Super User
“Eyni kupelərdəyik, amma ayrı qatarda” - Əlizadə Nuri
“Ədəbiyyat və incəsənət” portalı Poetik qiraət rubrikasında Əlizadə Nurinin “Uzaq”
şeirini təqdim edir.
Nə olsun, yanımdasan?-
Nə Rumdasan, nə Çində.
Ayrı dünyalardayıq
Eyni evin içində.
Eyni kupelərdəyik,
Amma ayrı qatarda…
Aradakı bu boşluq
Min adama çatar da.
Sən çiçəyə əl açdın,
Mən də kəpənəklərə.
Qoy bahar sənin olsun
Payız qalsın təklərə.
Elə soyumuşuq ki-
Gec əriyən qarıq biz.
Bir dəryanın içində
Ayrı damlalarıq biz…
Özümlə savaşanda,
Özüm girdim araya.
Yanımdasan… özgəni
Çağırıram haraya…
Eşqimiz oğurlanıb-
Boş bir muzey kimiyik.
Günümüz də ayrıdı-
Güney, quzey kimiyik…
Təkcə yaradan bilir
Necə dostuq, yarıq biz.
Bir- birinə bitişik,
Uzaq adalarıq biz.
Dənizi sevmədin sən
Sevdin isti qumunu.
Nə olsun, yanımdasan,
Sənə məktub yazmışam
Gəl, götür məktubunu…
… Nə olsun, yanımdasan?/
Nə rumdasan, nə çində.
Ayrı dünyalardayıq
Eyni evin içində…
“Ədəbiyyat və incəsənət”
(01.02.2023)
Bu gün aləm “Çiçəklər”ə bürünəcək
Fevralın 1-də Xətai Sənət Mərkəzində “Çiçəklər” adlı etüd keçiriləcək. Bu tədbirdə 15-29 yaşarası rəssamlar iştirak edə bilərlər.
Bu barədə Xətai Sənət Mərkəzinin direktoru Zahid Əvəzov məlumat verib.
“Sözügedən etüd Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə 2 Fevral – Azərbaycan Gəncləri Gününə həsr olunacaq.
“Ədəbiyyat və incəsənət”
(01.02.2023)
Gəlin tanış olaq! – Uğur düsturunun müəllifinin tanıtımı
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir
Əziz oxucum. Elə bu yerdə bir qədər haşiyəyə çıxaraq sizinlə başqa mövzuda danışmaq istəyirəm. Mən kiməm, nəçiyəm? Həyat məramım nədir? Əlbəttə, kitab boyu bu sualların cavabına rast gələcəksiniz. Bunları bilməlisiniz, müəlliminizi tanımalısınız ki, sizə verilən ev tapşırığını da mənimsəyə biləsiniz
Hələlik isə, əziz oxucum, istəyirəm sizə ilk tanışlığımızda vətənim barədə məlumat verim. Mən azərbaycanlıyam, paytaxtı Bakı şəhəri olan Azərbaycan Respublikasında yaşayıram. Uzun illər, 1920-ci ildən ta ki 1991-ci ilə qədər Sovet İttifaqı adlı bir federasiyanın tərkibinə daxil olan Azərbaycan Respublikası 1991-ci ildən müstəqilliyini bərpa edə bilib. Bu müstəqilliyi itirənədək, 1920-ci ilədək isə Şərqdə ilk demokratik respublika olan Azərbaycan Demokratik Respublikası dövlətçiliyinə malik olmuşuq. Onu da deyim ki, dünya tarixindəki ən böyük imperiyalardan biri – Səfəvilər imperiyası (XVI-XVIII əsrlər) da biz azərbaycanlıların olub. Bu tarixi Azərbaycan dövləti bugünkü Azərbaycan, İran, Ermənistan, Əfqanıstan, qərbi Pakistan, Türkmənistan, şərqi Türkiyə, şimal-şərqi Hindistan və Özbəkistan ərazilərini, eləcə də ərəb ölkələri ərazilərini (İraq, Suriya, BƏƏ, Küveyt, Bəhreyn, Oman) əhatə edib, 3500000 kvadrat kilometrlik nəhəng əraziyə malik olub.
