Super User
İrlandiya milli rəqs şousu Bakıda təqdim ediləcək
Noyabrın 2-də Heydər Əliyev Sarayında dövrümüzün ən yaxşı üç İrlandiya şousundan biri olan əfsanəvi rəqs şousu - "Rhythm of the Dance" təqdim ediləcək.
Yerli tamaşaçıları orijinal Kelt melodiyalarından ibarət sehrli kokteyl, dünyaşöhrətli İrlandiya stepi, canlı musiqi və solistlərin valehedici ifaları gözləyir.
İnanılmaz hərəkət enerjisi, incəlik və sinxronluq, xalq elementlərinin metropolun müasir ritmləri ilə birləşməsi - bütün bunlar "Rhythm of the Dance" şousunu dünyada ən populyar şoulardan birinə çevirib.
"Rhythm of the Dance" irland rəqslərində dünya lideridir, öz ənənələrinin saflığını qorumağa çalışır, eyni zamanda, rəqsi ən müasir formada təqdim edir. "Rhythm of the Dance" öz miqyası və bacarığı ilə tamaşaçıları heyran qoyan musiqi, teatr, improvizasiya, müasir xüsusi effektlər və heyrətamiz səhnə işıqlandırmasıdır.
Əyyub Quliyevin Polşanın Lutoslavski adına Beynəlxalq Gənclər Simfonik Orkestri ilə benefisi
Polşanın Lutoslavski adına Beynəlxalq Gənclər Simfonik Orkestri Azərbaycan Dövlət Akademik Opera və Balet Teatrının baş dirijoru və musiqi rəhbəri, Əməkdar artist Əyyub Quliyevin rəhbərliyi altında Berlinin ən mötəbər salonlarından biri olan “Konzerthaus” və Polşanın Şeçin şəhərinin M. Karloviç adına Dövlət Filarmoniyasının Qızıl zalında əlamətdar çıxışlarını həyata keçirib. Bu barədə “Ədəbiyyat və incəsənət” portalı AzərTAC-a istinadən məlumat verir.
Lutoslavski Gənclər Simfonik Orkestri artıq 10 il davamlı olaraq xüsusi sınaq müsabiqələrinin nəticələri əsasında dünyanın müxtəlif ölkələrindən istedadlı gəncləri seçib kollektivə dəvət edir. Bu il Polşa, İspaniya, İtaliya və digər ölkələrdən seçilmiş gənc musiqiçilər Berlin Filarmonik, Belin Konzerthaus və Polşa milli orkestrinin musiqiçiləri tərəfindən xüsusi olaraq hazırlıq prosesi keçiblər. Son mərhələdə Azərbaycanlı dirijor Əyyub Quliyevlə bərabər çox mürəkkəb musiqi proqramı üzərində iş gedir - Bela Bartokun Orkestrin üçün “Konserti”, M. Karloviçin “Molenadan Bianka” simfonik poeması və V. Lutoslavskinin Violonçel və orkestr üçün konserti (solist - beynəlxalq müsabiqələr laureatı Marcin Zdunik) əvvəlcə Berlində təqdim olunur. Hər il Berlində avqust ayında keçirilən və dünyanın ən tanınmış gənclər simfonik orkestrlərinin iştirak etdiyi “Young Euro Classics” festivalında Lutoslavski Beynəlxalq Gənclər Orkestri ilk dəfə iştirak edir. Polşa Orkestri ilə bərabər Berlin Musiqi Festivalının açılışında Amerika Milli Gənclər Simfonik orkestri (dirijor Daniel Hardinq), Almaniya Gənclər orkestri (dirijor - Mark Abrext), Ukrayna (dirijor - Oksana Lyniv), Türkiyə (dirijor - Cem Mansur), həmçinin Holland, Venesuela, Vyana Milli Gənclər simfonik orkestrləri rəngarəng proqramlarla çıxış ediblər. Konsertlərdə Rene Kapuson (skripka/Fransa) və Alisa Vaylerştayn (violonçel/ABŞ) kimi solistlər də iştirak ediblər.
