Türkiyəli müğənni Hadisə Yeni ildə Kiprdə konsert verəcək.

Türkiyə mediasının yazdığına görə, sənətçi bunun müqabilində 150 min dollar (təxminən 255 min manat) məvacib alacaq.

Günün fotosu: İki mənfur rejim bir-birinə kömək edir

Söhbət Rusiyadan və İrandan gedir. Rəsmi Vaşinqton bir daha dəlil sübutlar gətirib ki, İran anneksiya olunmuş Krımın ərazisindən Ukraynaya dronlar buraxır.

Foto: Euronews

Günün fotosu: Mosulda 2700 yaşlı qaya rəsmləri aşkarlanıb

İrakın Mosul şəhərində arxeoloqlar 2700 yaşı olan qaya rəsmləri aşkar etmişlər.

Foto: Euronews

“Bir dəfə yas məclisində idim. Molla xanım mikrofonu götürdü ki, bugünki yasın, mərhumə xanımın məclisinin sponsoru filankəs hacıdır. Elə çıxdı ki, filan hacı oturub başda, məclisin tədarükünü görüb. Atam ağlıma gəldi, hönkür-hönkür ağladım. O vaxt Bakıda mağar qurulmasına icazə verilmirdi. Cümə axşamları olanda atam gedirdi, nəyə gücü çatır yasda süfrənin altına qoyurdu, gəlirdi. Heç kim bilmirdi: nə xanımı, nə uşağı utanırdı. İndi restoranda oturanda biri kənardan qışqırır: Bəhram müəllim, durarsınız, qonağımsız. Bütün hamı bilir ki, hesabı ödəyib. Mədəni insan susmalıdır, yola verməlisən". 

“Ədəbiyyat və incəsənət” axşam.az-a istinadən xəbər verir ki, bu sözləri Əməkdar artist Bəhram Bağırzadə "Astar" YouTube layihəsində deyib. Aktyor bildirib ki, yas məclisinə də sponsorluq edirlər. 

Bağırzadə qazanc yerini açıqlayıb. O, restoranı olması haqda suala belə cavab verib:

"Yeni filmlərə çəkilirəm ki, ailəmi dolandırım. Pul üçün yola verirəm, reklamlardan qazanıram. Bir də ağlım var. Şirkətlər dəvət edir, onlar üçün layihə yazıram. Restoranım yoxdur, sinif yoldaşımın məkanıdır. reklam edir, pul qazanıram".

Azərbaycan Dövlət Akademik Opera və Balet Teatrında italyan bəstəkarı Pyetro Maskaninin “Kənd namusu” operasının tamaşası keçirilib.

Teatrın mətbuat xidmətindən “Ədəbiyyat və incəsənət” portalına bildirilib ki, tamaşada əsas rolları Xalq artisti Fidan Hacıyeva (Santutsa), Əməkdar artistlər Ramil Qasımov (Turiddu), Səbinə Vahabzadə (Lüçiya), aparıcı solistlər Nina Makarova (Lola) və Taleh Yahyayev (Alfio) ifa ediblər. 

Opera tamaşasında Əməkdar incəsənət xadimi Sevil Hacıyevanın rəhbərliyi altında xor kollektivinin və Azərbaycanın Xalq artisti, professor Yalçın Adıgözəlovun idarə etdiyi simfonik orkestrin professional ifaları xüsusilə diqqəti cəlb edib.

Xronometrajı 1 saat 50 dəqiqə olan səhnə əsərinin əsas qəhrəmanları - öz məhəbbətinə hədsiz dərəcədə sədaqətli olan Santutsa, yüngül xasiyyətli, şıltaq Lola, ehtiraslı Turiddu və öz rəqibindən amansız qisas alan Alfiodur. Operanın İtaliya xalq mahnılarının əsasında qələmə alınmış musiqisi, əsərin kəskin süjet xəttinə uyğun olub, qəhrəmanların xarakterinin daha aydın şəkildə açılmasına yardım edir.

