Super User
Türk Ədəbiyyatı Vakfı Özəl Ödüllərə sahib oldu
Türkiyənin ədəbi həyatında əhəmiyyətli rol oynayan Türk Ədəbiyyatı Vakfı 2021-ci il üçün Kültür ve Turizm Bakanlığının Özəl Ödüllərinin sahibi olub.
“Ədəbiyyat və incəsənət” portalı xəbər verir ki, Türkiyə Cumhuriyyətinin Cumhurbaşkanlığı Külliyesində düzənlənən törəndə ödülü Türk Ədəbiyyatı Vakfının başqanı, tanınmış şair Serhat Kabaklıya Cumhurbaşkanı Yardımcısı Fuat Oktay ile Kültür ve Turizm Bakanı M. Nuri Ersoy təqdim ediblər.
Onu da qeyd edək ki, Türk Ədəbiyyatı Vakfı Azərbaycan ədəbiyyatının Türkiyədə təbliğatı baxımından da əhəmiyyətli işlər görür. Ötən ilin avqustunda yazıçı Varisin İstanbulda TADEV yayınları tərəfindən erməni-türk münaqişəsinin tarixindən bəhs edən “Altun cip saatı” romanının işıq üzü görməsini xatırlatmaq yerinə düşər.
Bu gün Xalça Muzeyində yeni layihənin təqdimatı olacaq
Bu gün, Martın 29-da Azərbaycan Milli Xalça Muzeyində “Bir xalçanın sirri: muzey obyektlərinə yeni yanaşma” layihəsinin təqdimat mərasimi keçiriləcək.
AzərTAC xəbər verir ki, bu beynəlxalq nüfuza malik art-menecer və təcrübəli sənətşünas Cahangir Səlimxanovun “Mədəni üfüqlər” adlı müəllif proqramına daxil olan 6 layihədən biridir. Könül Rəfiyevanın kuratoru olduğu layihə innovativ təqdimat üsullarının sərgi məkanına tətbiqi nümunəsidir.
Burada muzey kolleksiyasının ən dəyərli eksponatlarından olan XVIII əsrə aid unikal Qarabağ xalçasının videoinstalyasiyası nümayiş etdiriləcək. Ziyarətçilər martın 29-da saat 10.00-dan 18.00-dək ekspozisiyada yerləşdirilən videoinstalyasiya ilə tanış ola biləcəklər.
Qrafik-dizayner Timur Əmirxanovun vizuallaşdırdığı videoinstalyasiya elektron musiqi prodüseri və tar ifaçısı İbrahim Babayevin “vİBrant” adlı yeni albomuna daxil olan “Muğam+” bəstəsi ilə müşaiyət edilir.
“Bir xalçanın sirri: muzey obyektlərinə yeni yanaşma” layihəsi Almaniya Xarici İşlər Nazirliyinin Mədəniyyət və Təhsil Təşkilatlarına Beynəlxalq Yardım Fondu (International Relief Fund2021), Höte İnstitutu və digər tərəfdaşların maliyyələşdirdiyi, mədəniyyət və incəsənət xadimləri üçün nəzərdə tutulan “Mədəni üfüqlər” adlı təhsil proqramı çərçivəsində həyata keçirilir.
Tolstoyun gündəlik tutmağa başlaması, Bethovenin səhnəyə ilk gəlişi
29 mart gününə hansı tarixi hadisələr düşür?
“Ədəbiyyat və incəsənət” portalı sizlərə günün ən əlamətdar hadisələrini təqdim edir.
1999-cu ilin 29 martını bu gün – Rusiyanın Ukraynaya qarşı apardığı işğalçı müharibə fonunda hamı təəssüflə xatırlamalıdır. Çünki həmin gün Rusiya prezidenti Boris Yeltsin Rusiyanın Təhlükəsizlik Şurasına heç kəsin tanımadığı Vladimir Putin adlı bir şəxsi sədr gətirdi, ilin sonunda da çox yorulduğunu bəyan edib onu öz yerinə prezident təyin elədi.
Sovet dönəmləri filmlərini xatırlayırsınızmı, onlardan biri – Vladimir Vısotskinin çəkildiyi “Görüş yerini dəyişmək olmaz” çox populyar idi. Odessa kinostudiyasının çəkdiyi həmin filmin premyerası 1979-cu ilin bu günündə baş tutmuşdu.
