Super User
Bu gün Beynəlxalq Tərcümə Günüdür
30 sentyabr. Beynəlxalq Tərcüməçi Günü
Bir dildən digər dilə mətn tərcüməsi əsl incəsənət nümunəsidir. Tarixə görə, Vavilon süqut edəndə insan həyatına yeni bir ehtiyac daxil oldu – müxtəlif xalqlar arasında anlaşma. Tərcümə tək ünsiyyətin deyil, həm də ədəbiyyatın, kinonun aparıcı lokomotividir, təsadüfi deyil ki, Puşkin bir vaxtlar deyib, tərcüməçilər – inkişafın poçt atlarıdır. 1991-ci ildə Beynəlxalq Tərcüməçilər Federasiyasının təklifi ilə bu gün təqvimə salınıb. 30 sentyabr - müasir xristian kilsəsinin dörd yaradıcı atasından biri sayılan latın İerodim Stridonskinin doğum günüdür. O, dövrünün tanınmış tərcüməçisi hesab olunurmuş həm də.
Bir dəfə bir rus filmini dilimizə dublyaj etmişdilər, obrazlardan biri “Vot qde zarıta sobaka” demişdi, hərfi mənası “gör it harda gizlənib” olan bu frazeoloji birləşmə “sən demə, məsələnin məğzi bu imiş” kimi məna verir. Səsləndirmədə isə bunun mahiyyətinə varmadan “gör it harda gizlənib” söyləyib gülünc bir situasiya yaratmışdılar. Yaxud da, bir dəfə bir qəzetdə Kapustin soyadlı rus hərbçisinin soyadı Kələmov kimi tərcümə edilmişdi. Bax bu isə tərcümə adına ləkədir.
30 sentyabr. Ümumdünya Dəniz Günü
Beynəlxalq dəniz təşkilatı (İMO) belə bir günü təqvimə salmağı təklif edib, BMT bu təklifi dəstəkləyib, biz də bir dəniz ölkəsi olmaqla bu günü qeyd etməliyik. Bu günü qeyd etməyin məğzi odur ki, su hövzələrinin çirkləndirilməsinin, qlobal istiləşmənin və balıqların kütləvi ovlanmasının dənizə necə böyük ziyan vurmasına diqqət cəlb edilsin. Planetin 70 faizi su ilə örtülüb. Yosunlardan ta ki mavi delfinlərəcən bütün dəniz canlılarının biokütləsi planetin bütün canlı orqanizmlərinin 90 faizini təşkil edir, təsəvvür edirsiniz, bu nə deməkdir?
Dənizləri gözləyən təhlükə get-gedə artmaqdadır. Hər il 21 milyon barel neft dəniz və okeanlara axıdılır. Son 100 il ərzində tunes, treska, marlin kimi qiymətli balıqların 90 faizi tamamilə ovlanıb. Su hövzələrinə atılan sintetik tullantılar hər il milyonlarla dəniz quşlarının məhvinə səbəb olur. Elə öz Xəzərimizi götürək. Neftlə çirklənir, çirkab sularla çirklənir, flora və faunası məhv olur, brakonyerlər nərə balığının kökünü kəsir. Gəlin bu gün ən azı gedib Xəzərin sahilini zir-zibildən təmizləyək, nə olar. Xəncərimizin qaşı düşməz ki.
30 sentyabr. ”Sehirli fleyta”dan BBC-yədək
Bu gün Extra Virgin günüdür, birinci sıxım Zeytun yağı günü yəni. Polşada oğlanlar, Kanadada narıncı köynək, ABŞ-da isə həm milli saqqız günüdür, həm də ədvalı alma sidri günüdür. 1954-cü ilin bu günündə dünyada ilk atom sualtı gəmisi olan Naitilus (ABŞ) suya buraxılmışdır. 1946-ci ildə Nürnberq tribunalında nasist cinayətkarlara ilk hökm çıxarılmışdır. 1929-cu ildə BBC ilk teletranslyasiya həyata keçirmişdir. 1791-ci ildə Vyanada Motsartın sonuncu operası olan “Sehirli fleyta”nın premyerası baş tutmuşdur.
Varisin “21-30 sentyabrın təqvimi” yazısından
“Quxuroba” filmi xüsusi mükafata layiq görülüb
Azərbaycanlı rejissor Teymur Qəmbərovun “Quxuroba” filmi Bişkek şəhərində keçirilən MDB ölkələri gənc rejissorlarının IX “Umut” kinoforumunda mükafata layiq görülüb.
AzərTAC xəbər verir ki, forum SSRİ Xalq artisti Bolot Şamşiyevin 80 illik yubileyinə həsr olunub. “İnsan. Tale. Həyat” devizi altında təşkil edilən kinoforumda “Quxuroba” filmi münsiflər heyətinin xüsusi mükafatı ilə təltif olunub.
Qısametrajlı (21 dəqiqə) film Rasim adlı taksi sürücüsünün başına gələn macəralardan bəhs edir. O, müdirindən vacib bir tapşırıq alır. Nəyin bahasına olursa olsun, gəlinlik paltarını ucqar kəndə çatdırmalıdır. Yolda maşına gənc bir qadın minir. İki fərqli tale bir yolda kəsişir...
Bu gün World Heart Day - Ümumdünya ürək günüdür
29 sentyabr. Ümumdünya ürək günü
World Heart Day. 70 il ərzində insan ürəyi 2 500 000 000 dəfə açılıb yumulur, hər açılıb yumulma zamanı arteriyaya 70-80 ml qan ötürür. Hər 12 zərbə bir litr qan deməkdir. Bu minvalla insan ürəyinin 70 il ərzində vurduğu qanla 3500 standart dəmiryolu sisternini doldurmaq mümkündür. Onu da nəzərə alın ki, fiziki gərginlik zamanı bu nəticələr 4-5 dəfə artmış olur. İnsan ürəyi çox zəhmətkeşdir, yetər ki, onu incitməyək, qayğısına qalaq. Bu gün məhz ictimaiyyətin fikrini ürək xəstəliklərinə yönəltmək məqsədi güdülür. Ürəyin əsas düşmənləri arterial təzyiq, qanda xolesterinin artması, artıq çəki, tütün və stresslərdir.