Hər bir xalqın taleyi qalibiyyətli və məğlubiyyətli müharibələrdən, eniş və yüksəlişlərdən keçir. 1813 və 1828-ci illərdə Gülüstan və Türkmənçay adlı iki müqavilə ilə Azərbaycan ərazisi Rusiya imperiyası və İran şahlığı arasında bölünüb, Rusiya imperiyasının tərkibindəki Şimali Azərbaycan hazırda, bax, mən yaşadığım müstəqil Azərbaycan Respublikasıdır, hal-hazırda burada 10 milyona yaxın azərbaycanlı yaşayır. İranda qalan Cənubi Azərbaycan (paytaxtı Təbriz) isə dövlət quruluşuna malik deyil, orada hazırda təqribən 25 milyon azərbaycanlı yaşayır.
Bu gün dünyada çoxlarına Azərbaycan məhz elə Şimaldakı müstəqil dövlətinə görə tanışdır. Azərbaycanı bir neft ölkəsi kimi tanıyırlar çoxları, neft bumundan sonra sürətlə böyüyüb gözəlləşən Bakıya «İkinci Dubay» adını da qoyublar. İndi buranı Şərq ölkələrində gözəl turizm məkanı kimi də tanıyırlar, qərbdə isə bura, həm də, Formula 1 yarışmasına evsahibliyi eləyən idman ölkəsi kimi tanınır.
Hər bir ölkənin öz «ən»ləri və «ilk»ləri var. Bizim Azərbaycanımızın da belə «ən»ləri və «ilk»ləri az deyil: Azərbaycanın Şərqin ilk Demokratik Respublikasına və dünyanın ən böyük imperiyalarından birinə müəllif olması barədə az öncə demişdim. Digər «ən»lərə baxaq: Bizim ölkənin sahillərini dünyanın ən böyük gölü (Xəzər dənizi) yuyur, Yer kürəsində ən çox palçıq vulkanı (300-dən çox) bizim ərazidədir. Qədim Şərqin ilk və ən mükəmməl Rəsədxanası 1259-cu ildə dünyaşöhrətli azərbaycanlı alim Nəsirəddin Tusi tərəfindən Azərbaycanın Marağa şəhərində yaradılıb. Dünya ədəbiyyatında ilk «Xəmsə» adlanan beş poemadan ibarət beşlik nümunəsini dahi Azərbaycan şairi Nizami Gəncəvi (XII əsr) yaradıb. Dünyada dəniz dibindən ilk neft hasilatı (1846) Azərbaycanın hesabına düşür. Şərqdə ilk diplomat qadın XV əsrdə Ağqoyunlu adlı Azərbaycan dövlətində yaşamış Sara xatun olub. Şərqdə ilk opera 1908-ci ildə tanınmış Azərbaycan bəstəkarı Üzeyir Hacıbəyov tərəfindən yazılıb. 1920-ci ildə Şərqdə ilk Musiqi Akademiyası Azərbaycanda yaradılıb. Müsəlman dünyasında ilk dəfə qadınlara seçki hüququ 1918-ci ildə Azərbaycanda verilib. Şərqdə ilk elektrik qatarı da 1926-cı ildə məhz Azərbaycanda hərəkət eləyib.
Mən bu siyahını çox uzatmayaraq son nöqtəni qoyuram: Dünyaşöhrətli alim, bəşər tarixində köklü dəyişikliklərə, böyük sıçrayışlara səbəb olmuş süni intellekt sahəsində qeyri-səlis məntiq nəzəriyyəsinin banisi Lütfi Zadə də azərbaycanlıdır!
***
Məncə, bir ölkənin, özü də dünya xəritəsində çox kiçik görünən, üstəlik də yenicə müstəqillik qazanmış bir ölkənin vətəndaşı üçün dünyanın ən böyük kürsülərində onun ölkəsi barəsində danışılması, dünyanın ən nüfuzlu mediasının onun ölkəsi barəsində yazması çox qürurvericidir. Biz azərbaycanlılar tez-tez bu cür qürurlanırıq.
«Bakı heç bir başqa şəhərə bənzəmir. Burada cəlbedici sərgiləri və attraksionları olan, nəhəng bulvarı, rahat kafeləri və xalça dükanları olan labirintəbənzər İçərişəhər vardır. Füsunkar qızılı çimərliklər, Abşeronun sayrışan işıqları, dəbdəbəli restoran və klublar, bərq vuran «Kristall Hall» sarayı...
Ölkənin qalan hissəsi də az təəccübləndirmir. Dünyada mövcud olan 11 iqlim tipindən 9-nun burada olmasına adamın inanmağı gəlmir. Qədim qayaüstü rəsmlər, dağ-xizək kurortu, dünyada mövcud olan palçıq vulkanların yarısı, duz gölləri, yanardağlar böyük maraq doğurur».
