Super User
Beynəlxalq Türk Mədəniyyəti və İrsi Fondu ilə Qırğızıstan arasında əməkdaşlıq barədə müzakirələr aparılıb
Beynəlxalq Türk Mədəniyyəti və İrsi Fondunun prezidenti Günay Əfəndiyeva Qırğızıstana səfəri çərçivəsində Qırğız Respublikasının Dövlət katibi Suyinbek Kasmanbetov ilə görüşüb.
Bu barədə “Ədəbiyyat və incəsənət” portalı Beynəlxalq Türk Mədəniyyəti və İrsi Fonduna istinadən məlumat verir.
Görüşdə tərəflər Fond ilə Qırğızıstan arasında əməkdaşlığın aktual məsələləri, türk xalqlarının mədəni-humanitar əlaqələrinin inkişaf etdirilməsi, dostluq və qardaşlıq münasibətlərinin gücləndirilməsi ətrafında müzakirələr aparıb.
Görüşdə Qırğız Respublikasının dövlət katibi Suyunbek Kasmambetov Fondun qırğız xalqının mədəniyyətinin və irsinin təbliği istiqamətində səylərini xüsusi qeyd edib. O bildirib ki, Fond Oşda “VII Beynəlxalq Dünya Xalqlarının Dastanları” Festivalının keçirilməsinə dəstək göstərmiş və bu möhtəşəm bayramın əsas təşkilatçılarından birinə çevrilmişdir. Suyunbek Kasmambetov Fond tərəfindən azərbaycanlı alim Adil Cəmilin “Manas” eposuna həsr olunmuş kitabının Qırğız və Azərbaycan dillərində nəşr etdirilməsini, həmçinin Türk Akademiyası ilə birgə qırğız manasçısı Rısbay İsakovun “Manas” eposunun Sağımbəy Orozbakov variantına həsr olunmuş əlyazmasının nəşri layihəsinə dəstəyin verilməsini geyd edib. “Fondun daimi dəstəyi sayəsində qırğız xalqının mədəni irsi Türk dünyasında daha da yayılacaqdır”, - deyə S.Kasmambetov vurğulayıb.
Beynəlxalq Türk Mədəniyyəti və İrsi Fondunun prezidenti Günay Əfəndiyeva təşkilatın türk xalqlarının milli-mənəvi dəyərlərinin öyrənilməsi, qorunması, dünyada təbliği istiqamətindəki fəaliyyətlərindən söz açıb. Fondun prezidenti təşkilat ilə Türk dünyasının ayrılmaz parçası Qırğızıstan arasındakı əməkdaşlığın günü-gündən daha da dərinləşdiyini bildirib. Günay Əfəndiyeva Fond tərəfindən 2018-ci ildə Azərbaycanda görkəmli qırğız yazıçısı Çingiz Aytmatovun irsinin təbliği yönündə və 90 illik yubileyi münasibətilə ədibin “Cəmilə” povesti əsasında tamaşanın qırğız dilində nümayişini, bu il yazıçının 95 illiyi ilə bağlı “Ana tarla” əsərinin səhnələşdirilməsini qeyd edib.
Fondun prezidenti təşkilatın qurucu üzv ölkələrindən olan Qırğızıstanın mədəniyyətinin daha yaxından tədqiqi və tanıdılması yönündə digər müxtəlif layihələrin həyata keçirilməsinə hər zaman hazır olduğunu bildirib.
Sonda tərəflər qırğız xalqının mənəvi irsinin tədqiqi və türkdilli xalqlar arasında təbliği istiqamətində səmərəli əməkdaşlığı davam etdirmək barədə razılığa gəliblər.
“Ədəbiyyat və incəsənət”
(26.09.2023)
Qarabağımızın incisi Şuşa yekdil qərarla “İslam dünyasının mədəniyyət paytaxtı” elan edildi
Xəbər verdiyimiz kimi, 25-26 sentyabr tarixlərində Qətər Dövlətinin paytaxtı Doha şəhərində keçirilən İslam Dünyası Mədəniyyət Nazirlərinin 12-ci Konfransı keçirilir. Və onu da xəbər vermişdik ki, konfransda Azərbaycanın qədim söz-sənət beşiklərindən olan Şuşa şəhərinin 2024-cü il üçün ICESCO-nun “İslam dünyasının mədəniyyət paytaxtı” proqramı üzrə namizədliyi irəli sürülüb.
“Ədəbiyyat və incəsənət portalı Mədəniyyət Nazirliyinə istinadən xəbər verir ki, konfrans iştirakçılarının yekdil qərarı ilə Qarabağımızın incisi Şuşa şəhəri “2024-cü il üzrə İslam dünyasının mədəniyyət paytaxtı” adına layiq görülüb.
