Super User
Bu gün Milli Qurama Festivalı öz işinə başlayacaq
Azərbaycanda ilk dəfə bu gün iyulun 7-də başlayan və avqustun 7-dək davam edəcək Milli Qurama Festivalı çərçivəsində dekorativ-tətbiqi sənətin bu növü haqqında kitab təqdimatı da keçiriləcək.
“İçərişəhər” Dövlət Tarix-Memarlıq Qoruğu İdarəsi, Mədəniyyət və Təhsil nazirlikləri , eləcə də Bakı Şəhəri İcra Hakimiyyətinin təşkilatçılığı ilə keçirilən festivalda bir sıra tədbirlər, kitab təqdimatı, elmi-praktik konfrans, autizm sindromlu uşaqlar üçün art-terapiya, sərgi, ustad dərsləri, kulinariya və poeziya gecələri təşkil olunacaq.
Qeyd edək ki, 2020-ci ildə “Qala” Dövlət Tarix-Etnoqrafiya Qoruğunda Qurama Mərkəzi açılıb. Qurama Azərbaycan bədii incəsənətində xüsusi yerə malik dekorativ-tətbiqi sənət növü olmaqla yanaşı, qədim tarixi köklərə və ənənələrə söykənərək bu gün də öz aktuallığını qoruyur.
Bir sözlə, olduqca maraqlı və rəngarəng bir festival gözləyirik.
Gəncə Dövlət Kukla Teatrı yeni tamaşa hazırlayıb
Gəncə Dövlət Kukla Teatrında Xalq şairi Rəsul Rzanın “Ana qaz” şeirinin motivləri əsasında eyniadlı tamaşa hazırlanıb.
Məktəblilərin yay tətili üçün hazırlanmış bu birhissəli uşaq tamaşasının quruluş müəllifi teatrın baş rejissoru Şamil Məmmədli, quruluşçu rəssamı Məhəmməd Hacıyev, xoreoqrafik həll müəllifi Fərmail Paşayev, musiqi tərtibatçısı Şamil Məmmədlidir.
Tamaşada Zülfiyyə Əliyeva, Naidə Namazova, Səməd Xanəhmədov, Yeganə Məmmədova, Elmar Vəliyev, Nərmin Şərifova oynayırlar.
“Cənubda kino günləri” layihəsi bu dəfə Lerikə qonaq gedir
İyulun 13-14-də Azərbaycan Kinematoqrafçılar İttifaqının “Cənubda kino günləri” layihəsi çərçivəsində Lerik rayonunda filmlər nümayiş olunacaq.
Ekran əsərləri saat 11:00-da rayonun Mədəniyyət Mərkəzində və saat 15:00-da Piran kəndinin Folklor Klubunda göstəriləcək.
Tamaşaçılara Mirbala Səlimlinin “Qırmızı bağ”, Elvin Adıgözəlovun “Biləsuvar”, İlqar Nəcəfin “Nar bağı”, Namiq Ağayevin “Ol”, Məzahir Həşimovun “Sizə məktub var”, Amil Amalın “Titrəmə”, Kamal Yaşarın “Dan yeli”, Amil Amalın “Dəhlizdə”, Nurlan Həsənlinin “Bir Ata haqqında”, Rövşən Nicatın “Hədiyyə”, Türkan Hüseynovanın “Papanin”, Ərturan Nəcəfin “Səs” qısametrajlı və tammetrajlı filmləri göstəriləcək.
Qeyd edək ki, “Cənubda kino günləri” layihəsinin icraçı prodüseri İntiqam Hacılıdır.
Əkbər Qoşalının türk xalqları ədəbiyyatının dövrləşməsinə dair məqaləsi Türkiyədə yayımlanıb
Milli Məclisin Mədəniyyət komitəsinin eksperti, Mədəniyyət Nazirliyi yanında İctimai Şurasının sədr müavini, Beynəlxalq "ALAŞ" Ədəbiyyat mükafatı laureatı Əkbər Qoşalının türk xalqları ədəbiyyatının dövrləşməsinə dair məqaləsi qardaş Türkiyənin “TARİH - türk dünyası tarix, mədəniyyət” dərgisində yayımlanıb.
“Ədəbiyyat və incəsənət” portalı xəbər verir ki, məqalədə türk xalqları ədəbiyyatının yeni bölgüsü irəli sürülüb. Bu, yazarın "TARİH"də çıxan ikinci irihəcmli məqaləsidir. O, cari ilin fevralında, "Ermənilərin Orta Asiya politikası" adlı araşdırma yazısı ilə çıxış etmişdi.
