14 sentyabr. Sevgi duyğularının mükəmməl ifadəsi

Elə ədiblərimiz var ki, bircə əsərlə özlərini milyonlara sevdirə biliblər. Onlardan biri də Azərbaycan teletamaşa tarixinin ən qızıl səhifələrindən olan “Səni axtarıram” trilogiyasının müəllifi Aslan Qəhrəmanovdur. 1939-cu ilin bu günündə dünyaya gəlmiş ədib həmin o üç tamaşayla – “Səni axtarıram”, “Bağışla” və “Səndən xəbərsiz”lə sevən qəlbləri riqqətə gətirməyibmi, gətirib. Üstəlik, Yaşar Nuri ilə Firəngiz Mütəllimovanın təkrarsız ifası günü bu gün də unudulmur. Biz – 80-ci illərin yeniyetmələri üçün Elçin və Gülnar Leyli və Məcnun, Romeo və Cülyetta qədər məhəbbət simvoluna çevrilmişdi, inanırsınızmı? Gəlin ədibimizə bir Allah rəhmət eləsin deyək.

14 sentyabr. Diqqətsizlik bəlası

CAR-lılar bu gün çox maraqlı bir günü qeyd edirlər: diqqətin və hiperaktivliyin defisiti sindromu gününü. Demək, belə bir sindrom var imiş. Əslində o sindrom indi bütün dünyada hakimi-mütləqdir. Dövran insanları  çox qayğılandırıb, pandemiya, müharibələr, təbii fəlakətlər, yoxsulluq, səfalət hamını üzür, fikir insanı incidir, passiv və diqqətsiz edir. Diqqətsizlikdən isə böyük problemlər törəyir, deyilmi? Elə hər şeyi bir kənara qoyaq, bir sürücü diqqətsizlik elədi, bir avtobus insanı qəzaya saldı, bir farmasept diqqətsizlik elədi, bir düjin xəstəni qırdı, bir kulinar diqqətsizlik elədi, bir obanın camaatını zəhərlədi. Cənubi afrikalılar ilk olaraq bu sindromu diqqət mənbəyi ediblərsə alqış onlara.

14 sentyabr. Kremli ponçik yeyən meksika süvarisi

Əlbəttə, ABŞ-da bu gün “Submarin” sendviçi və kremli ponçik günüdür. Birincidən dadmasam da ikinci çox dadlıdır, nuş olsun onlara. Hindistanda Hindi-diva günüdür, 1949-cu ilin bu günündə ölkədə hindi dili rəsmi dil kimi qəbul edilib. Meksikanlarda isə bu gün süvari günüdür. Bir köhlən atın ola, tumarlayıb, əzizləyib belədən-belə çapasan, elədən elə.

1937-ci ilin bu günündə hay-lek stilinin yaradıcısı, Pritsker mükafatı laureatı, italyan memarı Penso Piano dünyaya gəlib, 1867-ci ilin bu günündə Karl Marksın məşhur “Kapital” əsərinin 1-ci cildi işıq üzü görüb. 1829-cu ilin bu günündə Andrionopol sülh müqaviləsi ilə Rusiya – Türkiyə müharibəsi başa çatıb, 1769-cu ildə bitki coğrafiyasının yaradıcısı, alman ensiklopedist alimi, botaniki, zooloqu və səyyahı Aleksandr fon Humbolt doğulub.

Varisin “11-20 sentyabrın təqvimi” yazısından

Şəkildə: “Səni axtarıram” teletamaşasından bir epizod

Sentyabrın 18-dən 24-dək ölkəmizdə ənənəvi Üzeyir Hacıbəyli Beynəlxalq Musiqi Festivalının keçirilməsi nəzərdə tutulur. 44 günlük Vətən müharibəsində Ali Baş Komandanın qətiyyəti, Ordumuzun şücaəti nəticəsində tarixi ədalət bərpa edilib və Azərbaycan Respublikası Prezidentinin müvafiq Sərəncamı ilə Şuşa şəhəri Azərbaycanın mədəniyyət paytaxtı elan olunub.
Mədəniyyət Nazirliyindən bildirilib ki, bu səbəblə builki festivalın ilk konsertlərindən biri də Şuşa şəhərində keçiriləcək. Sentyabrın 18-də Üzeyir Musiqi Günündə Xalq artisti Ağaverdi Paşayevin rəhbərliyi altında Fikrət Əmirov adına Azərbaycan Dövlət Mahnı və Rəqs Ansamblı və tanınmış solistlərin iştirakı ilə Şuşada açıq havada konsert təşkil olunacaq.
Bundan əlavə, sayca XIII olan bu festival çərçivəsində Bakı, Gəncə və Ağdamda bir neçə tədbirin təşkili planlaşdırılıb. Eyni zamanda, cari festival çərçivəsində ilk dəfə olaraq “Üzeyir sənətinin gənclik sədaları” adı altında yeni proqrama start verilib və gənclərə böyük səhnədə özlərini nümayiş etdirməyə şans yaradılıb.
Festival çərçivəsində Azərbaycanın bədii kollektivləri, solistləri ilə yanaşı, ABŞ və Polşadan dəvət olunmuş məşhur musiqiçilərin də çıxışı nəzərdə tutulub.
Onu da vurğulamaq lazımdır ki, mövcud pandemiya şəraiti ilə əlaqədar tədbirlərə yalnız xüsusi dəvətnamələr və COVID pasportu ilə giriş mümkün olacaq.