The Telegraph (Böyük Britaniya)
«Hava limanından şəhərə gedən geniş və füsunkar yolda özünü çox rahat hiss eləyirsən. Diqqətəlayiq memarlıq elementləri ilə bol tikililər yol boyu diqqətini cəlb edir, xüsusən Heydər Əliyev Mərkəzinə heyran qalırsan. Axşam Bakısının gözəlliyi bir başqa aləmdir. Dənizkənarı Milli Park, mərkəz və ona yaxın yerləşən binalar, körpülər, yollar yüksək səviyyədə işıqlandırılır. Şəhərin ən müxtəlif yerlərində toplaşan şən və qayğısız gəncləri görürsən.
Bakıda yaddaşa yazılacaq bir şey də var: istəsən dənizkənarı parkda İkinci Dünya müharibəsi veteranı ilə şahmat da oynaya bilərsən».
Frankfurter Allgemeine (Almaniya)
***
Ən nəhayət, vətən insanın doğulduğu yerdən başladığı üçün, əziz oxucularım, qısaca sizə doğulduğum Quba bölgəsi barədə də söz açmaq istəyirəm. Bu barlı-bağatlı, ecazkar təbiətə malik qədim diyarın o qədər özəllikləri var ki.
Bakıdan 168 km şimalda, Böyük Qafqazın Şahdağının yamaclarında, dəniz səviyyəsindən 600 metr yüksəklikdə, Qudyalçayın sahilində yerləşən Quba dünyada öz alması ilə məşhurdur. Xüsusən, burada yetişən ağ alma çox unikaldır.
Dünyada, həm də Quba xalçaları məşhurdur. Dünyanın bir çox məşhur muzeylərində, bir çox şəxsi kolleksiyalarda orijinal naxışları ilə seçilən Quba xalçaçılıq məktəbinə məxsus Çiçi, Yerfi, Qımıl kimi xalçalara rast gəlmək olar.
Qubanın başqa bir unikallığı rayon ərazisindəki bənzərsiz kənd və qəsəbələrə malik olmasıdır. Burada dəniz səviyyəsindən 2500 metr yüksəklikdə Xınalıq kəndi mövcuddur ki, kəndin əhalisi öz dili ilə ayrıca etnoqrafik qrup təşkil edir. 5000 illik tarixə malik Xınalıq fenomeni, təsadüfi deyil ki, bəşər tarixində ən zəngin etnoqrafik dəyərlərdən hesab olunur.
Eyni zamanda Qubada dünya yəhudilərinin ən böyük icmalarından birinin yaşadığı məşhur Qırmızı Qəsəbə yerləşir. Qafqazın Yerusəlimi adını almış bu qəsəbəyə qafqaz yəhudiləri 1797-ci ildə Quba xanı Fətəli xanın sayəsində gəlmişlər. O vaxt onlar daim yaşadıqları Dağıstan ərazisində yerli Surxay xanın əmri ilə soyqırıma məruz qaldıqlarından, sərhədi keçərək Azərbaycana adlamışdılar, Fətəli xan da onlara Qubanın ən səfalı yerində məskunlaşmağa izn vermiş, onları himayəsinə götürmüşdü.
Bir vaxtlar Qafqaz Albaniyasının tərkibində olan, bu qədim şəhərin yaranma tarixi, mənbələrə görə XIII əsrə gedib çıxır. Rayon ərazisində XI-XII əsrə aid müdafiə qüllələri, XVI-XIX əsrlərə aid Subaba və Ağbil türbələri, Tağlı körpü, Hacı Cəfər və Cümə məscidləri, Ələmu qalası, Atəşpərəstlər məbədi qiymətli memarlıq abidələrindən sayılır. XVII-XIX əsrlərə aid edilən Çuxur hamam isə xüsusilə məşhurdur. Şərq memarlığının incilərindən sayılan bu abidəni məşhur fransız yazıçı Aleksandr Düma da vəsf edib. Qafqaz səyahəti zamanı burada çimən Düma, göründüyü kimi hədsiz məmnunluq hissi keçiribmiş.
Mən bir neçə kəlmə Qubanın ecazkar təbiətindən də söz açmasam, günah işlətmiş olaram. Quba rayonu ölkəmizə təşrif buyuran turistlərin ən sevimli yerlərindən biridir.
