Super User
Qoşulmama Hərəkatının UNESCO yanındakı qrupunun növbəti iclası keçirilib
UNESCO-nun mənzil-qərargahında Azərbaycanın sədrlik etdiyi Qoşulmama Hərəkatının UNESCO yanındakı qrupunun 2022-ci ildə üçüncü iclası keçirilib.
“Ədəbiyyat və incəsənət” AzərTAC-a istinadən xəbər verir ki, Azərbaycanın UNESCO yanında daimi nümayəndəsi Elman Abdullayevin sədrlik etdiyi iclasda Qoşulmama Hərəkatına UNESCO yanında üzv ölkələrin səfirləri, daimi nümayəndələri iştirak ediblər.
İclasın gündəliyi qəbul olunduqdan sonra daimi nümayəndə Elman Abdullayev QH ölkələrinin UNESCO-ya yeni təyin olunmuş səfirlərini salamlayaraq, onlara işlərində uğurlar arzulayıb.
Daha sonra cari ilin iyun ayında keçirilmiş iclasdan sonra Azərbaycanın Qoşulmama Hərəkatına sədrliyi çərçivəsində həyata keçirdiyi işlərdən danışılıb.
QH ölkələrinin səsinin UNESCO platformasında daha yaxşı eşidilməsi üçün, İcraiyyə Şurasında QH ölkələrinin səfirlərinin Koordinasiya Qrupunun yaradılması xatırladılaraq bildirilib ki, 2022-ci ilin oktyabr ayında keçiriləcək İŞ-nin 215-ci sessiyası zamanı Hərəkat üzvlərinin maraqlarına uyğun olaraq, sədr tərəfindən müəyyən mövzular üzrə çıxışlar ediləcək. Bir sıra səfirlər qeyd olunan təşəbbüsü təqdir edərək dəstəklərini ifadə edib.
İclasda, həmçinin ötən iclasın hesabatı dinlənilib və qəbul olunub.
İclas Qoşulmama Hərəkatına üzv ölkələrin UNESCO orqanlarına namizədliyinə və müxtəlif məsələlərə dair müzakirələrlə davam edib.
TÜRKSOY-un Fikrət Əmirova həsr etdiyi opera günlərinin sonuncu tədbiri Kiprdə təşkil olunacaq
Beynəlxalq Türk Mədəniyyəti Təşkilatının (TÜRKSOY) türk dünyası opera sənətçilərini bir araya gətirən ənənəvi tədbiri olan “23-cü TÜRKSOY Opera Günləri” keçirilir.
“Ədəbiyyat və incəsənət” AzərTAC-a istinadən xəbər verir ki, TÜRKSOY-un Daimi Şurası tərəfindən 2022-ci il görkəmli Azərbaycan bəstəkarı Fikrət Əmirovun anadan olmasının 100 illiyi ilə bağlı onun anım ili elan edilib. Bu münasibətlə TÜRKSOY-un 23-cü Opera Günləri Fikrət Əmirova həsr olunur. Tədbirlərdə dahi bəstəkarın bədii əsərlərindən və şəxsi arxivindən ibarət fotosərgilər də sənətsevərlərin diqqətinə təqdim olunur.
Türkiyənin Mədəniyyət və Turizm Nazirliyinin dəstəyi ilə təşkil olunan tədbir Türkiyənin Bursa və İzmir vilayətləri, eləcə də Şimali Kipr Türk Respublikasında (ŞKTC) keçirilir. Tədbir nazirliyin Gözəl Sənətlər Baş İdarəsinin Bursa Dövlət Simfonik Orkestri, Dövlət Opera və Balet Ümumi Müdirliyi, İzmir Dövlət Opera və Balet Orkestri, İzmir Böyükşəhər Bələdiyyəsi iştirakı, eləcə də ŞKTC-nin Baş nazirinin müavini, Turizm, Mədəniyyət, Gənclər və Ətraf Mühit Nazirliyinin himayəsi altında keçirilir.
İlk belə tədbir sentyabrın 15-də Bursa vilayətində, 18-də isə İzmirdə baş tutub.
