İyulun 14-də Azərbaycan Respublikasının mədəniyyət naziri Anar Kərimov İslam Əməkdaşlığı Gənclər Forumu (IYCF) tərəfindən təşkil edilən xüsusi silsilə çıxışlar (Special Edition Talks) çərçivəsində Fəxri Qonaq qismində “Gənclər və mədəniyyətin formalaşdırılması” mövzusunda çıxış etmişdir.
Mədəniyyət Nazirıiyinin yaydığı rəsmi açıqlamaya görə, mədəniyyətin dayanıqlı inkişafında gənclərin həlledici rolundan söhbət açan Anar Kərimov əvvəlcə bu sahədə dünyada və Azərbaycanda müşahidə olunan müasir meyllərdən danışmışdır. Yaradıcı gənclərin dəstəklənməsi naminə Mədəniyyət Nazirliyi tərəfindən təkcə COVID-19 pandemiyası dövründə 30-dan çox layihənin reallaşdırıldığı qeyd edilmişdir.
Beynəlxalq səviyyədə gənclərin mədəniyyətdə rolunun artırılması məqsədilə Azərbaycanın dəstəyi ilə həyata keçirilən layihələrdən söz açan nazir, son illər dünyada cərəyan edən müxtəlif proseslər, rəqəmsallaşma, IV Sənaye İnqilabı kimi hadisələrin fonunda mədəniyyətin üzləşdiyi çağırışlardan da danışmışdır. Texnoloji inqilablar əsrində mədəniyyətə yeni baxışın formalaşdırılması və mədəni dəyərlərin qorunmasının önəminə diqqət çəkmiş, dünyada insanların artan məşquliyyətləri və azalan vaxtı çərçivəsində gündəlik həyat tərzlərinin onları robotlaşdırmaması üçün mədəniyyətin ruhlandırıcı və yüksək estetik zövq formalaşdıran təsirlərinin güclənməsinin zərurətə çevrildiyini vurğulamışdır.
Çıxışda həmçinin, Azərbaycanın təşəbbüsü ilə 2008-ci ildə yaradılan “Bakı Prosesi” qlobal təşəbbüsü və bu çərçivədə dünyanın nüfuzlu beynəlxalq təşkilatları ilə birgə təşkil olunan Ümumdünya Mədəniyyətlərarası Dialoq Forumları , eləcə də, Gənclər üçün təşkil olunan panellər haqqında məlumat verilmişdir.
Mədəni müxtəlifliyin qorunması istiqamətində ölkəmizin beynəlxalq miqyasda olduqca fəal olduğunu bildirən A.Kərimov, buna baxmayaraq  30 il müddətində Azərbaycanın işğal edilmiş ərazilərində mədəni irsin planlı şəkildə məhv edildiyini və bu ərazilərin Azərbaycanın özü tərəfindən 44 günlük Vətən müharibəsində azad olunmasına qədər mədəniyyətə təcavüzün dayandırılmadığını bildirmişdir.
Mədəniyyətin sülhə dəstək verdiyi kimi, sülhün də mədəniyyətin inkişafı üçün əsas şərt oluğunu vurğulayan Anar Kərimov müharibələrin və vandalizmin mədəniyyəti hədəf seçdiyini, bütün dünyada bunun qarşını birdəfəlik almaq məqsədlə Mədəniyyət Nazirliyi tərəfindən “Mədəniyyət üçün sülh” (#Peace4Culture) qlobal çağırışının və çağırış çərçivəsində “Sülh  üçün yarat” (#Create4Peace) kampaniyasının elan edildiyini qeyd etmişdir. BMT-nin Sivilizasiyalar Alyansı və İSESKO kimi beynəlxalq təşkilatların çağırışı dəstəklədikləri vurğulamışdır.

