Super User
RUHƏN ŞEİRƏ HOPMÜŞ ADAM - Sumqayıtda Sabir Yusifoğlunun xatirə gecəsi keçirildi
Gülnarə Cəmaləddin, “Ədəbiyyat və incəsənət” üçün
Ağ kağıza yazmadı
qələm
şeirlərimi.
Canımı dost-düşmənə
bölən şeirlərimi...
Sabir Allahla adaş idi. Allahla adaş olanlar onunla bağrıbadaş olurlar. Onların taleyində ya bir natamamlıq
olur, ya da peyğəmbər yaşında dünyanı tərk edirlər. Amma adları kimi aydın, alnıaçıq, mərdi-mərdanə bir ömür yaşayırlar Allahla adaş olanlar...
Sabir şeirlərinə çox bənzəyirdi. Oxuduqca dərinlərə baş vurmalı olurdun...
Fevralın 10-da Sumqayıtdakı Poeziya Evində AYB Sumqayıt bölməsi və Ə.Kərim adına Poeziya klubunun birgə təşkilatçılığı ilə çağdaş Azərbaycan ədəbiyyatında öz sözü və yeri olan Sabir Yusifoğlunun yaradıcılığına həsr olunmuş xatirə gecəsi keçirildi.
Öncə Azərbaycan torpaqlarının bütövlüyü uğrunda canından keçən vətən oğullarının xatirəsi yad edildi və Azərbaycan Respublikasının himni səsləndirildi. Şairin ömür yolunu əks etdirən video-çarx nümayiş etdirildi.
AYB Sumqayıt bölməsinin sədri Gülnarə Cəmaləddin Sabir Yusifoğlunun şeiri ilə tədbir iştirakçılarını salamladı. AYB -nin Poeziya seksiyasının rəhbəri, Poeziya Evinin direktoru İbrahim İlyaslı Sabir Yusifoğlunun həyat və yaradıcılığı haqqında qonaqlara geniş məlumat verdi.
Söz AYB-nin Ədəbiyyat Fondunun rəhbəri, tanınmış yazıçı Varisə verildi. Varis Sabir Yusifoğlunun poetik nümunələrindən misal çəkərək, onunla bağlı xatirələrindən danışdı, onun çağdaş ədəbiyyat müstəvisindəki yerindən və çəkisindən bəhs etdi.
Şumqayıtlı qələm adamları Rafiq Yusifoğlu, Zirəddin Qafarlı, Süleyman Hüseynov, Hümbət Quliyev, Sübhan Quliyev, Hafiz Ataxanlı, Lilpar Cəmşidqızı, Elvin Əlizadə Sabir Yusifoğlu şəxsiyyətinin böyüklüyündən bəhs etdilər.
Vaxtilə "Dəniz" ədəbi birliyinin yığıncaqlarında Sabir Yusifoğlu ilə bir yerdə olan, bu gün imzaları respublika səviyyəsində tanınan- Məryəm Aslanqızı, Asif Asiman, Mövlam Hüseynli, Füzuli Sabiroğlu, Xan Rəsuloğlu, Xəqani Abbasəli Öztürk, Müqəddəs Şahbazov, Almaz Ərgünəş Bəyazid, aşıq İman Sabir Yusifoğlunun insani keyfiyyətlərindən və yaradıcılıq məziyyətlərindən söz etdilər.
Sumqayıt Dram Teatrının aktyoru İzaməddin Bağırov şairin şeirlərindən nümunələr səsləndirdi.
22 saylı məktəbin şagirdi Fatimə Məmmədli və nəvəsi Ləman Sabir Yusifoğlunun şeirlərini əzbərdən söylədilər.
Sonda Sabir Yusifoğlunun övladı - qazi şair Emin Piri öz adından və ailə üzvləri adından tədbirin təşkilatçılarına və iştirakçılarına təşəkkürünü bildirdi.