Təbii bulaqları ilə, itburnu, alma, armud, əzgil, qoz, fındıq, zoğal, yemişan kimi yabanı bitkilərlə, müalicəvi əhəmiyyətli otlarla zəngin olan, dərinliklərində ceyran, tülkü, çöl donuzu, canavar, ayı kimi heyvanlar yaşayan Qəçrəş meşəsi, dadlı çapaq balığı ilə bol olan əzəmətli Qudiyalçay, kanyonvari dərənin yamacında Yura dövrü əhəngdaşı suxurlarının səthə çıxması ilə əlaqədar yaranmış 60 metr hündürlüyə malik Afurca şəlaləsi, dağ havası ilə yaşıllığın yaratdığı misilsiz oksigen mənbəyi sayılan Təngəaltı dərəsi turistlərin sevgi ilə üz tutduqları populyar turist marşrutlarıdır.
Təsadüfi deyil ki, belə bir el deyimi yaranıb: «Qubaya bir gələn, hökmən yenə də gələr». Böyük Azərbaycan şairi Məmməd Araz isə yazıb: «Qubanı görməmisənsə, demə ki, Azərbaycanı görmüşəm.
“Ədəbiyyat və incəsənət”
(01.02. 2023)
Bu gün “Özünü kəşf et” adlı ustad dərsi olacaq
Azərbaycan Rəngkarlıq Muzeyində rəssamlığa həvəsi olan 16 yaşdan yuxarı gənclər üçün nəzərdə tutulmuş “Özünü kəşf et” adlı ustad dərsləri davam edir. Bu ilin ilk dərsi bu gün Hüseyn Haqverdiyevin iştirakı ilə “Həndəsi kodlar” mövzusuna həsr olunacaq.
Ustad dərsinin iştirakçıları kağızdan həndəsi fiqurlar kəsib, vizual təsvirlər yaradacaqlar. Bu texnika onlara həndəsə və formalar ilə təcrübə aparmağa imkan verəcək.
Növbəti dərs fevralın 8-də Müşfiq Heydərovun rəhbərliyi ilə “Relyef heykəltaraşlığı” mövzusuna həsr ediləcək.
Ustad dərsi ilk dəfə heykəltaraşlıqda özünü sınamaq və ya bu sənət növündə bacarıqları dərinləşdirmək imkanı verir. İştirakçılar öz unikal heykəltaraşlıq relyeflərini yaradacaqlar.
Fevralın 15-də isə dərslər Miraslan Zeynin rəhbərliyi ilə “Tekstura və kollaj” mövzusunda keçiriləcək. Bu ustad dərsində müasir incəsənətin qarışıq texnikalarından istifadə olunacaq. İştirakçılar kollaj texnikasından istifadə edərək, kətan üzərində əsərlər yaradacaq və əsərlərinə müxtəlif fakturalar verəcəklər.
Fevralın son dərsi 22-də Bəhruz Kəngərlinin iştirakı ilə “Rəngkarlıq fakturası” mövzusunda olacaq.
Ustad dərsi, iştirakçılara ənənəvi rəngkarlığa yeni müasir bucaqdan baxmağa, həmçinin əsas texnika və üsullarla tanış olmağa imkan verəcək. Akril boyalar və markerlərdən istifadə edərək, iştirakçılar öz fikirlərini və ideyalarını kətan üzərinə köçürəcəklər.
Qeyd edək ki, təcrübəsindən asılı olmayaraq hər kəs dərslərdə iştirak edə bilər. Bütün ləvazimatlar muzey tərəfindən qarşılanır.
Yerlər məhdud olduğundan qeydiyyatdan keçmək zəruridir. Qeydiyyat çərşənbə axşamı – bazar günü saat 12:00-dan 20:00-dək aparılır.
Ustad dərsləri ödənişsizdir.
“Ədəbiyyat və incəsənət”
(01.02.2023)
Ötən il aliment tələbləri üzrə 100 milyon manat vəsait ödətdirilib
Ötən il ərzində e-xidmətlərindən istifadə sayı 2.4 milyonu ötüb. Ölkəmizin iqtisadi tərəqqisi və mülki dövriyyənin artması notariat və vətəndaş vəziyyəti aktlarının qeydiyyatı ilə bağlı əməliyyatların çoxalmasına səbəb olub. İl ərzində 4.7 milyondan çox notariat hərəkəti rəsmiləşdirilib, əhalinin sosial rifahının və demoqrafik inkişafın təzahürü olaraq nikah və doğum sayının 10 faizədək artması məmnunluq doğurur.
