Super User
Eldar Əhədovun küləkdə eşidilən səs barədə nağıl kitabı Bostonda
ABŞ-da, Bostonun Prodigy Published nəşriyyatında Rusiyada yaşayan azərbaycanlı yazıçı, AYB-nin fəxri üzvü Eldar Əhədovun elektron versiyada “About the voice in the wind" (Küləkdə eşidilən səs barədə) nağıl kitabı işıq üzü görüb. İngilis dilinə kitabı beynəlxalq tərcümə bürosu "Corefeey”in əməkdaşı Lily Berkush çevirib. Kitabın ön sözünü Kembric professoru Riçard Baumgarten yazıb.
34-cü Tokio Beynəlxalq kinofestivalı Klin İstvudun "Kişi göz yaşları" filmi ilə açıldı
Hər il keçirilən və sayca 34-cü olan Tokio Beynəlxalq Kinofestivalı uikend günlərində Yaponiyanın paytaxtında açıldı. Öncə ulduzlar və qonaqlar ənənəvi qırmızı xalça üzərindən keçdilər, sonra isə rəsmi açılış mərasimi keçirildi. Hər iki tədbirin yayımı YouTube-dakı festival kanalı ilə nümayiş olundu. “Ədəbiyyat və incəsənət” portalı TASS agentliyinə istinadən bildirir ki, açılış törəninə Yaponiyanın Baş naziri Fumio Kisida da qatılmışdı.
"Biz bu il festivalı keçirə biləcəyimizdən çox narahat idik. Ancaq koronavirus ilə bağlı vəziyyət yaxşılaşıb və biz bu festivalı tamaşaçılarla birlikdə keçiririk. Bu il biz əsas meydançamızı dəyişdik və indi festivalı Hibiya və Yurakut rayonlarındakı kinoteatrlarda keçiririk ki bu rayonlar da tarixən kinematoqrafla bağlıdır. Ümid edirəm, yaxın on gün kinoşünaslar üçün bol emosiyalı, maraqlı və zəngin təəssüratlı olacaq", - deyə açılış mərasimində kinofestivalın sədri Hiroyasu Ando bildirib.
Yaponiyanın Baş naziri Fumio Kisida isə öz növbəsində tədbirin koronavirusa qarşı davam edən mübarizə dövründə keçirildiyini, festivalın özünün də həm adi formatı, həm də onlayn formatı özündə birləşdirdiyini vurğulayıb. Hökumət başçısı həmçinin Yapon filmlərinin və animelərinin nümayişlərinin xarici auditoriyaya yaxşı təsir göstərəcəyinə ümid etdiyini bildirib.
Festival proqramı
Şənbə axşamı gecə saatlarında "Kişi göz yaşları" (Cry Macho, 2021) böyük anşlaqla nümayiş olunub. Amerika rejissoru Klin İstvudun çəkdiyi bu filmdə əsas rolu da o özü oynayır. Noyabrın 8-də amerikalı rejissor və yazıçı Stiven Çboskinin çəkdiyi "Əziz Evan Hansen" (Dear Evan Hansen, 2021) müziklinin nümayişi ilə isə kinofestival bağlanacaq. Festivalda cəmi doqquz bölmə olacaq.
Hazırkı baxışdan əvvəl rəhbərlik proqram direktorunu dəyişib, Takesi Kitanonun filmləri də daxil olmaqla ən məşhur rejissorlarla işləyən prodüser Sedzo İtiyama bu vəzifəyə təyin olunub. Proqramın özündə əvvəllər olduğundan daha çox dünya premyerası təqdim olunur. Bu, əsasən Asiya filmlərinə aiddir. Tokioda kinoteatrlara gəliş üçün məhdudiyyətlər indi tamaşaçılar üçün işləmir, lakin dəvət olunmuş xarici qonaqlar və kino ulduzları festivalda iştirak etmirlər, çünki Yaponiya indi, demək olar ki, yeni giriş vizaları vermir.
Pandemiyanın əsas nominasiyasından imtina etmək qərarına gəlinmiş ötən ildən fərqli olaraq bu il müsabiqə proqramı bərpa olunub. Onun çərçivəsində 15 film nümayiş olunur. Biz azərbaycanlılar üçün sevindirici bir fakt. Əsas mükafata iddiaçılar arasında azərbaycanlı rejissor Hilal Baydarovun "Durna fənəri" (Crane Lantern, 2021) filminin də adı çəkilir. Film hüquq fakültəsinin tələbəsi olan bir qızdan və dörd qadının oğurlanması səbəbiylə həbsə alınan bir kişinin münasibətlərindən bəhs edir.