Aşıq Anar Laçınlının səsləndirdiyi saz havası isə məclisə başqa bir ovqat bəxş etdi.
“Ədəbiyyat və incəsənət”
(12.02.2024)
Mədəniyyət Nazirliyində Mərakeşin media təmsilçiləri ilə görüş keçirilib
Mədəniyyət Nazirliyində ölkəmizdə səfərdə olan Mərakeş Krallığının nüfuzlu media orqanlarının təmsilçilərindən ibarət nümayəndə heyəti ilə görüş keçirilib. Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Görüşdə Mərakeşin “Məqrib ərəb press” agentliyinin redaktoru Mohammed Asvab, “L’Opinion” nəşrinin redaktoru Anass Machloukh, “Le Matin” dərgisinin redaksiya direktoru Souhail Nhaili və bu ölkənin bir sıra digər media nümayəndələri iştirak ediblər.
Qonaqları salamlayan mədəniyyət naziri Adil Kərimli ölkəmizin qədim və zəngin mədəniyyəti haqqında məlumat verib, həmçinin Azərbaycanla Mərakeş Krallığı arasında mədəni əlaqələrdən danışıb.
Bildirilib ki, Azərbaycanın qədim mədəniyyət mərkəzlərindən olan Şuşa şəhəri ICESCO tərəfindən 2024-cü il üçün “İslam dünyasının mədəniyyət paytaxtı” elan edilib. Bu il eyni zamanda Mərakeş Krallığının Mərakeş şəhəri də “İslam dünyasının mədəniyyət paytaxtı” missiyasını yerinə yetirir. “Paytaxt ili” çərçivəsində birgə fəaliyyət barədə məsələlər müzakirə olunub.
“Ədəbiyyat və incəsənət”
(12.02.2024)
TÜRKSOY-un Baş katibi Azərbaycan Prezidentini təbrik etmişdir
TÜRKSOY-un Baş katibi Sultan Raev Azərbaycan Prezidenti İlham Əliyevi Növbədənkənar Prezident Seçkilərində qazandığı parlaq qələbə münasibətilə təbrik etmişdir.
“Ədəbiyyat və incəsənət” portalı təbrik mətnini təqdim edir:
Azərbaycan Respublikasının Prezidenti Zati-aliləri cənab İlham Əliyevə
Hörmətli cənab Prezident,
Azərbaycan Respublikasında 2024-cü il fevralın 7-də yüksək səviyyədə keçirilmiş prezident seçkilərində inamlı qələbəniz münasibətilə Zati-alinizi TÜRKSOY-un Baş Katibliyi, Türk dövlətləri mədəniyyət nazirlərinin Daimi Şurası adından və şəxsən öz adımdan səmimi-qəlbdən təbrik edir, ən xoş arzularımı bildirməkdən məmnunluq duyuram.
Seçkilərdə Azərbaycan xalqının Sizin namizədliyinizi hərtərəfli dəstəkləməsi ölkənin ərazi bütövlüyünü tam bərpa etmiş və tarixi ədaləti bərqərar etmiş Ali Baş Komandanına və müdrik liderinə sonsuz inamının əyani təzahürüdür.
Zati-alinizin zəngin təcrübəsinin və müdrik siyasətinin yeni dönəmdə də Azərbaycanın tərəqqisinə və xalqın rifahına böyük töhfə verəcəyinə, TÜRKSOY ilə Azərbaycan Respublikası arasındakı məhsuldar əməkdaşlığın və mədəni əlaqələrin daha da genişlənərək inkişaf edəcəyinə inanıram.
Əminəm ki, beynəlxalq TÜRKSOY təşkilatının üzv ölkələrimiz arasında mədəni əlaqələrin inkişaf etdirilməsi və türk dünyasının ayrılmaz parçası olan Azərbaycanın zəngin mədəniyyətinin dünyada tanıdılması istiqamətində apardığı fəaliyyətlər bundan sonra daha geniş vüsət alacaqdır.
