Xəbər verdiyimiz kimi, Mədəniyyət Nazirliyi tərəfindən narkomaniyanın zərərləri mövzusunda videoçarx ssenariləri müsabiqəsi keçirilirdi. Ötən gün müsabiqəyə yekun vurulub. 

“Ədəbiyyat və incəsənət” portalı Mədəbiyyət Nazirliyinə istinadən məlumat verir ki, Mədəniyyət Nazirliyinin Azərbaycan Respublikası Prezidentinin 2019-cu il 22 iyul tarixli 1334 nörməli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın 4.4.30-cu yarımbəndinin icrasını təmin etmək, eləcə də mədəniyyət və incəsənət sahəsində təhsil alan gənclərin yaradıcılığını stimullaşdırmaq və yeni yaradıcı qüvvələri audiovizual sahəyə cəlb etmək məqsədilə tələbələr arasında keçirdiyi müsabiqədə ssenarilər 2021-ci il dekabr ayının 1-dən 30-a qədər qəbul olunmuşdu.

Müsabiqəyə təqdim edilən videoçarx ssenariləri əsasında Münsiflər heyəti aşağıda adları qeyd olunan layihələri qalib olaraq seçib.

Yer          Qalibin adı             Layihənin adı

1-ci yer    Murad Şükürlü“      Kilid ekranı”

2-ci yer    Çinarə Əlişli“          Həyat ağacı”

3-cü yer    Ziyafət Kazımov“   Bir qrossmeysterin hekayəti”

Qaliblər müvafiq olaraq 1500, 1000 və 500 manat məbləğində pul mükafatı ilə mükafatlandırılacaqlar. Qaliblərin mükafatlandırılması mərasiminin fevral ayının ikinci yarısında, Ali təhsil qurumlarında ikinci semestr başladıqdan sonra keçirilməsi nəzərdə tutulur.

Müsabiqənin münsiflər heyətinin sədri Azərbaycan Dövlət Mədəniyyət və İncəsənət Universitetinin Kino və televiziya fakültəsinin dekanı, sənətşünaslıq üzrə fəlsəfə doktoru, dosent Elnur Mehdiyev, üzvləri isə ADMİU-nun Kinoşünaslıq və ekran dramaturgiyası kafedrasının müdiri, dramaturq Əli Əmirli, sənətşünas, kino və televiziya redaktoru Nadir Bədəlov olub.

Bu gün Azərbaycanın xalq artisti, incəsənətimizə layiqli töhfələr vermiş məşhur rəqqasə Afaq Məlikovanın ad günüdür, 75 illik yubileyidir.

“Ədəbiyyat və incəsənət” portalı xəbər verir ki, Afaq Məlikova 1947-ci il yanvar ayının 18-də Bakıda anadan olub. Uşaqlığı müharibədən sonrakı çətin illərə təsadüf edib. Kiçik Afaq uşaqlıqdan rəqs etməyi sevirdi, rəqsə hədsiz marağını görən valideynləri onu Bakı Xoreoqrafiya Məktəbinə qoyublar. Leyla Vəkilovadan dərs alan gənc xanım istedadı sayəsində xalq artisti adına qədər yüksəlib.

O, 1963–1974-cü illərdə Azərbaycan Dövlət Mahnı və Rəqs Ansamblının solisti, sonradan həm də məşqçi pedaqoqu olub, 1982-ci ildən isə ansamblının bədii rəhbəri vəzifəsində çalışıb. Azərbaycan xalq rəqslərinin mahir ifaçısı olan Afaq xanımın repertuarına Şərq xalqları rəqsləri də daxildir. Türkiyə, Polşa, Fransa, Almaniya, İspaniya, Kanada kimi bir sıra xarici ölkədə çıxışlar edən rəqqasə 2001-ci ildə “Şöhrət”, 2017-ci ildə “Şərəf” ordenlərinə layiq görülüb. Afaq xanımı yubileyi münasibəti ilə təbrik edirik!

Dövlət Turizm Agentliyi (DTA) və Medianın İnkişafı Agentliyinin (MEDİA) KİV nümayəndələri arasında elan etdiyi “Azərbaycanın turizm potensialını tanıt” mövzusunda keçirilən müsabiqədə birinci yeri tutan qaliblərin mükafatalandırılması mərasimi keçirilib.

DTA-dan AzərTAC-a bildirilib ki, mükafatlandırma “Dubai Expo-2020” beynəlxalq sərgisində turizm həftəsi çərçivəsində baş tutub.