29 sentyabr. Qəhvə günü
Dünyanın əksər ölkələrində bu gün milli qəhvə günü kimi qeyd edilir. ABŞ isə bu gün həm milli qəhvə gününü, üstəlik də, milli Mokkaçino qəhvəsi gününü qeyd edir. Qəhvə çayla bərabər dünyada ən geniş yayılmış içkidir, normada qəbul edildikdə ürək-damar sisteminə fayda verir, yorğunluq və stresi aradan qaldırır.
İlk dəfə qəhvə Afrikada - Həbəşistanın cənub qərbində yerləşən Qaffa bölgəsində aşkar olunub. Sonralar qəhvə Mərkəzi Ərəbistana gətirilib. Yəmənin cənub qərb hissəsində becərilib. Bu günə kimi də Yəmən dünayada ən böyük qəhvə istehsalçısıdır. Hazırda dünyada 50-dən çox ölkədə qəhvə bitkisi növləri becərilir. Qəhvənin hazırlanmasının Həbəşistan üsulu ən qədim üsul sayılır. Dənəciklər qovrulduqdan sonra üyüdülür. Üyüdülmüş qəhvə tozu su və qəndlə birlikdə qaynadılır və Yabana adlanan maye hazırlanır. Onu kiçik piyalədə içirlər.
Dünyada ən məşhur qəhvə hazırlanma növləri amerikano, kappuçino, espresso, late ilə yanaşı həm də türk qəhvəsi hesab edilir. 1517-ci ildə Yavuz Sultan Səlimin dövründə türkəsilli Özdəmir paşa Yəməndə içdiyi və çox sevdiyi qəhvəni İstanbula gətirməklə qəhvəni Avropaya ilk gətirən şəxs kimi tarixə düşüb. Bu gün həmən qəhvə için, nuş olsun!
29 sentyabr. Mikkelancelo və Zolya
1913-cü ilin bu günündə alman mühəndisi Rudolf Dizel – o şəxs ki dizel yanacağını kəşf edib, dünyadan köçüb. 1902-ci ildə məşhur fransız yazıçı Emil Zolya vəfat edib. 1897-ci ilin bu günündə Buenos-Ayresin Olimpo teatrında ilk dəfə tanqo ifa edilib. 1789-cu ildə ABŞ konqresi Amerika ordusunun yaradılması haqda qərar verib. 1571-ci ildə dünyaşöhrətli italyan rəssam Mikkelancelo dünyaya gəlib.
Varisin “21-30 sentyabrın təqvimi” yazısından
Londonda əfsanəvi “Queen” qrupunun rəsmi mağazası açılıb
Londonda Britaniyanın məşhur “Queen” qrupunun rəsmi dükanı açılıb. TASS agentliyi xəbər verir ki, dükan növbəti 4 ay ərzində fəaliyyət göstərəcək.
“Queen Thе Greatest” adlanan dükanda qrupa məxsus müxtəlif aksesuarlat - geyim, vallar, kollektivin simvolik suvenirləri, bəzək əşyaları, hətta musiqiçilərin üzərinə imza atdığı gitaralar pərəstişkarların ixtiyarına veriləcək.
Firuzə İbadova: “Məgər Cabbar Qaryağdıoğlunun Əməkdar artist və ya Xalq artisti kimi titulları olub?”
“Ədəbiyyat və incəsənət” portalının bugünkü Çərşənbə söhbəti sevilən müğənni, Respublikanın Əməkdar artisti Firuzə İbadovayladır.
Qonaqla söhbəti rubrikanın daimi aparıcısı Aysel Kərim aparır.
-Salam, Firuzə xanım. Xoş gördük. Artıq yay tətili bitdi və hər kəs iş başındadır. İrəlidə nə kimi hədəfləriniz var?
-Salam Aysel xanım. Xoş günlərdə görüşək. İrəlidə bir neçə klassik bəstəkarlarımızın lirik mahnılarından ibarət bir toplu şəklində ifalarımı hazırlamaq istəyirəm. Yəni mənə elə gəlir ki, bu, gənc nəsil üçün arxiv kimi çox dəyərli olar. Ansambl şəklində yox, təkcə fortepiano müşayiəti ilə olan mahnılara müraciət etmək fikrindəyəm. Bundan başqa, nəvəmlə məşğul olacağam, çünki nəvəm 132 nömrəli məktəbin 7-ci sinifindən birbaşa İncəsənət gimnaziyasına daxil oldu. Qalan boş vaxtlarımı nəvəmə sərf edəcəyəm. İrəlidəki hədəflərim budur.
-Bu qədər incə ruhlu, həssas olmaq sizə dost qazandırırmı? Yoxsa insanlar bu xarakterinizdən daha çox süi-istifadə edir?