TURKSOY-a diqqətini və dəstəyini əsirgəməyən Zati-alinizi bu mühüm qələbə münasibətilə bir daha ürəkdən təbrik edirəm. Sizə və ailənizə möhkəm cansağlığı, qardaş Azərbaycan xalqına isə sülh, əmin-amanlıq və davamlı tərəqqi arzulayıram.
Ən dərin hörmət və ehtiramla,
Sultan Raev
TÜRKSOY-un Baş katibi
“Ədəbiyyat və incəsənət”
(09.02.2024)
Rəsm qalereyası: Pablo Pikasso, “Absent həvəskarı” (1901)
Rəsm qalereyası: Pablo Pikasso, “Absent həvəskarı” (1901)
Mumbayda Azərbaycanın turizm imkanları təbliğ olunur
Dövlət Turizm Agentliyi və Azərbaycan Turizm Bürosunun təşkilatçılığı ilə Azərbaycanın turizm imkanları fevralın 8-də işinə başlayan “OTM Mumbai 2024” (“Outbound Travel Mart”) sərgilənir.
Bu barədə “Ədəbiyyat və incəsənət” portalı Dövlət Turizm Agentliyinə istinadən məlumat verir.
Hindistanın Mumbay şəhərində fevralın 10-dək davam edəcək sərgidə ziyarətçilərə Azərbaycanın tarixi və mədəni irsi, qastroturizm potensialı, qış turizmi və dağ-xizək mərkəzləri, şərabçılıq, sağlamlıq, ekoturizm kimi turizm istiqamətləri və məhsulları barədə məlumat verilir.
Milli stenddə “Azərbaycan Hava Yolları” QSC və “Şahdağ” Turizm Mərkəzi ilə yanaşı, 15 yerli turizm sənayesi nümayəndəsinin iştirakı ilə ölkə turizminin təbliği və təşviqi ilə bağlı B2B görüşlər keçirilir, əməkdaşlıq imkanları müzakirə olunur.
Qeyd edək ki, 2023-cü il ərzində ölkəmizə gələn xarici ölkə vətəndaşları sırasında Hindistan olan ziyarətçilər 4-cü yerdə qərarlaşıblar. Ötən il ərzində Azərbaycana 117 302 nəfər Hindistan vətəndaşı gəlib ki, bu da 2022-ci il rəqəmləri ilə müqayisədə 93%, 2019-cu il rəqəmləri ilə müqayisədə isə 80% çoxdur.
Asiya üzrə ən böyük turizm sərgisi hesab olunan 2023-cü ildə 35 mindən artıq ziyarətçi qəbul edən sərgiyə 60 ölkədən 1600-dən çox turizm şirkəti qatılıb.
“Ədəbiyyat və incəsənət”
(09.02.2024)
Bazar günü məşhur kamança ifaçısı Mark Eliyahunun Bakı konsertidir
Dünyaşöhrətli kamança ifaçısı Mark Eliyahu 2024-cü il fevralın 11-də - bazar günü Heydər Əliyev Sarayında çıxış edəcək. Səbirsizliklə gözlənilən gün artıq yetişdi.
“Ədəbiyyat və incəsənət” portalı ticket.az-a istinadən xəbər verir ki, konsertdə ifaçı tamaşaçıların qarşısına “Journey”, “About love”, “Endless”, “Let it go” kimi əsərlərlə çıxacaq.
Mark Eliyahu Dağıstanda məşhur musiqişünas və musiqiçi Perets Eliyahunun ailəsində dünyaya göz açıb. Milliyyətcə yəhudidir. Gənclik vaxtlarında əfsanəvi kamança ustadı Habil Əliyevin ifasından ruhlanan Mark bu musiqi alətini dərindən öyrənməyə qərar verib. O, 16 yaşında Azərbaycana gəlib və Əməkdar artist Ədalət Vəzirovdan kamança ifaçılığı sənətini mənimsəyib.