Sentyabrın 20-də isə növbəti konsert proqramı uzun fasilədən sonra ŞKTC-nin Mağusa şəhərinin Famagusta Otello qalasında keçirilib. Kiprdə daha bir tədbir sentyabrın 21-də Girne Bellapais Manastırında keçiriləcək.
“23-cü TÜRKSOY Opera Günləri” çərçivəsində keçiriləcək konsertlərdə türk dünyasının müxtəlif ölkələri-Azərbaycan, Türkiyə, Qazaxıstan, Qırğızıstan, Özbəkistan, ŞKTC və Şimali Makedoniyadan ifaçılar və icmalar çıxış edirlər. Türk Dünyası opera müğənnilərini Qırğızıstanlı pianoçu İuliya Babiç müşayiət edir.
“Ağrı” müəllifinin yoxluğunun ağrısını çəkə-çəkə
(Arye Qutun işıqlı xatirəsinə)
Aida Eyvazlı yazır
Mən bu yazını yazanda Arye hələ sağ idi, xərçənglə mübarizə aparırdı. Bu yazını ona bir vəfa borcum kimi yazmışam. Ona ömür diləmişəm. Təəssüf ki, bu ömür tez qırıldı. Allah ona rəhmət eləsin. Onun ölümü bizləri çox sarsıtdı.
Mən Vətənimi sevən, ona bağlı olan, özünü bu ölkəyə tən bilən insanları hər zaman Vətən torpağına bənzədirəm. Vətənə bənzətdiyim, “Vətən” deyib güvəndiyim insanlar üçün də “Vətən öncə” olub. Vətən sevgisinin göstərməyin bir adı isə əməldir. Ümumimilli liderimiz Heydər Əliyev qürbətdə yaşayan, taleyin və qismətin yazısı ilə azərbyacanlı kimi qürbətdə doğulan və ya nə zamansa Azərbaycanda doğulub, sonra isə dünyanın başqa yerlərinə köçüb həyatını yeni güzərgahlarda quran həmyerlilərimizə, Vətənimizin dostlarına üzünü tutaraq deyirdi ki, olduğunuz ölkələrdə özünüzü elə göstərin ki, əməllərinizlə Vətənimizə şərəf gətirəsiniz.
Nümunəvi əxlaq, əqidə, davranış insanın başını hər yerdə uca edir. Belə başı uca, qəlbi hər zaman Azərbaycanla döyünən insanlardan biri haqqında, dostum, əqidədaşım Arye Qut haqqında danışmaq istəyirəm.
1975-ci ildə qədim Bakımızda doğulub. 1992-ci ilin fevral ayının 25-dən 26-na keçən gecə Xocalıda qətliam törədiləndə onun 17 yaşı var idi. 17 yaşına qədər isə o atasından, anasından, tarixdən, kitablardan öyrənmişdi ki, qana həris insanların qəddarlığı, siyasətçilərin siyasi oyunlarının qurbanı olan bir gecənin içərisində uşaqları, qocaları ilə birlikdə yandırılan, Yer üzündən silinən Babi Yar, Liditsa, Oradur, Xatın, Sonqmi kimi kənd və şəhərlər var. Bundan əlavə isə yəhudi kökənli olduqlarından ailədə həmişə dünya tarixinə Holokost faciəsi kimi yazılan, milliyyətləri yəhudi olduqları üçün faşistlər tərəfindən soyqırımına məruz qalan xalqı və milləti var. Xocalı hadisəsi baş verən o qanlı gecədə, bütün sülhsevər insanlar kimi, onların da ailəsində bu qanlı hadisələrin tarixi bir daha xatırlanmışdı.
2000-ci ildə kökdən gələn ənənələrə sadiq qalaraq onlar da İsrail dövlətinə köçdülər. Hər zaman axtarışda olan, öz bilik- bacarığı, zəhməti ilə insanların etimadını qazanan Arye Quta "GİLRO LTD" İsrail şirkətində idxal-ixrac departamentinin rəhbəri vəzifəsi, sonra isə NESS və YR şirkətində Azərbaycan üzrə direktor vəzifəsi təklif olunanda, o tərəddüd etmədən bu vəzifələri üzərinə götürdü. Yuxarıda qeyd etdiyimiz vəzifələrdə çalışaraq özünü doğrultdu, artıq İsrail dövlətində də onu həm də beynəlxalq münasibətlər üzrə siyasi şərhçi və içtimai xadim kimi tanımağa başlamışdılar.