-Aysel xanım, demək olar ki, mənim xasiyyətim hal-hazırda necədirsə, dünyamı dəyişənə qədər də bu xasiyyətdə qalacağam. Amma, düzdür, ətrafımda məndən sui-istifadə edənlər çox olub. Əlbəttə ki, bu xasiyyətim sənət aləmində mənə çox maneçiliklər törədib. Çünki bu sənət bir az, bilirsiniz, necədir? İncəsənət, mədəniyyət sahəsində olan insanların əhatələri, çevrələri çox böyük olur. Amma bu çevrədən sən bir neçə yaxın dost, rəfiqə, bacı qazana bilərsən. Mən isə bilirsiniz ki, xaraktercə çox mülayim insanam. Yəni mülayim olduğumdan da çox hisslərimə bəzən hədsiz qapanıram. İstəyirəm elə özüm mehriban olduğum kimi, qarşı tərəfdən mehribanlıq göstərməyən insana da mehribançılığı öyrədim və ünsiyyətim belə qalsın. Yəni kiminsə qəlbinə dəymək mənim xasiyyətimdə deyil. Mən qəlbə dəyməyi sevmirəm. Çünki qəlbə dəymək Kəbə evindən daşı salmaq deməkdi. Yəni bəndə kimi bir-birimizi yola verməliyik. Amma bu xarakter sənətimdə mənə çox maneçiliklər törətdi. Hal-hazırda törədir də. Yəni mən bunu birmənalı deyirəm və sözümün də üstündə dayanıram ki, bu xasiyyətim sənətimə çox mane olub. Gərək bir balaca sərt olardım, amma nə edim ki, bu da mənim xasiyyətimdir. Mənim bir növ təbiətimdir. Mənim təbiətimdə ancaq yazdı, yaydı. Payız, qış yoxdu. Çünki onlar sərt fəsillərdi. Özüm sərt ayda - fevralda anadan olsam da amma xasiyyətim yaz-yaya bənzəyir. Təbiətimdə olan fəsli bax belə izah edərdim.
-Reallaşdıra bilmədiyiniz ideyalarınız olubmu? Yoxsa, geriyə dönüb baxanda gördüyünüz işləri yetərli hesab edirsiniz?
-Bilirsiniz, bir insan bir dəfə ömür sürər, amma məcazi anlamda desək, hətta bir neçə dəfə ömür sürsə belə yenə də reallaşdıra bilmədiyi nəyisə qalar. Heç olmasa real etmədiyi bircə şey üçün də mütləq heyfislənər. Mən də geriyə baxanda görürəm ki, istər Azərbaycanda, istər xarici ölkələrdə o qədər nailiyyətlərim, uğurlu çıxışlarım olubdur. Bilirsiniz, o vaxtlar məndə bir balaca tənbəllik olduğu üçün o hadisələrin bir çoxu mənim yalnız beynimə həkk olub, özümlə kameramanlar, fotoqraflar daşımamışam. Sənətində sübutlarının olmağı yaxşıdır ki, görünsün, sən nə etmisən. Nə yaxşı ki, hamısı Azərbaycan Dövlət Radiosunun qızıl fondunda qorunub saxlanılır. Nailiyyətlərim, bəli, yetərincə çox olub. Amma çox istərdim ki, o nailiyyətlərim indi də olsun. Bu problemlərlə, çətinliklərlə üzləşərək çalışdığım qədər nəsə edə bilirəmsə, bu da böyük şeydir, mənə elə gəlir, indiki dönəmdə bir mahnı da yazdırsan, böyük şücaətdir. Oxuduğun mahnını azı iki il sevə-sevə dinləyirlərsə, bu, mənim üçün artıq indiki zamanda böyük nailiyyət hesab olunur. Əlbəttə, yeni mahnılara - bayaq vurğuladım, yeni deyəndə ki, retro mahnılara müraciət edəcəyəm və bunları reallaşdıracağam, inşallah, ömrüm vəfa etsə.
-Sənətkar təbii ki, sönməyən günəşdir. Lakin özünüz sənət sarıdan ən parlaq dönəm olaraq ömrünüzün hansı çağını hesab edirsiniz?
-Mənim gözəl qızım, Ayselim. Sənətkar dediklərimiz dünyasını dəyişib. Bu sualı mənə verdiyiniz üçün mən sizə çox-çox təşəkkür edirəm. Çünki sənətkar deyilən anlam bizim dahilərimizə aid idi ki, onlar dünyadan köç etdilər. Onlar bizim müəllimlərimiz olub. Mən özümə sənətkar deməyə bir balaca utanaram. Çünki özümə peşəkar müğənni kimi baxıram. İfaçıların hamısı istəyər ki, ona sənətkar deyilsin. Amma təəssüf ki, indi bu ifadə hər sənətçiyə deyilir. Mən isə deyərdim ki, sənətkar sözünün altında yaşamaq, işləmək böyük məsuliyyətdir. Amma mənbəli sənətimin professionalıyam, musiqi savadım var. Musiqi tarixini, musiqi ədəbiyyatını, solfecionu bilirəm. Hələ də dərsliklərə müraciət edirəm. Oxuyuram, öyrənirəm. Yəni deyərdim ki, qızım, dünyamı dəyişəndən sonra sənətkar adını qazansam, nə xoş mənə. Ruhum da şad olar. Özümün sənətdə ən parlaq çağlarımı, parıldayan ulduz kimi gənclik illərimdə görürəm. Amma o parıltımı bu vaxta kimi saxlaya bilmişəmsə, sizin kimi dəyərli yazıçı, şair, jurnalistl əgər məndən müsahibə alırsa, deməli, mənim ulduzum hələ sönməyib. Hələ yanır, işıqlıdır. Mən sizə minnətdaram. Çalışacağam bu etimadı ömrümün sonuna qədər qoruyub, saxlayım.
-Bilirik ki, səbrli və anlayışlı insansınız. Bəs tale yazısıyla razılaşmayan və daxilən üsyan içində olan kəslərə nə kimi tövsiyyələr verə bilərsiniz?
-Mənim həyatımda nə qədər keşməkeşli illərim, aylarım, çağlarım, günlərim olursa mən onların hamısını dəf edə bilirəm. Ümumiyyətlə, mən yerə yıxılarkən tez qalxmağı bacaran insanam. Bu da Allahdan gələn bir istedaddır. O kəslərə deyərdim ki, üsyan etməyin. Çünki bizi yaradan Allah o üsyanı sevmir. Biz bu qədər işlər içərisində nələr ediriksə Allah təala buna dözür. Bizə qarşı üsyanı hələ etmir. Gəlin biz də üsyankar olmayaq. Mən xüsusən gənclərə tövsiyyə edirəm ki, üsyankar olmayın. Bir-birinizin qəlbinə dəyməyin. Bir-birinizi təhqir etməyin, çünki bu çox dözülməz, pis hərəkətdir, əlamətdir. Yəni bunlardan uzaq olsanız daha yaxşı olar və mənim yaşıma gələndə siz də təravətli görünərsiniz. Mən üsyankar insanlarla dostluq edə bilmərəm və ordan tez ayrılaram. Çünki mən heç vaxt üsyankar olmadım. Yəqin ki, ola da bilmərəm. Bu da mənim obrazımdı, təbiətimdir, yaranışdan bu günə olan xasiyyətimdir.