Sovet xalqından gizlədilən gerçəklikləri 1933-cü ildə uelsli jurnalist Qaret Jons üzə çıxararaq dünyaya bəyan etmişdi. O, ukrainlərə qarşı həyata keçirilən dəhşətli qolodomordan, insanların aclıqdan qırılmasından bəhs etmişdi.
1910-cu ilin bu günündə Marseldə tarixdə ilk dəfə səmaya hidroplan qaldırılıb, pilotu Albert Fabr olub.
Kolasevərlər, məlumunuz olsun ki, bu gün sevimli içkinizin 136 yaşı tamam olur. 1886-cı ilin bu günündə Atlantada Con Pemberton hazırkı Coca Cola-ya “müalicəvi içki” adı altında patent alıb.
1847-ci ilin bu günündən Lev Tolstoy gündəlik tutmağa başlayıb.
1795-ci ildə isə dahi alman bəstəkarı Lüdviq van Bethoven Vyanada ilk konsertini verib.
Bu gün Ümumdünya Fortepiano Günüdür
Bu gün, martın 29-da təqvimdə bir sıra bayramlara, əlamətdar hadisələrə rast gəlmək olar. Məsələn, bu gün Ümumdünya Fortepiano Günüdür. Musiqi xadimi Nils Framın təşəbbüsü ilə ilin 88-ci günündə bütün dünya bu sirli-sehirli, ecazkar çalğı alətinin gününü bayram edir. Niyə 88? Çünki fortepianonun məhz 88 dili var.
“Ədəbiyyat və incəsənət” potrtalı bildirir ki, Tüstü və güzgü bayramı adlı bayram da bu gün qeyd olunur. Əslində, günün sadə adı ilyuzionist, yəni gözbağlayıcı günüdür. Bu maraqlı sahədə çalışanların da öz peşə bayramları var imiş.
Bir dəfə bulvarda bir səhnəyə şahid olmuşuq. Bir gözbağlayıcı bir nəfərdən bir manatlıq alıb manatlığı ovcunda saxladıqdan sonra ona əvəzində iki dənə manatlıq qaytarmışdı. Xoşbəxt olan şəxs bu dəfə ona yüzlük vermişdi. Ovucdan iki yüzlüyün çıxacağını gözləyən biçarə ordan ümumən pul çıxmadığını görəndə gözbağlayıcının üzərinə yerimişdi. O da demişdi ki, bayaq alındı, indi alınmadı, neynəmək olar?
Necə deyərlər, artıq tamah baş yarar.
Niaqara şəlaləsi quruyan gün – təsəvvür edin ki, bu günün belə bir qeydolunma təyinatı var.
Aətən saniyədə 3160 tonn su keçən Niaqara şəlaləsi 1848-ci ilin 29 martında buzlaqlar səbəbindən qurumuş, şəlalə funksiyasını itirmişdi. İnsanlar dəhşətə gəlmiş, bunu Allahdan gələn bəla hesab etmişdilər. Sonrakı günlər su tədricən axmağa başlamışdısa da insanların suyun yenidən quruya biləcəyi qorxu-hürküsü bitməmişdi. O vaxtdan da bu gün, bir növ, “faciə qaşla göz arasındadır” anlamında qeyd edilməkdədir.
O kı qaldı ayrı-ayrı ölkələrdə qeyd olunan bayramlara, məsələn, dünyanın lider dövləti ABŞ-da bu gün 3 bayram bir-birinə qarışacaq. Vyetnam müharibəsi veteranları günü. Kiçik biznes sahiblərinin bayramı. Və təbii ki, bir də qida bayramı – milli şifon biskviti günü.
Tanınmış mədəniyyət xadimi Gəray Əlibəyovun doğum günüdür
Bu gün tanınmış aktyor, Azərbaycan Respublikası Mədəniyyət Nazirliyi yanında İctimai Şuranın sədri Gəray Əlibəyovun doğum günüdür.