Əsas sual - “İlin ifaçısı” kim oldu?
Bu, hamımızın yaxşı tanıdığı, yeniyetməliyindən musiqi Olimpinə yüksəlməyi bacarmış bir gəncdir - kanadalı müğənni Jastin Biber!
Mərasim barədə geniş məlumatı sabah yayınlayacağıq.

Sentyabrın 11-də Bakı Ali Neft Məktəbində İslam Dünyası Təhsil, Elm və Mədəniyyət Təşkilatının hazırladığı (ICESCO) “ICESCO akseleratoru” adlı yeni pilot layihənin təqdimatı keçirilib.
Mədəniyyət Nazirliyi, ICESCO üzrə Azərbaycan Respublikasının Milli Komissiyası, Bakı Ali Neft Məktəbi və “NewSpace Innovation”un dəstəyilə ərsəyə gələn layihə ICESCO-nun üzvü olan ölkələrdə dinamik yaradıcı texnologiya və mədəniyyət sahələrinin inkişaf etdirilməsi məqsədilə yaradılıb.
Mədəniyyət Nazirliyinin yaydığı rəsmi məlumata görə, Bakı Ali Neft Məktəbinin rektoru Elmar Qasımov tələbələri bu layihəyə qoşularaq öz ideyalarını tətbiq etdikləri üçün onlara təşəkkürünü bildirib. O, tədbirə toplaşan qonaqların tələbələrlə sıx əməkdaşlıq etməsini arzulayıb. Layihədə 23 komandanın iştirak etdiyini deyən E.Qasımov bildirib ki, bu gün onlar öz ideyalarını reallaşdırmaq üçün gözəl bir fürsət qazanıblar.
Mədəniyyət nazirinin birinci müavini Elnur Əliyev azərbaycanlı gənclərin ölkədə aparıcı yerləri tutmalı olduğunu söyləyib. Bildirib ki, Azərbaycan Nizami Gəncəvi, Nəsimi, Füzuli kimi dahi şəxsiyyətlər yetişdirən qədim mədəniyyətə və yüksək dəyərlərə malik bir ölkədir. Bunu dünyaya çatdırmaq yalnız gənclərin üzərinə düşür.
E.Əliyev bildirib ki, bir sıra beynəlxalq təşkilatlar Qarabağ məsələsində hər zaman ikili mövqe tutmuşlar. Ölkəmizin başçısı onları 30 illik Qarabağ münaqişəsini həll etmək üçün ədalətli mövqe tutmağa çağırsa da bunun əməli nəticəsi olmamışdır. Azərbaycana dəstək olan yalnız bir neçə təşkilatlar var ki, onlardan biri də ICESCO-dur.
Tədbirə onlayn qoşulan ICESCO-nun Baş direktoru Salim bin Məhəmməd əl-Malik bildirib ki, “ICESCO akseleratoru” proqramı dünyada ilk dəfə olaraq Azərbaycan, Qazaxıstan və Özbəkistanda tətbiq olunur və ilkin olaraq 5 sənaye sahəsini əhatə edir: bunlar kənd təsərrüfatı, rəqəmsal media, maliyyə texnologiyaları, əyləncə və oyunlar, turizm və qida texnologiyaları sahələridir. O, gənclərin bu proqram vasitəsilə öz bacarıqlarını inkişaf etdirəcəyini vurğulayıb.
Açılış mərasimində ICESCO-nun Elm və Texnologiya bölməsinin məsləhətçisi Məhəmməd Şərif, Mədəniyyət Nazirliyi Aparatının rəhbəri, ICESCO üzrə Azərbaycan Milli Komissiyasının baş katibi Vasif Eyvazzadə çıxış edərək layihənin əhəmiyyətindən danışıb və Azərbaycan-ICESCO əməkdaşlığının davamlı olacağını bildiriblər.
Sonra “NewSpace Innovation” şirkətinin təsisçisi Leyla Tağızadə layihə haqqında məlumat verib.