-Heç səhnədən yorulub başqa sənəti və yaxud sadəcə evdar bir xanım olmağı arzuladığınız vaxtlar olubmu? Yoxsa səhnə sizin olmazsa olmazınızdır?
-Səhnə mənim bütün həyatımdı. Səhnə mənim ruhumdu, nəfəsimdi. Mən səhnədə özümü 20 yaşında hiss edirəm. Bilirsiniz, Şövkət xanım sinifdə dərs keçərkən tələbələrinə bir muğam parçasını, yaxud bir şeiriyyəti başa salanda deyirdi: “Mən ifa edəndə, elə bilirəm ki, yaşıllıq bağ-baxçadı, güllər-çiçəklər açıb. Bülbüllər də ötür, onları sevərək qoxlayır. Mən elə bilirəm, mənim 18, 19, ya da 20 yaşım var”. Zaman keçdikcə başa düşürəm ki, bu dahi sənətkar çox düzgün vurğulayıb. Mən o hissləri indi yaşayıram. Ruhən elə bilirəm ki, elə mənim 20 yaşım var. Bir sözlə, sənətimdən çox böyük zövq alıram. Yenə də həyata gəlsəydim, yenə də səhnəni sevərdim, bu peşəni seçərdim. Çünki mənim ruhuma, boyuma biçilən bir sənətdir. Bu istedad hər kəsə verilmir. Mən səhnəni çox sevirəm. Evdə isə bütün xanımlar kimi mən də mətbəxi çox sevirəm. Yığışdırım, yuyum, bişirim. Övladımla, nəvəmlə çay süfrəsində, yemək arxasında zaman keçirim. Əgər sənətdə olmasaydım, yəqin ki, çox yaxşı evdar xanım olardım. Amma müğənnilik mənim ruhumdu. Bu mənim əynimə geyindiyim ən gözəl libasdı.
-Sənətə dair mükafatlandırılmaq, fəxri ad sizin üçün nə ifadə edir? Dəyərləndirilmək və dəyərləndirilməmək sizin üçün önəmlidirmi?
-Bilirsiniz, məndən heç kim inciməsin. Sovetlər dönəmində Xalq artisti, Əməkdar artist – bu kimi fəxri adların çox böyük önəmi vardı. Anadan olanda, yaxud bu sənətə gələndə mən fikirləşmədim ki, mütləq Xalq artisti olmalıyam. Yaxud mütləq Əməkdar artist olmalıyam. Yəni bu adın bir önəmi odur ki, xalq səni sevsin. Əgər xalqın səni sevirsə sən Əməkdar artist də olsan onlar səni Xalq artisti deyə elan edirlər. Yəni qızım, sizə qurban, kimə Aysel Kərim desən, bu ad yüksək dərəcədə aydın olacaq. Mən fəxr edirəm sizin adınızla. Bu, təvazökarlıqdan uzaqdı. Siz bilirsiniz ki, mənim xasiyyətimdə sevmədiyim insanları çox yüksəyə qaldırmaq yoxdu. Yəni onlara hörmətlə yanaşıram. Amma onlara tərif demirəm. Pis ifaçıya tərif desəm mənim üçün çox ayıb olar. Mən onun qəlbini üzmürəm. Deyirəm, yaxşı idi, təbrik edirəm, amma daha mükəmməl çalışmalısınız. Amma sənəti olan insana mən durub deyə bilmərəm, sən hələ çox oxumalısan, yaxud sən hələ öyrən. Təbii ki, bu, mən tərəfdən ayıb olar. Qızım, mən yenə deyirəm, mən sənətə gələndə çalışmadım ki, mənim böyük villalarım olsun, Xalq artisti olum, Şöhrət ordeni alım. Xeyr! Əsla! Heç vaxt! Bu lazımsız bir istəkdir. Elə Xalq artisti var ki, onu heç xalq tanımır, xalq tərəfindən də sevilmir. Amma elə sənətkarlarımız var, heç Əməkdar artist adı almadan dünyasını dəyişdi. Məgər Cabbar Qaryağdıoğlunun Əməkdar artist və ya Xalq artisti kimi titulu olub? Hansının olub ki? Heç birinin olmayıb. Mahrux Muradova Əməkdar artist olmadan dünyasını dəyişdi. Yəni fəxri titul almayan çox sənətkarlarımız var, həmçinin İldırım dayı var idi, gözəl xanəndə idi. Xalq artisti olsa da olmasa da yetər ki, sən xalq tərəfindən seviləsən. Qarşına məqsəd qoyasan ki, “mən neyləmişəm?” Baxın Firuzə İbadovanın gələn il 2022-ci ildə sənətdə 50 illik yubileyi olur. Firuzə İbadova 1972-ci ildən böyük səhnəyə gəlib. Uşaqlıq çağlarımı saymıram. Nələr edib bu illər ərzində? Hansı töhfələri olub? Hansı laureat adlarını qazanıb? Hansı diplomlar alıb? Lenin Komsomolu mükafatına neçənci ildə layiq görülüb? Hansı ki o elə Əməkdar artist adı kimi bir yüksəliş idi. Yəni üç-dörd gənc insanlar var idi ki, Lenin Komsomolu mükafatına layiq görülmüşdülər. Yəni bu, Sovetlər Birliyində sənin zəhmətinin bəhrəsi idi. O zamanlar Əməkdar artist və Xalq artisti adlarını almaq çox çətin idi. İnsanlar o qədər işləməli idi və onlar sənət göstərməli idilər. Baxın, qızım, yetər ki, məni xalq sevir. Mən onlar üçün Respublikanın Əməkdar artisti yox, elə Respublikanın Xalq artisti kimiyəm. Əməkdar artist adı almağım üçün də dövlət başçımıza, mədəniyyət nazirimizə çox-çox minnətdaram. Əlbəttə onların sayəsində zəhmətim qiymətləndirilib. Əgər mən buna layiqəmsə bu layiqimi də almışam. Amma insanlar tərəfindən Xalq artisti kimi qələmə verilirəm. Mən onlara öncədən təşəkkür edirəm.
