Super User
“Canlı bir ölü dolaşır şeir dəftərimdə” - güneyli şair Arda Xaninin şeirləri
“Ədəbiyyat və incəsənət” portalının çox sevilən Güneydən səslər rubrikasında portalımızın Cüney Azərbaycan təmsilçisi Əli Çağla bu bazar ertəsində sizləri Arda Xaninin şeirləri ilə tanış edir.
Qeyd: Yazının orfoqrafiyasına toxunulmayıb.
Arda Xani 1993-cü ildə Xiyox şəhərində anadan olubdur. Arda bu günlər gənc şairlər arasında şeirləri bəyənilən xarakterə çevrilibdir. Sosial şəbəkələrdə Azərbaycan ədabiyyatının təbliğatında çalışır.
SƏHƏR
Özümə hər axşam şeir yazıram,
Yazdığım nə varsa, silirəm səhər.
Gecələr yanımda olsan da mənim,
Yuxu olduğunu bilirəm səhər.
Dəli tək özumlə danışsam da mən,
Duyduğum hər sözlə alışsam da mən,
Özümdən qaçmağa çalışsam da mən,
Dolanıb özümə gəlirəm səhər.
Darıxıb, sıxılıb hey dığlasam da,
Gördüyüm hər şeyə göz bağlasam da,
İçimdə yas tutub çox ağlasam da,
Hamının üzünə gülürəm səhər.
Çevrəmdə hamı var, yalnız qalıram,
Divara baxıram, hara dalıram,
Hər gecə yaşayıb nəfəs alıram,
Yenə də ölürəm, ölürəm səhər.
BU GÜNLƏR
Gülüşüm ağacdan tökülən yarpaq,
Pəncərə önündə gözüm yoldadı.
İçimə atdığım neçə xətt şeir,
Bəlkə də hər şeyim qalma-qaldadı.
Nə qədər dayansam, nə qədər getsəm,
Yolumu tapmağa həvəs yox daha.
Dağlayıb çox zaman əlimin dalın,
Hər dönə batıram yeni günaha.
Gördüyüm bu insan, mənə bənzəmir,
Bu günlər uduram çox sözlərimi.
Gözümü yumanda ölürəm sanki,
Qorxuram bağlayam, aç gözlərimi.
Bu günlər görürsən acı çəkirəm,
Beynimdə sevginin gülləsi qalıb.
Üstümə qar yağıb, qış-borandayam,
Canımda ölümün çilləsi qalıb.
AD GÜNÜM
Mən nə yaşamışam?! Neçə yaşım var?!
Yaşamaq illərdir yorur qəlbimi.
Yaşımın üstünə artırdı ancaq,
Xəyalım saçı ağ bir uşaq kimi.
Başımda dünyalar oynayır mənim,
Baxışım yenə də süzülür, axır.
Güzgüdə qorxduğum cansız bir şəkil,
Mən ona baxmıram, o mənə baxır.
Gördüyün bu insan mənə bənzəmir,
Mən hələ özümdən nəsə bilmirəm.
Mənim həsrətimi kağazlar bilir,
Danışa bilmirəm, susa bilmirəm.
Bir otaqdır, bir mən, bir də siqaret,
Çəkirəm ölümə nəfəs-nəfəs can!
Pəncərə önündə şeir oxuyur,
İçimdə illərdir yalnız yaşayan.
Yaşadım deyirəm! Neçə yaşım var?!
Özümlə edirdim mən, inad Günüm.
Üzgünəm, yorğunam, biraz ümidsiz,
Və bu gün deyəsən, mənim ad günüm...
URMU
Urmuya qan dolub su şəkilində,
İntihar edilən yerdə dayanıb.
İçində gəzdiyim torpağın indi,
Hər evdə iki-üç satqın oyanıb.
Hələ də axacaq damcı-damcı su,
Urmu quruyunca bizim damlardan.
Urmunu evimdə gizlədirəm mən,
Ölkədə qan içən bu adamlardan.
Keçdiyim Urmuda qorxu səsi var,
Ölüm qoxusunu unutmamışam.
Əlimi vurduğum yaşlı gəlindən,
İllərdir gölümdən su tutmamışam.
Həsrətim göyərir su damcısına,
Nisgilim boy atır duzlu su ilə.
Aylardır köçürəm öz vətənimdən,
Hər gecə yatıram bu qorxu ilə.