Doğulduğu Azərbaycandan kənarda olsa da, yaşadığı İsrailin Akko şəhərində ətrafda onu əhatə edən insanlar milli köklərindən, tarixlərindən danışanda Holokost faiciəsini yada salırdılar. Onların içərisində həmin faciələri yaşayan yaşlı şahidlər də var idi. Və belə söhbətlər, acı xatirələr yada düşəndə Aryenin atası Əhməd müəllim, anası Rita xanım, Arye və bacısı Rena (Reyhan) isə 1992-ci ildən sonra şahidi olduqları Xocalı faciəsindən söhbət açırdılar. Hər iki xalqın faciələri bir-birinə bənzədiyi kimi, insan taleləri də bir-birinin bənzəri idilər. Əvvəlcə dostlar, sonra auditoriyalar arasında aparılan müzakirələrdə Holokostdan danışılanda artıq Xocalıdan da, Azərbaycanın ermənilərin işğalı nəticəsində itirdiyi torpaqlardan və bu yerlərdə həlak olan insanlar, köçürülən və əsir düşən insan talelərindən də söhbət gedirdi. Və beləcə həmin söhbətlər, xatirələr ağızdan-ağıza, yaddaşdan yaddaşa köçməklə bərabər, həm də kütləvi informasiya vasitələrində də yayılmağa başladı... Və beləcə... Arye həm yəhudilərin, həm də azərbaycanlıların soyqırımı faciələrini, 1992-ci ildən sonra işğal olunan ərazilərinin ağrılarını dünyanın böyük konfrans salonlarından, beynəlxalq təşkilatlarının tribunalarından hayqırdı, dünya ictimaiyyətinə, səsimizi eşitmək istəyənlərə və istəməyənlərə səsləndi.
Arye Qutun təşəbbüsü və fədakarlığı ilə Amerikada, Litvada, Rusiyada, Moldovada, İsveçdə Holokost faciəsi ilə Xocalı faciəsi eyni zamanda təbliğ olundu. İndi vətəndaşı olduğu İsrail dövlətinin sayılıb seçilən insanlarını, dövlət və ictimai xadimlərini Azərbaycana gətirdi. Babalarının doğulduğu Quba şəhərinə apardı. Quba şəhərinə apardı ki, orada 1918-ci ildə ermənilərin vəhşiliklərindən xəbər verən, bu günə və dünənə şahidlik edən “Soyqırımı” muzeyini göstərsin. Gəldilər, gördülər, getdilər... və bunları görəndən sonra, “Xocalı” faciəsini qəbul edərək, dünyaya soyqırım faktı kimi yayılmasında Arye Quta yardımçı oldular. Çünki gördükləri göz qabağında olan ötən yüzillikdən xəbər verən həqiqətlər idi. Onun Amerikadan və Avropadan Azərbaycana gətirdikləri dostlarını dövlətimiz də azərbaycanlılara məxsus qonaqpərvərliklə qarşıladı. Bu istinin, sevginin davamını isə Qubada Qırmızı qəsəbədə gördülər.
Yadımdadır, 2015-ci ilin yanvar ayında İsrailin Akko şəhərinin meri Şimon Lankrinin başçılıq etdiyi nümayəndə heyətinin tərkibində Azərbaycana gələn israilli və yəhudi əsilli xarici jurnalistlər Sinaqoqda ibadət etdiklərini, gördükləri tolerant mühiti yazaraq dünyaya yaydılar. Onu qeyd etmək olar kı, bu səfərdən sonra İsrailin ən çox oxunan "Jerusalem Post " qazetinin üç səhifəsi Vətənimizə həsr olunmuşdu.