2020-ci ilin 44 günlük Vətən müharibəsində müzəffər Ali Baş Komandan, Prezident İlham Əliyevin rəhbərliyi altında şanlı Azərbaycan Ordusu tərəfindən böyük qəhrəmanlıqla erməni işğalından azad olunan qala-şəhərimizin tarixi şöhrəti özünə qaytarılır. Prezident İlham Əliyevin rəhbərliyi altında Şuşa şəhərinin qısa müddət ərzində yenidən qurulması, həyatın bu qədim yurdumuza qaytarılması, eyni zamanda tarixi-mədəni və dini abidələrin bərpa edilərək istifadəyə verilməsi istiqamətində aparılan intensiv işlər, Şuşanın beynəlxalq tədbirlərin keçirildiyi məkana çevrilməsi müsəlman ölkələri və ICESCO tərəfindən yüksək dəyərləndirilib.
Şuşanın “İslam dünyasının mədəniyyət paytaxtı” adına namizədliyinin irəli sürülməsi məqsədilə ICESCO-nun müvafiq missiyası burada olub, şəhərdə aparılan quruculuq işləri yüksək qiymətləndirilib.
Birinci vitse-prezident, ICESCO-nun xoşməramlı səfiri Mehriban Əliyevanın rəhbərliyi ilə Heydər Əliyev Fondu tərəfindən Şuşanın mədəni irsinin, mədəni, tarixi və dini abidələrinin bərpa etdirilməsini diqqətə alan İslam dövlətləri, yekdil qərarla Şuşa şəhəri növbəti il üçün İslam Dünyasının mədəniyyət paytaxtı elan edilib. Qeyd edək ki, Şuşanın namizədliyinin irəli sürülməsi prosesinə ICESCO-nun xoşməramlı səfiri Mehriban xanım mühüm dəstək göstərib.
Xatırladaq ki, Prezident İlham Əliyevin müvafiq sərəncamı ilə 2022-ci il Azərbaycanda “Şuşa İli” elan olunub. Şuşa bu il “Türk dünyasının mədəniyyət paytaxtı”dır.
Bu gün Şuşa şəhəri beynəlxalq tədbirlərə, böyük mədəniyyət layihələrinə ev sahibliyi edir. Bu qədim şəhərimizdən dünyaya sülh, birlik və humanizm mesajları verilir.
“Ədəbiyyat və incəsənət”
(26.09.2023)
Şuşa şəhəri 2024-cü il üçün “İslam dünyasının mədəniyyət paytaxtı” elan edilib
Qətərin paytaxtı Doha şəhərində keçirilən İslam Dünyası Mədəniyyət Nazirlərinin 12-ci Konfransı davam edir. Konfransda Azərbaycanın qədim söz-sənət beşiklərindən olan Şuşa şəhərinin 2024-cü il üçün ICESCO-nun “İslam dünyasının mədəniyyət paytaxtı” proqramı üzrə namizədliyi irəli sürülüb.
AzərTAC xəbər verir ki, konfrans iştirakçılarının yekdil qərarı ilə Qarabağımızın incisi Şuşa şəhəri 2024-cü il üzrə “İslam dünyasının mədəniyyət paytaxtı” adına layiq görülüb.
2020-ci ilin 44 günlük Vətən müharibəsində Müzəffər Ali Baş Komandan, Prezident İlham Əliyevin rəhbərliyi altında şanlı Azərbaycan Ordusu tərəfindən böyük qəhrəmanlıqla erməni işğalından azad olunan qala şəhərimizin tarixi şöhrəti özünə qaytarılır. Prezident İlham Əliyevin rəhbərliyi altında Şuşa şəhərinin qısa müddət ərzində yenidən qurulması, həyatın bu qədim yurdumuza qaytarılması, eyni zamanda, tarixi-mədəni və dini abidələrin bərpa edilərək istifadəyə verilməsi istiqamətində aparılan intensiv işlər, Şuşanın beynəlxalq tədbirlərin keçirildiyi məkana çevrilməsi müsəlman ölkələri və ICESCO tərəfindən yüksək dəyərləndirilib.
Şuşanın “İslam dünyasının mədəniyyət paytaxtı” adına namizədliyinin irəli sürülməsi məqsədilə ICESCO-nun müvafiq missiyası burada olub, şəhərdə aparılan quruculuq işləri yüksək qiymətləndirilib.
Birinci vitse-prezident, ICESCO-nun xoşməramlı səfiri Mehriban Əliyevanın rəhbərliyi ilə Heydər Əliyev Fondu tərəfindən Şuşanın mədəni irsinin, mədəni, tarixi və dini abidələrinin bərpa etdirilməsini diqqətə alan İslam dövlətləri, yekdil qərarla Şuşa şəhərini növbəti il üçün “İslam dünyasının mədəniyyət paytaxtı” elan ediblər. Qeyd edək ki, Şuşanın namizədliyinin irəli sürülməsi prosesinə ICESCO-nun xoşməramlı səfiri Mehriban xanım mühüm dəstək göstərib.