Bu barədə yanvarın 31-də ədliyyə naziri Fikrət Məmmədovun sədrliyi ilə nazirliyin hibrid formatda keçirilən kollegiya iclasında bildirilib.
Qeyd edilib ki, eyni zamanda, boşanmanın sayı nəzərəçarpacaq dərəcədə azalıb və nazirlik tərəfindən təşkil olunan mediasiya xidmətləri nəticəsində hər 5 nəfərdən birinin bu fikirdən daşınmasına nail olunub.
Vətəndaşların pozulmuş hüquqlarının bərpasında mühüm rol oynayan məhkəmə qərarlarının icrası üzrə təsirli tədbirlər davam etdirilərək yarım milyondan çox sənədin icrası təmin edilib, hüquqi və fiziki şəxslərə əvvəlki illə müqayisədə 2,4 dəfə çox - 1,4 milyard manat, o cümlədən aliment tələbləri üzrə 100 milyon manat vəsait ödətdirilib.
“Ədəbiyyat və incəsənət”
(01.02.2023)
Fevralın 3-dən ictimai nəqliyyatda gedişhaqqı bahalaşacaq
Metroda sərnişindaşıma tarifi 10 qəpik artırılmaqla 1 gediş üçün 40 qəpik, ölkə üzrə tarifin yuxarı həddi şəhərdaxili avtobus marşrutlarında 40 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 0,40-1,00 manat təsdiq edilib. Şəhərlərarası avtobus marşrutlarında isə tarifin yuxarı həddi 1 kilometr üçün 3 qəpik səviyyəsində müəyyən olunub (əvvəlki tarif 2,4 qəpik).
Yeni tariflər Tarif (qiymət) Şurasının yanvarın 31-də keçirilən növbəti iclasında təsdiq edilib.
Qərar 2023-cü il 3 fevral tarixindən qüvvəyə minir.
“Ədəbiyyat və incəsənət”
(01.02.2023)
“Macarıstan ilə Azərbaycan arasındakı ikitərəfli münasibətlər ciddi sınaqlardan çıxıb”
İkinci Dünya müharibəsindən sonra formalaşan siyasi konfiqurasiya artıq etibarlılığını itirib. Hazırda XXI əsrin siyasi konfiqurasiyasının formalaşma prosesinin getdiyini demək mümkündür. Belə ki, dövlətlər arasında siyasi, iqtisadi, hərbi kontekstə imzalanan müqavilələr XXI əsrin konfiqurasiyasını hazırlayır. 1994-cü ildə imzalanan atəşkəs və “Əsrin müqaviləsi” bu mənada müstəqil Azərbaycan dövlətinin siyasi və iqtisadi baxımdan varlığını təmin edən ilkin anlaşmalar olub. Lakin həm XXI əsrin prioritetləri dəyişib, həm də Azərbaycan Qarabağda qazandığı Zəfərlə fərqli bir mərhələyə daxil olub. Vətən müharibəsində əldə olunan Qələbə Azərbaycan dövlətinin beynəlxalq statusuna ciddi şəkildə müsbət təsir edib.
Rusiya-Ukrayna müharibəsi Avropa dövlətlərini enerji təminatında alternativləri düşünməyə vadar edir. Belə ki, bu gün enerji təhlükəsizliyi Avropa üçün prioritetə çevrilib. Bu mənada enerji məsələsi postmüharibə dövründə Azərbaycan-Avropa münasibətlərinin tənzimlənməsi, eyni zamanda, Brüssel nəzdində rəsmi Bakının ciddi, etibarlı tərəfdaş kimi əhəmiyyətini artırıb.
Bu sözləri AzərTAC-a açıqlamasında siyasi elmlər üzrə fəlsəfə doktoru Orxan Vəliyev söyləyib.