Arye Qut Azərbaycanda doğuldu, mayasını bu müqəddəs torpaqlardan tutdu. Lakin Vətəni, onun havasını, suyunu-çörəyini heç zaman unutmadı. Dünyanın harasında olsa, hansı tribunada çıxış etsə də, İsraillə yanaşı sözünün əzəli də, sonu da Azərbaycan həqiqətləri oldu. Ötən il isə Arye Qut Azərbaycana və İsrailə daha bir töfhə verdi. Atası Amir Qutla (Azərbaycanda onu Əhməd Abdullayev kimi tanıyırlar) birlikdə “Ağrı” kitabını yazdı. Bilirsinizmi, hansı “Ağrı” idi... 17 yaşından ürəyini köz-köz, dama –dama yandıran ağrı. Xocalını unutmadı. İçini göynədən ağrıları “Ağrı” kitabına çevirdi. Özü də ki, kitabı İsraildə çap edib, sonra gətirib Azərbaycanda təqdimatını keçirdi. Bu kitabın ilk nüsxəsi 2016-cı ilin oktyabrın ayında V Bakı Humanitar Forumu zamanı Azərbaycan Prezidenti İlham Əliyevə təqdim olundu. “Xocalıya ədalət” kampaniyasına öz töfhələrini ata-bala belə verdilər. Ermənilərin Xocalı soyqırımı faktı barədə ən dəqiq və ən oxunaqlı bir əsərin yaranmasının kökündə, əlbəttə ki, Əhməd müəllimin böyük fədakarlığı dayanırdı.
Əhməd Abdullayev Bakının qədim “Sovetski” məhəlləsində doğulan bir insan. Uşaqlığı, gəncliyi sirlərlə dolu İçəriŞəhərin, Qız qalasının yanında keçən həmşərimiz. İndi 80 yaşını dolduran bu ağsaqqal söhbətlərində xatırlayır ki, 16 yaşında ikən Neft Akademiyasının neft-mədən fakültəsinə daxil olub. Lakin neft mühəndisi olmaq ona qismət olmayıb. Məhəllələrində yaşayan məşhur kinorejissor Həsən Seyidbəyli Əhmədin həyatını dəyişib. Gənc ikən bu istedadlı kinorejissorun yanında gəzib dolanıb, rəngli işıqlara və sehirli kameralara salıb meylini. Nəhəng çəkiliş meydanlarının cazibəsindən çıxa bilməyib, həmin illərdə artıq məşhur olan rejissor Həsən Seyidbəylinin yaradıcılıq təsiri ilə Moskvada Ümumittifaq Dövlət Kinematoqrafiya İnstitutunun ssenari fakültəsinə daxil olub... Sonra Bakıya qayıdaraq, sənət dərslərini Azərbaycan Dövlət İncəsənət İnstitutunda davam etdirib. Bu institutun rejissorluq fakültəsini fərqlənmə diplomu ilə bitirdikdən sonra "Azərbaycantelefilm"də işə başlayıb... İllər ötəndən sonra yaradıcılıq bioqrafiyasını vərəqləyəndə görüb ki, ustad rejissor indiyədək Azərbaycanın qədim tarixi və mədəniyyətindən bəhs edən 70-dən çox sənədli filmə ekran həyatı verib. Müstəqillik dövründə Əhməd müəllim Azərbaycan Dövlət Televiziyasının ictimai-siyasi proqramlar redaksiyasında aparıcı telerejissor vəzifəsində çalışıb. Sovetlər Birliyinin dağılması prosesini, Qarabağ müharibəsinin real və qanlı üzünü, Azərbaycan xalqının müstəqillik uğrunda mübarizəsini lentə alıb. Vətənimizi oba-oba, oymaq-oymaq gəzib. Düz 40 il Azərbaycan Dövlət Televiziyasında əmək sərf edib. Elə bu müşahidələrini də “Ağrı” kitabında yazıb. Çünki Əhməd Abdullayev ermənilərin bizə qarşı başladıqları torpaq iddialarından sonra Bakıda isti iş otağında, isti yatağında qala bilmədi. Mütəmadi olaraq Qarabağ bölgəsinə, yeni yaranmış cəbhəyanı ərazilərə səfər etdi. Gördüklərini isə əvvəlcə oğlu Arye Quta danışırdı... Arye isə hələ məktəbli olanda atasının danışdıqlarını fırça ilə ağ vərəqlərə çəkərdi... Çəkə bilmədikləri isə sonradan “Ağrı”ya döndü. “Ağrı”da təkcə Xocalı faciəsindən danışılmır, həm də Azərbaycanın qədim tarixinə, mədəniyyətinə ekskurslar edilir, tam bir tolerant və sülhsevər insanların Vətəninin panoramı öz əksini tapır.