Azərbaycanlı dirijor Əyyub Quliyevin rəhbərliyi ilə keçən konsertdə Polşa Beynəlxalq Gənclər Simfonik Orkestrinin ifası alman mətbuatında (“Tagelsspiegel”, Classic İnfo, “Rondo”) festivalın ən yaddaqalan və uğurlu konsertlərindən biri kimi qeyd olunub. Konsertin sonunda dinləyicilərin alqışlarını və istəyini nəzərə alaraq musiqiçilər əlavə olaraq Yohannes Brahmsın əsərlərini ifa ediblər. Qeyd etmək lazımdır ki, nüfuzlu Berlin Konzerthausda keçirilən konsert Alman Dövlət Radiosu (Deutch Rundfuk) tərəfindən tam olaraq lentə alınıb. Konsertdən sonra Polşanın Almaniyadakı səfiri tərəfindən Azərbaycanlı dirijor və Polşa orkestrinin şərəfinə rəsmi qəbul təşkil olunub. Berlindəki konsert proqramı Polşanın Şeçin şəhərində yerləşən M. Karloviç adına Dövlət Filarmoniyasının Qızıl zalında yerli dinləyicilərə xüsusi məharətlə təqdim olunub. Konsertin sonunda polşalı dinləyicilər dirijor və digər ifaçıları ayaqüstə alqışlayıblar. Tədbir bitdikdən sonra Polşa Dövlət Filarmoniyasının direktoru Dorota Serva və dirijor Əyyub Quliyev bütün orkestr üzvlərinə xüsusi sertifikatlar təqdim etmişlər.
ANİMAFİLM Beynəlxalq Animasiya Festivalının proqramı açıqlandı
Azərbaycana böyük kino bayramı təşrif buyurur. Uşaqlar və böyüklər üçün nəzərdə tutulmuş ənənəvi 5-ci ANİMAFİLM Beynəlxalq Animasiya Festivalı 2022-ci il, 7-11 sentyabr tarixində Nizami Kino Mərkəzində keçiriləcək. Festival geniş proqramını açıqlayaraq, artıq bilet satışını elan edib.
“Ədəbiyyat və incəsənət” portalı xəbər verir ki, tədbir “İqlim dəyişikliyi”nə həsr olunduğuna görə, bilet satışından əldə olunacaq bütün vəsait işğaldan azad olunmuş ərazilərdə ekoloji tarazlığın bərpası üçün Qarabağ Dirçəliş Fonduna ianə ediləcək.
Bu il festival tamaşaçılara üç əsas proqram təqdim edəcək: müsabiqə proqramı, müsabiqədənkənar proqram və peşəkarlar üçün proqram. Animasiya filmlərinin nümayişi ilə yanaşı, yerli və xarici peşəkarların iştirakı ilə vörkşoplar və ustad dərsləri də təşkil olunacaq.
Festivala 50 müxtəlif ölkədən 230 film təqdim olunub. Seçim komissiyası müsabiqə proqramına 29 ölkədən 76 film qəbul edib. Müsabiqə iştirakçıları 1 yerli və 6 beynəlxalq kateqoriyalar üzrə mükafatlar uğrunda yarışacaqlar. Bütün seçilmiş filmləri beynəlxalq və uşaq münsiflər heyəti izləyəcək, qaliblər 5-ci ANİMAFİLM festivalının açılış və bağlanış mərasimlərində elan olunacaq. Uşaq münsiflər heyətinə 22 yerli uşaq, beynəlxalq münsiflər heyətinə isə 6 xarici peşəkar daxil edilib: Jonathan Laskar (İsveçrə), Tilly Wallace (Böyük Britaniya), Markus Øvre (Böyük Britaniya), Nodar Beqiaşvili (Gürcüstan), Jorn Leeuwerink (Niderland) və Daniel Bird (Böyük Britaniya). Bundan əlavə, bu il “Tamaşaçı seçimi” müsabiqəsinin qalibi film nümayişləri zamanı tamaşaçı səsverməsinin nəticələri əsasında müəyyənləşdiriləcək, qalibə isə Lenovonun mükafatı təqdim olunacaq. Festivalın digər nominasiyalarında mükafatlar TVPaint Développement (“Ən yaxşı tələbə animasiya filmi”), Fransanın Azərbaycandakı səfirliyi və Fransız İnstitutu (“Ən yaxşı Azərbaycan qısametrajlı animasiya filmi”) və Shahmaran Metaceramica tərəfindən təqdim olunacaq.