“Ədəbiyyat və incəsənət” portalı xəbər verir ki, Gəray Ayaz oğlu Əlibəyov 1955-ci ildə Füzulu rayonunun Dədəli kəndində dünyaya göz açıb. Səkkizilliyi həmin kənddə, orta məktəbi Füzuli rayonu B.Sərdarov adına məktəbdə bitirib. 1973-1977-ci illərdə M.A.Əliyev adına Azərbaycan Dövlət İncəsənət İnstutunda təhsil alaraq Gəray Əlibəyov bütün həyatını teatra və kinoya həsr edib. O, Sumqayıt Dövlət Teatrında aktyor, şəhərin “Veteran” klubunda direktor, Bakıdakı “Araz” kinoteatrında direktor müavini və direktor, "Sinema" kiçik dövlət müəssisəsində direktor, Mədəni İnkişaf Mərkəzi İctimai Birliyinin sədri, ULUS FİLM prodüsser mərkəzinin direktoru vəzifələrində çalışıb.
Gəray Əlibəyov “Tütək səsi”, “Sevinc buxtası”, “Gözlə məni” və “Qanlı zəmi” kimi populyar filmlərdə yaddaqalan obrazlar yaratmışdır.
O, Azərbaycan kinematoqrafiyasının nailiyyətlərindən hesab olunan "Cavad xan” filminin təbliğatına və yayımına rəhbərlik edərək Moskva, Tehran, Budapeşt, Varşava, Kiyev və Nyu-York şəhərlərində təqdimatının keçirilməsinə nail olmuşdur.
2005 -ci il tarixdən 565 №-li Şəhadətnamə ilə Azərbaycan Respublikası Əsilzadələr Məclisinin üzvüdür.
2021-ci il iyul ayından Azərbaycan Respublikası Mədəniyyət Nazirliyi yanında İctimai Şuraya sədrlik edən Gəray Əlibəyov ölkənin mədəni həyatında canlanma yaratmağa nail olaraq bir çox layihələrin həyata keçməsini təmin etmişdir. Bakıda keçirilən xalq teatrlarının festivalı, Sumqayıtda keçirilən Mədəniyyət forumu və digərləri dediyimizə əyani sübutdur.
Gəray Əlibəyovu doğum günü münasibəti ilə səmimi qəlbdən təbrik edir, ona mədəniyyətimizin çiçəklənməsi yolunda yeni-yeni uğurlu layihələrə imza atmağı arzulayırıq.
O ki qaldı, bu gün dünyaya gələn digər tanınmış incəsənət xadimlərinə, meyxanasevərlər bu gün Elşən Xəzəri təbrik etməyə tələsəcəklər, istedadlı meyxanaçı ömrünün 49-cu baharına qədəm qoyacaq.
1936-cı ilin 29 martında tanınmış rus-sovet kinorejissoru Stanislav Qovoruxin, 1873-cü ilin 29 martında isə Güney Azərbaycan ədəbiyyatının tanınmış nümayəndəsi, satirik şair Mirzə Əli Möcüz dünyaya gəliblər.
Çalındı suri-israfil və bidar oldu hər millət,
Ayılmır xabi-qəflətdən hələ bu bixəbər millət.
Yüz il öncə Mirzə Əli Möcüzün söylədikləri görün necə indimizdə də aktuallığını qoruyub saxlayır.
Daşkənddə “Xalqların adət-ənənələri və mətbəxi” festivalında ölkəmiz də təmsil olunub
Daşkənddəki Beynəlxalq Britaniya məktəbində “Xalqların adət- ənənələri və mətbəxi” festivalı keçirilib.
AzərTAC xəbər verir ki, tədbirdə Amerika Birləşmiş Ştatları, Böyük Britaniya, Rusiya, İtaliya, İran, Misir, Səudiyyə Ərəbistanı, Cənubi Koreya, Hindistan, Pakistan, Qazaxıstan, Qırğızıstan, İndoneziya, Tacikistan, Ukrayna və digər ölkələrin Özbəkistandakı səfirlikləri və mədəniyyət mərkəzləri iştirak ediblər.
Ölkəmiz bu tədbirdə Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzi tərəfindən təmsil olunub.
Azərbaycan üçün ayrılmış guşədə ölkəmizin bayrağı, Azərbaycan tarixi, ulu öndər Heydər Əliyevin həyat və fəaliyyəti, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, “Qarabağ həqiqətləri” seriyasından Heydər Əliyev Fondu tərəfindən rus və ingilis dillərində çap edilən nəşrlər, Azərbaycanın tarixi və mədəniyyəti ilə bağlı Mədəniyyət Mərkəzinin Daşkənddə özbək dilində çap etdirdiyi kitablar nümayiş etdirilib.