Anşlaqla baş tutan tamaşa boyu tamaşaçılar solistlərin ifalarını alqışlarla qarşılayıblar.

Qeyd edək ki, “Kənd namusu“ operasının ilk tamaşası 1890-cı ildə Romanın “Konstants” teatrında keçirilib. Bu opera son dərəcə gözəl musiqisi və kəskin dramatik süjeti ilə fərqlənir. Opera Maskani yaradıcılığının ən uğurlu əsərlərindən biri hesab edilir və bu günə kimi bir çox dünya teatrlarının repertuarını bəzəyir.

Azərbaycan Dövlət Akademik Opera və Balet Teatrında “ Kənd namusu “ operası 2015-ci ildə almaniyalı rejissor Lüdviq Bauman və dirijor Korneliya fon Kerssenbrok tərəfindən səhnəyə qoyulmuş və repertuara daxil edilib.

Azərbaycan Yazıçılar Birliyində (AYB) Vətən müharibəsində döyüşən qazilər və qəhrəmanlarla görüş keçirilib. 

“Ədəbiyyat və incəsənət” portalı AzərTAC-a istinadən  xəbər verir ki, görüşdə iştirak edən şeirli-sözlü müharibə iştirakçılarının şeirlərindən ibarət “Barıt qoxulu sətirlər...” və Ayaz Məmmədovun “Ünvansız məktub” adlı xatirə povesti kitablarının təqdimatı olub. 

Kitabda şeirləri dərc olunan Emin Piri, Kərəm Aydın, Cavid Əlioğlu, Oğuz Alparslan, Elvin Məmmədli, Səbuhi Qurbanov, Eyvaz Əyyub, Tofiq Əhməd, Orxan Səlifov, Həsən Kür, Sərxan Yolçuyev, Nicat Ağayev, Vüsal Hətəmov, Mir Əjdər Abdullayev və Tamerlan Əsədovun şeirləri bir neçə ay bundan əvvəl Şuşada Vaqif Poeziya günlərində “Söz” ədəbi layihəsinin “İgidlərin sözü” proqramı çərçivəsində səsləndirilib. Qazilərin öz ifalarında şöylədikləri müharibə vaxtı yazdıqları şeirlər ölkə ictimaiyyəti və ədəbiyyatsevərlər tərəfindən böyük maraqla qarşılanıb.

“Barıt qoxulu sətirlər...” kitabında qazi və veteran şairlərin Vaqif poeziya günlərində səsləndirdikləri şeirlərlə yanaşı, zəfər ruhlu şeirlər də yer alıb. Qazilərin şeirlərindən ibarət yeni şeir antologiyasının tərtibçiləri və “Ön söz” müəllifləri AYB-nin katibi Elçin Hüseynbəyli, “Söz” ədəbi layihəsinin rəhbəri Nigar Həsənzadə, texniki redaktoru isə Şükufə Məmmədlidir. Kitab “Vektor” Beynəlxalq Nəşrlər evində çap edilib.

Yazıçılar Birliyinin katibi Elçin Hüseynbəyli Xalq yazıçısı Anarın ideya müəllifi olduğu “Barıt qoxulu sətirlər...” haqqında danışıb.

Xalq yazıçısı Anar 44 günlük Vətən müharibəsindən, Ordumuzun şücaətindən, tarixi Qələbəmizdən bəhs edib. Qazi şairləri təbrik edən AYB sədri, onların Yazıçılar Birliyinə üzv seçildiklərini bildirib. Bundan sonra qazi şairlərə üzvlük biletləri təqdim olunub.

Tədbirdə, eyni zamanda, təqdimatı olan Qarabağ qazisi Ayaz Məmmədovun “Ünvansız məktub” kitabı Qarabağ döyüşlərinə həsr olunub. Əsərdə müəllif keçdiyi döyüş yollarına nəzər salır, cəbhədə olan ağrılı və maraqlı hadisələri, keçirdiyi hissləri, təəssüratlarını oxucularla bölüşür. Bu kitab həm də bir döyüşçünün gündəliyidir. 