Həmçinin izləmənin əsas mükafatı üçün Qazaxıstandan olan rejissor Darejan Omirbayevin "Şair" (Poet, 2021) filmi yarışacaq. Film XIX əsrdə yaşamış və hakimiyyət tərəfindən edam edilmiş Didar adlı tanınmamış şairin həyat hekayəsini izah edir. Bundan başqa, əsas proqrama Çindən, Cənubi Koreyadan, Yaponiyadan, Albaniyadan, İrandan olan rejissorların əsərləri daxil edilib.
Ənənəvi olaraq, Tokio kinofestivalında müasir yapon filmləri və animelər, eləcə də klassik filmlər təqdim olunur. Bu il həmin klassik bölməyə bir neçə film daxil edilib, buraya yapon kult aktrisası Kinue Tanakanın rejissor ampluasında çıxış etdiyi, 50-ci, 60-cı illərdə şəkilmiş 3 film daxil edilmişdir. Bunlar "Hələ ay çıxmadı" (Tsuki vay noborinu, 1955), "Avara şahzadə" (Ruten no ohi, 1960) və "O-Gin-sama" (Ogin-sama, 1962) filmləridir.
Beləliklə, bütün diqqətlər Tokiodadır. Azərbaycan kinosu noyabrın 8-də - Zəfər günündə tarixində ən böyük zəfərə imza atıb Tokio kinofestivalının baş mükafatına sahib ola bilər.
Gəlin bunu hamılıqla arzulayaq və həyəcanla gözləyək.
“Səhnə” teatrının ilk premyerası olub
Azərbaycan dramaturgiyasının banisi Mirzə Fətəli Axundzadənin “Hekayəti-müsyö Jordan həkimi-nəbatat və dərviş Məstəli şah cadukuni-məşhur” əsərinin motivləri əsasında “Səhnə” teatrında hazırlanan “Bir dəfə Qarabağda” tamaşasının premyerası keçirilib.
AzərTAC xəbər verir ki, Dövlət Təhlükəsizliyi Xidmətinin Mədəniyyət Mərkəzində təqdim olunan tamaşa ilk dəfə olaraq etno-müzikl janrında hazırlanıb.
Premyerada teatr tənqidçiləri, teatr ictimaiyyəti və teatrsevərlər iştirak ediblər. Tamaşa tamaşaçılar tərəfindən böyük rəğbət, sevgi və alqışlarla qarşılanıb.
Tamaşanın rejissoru Elvin Mirzəyev, bəstəkarı Azər Hacıəsgərli, şeirlərin müəllifi isə Eminquey Akifdir. Tamaşada rolları Elçin Hacı, Əhliman Ərşadlı, Ramil Məmmədov, Mətanət Eres, Abdulla Elşadlı, İranə Kərimova, Ülvi Haşim və Ruhiyyə Yəhyayeva canlandırıblar. Tamaşadakı musiqiləri qədim milli musiqi alətlərindən ibarət olan “Əsrlərin sədası” ansamblı ifa etdi. Ansamblın bədii rəhbəri Məmmədəli Məmmədovdur.
Tamaşanın noyabr ayında yenidən nümayiş olunacağı gözlənilir.
Mədəniyyət nazirimiz Türkiyənin ən məşhur seriallarının çəkildiyi məkanda olub
Mədəniyyət naziri Anar Kərimov, Özbəkistanın mədəniyyət naziri Ozodbek Nazarbekov Türkiyənin məşhur ssenari müəllifi və film prodüsseri Mehmet Bozdağın müşaiyəti ilə "Diriliş Ərtoğrul", "Quruluş Osman", " Bozkır Arslanı Cəlallədin", "Dastan" kimi milyonlarla tamaşaçının sevərək izlədiyi ekran əsərlərinin çəkiliş meydançasını ziyarət ediblər.
Mədəniyyət Nazirliyinin məlumatına görə yaradıcı heyətlə görüşüb, çəkilişlərin gedişatı ilə yaxından tanış olan Anar Kərimovunun son illər türk seriallarında rol alan həmyerlimiz, məşhur idmançı Zabit Səmədovla da səmimi söhbəti baş tutub.
