“Ədəbiyyat və incəsənət” portalı “Güneydən gələn səslər” rubrikasında sizlərə Vida Heşmətinin ruh oxşayan  şeirlərini təqdim edir. Rubrikanı “Ədəbiyyat və incəsənət” portalının Güney Azərbaycan  nümayəndəsi, Təbrizdən olan şair, yazar Əli Çağla aparır. 

Vida Heşməti 1968-ci il oktyabr ayının 26-da Təbriz şəhərində doğulmuşdur. O, uşaqlıq dövründən ədəbiyyata marağını büruzə vermiş, Təbriz universitetində fars dil və ədəbiyyatı fakültəsində oxumuşdur. Onun “Ağ qanadlı kəpənək” və “Ulduzların nəğməsi” adında uşaq kitabları çap olunmuşdur. Kitabların rəsmlərini şairənin bacısı Lida Heşməti çəkmişdir. 

Şairənin “Tanrı boyalı saçlarım” adlı şeir kitabı da 2021-ci ildə Təbriz şəhərində çap olunmuşdur.

SÜLH

Keşkə səsini dağlara, 

Nəfəsini bağlara

Gözəlliyini göy qurşağına paylaşaydım. 

İsti əllərini sevgililərin ilk görüşünə

Ürəyini

Oğlu savaşda yubanmış ananın

Sap-sarı astanasına. 

Maviliyini dənizlərə qoşaydım

Səni dalğalarla bağlaşaydım. 

Ahaaaaay

Mahnılarımın Sarı gəlini

Buludlardan uzaldaydın yağış əlini. 

Ulduzlardan göz vuraydın, 

Gülümsəyən heykəlini

Calanaydın qaraqançıl kürəmizin

Qsır dodaqlarına. 

Səs-səsə verib oxuyaydıq

Ozaylar uzunu. 

Saçın ucun hörməzlər

Gülü qönçə dərməzlər…

TANRI BOYALI SAÇLARIM

Saçlarım...

Doğu yellərin qançıllığı

Buludların manifesti

Batı qızlarının yağış lirikası

Gözüyaşlıdı tellərim.

Saçlarımda yellər ulayır kəndımi

Və hörükləyir çaylaqları

Su tökür qadınlar əlimə.

Bu mənəm “Vida”

Bu mənəm...

Bu mənəm türkün şeir qızı!

Saçlarım...

Günəş kölgəli saçlarım.

Mürgü döyür

Röyasında məni Təbriz

İndi şənbədi birçəklərim

Və bir sərçə yuva qurur

Mənim

Tanrı boyalı saçlarımda...

QADIN

Dünyanın yaraşığı qadındırsa

Hələ qadınların yaraşığı deyil dünya!

Mikrofonların əngində

Saqqız olub qadın.

Sekolaritəsinə

İpəkdən don geydirsələr də,

Demokrasiyasına bal qatsalar,

Göbək ciyəsi

Aşxanaya atılmış

Canı düşlərindən çıxmalıdır.

Ancaq

Hələ də onu qiymətləndirən 

Erkək yasaların yazılmamış

Səhnə arxasıdır.

Yoxsa vitrinlər

Boş bəhanədi...

BİTSİN SAVAŞ

Yenə bu köndələn yer kürəsi, ‌

Dumana bələdi dağlarını. 

Göyündə qaraldı göyərçinlərin

ağuuuş dimdikləri

Lalalar yallılanır torpaqları.

Yenə okeanların nefti üzərində

Qumarlaşır naqqalar. 

Yenə generalların əllərində oyuncaq oldu

Ürəyi kabab adaxlı qızın əsgər nişanlısı. 

İtdi-batdı nişan bəlgəsi

Hələ xəritə çəkir imperiyalların 

günəş gözlüyü

Qaraqançıl köksündə. 

Uşaqların bayram sevinci isə

Boy atırdı ayaqqabılarında

Oysa boğuldu xonçasında.

Anasının ləçəyi yaş,

Cibində məktubu sevginazlanan oğlanın

Tapılmadı bir pişikyolu da. 

Yenə görəsən boylanacaq əriklər

Tüstülü ağaclardan?!..

SƏN

Barı 

Bölmək olsaydı

Sevincləri, ağrıları.

Mən də sənə göndərərdim

Çərşəmbə bayramımı,

İsti günlərimin söyüdlərini,

Qış ocağımın kabab könlünü.

          Ama neyləyim?!

Sən Müşfiqin tarında yeniləndin

NazPərinin səsində qocaldın.

               Yenə sağ ol ki, 

Kölgə kimi yerə sərilib,

Çinar kimi ucaldın...

Qeyd: Şeirlərin orfoqrafiyasına toxunulmamışdır.

Lüksemburq Böyük Hersoqluğunun təşkilatçılığı ilə keçirilən 62-ci Beynəlxalq Lüksemburq Bazarında bu ölkənin Baş naziri Ksavye Bettel Azərbaycan stendini ziyarət edib. 