Qeyd edək ki, qazi şairlərin “Barıt qoxulu sətirlər...” və Ayaz Məmmədovun “Ünvansız məktub” kitablarının təqdimat mərasimində Azərbaycan Yazıçılar Birliyinin katibləri Elçin Hüseynbəyli, Səlim Babullaoğlu, şair Nigar Həsənzadə, Yazıçılar Birliyinin üzvləri Rəfail Tağızadə, Zemfira Məhərrəmli, Aida Eyvazlı, Elmira Aslanxanlı çıxış edərək qazilərə göstərilən qayğıya görə Azərbaycan Yazıçılar Birliyinin rəhbərliyinə təşəkkürlərini bildiriblər. Eyni zamanda, əməlləri və sözləri ilə Zəfər tariximizdə imzası olan mərd oğullarımızla fəxr etdiklərini söyləyiblər.

“44 günlük Vətən müharibəsinə həsr etdiyim “Qarabağnamə” baleti üzərində işləyirəm.”

“Ədəbiyyat və incəsənət” portalı xəbər verir ki, bu sözləri tanınmış bəstəkar, Xalq artisti Eldar Mansurov jurnalistlərə açıqlamasında deyib.

O bildirib ki, İkinci Qarabağ müharibəsindən əvvəl və sonra da vətənpərvərlik ruhunda bir neçə əsər yazıb, Xalq artisti Mübariz Tağıyevlə birgə onlarla mahnı bəstələyib.

“Bəstələdiyim mahnıların hamısı Vətənlə, əsgərlərimizin qəhrəmanlığı, şəhidlərimizlə bağlı olub. Onları müxtəlif şairlərin sözlərinə bəstələmişəm. Bu mahnılar Azərbaycanın Qələbəsini vəsf edən mahnılardır. Bundan sonra da yazacağam. Hazırda yeni əsər üzərində işləyirəm. 44 günlük Vətən müharibəsinə həsr etdiyim “Qarabağnamə” baletinin bəzi hissələri hazırdır”, - deyə bəstəkar əlavə edib.

Oktyabrın 20-də BP müasir Azərbaycan ədəbiyyatının dörd istedadlı gənc nümayəndəsinin əsərlərinin təqdimatını keçirib.

“Əfəbiyyat və incəsənət” portalı AzərTAC-a istinadən  xəbər verir ki, ikisi şair, ikisi isə yazıçı olmaqla dörd müəllifin hər birinin bir kitabının nəfis tərtibatda nəşrindən ibarət bu layihə dünya ədəbiyyatı xəzinəsini ən qiymətli incilərlə zənginləşdirmiş Azərbaycan ədəbiyyatının gələcəyinə BP-nin töhfəsidir.

Azərbaycan Yazıçılar Birliyinin sədri, Xalq yazıçısı Anar: “Tarixən böyük inkişaf yolu keçmiş Azərbaycan ədəbiyyatı bu gün də öz ənənələrinə sadiq qalaraq inkişaf edir, yeni-yeni ədəbi qüvvələr, istedadlı gənclər söz sənətimizə dəyərli töhfələr verirlər. Çağdaş Azərbaycan ədəbiyyatında sevilən, seçilən gənc ədiblər yeni əsərləri ilə oxucuları sevindirirlər. Müsbət haldır ki, BP şirkəti tariximizə, mədəniyyətimizə, ədəbiyyatımıza aid çoxsaylı dəyərli layihələrə dəstək verib və bu işlər cəmiyyət tərəfindən böyük rəğbətlə qarşılanıb. BP şirkətinin müasir ədəbiyyatımızda öz dəst-xəti ilə seçilən gənc şairlər Şəhriyar del Gerani və Fərid Hüseynin və gənc yazıçılar Ömər Xəyyam və mərhum İkinci Mahmudun kitablarının nəşrinə yardım göstərməsi olduqca əhəmiyyətli addımdır”.

BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli: “BP böyük məmnuniyyətlə Azərbaycanın ədəbi irsinin təbliğinə dəstəyini davam etdirir. Bundan öncə biz Nizami və Nəsimi kimi dünya poeziyası nəhənglərinin ədəbi irslərinin tədqiqi və təbliği səylərini dəstəkləyən iri layihələr həyata keçirmişik. Ədəbi gəncliyin yaradıcılığının təbliğinə yönəlmiş bu layihə ilə biz Azərbaycan ədəbiyyatının misilsiz dəyərlərinin gələcəyə ötürülməsi və zəngin ənənələrinin davamlı olması səylərini dəstəkləyirik. Ümid edirik ki, Azərbaycan ədəbiyyatının böyük gələcəyinə BP-nin dərin inamının ifadəsi olan bu layihə Azərbaycanın yaradıcı gəncliyini ədəbiyyatımızın gözəl ənənələrini fəxrlə davam etdirməyə ruhlandıracaq”.

Layihəyə daxil edilmiş kitablar bunlardır: Müəllifi Fərid Hüseyn olan “Bəyaz ləkə” şeirlər toplusu; Müəllifi Şəhriyar del Gerani olan “Özümdən məşhur şeirlər”; Müəllifi Ömər Xəyyam olan “Bizim atalarımız, bizim analarımız” hekayələr toplusu; Müəllifi II Mahmud olan “Yersiz ölüm” hekayələr və romanı.

BP-nin ev sahibliyi etdiyi bu tədbirdə müasir Azərbaycan ədəbiyyatının tanınmış nümayəndələri, tədqiqatçılar, alimlər, ədəbiyyatsevərlər bir araya gəliblər.

Layihəyə daxil edilmiş dörd kitabın ümumi həcmi təxminən 800 səhifədir. Layihənin ümumi dəyəri kitabların nəşri ilə birlikdə 43 min manatdan artıqdır.

Azərbaycan Milli Xalça Muzeyində “Gənc tamaşaçılar üçün muzey” adlı beynəlxalq konfrans öz işinə başlayıb. Konfransı mədəniyyət nazirinin müavini Sevda Məmmədəliyeva açaraq bu cür tədbirlərin beynəlxalq təcrübənin öyrənilməsi, paylaşılması baxımından geniş imkanlar yaratdığını, dünya muzey mütəxəssislərinin mədəni əməkdaşlıq əlaqələrini daha da möhkəmləndirdiyini bildirib.

“Ədəbiyyat və incəsənət” portalı xəbər verir ki, Azərbaycan Milli Xalça Muzeyinin direktoru Şirin Məlikova uşaqların muzeylərə cəlb edilməsi, burada onların maraqlarına uyğun mühitin formalaşdırılması məsələlərinin aktuallığını diqqətə çatdırıb, konfransın məqsəd və əhəmiyyətindən danışıb. Əsas məruzəçi, Amsterdam Brilyant Muzeyinin rəhbəri, İCOM MPR Beynəlxalq Komitəsinin İdarə Heyətinin üzvü Byorn Stenvers "Muzeylərin uşaq auditoriyası üzərində dəyişən rolu” mövzusunda çıxış edib.

Konfransın ilk günü Azərbaycan, Serbiya, Almaniya, Bolqarıstan, Latviya, Rusiyadan olan mütəxəssislərin “Muzeylər və məktəblər: muzey pedaqogikasının üfüqləri”, “Muzeylərdə uşaqlar üçün rəqəmsal materiallar “Uşaqlar, yeniyetmələr və valideynlər üçün muzey proqramları” mövzularında çıxışları dinlənilib. 

Azərbaycan Milli Xalça Muzeyi və Mədəniyyət Nazirliyinin təşkilatçılığı, MDB ölkələrinin Dövlətlərarası Humanitar Əməkdaşlığı Fondunun dəstəyi ilə keçirilən konfrans oktyabrın 21-dək davam edəcək.