Maraqlı səfər çərçivəsində Mehmet Bozdağın yaradıcısı olduğu film şirkətinin mədəniyyət nazirliyi ilə kinematoqrafiya sahəsində gələcək əməkdaşlığı da müzakirə olunub.
Dərbənddə “Nizami Gəncəvi” tamaşasının premyerası olub
Rusiyaya aid Dərbənd şəhərində, Azərbaycan Dövlət Dram Teatrında “Nizami Gəncəvi” tamaşasının premyerası olub.
TASS agentliyi xəbər verir ki, böyük Azərbaycan şairi Nizami Gəncəvinin anadan olmasının 880 illiyinə həsr edilmiş tamaşanın müəllifi İftixar, quruluşçu rejissor Azərbaycanın Əməkdar artisti Sərvər Əliyevdir.
Dərbənddəki Azərbaycan Dövlət Dram Teatrının direktoru Firdovsi Əsgərov TASS agentliyinə müsahibəsində bildirib ki, aktyorların nümayiş etdirdiyi istedadlı oyun və gözəl dramaturgiya tamaşaçıların zövqünü oxşayıb. Tamaşaçılar bu əsərə xüsusi sevgi ilə baxıblar. F.Əsgərov deyib: “Burada, Dağıstanda, xüsusən Dərbənddə böyük şair Nizaminin yaradıcılığına xüsusi sevgi var. Axı Nizaminin xanımı məhz bizim doğma Dərbənddən olub. Onun əsərlərində Dərbəndin adı dəfələrlə çəkilir”.
Qənirə Paşayeva Azərbaycan Mədəniyyət Mərkəzində Özbəkistanın mədəniyyət xadimləri ilə görüş keçirib
Azərbaycan Milli Məclisinin Mədəniyyət komitəsinin sədri Qənirə Paşayeva Özbəkistandakı Heydər Əliyev adına Azərbaycan Mədəniyyət Mərkəzində bu ölkənin elm, mədəniyyət, incəsənət xadimləri, ali məktəblərin professor-müəllim heyəti və jurnalistlərlə görüşüb.
AzərTAC xəbər verir ki, tədbiri AMM-nin direktoru Samir Abbasov açaraq Qənirə Paşayevanın jurnalist və deputat kimi fəaliyyəti haqqında məlumat verib, bu günlərdə Qaraqalpaqstan Respublikasında və Xarəzm vilayətində yüksək səviyyədə Azərbaycan mədəniyyəti və ədəbiyyatı günlərinin keçirildiyini diqqətə çatdırıb. Azərbaycan mədəniyyəti və ədəbiyyatı günləri çərçivəsində səmərəli görüşlərin, konsert proqramlarının keçirildiyini, Qənirə Paşayevanın “Addım-addım Özbəkistan” kitabının təqdimatının baş tutduğunu vurğulayan S.Abbasov AMM-nin fəaliyyəti haqqında da söhbət açıb, indiyədək mərkəzin xətti ilə 90-a yaxın kitabın çap edildiyini bildirib.
Direktor böyük Azərbaycan şairi Nizami Gəncəvinin 880 illiyi ilə bağlı AMM-nin Daşkənddə özbək dilində çap etdirdiyi “Xəmsə”nin Daşkənddə təqdimatının keçirildiyini də diqqətə çatdırıb.
Qənirə Paşayeva Özbəkistanın müstəqilliyinin 30 illiyi münasibətilə özbək xalqını təbrik edib, Azərbaycanın iqtisadi inkişafı haqqında məlumat verib, ölkələrimiz arasında münasibətlərin yüksək səviyyəyə çatmasında, iqtisadi inkişafın dərinləşməsində dövlət başçılarımız İlham Əliyevlə Şavkat Mirziyoyevin böyük xidmətləri olduğunu diqqətə çatdırıb. Deputat xalqlarımızın dost, qardaş olduğunu vurğulayıb, şair və yazıçılarımızın dostluğundan söhbət açıb, Səməd Vurğunla Qafur Qulamın, digər şair və yazıçılarımızın dostluğunun bir örnək olduğunu söyləyib. Belə səfərlərin həm Özbəkistanda, həm də Azərbaycanda müntəzəm olaraq keçirilməsinin vacibliyindən danışıb. Komitə sədri vurğulayıb ki, bir il əvvəl sentyabrın 27-də başlayan Vətən müharibəsində Özbəkistan Azərbaycanın haqq işini müdafiə edib. Bunun üçün deputat Özbəkistan Prezidenti Şavkat Mirziyoyevə və özbək xalqına minnətdarlığını bildirib.