-Sizin necə şirin nənə olduğunuzu, nəvənizi səhnədə necə həvəslə izlədiyinizi və ona mənəvi dəstək olduğunuzu öz gözlərimlə görüb şahid olmuşam. Nənə və nəvə anlayışı, nəvə və nənə arasındakı bağ nədir?
-Nənə və nəvə - bu çox gözəl səslənir. Bu həyatda insan nənə kimi obrazını doğrudan da layiqincə oynayanda bu çox gözəl olur. Mən nəvəmlə ruhən qidalanıram. Onun istedadına çox heyranam. Nəvəmin adı Hökümədir. Bu balaca insanda bilirsiniz, maşallah, nə böyük istedad var? Onun istedadı imtahan verdiyi İncəsənət Gimnaziyasında müəllimlər tərəfindən də çox heyranlıqla qarşılandı və mən “Oyuq” uşaq studiosunun rəhbəri Səidə xanımın çox böyük zəhmətini vurğulamaq istəyirəm. Höküməni çox sevir. Hökümənin orda çox gözəl yaratdığı obrazları var idi. Orada digər istedadlı balacalar da var. Mən orda musiqi rəhbəri kimi çalışıram. Hökümə orda püxtələşdi və istedadı onu İncəsənət Gimnaziyasına apardı. Elə bil ki, mən onunla ömrümün ikinci baharını yaşayıram. Bayaq vurğuladım ki, öz mahnılarımı ifa etdikdən sonra mütləq nəvəmin işləriylə məşğul olacağam. Oxumağına nəzər yetirəcəyəm. Həm savadı, həm yiyələndiyi peşəsi yerində olsun. Hökümə xanım həm mənim nəvəmdi, mən onun nənəsiyəm, həm də o mənim anamdı. Aramızdakı bağ çox böyükdü. Bir-birimizi sevirik. Hərdən bir-birimizdən küsə də, inciyə də bilirik. Hökümə məndən tez-tez küsür ki, sən məni həddindən artıq çox istəyirsən. Mən də ondan küsürəm ki, sən məni heç istəmirsən. Bu küskünlük o sevginin böyüklüyündən irəli gəlir. Sonradan ikimiz də bir-birimizə gülürük. Bir-birimizi qucaqlayıb öpürük. Bir-birimizdən üzr istəyirik. Bax sevgi bizim başımıza bəla açır. (gülümsəyir)
-Bəs ana kimi necə? Öz ananızdan gördüyünüz özəllikləri qızınıza tətbiq etdinizmi? Yoxsa siz ananızdan tam fərqli ana oldunuz?
-Mənim rəhmətlik anam çox mükəmməl ana idi. Onun bir neçə övladı var idi. Amma mənim bir övladım olduğu üçün əlbəttə mən anamdan bu sarıdan çox fərqliyəm. Mən anamdan o mükəmməlliyi götürdüm. Amma mənim yeganə övladım, yeganə nəvəm olduğu üçün anamdan təkuşaqlı ana və nənə olmağımla fərqlənirəm. Baxmayaraq ki, anamın bir neçə övladı var idi, anam deyirdi ki, mənim Firuzəm hamıdan seçilir. Ona görə də anam mənə bağlanmışdı. Ömrünün sonuna qədər də anam mənimlə qaldı. Əlbəttə anamdan gördüklərimi qızıma ötürmüşəm. Qızım çox dadlı yeməklər hazırlamaqda, övladına qarşı əsməyində, nigarançılığında, məhəbbətində anama bənzəyir. Yəni mən anamdan görüb ona ötürmüşəm. Bu mütləqdir.
- Ananız əbədiyyətə qovuşdu. Tanrı məkanını behişt etsin. Hər kəsin gedəcəyi yerə gedib. Onun yoxluğuyla danışırsınızmı? Yoxsa onu həyatınızda hələ də var kimi qəbul edirsiniz?
-Anamın həyatımızdan, evimizdən getməsi bütün övladları kimi bizdə də çox dərin yara hissi yaratdı. Mən bəzən anamı evdə hiss edirəm. Onun ətri gəlir. Onun iyini duyuruq. Onun çox qəribə bir hərəkətləri var idi. Bəzən elə kölgə kimi evdə tək olanda özümə qapanıram. İş görə-görə onun yatdığı yerə, oturduğu divana baxıram. Deyirəm ki, ana, sən məni görürsən? Bilirsən ki, mənim üçün necə çətindi? Mən hiss edirəm. Anamı hiss edirəm ki, anam evdədi və onunla danışıram, bölüşürəm ki, “Bax, ana, Hökümə gimnaziyaya daxil oldu. Ana, bax Hülya belə etdi, mən bunu etdim, onu etdim. Amma sənin üçün çox darıxırıq ana”. Məzarlığa gedəndə orda danışa bilmədiklərimi, deyə bilmədiklərimi evdə səssizlikdə danışıram. Çünki məzarlıqda insanda aramsız ağlamaq olur. Yəni bu bütün insanlarda, övladlarda təbii haldı. Evə gəlib onunla çoxlu-çoxlu danışıram. Röyalarımda görüşürəm. Yuxuya getməzdən əvvəl hiss edirəm ki, o bizimlədir. O, ruhən bizi görür, mən bunu hiss edirəm. Amma yoxluğuyla heç barışmıram. Çünki ananın yaşı olmaz. Bir telekanalda anamı göstərəndə mən özümdən ixtiyarsız çox ağlamışdım. İnsanların qarşısında ağlamağı sevmirəm. Göz yaşıyla ürəyimizin bulağı açılır. Ona heç bir qadağa yoxdu. Onu heç bir insan saxlaya bilməz. Bir balaca məni qınamışdılar ki, özü yaşlı qadındı, anası da çox yaşlıdı, gör necə də ağlayır. Ananın yaşı yoxdu. Bəxtiyar Vahabzadənin anası dünyasını dəyişəndə bizim dahi şairlərimiz gəlib soruşublar ki, “Bəxtiyar, ananızın neçə yaşı var idi?” O da hıçqıra-hıçqıra deyib ki, “ O, mənim anamdı”. Çox ağrılıdır. Çox acı bir ayrılıqdı. Dözülməz bir ayrılıqdı. Ana böyük bir qüvvədi, dağdı. Mənə dua edənim, ağlayanım, nigaran qalanım gedib. Onun dualarına həsrət qalmışam.