Atasının ürəyinin ocağından od–köz götürən qardaşım, əqidədaşım Arye Qut Azərbaycanın ağrılarını qəlbinin dərinliyindən çalın-çarpaz ilmələrlə keçirib. Yazdığı yazılarda, apardığı radio və televiziya verilişlərində, çəkdiyi rəsm əsərlərində, tablolarda göstərib bu ağrıları. Arye dünyanın harasında olursa olsun, “Azərbaycan” deyəndə dili-dodağı yanır. “Azərbaycan” deyəndə səsinin titrədiyini, gözündən yaşlar gilələndiyini görmüşəm. Faciələrimizi və Qalibiyyətimizin şərəfini yaşadığımız günlərdə Arye Qut Azərbaycandan neçə min kilometrlə uzaqda olsa da, internet üzərindən Vətəni izləyirdi.
O, qalibiyyətlərin bizə yaşatdığı sevinc və qüruru, şəhidlərimizin ucalığını, haqq savaşını İsraildə yenə təbliğ etməklə məşğuldur. Vətəndən gedəndən sonra, Vətəni tənindən çıxarmayan qardaşımızdır o!
Tanrı səni Azərbaycanın haqq səsini yaymaq üçün yaratdı. Sən də Tanrının Yer üzündə bir haqq səsi olaraq “Haqq” deməkdən usanmadın ki... Vətənimə TƏN olan, qardaşımız, vətənimizin bir parçası Aryenin oğlu Aviel da hər zaman Azərbaycan bayrağı olan libaslar geyinir. Ot kökü üstə bitər. Uca Tanrım səni bu Vətənə, bu dostlara, bü dünyaya kaş ki, çox görməyə!
Mədəniyyət ocaqlarında 27 Sentyabr - Anım Günü ilə əlaqədar tədbirlər təşkil olunacaq
Azərbaycanın bir sıra mədəniyyət ocaqlarında 27 Sentyabr - Anım Günü ilə əlaqədar tədbirlər keçirilməsi nəzərdə tutulur.
“Ədəbiyyat və incəsənət” Mədəniyyət Nazirliyinə istinadən bildirilir ki, Anım Günü ilə əlaqədar Akademik Milli Dram Teatrında dövlət sifarişi ilə "Zəfər yolu" tamaşası hazırlanıb.
Səhnə əsəri sentyabrın 23, 24 və 25-də nümayiş olunacaq. Həmçinin sentyabrın 27-də Azərbaycan Dövlət Akademik Musiqili Teatrında Vətən müharibəsinə həsr olunan "Bir nəfəs qədər" tamaşası təqdim ediləcək. Azərbaycan Musiqi Mədəniyyəti Dövlət Muzeyində anım günü ilə bağlı "Şəhidlər ölməz, Vətən bölünməz" adlı tədbirlə yanaşı, eyni zamanda, Leopold və Mstislav Rostropoviçlərin ev-muzeyində müharibənin qısa tarixi, şəhidlik zirvəsinə ucalanları tanımaq və anmaq məqsədilə müharibənin canlı şahidləri olan qazilərin və şəhid ailələrinin iştirakı ilə “Qəhrəmanımızı tanı!” adlı tədbir keçiriləcək.
Səməd Vurğunun ev-muzeyində də keçirilməsi nəzərdə tutulan "44 günlük Vətən müharibəsi..." adlı tədbir və qəhrəmanlarımıza həsr olunan onlayn sərgi bu sıralamaya aid edilir. Abdulla Şaiqin mənzil-muzeyində anım günü ilə bağlı "Zəfərə aparan yol" adlı tədbir və Nəriman Nərimanovun xatirə muzeyində "44 günlük zəfər tariximiz" adlı sərgi, eləcə də “Açıq qapı” təşkil olunacaq.