Urmunun duzların al-ver edirlər,
Ölkədə insanlar duz-çörək yeyir.
Ölümün özünü görürük burda,
Urmunun duzundan qoxuyur şeir.
ÖZÜN GƏL
Mənə məktub yaz
Dəlicəsinə göydə dans edən ulduzları.
Mənə məktub yaz
Özləmlərini bilmirəm.
Səni hiss edə biləcək şəklini yox məndə
Şəkilini qoy paketə göndər.
Can alan dəqiqələrdən vaz keç
Ömrünü yaz.
Gecələr hansı düşüncəylə uyuduğunu
Səhərlər hansı öpücüklə oyandığını
Küçələrdə qorxduqca hansı əllərə sığındığını
Mənə məktub yaz.
Hər sabah günəş burdan çıxıb, orda batır
Sən yaşamın o tayındasan!
Mən bu tayında çırpınıram
Hər gün batıram sizin oralarda...
Hər gecə bir çillədir bizim buralarda
Soyuqdur soyuq!
Günəşi gizlədirsən gözlərində
Qaynağı yox bu gecələrin səhər olmağı.
Yarımçılıq qaldı
Yaşanmadıq
Yaşaya bilmədik
Yaşlandıq
Yaşayış, yaş-yaş axır gözümdən
Canlı bir ölü dolaşır şeir dəftərimdə
Mənə məktub yaz.
Olduğun yeri anlat mənə
Hələ də Türkcə danışan varmı orda?
“Divar-divar mirizəm
Dər la be laye şəhri ke to ra qom kərdeəm”.
İncə-incə qalınlaşır sözlərim
Telefonun o biri ucunda duran qadın!
Səsini məktub yaz.
Qucağını məktub yaz.
Qələmi burax, mənə məktub yazma...
Özün gəl!
“Ədəbiyyat və incəsənət”
(09.01.2023)
ABŞ-Azərbaycan Mədəniyyət Fondu mərhum Arye Qutun adına mükafat təsis edib
ABŞ-Azərbaycan Mədəniyyət Fondunun İdarə Heyəti iki ölkə arasında son 15 ildə dostluq münasibətlərinin daha da dərinləşməsində, eləcə də Azərbaycan həqiqətlərinin İsraildə təbliğində müstəsna rol oynamış mərhum israilli ictimai xadim və jurnalist, Xocalı həqiqətlərinin dünyada yayılmasında rolu olan Arye Qutun adına xüsusi mükafat təsis edib.
Bundan sonra hər il xüsusi mərasimdə təqdim olunacaq mükafat Azərbaycan və İsrail arasında əlaqələrin möhkəmlənməsinə töhfə verəcək şəxslərə və ya təşkilatlara təqdim olunacaq.
Xatırladaq ki, ABŞ-Azərbaycan Mədəniyyət Fondunun prezidenti Nurit Qringer və ABŞ-nin “Double Trouble Production” şirkətinin baş direktoru Eti El-Kissin dəstəyi ilə İkinci Qarabağ müharibəsində yaralanmış azərbaycanlı hərbçi Arif Hacıyev haqqında lentə alınan “Göz qırpımında” adlı sənədli film də Arye Qutun əziz xatirəsinə həsr olunub.
Fondun rəhbəri Nurit Qringer bildirib ki, 2022-ci ilin iyul ayında sonuncu dəfə Arye Qutla görüş zamanı Vətən müharibəsində ağır yaralanan qazi Arif Hacıyev haqqında sənədli film çəkilməsi ideyası ilə bölüşüb və Arye Qut bu təşəbbüsü dəstəkləyib.
Qeyd edək ki, 44 günlük Vətən müharibəsi dövründə yaralanmış 24 yaşlı azərbaycanlı əsgər Arif Hacıyevin görmə qabiliyyəti israilli donor tərəfindən verilən göz və israilli həkim Yişhay Falikin icra etdiyi əməliyyat sayəsində bərpa edilib.
Nəzərdə tutulub ki, Arye Qutun adını daşıyan mükafat 2023-cü ildə Bakıda keçirilməsi planlaşdırılan “Göz qırpımında” sənədli filminin təqdimatı zamanı seçilmiş şəxsə və ya təşkilata təqdim olunsun.
Mərhum Arye Qut 15 ildən çox Azərbaycan və İsrail arasında münasibətlərin yaxınlaşmasına xidmət edib və Azərbaycanda İsrailin xoşməramlı səfiri kimi tanınırdı.