Beynəlxalq Türk Mədəniyyət Təşkilatı (TÜRKSOY) və İzmir Böyükşəhər Bələdiyyəsinin birgə təşkilatçılığı ilə İzmir şəhərində möhtəşəm konsert proqramı gerçəkləşib.
AzərTAC xəbər verir ki, türk dünyasını təmsil edən solistlər TÜRKSOY-un Gənclər xoru, İzmir Dövlət Opera və Balet xoru və “Əl-ələ” Musiqi Simfonik Orkestrinin müşayiətilə gözəl musiqi nömrələri ifa ediblər.
Dünya Birləşmiş Şəhərlər və Yerli İdarələr Təşkilatının Mədəniyyət zirvəsinin bağlanış mərasimində tamaşaçılar qarşısına çıxan türkdilli ölkələrin sənətçiləri ifaya “Yunus Əmrə və Türkcə ili” çərçivəsində Ahmet Adnan Saygunun “Yunus Əmrə” oratoriyasından bir bölümlə başlayıblar.
Azərbaycandan konsertdə vokalçı Çinarə Şirinova təmsil edib.
TÜRKSOY Baş katibi Düsen Kaseinov konsertlə bağlı açıqlamasında vurğulayıb ki, zəngin mədəniyyət proqramları ilə Yunus Əmrənin humanizmini və ümumdünya tolerantlıq mesajlarını gələcək nəsillərə çatdırırıq.
Qeyd edək ki, pandemiya səbəbindən çıxışlarına bir müddət ara verən TÜRKSOY-un Gənclər xoru Azərbaycan, Qazaxıstan, Qırğızıstan, Özbəkistan və Türkmənistanın müstəqilliyinin 30-cu ildönümü münasibətilə Türkiyənin şəhərlərində qastrol səfərində olub.

Televiziyalarımızın vəziyyəti niyə qənaətbəxşdeyil? Cəmiyyəti ən çox narahat edən məsələlərdən biri də budur. Yuxarıdan direktiv gözləyə-göləyə fəaliyyət göstərən televiziyalar hətta siyasi müstəvidən kənar, adicə mədəniyyət, əyləncə sferalarına da nüfuz edə bilmir, yapışdıqları şablondan qopa bilmirlər. Bu günlərdə Axar.az saytı tanınmış telejurnalist, Azərbaycan televiziyası tarixinə kifayət qədər original olan, çoxmilyonlu izləyici auditoriyası toplamış “Səhər” proqramı ilə möhür vurmuş professor Qulu Məhərrəmlidən müsahibə götürmüşdür. Müsahibənin televiziyaların fəaliyyəti ilə bağlı hissəsi bizə olduqca maraqlı göründüyündən onu oxucularımız ilə bölüşmək qərarına gəldik:

- Azərbaycan televiziya kanalları vaxtaşırı müzakirə mövzusuna çevrilir. Sanki hamı narazıdır. Efir məkanımızda nələr çatışmır?

- Bu gün Azərbaycan televiziya məkanının çox ciddi problemləri var. Ən ciddi məsələ televiziya auditoriyasının parçalanmasıdır. İnsanlar artıq məlumatı sosial şəbəkələrdən alır. Verilişlər geniş auditoriya cəlb edə bilmir. Bunun səbəbi isə proqram çeşidlərinin məhdudluğu, məzmun cəhətdən tamaşaçını qane etməməsidir. Televiziyanın birgəlik hissi yaratmaq imkanı digər platformalarda yoxdur. Ona görə də tamaşaçının televiziyadan gözləntiləri böyükdür. Müharibə dövründə internetlə bağlı məhdudiyyətlər var idi. Onda insanlar televiziyaya üz tutdular. Daha çox televiziya kanallarından məlumat gözləyirdik. Bəs, televiziya həmin vaxt bizi qane etdimi? Əlbəttə, qane edən tərəflər də oldu, lakin problemlər çox idi.

- Xəbər proqramlarımızdan tamaşaçının fərqli gözləntisi var. Sosial şəbəkələrdə tamaşaçıların ən çox standart proqramlardan yorulduğu qənaətlərini görürük.