Politoloq vurğulayıb ki, Macarıstan ilə Azərbaycan arasındakı ikitərəfli münasibətlər ciddi sınaqlardan çıxıb. Uzunmüddətli münasibətlər, həmçinin Prezident İlham Əliyev və Baş nazir Viktor Orbanın xüsusilə Türk dünyası çərçivəsində sıx əlaqələri iki ölkə arasında imzalanması nəzərdə tutulan sənədlərin üç gün kimi qısa müddətə razılaşdırılmasının əsas səbəblərindəndir. Prezident Əliyev çıxışında bunu belə ifadə etdi: “Milli ənənələrə sadiqlik, ailə dəyərlərinin qiymətləndirilməsi kimi prinsiplər bizim həyat prinsiplərimizdir. Həm ikitərəfli münasibətlərə baxışlarımız eynidir, həmçinin dünyada gedən prosesləri də biz eyni prizmadan qiymətləndiririk” .
Orxan Vəliyev qeyd edib ki, Macarıstanın Baş naziri Viktor Orban öz növbəsində enerji marşrutlarının şaxələndirilməsində Azərbaycanı “gizli silah” kimi ifadə edib. İmzalanan sənədlər enerji başda olmaqla, 6 məsələni ehtiva edir. Münasibətlərin strateji tərəfdaşlıq səviyyəsinə yüksəldilməsi isə hər iki ölkə üçün əhəmiyyət kəsb edir. Belə ki, Macarıstan həm enerji təminatı, həmçinin Azərbaycandan gələcək qaz və elektrik enerjisinin ötürülməsində tranzit ölkə olmağa ümid edir.
“İki ölkə arasında imzalanan sənədlər arasında enerji məsələsi ilk sırada yer alıb. Bununla belə, ikitərəfli münasibətlərin strateji tərəfdaşlıq səviyyəsinə yüksəldilməsi Azərbaycanın qeyri-neft sektorunun inkişafına da töhfəsini verə bilər. Digər tərəfdən Azərbaycan-Macarıstan münasibətlərinin inkişafı Türk Dövlətləri Təşkilatının (TDT) xüsusilə iqtisadi bazasının inkişafına öz təsirini göstərəcək. Belə ki, Prezident Əliyevin Macarıstan səfərindən bir neçə gün əvvəl TDT-nin Baş katibi Kubanıçbek Ömüralıyevin Macarıstana səfəri baş tutub. Beləliklə, postmüharibə dövründə xüsusilə enerji sahəsində imzalanan sazişlər Azərbaycanın Avropanın enerji təchizatında əsas və etibarlı tərəfdaşlardan biri olmağa davam edəcəyini göstərir. Regionda siyasi gərginliyə baxmayaraq, rəsmi Bakının rasional xarici siyasət xəttini davam etdirməsi bu məsələdə həlledici amildir”, - deyə Orxan Vəliyev vurğulayıb.
Şəkildə: Yanvarın 30-da Budapeştdə Azərbaycan Respublikasının Prezidenti İlham Əliyevin və birinci xanım Mehriban Əliyevanın şərəfinə Macarıstanın Baş naziri Viktor Orban və xanımı Aniko Levai tərəfindən rəsmi nahar verilir.
“Ədəbiyyat və incəsənət”
(01.02.2023)
Xəyanəti bağışlamaq olar?
“Həyat yoldaşım mənə də qadağalar qoyub. Harasa getməyə icazə vermirsə, demək ki, nələrsə bilir və ona görə icazə vermir. Evdə böyük odur. Deməli, belə məsləhətdir".
“Ədəbiyyat və incəsənət”
axşam.az-a istinadən xəbər verir ki, bu sözləri aşıq Zülfiyyə İbadova "ATV səhər"ə müsahibəsində deyib. Sənətçi xəyanəti bağışlamağın mümkün olduğunu bildirib:
"Bizim sənət adından da bəllidir ki, incədir. Hər şeydən ləkə götürə bilərsən. Ailənin sirri qorunmalıdır. Yoxsa, ərim mənə onu-bunu dedi... İnsan hər cılız şeyin üstündə dalaşıb aildə qan-qaraçılıq salmaz. Hansısa bir mövzudan söhbət gedirsə, son sözü kişi deyib, möhür vurmalıdır. Kişi səhv edə bilər. Xəyanət olmasa yaxşı olar. Elə qadınlar var ki, deyir ərim xəyanət etdi və mən də öz bildiyimi edim. Səhvsiz insan olmur. Xəyanəti ailəyə, uşaqlara, qınaqlara görə bağışlamaq olar. Şəxsi fikrimdir, mən bağışlayardım".
