“Mücrü” nəşriyyatında gənc şair Aypara Ayxanın ilk şeir kitabı olan  "Mutasiya" işıq üzü görüb. Bu kitabda 13 yaşından şeirlər yazan Ayparanın 2015-ci ildən bu yana yazdığı şeirləri yer alıb. Redaktoru tanınmış şair Ayaz Arabaçı, ön söz müəllifləri Vasif Süleyman və Ömer Faruk Arlı olan kitabda Ayparanın Azərbaycan və Türkiyə mediasında ara-sıra dərc edilən, eləcə də sosial mediada paylaşılan şeirləri yer alıb.
“Sayəndə DNT-si də dəyişdi duyğularımın. Sevgim mutasiyaya uğrayaraq nifrətə çevrildi” deyən şair bununla öz lirik mənini də ortaya qoymuş olur, kövrək sevgi misralarına tapındığını izhar edir.  
Aypara Ayxan öz sosial media hesabında kitabı ilə bağlı ümidlərini bu cür dilə gətirib: “İnanıram ki, bu kitabı oxuyan hər kəs öz  duyğularına xitab edən şeirlə qarşılaşacaq.”
Ümidlərinin doğrulması diləyi ilə!

İspaniyalı dünyaşöhrətli rəssam  Pablo Pikassonun qızı Maya Pikasso  Fransaya doqquz eksponat hədiyyə edir. Bu barədə Agence France-Presse-nin məlumatına istinadən “Ədəbiyyat və incəsənət” portalı məlumat verir.
Ötən gün Fransanın mədəniyyət naziri Rozlin Başlo-Narken bu olay haqda rəsmi açıqlama edib. “Mən bu hədiyyənin Milli kolleksiyalara daxil edilməsini dərin həyəcan hissi ilə qeyd edirəm", - deyən nazir bunu “müstəsna hadisə" adlandırıb.
Agentliyin məlumatına görə, Maya  Pikasso bu işləri Fransa dövlətinə hədiyyə edərək, bu yolla miras vergisinin ödənilməsini əvəz edə biləcək. Rəsmlərin hamısı təntənəli mərasimin keçirildiyi Pikasso Muzeyinə təqdim olunacaqdır. Tədbirdə mədəniyyət naziri və Maya Pikasso ilə yanaşı, Mayanın uşaqları da iştirak edib.
9 hədiyyə edilmiş eksponatdan altısı rəsm əsəridir, biri karandaşla eskizlər edilmiş rəsm albomudur, biri xırda heykəldir, biri isə etnoqrafik sənət əsəridir.
Mətbuat konfransı zamanı jurnalistlərə yalnız bir iş - "Konfetlə  uşaq" nümayiş etdirilib. Bu rəsmi rəssam 1938-ci ildə çəkib. Kubizm üslubundadır rəsm. Hədiyyə olunan rəsmlərin ən köhnəsi isə 1895-ci ilə aiddir, bu, Pikassonun atası Don Xose Ruisonun portretidir.
Hədiyyələrə 2022-ci ilin aprelindən ümumi baxış mümkün olacaq.
Maya özü 1935-ci ildə Fransada anadan olub. 1938-ci ildə böyük rəssam sevimli qızının portretini çəkib, əsər “Kukla ilə Maya" adlanır, ondan sonra daha on üç iş Mayaya həsr edilib.
2017-ci ildə Maya İspaniyanın təbəəliyini alıb və Madridə köçüb. Pikassonun və Mayanın Fransada  yaşamaları qanuna görə dahi rəssamın qoyduğu mirasdan Fransa hökümətinə pay ayrılmasını tələb edirdi, 9 hədiyyədən sonra (əslində, bunlara vergi demək daha düzgün olardı) miras borcları silinmiş olacaq.

Şəkildə: Pikasso və qızı Maya Parisdəki mənzillərinin eyvanında. 1944-cü il.

“Tac”, “Ted Lasso” və “Kraliçanın addımı” serialları “Emmy mükafatları”nın qalibi seçilib.
TASS agentliyi xəbər verir ki, 73-cü mükafatlandırma mərasimi ötən gün Los-Ancelesdə keçirilib.
“Tac” 24 kateqoriya üzrə namizədliyini irəli sürərək ümumi nominasiyalar arasında liderliyini saxlayıb. Bu filmlə bərabər ən yaxşı faciəvi serial adı uğrunda “Mandalorian”, “Qaqalar”, “Bridcerton”, “Qulluqçunun nağılı”, “Lavkraft ölkəsi”, “Duruş”, “Bu bizik” ekran əsərləri mübarizə aparıb.
Daha geniş növbəti günlərdə.