- Xəbər proqramlarında nələri görmək istəyirik? Dünya standartları ilə müqayisədə onlar Azərbaycan tamaşaçısını məlumatlandıra, qane edə bilirmi? Televiziya proqramları hamısı bir-birinə oxşayır. Bütün kanalların mövzuları eynidir. Proqramların ardıcıllığı, tərtibi, aparıcıların təqdimatı sanki bir nöqtədən idarə olunur. Hamısı elə bil eyni konveyerdən çıxıb. Belə olmaz! Bizim umacağımız daha çox büdcədən maliyyələşən televiziyalara aiddir. AzTV və İctimai TV xəbər sahəsində öncüllüyü ələ almalıdır.

- Vaxtilə elə kanallarımız var idi ki, yayımladığı verilişlərlə auditoriyanı özünə kilidləməyi bacarırdı. Hazırkı kanallarımız bunu niyə bacarmır?

- Vaxtilə Azərbaycanda müstəqil televiziya kanalı ANS var idi. ANS-ə çox adam baxırdı. Çünki başqa kanalların vermədiyi sujetlər, hadisələr, xəbərlər geniş işıqlandırılırdı. Təəssüf ki, televiziya kanallarımız hazırda o mühiti dirçəldib yüksək səviyyəyə qaldıra bilmirlər.

- Sizcə, Milli Televiziya və Radio Şurası bu istiqamətdə hansı yeniliklər edə, necə stimullaşdırıcı tədbirlər görə bilər?

- Milli Televiziya və Radio Şurası maarifçilik proqramı üçün müsabiqə elan etmişdi, bilmədik ki, onun axırı necə oldu. Maarifçi verilişlərə, öyrədici proqramlara ehtiyac var. Bu kanal arzu edirəm ki, ya AzTV-nin, ya da İctimai TV-nin ixtiyarında olsun. Təsəvvür edin, Yaponiya kimi dünyanın inkişaf etmiş ölkəsində onun İctimai televiziyasının Birinci kanalı universaldır. Amma İkinci kanal maarif kanalıdır. Azərbaycanda da ciddi maarifçi kanala ehtiyac var. Televiziyalar bununla bağlı ciddi düşünməlidirlər.

- Şou verilişlərimiz necə? Tamaşaçının yumor istəyinə cavab verə bilirmi?

- İnsanlar keyfiyyətli şouya baxmaq istəyirlər. O cür şou varmı? Təəssüf ki, çox azdır. Məsələn, İctimai TV-də “3D” proqramı meydana çıxdı. Əməlli-başlı ciddi rezonans doğurdu. Bunu qəbul etməyənlər də var idi. Amma proqramda müxtəlif kateqoriyadan olan insanlar cəmiyyət üçün çox maraqlı subyektə çevrildi. Ortaya qoyulan mövzular, müsahibələr cazibədar idi. Çünki formanın özü qeyri-standart idi.

Kütləvi şou proqramlarını canlandırmağa ehtiyac var. O bayağı, bəsit, xüsusən əvvəllər Xəzər TV-də, Lider TV-də olan o proqramlar yaxşı ki, bağlanıb. Məişət, toyxana səviyyəsində əyləncə proqramlarının bağlanması müsbət haldır. Amma bağlananların yerinə mahiyyətcə yenisi və keyfiyyətlisi yaradılmalıdır.

- Televiziya kanallarımız öz əvvəlki auditoriyasını nə vaxtsa geri qaytara biləcəkmi?

- Bu barədə kanal rəhbərləri düşünməli, yeni cazibədar proqramlarla auditoriyalarını qaytarmalıdırlar. Belə olan halda öz televiziyalarımızla fəxr edə bilərik. İndiki halda kanallarımızda çatışmayan 3 şey var: birincisi, yaxşı idarəçi, menecment olmalı, ikincisi, forma və məzmun yüksəldilməli, üçüncüsü isə kadr məsələləri və iqtisadi-maliyyə məsələləri həll edilməlidir. Yalnız bu halda televiziya kanallarımızı bəlli bir səviyyəyə qaldıra bilərik.