Musiqiçi müxtəlif ölkələrdə bir çox musiqi və rəqs layihələrində iştirak edib. Onun “Voices of Judea” (“İudeyanın səsləri”) solo-albomu musiqi tənqidçiləri tərəfindən yüksək qiymətləndirilib.
“Bakı” jurnalı yazır ki, Eliyahunun sayəsində kamança bütün dünyada tanınıb.
Mark Eliyahu təkcə musiqiçi deyil, o həm də multikulturalizmin və sülhün nümayəndəsidir. İfası ilə o, coğrafi sərhədləri, dil maneələrini və dini fərqlilikləri aşaraq dünyaya nikbin mesajlar çatdırır. Sevginin universal dili olan musiqi vasitəsilə Mark Eliyahu musiqisevərlərin ürəyinə yol tapır.
Biletləri şəhərin kassalarından və iticket.az saytından əldə etmək olar.
Biletlərin qiyməti 40-220 manat aralığındadır.
“Ədəbiyyat və incəsənət”
(09.02.2024)
“YAŞAT" Fondunun "Onlar bizə əmanət" layihəsi davam edir
19-20 sentyabr 2023-cü il tarixində Qarabağda aparılan lokal xarakterli antiterror əməliyyatları zamanı şəhid olan qəhrəmanımız Elvin Qeybəliyev Ağalar oğlunun Bakı şəhərində doğulan övladı Məhəmmədəlinin zəruri xərcləri "YAŞAT" Fondu tərəfindən qarşılanıb.
Bu məqsədlə 1 000 AZN vəsait ananın hesabına köçürüləcək.
Bu barədə “Ədəbiyyat və incəsənət” portalına “YAŞAT” Fondundan məlumat verilib.
Dünyaya yeni göz açan körpənin adına isə depozit hesabı açılacaq və 5 000 AZN vəsait onun hesabına yerləşdiriləcək. Həmin hesaba vəsait Fonda edilən ianələr hesabına toplanmış məbləğdən köçürülür.
Şəhidin övladı bu vəsaiti üzərinə mütəmadi toplanan faizləri ilə birlikdə 18 yaşına çatdıqdan sonra hesabından çıxara biləcək.
"Onlar bizə əmanət" layihəsi indiyədək 117 şəhid övladını əhatə edib.
Xatırladaq ki, “YAŞAT” Fonduna müraciət etmək və Fondun fəaliyyəti ilə tanış olmaq üçün yashat.gov.az portalı istifadədir.
Fondun hesabatlılığı ilə tanış olmaq üçün keçid: https://yashat.gov.az/report/tableau
Həmçinin Fondun 8110 “Çağrı” Mərkəzi fəaliyyət göstərir.
“Ədəbiyyat və incəsənət”
(09.02.2024)
“Bir, iki – bizimki” nümayiş olunub
Azərbaycan Dövlət Akademik Milli Dram Teatrında Xalq yazıçısı Kamal Abdullanın “Bir, iki – bizimki!” pyesi əsasında hazırlanan eyniadlı tamaşa nümayiş olunub.
Teatrın mətbuat xidmətindən verilən məlumata görə, quruluşçu rejissoru Əlif Cahangirli olan tamaşada rolları Əməkdar artist Ayşad Məmmədov, aktyorlar İlahə Həsənova, Ziya Ağa, Xədicə Novruzlu və Davud Arif ifa ediblər.
Səhnə əsəri dünyagörüşləri fərqli olan iki insanın söhbəti, bir-birinə təmassız toxunuşları, ehtirası, sevgisi, peşmanlığı, mübahisəsi, yenə də qovuşmaq arzuları üzərində qurulub. Onların dialoqu kişinin xarakteri, kimliyi haqqında geniş düşüncələr yaradıb. Bütün ömürlərini öz ağuşuna alan faciə də məhz budur: bir-birini sevən, bir-birinə can atan insanların bir-birinin dünyalarındakı ayrılıq. Elə birinin ölü, o birinin diri olması da simvolikdir.