2022-ci ilin “Şuşa İli” elan olunması ilə əlaqədar Azərbaycanın Qarabağ bölgəsinin beşiyi olan Şuşanın tarixi, mədəniyyəti və şəhərdə yaşayıb-yaratmış görkəmli şəxsiyyətlər haqqında məlumatlar yer alıb. Tədbirdə Qarabağ bölgəsinin milli kişi və qadın geyimləri də təqdim olunub. AMM-nin naxıştikmə və rəsm dərnəyi üzvlərinin hazırladıqları əl işləri və suvenirlər də maraqla qarşılanıb. Həmçinin Azərbaycanın müxtəlif bölgələrindən xalçalar və xalq musiqi alətləri nümayiş etdirilib.
Novruz bayramı münasibətilə şagirdlər və tədbirin qonaqları üçün Azərbaycan guşəsində yumurtanın müxtəlif rəng və naxışlarda bəzənməsi üzrə usta dərsləri təşkil olunub.
Azərbaycan guşəsində plov, dolma, həmçinin şəkərbura, paxlava və digər şirniyyatlarımızın satışı həyata keçirilib. Milli mətbəximizə dair stendi Daşkənddəki “Yeməli” restoran təşkil edib. Bildirilib ki, satışdan əldə olunan vəsait uşaq evlərinin fonduna köçürüləcək.
Konsert proqramında Kövkəb Aliyeva adına “Azərbaycan qızları” rəqs ansamblının üzvləri milli rəqslərimizi ifa edib, iştirakçılar tərəfindən alqışlarla qarşılanıb.
Bolqarıstanın ədəbiyyat jurnalı Yusif Səmədoğlu və Ələkbər Salahzadə yaradıcılığından bəhs edib
Bolqarıstanın “Literaturen svyat” elektron ədəbiyyatı jurnalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində Azərbaycanın Xalq yazıçısı Yusif Səmədoğlunun “İncə dərəsində yaz çağı” hekayəsinin və tanınmış Azərbaycan şairi Ələkbər Salahzadənin “Elegiya” şeirinin yayımına başlayıb.
Tərcümə Mərkəzindən bildirilib ki, əsərlərin bolqar dilinə tərcümə müəllifləri – tanınmış bolqar tərcüməçiləri Nadya Popova və İvan Esenskidir.
Mədəniyyət Nazirliyinin təşkilatçılığı ilə xeyriyyə konserti keçiriləcək
Azərbaycan Respublikası Mədəniyyət Nazirliyinin təşkilatçılığı, Azərbaycan Dövlət Akademik Filarmoniyası və Heydər Əliyev Sarayının dəstəyi ilə 9 may 2022-ci il tarixində Heydər Əliyev Sarayında Azərbaycan Dövlət Rəqs Ansamblının xeyriyyə konserti keçiriləcək.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, konsertdən əldə olunacaq gəlir şəhid ailələri və müharibə əlillərinin təminatı üçün "YAŞAT" Fonduna ianə ediləcək.
Biletlərin onlayn sifarişi üçün bu saytda daxil olmaq lazımdır:
https://iticket.az/events/concerts/my-azerbaijan-nw
Sənət şöhrəti Şuşadan bütün dünyaya yayılan dahi - Üzeyir Hacıbəyli
“Şuşa İli” münasibətilə Mədəniyyət Nazirliyi tərəfindən həyata keçirilən “Şuşa mədəniyyətinin inciləri” layihəsinin “Şuşanın simaları” bölməsi üzrə növbəti təqdimatı müsəlman Şərqində ilk operanın banisi, dünya şöhrətli bəstəkar, görkəmli musiqişünas alim, yazıçı, publisist, ictimai xadim, Azərbaycanın və SSRİ-nin Xalq artisti, akademik, ən məşhur şuşalı Üzeyir Hacıbəyliyə (1885-1948) həsr olunub.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, təqdimatda Azərbaycanın mədəniyyət tarixində misilsiz xidmətləri olan Üzeyir bəyin ana yurdu musiqi-sənət beşiyi Şuşa şəhərinin olması, dahi musiqiçinin uşaqlığının qədim Qarabağımızın tacı olan Şuşada keçməsi aparıcı xətt təşkil edir. Üzeyir dühasının qaynaqları da qarlı zirvələrin, dibi görünməz uçurumların, dərin dərələrin dövrələdiyi, sərin səhər nəsimlərinin oxşayıb tumarladığı, bulaqları bal dadan Şuşadır!