1975-ci ildə Bakıda anadan olan Arye 2000-ci ildə İsrailə köçüb, oradan Bakı Beynəlxalq Multikulturalizm Mərkəzinin nümayəndəliyinə rəhbərlik edib. O, Türkiyə-İsrail münasibətləri, İsrail-Azərbaycan strateji tərəfdaşlığı, Cənubi Qafqazdakı geosiyasi vəziyyət, Ermənistan-Azərbaycan münaqişəsi ilə bağlı 700-dən çox analitik məqalənin müəllifi olub.
Ruhu şad olsun!
Şəkildə: ABŞ-Azərbaycan Mədəniyyət Fondunun prezidenti Nurit Qringer və
Arye Qut.
“Ədəbiyyat və incəsənət”
(09.01.2023)
Qərbi Azərbaycan İcmasının tərkibində Elm komissiyası yaradılıb
Qərbi Azərbaycan İcmasında İcma rəhbərliyinin İcmanın müxtəlif strukturlarında təmsil olunan, Qərbi Azərbaycan üzrə bir qrup tədqiqatçı alimlə görüşü keçirilib.
“Ədəbiyyat və incəsənət” pprtalı xəbər verir ki, Qərbi Azərbaycan İcmasının Mətbuat Xidmətinin yaydığı məlumata görə, görüşdə İcmanın qarşısında duran vəzifələr, Qərbi Azərbaycan həqiqətlərinin sistemli şəkildə tədqiqi, nəşri və təbliği məsələləri müzakirə olunub.
Tədbiri giriş sözü ilə açan Qərbi Azərbaycan İcmasının sədri, deputat Əziz Ələkbərli görüşün məqsədi barədə məlumat verərək, Qərbi Azərbaycan həqiqətlərinin həm daxili, həm də xarici auditoriya üçün çatdırılma zərurətindən və üsullarından bəhs edib.
Bir neçə saat davam edən müzakirələr zamanı mövcud problemlərin bütün aspektləri nəzərdən keçirilib.
Müzakirələrdə İcmanın sədri, deputat Əziz Ələkbərli, İcma sədrinin müavini, deputat professor Hikmət Babaoğlu, İcmanın şöbə müdiri Miraslan Bəkirli, professor Həsən Bayramoğlu, professor Fərrux Rüstəmov, professor, AMEA-nın Tarix İnstitutunun Qərbi Azərbaycan tarixi çöbəsinin müdiri Cəbi Bəhramov, tanınmış tarixçi alim Nazim Mustafa, dosent Cəlal Allahverdiyev, tədqiqatçı Mirzə Ənsərli iştirak və çıxış ediblər.
Tədbirdə Qərbi Azərbaycan İcması tərkibində Elm komissiyasının yaradılması, onun müxtəlif tədqiqat sahələri üzrə bölmələrinin təşkil edilməsi və Komissiyanın işinə bu elm sahələri üzrə alimlərin cəlb edilməsi qərara alınıb. Komissiyanın işinə rəhbərlik Qərbi Azərbaycan İcması sədrinin müavini, deputat professor Hikmət Babaoğluya tapşırılıb.
“Ədəbiyyat və incəsənət”
(09.01.2023)
Faciələr yaşamış Azərbaycan gözəlinin hekayəti
Leyla Bədəlbəylinin anadan olmasının 103-cü ildönümü tamam oldu
Bazar günü Azərbaycan teatrının görkəmli nümayəndəsi, milli kino sənətimizin bənzərsiz siması Leyla Bədirbəylinin anadan olmasının 103 illiyi tamam oldu. “Azərbaycan gözəli” adını almış aktrisanın çox maraqlı, həm də faciəli bir həyat tarixçəsi var.
Leyla Bədirbəyli fitri istedada malik teatr ustası kimi ifa üslubundakı səmimiyyət, məlahət və təbiilik sayəsində dramaturqlarımızın və dünya ədəbiyyatı klassiklərinin çox sayda qadın qəhrəmanına zəngin boyalarla parlaq səhnə həyatı verib.
Xalq artisti, Dövlət mükafatı laureatı Leyla Bədirbəyli yaratdığı təkrarsız obrazlarla öz adını Azərbaycan sənət tarixinə yazdırmağı bacaran sənətkarlardandır.