“Azərbaycanda mədəniyyət iqtisadiyyatı: Şuşadan inkişaf impulsları” adlı beynəlxalq elmi-praktik konfrans başa çatıb
Xəbər verdiyimiz kimi, 19-20 sentyabr tarixlərində Mədəniyyət Nazirliyi və Elm və Təhsil Nazirliyi İqtisadiyyat İnstitutunun birgə təşkilatçılığı ilə “Azərbaycanda mədəniyyət iqtisadiyyatı: Şuşadan inkişaf impulsları” adlı beynəlxalq elmi-praktik konfrans keçirilib.
“Ədəbiyyat və incəsənət” Mədəniyyət Nazirliyinə istinadən xəbər verir ki, birinci iş günü mədəniyyət paytaxtımız Şuşada, ikinci günü Bakıda gerçəkləşən konfrans sentyabrın 20-də “Yaradıcı iqtisadiyyat üçün potensialın inkişafı və təhsilin əhəmiyyəti” mövzusunda sonuncu – dördüncü panellə işini başa vurub.
Panelin moderatoru, “SmartNation” platformasının rəhbəri Şəbnəm Məmmədova çıxışçıları təqdim edib.
Mədəniyyət nazirinin birinci müavini Elnur Əliyev çıxışında dayanıqlı və uğurlu iqtisadiyyat məsələsinə toxunaraq qeyd edib ki, əslində, bütün ölkələrdə qanunvericiliyi və sərmayələri tənzimləyən sənədlər, demək olar ki, eynidir: “Bu ölkələri fərqli edən insan amilidir. İnsanlar fizioloji olaraq eynidir. Onları bir-birindən fərqləndirən isə mədəniyyətdir. Deməli, sənəti gerçəkliyə aparan mədəniyyətdir. Uğurlu olmaq istəyiriksə, mədəniyyətimizi tənzimləməliyik. Bizim əsrlərin süzgəcindən keçmiş mədəniyyətimiz var. Düşünürəm ki, peşəmizdən, fəaliyyət sahəmizdən və biliyimizdən asılı olmayaraq, öz mədəniyyətimizi tanımalı və ona sahib çıxmalıyıq”.
“Experience UK” Məsləhət Şurasının üzvü Emili Smit bildirib ki, Böyük Britaniya öz sistemini elə qurub ki, onun rəssamları digər sahələrlə eyni imkanlara malik olsunlar. Britaniyada bu sahəyə dövlət tərəfindən investisiyalar ayrılır. Şuşa şəhərinə səfərin onun üçün çox unudulmaz bir xatirə olduğunu söyləyən Emili Smit vurğulayıb ki, mədəniyyət iqtisadiyyatı sahəsi üzrə Şuşada müxtəlif işlər görmək üçün böyük potensial mövcuddur.
Elm və Təhsil Nazirliyi İqtisadiyyat İnstitutunun direktoru Nazim İmanov söyləyib ki, ölkəmizdə ənənəvi mədəniyyəti iqtisadiyyatın sektoruna çevirmək üçün Qarabağdan başlamaq lazımdır.
Multidisiplinar dizayner Nejla Güvenc Türkiyədə yaradıcı mədəniyyət sahəsi ilə bağlı vəziyyət haqqında fikirlərini bölüşüb. Söyləyib ki, mədəniyyət iqtisadiyyatının inkişafı üçün qeyri-hökumət təşkilatları da fəal şəkildə çalışmalıdır.
“Re-Fresh Global” şirkətinin həmtəsisçisi Revital Nadiv deyib ki, ideyaları reallaşdırmaq üçün gənclərə meydan vermək lazımdır: “Səhv etmək azadlığımız yoxdursa, yeni bir ideya yarada bilmərik. Hansısa uğursuzluqdan qorxmaq lazım deyil. Biz gənclərə bu sahədə bir sıra imkanlar aça bilərik. Bunun üçün sınaqlar keçirməliyik. Sözsüz ki, bunları təkbaşına edə bilmərik. Bu sahə üzrə müxtəlif mütəxəssislər lazımdır”.
Revital Nadiv çıxışının sonunda mədəniyyət nazirinin birinci müavini Elnur Əliyevə tekstil tullantılardan hazırlanan ətir və yeni parça növü hədiyyə edib.
Daha sonra konfrans iştirakçılarının sualları cavablandırılıb.