O, belə mədəni tədbirlərin həm Özbəkistanda, həm də Azərbaycanda reallaşmasının vacibliyini söyləyib.
Tarixçi alim Şuxrat Barlas 44 günlük müharibədə Azərbaycanı parlaq Qələbəsi münasibətilə xalqımızı təbrik edib, Azərbaycanın müharibə təcrübəsinin böyük dövlətlər tərəfindən öyrənildiyini bildirən tarixçi bu yaxınlarda Qarabağda və Şuşada olduğunu, işğaldan azad edilən ərazilərdə böyük quruculuq işlərinin aparıldığını vurğulayıb.
Şair Gülzira Şaripova, professor Niqina Şirmuxammedova, jurnalist Şərafəddin Tulaqanov, musiqiçi Firuza Abduraxmanova və başqaları 44 günlük müharibədə özbək xalqının Azərbaycanın haqq işini dəstəklədiyini bildiriblər. Onlar AMM-nin bu istiqamətdəki təbliğat işini də yüksək qiymətləndiriblər.
Sonra iştirakçılar Azərbaycan milli yeməklərinə qonaq edilib, “Özbegim yoşları” ansamblının üzvləri Azərbaycan və özbək mahnılarını ifa ediblər.
Müharibə iştirakçıları olan şairlər “İgidlərin sözü” layihəsində bir araya gələcəklər
Beynəlxalq Muğam Mərkəzi “Söz” ədəbi layihəsi çərçivəsində “İgidlərin sözü” adlı proqram təqdim edəcək.
“Ədəbiyyat və incəsənət” portalı xəbər verir ki, noyabrın 5-də reallaşacaq tədbirdə Vətən müharibəsi iştirakçıları, qazilər öz yaradıcılıq nümunələrindən şeirlər və esselər səsləndirəcəklər.
Layihə rəhbəri Nigar Həsənzadə bildirir ki, proqrama regionlardan olan qazilər və müharibə iştirakçıları da qatılacaq və bir çox bölgələrimizdən olan döyüşçü-şairlər qələmə aldıqları şeirlərini geniş kütləyə çatdırmaq imkanı qazanacaqlar. Bu şeirlər arasında birbaşa döyüşlər zamanı qələmə alınan nümunələr də yer alır. Müharibə iştirakçısı olmuş şairlərin qələmə aldıqları bədii nümunələrdə döyüş meydanında qəhrəmanlıq göstərərək şəhidliyə ucalan, qazi olan Vətən oğullarının ürək döyüntüləri, qəlb çırpıntıları var.
Tədbirdə Qarabağ müharibəsi zamanı lentə alınan videogörüntülər nümayiş olunacaq və hər kəs bu od-alov içindən çıxan igidlərin müharibədə, cəbhədə keçirdikləri hisslərlə tanış olacaq.
Qeyd edək ki, Vətən uğrunda canından, qanından keçən Vətən oğullarının bütün dünyaya səs salan bu Zəfərini yaşatmaq üçün gözəl təşəbbüslərdən olan “İgidlərin sözü” proqramı Vətəni azad edən igidlərimizi həm də yaradıcılıq rakursundan tanıdacaq.
Bu gün yeni əhatə dairəsi axtarışı günüdür
Bu günə təsadüf edən əlamətdar hadisələri diqqətinizə çatdırırıq:
2 noyabr. Yeni əhatə dairəsi axtarışı günü
Dost və tanışlar səni qane etmirlər? Onda lütfən bu gün hər şeyə yenidən başla, dostları və tanışları dəyiş. Özünə yeni “kruq” tap. Əslində ilk baxışda bu çox çətin görünür. İllərlə fortmalaşan münasibətləri necə qırasan, başqasıyla təzədən necə münasibət qurasan? Azərbaycanda bir məsəl də var, hər şeyin təzəsi, dostun köhnəsi. Yəni, mental olaraq azərbaycanlılar bu cür gedişlərə hazır deyillər, bizdə ailəni, dost dairəsini dəyişmək istisna hallarda baş verir. Ona görə də 2 noyabrdakı bu təyinat necə olsa da bizə yad görünəcək.