O, 1920-ci il yanvarın 8-də Bakıda dünyaya göz açıb. Anası Bikə xanım Şəmkirdə Musa xanın qızı, atası Ağalar bəy isə həmin bölgənin kənd bəylərindən olub.
Balaca Leylanın uşaqlıq illəri Bakıda, daha doğrusu, İçərişəhərdə keçib. Leyla Bədirbəylinin sənətə gəlməyində anası Bikə xanımın böyük rolu olub. Belə ki, həmin illərdə Əli Bayramov klubundakı qadınlar dərnəyinə gedən Bikə xanım böyük qızı Leylanı da özü ilə aparırmış. Rəqsə böyük marağı olan gələcəyin məşhur aktrisasının istedadını üzə çıxardığı ilk sahə də məhz rəqs olur. Belə ki, fərqli xarici görünüşə və rəqs bacarığına sahib olan L.Bədirbəyli Azərbaycan Dövlət Filarmoniyasına dəvət edilir. Filarmoniyada çalışdığı illərdə “Ayna” və “Bakının işıqları” filmlərində rol alan Leyla Bədirbəyli 1941-ci ildə 21 yaşında Azərbaycan Dövlət Akademik Milli Dram Teatrına dəvət olunur. O, 33 il bu sənət məbədinin səhnəsində bir-birindən fərqli qadın obrazları yaradıb. Azərbaycan teatrının inkişafında Leyla Bədirbəylinin xidmətləri həmişə xatırlanır. O, milli teatrımızın səhnəsində yaratdığı Sara (“Solğun çiçəklər”), Solmaz (“Od gəlini”), Şəlalə (“Yalan”), Dezdemona (“Otello”), Liza (“Canlı meyit”), Nərminə (“Göz həkimi”) və digər bu kimi obrazları ilə mədəniyyət tariximizin qızıl səhifələrini yazıb.
Kinoda Leyla xanımın parlamağında Üzeyir Hacıbəylinin böyük rolu olur. Belə ki, 1945-ci ildə “Arşın mal alan” filmi çəkilərkən Rza Təhmasib Gülçöhrə rolu üçün gözəl xarici görünüşə malik qız axtarırmış. Məhz Üzeyir Hacıbəylinin tövsiyəsindən sonra Leyla Bədirbəyli bu rola təsdiqlənir.
Leyla Bədirbəylinin Azərbaycan kinosunun inkişafındakı fədakarcasına xidməti təkcə Gülçöhrə ilə bağlı deyildir. İstedadlı aktrisa 50-yə yaxın filmdə, o cümlədən “Səbuhi”, “Fətəli xan”, “Dəli Kür”, “Sevil”, “Onun böyük ürəyi”, “Dərviş Parisi partladır” filmlərində unudulmaz, eləcə də yaddaqalan obrazlar yaradıb.
Leyla Bədirbəylidən Tanrı heç nəyi əsirgəməmişdi. Çox gözəl idi, istedadlı idi. Onu sevən, anlayan, qiymətləndirən və həyatın bütün təzyiqlərindən qoruyan həyat yoldaşı vardı. 55 il bir yerdə xoşbəxt, qayğısız həyat sürmüşdülər. İki qız övladları vardı. Bütün bunlar Leyla xanımın təravətli qalması üçün stimul idi. Bir gün həyat yoldaşı ona “sənə yeni maşın almaq üçün Almaniyaya gedəcəm” deyir. Leyla xanım maşınları olduğu üçün etiraz edir, “neyniyirsən yeni maşını, mənə bu da bəsdir” deyir. Kamil “o maşın daha sənə yaraşmır” cavabını verir və səhəri Almaniyaya yola düşür.
O gedir, maşını alır, yol uzun olduğu üçün məsuliyyəti öz boynuna çəkməyib orda yaşayan bir dostu ilə Bakıya doğru yola çıxırlar. Yağışlı havada necə olursa maşın sürüşüb yoldan çıxır və hər ikisi qəzada həlak olur. Onun cənazəsi Bakıya gələndə Leyla xanım dərddən üzülür.