Sentyabrın 18-i və 19-da Estoniyanın paytaxtı Tallində “milli azlıqların yarmarkası” keçirilib.
Azərbaycan Diasporuna Dəstək Fondundan AzərTAC-a bildiriblər ki, Tallin şəhərinin mərkəzi Ratuş meydanında keçirilən yarmarkada ölkəmiz də təmsil olunub.
Estoniyadakı “Azərbaycan Evi” tərəfindən hazırlanmış guşədə ölkəmizin milli musiqiləri, rəqsləri, xalq geyimləri və milli mətbəximizin ləziz təamları festival iştirakçılarına təqdim edilib.
Azərbaycan tarixini, mədəniyyətini təsvir edən kitablar, milli məhsul və suvenirlərlə bəzədilən Azərbaycan guşəsi maraqla qarşılanıb. Guşədə Azərbaycan Diasporuna Dəstək Fondunun maliyyə dəstəyi ilə hazırlanan, 44 günlük Vətən müharibəsinin şanlı Qələbəsinə həsr edilən “Xarıbülbül” və dahi Azərbaycan şairi Nizami Gəncəvinin 880 illik yubileyinə həsr olunan “Eternity” adlı musiqi albomları da nümayiş etdirilib.
Tədbirdə Estoniyada fəaliyyət göstərən, rəhbəri Yelena Əhmədova olan “Gratsia” rəqs qrupunun Azərbaycan milli rəqslərini nümayiş etdirməsi və Leyla Rəhimovanın ifasında “Azərbaycan” mahnısının səsləndirilməsi ilə yaddaqalan anlar yaşanıb.
Qeyd edək ki, Estoniya Milli Azlıqlar Forumunun təsis konfransı 1988-ci il sentyabrın 24-də Tallin Politexnik İnstitutunda keçirilib. O zaman Estoniyadakı Azərbaycan İcması həmin Forumun təsisçilərindən biri olub və hər il keçirilən festivalda bu məlumat xüsusi olaraq vurğulanır.

Kinosevərlərin diqqəti Türkiyəyə yönəlmişdi. Paytaxtın Adana Bələdiyyəsinin təşkil etdiyi 28-ci Adana "Qızıl Barama" beynəlxalq kinofestivalında mükafatlar öz sahiblərini tapmışdır.  
Son dakika informasiya agentliyinin məlumatına görə, milli bədii filmlər müsabiqəsində ən yaxşı filmə görə mükafat "Yaramaz oğlan" filminə  təqdim edilib. Ən yaxşı aktyor Bard Çelik olub, ən yaxşı aktrisa isə Emel Qeksu və Ayşe Dəmirəl olublar.

Azərbaycanın görkəmli bəstəkarı Üzeyir Hacıbəylinin “Koroğlu” operası yenidən lentə alınıb.
AzərTAC xəbər verir ki, Azərbaycanın məşhur vokal ifaçısı, Əməkdar artist Ramil Qasımovun təşəbbüsü ilə lentə alınmış Uzeyir Hacıbəylinin məşhur “Koroğlu” operası artıq bütün musiqi platformalarında yer alıb.
“Azərbaycan klassik opera janrımızın şah əsəri olan “Koroğlu” operası böyük tarixi bir yol keçmişdir. Məhz, Üzeyir bəyin “Koroğlu” operası müxtəlif illərdə müxtəlif ifaçılar tərəfindən özünəməxsus formada ifa edilmişdir. “Koroğlu” operası sonuncu dəfə 1959-cu ildə böyük Maestro Niyazinin rəhbərliyi altında lentə alınmışdır. Yaradıcı heyətlə belə bir qərara gəldik ki, Azərbaycan Dövlət Akademik Opera və Balet Teatrının simfonik orkestri, xoru və solistləri ilə bu operanı lentə alaq. Düşünürəm ki, bu opera hüdudlarımızdan kənarda Azərbaycan klassik musiqisevərlərə Üzeyir bəyin əziz xatirəsinə, Milli Musiqi Günündə bir töhfə olacaq. Fürsətdən istifadə edib, səs yazılışında iştirak edən bütün yaradıcı kollektivə öz minnətdarlığımı bildirirəm”,- deyə Ramil Qasımov söyləyib.
Qeyd edək ki, operanın fond yazılışının dirijoru Əməkdar artist Əyyub Quliyev, səs rejissoru Əməkdar mədəniyyət işçisi Faiq Babayev, əsas partiyaları Əməkdar artistlər Ramil Qasımov, İlahə Əfəndiyeva, Cahangir Qurbanov, Tural Ağasiyev, Xalq artisti Əli Əsgərov və Taleh Yəhyəyev ifa ediblər.