“Ədəbiyyat və incəsənət”
(01.02.2023)
Bu gün gənc rəssamların əsərlərindən ibarət rəsm sərgisi açılır
Bu gün “Nur Art House” qalereyasında “Arts Council Azerbaijan”ın təşkilatçılığı ilə gənc və həvəskar rəssamların iştirakı ilə rəsm sərgisi açılacaq. “START” layihəsi çərçivəsində reallaşacaq sərgi Gənclər Gününə həsr olunacaq.
“Arts Council Azerbaijan”ın rəhbəri Dadaş Məmmədovun məlumatına görə, layihənin məqsədi incəsənətin təbliğində gənclərin rolunu artırmaq, onların bu işin təbliğatçısı qismində çıxış etmələrinə dəstək olmaqdır.
Sərgidə müxtəlif mövzuda işlənən 50-dək sənət əsərlərinin nümayişi nəzərdə tutulur.
Sərgi üç gün ziyarətçilər üçün açıq qalacaq.
“Ədəbiyyat və incəsənət”
(01.02.2023)
“Eşq və ölüm”də Azər və Baycanın faciəli eşqi nümayiş olunacaq
Akademik Opera və Balet Teatrı fevral ayının ilk tamaşasını bu gün təqdim edəcək. Özü də bu, adi tamaşa olmayacaq. Polad Bülbüloğlunun müəllifi olduğu “Eşq və Ölüm” baleti onun ad günü münasibəti ilə nümayiş olunacaq. Teatrın kollektivi 2 pərdəli balet tamaşasını bəstəkarın doğum gününə hədiyyə edəcək.
“Ədəbiyyat və incəsənət” portalı xəbər verir ki, “Eşq və Ölüm” baleti məhəbbət və nifrət, dostluq və xəyanət, həyat və ölüm kimi əbədi mövzulardan bəhs edir. "Eşq və ölüm" baletinin süjeti YUNESKO-nun Dünyanın Mədəni İrsi siyahısına daxil olan "Kitabi-Dədə Qorqud" eposundan qaynaqlanır. Əsərin baş qəhrəmanları Azər və Baycanın faciəli eşqi Azərbaycan dövlətinin adını təcəssüm etdirir.
Balet ilk dəfə 2005-ci ildə Azərbaycan Dövlət Akademik Opera və Balet Teatrında Vyana Balet Akademiyasının professoru, baletmeyster Vakil Usmanov tərəfindən səhnəyə qoyulub. Elə 2005-ci ildə Akademik Opera və Balet Teatrının balet truppası həmin tamaşanı Mariinski adına Sankt-Peterburq Akademik Opera və Balet Teatrında, daha sonra Moskvada nümayiş etdirib. 2010-cu ildə isə xoreoqraf Nadejda Malıqinanın təşəbbüsü ilə “Eşq və Ölüm” baleti Yekaterinburq Dövlət Opera və Balet Teatrında səhnəyə qoyulub. Özü də Böyük Teatrının səhnəsində. 2011-ci ildə Yekaterinburq teatrı bu tamaşanı Türkiyənin Ankara şəhərində göstərib. Ümumiyyətlə, bu baletdən ayrı-ayrı musiqi parçaları hər il keçirilən Münxen Opera Sənəti Festivalında musiqi rəhbəri Korneliya Kerssenbrofkun dirijorluğu ilə Azərbaycan Dövlət Akademik Opera və Balet Teatrının simfonik orkestri tərəfindən ifa olunur.
Bu yerdə baletin bıstəkarın 65 illik yibileyindəki təntənəli nümayişini də xatırlamaq yerinə düşər. Böyük Teatr premyerası unudularmı? 2010-cu il fevralın 5-də “Eşq və ölüm" Yekaterinburq Opera və Balet Teatrının quruluşunda təqdim olundu, premyera Moskvada, əzəmətli Böyük Teatrın səhnəsində anşlaqla keçdi. Tamaşanın Rusiya Mədəniyyət Nazirliyi, Moskva hökuməti tərəfindən "Qızıl maska" - "Rusiyanın ən yaxşı tamaşaları" festivalı çərçivəsində təşkil olunmuş nümayişi müəllifin 65 illik yubileyinə həsr edilmişdi.
Tamaşa başlamazdan əvvəl bildirildi ki, artıq ikinci ildir "Qızıl maska" festivalı çərçivəsində "Maska Plyus" müsabiqədənkənar tamaşalar proqramı təqdim olunur. Rusiya Mədəniyyət Nazirliyinin və MDB ölkələrinin Dövlətlərarası Humanitar Əməkdaşlıq Fondunun (DHƏF) dəstəyi olmadan bu proqramı həyata keçirmək mümkün olmazdı.