Ərini ürəkdən sevən həyat yoldaşı üçün bu itkiyə dözmək çox çətin olur. Ancaq bu, bəs etmirmiş kimi, dərd üzərinə daha bir dərd gəlir... Heç bir il keçməmiş buna bənzər daha bir faciə baş verir. Leyla Bədirbəylinin böyük qızı Lalə xanımı Kukla Teatrının qabağında maşın vurur. Övlad itkisi də ananın ürəyinə dağ çəkir. İki böyük itki Leyla xanımın ömrünü şam kimi əritməyə başlayır. Bu iki ölümdən sonra o özü də tədricən sağkən ölməyə başlayır. Həyatdan küsür. Ər, övlad itkisindən sonra özünə qapanır. 3-4 il isə ümumiyyətlə, evdən çölə çıxmır. Onun üçün artıq heç nəyin marağı yox idi. Nə televizora baxırdı, nə də mütaliə edirdi. Hətta heç kimlə görüşüb danışmaq belə istəmirdi.
Bunu eşidən ölkə başçısı o vaxt Leyla Bədirbəyliyə istiqlal ordenini təqdim etmək üçün onu evdən çıxarda bilir. İllər ərzində bu görüş, bu evdən çıxma ilk və son dəfə olur. Yenə özünə qapanır. Onu həmin təqdimetmə mərasimindən görənlər Leyla xanımın niyə evə qapıldığını yaxşı anlayırdılar. Azərbaycan gözəli belə dərd içində, yaşlı, miskin kimi yaddaşlarda qalmaq istəmir. Onu əvvəlki, Gülçöhrəli Leyla kimi xatırlamalarını istəyir.
1999-cu il noyabrın 23-də Leyla Bədirbəyli gözlərini əbədi olaraq yumur. Dünyasını dəyişən gün də o, heç kimlə danışmayıb. Hamıdan, həyatdan, taleyindən küskün kimi sadəcə gözlərini yumub və gedib.
İndi onun adını kiçik nəvəsi daşıyır.
Görkəmli aktrisanın fəaliyyəti dövlətimiz tərəfindən hər zaman yüksək qiymətləndirilib. Prezident İlham Əliyev 2019-cu ilin dekabrın 29-da imzaladığı Sərəncamla ölkəmizdə Leyla Bədirbəylinin anadan olmasının 100 illiyi ilə əlaqədar silsilə tədbirlər keçirilib.
Ruhu şad olsun!
“Ədəbiyyat və incəsənət”
(09.01.2023)
Mehriban xanım Əliyeva Milad bayramı münasibətilə paylaşım edib
Azərbaycan Respublikasının Birinci vitse-prezidenti Mehriban Əliyeva Milad bayramı münasibətilə rəsmi instaqram səhifəsində paylaşım edib.
Paylaşımda deyilir: “Milad bayramı münasibətilə Azərbaycanın xristian icmasını səmimi-qəlbdən təbrik edir, bütün həmvətənlərimizə möhkəm cansağlığı və xoşbəxtlik arzulayıram!”.
“Ədəbiyyat və incəsənət”
(09.01.2023)
96-nı aşırdın, 100-ə nə qaldı...
Böyük Azərbaycan yazıçısı, “Şərəf” ordenli, “Vicdan susanda” romanı ilə yüz minlərlə insanın sevimlisinə çevrilmiş Vidadi Babanlı ailə üzvləri ilə birgə 96 yaşını qeyd etdi. Ad günündə qızları Leyli və Aygün, oğlu Vüqar, gəlini Tomris, qardaşı oğlu, akademik Məhəmməd Babanlı iştirak edirdilər. Amma bu hələ hamısı deyil.
Qəfildən “Qazax” Xeyriyyə-İctimai Birliyinin sədri İlham Pirməmmədov, birliyin idarə heyətinin üzvü Sultanxanım Nəsibova, BDU-nun Mülki Hüquq kafedrasının müdiri, professor Məhəbbət Dəmirçiyeva və yazıçı Varis təşrif buyurdular. Və onlarla birgə gələn aşıq Avdı öz sazı ilə məclisə rəng qatdı. Dərhal Vidadi müəllim ondan bir “Ruhani” havası istədi, Avdı da məharətlə sazını dilləndirdi.
Müdrik yazıçı indi onun üçün hər doğum gününün bir yubiley olmasını dilə gətirdi, həyatdan heç vaxt narazılıq etməməyi, məğrur və qürurlu yaşamağı hamıya tövsiyə etdi. Xatirələrini danışdı.
Xüsusən “Vicdan susanda” romanı ilə Kommunist Partiyasının necə qəzəbinə düçar olması, bu romanın vaxtı ilə tək Azərbaycanda deyil, postsovet məkanında necə rüzgar qoparması yada düşdü.