Əsər bir-birini anlamaq istəyən və anlamayan, tapmaq istəyən və tapmayan iki nəfərin duyumlar dramı kimi təqdim olunub.
“Ədəbiyyat və incəsənət”
(09.02.2024)
Haaqada Beynəlxalq Cinayət Məhkəməsinin tamhüquqlu üzvü kimi Ermənistanı salamlayan təntənəli mərasim keçirilib
Kənan Məmmədli, “Ədəbiyyat və incəsənət”
Bəli, Avropadakı əsas qüvvələrin Azərbaycana qarşı itələyici təsiri duyulduqca Ermənistanın bu məkanda güclənməsi hiss edilməkdədir.
Ermənistan dünəndən etibarən rəsmi olaraq Haaqa Beynəlxalq Cinayət Məhkəməsinin üzvüdür. Respublika Roma əsasnaməsinə qoşulan ümumən 124-cü, Şərqi Avropadan isə 19-cu üzv-dövlət oldu.
Mərasimdə ICC Prezidenti Ermənistan parlamenti tərəfindən Roma statutunun ratifikasiyasını mühüm və cəsarətli qərar adlandırdı.
Xatırladaq ki, Ermənistanın Qanunverici orqanında Haaqa Məhkəməsinə üzvlük səsverməsi keçən ilin oktyabrında baş tutub. Hakim partiyadan 58 deputat “lehinə" səs verib, müxalifətdən 25 deputat səsvermədə iştirak etməyib.
Ermənistanın üzvlüyünü salamlayan mərasim barədə Euronews telekanalının reportajında vacib bir detal diqqət çəkdi. Rusiya Ermənistan tərəfindən sənədin ratifikasiyasına fəal şəkildə qarşı çıxıb. Səbəbi də odur ki, ICC Rusiya prezidenti Vladimir Putinin Ukraynanın işğal olunmuş ərazilərindən uşaqların Rusiyaya qanunsuz deportasiyası ittihamı ilə həbsi üçün Order verib. Və bu sanksiyaya avtomatik olaraq Ermənistan da ikiəlli səs verməli olub.
Kreml Ermənistan hakimiyyətinin qərarını Rusiyaya qarşı son dərəcə düşmən addım adlandırdı.
Gəlin unutmayaq ki, Kremlin Ermənistandan qisas almaq üçün açarı bir iqtisadi sanksiyalar, bir də Azərbaycan - Ermənistan konfliktidir, Rusiya illərdir ki, bu konfliktdən öz manipulyasiya aləti kimi yararlanmağa cəhd edir.
Və ölkəmizin Ermənistana qarşı daha ciddi köklənərək, hazırda mübahisə predmetinə çevrilən Zəngəzur dəhlizi məsələsində aktiv hücumçu mövqeyi sərgiləyəcəyi baş verərsə, bu Rusiyaya fayda verməklə yanaşı, dünya ictimaiyyətini daha çox antiAzərbaycan ovqatına kökləyəcəkdir.
Ayının min oyunu var, bir armudun başında.
Ümidvarıq ki, Azərbaycan Prezidenti nəyi necə edəcəyini gözəl bildiyindən, yenə də Azərbaycanı bu presendentdən itkisiz çıxarmağı bacaracaq.
Şəkildə: Haaqada keçirilən Beynəlxalq Cinayət Məhkəməsinin tamhüquqlu üzvü kimi Ermənistanı salamlayan təntənəli mərasimdən.
