“Ədəbiyyat və incəsənət” portalı ustad şair Ramiz Qusarçaylının Mirzə Şəfi Vazehə ithaf elədiyi şeirini 39-cu ildönümünündə yad edir. 

Bu şeiri yazanda mənim 25, Mirzə Şəfi Vazehin 189 yaşı vardı. İndi mənim 64, Mirzə Şəfinin 228, bu şeirin isə 39 yaşı var. 

Ustadın ruhu şad olsun!

Mirzə Şəfi

Şeyx Sənan dağında düşüncələr

Sinəmdə quş kimi çırpınır ürək,

Sükut sıxır məni, töyşüdür məni. 

Donmuşam yerimdə məzar daşı tək,

Sırsıra fikirlər üşüdür məni.

Küləklər ahımı səpir yollara,

Qayalar bu dərdi yazar daşına.

Dağ dağa sığınıb, məzar məzara,

Mən də sığınmışam məzar daşına.

Dərələrdən ötən duman da, sis də,

Sanki göz yaşımdır, yeriyir dağ-dağ.

Büst də qoymadılar məzarın üstə,

Qəlbimdə heykəlin ucalır ancaq. 

Ovuda bilməyir nə çən, nə çiçək,

Dağın gen sinəsi çuxurlanıbdı. 

Bəlkə yoxa çıxan şeirlərin tək,

Qərib məzarın da oğurlanıbdı.

Buludlar içində boğulan Günəş,

Nur aldı şeirinin şəfəqlərindən.

Bir nəmli daxmada doğulan Günəş,

Sozaldı kədərin üfüqlərində.

Bodenştedt qorxmadı nifrətdən, kindən,

İsindi bir həzin qəlbin közünə.

Bir qəmli şairin qəm dəftərindən

Bir şöhrət sarayı tikdi özünə.

Könlündən bir misra dərə bilməyən,

Bir şair qəlbini qopardı, getdi.

Dünyaya bir nəğmə verə bilməyən

Dünyadan min nəğmə apardı getdi.

Hissimə, duyğuma daş atıb qəhər,

Öz sözüm özümdən alınıb indi,

Dünyaya sığmayan odlu nəğmələr

Yüz illik qəfəsə salınıb indi.

Bir ovuc torpağam yer kürəsində,

Min fikir uyuyur hər zərrəsində.

Yarada-yarada talanmışam mən.

Talana-talana tanınmışam mən.

Zilimdə kükrəyən tarım, kamanım, 

Bəmimdə hıçqıran simim olubdu.

Mənim Vazeh boyda şöhrətim, şanım,

Mənim Vazeh boyda qəmim olubdu.

1983

Xəbər verdiyimiz kimi, Heydər Əliyev Fondunun dəstəyi, Mədəniyyət Nazirliyi və Azərbaycan Televiziyasının təşkilatçılığı ilə keçirilən VIII “Muğam” Televiziya Müsabiqəsinin finalı və qala-konsertinə Şuşa şəhəri ev sahibliyi edəcək.

Final gecəsi bu gün, qala-konsert isə sabah keçiriləcək. 

Finala və qala-konsertə tanınmış sənət adamları, mədəniyyət və incəsənət xadimləri dəvət olunub. Final gecəsinin açılışını Xalq artisti Mənsum İbrahimov edəcək. Ardınca iştirakçıların ifaları dinləniləcək, münsiflər heyətinin məşvərətindən sonra qaliblər elan olunacaq. 

Qala-konsertdə bu günədək keçirilən səkkiz “Muğam” müsabiqəsinin qalib və mükafatçıları çıxış edəcəklər. İfalar müsabiqənin keçirildiyi illər üzrə duet şəklində təqdim olunacaq. 

Müsabiqənin finalı Bülbülün ev-muzeyinin həyətində, qala-konsert isə Cıdır düzündə təşkil olunacaq. Hər iki konsert proqramı AzTV, “Mədəniyyət” TV və Azərbaycan Radiosu vasitəsilə saat 16:00-dan etibarən canlı yayımlanacaq. 

İki saatlıq muğam ziyafətini AzTV və “Mədəniyyət” TV-nin rəsmi feysbuk və YouTube səhifələrində də canlı izləmək mümkün olacaq. Bununla yanaşı, avqustun 5-6-da saat 21:00-da Dənizkənarı Milli Parkdakı böyük monitorda VIII “Muğam” müsabiqəsinin finalı və qala-konserti nümayiş etdiriləcək.

Finalın Şuşada keçirilməsi VIII “Muğam” müsabiqəsinin məhz “Şuşa İli”nə təsadüf etməsi ilə bağlıdır. Muğamın beşiyi olan mədəniyyət paytaxtımızın yarışmanın həlledici etapına ev sahibliyi etməsi QSC-nin “Şuşa İli”nə töhfəsidir.

Qeyd edək ki, müsabiqənin seçim turları aprelin 9-da başlanıb, Ağdam, Füzuli və digər işğaldan azad olunmuş ərazilər başda olmaqla bütün regionları əhatə edib. Yarışma mayın 10-da start götürüb. Müsabiqə üç ay müddətində həftədə iki dəfə olmaqla Azərbaycan Televiziyası və “Mədəniyyət” kanalı vasitəsilə canlı yayımlanıb.

Bildiyiniz kimi yay ali məktəblərə qəbul imtahanları ilə də səciyyəvidir. Abituriyentlərin maksimal nəticə toplamaları hadisəsi isə həmişə müstəsna hal kimi hamının diqqətini cəlb edir.

“Ədəbiyyat və incəsənət” portalı xəbər verir ki, Bakı Şəhəri üzrə Təhsil İdarəsinin tabeliyindəki ümumi təhsil məktəbinin məzunu IV ixtisas qrupu üzrə ali məktəblərə qəbul imtahanında ən yüksək nəticə göstərib. Söhbət Xəzər rayonu, Buzovna qəsəbəsi, Əfqan Əliyev adına 125 nömrəli tam orta məktəbin məzunu Nigar Əhədulla  qızı Ağazadədən gedir. O, IV  ixtisas qrupu üzrə bütün suallara düzgün cavab verərək 400 bal toplayıb. 

Qeyd edək ki, imtahanın I mərhələsində 300 bal toplayan istedadlı məzun hər iki mərhələnin cəminə görə maksimal olan 700 bal toplayıb.

Yüksək uğur qazanmış  Nigar Ağazadəni  ürəkdən təbrik edirik!

Ukraynanın şəhər və kəndlərini xarabaya döndərən, dinc sakinləri öldürən Rusiya bir ucdan mədıniyyət tədbirləri də keçirir. Bu tədbirlərdən birini 40 yaşlı moskvalı Nina Bannaya qazanıb. O, ərdə olan xanımların  "Miss Rusiya 2022" gözəllik müsabiqəsinin qalibi olub. 

“Ədəbiyyat və incəsənət” portalı RİA Novostiyə istinadən xəbər verir ki, sözügedən yarışmada ümumilikdə Rusiyanın hər yerindən 25 qadın iştirak edib.

Ən gənci Rostovdan olan 21 yaşlı, ən yaşlısı isə Moskva vilayətindən olan 64 yaşlı iştirakçı digərləri ilə birlikdə tac uğrunda çarpışıblar. 

Qeyd edək ki, qalib gəlmiş Nina beynəlxalq otel biznesi üzrə çalışır və üç övladı var - 16, 15 və 11 yaşında. O, idmanı və səyahət etməyi sevir, sosial tədbirlərdə iştirak edir, "Instagram"da məşhurlarla fotolar paylaşır.

Bu qələbəni isə əsla gözləmədiyini söyləyir.