- Suallarımı cavablandırdığınız üçün çox minnətdaram. Yekun olaraq demək istədiyiniz könül sözləriniz varsa buyurun. Məmnunuq.
-Sonda mən sizə cansağlığı arzu edirəm. Mən istəyirəm ki, siz həyatda çox xoşbəxt olasınız. Çünki sizin şeirlərinizə nəzər salanda və bəstələrinizə qulaq asanda çox təsirlənirəm. Sizin həm poeziyanızı, həm musiqi ruhunuzu çox sevirəm, qızım. Siz bunu bilirsiniz. Hətta mən sizin barədə bu duyğularımı millət vəkili, Milli Məclisinin Mədəniyyət Komitəsinin sədri Qənirə Paşayevaya da demişdim ki, Aysel Kərimi mən çox sevirəm. Siz Qənirə xanımla yaradıcılıq yönündə əməkdaşlıq edirsiniz. Onun şeirlərinə musiqi yazırsınız. Mahnılarınızın hər biri çox sevilir. Zəngin yaradıcılığınızı mən özüm çox sevirəm. Əməkdar artist Mətanət İsgəndərlinin ifasında yer alan mahnılarınızı da çox bəyənmişdim. Zövqünüz, intelektual səviyyəniz çox yüksəkdi. Dönə-dönə dəfələrlə deməkdən doymuram ki, sizi çox, lap hədsiz çox sevirəm. Sizə təşəkkür edirəm qızım. Allah təala mənə tamaşaçılarımı, sizləri, sizi mənə, məni sizə çox görməsin. Məni heç vaxt unutmayın. Siz mənim dan ulduzlarımsınız. Sondakı könül sözüm bu qədərdir.
Beş gün davam edəcək 7-ci Bakı Beynəlxalq Kitab Sərgi-Yarmarkası çərçivəsində çoxsaylı görüşlər keçiriləcək
Oktyabrın 6-dan 10-dək Bakı Ekspo Mərkəzində 7-ci Bakı Beynəlxalq Kitab Sərgi-Yarmarkası keçiriləcək.
AzərTAC xəbər verir ki, sərgi-yarmarkanın məqsədi kitab və mütaliəni təbliğ edəcək və populyarlaşdırmaq, ziyarətçiləri həm Azərbaycan, həm də xarici nəşriyyatların çap məhsulları ilə tanış etmək, nəşriyyat işinə dəstək vermək, nəşriyyatları potensial əməkdaşlıq üçün kitab mağazaları ilə tanış etmək, eləcə də rəqəmsal dövrdə kitab biznesinin inkişafı ilə bağlı təcrübə və fikir mübadiləsini təmin etməkdir.
Kitab sərgi-yarmarkası dünya ədəbiyyatının görkəmli nümayəndəsi, Azərbaycanın dahi şair və mütəfəkkiri Nizami Gəncəvinin 880 illik yubileyinə həsr olunacaq.
Sərgidə nəşriyyatlar, mətbəələr, kitab mağazaları və mədəniyyət mərkəzləri nümayiş olunacaq. Sərgi-yarmasında Azərbaycan, Bolqarıstan, Gürcüstan, Fransa, İndoneziya, İran, Kolumbiya, Qazaxıstan, Qırğızıstan, Misir, Özbəkistan, Rusiya və Türkiyədən 200-ə yaxın nəşriyyat və poliqrafiya şirkətləri iştirak edəcək.
Sərgi şirkətlərin çap məhsullarını nümayiş etdirmək və satmaq, habelə yerli və xarici nəşriyyatlar, müəlliflər, eləcə də milli nəşriyyat və poliqrafiya şirkətləri ilə danışıqlar aparmaq və müqavilələr imzalamaq üçün unikal fürsətdir.
Sərginin keçiriləcəyi 5 gün ərzində iştirakçıları və ziyarətçiləri əlavə tədbirlərdən ibarət maraqlı proqramlar gözləyir. Məşhur azərbaycanlı və xarici yazarlar sərginin müxtəlif günlərində “günün qonaqları” olacaqlar: Çingiz Abdullayev, Elxan Elatlı, Elçin Əliyev, Nail Əlizadə, Gülseren Buğdayıcıoğlu, Togrul Mehti Niyazi və digərləri. Tarixçi Fuad Axundovun təqdimatında “Cənubi Qafqaz şəhərlərinin tarixi ənənələri” mühazirəsi baş tutacaq. Ercan Kesal (“Çukur” serialının baş qəhrəmanı İdris Koçovalı) ilə görüş saatı keçiriləcək.
Şairə Nigar Həsənzadənin təqdimatında “Söz” layihəsi çərçivəsində 44 günlük müharibədə iştirak edən şeir təqdimatları baş tutacaq.