Xatırladaq ki, Prezident İlham Əliyevin müvafiq Sərəncamı ilə 2022-ci il Azərbaycanda “Şuşa İli” elan olunub. Şuşa bu il “Türk dünyasının mədəniyyət paytaxtı”dır.
Bu gün Şuşa şəhəri beynəlxalq tədbirlərə, böyük mədəniyyət layihələrinə ev sahibliyi edir. Bu qədim şəhərimizdən dünyaya sülh, birlik və humanizm mesajları verilir.
“Ədəbiyyat və incəsənət”
(25.09.2023)
İslam Dünyası Mədəniyyət Nazirlərinin 12-ci Konfransı işə başlayıb
Azərbaycan Respublikasının mədəniyyət naziri Adil Kərimlinin rəhbərliyi ilə nümayəndə heyəti İslam Dünyası Mədəniyyət Nazirlərinin 12-ci Konfransında iştirak etmək məqsədilə sentyabrın 25-də Qətər Dövlətinin Doha şəhərinə səfər edib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, Adil Kərimli “İslam dünyasında mədəni fəaliyyətin yenilənməsinə doğru” mövzusuna həsr olunmuş 12-ci Konfransın açılış mərasimində iştirak edib.
Builki tədbirdə mədəniyyət siyasəti üzrə əsas prinsiplər və davamlı inkişaf göstəriciləri, “İslam dünyasının mədəniyyət paytaxtı” proqramının inkişaf etdirilməsi mexanizmləri, mədəni sərvətlərin qanunsuz dövriyyəsinə qarşı mübarizə sahələrində birgə mədəni fəaliyyətin genişləndirilməsi kimi məsələlər müzakirə ediləcək.
Konfransda, həmçinin Azərbaycanın söz-sənət beşiklərindən Şuşa şəhərini 2024-cü il üçün “İslam dünyasının mədəniyyət paytaxtı” elan edilməsi ilə bağlı ölkəmizin təqdim etdiyi nominasiya sənədinə baxılması, Şuşa ilə bağlı çıxış və təqdimat nəzərdə tutulur.
“Ədəbiyyat və incəsənət”
(25.09.2023)
Qənirə Paşayevanın son durumu AÇIQLANDI
Mərkəzi Klinikanın baş həkimi Kamran Musayev millət vəkili Qənirə Paşayevanın vəziyyəti ilə bağlı açıqlama verib.
Baş həkim APA-ya açıqlamasında bildirib ki, Qənirə Paşayevanın vəziyyəti ağırdır:
“Qənirə xanımın reanimasiya şöbəsində süni tənəffüs aparatına bağlı müalicəsi davam edir”.
“Ədəbiyyat və incəsənət”
(25.09.2023)
Qazax Dövlət Dram Teatrı bu gün Bakıda çıxış edəcək
Bu gün Qazax Dövlət Dram Teatrının yaradıcı heyəti Teatr Xadimləri İttifaqının səhnəsində - Aktyor evində Əməkdar İncəsənət Xadimi, yazıçı-dramaturq Ağalar İdrisoglunun "İnan mənə" pyesinin tamaşası ilə çıxış edəcək. Bu barədə “Ədəbiyyat və incəsənət” portalına teatrdan məlumat verilib.
Tamaşa saat 18.00-da başlanır. Giriş sərbəstdir.
Şəkildə: Teatrın yaradıcı heyəti.
“Ədəbiyyat və incəsənət”
(25.09.2023)
Dünya Poliqlotlar Cəmiyyətinin azərbaycanlı mudir müavini vəfat edib
Poliqlot, 24 dildə danışa bilən, əslən Cəlilabad rayonunun Göytəpə qəsəbəsindən olan, Dünya Poliqlotlar Cəmiyyətinin mudir müavini, jurnalist, tədqiqatçı-yazar, 20 dən çox Azərbaycan və bir çox əcnəbi dillərdə nəşr edilmiş milli dini tarixi tədqiqat əsərlərinin müəllifi Yaqub Bəhrəm oğlu Abbasov dünyasını dəyişmişdir.
Bu barədə “Ədəbiyyat və incəsənət” portalı Yaqub Abbasovun yaxınlarına istinadən məlumat verir.
Allah rəhmət eləsin, Ruhu şad olsun.
“Ədəbiyyat və incəsənət”
(25.09.2023)
Bir ətrafa baxın!
Qoşqar İsmayılzadə, “Ədəbiyyat və incəsənət”
İnsan öz taleyini, hansı mühitdə, hansı şərait və şərtlər altında doğulacağını özü seçmir. Sən sonradan düşdüyün vəziyyətdən asılı olaraq öz xəyallarını gerçəkləşdirmək üçün hansısa sərtliklərdən, hansısa sənə qoyulan qadağalı çərçivələrdən, sənə atılan daşlardan pilləkən düzəldərək addımlaya bilərsən.