Xəbər versiyimiz kimi, Azərbaycan Respublikası Kinematoqrafçılar İttifaqı geniş iclas keçirib. İclasda  Milli Kino Mükafatı ilə bağlı məsələyə də baxılıb.
İttifaqın İdarə Heyətinin yekdil qərarına görə tanınmış kinooperator, Əməkdar incəsənət xadimi Rafael Qənbərov Milli Kino Mükafatına layiq görülüb.
Rafael Əli oğlu Qəmbərov 1947-ci ildə Rusiya Feserasiyasının Qroznı şəhərində dünyaya gəlib,  kinooperator və fotoqrafdır, Azərbaycan Fotoqraflar Birliyinin sədri olub. Azərbaycanın əməkdar incəsənət xadimi, SSRİ Dövlət Mükafatı laureatıdır (1981), 2018-ci ildən Prezident təqaüdçüsüdür.
“Dantenin yubileyi”, “İstintaq”, “Park”, “Ölsəm bağışla”, “Həm ziyarət, həm ticarət” kimi sevilən filmlərdə əmək qoyub.
Milli Kino Mükafatı 2012-ci ildən Azərbaycan Respublikası Kinematoqrafçılar İttifaqının İdarə Heyətinin qərarı ilə təsis edilib və Azərbaycanda ən yüksək kino mükafatıdır. Mükafatın məbləği 2 min manatdır.
Mükafat qalibə 2 avqust Milli Kino Günündə təqdim ediləcək.

Dünən Azərbaycan Respublikasının Xarici İşlər Nazirliyi və ADA Universitetinin birgə təşkilatçılığı ilə “44 günlük Vətən müharibəsi və müharibədən sonra Azərbaycanın xarici siyasəti" mövzusunda "Diplomatiya həftəsi"nin növbəti günü oldu və gün Azərbaycanın mədəniyyət sahəsinə həsr olundu.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, tədbirdə əsas qonaq qismində Azərbaycan Respublikasının mədəniyyət naziri Anar Kərimov iştirak edib.
Mədəniyyət naziri Anar Kərimov “Azərbaycanın mədəni irsinə qarşı erməni təcavüzü” mövzusunda təqdimatla çıxış edib.
Nazir tarixi irsimizə qarşı erməni vandalizmini əyani nümayiş etdirən təqdimatla abidələrimizin hazırki vəziyyəti və onların bərpa olunması üçün dövlətimizin həyata keçirəcəyi işlərdən danışıb.
Anar Kərimov müzəffər ordumuzun 44 günlük Vətən müharibəsində böyük qəhrəmanlıq göstərərək işğal altında olan torpaqlarımızı  mənfur düşməndən azad etdiyini vurğulayıb. Ali Baş Komandan İlham Əliyevin rəhbərliyi altında Azərbaycan Ordusu qızıl hərflərlə zəfər tariximizə yeni səhifə yazdığını bildirib. Bu gün Müzəffər Ali Baş Komandan İlham Əliyevin rəhbərliyi altında tariximizin ən şərəfli günlərini yaşayan respublikamız bütün dünyada qalib dövlət, xalqımız isə məğrur xalq kimi tanınır.
Tədbirin sonunda Nazir gəncləri maraqlandıran sualları cavablandırıb.
Azərbaycanda fəaliyyət göstərən könüllü təşkilatları və hərəkatlarının nümayəndələrinin iştirakı ilə keçirilən diplomatiya həftəsi cari ilin 26 iyul tarixinədək davam edəcək.

Xəstəxanalar tam boşaldılır, xüsusi kovid şöbələri bağlanır, dövlətdə praktiki olaraq sıfır yoluxma səviyyəsi qeydə alınır. Bu ölkə hansıdır və bu cür uğurlara necə nail ola bilib?
Söhbət sahəsi 61 kv. km olan San-Marinodan -  kiçik turizm dövlətindən gedir.
“Ədəbiyyat və incəsənət” portalı CNN-ə istinadən məlumat verir ki, San Marinoda post kovid dövrü bərqərar olub, bərpa olunanların statistikasına baxanda görünür ki, ölkə 90 sanmarinolunu itirib, 5 min nəfər isə xəstələnib və sağalıb.
Ölkə rəhbərliyi məcburi peyvənd sayəsində kovidi qovmağa müvəffəq olub. Burada peyvəndi yalnız ölkə vətəndaşlarına deyil, həm də səyahətçilərə də ediblər, öz arzuları ilə. Enjeksiyonlar 22 min yerli sakin tərəfindən tətbiq olunub, onlardan 14 min nəfər artıq tam peyvənd kursunu tamamlayıb. Turistlər "səyahətçilər üçün əlavə xidmət" kimi pullu prosedurdan keçirlər.
Nə üçün San-Marino peyvəndləməyə bu qədər tez qərar verib, halbuki böyük ölkələrdə vətəndaşların yalnız 20- 25 faizi peyvənd olunub?
Məsələ ondadır ki, pandemiya onsuz da azsaylı San-Marino əhalisini məhv etmək təhlükəsi ilə üzləşdirmişdi. Bununla əlaqədar olaraq, lokdaun tətbiq edilərdi və ölkə iqtisadiyyatı iflasa uğrayardı. Xoşbəxtlikdən, hakimiyyət tez bir zamanda problemə reaksiya verdi və tədbirlər gördü. Onlar nəinki yerli, həm də minlərlə xarici vətəndaşların  həyatını xilas edə bildilər. Və iqtisadiyyat da zərər görmədi.
Kovid nədir, hardan peyda oldu, süni yollamı yayılır, arxasında hansı maraqlar dayanır kimi suallarla bütün dünya məşğul ikən San Marino əməli iş gördü və məsələni çözdü. Bax belə.