“Ədəbiyyat və incəsənət” portalı AzərTAC-a istinadən xəbər verir ki, ölkəmizin Lüksemburq Böyük Hersoqluğundakı səfirliyinin, “Azersun”, “Meyseri”, “Silkway Cargo” şirkətlərinin dəstəyi və bu ölkədə yaşayan soydaşlarımız Seymur Əhmədov və Samir Məmmədovun təşkilatçılığı ilə Lüksemburq Beynəlxalq Bazarında nümayiş olunan Azərbaycan stendi lüksemburqlu rəsmiləri yüksək qonaqpərvərliklə qarşılayıb. Lüksemburqun Baş nazirinə Azərbaycanın tarixi, mədəniyyəti, məhsulları haqqında məlumat verilib. Ksavye Bettel milli mətbəximizin təamlarından dadıb. 
Azərbaycanın Əməkdar artisti, pianoçu, bəstəkar və aranjemançı İsfar Sarabski və tarzən Bəhruz Zeynal Lüksemburq Beynəlxalq Bazarında təşkil olunan Azərbaycan stendində musiqi proqramı ilə çıxış ediblər. 
Azərbaycan musiqisinin sədalarını eşidən Beynəlxalq Bazarın ziyarətçiləri stendimizin qarşısına toplaşaraq, azərbaycanlı musiqiçiləri heyranlıqla dinləyiblər. Azərbaycan musiqisi xeyriyyə bazarına xüsusi rəng qatıb. 
Qeyd edək ki, müxtəlif Avropa ölkələrində dəfələrlə konsertlər vermiş pianoçu İsfar Sarabski avropalılar tərəfindən çox sevilən musiqiçidir. Azərbaycanlı musiqiçilərin ifası ziyarətçilər tərəfindən böyük maraqla qarşılanıb
Lüksemburq Beynəlxalq Bazarı noyabrın 13-də öz işini başa vurub.

Azərbaycan Respublikası Mədəniyyət Nazirliyinin dəstəyi, “İgidlərin sözü” layihəsinin müəllifi və rəhbəri şairə Nigar Həsənzadənin təşəbbüsü ilə Beynəlxalq Muğam Mərkəzində “İgidlərin sözü” adlı antologiyanın ictimaiyyət üçün geniş təqdimatı keçirilib. 

“Ədəbiyyat və incəsənət” portalı xəbər verir ki, kitab təqdimatında Milli Məclisin deputatları Qənirə Paşayeva və Ceyhun Məmmədov, “YAŞAT” Fondunun sədri Elvin Hüseynov, Mədəniyyət Nazirliyinin Kitab sənayesi şöbəsinin müdiri Akif Marifli, Vətən müharibəsi iştirakçıları, “Şəhid analarına dəstək” İctimai Birliyinin üzvləri, şəhid ailələri, mədəniyyət və incəsənət xadimləri iştirak ediblər. 

Tədbirdə əvvəlcə Azərbaycanın Dövlət Himni səsləndirilib, şəhidlərin xatirəsi bir dəqiqəlik sükutla yad olunub. 

Sonra çıxış edən Milli Məclisin Mədəniyyət komitəsinin sədri Qənirə Paşayeva Vətən uğrunda döyüşən qəhrəmanlarımızın sözü ilə əməlinin bir olduğunu bildirib, qanları ilə tarix yazan igidlərin həm də tarixdə qalacaq sözlərinin şeir kimi bir kitabda toplanmasını alqışladığını söyləyib. Bu gün Azərbaycanın dünyada artan nüfuzundan danışan komitə sədri Prezident İlham Əliyevin apardığı siyasətdən, şəhid və qazi ailələrinə göstərdiyi diqqət və qayğıdan da bəhs edib.

“YAŞAT” Fondunun sədri Elvin Hüseynov çıxışında hələ Aprel döyüşlərindən sonra Birinci vitse-prezident Mehriban xanım Əliyevanın qazilərlə görüşündə söylədiyi “Bizim oğullarımız tarixi ədaləti bərpa edəcəklər” fikrini səsləndirərək bildirib ki, 2020-ci ildə Azərbaycanın mərd oğulları, sözün həqiqi mənasında, tarixi ədaləti bərpa ediblər.

Mədəniyyət Nazirliyinin şöbə müdiri Akif Marifli Qələbəmizin tarixi əhəmiyyətini qeyd edərək, nazirlik tərəfindən bu sahədə nəşr olunan kitablardan və keçirdiyi tədbirlərdən danışıb. O bildirib ki, layihənin həyata keçirilməsində məqsəd 44 günlük Vətən müharibəsində ölkəmizin ərazi bütövlüyü uğrunda mübarizə aparmış igid oğulların yaradıcılıq nümunələrini nümayiş etdirmək, onların rəşadət və şücaətini gələcək nəsillərə ötürməkdir. 