"Kasıb doğulmaq sənin günahın deyil, amma kasıb ölmək sənin günahındır."
Bu fikrə istinad etsək, bu gün bizim qarşımızda duran əsas maneə ilk növbədə elə özümüzük...
Doğulduq və ata, anamızın təfəkkürlərinin yetişdirməsi nəticəsində çərçivəli bir fərdə çevrildik. Təbii ki, sosioloqların qeyd etdiyi kimi cəmiyyət ailədən başlayırsa və ailənin özü də sosial varlıqlardan təşkil olunubsa, bu artıq sənin atacağın addımların müəyyən sayını, limitini göstərir.
Burada bizə təsir edən əsas amillərdən biri yaşadığımız coğrafi ərazinin formalaşdırdığı "mentalitet" məfhumdur. Və ondan qaynaqlanan "Camaat nə deyər ?", "Ayıbdı", "Filankəs nə deyər ", "Filankəs necə düşünər?" və s. tipli məsələlərdir. Bu gün bizim yaşadığımız coğrafi ərazi əsrlərin biri-birinə ötürərək yaşatdığı bir təfəkkür toplusuna sahiblik edir.
Bu gün ətrafınıza baxın, baş verənlərə baxın, sizcə, bir Avropalının, Yaponiyalının, Çinlinin maraq dairəsi, inkişaf məsələsi daha qabarıqdır, ya ətrafımızda olan neandertalların ?!
“Ədəbiyyat və incəsənət”
(25.09.2023)
“Mənə həyatından bir parça ver” - ESSE
Kubra Quliyeva, “Ədəbiyyat və incəsənət”
Hər şey, əslində, bir balaca hüceyrədən başlayır. İnsan olmaq uğrunda atılan ilk addım məhz ilk hüceyrədən başlayır. Sonra ana bətnində 9 aylıq qət edilən yolda hissə-hissə orqanlar formalaşır. Nəfəs alacaq ağ ciyər, süzülmə aparatı böyrəklər, təmizləyici funksiyalı bağırsaq, dalaq, öd kisəsi, mədə və ən əsas iki orqan. Ürək və beyin: həyata atılandan bəri bir-biri ilə ahəngdar olan mehriban düşmənlər.
Nəhayət dünyaya gələn bəşər övladı yeməyi, gəzməyi, danışmağı öyrənir. Zaman keçir, özünü idarə etməyə, həyata təkbaşına tutunmağa, canını qorumağa çalışır. Aydındır ki, hər kəsin özünəməxsus öncəlikləri var. Amma hər kəs üçün ilk sıralarda onun sağlamlığı gəlir. Bəzilərimiz üçün isə sağlam yaşam bir az möcüzə olur. Kimiləri yaşlılıq çağına çatarkən, kimiləri xəstəhal orqanlarının ağrısından günbəgün qocalır. Neyləyək, Allah hərəni bir cür yaradıb. Burada bizim edəcəyimiz nə var ki?
Çox şey var əslində. Sənin ürəyin, ciyərin, gözlərin, qan hüceyrələrin var. Və sən başqa birinə həyat ola bilərsən. Ona bəxş etdiyin donor sayəsində artıq onun da həyata tutunacaq ümidləri, xəyalları, gələcəyi ola biləcək. Hər il milyonlarla insan donor olaraq milyonlarla insan üçün həyat eşqi olur. Unutma, canından bir parça vermək səni həyatda bomboş qoymazkən, başqalarının canına can qata, gələcəyinə ümid ola bilərsən.
Mənə həyatından bir parça ver!
“Ədəbiyyat və incəsənət”
(25.09.2023)
“Daş qoyduq başlarına…”
Bu gün “Ədəbiyyat və incəsənət” portalının Poetik qiraət rubrikasında Emin Pirinin şeiridir. Çox düşündürücü və ağrılı bir şeir!
Şəhid məzarlarını
mərmərə bükdük,
daş qoyduq başlarına
qalxa bilməsinlər
üzümüzə tüpürməyə.
Bu yaşıma görə
Şəhidlər Xiyabanında
18 yaşlı
başdaşları
utandırdı məni.
məndən kiçikdi hələ
məndən öncə doğulanlar
əmi deyib
üstümə qaçır başdaşları
bir əsgərin ölüm günü
başdaşının doğum günüymüş.
can qoydular
nə düşdü paylarına
sağ qalanlar
daşladılar
torpağının başını.
Şəhid məzarlarını
mərmərə bükdük,
daş qoyduq başlarına
qalxa bilməsinlər
üzümüzə tüpürməyə.
“Ədəbiyyat və incəsənət”
(25.09.2023)