Rejissor Şamil Əliyevin “Yaradanlar” bədii-sənədli filmi “Vesuvius İnternational Film Festival 2021”in (Napoli, İtaliya) münsiflərinin xüsusi mükafatına layiq görülüb.
AzərTAC-ın verdiyi  xəbərə görə “Yaradanlar” filmi dahi memarlar Mikayıl Hüseynov və Sadıq Dadaşovun həyat və yaradıcılığı fonunda XX əsrdə kommunist ideologiyasının Azərbaycan mədəni irsinə, əxlaqına vurduğu şiddətli zərbənin araşdırılmasından bəhs edir. 1937-ci il repressiyasında onların qohumlarından olan ziyalıların əksəriyyəti məhv edildi. Mikayıl Hüseynov və Sadıq Dadaşov ömürlərinin bir hissəsini qorxu və mənəvi sıxıntılarla yaşamağa məcbur oldular.
Qeyd edək ki, “Yaradanlar” filmi Mədəniyyət Nazirliyinin sifarişi ilə “Salnamə” studiyasında 2020-ci ildə istehsal olunub. Filmin ssenari müəllifi Natiq Rəsulzadə, operatoru Rüfət Süleymanov, bəstəkarı Azər Əsgərov, rəssamı Lalə Hüseynzadə, prodüseri Nazim Hüseynovdur.

Bu vacib xəbər İslam Dünyası Elm, Təhsil və Mədəniyyət Təşkilatının (ICESCO) baş qərargahında təşkilatın Baş direktoru Salim bin Məhəmməd Əl-Malik ilə Azərbaycanın Mərakeşdəki səfiri Oktay Qurbanov arasında keçirilmiş görüşdə səslənib.
Şuşa şəhərinin 2022-ci ildə İslam dünyasının Asiya regionu üzrə mədəniyyət paytaxtı elan olunması üzrə təşəbbüsü ISESCO irəli sürüb, Salim bin Məhəmməd Əl-Malik görüşdə qeyd edib ki, onun rəhbərlik etdiyi təşkilat bu mühüm təşəbbüsün yüksək səviyyədə həyata keçirilməsi üçün lazım olan bütün tədbirləri görəcək. O, əlavə edib ki, Şuşanın İslam Dünyası Mədəniyyət Paytaxtı tədbirləri çərçivəsində ICESCO-nun Azərbaycanda regional ofisinin açılması da nəzərdə tutulur.

Gürcüstanın paytaxtı Tbilisi şəhərinin meri Kaxa Kaladzenin başçılıq etdiyi nümayəndə heyəti ölkəmizə səfər çərçivəsində dünən İçərişəhəri ziyarət edib.”İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Əsgər Ələkbərov tərəfindən qarşılanan qonaqlar Bakı Xan Sarayı Kompleksinin parkı və Yeraltı hamamla tanış olublar.
Gürcüstanlı rəsmilər, eyni zamanda, “İçərişəhər” Ənənəvi İncəsənət Mərkəzində də olublar, burada onları ən dəyərli əl işləri nümunələri ilə tanış ediblər. Daha sonra qonaqlar  Bakı Fotoqrafiya Evini ziyarət ediblər.
Həmçinin ekskursiya zamanı ziyarətçilərə Qız Qalası, Qala divarları kimi abidələrin tarixi və memarlıq xüsusiyyətləri barədə dolğun məlumat verilib.
Kaxa Kaladze və Nümayəndə heyəti qədim şəhərdən xoş və zəngin təəssüratla ayrılıblar, Azərbaycan mədəni irsini yüksək qiymətləndiriblər.
Xatırladaq ki, Kaxa Kaladze vaxtı ilə futbolçu olub, Gürcüstan futbol tarixinin bir nömrəlisi hesab olunur. Azərbaycanlılar onu İtaliyanın “Milan” klubindakı möhtəşəm çıxışı ilə xatırlayırlar.