2 noyabr. Jurnalistlərə qarşı işlənən cinayətlərin cəzasız qalmasının qarşısının alınması günü
Son on ildə 700-dən çox jurnalist cinayətin qurbanı olmuşdur. YUNESKO-nun Baş direktorunun məruzəsinə görə, 2006-2013-cü illərdə jurnalistlərə qarşı cinayətlərin cəmi 6 faizi (593 hal) təhqiqata cəlb edilmişdir. 171 iş üzrə (28 faiz) hələ də müxtəlif instansiyalarda təhqiqatlar dolaşıb qalmışdır, 384 cinayətin isə (68, 8 faiz) üstü sadəcə örtülmüşdür. Bu cür cəzasızlıq jurnalistlərə qarşı cinayətkarlıq hallarını daha geniş miqyasa çatdırmaqdadır. Yeri gəlmişkən, 2005-ci ilin martında güllələnən “Monitor” jurnalının baş redaktoru Elmar Hüseynovun qətli də bu qəbildəndir. 2013-cü ildə BMT Baş Assambleyası öz 68-ci sessiyasında 2 noyabrı Jurnalistlərə qarşı işlənən cinayətlərin cəzasız qalmasının qarşısının alınması günü elan edəndə bu cəzasızlığa tez bir zamanda son qoyulmasına inamını da bildirmişdi.
Bəs niyə məhz 2 noyabr? Çünki 2013-cü ilin 2 noyabrında iki fransız jurnalisti Malidə öldürülmüşdü, yerli hakimiyyət isə hadisəni ört-basdır etməyə çalışırdı.
2 noyabr. Musiqi xadimi Şəhla İbrahimovanın 60 illiyi
Tanıyaqmı bu musiqi xadimimizi? Şəhla İbrahim qızı İbrahimova 1961-ci il noyabr ayının 2-də Bakı şəhərində anadan olub. Bülbül adına orta ixtisas musiqi məktəbində, Üzeyir Hacıbəyov adına Azərbaycan Dövlət Konservatoriyasında, Bakı Musiqi Akademiyasının aspirantura şöbəsində təhsil alıb. O, 1983-cü ildən Üzeyir Hacıbəyov adına Azərbaycan Dövlət Filarmoniyasının simfonik orkestrində çalışır. 1997-ci ildən isə bu orkestrin baş konsertmeysteridir. 1997-ci ildən Bakı Musiqi Akademiyasının Kamera ansamblı və Simli alətlər kafedrasında işləyir. Hazırda Simli alətlər kafedrasının müdiri və professorudur. Şəhla İbrahimova Bakı Musiqi Akademiyasının Elmi Şurasının üzvüdür. O, “Orkestr repertuarı” adlı proqramın, “Skripka üçün orkestr çətinlikləri” adlı dərs vəsaitinin və bir sıra elmi-metodiki vəsaitlərin müəllifidir. Azərbaycan mədəniyyətinin inkişafındakı xidmətlərinə görə 2000-ci ildə Respublikanın “Əməkdar artisti”, 2005-ci ildə “Xalq artisti” fəxri adlarına, 2019-cu ildə Azərbaycan Respublikası Prezidentinin mükafatına layiq görülmüşdür. Təbrik edirik Şəhla xanımı!
2 noyabr. Koronasiya və ölülər günü
Bu gün şimal qonşumuz İmperator kəlməsini gen-bol işlədəcək. 1721-ci ildə Senat 1-ci Pyotra imperator titulu verib. 1884-cü ildə də imperator 2-ci Nikolay taxta çıxıb.
İrlandiyada Bernard Şounun – dramaturq, publisist, Nobel mükafatı laureatının anım günüdür, kişi 1950-ci ildə haqq dünyasına gedib.
Bu gün əfsanəvi Selassienin koronasiyası günüdür deyə həm Qvatemala, həm Honduras, həm Salvador – üç Mərkəzi Amerika ölkəsi, həm də Boliviya – Cənubi Amerika ölkəsi ölülər gününü qeyd edəcəklər. Şimali Amerika ölkəsi olan Meksikada isə bu gün İkinci ölülər günüdür, çünki birincisi noyabrın 1-nə təsadüf edirdi. Gözünə döndüyüm əsas Amerika ölkəsində - ABŞ-da isə ölü-filan söhbəti yoxdur, növbəti Milli mətbəx bayramıdır, içi marinə edilmiş tərəvəzlə doldurulmuş yumurta günüdür.
