietra" ("Məndə daşa da sevgi var") kitabına qədər Təranə Turan Rəhimlinin bir çox şeirləri görkəmli italyan şairi, Pablo Neruda Mədəniyyət Assosiasiyasının vitse-prezidenti Maria Miraqlia, görkəmli italyan şairi və rəssamı, özünəməxsus yaradıcılıq üslubu ilə seçilən və beynəlxalq səviyyədə tanınan sənətkar, "İmmegine Poesia" sənət mərkəzinin sədri Lidia Kiarelli, tanınmış şair və qiraət ustası Emanuela Rizzo tərəfindən italyan dilinə tərcümə olunaraq Avropa ölkələri mətbuatında dərc edilmişdir. Həmçinin bu şeirlər 2016-cı ildə İtaliyanın Bari Aldo Moro Universiteti tərəfindən Taranto şəhərində nəşr edilən "Antologia Poetica" beynəlxalq ədəbi toplusunda dərc edilmiş, ölkənin müxtəlif saytlarında yayımlanmış, bədii qiraət ustaları tərəfindən ifa edilmişdir. Şairin tanınmış bədii qiraət ustaları Rosanna Sofiya Papalia və Emmanuela Rizzonun ifa etdiyi şeirləri müxtəlif beynəlxalq tədbirlərdə, ədəbiyyat festivallarında səslənmiş, videokkiplər halnda internet kanallarında yayılmış, italyan sənətsevərlərinin rəğbətini qazanmışdır. İtalyan şairi və psixoloqu Sergio Kamellini Təranə Turan Rəhimlinin italyanca kitabına yazdığı ön sözdə şairə beynəlxalq aləmdə ədəbi nüfuz qazandıran amilləri açıqlayır, bunun ilk növbədə şairin poeziyasının universal semantik dilə malik olması, avtobioqrafik eyhamlarla fantastik sevgi dünyasında gəzişmə məharəti və dərin poetik fəlsəfəsi ilə bağll olduğunu izah edir:
"Tanınmış Azərbaycan şairi və ədəbiyyatşünası Təranə Turan Rəhimlinin kitabı İntrospektiv qavrayış və düşüncənin, daha doğrusu, son dərəcə həssas poetik ruhun hiss və duyğuları arasında səyahətinin, eyni zamanda möhkəm və qətiyyətli bir tarazlığın mövcud olduğu bir şeirlər toplusudur. Misralar əsrarəngiz hisslər, fərqli məkanlar və xatirələr arasında cərəyan edir, sevginin mülayim istiliyi ilə daşın sərtliyi arasında rəngarəng bir əlaqə yaradır. Nəticədə Təranə Turan Rəhimilinin nəfis poetik mənliyi onun hər misrasında görünür, şairin özünəməxsus dünyasının təbii gözəlliyini təsdiqləyir."
Təranə Turan Rəhimlinin italiyanca "Ho amato persino la pietra" ("Məndə daşa da sevgi var") adlı şeirlər kitabı təkcə nəşr edildiyi Baloniya şəhərində "Cuscini di Stelli" nəşriyyatının satış mərkəzlərində deyil, "Amazon" beynəlxalq kitab satışı, Avropanın "Mondadori store", "Libreria rizzoli", "Pic Click It", ABŞ-ın "Dookey Book" kitab satışı mərkəzlərində təbliğ edilmiş və satışa qoyulmuşdur.
Bəli, İtaliyada Azərbaycan şeiri oxunur. Necə də gözəldir.
“Ədəbiyyat və incəsənət”
(12.12.2023)
ANONS: Sabah Esra Gür Karagülle ilə müsahibəni qaçırmayın
…Salam mən yaxşıyam, təşəkkürlər. Siz Necəsiniz? İstanbulda anadan olmuşam. İbtidai məktəb illərində Dövlət Konservatoriyasının qiyabi tələbəsi kimi balet hazırlığına başlamışam. Klassik baletlə yanaşı, piano, teatr kimi kursları yan kurs kimi görürdüm. Peşəkar karyerama orta məktəbdə oxuyarkən İzmir Dövlət Teatrında tamaşaya qoyulan “Oğlan Dost” adlı musiqili teatrda iştirak etməklə başlamışam.