Solmaz Amanova, Sayman Aruzu, Orxan Adıgözəl, professor Nəsiman Yaqublu, İradə Məlikova, Elçin Əzimli, kimi yazıçılar kitablarını təqdim edəcək, Azərbaycanın və Türkiyənin gənc şairləri ilə görüşlər keçiriləcək.
“Nizami Gəncəvi İli” çərçivəsində hər gün səhər saat 10:00-dan etibarən Bakı Ekspo Mərkəzinin foyesində müxtəlif tədbirlər keçiriləcək. Onların arasında Abdulla Şaiq adına Azərbaycan Dövlət Kukla Teatrı tərəfindən Nizami Gəncəvinin əsərləri üzərində qurulmuş kukla tamaşaları, Xalça Muzeyinin təqdimatı və s. Azərbaycanlı və türkiyəli yazıçılar Nizami Gəncəvinin və Yunus Əmrənin şeirlərini oxuyacaqlar.
Uşaqlar üçün bir sıra tədbirlər təşkil olunacaq. Sərgi-yarmarkası zamanı "Tık-Tık xanım", “Cırtdan” uşaq tamaşası, Uşaqlar və böyüklər üçün müxtəlif master- klaslar, ebru (su üzərində rəsm sənəti) və daha nələr nümayiş olunacaq. Yazıçı Solmaz Amanova milli Azərbaycan nağıllarının personajlarını təqdim edəcək və hər bir uşağa paltarını dəyişərək nağıl qəhrəmanı obrazında olmaq imkanı veriləcək. Yazıçı Mürşüd İsmayılzadə ilə intellektual oyunlar keçiriləcək.
Sərgi-yarmarka çərçivəsində N.Gəncəvinin əlilliyi olan uşaqlar üçün işarə dilinə tərcümə edilmiş "Yeddi gözəl" kitabının elektron versiyasının təqdimatı da gerçəkləşəcək.
Ziyarətçilər üçün sərgiyə “Koroğlu” metro stansiyasından hər yarım saatdan bir, “Elmlər Akademiyası” stansiyasının yanından isə hər saatdan bir avtobuslar hərəkət edəcəklər.
Sərgi-yarmarka Mədəniyyət Nazirliyinin təşkilatçılığı, “bp” şirkətinin sponsorluğu, “Caspian Event Organisers” (“CEO”) şirkətinin isə dəstəyi ilə açılacaq.
Sunay Akının “Yastığındakı çuxur”
Türkiyənin dəyərli şairi Sunay Akının seçmə şeirlərini gənc şair Fərid Hüseyn dilimizə uyğunlaşdıraraq "Yastığındakı çuxur" adı altında nəşr etdirib. 70-dən artıq şeir toplanan kitab 10 ildir ki, Fərid Hüseynin rəhbəri olduğu "Eşq" adlı kitab seriyasından çap olunub.
“İgidlərin sözü” layihəsindən: Orxan Səlifov, “Mən şəhid olmuşam, ölməmişəm ki...”
Xəbər verdiyimiz kimi, “Söz” ədəbi layihəsi və Mədəniyyət Nazirliyinin dəstəyi ilə tezliklə “İgidlərin sözü!!!” adlı antologiya işıq üzü görəcək. Bu gündən etibarən döyüşən əsgərlərimzin şerlərini öz ifalarında dinləyicilərə, “SÖZ” layihəsinin pərəstişkarlarına və geniş oxucu kütləsinə layihə təşkilatçıları YouTube platformasında və digər sosial medialarda təqdim etməyə başlayıb.
“İgidlərin SÖZÜ” kitabında toplanan şerlərin, esselərin içərisində həm də döyüşlər gedən anda yazılanları vardır. Xatırlatmaq istəyirik ki, “İgidlərin SÖZÜ” kitabının ideya müəllifi “SÖZ” ədəbi layihəsinin rəhbəri Nigar Həsənzadə, kitabın redaktoru isə Aida Eyvazlı Göytürkdür.
“İgidlərin sözü” kitabında aprel şəhidləri Nazim Şamaxılı, Mikayıl Vahabzadə, Mirsalam Cəfərov, II Qarabağ şəhidləri polkovnik-leytenant Elzamin Təhməzov, mayor Mehman Süleymanov, şəhid əsgərlər Şahgündüz Cabbarov, Murad Mayıl oğlu Nəbiyev, Vətən müharibəsi iştirakçıları Vüsal Hətəmov, Kərəm Aydın, Emin Piri, Sərxan Yolçuyev, Həsən Kür, Orxan Səlifov, Cavid Əli oğlu , Tofiq Əhməd, Eyvaz Əyyub, Araz Əfəndi, Səbuhi Qurbanov, Elvin İntiqamoğlu, Oğuz Alparslan, Nicat Ağayevin yaradıcılıqları yer alıb.
“Ədəbiyyat və incəsənət” portalı sizə layihəyə qatılmış gənc şair Orxan Səlifovun “Mən şəhid olmuşam, ölməmişəm ki...” şeirini təqdim edir. Şeir Ağdamın Çəmənli kəndində qələmə alınıb.
Mən bu gün şəhidəm, qan içindəyəm,
Ölüm başım üstə günahım kimi.
Yıxılıb, qalmışam səngər icində,
Sahibsiz, boş qalan silahım kimi..
Mən şəhid olmuşam, ölməmişəm ki,
Tanrı şərəf yazdı taleyimizə.
Şəhidlik ən uca zirvə sayılır,
Həmin o zirvədən baxacam sizə.
Siz də üzülməyin , mən üzülmürəm,
Axı öz arzuma çatıram bu gün.
Torpağın üstündə gəzəsiz deyə,
Torpağın altında yatıram bu gün.
Mən öldüm, nə qaldı məndən geriyə ?
Bir məzarım qalıb, hər yanı daşlı.
Tozlu cəkmələrim, qanlı paltarım,
Hə, bir də anamın gözləri yaşlı...