Varisin “Həftənin təqvimi” yazısından seçmələr
Beynəlxalq Türk Mədəniyyəti və İrsi Fondunda “Qarabağ” milli geyim kolleksiyası təqdim edilib (daha ətraflı)
Xəbər verdiyimiz kimi, Beynəlxalq Türk Mədəniyyəti və İrsi Fondunda tanınmış modelyer-dizayner Gülnarə Xəlilovanın hazırladığı “Qarabağ” milli geyim kolleksiyasının təqdimatı keçirilib.
Təqdimat barədə daha geniş icmalı oxucularımızın diqqətinə çatdırırıq. Mədəniyyət Nazirliyinin saytının yaydığı məlumata görə, tədbirdə rəsmilər, Azərbaycanda akkreditə olunmuş səfirlər, beynəlxalq təşkilatların rəhbər və nümayəndələri, tanınmış mədəniyyət və incəsənət xadimləri iştirak edib.
Beynəlxalq Türk Mədəniyyəti və İrsi Fondunun rəhbəri Günay Əfəndiyeva bildirib ki, Zəfər Günü ərəfəsində doğma Türkiyədə də bayram əhvali-ruhiyyəsi vardır. Bu gün Türkiyə Cümhuriyyət Bayramının 98-ci il dönümünü qeyd edir. Bu münasibətlə Günay Əfəndiyeva Türkiyənin Azərbaycandakı səfiri Cahit Bağcının simasında Türkiyə dövlətini və xalqını təbrik edib.
Kolleksiyada nümayiş etdirilən milli geyimlərin mədəniyyətimizdə xüsusi yeri olduğunu vurğulayan Günay Əfəndiyeva deyib: “Bu kolleksiya bir tarixdir, çünki özündə Qarabağın 12 tarixi şəhərini birləşdirir. Kolleksiyanın hər bir geyimi Qarabağın bir bölgəsini təcəssüm edir və sanki həmin bölgənin canlı obrazını yaradır. Təqdim olunan kolleksiya Azərbaycan xalqının yaddaşından silinməyən bir izdir, türk dünyasının ən qədim yazılı abidələrindən biri olan “Kitabi-Dədə-Qorqud” dastanından başlayaraq, yüzilliklər ərzində formalaşan milli adət-ənənələrin bərpası, mənəvi dəyərlərin yaşadılması, muğamların oxunması, qəzəllərin, rübailərin səslənməsidir”.
Qeyd edib ki, o zamanlar Ağabəyim ağa, Xurşidbanu Natəvan kimi Qarabağın ziyalı qadınları gözəl ornamentlərlə, naxışlarla, xüsusi elementlərlə bəzədilmiş, xalq yaradıcılığının bədii xüsusiyyətlərini özündə əks etdirən libaslardan istifadə etmişlər.
“Bu kolleksiya Qarabağın qayıdışına, bu unudulmaz hissləri bizə yaşadan Ali Baş Komandana, müzəffər Ordumuza, şəhid və qazilərimizə bir ithafdır”, - deyə Günay Əfəndiyeva vurğulayıb.
Mədəniyyət nazirinin müavini Sevda Məmmədəliyeva bildirib ki, kolleksiyanın tarixi bir gündə təqdim edilməsi rəmzi məna daşıyır. Qeyd edib ki, bir il bundan öncə Prezident İlham Əliyevin rəhbərliyi ilə rəşadətli Ordumuz uzun illər işğal altında qalan torpaqları azad edərək Qarabağın tarixində yeni bir səhifə açıb. İndi Şuşa və Qarabağın digər rayonlarında quruculuq işləri aparılır, genişmiqyaslı layihələr həyata keçirilir. Uzun illər düşmən vandalizminə məruz qalan ərazilərin bərpası ilə yanaşı mədəni tədbirlər də keçirilir.