Bu yaşda insanı tək qoymaq olmaz, bu yaşda insanın darıxması ağrılıdır. Ona görə də Vidadi müəllim daim qapısının açıq olmasını, qonaqlı-qaralı olmasını arzulayır. İnsanlarla ünsiyyətinin bir an da olsa kəsilməsi onu qorxudur.
Və təsəvvür edin ki, 100 yaşın nəfəsini duyan 96 yaşlı yazıçı bu yaşında gəlinləri Tomrisə diktə edərək yazdırdığı son təhkiyələrinin işıq üzü görməsini, onlara cəmiyyətin necə reaksiya verəcəyini gözləyir. Bu yaşda belə iti zəka, inanın ki, möcüzədir.
Vidadi müəllimi təbrik edir, ona yetişmədiyi arzusu qalıbsa ona yetişməyi arzu edirik.
Məclisin şirin yerində nəticəsi Moskvadan zəng edərək söylədi: “Mən ulu babama ən azı 100 il yaşamağı arzulayıram. Gerisini isə Allah bilər.”
Var ol, böyük şəxsiyyət!
Şəkildə: Məclisin iştirakçıları səbəbkarı əhatə ediblər.
“Ədəbiyyat və incəsənət”
(06.01.2023)
Bazar günü Musiqili Teatr “Paris Notr-Dama ithaf” tamaşasını göstərəcək
Azərbaycan Dövlət Akademik Musiqili Teatrı bazar günü - yanvarın 8-də məşhur fransız yazıçı Viktor Hüqonun “Paris Notr-Dam” əsərinin motivləri əsasında rejissor Samir Qulamovun səhnələşdirdiyi və quruluş verdiyi “Paris Notr-Dama ithaf” tamaşasını nümayiş etdirəcək.
2019-cu ilin noyabrından repertuara daxil edilən bu səhnə əsəri davamlı olaraq çoxsaylı tamaşaçı kütləsini ətrafına toplaya bilir və teatrın ən çox tələb olunan tamaşalarının siyahısında ilk yerdə dayanır.
ideya müəllifi və bədii rəhbəri Əməkdar incəsənət xadimi, sənətşünaslıq üzrə fəlsəfə doktoru Əliqismət Lalayevdir.
Tamaşada bəşəriyyətin nadir tarixi memarlıq incisi, Avropanın əzəmətli simvollarından biri olan Paris Notr-Dam kilsəsində 2019-cu il aprelin 15-də baş vermiş yanğın hadisəsinə ithaf olunub.
“Paris Notr-Dama ithaf”da “Notre-Dame de Paris” müziklinə görə “Ginnesin rekordlar kitabı”na düşən Riçard Konçiantenin və dünyaşöhrətli bəstəkarların: Rixard Ştraus, Tomaso Albinoni, Jorj Bize, Samuel Barberin əsərlərindən istifadə edilib.
Əsərin quruluşçu dirijoru və orkestrləşdirmənin müəllifi Əməkdar incəsənət xadimi Fəxrəddin Atayev, quruluşçu baletmeysterləri Əməkdar artistlər: Zakir və Leyla Ağayevlər, xormeysteri Əməkdar artist Vaqif Məstanov, quruluşçu rəssamı Vüsal Rəhim, musiqi mətnlərinin müəllifi Azərbaycan Yazıçılar Birliyinin katibi, şair İlqar Fəhmi, dirijoru Səməd Süleymanlı, konsertmeysteri Prezident təqaüdçüsü Kamil Həsənov, rejissor assistentləri: Sevinc Məmmədova və Əmrah Dadaşovdur.
Tamaşada rolları Xalq artisti Pərviz Məmmədrzayev, Əməkdar artist Nadir Xasıyev, beynəlxalq müsabiqələr laureatı Aydan Həsənova, aktyorlar: Mehriban Zalıyeva, Əmrah Dadaşov, Nicat Əli, İbrahim Əlizadə, Emin Zeynallı, Hüseyn Əlili, Səmədzadə Xasiyev, Şaban Cəfərov, Telnaz Hüseynova, Murad Əliyev, Fərid Rzayev, Zaur Əliyev, Əli Kərimov, həmçinin xor və balet truppasının artistləri ifa edəcəklər.