Ən möhtəşəm premyeralar Şuşada təqdim ediləcək
“Vətən müharibəsi Azərbaycan tarixinin qürur, şərəf və ləyaqət səhifəsidir. Xoşbəxt adamlarıq ki, bu tarixə şahidlik etmək bizə nəsib oldu. Azərbaycan xalqı 30 ilə yaxın idi ki, yurd-yuva həsrəti ilə yaşayırdı. Taleyinə köçkünlük düşən insanlar bu ağrı-acını yaşasalar da, heç vaxt inamlarını itirmədilər. İndi hamımız torpaqlarımızın azad olunmasının sevincini yaşayırıq. Bu sevinci bizə Ali Baş Komandanımız, Prezident İlham Əliyev yaşatdı”.
Bu sözləri AzərTAC-a müsahibəsində Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, Xalq artisti, professor Azər Paşa Nemətov deyib.
“Sentyabrın 27-də erməni təxribatçıları bizə qarşı növbəti çirkin niyyətlərini həyata keçirməyə çalışdılar. Ali Baş Komandanın iradəsi və göstərişi ilə ordumuz əks-həmlə hücumuna başladı. 44 gün davam edən müharibədə Azərbaycanın igid oğulları görünməmiş qəhrəmanlıq göstərdilər və illərdir düşmən tapdağı altında qalan yurd yerlərimiz öz azadlığına qovuşdu. Biz bu 44 gündə nə gördük? Əlbəttə, xalqın öz liderinin ətrafında necə qətiyyət və məhəbbətlə birləşməyini. Böyük ruh yüksəkliyi, şövq, sabaha olan tükənməyən inam. Məhz bu ali keyfiyyətlər bizi Qələbəyə apardı”, - deyə Xalq artisti bildirib.
Azər Paşa Nemətov deyib: “Bu gün Qarabağ azaddır. Birinci və ikinci Qarabağ müharibəsində qanı tökülən şəhidlərimizin ruhu şaddır. Onların qisası düşməndən alınıb. Onların qanı yerdə qalmayıb. Şuşada “Xarıbülbül” festivalı və Vaqif Poeziya Günləri, Üzeyir Hacıbəyliyə həsr olunmuş musiqi günləri böyük uğurla başa çatdı. Şuşa Azərbaycanın mədəniyyət paytaxtı elan olunub. Bundan sonra biz Şuşada hələ çox belə tədbirlər keçirəcəyik. İnşallah, Şuşada teatr tamaşaları oynayacağıq. Ən möhtəşəm premyeralarımızı Şuşada təqdim edəcəyik. Bu, bütün teatr xadimlərinin arzusudur”.
Bu gün Qarabağda quruculuq işləri aparıldığını söyləyən Azərbaycan Teatr Xadimləri İttifaqının sədri vurğulayıb ki, tezliklə Şuşa, Ağdam, Füzuli, Zəngilan, Qubadlı, Cəbrayıl və başqa rayonlarımız dünyanın ən gözəl şəhərlərinə çevriləcək: “Mən Vətən yolunda canından keçmiş bütün oğullarımızın unudulmaz xatirəsi qarşısında baş əyirəm. Qazilərimizə can sağlığı, şəhid ailələrinə səbir, dözüm və təmkin arzu edirəm. Azərbaycan xalqı bu oğulları heç zaman unutmayacaq”.
Teatrda “Oskar”ın analoqu sayılan Tony mükafatı “Mulen Ruj”a qismət oldu
İki illik fasilədən sonra Nyu-Yorkun teatr mərkəzi sayılan Brodveydə yenidən "Tony" mükafatının - teatr sahəsinin “Oskar”ı sayılan mükafatın təqdimetmə mərasimi keçirildi. Pandemiya ilə əlaqəli məhdudiyyətlər səbəbindən "Tony" nin 74-cü mərasimi bir neçə dəfə ertələnmiş, teatrsevərləri intizarda saxlamışdı. Baş mükafat "Mulen Ruj” müziklına (Moulin Rouge) təqdim edildi. Bu barədə “Ədəbiyyat və incəsənət” portalı TASS-a istinadən məlumat verir.
Bu dəfə teatr "Oskar"ının təqdimedilmə mərasimi - ilin əsas hadisəsi, çoxları onun virtual keçiriləcəyini zənn etsələr də, əyani şəkildə baş tutdu. Zalda iştirak edənlər qoruyucu maskalarda idilər. Mərasimin aparıcısının sözlərinə görə, hər bir qonaq vaksinasiyadan keçmişdi.
28 nominasiyadan baş mükafatdan savayı ayrı-ayrılıqda "Ən yaxşı tamaşa" və "Ən yaxşı remeyk" mükafatları fərqlənir, daha prestijli hesab olunur. Tamaşanın yenidən tərtibatına görə - Ən yaxşı remeyk mükafatını Amerika ordusunun sıralarında irqi problemlərdən bəhs edən "Soldier' s Play" (Əsgər pyesi) qazandı. Laureatlar təqdimat zamanı polisin ötən ilin mayında saxlamasından sonra həlak olmuş afroamerikalı Corc Floydun adını çəkdilər.
Ən yaxşı tamaşa "The Inheritance” (İrs) oldu.
Brodveydə bütün tamaşaların nümayişi pandemiyaya görə 12 Mart 2020-ci ildə dayandırılmışdı. O zamankı repertuarda 31 tamaşa və müzikl, o cümlədən səkkiz yeni şou var idi. Hələ səkkiz tamaşanın məşqləri gedirdi, onların premyeralarının ötən ilin baharında keçirilməsi nəzərdə tutulurdu. Ta ki builki sentyabrın 14-dək tamaşaçılar intizarda qaldılar, məhz bu tarixdən Brodvey teatrları yenidən tamaşaçıları qəbul etməyə başladılar. Və ayın sonlarına doğru da dərhal Tony mükafatları təqdim edildi.