Biznes təhsilimi bitirdikdən sonra özəl bir şirkətdə işləməyə başladım və hələ də biznes həyatımı davam etdirirəm.
Qarışıq rəsm sərgilərim olub…
Çağdaş Türk ədəbiyyatında bol oxucusu olan, izdihamlı kitab təqfimatları keçirən Esra Gür Karagülle portalımıza müsahibə verib. Habil Yaşarın təqdimatında müsahibəni sabah oxuya biləcəksiniz.
Qaçırmayın!
“Ədəbiyyat və incəsənət”
(12.12.2023)
“INNOLAND”də “Brain Game” intellektual oyun hakatonu keçirilib
“INNOLAND" İnkubasiya və Akselerasiya Mərkəzində “Brain Game” intellektual oyun hakatonu keçirilib.
Hakaton Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin və "Azərlotereya” ASC-nin birgə təşkilatçılığı ilə reallaşdırılıb.
“Ədəbiyyat və incəsənət” portalı “ASAN media”ya istinadən xəbər verir ki, layihənin məqsədi ölkəmizdə intellektual oyunların yaradılması sahəsində proseslərin təşviqi, yeni oyun əsaslı həllərin yaradılması və cəmiyyətin intellektual potensialının artırılmasıdır.
Tədbir çərçivəsində hər biri 3-5 nəfərdən ibarət 20 komanda yaradıcı və innovativ oyun layihələrini hazırlayıb. Mentorlar göstərilən müddət ərzində prototiplərin hazırlanıb sonlandırılması üçün komandalara dəstək göstəriblər.
Bağlanış tədbirində komandalar tərəfindən hazırlanan layihələr münsiflər heyəti tərəfindən qiymətləndirilib.
Münsiflər heyəti qismində Dövlət Agentliyinin sədrinin müşaviri Mehdi Cavadov, “İnnovasiyalar Mərkəzi”nin direktoru Vüsal Rüstəmov, “Azərlotereya”nın İdarə Heyətinin sədri Osman Karakuş, “Code Academy”nin rəhbəri Ülvi Aslanov və “DynamicBox Studio” şirkətinin oyun prodüseri Şahin Əliyev iştirak ediblər.
Nəticələrə əsasən “85 Games Studio” komandası 1-ci yerə, “EcoDev” komandası 2-ci yerə, “Bomba!” komandası isə 3-cü yerə layiq görülüb.
Sonda qaliblərə müvafiq olaraq 5000, 2000 və 1000 manat məbləğində pul mükafatı və diplomlar təqdim olunub. Növbəti yaxşı nəticə göstərən “Kript 10” və” AKA” komandaları isə həvəsləndirici mükafat alıb.
Hakatona müraciət edən 65 komanda arasından seçilən 54 komanda 16 noyabr tarixində ideya konseptlərini təqdim ediblər. Qiymətləndirmə nəticəsində yalnız 20 komanda müsabiqə mərhələsində iştirak hüququ qazanıb.
“Ədəbiyyat və incəsənət”
(12.12.2023)
“ASAN xidmət” növbəti beynəlxalq mükafata layiq görülüb
Bakıda II Beynəlxalq İnnovasiya Menecmenti və TRİZ konfransı keçirilib.
TRİZ İnstitutunun, Türkiyənin Qazi Universitetinin və Milli Aviasiya Akademiyasının birgə təşəbbüsü ilə reallaşdırılan tədbir Ulu öndər Heydər Əliyevin anadan olmasının 100 illiyinə, eyni zamanda 20-ci əsrin ən önəmli nəzəriyyələrindən biri olan və Bakıda yaradılmış TRİZ (ixtiraçılıq məsələlərin həlli) nəzəriyyəsinə həsr edilib.
“Ədəbiyyat və incəsənət” portalı “ASAN xidmət”ə istinadən xəbər verir ki, konfrans çərçivəsində “ASAN xidmət” ixtiraçılıq məsələlərinin həlli nəzəriyyəsinin banisi, görkəmli ixtiraçı-mühəndis Genrix Altşullerin adını daşıyan medal və mükafat ilə təltif olunub. Mükafat quruma beynəlxalq innovativ ictimai idarəçilik sahəsində əldə olunan uğurlara görə verilib.
“Ədəbiyyat və incəsənət”
(12.12.2023)