Elnur Əliyev konfransda iştirak edən bütün qonaqlara təşəkkürünü bildirib.
Sonda xatirə şəkli çəkdirilib.
Rəsm qalereyası: Sakit Məmmədov, “Küsmüş mələk”
Rəsm qalereyası: Sakit Məmmədov, “Küsmüş mələk”
Günün fotosu: Rusiya siyasətini dəyişir
Günün fotosu: Rusiya siyasətini dəyişir
Uzun müddət Ukraynada apardığı işğalçı müharibəyə “xüsusi əməliyyat” adı verən Rusiya Ukraynanın dirənişindən, müharibənin Rusiya ərazisinə keçmə təhlükəsindən qorxuya düşüb. Budur, Dövlət Duması Cinayət Məcəlləsinə “hərbi vəziyyət”, “səfərbərlik”, “müharibə dövrü” kimi terminlər salmışdır.
Mənbə: Euronews
“Səni başqasıyla görmək də gözəl” – Güneyli Elnaz İslamvəndin şeirləri
“Ədəbiyyat və incəsənət” portalının “Güneydən gələn səslər” rubrikasında portalımızın Güney Azərbaycan təmsilçisi Əli Çağla sizləri Elnaz İslamvəndin şeirləri ilə tanış edəcək. Köylü Qız adıyla tanınmış güneyli şairə Elnaz İslamvənd 1983-cü ildə Təbriz şəhərində doğulmuşdur. O, 2005-ci ildə Təbriz Universitetinin pedaqoji fakültəsini bitirmişdir. Şairənin “Bax, mən də köylü qız olmuşam” adlı ilk kitabı 2005-ci ildə və “Islanmış son duraq” adlı şeirlər kitabı 2017-ci ildə işıq üzü görmüşdür.
SALAM VERDİYİM GÜNƏŞ
Köçəri quşları sevdin həmişə,
Gəlib qonaq qalıb gedən quşları.
Gələnin cütlədin başmaqlarını,
Bir an dayanmaya belə qıçları.
Bir buxça bələdin xatirələrdən,
Olub keçənləri silib-süpürdün.
Sanki biz heç zaman tanışmamışdıq,
Sanki sən deyildin məni öpürdün.
Şəhərdən şəhərə boylanmadaydıq,
Mən sizin günəşə salam verərdim.
Görərdin sən orda bir ağac əkdin,
Mən burda meyvəsin əl atıb dərdim!
Bilirdim azanız haçağ səslənər,
Kölgənə quş belə qonsa bilərdim.
Baharı dizimə çökdürürdün sən,
Hanı mən gördüyüm? -
Borandı, qar, qış!
“Sənə gül alımmı?” dediyin gündən,
Gül nədi, başıma kül ələyirsən.
Mən gedən deyildim, özün bilirsən,
Sən məni bu yola itələyirsən.
Köçəri quşları sevdin həmişə,
Gəlib qonaq qalıb gedən quşları.
Gələnin cütlədin başmaqlarını,
Bir an dayanmaya belə qıçları.
QIVRILAN YOL
Mən yoruldum, gözün aydın,
Bu sən, bu verdiyin ürək.
Artıq tanrının əlindən,
Heç iş belə gəlməyəcək.
Kim deyir ki, ömür boyu,
Yora bilməz yollar məni!
Fəsillər aldadır bizi,
Təqvimlər oynadır səni.
Birisi köçürtdü səni,
O fəsildən bu fəsilə.
Yuxu da görməzdim belə,
Ayağım səndən kəsilə.
Mən yoruldum, gözün aydın,
Dönürəm, bu imza, bu qol.
Sonunda zəhrini tökdü,
İlan kimi qıvrılan yol…
QADIN
Harada quyulanarsa;
Oyaq gözlərlə baxar qadın!
Üfürər tanrı, gözlərindəki torpağı,
Gömülməz!
Yeddi can var köksündə
Çıxmaz,
Canı can doğurar, bitməz!
Mətbəxdəki duz qabında mumyaya dönər
Tablolarında gül pənbə rəngi görünər
Getməz!
Yaşarmış gözlərində,
Cavanlaşar şəhər.
Süpürər yanağını
Quyulanar, quyulanar.