Mükafatlandırma mərasimində qaliblərə sertifikatlar Azərbaycan Turizm Bürosunun Baş icraçı direktoru Florian Zenqstşmid tərəfindən təqdim olunub.

Xatırladaq ki, müsabiqədə yazı kateqoriyası üzrə “Əsrlərdir saflığını qoruyan kənd - "Təbiət muzeyi"ndən reportaj” məqaləsi ilə Samirə Əli, TV süjeti kateqoriyası üzrə “Ağdam şəhəri işgüzar turizmin mərkəzi olacaq” süjeti ilə Çinarə Qambayeva və Elşad Məmmədov, foto kateqoriyası üzrə Anar Bayramlı I yeri tutaraq “Dubai Expo-2020” tədbirində Azərbaycan pavilyonunu ziyarət etmək üçün 3 günlük iştirak haqqı əldə ediblər.

Qeyd edək ki, “Dubai Expo-2020” beynəlxalq sərgisində yanvarın 9-dan 15-dək təşkil olunan turizm həftəsi çərçivəsində Azərbaycan turizm şirkətləri tərəfindən Novruz ənənləri və elementləri, milli mətbəx nümunələri, müalicəvi Naftalan nefti, saxsı qablar və milli ornamentli zinət və dekorativ əşyaların hazırlanması nümayiş etdirilib, eləcə də ölkəmizin turizm imkanları təqdim olunub.

Tarixdə elə beynəlxalq miqyaslı hadisələr baş verib ki, onlar bu və ya digər şəkildə Azərbaycanın taleyində önəmli rol oynayıb. Eləcə də haqqında baş açacağımız bu konfrans.

“Ədəbiyyat və incəsənət” portalı xəbər verir ki, 1919-cu ilin 18 yanvarında Parisdə, Versalda Paris Sülh Konfransı öz işinə başlayıb. Bu tarix simvolik bir tarix idi. Alman imperatoru l Vilhelm 1871-ci ilin 18 yanvarında Versalda "Güzgülü zalda" Fransa-Prussiya müharibəsindən qısa müddət sonra öz hakimiyyətini elan etmişdi. Həm də 18 yanvar 1701-ci ildə Prussiya krallığının da yarandığı gün idi.

Burada 27 ölkə, o cümlədən də müstəqilliyini elan etmiş Azərbaycan Xalq Cumhuriyyəti təmsil olunurdu. Məğlub ölkələr və Sovet Rusiyası konfransa dəvət almamışdılar. Konfransda aparıcı rolu "Böyük dördlük" - ABŞ prezidenti Vudro Vilson, Böyük Britaniyanın baş naziri Lloyd Corc, Fransanın və İtaliyanın baş nazirləri Jorj Klemanso və Vittorio Orlando oynayırdı. Konfransda məqsəd Almaniya və məğlub dövlətlərlə sülh müqavilələrini hazırlamaq idi. Müqavilənin əsasını V.Vilsonun konqresə təqdim etdiyi 14 maddə təşkil edirdi. Bu maddələrin məğzini dünyanın ədalətli surətdə yenidən qurulması prinsipləri təşkil edirdi.

Azərbaycan Cümhuriyyətini Paris Sülh konfransında təmsil edən Əlimərdan bəy Topşubaşovun rəhbərliyi altında nümayəndə heyətinin tərkibinə ölkənin tanınmış ictimai-siyasi xadimləri və görkəmli ziyalılar daxil idilər.

Müharibəni məğlubiyyətlə başa vuran "Dördlər ittifaqı"nın üzvləri, yaxud neytral ölkələr Azərbaycanın müstəqilliyinin beynəlxalq miqyasda tanınması üçün o qədər də mühüm, həlledici iş görə bilməzdilər. Burada əsas söz sahibi qalib tərəf -Antanta idi. Çox şey onların istək və iradəsindən, ümumi məşvərət əsasında verəcəkləri qərarlardan asılı idi. Bu elə bir zaman idi ki, məhz Osmanlıya yaxınlıqlarına görə ingilis və fransızlar Birinci Dünya müharibəsində səngərin əks tərəflərində vuruşduqları türklərə qarşı hələ də sönməyən qəzəbi onların azərbaycanlı qardaşlarına yönəltmişdilər. Nümayəndə heyətimizə Parisə getməyə viza belə verilmirdi, bununla belə fədakar və vətənpərvər həmyerlilərimiz bütün çətinliklərə baxmayaraq Paris sülh konfransına ilk gündən olmasa da, hər halda qatıla bildilər, 1919-cu il mayın 28-də İstiqlal günü ABŞ prezidenti Vilson Azərbaycan nümayəndə heyətini qəbul etdi. Vilsondan Azərbaycanın istiqlalının tanınması, Vilson prinsiplərinin Azərbaycana aid edilməsi, Azərbaycanın Millətlər Cəmiyyətinə qəbul olunması, ABŞ-ın Azərbaycana hərbi ləvazimat sahəsində yardım göstərməsi xahiş olunurdu.Vilson Azərbaycan nümayəndə heyətinə ümidverici bir şey demədi. O, sülh konfransının dünyanı kiçik hissələrə parçalamaq niyyətində olmadığını dedi və bildirdi ki, Azərbaycan məsələsi rus məsələsindən əvvəl həll edilə bilməz. Bununla belə, 1920-ci il yanvarın 11-də Lord Kerzonun təklifi ilə Paris konfransının ali şurasında Azərbaycanın istiqlalını de-fakto tanımaq haqqında yekdilliklə qərar qəbul olundu.