RF Prezidentinin beynəlxalq mədəni əməkdaşlıq üzrə xüsusi nümayəndəsi, Dövlətlərarası Humanitar Əməkdaşlıq Fondunun (DBƏF) həmsədri Mixail Şvıdkoy "Eşq və ölüm" baletinin Böyük Teatrın səhnəsində premyerasını Azərbaycan-Rusiya mədəni əlaqələrinin möhkəmlənməsi baxımından çox vacib hadisə adlandırdı. Onun sözlərinə görə, Azərbaycan bəstəkarlarının Rusiyada və bütün postsovet məkanında səhnələşdirilən balet tamaşalarına musiqi yazmaları artıq yaxşı bir ənənəyə çevrilmişdir: "Bildiyiniz kimi, Polad Bülbüloğlu dahi Qara Qarayevin, Qara Qarayev isə dahi Şostakoviçin yetirməsidir. Bu baxımdan rus və Azərbaycan musiqi ənənələri arasında varislik və möhkəm tellər vardır. Azərbaycan bəstəkarları Qara Qarayev, Fikrət Əmirov və Arif Məlikov rus balet teatrı üçün musiqi bəstələmişlər. Polad Bülbüloğlu da hazırda bizim sahib olduğumuz həmin o ümumi mədəniyyətin böyük ənənələrini davam etdirir".
Tamaşanın quruluşçu xoreoqrafı Nadejda Malıgina, quruluşçu dirijoru Fabio Mastranjelo, quruluşçu rəssamı İqor İvanov idilər.
Moskvalılar baleti heyranlıqla, gurultulu alqışlarla qarşılamışdılar. Sonra səhnəyə qalxan Polad Bülbüloğlu səmimi qəbula və alqışlara görə dərin minnətdarlığını bildirərək demişdi: "Əlbəttə, Böyük Teatrın səhnəsində tamaşa göstərmək hər bir kollektiv üçün şərəf və fəxrdir. Çox şadam ki, mənim musiqim, mənim baletim bu gün qocaman Yekaterinburq teatrının ifasında təqdim olunur".
Polad Bülbüloğlu jurnalistlərlə söhbətində bildirmişdi ki, bu, onun həyatında müstəsna bir gündür, çünki 65 illik yubileyi ərəfəsində Böyük Teatrda onun baletinin premyerası olmuşdur. Polad Bülbüloğlu bu gözəl hədiyyəyə görə Rusiya Mədəniyyət Nazirliyinə, DHƏF-ə, Böyük Teatrın rəhbərliyinə təşəkkürünü bildirərək demişdi ki, Rusiyanın bu qocaman səhnəsində tamaşa premyerası hər bir bəstəkarın yaradıcılığında çox əlamətdar bir hadisədir: "Sevinirəm ki, Azərbaycan musiqisi, Azərbaycan bəstəkarının musiqisi yenə də Moskvada səslənir və zənnimcə, bu, təkcə mənim deyil, bütün Azərbaycan mədəniyyətinin nailiyyətidir, ənənələrin davam etdirilməsidir, çünki bu səhnədə böyük Qara Qarayevin və digər bəstəkarlarımızın tamaşaları oynanılmışdır. Sevindirici haldır ki, italiyalı dirijorun, rusiyalı quruluşçu xoreoqrafın və Azərbaycan bəstəkarının birgə zəhməti ilə ərsəyə gəlmiş bu beynəlxalq layihə Rusiya paytaxtının mərkəzində həyata keçirilir və böyük hərarətlə qəbul edilir. Mən Azərbaycan mədəniyyətinin, Azərbaycanın adının həmişə yüksəkdə durmasını istəyirəm".
Əminik ki, tamaşa Bakı səhnəsində də uğurla keçəcəkdir.
Adətən bu tamaşanı ailəsi ilə izləyən Polad Bülbüloğlunun bu dəfə də ailəsi ilə birgə zalda olacağı gözlənilir.
Bəstəkarın mahnılarını sevirik, amma baleti də sevilməyə layiqdir.
Biletləri teatrın kassası ilə yanaşı, şəhərin bütün kassalarından və iticket.az saytından əldə etmək olar.
Şəkillərdə: Tamaşadan səhnə; Bəstəkar ailəsi ilə.
“Ədəbiyyat və incəsənət”
(01.02.2023)