(Foto: Euronews)
“Ədəbiyyat və incəsənət”
(09.02.2024)
Akademiyanın prezidentinin heykəltaraş oğlu
Kənan Məmmədli, “Ədəbiyyat və incəsənət”
Hər dəfə Dəmiryolu vağzalı ilə 28 Mall alış veriş mərkəzi arasında ucalaraq göz oxşayan bu nəhəng abidəyə baxanda onu ərsəyə gətirən heykəltaraşa səd əhsən deyirəm.
Bəli, söhbət görkəmli yazıçımız, dramaturqumuz Cəfər Cabbarlıya ucalan abidədən və Xalq rəssamı Mirəli Mirqasımovdan gedir.
Bu gün Azərbaycan heykəltəraşlıq sənəti tarixində iz qoymuş Xalq rəssamı Mirələsgər (Mirəli) Mirqasımovun doğum günüdür.
Anadan olmasının 99-cu ildönümü tamam olan Xalq rəssamı heykəltaraşlıq sahəsində yaddaqalan yaradıcılıq nümunələri ilə xüsusi rəğbət qazanıb.
Heyjəltaraş 1924-cü il fevralın 9-da Bakı şəhərində AMEA-nın ilk prezidenti olmuş görkəmli akademik, Azərbaycan tibb elminin əsaslarını qoyanlardan biri Mirəsədulla Mirqasımovun ailəsində dünyaya göz açıb. Təsviri sənətə olan böyük həvəsi onu Əzim Əzimzadə adına Azərbaycan Dövlət Rəssamlıq Məktəbinə gətirib çıxarıb. 1944-cü ildə həmin məktəbi bitirən Mirəli təhsilini İ.Y.Repin adına Leninqrad Boyakarlıq, Heykəltəraşlıq və Memarlıq İnstitutunda davam etdirib və 1950-ci ildə təhsilini uğurla başa çatdıraraq, ilk ali təhsilli peşəkar Azərbaycan heykəltaraşı olub.
Qeyd etmək lazımdır ki, heykəltaraş yaradıcılığının ilk illərində animalistik janrda heykəllər yaratmağa üstünlük verib. Ümumiyyətlə, Azərbaycan heykəltəraşlıq sənətində nədənsə animalistik janrda heykəltaraşlıq əsərləri az yaradılıb. Bu baxımdan M.Mirqasımovun bu sahədə olan yaradıcılıq fəaliyyəti təqdirəlayiqdir. Onun müəllifi olduğu dəzgah heykəltaraşlığı əsərlərinə nümunə olaraq “M.Ə.Sabirin büstü” (1948), “At” (1950, gips), “Şir” (1950, gips), “Qız portreti” (1955, mərmər), “Ana portreti” (1956, gips), “Qız göyərçinlə” (1956, mərmər), “Şah yaylaq” (1957, gips), “C.Cabbarlı” (1958, mərmər), “Neftçi Qurban” (1959, bürünc), “Azadlıq” (1959, bürünc), “İkar” (1962, bürünc), “Xəzri” (1966, bürünc), “Akademik Mirəsədulla Mirqasımov” (1980, bürünc), “Hərəkət qüvvətdir” (1982, bürünc), “C.Cabbarlı” (1987, bürünc) və başqalarını göstərmək olar. Sadalanan hər bir sənət əsərinin ərsəyə gətirilməsi heykəltaraşın gərgin yaradıcılıq axtarışları və zəhməti hesabına başa gəlib.
M.Mirqasımov mənsub olduğu ailənin gözəl ənənələrindən qaynaqlanan yüksək intellektuallığı və əməksevərliyi, seçdiyi sənətə sonsuz bağlılığı sayəsində heykəltaraş kimi böyük yaradıcılıq yolu keçib və onun yarım əsrdən artıq müddət ərzindəki fəaliyyəti Azərbaycanda heykəltaraşlığın inkişafında mühüm rol oynayıb. Mirəli Mirqasımovun monumental plastika sahəsindəki xidmətləri xüsusilə yüksək qiymətə layiqdir. Heykəltaraşın xalqımızın görkəmli oğul və qızlarının mərmərdə, qranitdə və tuncda əbədiləşdirdiyi obrazları küçə və meydanları, böyük sərgi və muzeyləri bəzəyən sənət inciləridir. Bakıda Cəfər Cabbarlının, Naxçıvanda Cəlil Məmmədquluzadənin monumental abidələri, Sumqayıtda Nəriman Nərimanovun büstü incəsənətimizin qızıl fonduna həmişəlik daxil olub.