Müsabiqədənkənar proqramda iqlim dəyişikliyi ilə bağlı filmlər, uşaqlar üçün “Ana təbiət” proqramı, Çexiyanın “Hətta siçanlar da cənnətə aiddir” tammetrajlı filmi, Ukrayna animasiyası, virtual sərgi və Bakı Beynəlxalq Qısa Filmlər Festivalının qalib filmləri təqdim olunacaq. Azərbaycanla Yaponiya arasında diplomatik əlaqələrin qurulmasının 30 illiyi münasibətilə “Hava övladı” adlı tammetrajlı animasiya filmi nümayiş etdiriləcək.
Peşəkarlar üçün proqramda hazırda üzərində iş gedən Azərbaycan animasiya filmləri təqdim olunacaq, beynəlxalq münsiflər heyəti ilə görüşlər, rejissor Jonathan Laskarın (İsveçrə) ustad dərsi təşkil olunacaq. Bunlardan başqa, proqramda Nitya Ramlogan (ABŞ), Tilly Wallace (İngiltərə) və Nəzrin Ağamalıyevanın (Azərbaycan) iştirakı ilə “Stop motion” və “Şüşə üzərində animasiya” vörkşopları da nəzərdə tutulub.
Festival çərçivəsində animasiya restavrasiyasına dair “Animasiyanın refreyminqi: Rəqəmsal texnologiyalar əsrində hərəkətli təsvirin qorunması və bərpası” adlı konfrans da keçiriləcək.
5-ci ANİMAFİLM Beynəlxalq Animasiya Festivalının təşkilatçıları “Azərbaycan Animasiya Assosiasiyası” ictimai birliyi və “PERİ FİLM” şirkətidir.
Festivalın builki tərəfdaşları bunlardır: Azərbaycan Respublikasının Mədəniyyət Nazirliyi, Azərbaycan Kinematoqrafçılar İttifaqı, Qarabağ Dirçəliş Fondu, Culture Network House Association, Azərbaycan Yaradıcı Sənayelər Federasiyası, Shahmaran Metaceramica, Dynamic Box Studio, Nizami Kino Mərkəzi, İsveçrə İnkişaf və Əməkdaşlıq Agentliyi, Fransanın Azərbaycandakı səfirliyi və Fransız İnstitutu, Çexiya Respublikasının Azərbaycandakı səfirliyi, Yaponiyanın Azərbaycandakı səfirliyi və Yaponiya Fondu, Lenovo, Tripsome, Ritual Mobil Teatr Laboratoriyası, Cafino Coffee&Wine, Nemi Hotel Baku, Unibroad, Choche.az, Annecy Beynəlxalq Animasiya Film Festivalı və TVPaint Développement.
Festivalın media tərəfdaşları bunlardır: “BAKU” və “Nargis” jurnalları.
Kinosevərlər, gəlin, maraqlı olacaq!
Mədıniyyət Nazirliyinin layihəsində bu dəfə Xan Şuşinski
Mədəniyyət Nazirliyinin “Şuşa mədəniyyətinin inciləri” layihəsi müxtəlif bölmələr üzrə təqdimatlarla davam edir. “Şuşa İli” münasibətilə həyata keçirilən layihənin “Şuşanın simaları” bölməsinin növbəti təqdimatı Xan Şuşinski həsr olunub.
“Ədəbiyyat və incəsənət” portalı xəbər verir ki, İsfəndiyar Aslan oğlu Cavanşir 1901-ci il avqust ayının 20-də Şuşa şəhərində dünyaya göz açıb.