Üzeyir bəyin atası Əbdülhüseyn Molla Məhəmməd oğlu Hacıbəyov öz dövrünün savadlı, ziyalı şəxslərindən idi. O, XIX əsrin tanınmış dövlət xadimi və şairə, Qarabağ xanlarının varisi Xurşidbanu Natəvanın mirzəsi olmuşdu. Üzeyir bəyin anası Şirinbəyim xanım isə Qarabağda məşhur Əliverdibəyovlar nəslindən idi. Bəstəkarın dayısı Ağalar bəy Əliverdibəyov xalq musiqisinin gözəl bilicisi və Üzeyir bəyin ilk musiqi müəllimi olub. Üzeyir Hacıbəylinin, eləcə də onun qardaşlarının musiqi istedadı Azərbaycanın ən qədim və gözəl guşələrindən olan Qarabağın, Şuşa şəhərinin zəngin musiqili mühitində formalaşıb.
Üzeyir Hacıbəyli ibtidai təhsilini Şuşada, Nikolayevski adına rus-tatar məktəbində alıb. 1899-cu ildə bu məktəbi bitirdikdən sonra Zaqafqaziya (Qori) Müəllimlər Seminariyasına daxil olub. 1904-cü ildə seminariyanı bitirib Şuşa yaxınlığındakı Hadrut kənd məktəbinə müəllim kimi əmək fəaliyyətinə başlamışdı.
Üzeyir Hacıbəyli bütün ömrünü, bilik və bacarığını müasir mədəniyyətin, musiqi elmi və musiqi sənətinin inkişafına sərf edib. O, müxtəlif təhsil sistemli musiqi məktəblərinin açılması, Azərbaycan Dövlət Konservatoriyasının təşkil olunması, dünya musiqi mədəniyyəti səviyyəli kadrların yetişdirilməsi, Azərbaycan musiqi tarixi və musiqi nəzəriyyəsinin yaradılması sahəsində xüsusi xidmətlər göstərib. Bununla yanaşı, bir-birinin ardınca musiqi təhsili və metodikasına aid dərslik və dərs vəsaitləri çap etdirir, yeni-yeni musiqili səhnə əsərləri yazıb.
Üzeyir bəy 1908-ci ildə yazdığı “Leyli və Məcnun” operası ilə təkcə Azərbaycanda deyil, bütün müsəlman Şərqində opera sənətinin əsası qoyub. Bəstəkarın 1910-cu ildə ərsəyə gətirdiyi “Ər və arvad” əsəri isə ölkəmizdə operetta janrının ilk nümunəsidir. Sənətkar daha sonra “O olmasın, bu olsun”, “Arşın mal alan” kimi operettalarını, “Əsli və Kərəm”, “Koroğlu” operalarını yaradıb. Üzeyir bəy eyni zamanda Azərbaycanın Dövlət Himninin, unudulmaz romans (“Sənsiz”, “Sevgili canan”) və mahnıların müəllifidir.
Üzeyir Hacıbəyli Azərbaycan klassik musiqisinin yaradıcısı olmaqla yanaşı, musiqişünas, onun əsaslarını və prinsiplərini dərindən bilən və tədris edən görkəmli alim-pedaqoq idi. "Azərbaycan xalq musiqisinin əsasları" fundamental kitabı, habelə "Azərbaycan xalq mahnılarının adlarını öyrənmək üçün təlim", "Çahargah" mövzusunda "Birinci fantaziya", "Şur" üzərində "İkinci fantaziya" və s. əsərləri ona böyük şöhrət qazandırıb.