“İgidlərin sözü” kitabının tərtibatçısı və redaktoru, Azərbaycan Yazıçılar Birliyinin üzvü, jurnalist Aida Eyvazlı Göytürk çıxışında bildirib ki, nəşrin ərsəyə gəlməsi heç də asan olmayıb. Qeyd edib ki, redaktoru olduğu “İgidlərin sözü” kitabı Türk dünyasının savaşan igidlərinin yaradıcılığından bəhs edən ilk antologiyadır.

Sonra kitabda şeirləri işıq üzü görən Vətən müharibəsi iştirakçıları Vüsal Hətəmov, Kərəm Aydın, Emin Piri, Sərxan Yolçuyev, Həsən Kür, Orxan Səlifov, Cavid Əli oğlu, Tofiq Əhməd, Eyvaz Əyyub, Səbuhi Qurbanov, Elvin İntiqamoğlu, Oğuz Alparslan, Nicat Ağayevin, Tamerlan Əsədov şerlərini səsləndiriblər.

Sonda “Söz” və “İgidlərin sözü” layihələrin müəllifi və rəhbəri şairə Nigar Həsənzadə təqdimata dəvət olunmuş şəhid analarının, şəhid övladlarının, qazilərin yaxınlarının bu günü, bu gözəl və həzin anları ən əziz xatirə kimi hər zaman yaddaşlarında saxlayacaqlarına inandığını bildirib. Deyib ki, bu böyük Zəfəri yazanlar unudulmur, onların sözlərini də heç vaxt unutmaq olmaz. 

Xatırladaq ki, “İgidlərin sözü” kitabının ilk təqdimatı bu ilin yayında Şuşada Vaqif Poeziya Günləri çərçivəsində olub.

Bir sözlə, möhtəşəm qələbəmiz daha bir nəşrdə layiqincə tərənnüm olunub.

Ötən gün Azərbaycan Milli Xalça Muzeyində qələbəlik idi.  Azərbaycan və Yaponiya arasında diplomatik əlaqələrin qurulmasının 30 illiyi münasibətilə “Eleqant kimono: Yapon kimono şousu” adlı moda nümayişi keçirilirdi. 

“Ədəbiyyat və incəsənət” pprtalı xəbər verir ki, tədbir Mədəniyyət Nazirliyi, Azərbaycan Milli Xalça Muzeyi, Yaponiyanın Azərbaycandakı səfirliyi, SOAC Art Consultancy & Curation, Odasho Co. Ltd, Yaponiya Beynəlxalq Tekstil Şəbəkəsinin təşkilatçılığı və “ISR Holding”in dəstəyi ilə gerçəkləşirdi.

Öncə açılış üçün söz Azərbaycan Milli Xalça Muzeyinin direktoru Şirin Məlikovaya verilib. Şirin Məlikova bu il Yaponiya ilə mədəni əlaqələrin yüksək səviyyədə inkişaf etdiyini və bunun əlamətdar tədbirlərlə müşayiət olunduğunu deyib: “Yaponiya mədəniyyəti üçün kimono əsas simvollardan biridir. Əsrlər boyu bu ənənəvi geyim bir çox dizayner və rəssamların ilham mənbəyi olub. Onların yaratdıqları əsərlər şübhəsiz geyim sənayesinə də təsir etmişdir”. 

Şirin Məlikova bildirib ki, moda nümayişində yaponların bayram, toy kimi xüsusi günlərdə və digər mərasimlərdə geyindikləri, həm uşaqlar, həm də böyüklərin həyatında öz yeri və rolu olan müxtəlif növ kimonolar nümayiş olunur. Dəfilədə ənənəvi yapon kimonoları ilə yanaşı, Azərbaycan xalça ornamentlərilə işlənmiş kimonolar da təqdim olunub. Qeyd edib ki, kimonoların üzərində Qarabağın şabalıd-buta adlı ornamentlərilə bəzədilmiş elementlərini, həmçinin ənənəvi türk “kutnu” parçalarından hazırlanmış kimonolarını də görmək olar.

Yaponiyanın Azərbaycandakı səfiri Cuniçi Vada bugünkü şounun Yaponiyanın ənənəvi kimonosu ilə bağlı olduğunu qeyd edib: “Kimono yapon mədəniyyətinin ayrılmaz hissəsi olan ənənəvi geyimdir. Kimononun müxtəlif növləri vardır. Bu gün model qismində səfirliklərin əməkdaşları, Azərbaycanda yaşayan yaponlar və yapon mədəniyyətini sevən azərbaycanlılar iştirak edir”. 

Sonra moda nümayişi başlayıb. Ümumilikdə təkcə milli yapon geyimi kimi deyil, həm də universal geyim olaraq coğrafi sərhədləri aşmış moda nümunələri olan 24 kimono nümayiş etdirilib.

Sonda modellərlə birlikdə kollektiv şəkil də çəkilib.

Səfir Cuniçi Vada tədbirin həyata keçirilməsinə görə Xalça Muzeyinə və dəstəkçi şirkətlərə təşəkkür edib. Azərbaycanda yapon mədəniyyətinin bit parçasının nümayişindən məmnun qaldığını da bildirib.

Fotolarda dəfilenin ən müxtəlif anları kadra alınıb.