İsfəndiyarda geniş diapazonlu, məlahətli səsin və xanəndəliyə həvəsin olması çox erkən nəzərə çarpdığından, Aslan ağa oğlunu yeniyetmə çağlarından dövrünün tanınmış xanəndələrindən olan İslam Abdullayevin sinfinə verib.
1920-ci illərdə Xan Şuşinski Bakıya gələrək öz ifaçılıq fəaliyyətini genişləndirir. Xanəndənin repertuarında “Mahur-Hindi”, “Bayatı-Qacar”, “Qatar” muğamları, “Qarabağ şikəstəsi”, “Arazbarı”, “Heyratı” zərbi muğamları ilə yanaşı, xalq mahnıları və təsniflər də yer alır. Xan xalq mahnılarını xüsusi bir şövqlə oxuyur, onlara yeni çalarlar əlavə edir.
Simfonik orkestrin müşayiəti ilə ilk dəfə simfonik muğamlarda solo hissəni Xan oxuyub. Musiqi tariximizdə ilk duet də böyük sənətkarın adı ilə bağlıdır. Şövkət Ələkbərova ilə Xan Şuşinskinin ifasında lentə alınan “Yaylıq” adlı bu duet indi də maraqla dinlənilir.
Görkəmli xanəndə 1960-cı ildə Azərbaycan Dövlət Filarmoniyasının nəzdində “Muğam studiyası” yaradaraq gənc xanəndələrə muğamın sirlərini öyrədib. O, həmçinin Azərbaycan Dövlət Musiqi Məktəbində dərs deyib, muğam ifaçılarının yeni nəslinin yetişməsində əvəzsiz xidmətlər göstərib.
İsfəndiyar Cavanşirov gənclikdə ona verilən “Xan” adının məsuliyyətini ömrünün sonunadək daşıyıb. Görkəmli sənətkar, adını milli musiqi tariximizə böyük hərflərlə yazdırmağı bacarıb.
Xan Şuşinski 1979-cu ildə vəfat edib.
Bu gün “Yayın son filmləri” festivalı başlayır
“CinemaPlus” kinoteatrlar şəbəkəsində bu gün - avqustun 22-dən 31-dək “Yayın son filmləri” festivalı keçiriləcək.
Filmlər xüsusi endirimli qiymətə təqdim olunacaq.
İran, Türkiyə, İndoneziya rəhbərlərinin məftun olduğu Sara Qədimova
“Ədəbiyyat və incəsənət” portalı Bizim.media-da dərc edilmiş görkəmli muğam və əcnəbi mahnıların əvəzsiz ifaçısı Sara Qədimova haqqında yazını diqqətinizə çatdırır.
Sara Qədimova əslən Qarabağdan olsa da, Bakıda doğulub. Cəmi 15 yaşında bu gözəl sənətkar özündən söz etdirib. Belə ki, 1938-ci ildə özfəaliyyət kollektivlərinin baxış müsabiqəsi keçirilirdi. Sara Qədimova da bu müsabiqədə iştirak edirdi.
İlk dəfə nəhəng sənətkarların qarşısında çıxış edirdi. O, "Qatar"ı oxumağa başlayıb. Ardınca "Gəlmə-gəlmə" xalq mahnısını ifa edəndən sonra Üzeyir Hacıbəyov heyrətdən donub qalıb.
Sara xanımın sənətkar kimi yetişməsində Hüseynqulu Sarabski, Xan Şuşinski, Seyid Şuşinski kimi nəhəng ustadların təsiri olub. O, öz sələflərinin layiqli davamçısı olaraq ömrünün sonuna kimi klassik ifaçılıq ənənələrinə sadiq qalıb.
22 yaşında o, növbəti konsertlərinin birində həyatının axarını dəyişən bir təklif alır. Sonralar Sara Qədimova xatırlayırdı:
"Qədir müəllim Tibb Texnikumunun direktoru idi. Mən mamalıq şöbəsində oxuyurdum. 1944-cü ildə bir gün konsertdən sonra Qədir müəllim mənə yaxınlaşıb ciddi şəkildə "Səninlə ailə qurmaq istəyirəm", - dedi.