M.Mirqasımovun yaradıcılığında xüsusi əhəmiyyət kəsb edən sənət əsəri, heç şübhəsiz ki, yazımızın əvvəlində qeyd etdiyimiz kimi, görkəmli yazıçımız Cəfər Cabbarlının Bakıda ucaldılan heykəlidir. Əzəmətli – hündürlüyü 5,5 metrə çatan abidə son dərəcə mükəmməl kompozisiya və bədii işlənilmə xüsusiyyətlərinə malikdir. Hündür qranit postamentin üzərində yazıçının ayaq üstə, başını sola çevirmiş, əlləri sinəsində qoşalanmış vəziyyətdə və gərgin fikirlər keçirdiyi məqamda, orijinal formada monumental bədii obrazı yaradılıb. Dramaturqun bədii obrazında ekspressiv, üsyankar və barışmaz “mən”i daha çox surətin zahiri quruluşu ilə üzə çıxarılıb. Dramatizm və dinamizm, yazıçının daxili gərginliyi abidənin ümumi plastik həlli yolu ilə açılıb. Heykəltaraş bu əsərində də paltodan obrazın ümumi bədii həllində vahid element kimi istifadə edib. Yazıçının çiyinlərindən sallanan palto sanki teatrın pərdələrini xatırladır və obrazın monolitliyini və monumentallığını artırır. Postamentdə teatr maskalarının əks etdirilməsi abidənin vahid kompozisiya biçimində həllinə xidmət edir və surətin bədii ifadəliyinə əlavə estetik zövq gətirir. C.Cabbarlının heykəli Azərbaycan heykəltaraşlıq sənətində bədii və texniki işlənilmə, həmçinin qranitdən yonulmuş ən monumental heykəltaraşlıq abidəsi kimi daxil olub. Bu abidə SSRİ Rəssamlıq Akademiyasının diplomuna layiq görülüb.
Heykəltaraşın əsərləri Rusiya, Polşa, Bolqarıstan, Almaniya, Kanada, Misir və başqa ölkələrdə uğurla nümayiş etdirilərək, Azərbaycan heykəltaraşlıq məktəbinə şöhrət qazandırıb.
Həyatın ağır sınaqlarına sinə gərmək Mirəli Mirqasımovda mübarizlik ruhu yaratmışdısa da, onun əsərlərində nikbin ovqat və romantiklik üstünlük təşkil edir. Sənətlərin sintezi probleminin gözəl həlli, monumental duyum və lakoniklik onun yaradıcılığının başlıca səciyyəvi cəhətləridir.
Azərbaycan heykəltaraşlıq sənətinin inkişafında var qüvvəsini sərf etmiş M.Mirqasımovun xidmətləri həmişə yüksək qiymətləndirilib. O, müxtəlif orden və medallarla, o cümlədən müstəqil Azərbaycan Respublikasının ali mükafatı – “Şöhrət” ordeni ilə təltif olunub. Onun mənalı yaradıcılıq yolu gənc heykəltaraş nəsilləri üçün zəngin sənət məktəbidir.
Respublikanın görkəmli heykəltaraşı, Azərbaycan Rəssamlar İttifaqının üzvü, Əməkdar incəsənət xadimi, Xalq rəssamı Mirəli Mirqasımov 2003-cü il noyabrın 9-da ömrünün 80-ci ilində vəfat edib.
Ruhu şad olsun!
“Ədəbiyyat və incəsənət”
(09.02.2024)