Qarabağın zəngin mədəni irsində geyimlərin xüsusi yeri olduğunu deyən Sevda Məmmədəliyeva bildirib ki, geyimlər hər bir xalqın mədəniyyəti ilə sıx bağlıdır. Geyimlərdə xalqın adət-ənənələri, dünya görüşü, yaradıcılığı, milli təfəkkürü öz təsdiqini tapır. Azərbaycanda qədim libasları, kəlağayılar əlvan rənglərlə seçilib. Bu geyimlər Azərbaycan xalqının qiymətli xəzinəsi, əsrlərdən qalan sərvətidir. O, Gülnarə Xəlilovaya “Qarabağ” kolleksiyasını hazırladığı üçün təşəkkür edib və yaradıcılıq işində uğurlar arzulayıb.
Azərbaycan Milli Geyim Mərkəzinin rəhbəri, modelyer-dizayner, sənətşünaslıq üzrə fəlsəfə doktoru Gülnarə Xəlilova söyləyib: “Apardığımız müşahidələr onu deməyə əsas verir ki, Azərbaycanın milli geyimində Qarabağ libasları xüsusi yer tutur. Qarabağın geyim mədəniyyəti bizim milli-mənəvi və maddi dəyərlərimizin ayrılmaz tərkib hissəsidir”.
Bildirib ki, “Qarabağ” kolleksiyasının tarixi Zəfər Günü ərəfəsində təqdim edilməsində məqsəd Azərbaycanın, ümumilikdə bütün türk dünyasının ayrılmaz parçası olan Qarabağın çoxəsrlik geyim mədəniyyətini daha geniş auditoriyaya çatdırmaqdır.
Sonra “Qarabağ” geyim kolleksiyası nümayiş olunub.
Sumqayıtda kitabın zəfəri - Nərgiz Cabbarlı yazır
Azərbaycanda, nəhayət ki, kitaba yanaşmada yeni bir münasibətin, daha dəqiqi, münasibət dirçəlişinin şahidi olmaqdayıq. Son zamanlar ard-arda keçirilən (və rəqabəti ilə yadda qalan!) kitab satış-yarmarkalarının sırasına bu dəfə paytaxtda yox – Sumqayıtda baş tutan kitab sərgisi də əlavə edildi. Və ən əsası, bu, dövlət tərəfindən deyil, ictimai təşkilat – “Azərbaycan Nəşriyyatları” İctimai Birliyi tərəfindən təşkil edilmiş yarmarka idi. Deməli, artıq bir çox mənada bir addım irəli doğru hərəkət deməkdir.
Kitabla bağlı olsa da, iki gün davam edən təbirlərə imza günlərinin, rəsm və əl işləri satış-sərgisinin, şeir saatlarının da olduğu əsl Kitab Bayramı da deyə bilərəm. Və açığı, hiss edirəm ki, ilk dəfədir, bunu belə ürəklə “bayram “adlandıra bilirəm. Çünki sözün əsl mənasında, təşkil edilmiş bir yığnağın deyil, könüllü axının şahidi oldum. Halbuki bu məsələdə təşkilatçılığın, hətta lazım gəldikdə şagird, tələbə, müəllim qruplarının sərgilərə sistemli göndərilməsinin tərəfdarıyam. Bu da bir estetikadır, mədəniyyətdir, vərdişdir və onun da cəmiyyətdə əsasının qoyulması, inkişaf etdirilməsi lazımdır, mütləqdir!
Təşkilatçılar oxucu marağını çox dəqiq hesablanmış bir şəkildə yönləndirə, bundan kitab adına, sərgi adına yararlana bilmişdilər. Necə? Sərginin keçirildiyi hər iki gün səhərdan axşama olmasa da, bir neçə saat sərgidə oldum. Kitab satışı vardı. Bu başqa. Alıcı da vardı. Bu da başqa. Amma əsas olan bu deyildi. Əsas olan maraq idi (Cəmiyyətdə, gənclikdə, oxucuda, dinləyicidə nəyə maraq olduğunu müşahidə etmək özü çox qeyri-adi prosesdir!). Və bu maraq, nəhayət ki, açıq şəkildə görünməyə başlamışdı.
Təşkilatçıların bu marağı yönləndirməsinə gəlincə... Xalq yazıçısı Çingiz Abdullayevi sərginin lider yazıçısı oldu. Çünki istər onunla görüş, istərsə də imza mərasimi çox qələbəlik keçdi. Hətta o dərəcədə ki, içəridəki sıxlığın qarşısını almaq üçün Çingiz Abdullayevin imza mərasimi həyətdə davam etdirildi.