İstiqlalın tanınmasından 3 gün sonra bu tarixi xəbərin sədasını almış Azərbaycan bayram libasına büründü.

İndi o tarixi günü şərəf və qürurla anırıq!

Bir neçə gün idi ki, sənətsevərlərin diqqəti Azərbaycan Dövlət Akademik Opera və Balet Teatrında idi, orada italyan bəstəkarı Cüzeppe Verdinin “Traviata” operasının tamaşası böyük maraqla gözlənilirdi.  Nəhayət, tamaşa baş tutub. 

Fransa yazıçısı - oğul Aleksandr Dümanın məşhur “Kameliyalı qadın” əsərindən operaya uyğunlaşdırılan, Parisin elit təbəqəsinin tanınmış simalarından olan, ömrünün möhtəşəm saraylarda keçməsinə baxmayaraq, əsl sevgiyə həsrət qalan Violetta adlı gənc qadının enişli-yoxuşlu həyatından və Alfredlə nakam sevgisindən bəhs edən “Traviata” operasının tamaşası musiqi bayramı kimi yaddaşlarda qalıb.

Dünyanın opera teatrlarında ən çox səhnələşdirilən əsərlərdən biri olan və sonu bədbəxtliklə bitən sevgi hekayəsində baş rollarda Əməkdar artistlər Ramil Qasımov (Alfred) və İnarə Babayeva (Violetta) çıxış ediblər. Dahi Verdinin bütün əsərlərində kişi və qadın partiyalarının hər zaman vokal baxımından çətin sayılan geniş diapazonlu səslər olduğunu nəzərə alsaq, onların duetləri və ifaçılıq qabiliyyətləri çox xoşagələn və uğurlu alınıb və dinləyicilərin zövqünü dərindən oxşamaqla onları heyran qoyub.

İnarə Babayeva əsərin əvvəlindən axırına qədər, texniki və bədii cəhətdən son dərəcə çətin bir rol olan Violettanı mükəmməl ifa ilə təqdim edib. Zəngin səsi ilə ən yüksək notlarda asanlıqla hərəkət edə bilməsi onun səsinə nə qədər hakim olduğunun göstəricisi idi. Səhnədə öz rolunu yaşamasıyla onun aktyorluq bacarıqları da diqqəti cəlb edirdi.

Ramil Qasımov ilk dəfə debüt etdiyi Alfredo rolunda özünəməxsus və uğurlu ifası ilə seçilib. Səhnədə böyük ustalığı, belkanto ifaçılığı, texniki cəhətdən bacarığı, italyan dilində sözlərin səlist deyilişi və ifası ilə tamaşaçılar tərəfindən hərarətlə qarşılanıb.

Dirijoru Xalq artisti Fəxrəddin Kərimov, xormeystri Əməkdar incəsənət xadimi Sevil Hacıyeva olan tamaşada digər rollarda Xalq artisti Əli Əsgərov (Markiz), Tələt Hüseynov (Doktor D' Obinyi), Əməkdar artistlər Cahangir Qurbanov (Jermon), Tural Ağasıyev (Qaston) və solistlər Nina Makarova (Flora), Mahir Tağızadə (Baron Bufol), Səbinə Bağırova (Anina) kimi möhtəşəm ifaları ilə fərqlənən məşhur opera müğənniləri iştirak ediblər.

Bu gün Vinni Pux günüdür. Bu günü təqvimə məşhur uşaq bədii qəhrəmanı olan Vinni Puxun və onun dostlarının yaradıcısı - 1882-ci ilin 18 yanvarında Londonda dünyaya gələn Alan Aleksandr Milni xatırlamaq üçün salıblar.