Heydər Əliyev dahi bəstəkarın yaradıcılığını, xalqımız qarşısındakı xidmətlərini yüksək qiymətləndirərək deyib: "Üzeyir Hacıbəyov fövqəladə fitri istedadı, böyük fədakarlığı, mükəmməl təhsili, elmi, vətənpərvərliyi, ictimai-siyasi fəaliyyəti ilə xalqımızın böyük şəxsiyyətlərindən biri olmuş, dünya korifeylərinin ön sırasında duran, Azərbaycanı təmsil edən görkəmli şəxsiyyət olmuşdur". Məhz Prezident Heydər Əliyevin 1995-ci ildə – bəstəkarın 110 illik yubileyi münasibətilə imzaladığı fərmanla hər il sentyabrın 18-i ölkəmizdə Milli Musiqi Günü (Üzeyir Musiqi Günü) kimi qeyd olunur.
1985-ci ildə Üzeyir Hacıbəylinin 100 illik yubileyi münasibətilə Şuşada bəstəkarın heykəli ucaldılmışdı. Heykəltəraş Əhməd Salikov tərəfindən hazırlanan abidə, həmçinin dahi musiqiçinin şəhərdəki ev-muzeyi 1992-ci ildə, Birinci Qarabağ müharibəsində ermənilər tərəfindən Şuşa işğal edildikdən sonra vandalizmə məruz qalaraq tamamilə dağıdılıb.
2020-ci ilin 44 günlük Vətən müharibəsində Qarabağımız və onun tacı Şuşa işğaldan azad edildikdən sonra Üzeyir bəyin doğma yurduna mədəniyyətimizin də qayıdışı başlanıb. Prezident İlham Əliyevin tapşırığına uyğun olaraq, bəstəkarın yeni heykəli hazırlanıb və dövlət başçısının iştirakı ilə 2021-ci ilin 29 avqustunda Şuşa şəhərində abidənin açılışı keçirilib.
2021-ci il sentyabrın 18-də uzun illərdən sonra ilk dəfə Milli Musiqi Günü çərçivəsində Şuşada görkəmli bəstəkara həsr olunmuş Üzeyir Hacıbəyli XIII Beynəlxalq Musiqi Festivalının konserti gerçəkləşdi. Şuşa bəstəkar övladının ölməz musiqiləri üçün çox darıxmışdı. Nəhayət, o gün də gəlib çatdı, azad Şuşada Azərbaycan professional musiqisinin banisinin əsərləri yenidən səsləndirildi. Şuşanın dağlarından Üzeyir musiqisinin sədaları hər tərəfə yayıldı.
Dahi bəstəkar Üzeyir Hacıbəyli bənzərsiz yaradıcılığı ilə adını Azərbaycanın musiqi mədəniyyəti tarixinə əbədi yazdıran böyük sənətkardır. Onun yaratdığı bəstəkarlıq məktəbi gələcəkdə də yeni musiqiçi nəsillərin yetişməsinə öz töhfəsini verəcək.
Ən çox oxunan xəbər rus rəssam Yevgeniya İsayevanın Duma qarşısındakı şücaətidir
Günün ən çox oxunan xəbəri kişilərə əsl örnək göstərən rus qadın rəssamın özünəməxsus etiraz aksiyası olub ki, həmin xəbəri “Ədəbiyyat və incəsənət” portalı Euronews-a istinadən dərc edir.
"Qırmızı rənglə boyanmış" ağ don geyinən Rəssam Yevgeniya İsayeva Sankt-Peterburq Şəhər Dumasının pilləkənlərinə qalxıb "ürək qan tökür", - deyə təkrarlayıb. Pilləkənlərin üzərinə isə bu sözlər yazılmış kətan döşəyib:
"Mən hiss edirəm ki, ağıla çağırmaq faydasızdır. Ona görə də sizin qəlbinizə müraciət edirəm. Hər gün Ukraynada qadınlar, uşaqlar, qocalar ölür. Bombardmanlardan, aclıqdan, dağıntılardan çıxmaq, ərzaq və dərman tapmaq mümkün deyil. Əldəqayırma xaçlar taxılmış qəbirlər həyətlərdə və uşaq meydançalarında qaralır. Minlərlə yaralı və şikəst, milyonlarla qırılmış talelər. Mərhəmət və şəfqət üçün güc tapın, qan tökülməsini dəstəkləməyin!"
Rəssam polis tərəfindən saxlanılıb.
Amma Putin rejiminə qarşı bu etiraz milyonlarla narazı insanı cəsarətləndirə bilər.