Sara xanım ilk öncələr tərəddüd edir, buna səbəb Qədir İslamzadənin Saradan 24 yaş böyük olması idi. Ancaq Sara xanım onunla evlənir. Lakin 8 il sonra cütlük evliliklərini bitirirlər.
Sara Qədimova Sovetlər dövründə xarici ölkələrə ən çox qastrola gedən müğənnilərimizdən biridir. Xüsusilə, Yaxın Şərqdə Sara xanımın daha çox sevənləri vardı. 1944-cü ildə Xan Şuşinski ilə Sara xanım Rza şahın dəvəti ilə İrana dəvət alır. Şahın qarşısında çıxış edən 20 yaşlı Sara xanımın ifası şahı necə valeh edirsə, ona orden bağışlayır. Və hətta Tehranda qalmasını istəyir. Lakin gənc Sara şahın sözünü yerə salır və Bakıya
1963-cü ildə Sara Qədimova İndoneziyaya qastrol səfərinə gedir. Onun ifası ölkə prezidentini necə məftun edirsə, Sara xanımı evinə dəvət edir. Müğənniyə bahalı hədiyyələr bəxş edən prezident onu 3 ay öz ölkəsində qonaq saxlayır.
Türkiyənin sabiq prezidenti Süleyman Dəmirəl prezident seçilməmişdən əvvəl Bakıda səfərdə olarkən Sara Qədimovanın ifasını dinləyib.
Sara xanım o zaman Abbas Səhhətin məşhur "Könlümün sevgili məhbubu mənim, vətənimdir, vətənimdir, vətənim" qəzəlini muğam üstündə ifa edərkən Dəmirəlin çox xoşuna gəlib. Dəmirəl prezident seçiləndən sonra Sara xanımla görüşüb. Onu Türk dünyasının ulduzu adlandırır.
Bu evdi, yoxsa zirzəmi? - Əlizadə Nuridən şeir
Yağdı sevgi yağışları-
Canımda bir qız göyərdi.
O qıza ocaq qaladım,
O gəlmədi, köz göyərdi.
Bu evdi, yoxsa zirzəmi?
Sahildə darıxır gəmi.
Çağırdı ” Yanıq Kərəmi”
Divarda bir saz göyərdi…
Sevib gəldim yalqızları,
O dualı ağızları.
Şumladım ağ kağızları
Dedim bəlkə söz göyərdi.
Ay orda- asdığın yerdə…
Ulduzlar azdığın yerdə.
Sən ayaq basdığın yerdə
Daş ağardı, toz göyərdi.
Ümid doyurmaz ki, acı.
Yüz dərdim var, bir əlacım.
…İlahi, bu dar ağacı
Neynədin ki, tez göyərdi?!..
Günün fotosu: Çin quraqlıqdan əziyyət çəkir
Günün fotosu: Çin quraqlıqdan əziyyət çəkir
Çinin ərazisinin böyük hissəsi fasiləsiz istilərdən və quraqlıqdan əziyyət çəkir. Xubay, Xunan, Anxoy, Syansi əyalətlərində vəziyyət lap dözülməzdir. Kənd təsərrüfatı məhv olmaqdadır, içməli su tapılmır.
Foto: Euronews
Aktyor Rəhman Rəhmanovun atası qanuni oğru imiş
Azərbaycan aktyoru, A.Şaiq adına Azərbaycan Dövlət Kukla teatrının aparıcı səhnə ustası, əməkdar artist Rəhman Rəhmanov atasının qanuni oğru olduğunu etiraf edib.