“Ədəbiyyat və incəsənət”
(06.01.2023)
Sabah Gülnarə Xəlilovanın əl işləri Norveçdə sərgilənəcək
Sabah - yanvarın 7-də Norveçin paytaxtı Oslo şəhərində, "Deichman Bjorvika" mədəniyyət mərkəzində Azərbaycan Milli Geyim Mərkəzinin rəhbəri, modelyer-dizayner Gülnarə Xəlilovanın "Northern Stories by CİZGİ" ("Şimal hekayələr CİZGİ ilə") adlı ekspozisiyasının açılışı olacaq.
“Ədəbiyyat və incəsənət” portalı Gülnarə Xəlilovaya istinadən xəbər verir ki, tədbir Oslodakı Azərbaycan Evi tərəfindən təşkil olunacaq. Qonaqlara Gülnarə Xəlilovanın Norveç və Qarabağ ornamentləri ilə əl işləri, ipək yaylıqlar və libaslar təqdim olunacaq.
Qeyd edək ki, bundan əvvəl Gülnarə Xəlilovanın kolleksiyaları ABŞ, Böyük Britaniya, İsveç, Avstriya, Rumıniya, Türkiyə, Rusiya, Çin, Qazaxıstan, Qırğızıstan, Özbəkistan, Bolqarıstan, Norveç və digər ölkələrdə keçirilən moda həftələrində və beynəlxalq tədbirlərdə uğurla nümayiş etdirilib.
“Ədəbiyyat və incəsənət”
(06.01.2023)
Gözəlliyi məhv edənlərin menyüsünə
Söhbət brakonyerlik fəaliyyətindən gedir. Get-gedə daha çox insan yüngül qazanc dalınca düşərək təbiəti məhv etməyə girişir.
Gətirəcəyimiz sitat ov fəaliyyətinin tənzimlənməsi barədədir.
“Ov fəaliyyətinə maraq nəzərə alınaraq gec də olsa, ov mövsümü açılıb. Lakin ov obyektlərindən asılı olaraq müəyyən limit daxilində ov həyata keçirilə bilər.
Daha çox ov fəaliyyətində cənub regionu, Muğan zonası maraqlıdır. Bununla bağlı 3 saylı regional idarədə limitlərimiz bitib. Lakin Qazax, Şəmkir, Gədəbəy, İsmayıllı regionlarında limit az da olsa, ov mövsümü davam etməkdədir”.
Sitatı Dövlət Ekoloji Təhlükəsizlik Xidmətinin rəisi Hikmət Əlizadə bu gün keçirilən mətbuat konfransında söyləyib.
“Ədəbiyyat və incəsənət”
(06.01.2023)
Hava kəskin soyuyacaq
Bakıda və Abşeron yarımadasında bir neçə gün davam edən mülayim, isti hava şəraitindən sonra yanvarın 8-dən başlayaraq havanın dəyişəcəyi, arabir yağıntılı olacağı, bəzi yerlərdə sulu qar, qar yağacağı gözlənilir.
Bu, Hidrometeoroloji Proqnozlar Bürosunun direktoru Gülşad Məmmədovanln açıqlamasıdır.
Gülşad xanım qeyd edib ki, şimal-şərq küləyi yanvarın 7-si axşamdan 8-i gündüzədək yarımadanın bəzi yerlərində arabir güclənəcək. Havanın temperaturu ötən günlərlə müqayisədə 10-12 dərəcə enərək, yanvarın 10-11-də gecə 2 dərəcəyədək şaxta, gündüz 0 dərəcəyə yaxın olacaq.
“Azərbaycanın şimal və qərb rayonlarından başlayaraq yanvarın 7-si axşamdan ayın 12-dək ölkə ərazisində havanın dəyişəcəyi, arabir yağıntılı olacağı, bəzi yerlərdə sulu qar, qar yağacağı, ayrı-ayrı yerlərdə intensivləşəcəyi gözlənilir”.
G.Məmmədova daha sonra qeyd edib ki, qərb küləyi bəzi yerlərdə arabir güclənəcək. Havanın temperaturu ötən günlərlə müqayisədə 10-12 dərəcə enərək, gecə 0-5 dərəcə şaxta, gündüz 4 dərəcəyədək isti, dağlıq rayonlarda isə gecə 10-15, gündüz 5-8 dərəcə şaxta olacaq. Gözlənilən yağıntılı və şaxtalı hava şəraiti ilə əlaqədar yolların buz bağlama ehtimalı var.
İstənilən havada sizlərə xoş ovqat arzulayırıq!
“Ədəbiyyat və incəsənət”
(06.01.2023)