Doldurar ancaq
Erkəklərin çanağını
Gözlərindən
Göyərçinlər uçar öföqə sarı.
Qartal qanadlarını gizlədərək “dikdabanlarında”
Sərçələri qonaqlamağa çırmalanar dik-dik
Atlanar… Atlanar…
Sığalsızkən saçları
Dördnala çapar əzik-əzik
Yol!
Özündə başlayıb, özündə bitər
İki ayaq yeriyər onda, görməzsən!
İki ayaq uzaqlaşar səndə, bilməzsən!
Sevgi,
Malikanəsidir qadının!
Səsi qapı səsi,
Gülüşü pəncərə
Hazır ol!
İşkilləməsin dodağını qadın!...
URMU
O qədər dedilər: “Dənizdir, dəniz”,
Deyirəm bəs sənə göz dəydi, Urmu!
Dərdi təzələsəm hənizdi həniz,
Bilirəm yarana duz dəydi, Urmu.
Al bu göz yaşları Təbrizdən gəlir,
Qıymasan üzünə baxmaram, Urmu!
Biz ana torpağın övladlarıyıq,
Gərəkdir paylaşaq çətin durumu.
Gördün babaların sözü düz çıxdı,
Dedilər: “İçindən yeyilər ağac”.
Duz yeyib duzqabı sındıran oldu,
Daraşdı üstünə hər ac yalavac.
Pisliyi pis etmək ayıbdır, ayıb,
Əti dırnağından ayırmazlar ki?!
Döyüşdə arxadan vurana lənət,
Əsgəri qurşunla doyurmazlar ki?!
Dərdi təzələsəm hənizdi, həniz,
Nə bilim, bəlkə də bir zaman oldu.
İndi duzlağında oynayan uşaq,
Gələcək günlərə Səttarxan oldu!
GİZLİNPAÇ
Səni başqasıyla gördüyüm anda,
Özümdən sabaha yol yerimişdim.
O qədər yerinə utanmışdım ki,
Səhər açılınca lap ərimişdim.
Toxundu saçıma süpürgəçimiz,
Vitrində matışka güldü üzümə.
Biraz buraxılmış siqar qutusu,
Biraz da qəhqəhə dəydi gözümə!
Səni başqasıyla görməyə nə var?
Hər zaman deyəndə: “Alma”, gəlmişəm.
Biraz gecənizdən heyva tökülüb,
Heyva yəni gəlmə, özüm gəlmişəm.
Səni başqasıyla görmək də olur,
Bu da ki, bir tordur, bu da bir biçim.
Mən gərək zamanın durduğu yerdə,
Bu kefli nağıldan adlayıb keçim.
Səni başqasıyla görmək də gözəl,
Dağ kimi səsimi qaytarır odam.
Ömür var sevərəm məni buraxsan,
Bir yerdən başlayıb gərək unudam…
Qeyd: Şeirlərin orfoqrafiyasına toxunulmamışdır.
Acun İlıcalı qəzaya düşüb: Qolu qırılıb
Türkiyənin məşhur teleaparıcısı Acun İlıcalı avtomobil qəzası keçirib.
“Ədəbiyyat və incəsənət” oxu.az-a istinadən xəbər verir ki, iş adamı İstanbulda qarşı tərəfdən gələn avtomobillə toqquşub.
Xəstəxanada aparılan şoumenin ilk yoxlamada qolunun sındığı aşkarlanıb. İlıcalının ümumi səhhətinin yaxşı olduğu bildirilib.
Qeyd edək ki, Acun vaxtilə valideynlərini də yol qəzasında itirib.
"Kurtlar vadisi"nin aktrisası vəfat edib
Türkiyənin məşhur kino və serial aktrisası Başak Özel 51 yaşında vəfat edib.
“Ədəbiyyat və incəsənət” APA-ya istinadən bildirir ki, aktrisanın vəfat xəbərini sənət dostları sosial şəbəkədə bildiriblər.
Onun vəfat səbəbi qeyd edilməyib.
Xatırladaq ki, aktrisa "Kurtlar vadisi", "İhlamurlar altında", "Melekler adası" kimi böyük televiziya layihələrində yer alıb.