Koronavirus dönəmi insanlığa elə bir zərbə vurub ki, acısı hələ uzun illər qalacaq. O, incəsənətdə, ədəbiyyatda da çoxsaylı əsərlərdə təcəssüm olunacaq. Halbuki, belə sənət əsərlərindən biri artıq ortaya qoyulmuşdur.
“Ədəbiyyat və incəsənət” portalı BBC-yə istinadən məlumat verir ki, Danimarkanın Blokxus şəhərində
Koronovan adında qum qəsr inşa edilib. 21 metr 16 santimetrlik bu qəsri 30 könüllü 5 ton qumdan ərsəyə gətirib. Bu, dünyanın ən böyük qum qəsridir.
Müəlliflər Koronovan adını korona virusundan götürüblər, qəsrin divarlarında ayrı-ayrı fiqurlarla korona epoxasının faciəsini fiksə eləyiblər: insan ölümü, sərhədlərin bağlanması, tibbi maskada gəzmək, qəm-kədər görüntüləri və s.

“Mədəniyyət/Culture” jurnalının 2021-ci ilə aid növbəti nömrəsi işıq üzü gördü. Bu elmi-metodiki, publisistik jurnalın bu nömrəsi bütövlükdə ilin möhtəşəm mədəniyyət hadisəsinə çevrilmiş "Xarıbülbül" Musiqi Festivalının Şuşada az qala üç on illikdən sonra yenidən baş tutması haqqında yazı, eləcə də bu milli özünüdərk bayramının bəzi iştirakçılarının festival və Şuşa təəssüratları ilə açılır.
İlin əvvəlindən başlayan “Mədəniyyətdən əbədiyyətə”, "Səhnədən hərb meydanına" layihələri Vətən müharibəsinin şəhid, qazi və veteranlarının cəbhə yolundan bəhs edir. Bütün bu məqalələr "Qarabağ Azərbaycandır!" rubrikasında birləşib.
“Azərbaycan Cümhuriyyəti – 103” rubrikasında Ceyhun Hacıbəylinin həyat və fəaliyyətinin indiyə qədər naməlum qalan tərəflərinə nəzər salınıb.
"Ədəbiyyat" rubrikasının oxucularını Aşıq Ələsgərin 200 illik yubileyi ilində saz-söz ustadının varislərindən biri olan Xətai Ələsgərlə geniş söhbət, görkəmli alim, Azərbaycan-özbək ədəbi əlaqələrinin ilk tədqiqatçılarından Qulamhüseyn Əliyevin Özbəkistan Respublikasında iki dildə nəşr edilən kitabı haqqında rəy və digər maraqlı məqalələr gözləyir.
“Musiqi” rubrikası görkəmli vokalçı Bülbülə həsr olunmuş məqalə və X Beynəlxalq Caz Günü ənənəsinin Azərbaycanda əks-sədası ilə səslənir.
Jurnalın “Teatr” rubrikasındakı yazı Jan Lui Barro və onun "Teatr haqqında düşüncələr"inin Azərbaycan dilinə tərcüməsinin davamıdır.
“Memarlıq” rubrikasındakı “Baş tutmayan müsahibə” korifey memarımız Mikayıl Useynovun həyatının son aylarına işıq salır. “Muzeylər” rubrikası Bakıdakı Nizami Gəncəvi adına Milli Azərbaycan Ədəbiyyatı Muzeyinə və Şəkidəki Şəkixanovların evinə həsr edilib.
Jurnalda işğaldan azad edilmiş ərazilərimizdə qurulmasına start verilmiş “Ağıllı kənd” layihəsinin gerçəkləşdirilməsi məsələlərinə də toxunulur.