Ə.Qoşalının şeirləri isə digər qardaş ölkədə - Özbəkistanın nüfuzlu "Cahan ədəbiyyatı" dərgisinin yeni sayında yayımlanıb. Burada yazarın yeddi şeiri oxuculara təqdim olunub. Şeirləri özbəkcəyə özbək şair-tərcüməçisi Rəhmət Babacan uyğunlaşdırıb.
İslam dünyası mədəni abidələri irsi üzrə “Gənc səfirlər proqramı” həyata keçiriləcək
İslam Dünyası Komitəsinin (IWHC) ISESCO-nun baş qərargahında keçirilən 10-cu iclasının yekun iclasında təşkilata üzv ölkələrin nümayəndələrinin iştirak edəcəyi “Gənc səfirlər proqramı” təsdiq olunub.
Proqramın birinci mərhələsində İslam ölkələrindən, o cümlədən Azərbaycandan 3 min gənc maddi və qeyri-maddi irs abidələrinin təbliği və qorunması üzrə təlim kurslarına cəlb olunacaq, həmçinin onların arasından 30 səfir seçiləcək. Proqram üç coğrafi regionu əhatə edəcək.
“Ədəbiyyat və incəsənət” portalı AzərTAC-a istinadən bildirir ki, iclasda 8 ölkədəki – İraq, Pakistan, Kamerun, Mavritaniya, Küveyt, Mərakeş, İndoneziya və Nigeriyadakı 141 tarixi məkan və mədəni elementi İslam Dünyası İrsi Siyahısına daxil edilib. Azərbaycanın da daxil olduğu coğrafi məkan üzrə yeni maddi və qeyri-maddi irs abidələrinin siyahıya daxil edilməsi məsələsinə gələcək iclasda baxılacaq.
Komitənin 10-cu iclasında qəbul edilmiş qərarlarda, həmçinin “Maddi və Qeyri-Maddi Mədəni İrs Elementlərinin Qorunması üzrə Ən Yaxşı Təcrübələrin Siyahısı” adı altında yeni layihənin hazırlanması, iki sessiya arasında IWHC-nin nailiyyətləri haqqında hesabatın təsdiqi də yer alıb.
Komitə üzvləri artıq birinci hissəsi hazırlanmış “İslam dünyasının irsi” kitabını nəzərdən keçirib və ona lazımi düzəlişlər ediblər. Bu kitabın son variantı çap edilərək üzv dövlətlərə göndəriləcək.
Mirzə Fətəli Axundzadənin 210 illiyi münasibətilə kitab sərgisi açılıb
Bakı Şəhər Mədəniyyət Baş İdarəsi Sabunçu rayon Mərkəzləşdirilmiş Kitabxana Sisteminin 1 nömrəli filialında Mirzə Fətəli Axundzadənin anadan olmasının 210 illiyinə həsr olunmuş sərgi təşkil edilib.
Baş İdarədən verilən məlumata görə, sərgidə müəllifin həyat və yaradıcılığından bəhs edən kitablar nümayiş edilib. Gün ərzində kitabxanaya gələn oxucular sərgi ilə tanış edilərək iştirakçılara Azərbaycan ədəbiyyatının görkəmli nümayəndələrindən biri olan M.F.Axundzadənin həyat və yaradıcılığı haqqında məlumat verilib. Bildirilib ki, M.F.Axundzadə görkəmli dramaturq, maarifçi, şair, materialist filosof, həmçinin Azərbaycan dramaturgiyası və ədəbiyyatında ədəbi tənqidin banisidir.
Qeyd edək ki, Mirzə Fətəli Axundzadə 1812-ci ildə Nuxa şəhərində anadan olub. Atası Mirzə Məhəmmədtağı və anası Nanə xanım 1814-cü ildə Təbriz yaxınlığındakı Xamnə qəsəbəsinə köçüblər. M.F.Axundzadə 1878-ci ildə Tiflisdə vəfat edib və köhnə müsəlman qəbiristanlığında (indiki Tbilisi botanika bağının ərazisində) dəfn olunub.
Ən çox oxunan: Rusiya kinosu çökməkdədir
Rusiyanın Ukraynada artıq beşinci aydır davam edən hərbi əməliyyatının ciddi iqtisadi əks-təsirləri ilə yanaşı, ölkənin mədəni həyatında, o cümlədən yaradıcı sənaye və əyləncə sektorunda fəsadları da genişlənməkdədir.