“Ədəbiyyat və incəsənət” portalı xəbər verir ki, bu gün Alan Milnin 140 illik yubileyi qeyd olunacaq. Yəqin ki, hər bir evdə böyüklü-kiçikli əksəriyyət Vinni Puxu tanıyır. İllərdir ki, bu obraza sevgi estafet kimi nəsildən nəslə keçir.

Həqiqətən də sən bir obraz yarat və bu obraz dünyanın hər guşəsində məşhur olsun, hər il əsər böyük tirajlarla az qala bütün dünya dillərində çıxsın, ona çəkilən bədii və cizgi filmləri ən populyarlar sırasında qərarlaşsın, buna görə də təqvimdə ayrıca sənin yaratdığın obrazın günü olsun – bu böyük hünərdir. Ruhun şad olsun sənin, Miln.

Mədəniyyət nazirinini birinci müavini Elnur Əliyevin bir qrup musiqişünas və bəstəkarlarla yaradıcı görüşü keçirilib.

Ədəbiyyat və incəsənət” portalı Mədəniyyət Nazirliyinə istinadən məlumat verir ki, görüşdə gələcək layihələr, qarşıda duran hədəflər, mövcud problemlər geniş müzakirə olunub. 

Elnur Əliyev çıxışında, nazirliyin təkliflərə açıq olduğunu, birgə əməkdaşlığın səmərəli olacağını xüsusi qeyd edib. 

Onu da qeyd edək ki, bu kimi görüşlərin davamlı olması nəzərdə tutulur.

Müslüm Maqomayev adına Azərbaycan Dövlət Akademik Filarmoniyasının səhnəsində Azərbaycanın Xalq artisti, bəstəkar, professor Azər Dadaşovun 75 illik yubileyinə həsr olunmuş gecə keçirilib.

AZƏRTAC xəbər verir ki, konsert başlamadan öncə Azərbaycan Mədəniyyət Nazirliyinin sektor müdiri Vüqar Hümbətov mədəniyyət naziri Anar Kərimovun təbrik məktubunu oxuyub.

Konsertdə Mustafa Mehmandarovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri və Azərbaycan Dövlət Xor Kapellası çıxış edib. Kapellaya Xalq artisti Gülbacı İmanova rəhbərlik edib.

Proqramın solistləri beynəlxalq müsabiqələr laureatları, pianoçular Nuranə Zeynalova və Nərgiz Kəngərli, vokalçı Sübhan Rüstəmov olub. 

Gecədə Azər Dadaşovun bəstələri səsləndirilib. Onların arasında 44 günlük Vətən müharibəsində Azərbaycanın Qələbəsinə həsr olunmuş “Zəfər çələngi” əsəri, ilk dəfə olaraq ümummilli lider Heydər Əliyevə həsr olunmuş “Fortepiano və Kamera Orkestri üçün şeir” səsləndirilib. Həmçinin fortepiano və orkestr üçün 2 nömrəli konsert, “Şuşa” simfoniyası, “Vətənim Azərbaycan” kantatası da ilk dəfə ifa olunub. 

Konsert proqramı tamaşaçılar tərəfindən böyük maraqla qarşılanıb. Yubiley konsertinin proqramı bəstəkarın yaradıcılıq fəaliyyətinin çoxşaxəliliyini nümayiş etdirib.

Qeyd edək ki, Azər Dadaşov 1946-cı il dekabrın 1-də Bakıda anadan olub. Azərbaycan Dövlət Konservatoriyasının (indiki – Üzeyir Hacıbəyli adına Bakı Musiqi Akademiyası) bəstəkarlıq fakültəsini bitirib. O, Papa II İohann Pavelin medalı, MDB Parlamentlərarası Assambleyası Şurasının fəxri döş nişanı laureatıdır. Azər Dadaşov akademik musiqinin bütün janrlarında 150-dən çox musiqi əsərinin müəllifidir.

Sabah portalımızda Yardımlıda yaşayıb yaradan gənc şair İqbal Nəhmətin şeirləri dərc ediləcək. 
Həqiqətən də insanı öz sehrinə sala bilən, ovsunlayan, səmimiyyəti, axıcılığı və poetik kamilliyi ilə seçilən şeirlərdir.

Mən necə darıxım sənsiz,

İlin, günün bu vaxtında.

Söylə necə yaşayırsan?

Həsrətimin paytaxtında, - deyən gənc şairin şeirlərini bəyənəcəyinizə əminik.