Tanqo üzrə Dünya Çempionatına şənbə günü Buenos-Ayresdə start verilib. Təşkilatçıların bildirdiyinə görə, onlayn və oflayn formatda keçiriləcək yarışda 400 ölkədən 25-dən çox cüt iştirak edəcək.
Çempionatın ilk günündə Buenos-Ayresdəki Usina del Arte Mədəniyyət Mərkəzində salon tanqo kateqoriyasına seçim turu başlayıb. Növbəti mərhələdə yer uğrunda yalnız Mərkəzin səhnəsində çıxış edən cütlüklər deyil, həm də sərhədləri xaricilər üçün bağlı olan
 Argentinaya gələ bilməyən rəqqaslar da mübarizə aparacaq və çıxışlarının videogörüntülərini göndərəcəklər.
Ötən il pandemiyaya görə təşkilatçılar çempionatı tamamilə onlayn formatda keçiriblər. Bu il Argentinada tüğyan edən koronavirus səbəbindən tətbiq olunan məhdudiyyətlərə görə bütün tamaşalar tam doldurulmuş olmayan zallarda keçirilir. Bundan əlavə, təşkilatçılar hər bir turda səhnəyə çıxan cütlüklərin sayını 10-dan 6-ya  azaldıblar.
Rəqs edənlərə maskalar olmadan çıxış etməyə icazə verilir, lakin tamaşaçılar daim maska daşımalıdırlar.

Sentyabrın 24-dək davam edəcək Üzeyir Hacıbəyli XIII Beynəlxalq Musiqi Festivalının təntənəli açılış mərasimi olub.
Azər TAC xəbər verir ki, Azərbaycan Dövlət Akademik Filarmoniyasında Mədəniyyət Nazirliyinin təşkilatçılığı ilə keçirilən tədbirdə çıxış edən mədəniyyət naziri Anar Kərimov festivalın əhəmiyyətindən danışıb: “Üzeyir Hacıbəylinin bizə qoyduğu miras heç zaman unudulmayacaq. Pandemiyanın yaratdığı çətinliklərə baxmayaraq bu dəfə festivalı keçirmək qərarına gəldik. Böyük bəstəkarın doğum gününün musiqi bayramı kimi qeyd edilməsi ənənəsi ulu öndər Heydər Əliyev tərəfindən qoyulub. Ümummilli Liderin 1995-ci ildə - bəstəkarın 110 illik yubileyi münasibətilə imzaladığı Fərmanla hər il sentyabrın 18-i ölkəmizdə Milli Musiqi Günü kimi qeyd olunur”.
Nazir deyib ki, Üzeyir Hacıbəyli göstərdiyi xidmətlərlə öz adını Azərbaycanın musiqi tarixinə əbədi olaraq həkk edib. Onun bənzərsiz irsi ölkəmizdə peşəkar bəstəkarlar nəslinin yetişməsinə təkan verib.
“Biz hər zaman bu festivalı dahi bəstəkarın doğulduğu və boya-başa çatdığı Şuşa şəhərində keçirməyi arzulamışıq. Çox sevinirik ki, bu gün doğma Qarabağımız, Şuşamız azaddır. Ali Baş Komandan İlham Əliyevin rəhbərliyi ilə ordumuz bu sevinci bizə yaşadıb. Bu gün bu festivalı Şuşada da qeyd edirik. Artıq biz Şuşada – mədəniyyət paytaxtımızda “Xarıbülbül” Musiqi Festivalını və Vaqif Poeziya Günlərini keçirmişik. Gələn ildən Üzeyir Hacıbəyli Beynəlxalq Musiqi Festivalının da böyük bir hissəsini Şuşada keçirəcəyik”.
Builki festivalın özəlliyindən danışan mədəniyyət naziri bildirib ki, festivalda daha çox ideyalarını reallaşdırmaq istəyən gənclərə yer ayrılıb. Builki festival çərçivəsində ilk dəfə olaraq “Üzeyir sənətinin gənclik sədaları” adı altında yeni proqrama start veriləcək və gənclərə böyük səhnədə özlərini nümayiş etdirməyə şans yaradılacaq. Yeni nəsil məhz Üzeyir Hacıbəyli musiqisinin təsiri altında böyüyür.
Festivalın zəngin proqramının olduğunu bildirən nazir deyib ki, Azərbaycanın bədii kollektivləri, solistləri ilə yanaşı, bu musiqi bayramında ABŞ və Polşadan dəvət olunmuş musiqiçilərin də çıxışları yer alıb. Festivalın proqramında Gəncə və Ağdamda tədbirlərin təşkili planlaşdırılıb.
Sonra söz musiqiyə verilib.
Festivalın ilk günündə Üzeyir Hacıbəyli adına Azərbaycan Dövlət Simfonik Orkestri (bədii rəhbər və dirijor Rauf Abdullayev) çıxış edib. Konsertdə Üzeyir Hacıbəylinin “Koroğlu” operasından uvertüra, Fikrət Əmirovun “Şur” simfonik muğamı, Arif Məlikovun fortepiano və orkestr üçün konserti səsləndirilib.