“Ədəbiyyat və incəsənət” portalı Qərb mətbuatına istinadən xəbər verir ki, Qərbin nüfuzlu kino şirkətləri Rusiya ilə əməkdaşlığı kəsiblər. Tətbiq edilən sanksiyalara uyğun olaraq, ABŞ-ın “Kolumbiya pikçers”, “Disney”, “Warner Broses”, “Paramount” kimi kino nəhənglərinin Rusiyaya film prokatını dayandırması bu ölkədə kinozalların fəaliyyətinə mənfi təsir göstərib.
Rusiya Kinoteatrlar Assosiasiyasının məlumatına görə, ötən müddətdə ölkə üzrə kinozalların üçdəbiri fəaliyyətini dayandırıb. Səbəb tamaşaçı sayının azalması və rentabelliliyin olmamasıdır. Sadəcə, yerli filmlərlə zalları doldurmaq artıq mümkün deyil.
Məlumatda bildirilir ki, bu ilin yanvar ayında assosiasiyanın şəbəkəsi üzrə 5,7 min kinozalı fəaliyyət göstərirdisə, may ayında bu rəqəm 3,6 minə düşüb. O cümlədən həftəsonları kino nümayişləri 21 faiz azalıb. Nəticədə kinoteatrların gəliri də bu ilin may ayında ötən ilin eyni dövrü ilə müqayisədə 63 faiz azalıb.
Təcavüzkar dövlət bunun bədəlini almaqdadır.
Günün fotosu: Bu sədd normal həyata mane olmur?
Günün fotosu: Bu sədd normal həyata mane olmur?
Polşa və Ukrayna sərhəddində - Belovejye şəhərində miqrantların qarşısının alınması üçün ucaldılan bu nəhəng hasar əslində normal həyatı durdurub.
Foto: Euronews
Şuşa teatrı mövsümə iki tamaşanın nümayişi ilə yekun vuracaq
Şuşa Dövlət Musiqili Dram Teatrı 148-ci teatr mövsümünü iyulun 16–da 2 tamaşanın nümayişi ilə yekunlaşdıracaq.
Teatrdan bildirilib ki, sənət ocağı mövsümə Abdulla Şaiqin “Danışan gəlincik”, Mirzə Fətəli Axundzadənin “Sərgüzəşti–vəziri–xani–Lənkəran” tamaşasının nümayişi ilə yekun vuracaq.
Qeyd edək ki, bu teatr mövsümü Şuşa teatrı üçün çox uğurlu və unudulmaz bir mövsüm olub.
Belə ki, Şuşa Dövlət Musiqili Dram Teatrı 30 ildən sonra iyun ayının 29–da Şuşa şəhərində Mirzə Fətəli Axundzadənin “Sərgüzəşti–vəziri–xani–Lənkəran” tamaşası ilə çıxış edib.
Hər 2 tamaşanın quruluşçu rejissoru, teatrın baş rejissoru, Əməkdar artist Loğman Kərimovdur.
Akademik Musiqili Teatrda premyera olub
İyulun 5-də Azərbaycan Dövlət Akademik Musiqili Teatrında “Məchul pilləkən” balet-tamaşanın premyerası keçirilib.
Bizim gənclərə bir örnək və ismarış xarakteri daşıyan tamaşanın süjet xəttində pis vərdişlərə düçar olmuş bir gəncin bütün maneələrə baxmayaraq ağ ölümlə mübarizəsi və sonda xeyir və şər qüvvələrin çəkişməsi fonunda iradəsinin təntənəsi nümayiş olunur.
Narkomaniya, eyni zamanda, zərərli vərdişlərə qarşı bir təbliğat vasitəsi kimi nəzərdə tutulan bu səhnə əsərinin baş rol ifaçısı Məhəmməd Abdullayev, quruluşçu rejissoru Samir Qulamov, quruluşçu rəssamı isə teatrın baş rəssamı Vüsal Rəhimdir.
Səhnə əsərində xarici bəstəkarların musiqilərindən, eyni zamanda, Əməkdar artist Sevda Ələkbərzadənin ifasında “Getmə-getmə” mahnısından istifadə edilib. Tamaşada, həmçinin Samir Qulamovun ifasında Xalq şairi Ramiz Rövşənin şeirlərindən ibarət kompozisiya səsləndirilib.