Amma tək o deyildi. Millət vəkili Qənirə Paşayeva, yazıçılar Varis, Elxan Elatlı aşıb-daşan oxucu sevgisinin, imza maraqlısının arasında qalmışdı. Sevinc Nuruqızının “Melisa”sı yenə də balaca oxucuların əllərində idi. Və ən maraqlısı, bu oxucular üçün Şəmil Sadiqin ideyası ilə döşənmiş xalçalar, mütəkəllərlə bəzədilmiş milli “oxu otağı”nda (bunu Hədəf liseyndə də görmüş, çox bəyənmişdim. Çünki uşaqların kitab oxusuna olan marağına başqa bir estetik zövq qatırdı) müəllifin öz kitabını oxuması oldu.
“Hədəf”in “zəka küpü” olan şagirdlərinin öz əl işlərini, eksperimentlərini nümayiş etdirməsi isə sərgiyə bir başqa ab-hava qatmışdı. Başqa imza günləri də oxuculardan yayınmırdı. Amma mənim xüsusi olaraq diqqətimi çəkən iki amili paylaşmaq istərdim.
Oxucuların şeir sevgisini. Bir də gənclərin təlimlərə qatılmaq, öyrənmək, biliklərə sahib olmaq istəyini. Məsələn, Orxan Şahbazın “Kitab bizim nəyimizə lazımdır” təlimində oxucu marağı, dinləmə mədəniyyəti, debat və fikir mübadiləsi bir başqa idi... Amma düşüncə etibarilə çox inkişaf etmiş, fikirlərini səlis şəkildə ifadə edən, orijinal düşüncə sahibi olan gənclərimizi dinləmək bir başqa təəssürat idi. Sadəcə, qürur duydum.
Oxucunun-dinləyicinin (elə özümün də) Səlim Babullaoğlunun iki mədəniyyətin (Şərq və Qərb), iki estetikanın qovuşağını, sintezini əks etdirən şeirlərini necə həssaslıqla, maraqla dinlədiyinin şahidi oldum. “Parlaq imzalar” nəşriyyatının təşkilatçılığı ilə Səlim Babullaoğlu və Əkbət Qoşalı ilə keçirilən şeir saatı bir çox bu yönlü tədbirlərdə olduğu kimi, hansısa suallarla, əlavə çıxışlarla zənginləşdirilmədən, sözün əsl mənasında, şeir saatı oldu. Və ən əsası, dinləyici özü şeiri dinləmək istəyirdi. Ürəklə, zövq alaraq.
Eyni ilə İntiqam Yaşarın, mid Nəccarinin, Fuad Cəfərlinin şeirlərini də maraqla dinləyənlər vardı.Təşkilatçılar kitab alanlara dostluq şarjları çəkdirməklə, şeir ifaları üçün canlı musiqi müşayiəti təşkil etməklə də maraqlı anlar bəxş etməyi bacardılar.
Yekun olaraq Daş Kitabə mukafatının uzun illər həyatını kitab təbliği və yayımına həsr etmiş Xan Rəsuloğluna verilməsi sərginin özünəxas bir akkordu oldu. 20 il əvvəl Altun Nəşriyyatı– Rafiq İsmayilov tərəfindən təsis edilmiş və son dəfə elə o zaman Tərlan Qorçuya təqdim edilmiş mükafat bu qədər fasilədən sonra kitabçılıqda fədakar xidmətlərinə görə təqdim edilərək öz layiqli ünvanını tapdı.
Təəssüf ki, sərgini başdan-sona izləmək nəsib olmadı. Amma bu saatlar belə ondan zövq almaq və sevinmək üçün yetərli idi. Sərgi bəlkə paytaxtda, mərkəzdə keçirilsə və ona bu qədər maraq göstərilsəydi, belə bir nəticəni bəyənsəm də, məni bu qədər həyəcanlandırmazdı. Paytaxtdan kənarda isə bu, həqiqətən, böyük uğurdur və onun göstəricisidir ki, hətta ən ucqar yerlərdə belə bu cür sərgilərin olması vacibdir.
Bir sözlə, Zəfər bayramına həsr edilən I Sumqayıt Kitab Sərgisi kitabın da zəfəri oldu. Və bu zəfərin sevincinə təşkilatçılarla, imza günü olanlarla birlikdə hamımız şərikik.
Fotolar AZpress.AZ video-foto informasiya agentliyinindir