“Ədəbiyyat və incəsənət” portalı Redaktor.az-a istinadən xəbər verir ki, aktyor bu etirafı "Düz üzünə" verilişində edib:
-Mən "Qara Volqa" kitabında adı çəkilən qanuni oğru "qızılbarmaq Tofiqin" yeganə oğluyam. Atam başkəsən, cəllad kimi adam idi. Amma ömrünün son illərində atamın başına hava gəldi. Ona oğru aləmində ləkə gətirmək üçün toy gecəsi anamın qızıllarını aparmışdılar. Bu atamı təhqir etmək demək idi. Atam o qədər pis olmuşdu ki, toy gecəsi başına hava gəldi. Ömrünün sonlarına yaxın mən onu Opera və Balet Teatrında qapıçı kimi işə düzəltdim. Amma əmək qabiliyyəti yox idi deyə çalışa bilmədi. Sonra Akademik Dram Teatrında çalışdı. Yenə də yarımçıq.
Şuşa - Qarabağın dünəni, bu günü, sabahı”: Əbdürrəhim bəy Haqverdiyev
“Şuşa İli” ilə əlaqədar Azərbaycan İstiqlal Muzeyi tərəfindən həyata keçirilən "Şuşa - Qarabağın dünəni, bu günü, sabahı" adlı layihə çərçivəsində təqdimatlardan biri Azərbaycan ədəbiyyatı tarixində dramaturq və teatr xadimi kimi daxil olan Əbdürrəhim bəy Haqverdiyevə həsr olunur.
AzərTAC xəbər verir ki, təqdimatda görkəmli ədibin həyat və yaradıcılığı haqında məlumat verilir.
Əbdürrəhim bəy Haqverdiyev 1870-ci il may ayının 17-də Qarabağ mahalının Şuşa şəhəri yaxınlığındakı Ağbulaq kəndində doğulub. Əbdürrəhim bəy üç yaşında olanda atası vəfat edəndən sonra əmisi Əbdülkərim bəyin himayəsinə götürülüb.
Şuşa şəhərindəki altıillik “Realnı” məktəbi 1890-cı ildə başa vuran Əbdürrəhim bəy bir il də Tiflis “Realnı” məktəbində oxuyub. 1891-ci ildə ali təhsil almaq məqsədilə Peterburqa gəlib və uğurla imtahan verərək Yol Mühəndisləri İnstitutuna daxil olub.
1908-ci ildən "Nicat" mədəni-maarif cəmiyyətində çalışıb, milyonçu Hacı Zeynalabdin Tağıyevin Kür-Xəzər gəmiçiliyi idarəsində işləyib. Xidməti vəzifəsi ilə bağlı Qafqazı, İranı, Volqaboyu diyarları, Orta Asiyanı dolanıb.
Əbdürrəhim bəy Haqverdiyev 1920-ci ilin iyununda Bakıda yenicə yaranan şura teatrı komissarı seçilib. 1921-1931-ci illərdə Azərbaycan Dövlət Universitetində ədəbiyyatdan mühazirələr oxuyub. 1924-cü ildə Rusiya Elmlər Akademiyasının ölkəşünaslıq bürosuna müxbir üzv seçilib.
Əbdürrəhim bəy Haqverdiyev XIX əsrin sonu XX əsrin əvvəlləri Azərbaycan ictimai-ədəbi və mədəni fikri tarixində özgün yeri olan şəxsiyyətlərdəndir. O, dramaturq, rejissor, dirijor, nasir, publisist, pedaqoq, tədqiqatçı alim kimi səmərəli fəaliyyəti ilə milli-mədəni şüurumuzun inkişaf edib formalaşmasında xüsusi rol oynayıb.
O həm dramaturgiya, həm də satirik publisistikamızı orijinal mövzularla yanaşı, özünəməxsus ideya-estetik, süjet və kompozisiya xüsusiyyətlərinə, üslub və ifadə tərzinə malik olan əsərlərlə zənginləşdirib.
"Şeyx Şəban", "Mirzə Səfər", "Bomba", "Pir", "Çeşmək", "Qiraət" əsərləri Haqverdiyevın yaradıcılığının incilərindən sayılır.
Yazıçı 1933-cü il dekabrın 11-də Bakıda vəfat edib və Fəxri xiyabanda dəfn olunub.