13 sentyabr. Roald Dal günü

Sən bir xalqın yazıçısı olasan, amma digər xalqlarda da o qədər seviləsən ki, ilin 365 gününün biri sənin günün ola, həmin günü dünyada qeyd edələr. Roald Dal adı bizə nəsə deyirmi? Bu, Şekspir deyil, Hemenquey, Höte, Balzak, Hüqo deyil, heç Markes də deyil, əksəriyyətimiz onun adını belə eşitməmişik, di gəl, təqvimdə onun adına gün salınıb. Bəs kimdir Roald Dal? 1916-cı ilin bu günündə doğulan norveç əsilli Britaniya ədibi, çoxsaylı  romanlar, nağıl və novellalar müəllifi olan yazıçı, şair, ssenarist. Onun prozası öz gözlənilməz sonluqları ilə, uşaq kitabları isə sentimentalizmdən uzaqlığı, qara yumoru ilə məşhurdur. Ədəbiyyat üzrə bəs qədər mükafatlar alan Roald Dal günü Avropada Böyük Britaniya və Nörveçdə, Latın Amerikası və Afrika ölkələrində zəruri şəkildə qeyd edilir, digər dünyada isə ən azı ədəbiyyatsevərlər onu anırlar. Biz də bu gün adını eşidib hafizəmizə yazsaq bəsimizdir. Barı bundan sonra bir əcnəbi bizə “Roald Dal gününüz mübarək” deyəndə, ən azı bunu hansısa Halloween günü ilə qarışdırmarıq.

13 sentyabr. Proqramçı və kompüterçi günü

Hər ilin 256-cı gününü proqramçı və kompüterçi kimi qeyd etmək ənənəsi var. Niyə 256? Bu, bir baytın köməkliyi ilə ifadə ediləsi mümkün olan rəqəm sayıdır. Adətən, proqramçı deyəndə fikrə personal kompüter qarşısında əyləşmiş şəxs gəlir, zira, məsafə idarəsi pultundan tutmuş proqram idarəli mürəkkəb istehsal dəzgahlarınacan hər bir elektron cihaz özlüyündə proqramlaşdırma mühəndisinin əlindən keçir. Televizora baxırıq, radio dinləyirik, telefonla danışırıq, bunların hər birini proqramçı yaradıb. Bir görün, bu gün nə qədər insanın bayramıdır. Təbrik edək hamısını. Gələcəyin ən çox tələb edilən sahələrində əyləşiblər, seçimləri gözəldir, çörək pulu qazanmaq problemi görməzlər əlbəttə ki.

13 sentyabr. Başqa birisini günahlandırmaq günü

Maraqlı bir gündür, deyilmi? Bu gün bilirsiniz kimə aiddir? Həmişə hər şeydə “nə yemisən, turşulu aş” deyib eyni adamı ittiham edənlərə. Onlara xitabən bu günü yaradıblar ki, atam-qardaşım, ildə bir gün get bir başqasından yapış, bu binəvaya bircə gün dinclik ver. Uğursuz ailə başçısı hər şeydə həyat yoldaşını, səbatsız müdir referentini, məşqçi yetişdirməsini günahkar bilmirmi, bilir. Ağzından gələni demirmi, deyir. Bu gün bunu edə bilməyəcək. Hüququ pozulanlar, bu gün belə hal təkrarlansa inamla Haaqa məhkəməsinə müraciət edib təzminat qopara bilərsiniz, ianın mənə.

13 sentyabr. Sem dayının günü

Bu gün dünyanın super güclü dövləti hansısa banan, piroq, yaxud kotlet gününü qeyd etmir, Sem dayının gününü qeyd edir, ona görə də bu rəsmi bayrama görə amerikalılara təbrik düşmürmü, düşür. Sem dayını tanımayan olmaz yəqin ki, ABŞ-ın simvollarından biridir. Bu simvolun proobrazı Sem Uilson 1776-cı ilin 13 sentyabrında doğulduğundan bu gün Sem dayı günü kimi bayram edilir.

Öz aramızdır, Sem dayı yaxşı səslənir, onu dilimizə Sem əmi kimi tərcümə etsəydik uğursuz alınardı. Siz heç eçitmisinizmi deyələr, filankəsin yaxşı əmisi vardı, onu qabağa çəkdi? Əsla yox. Qabağa çəkən, arxa-dayaq olan ancaq daydaylar olur. Amerika da dünyada ən yaxşı arxa-dayaq sayıla bilər, onun statusu dayılıqdır, əmilik yox.

13 sentyabr. Pozitiv düşüncə günü

İnsan beyni fəaliyyəti müddətində yalnız düşünür. İnsanın yaşadığı mühitdən asılı olaraq bu düşüncələr pozitiv, yaxud neqativ olur. İndi dünyanın ən pis vaxtıdır, hər şey bir yana, koronavirusun həmləsi hamını qorxu, xof içinə salıb. Təsəvvür edin, əhalisinə qarşı ən diqqətli və qayğıkeş olan İsrail dövləti ən bahalı və ən keyfiyyətli hesab olunan Moderna və Pfizer/BioNTech vaksini alıb vaksinasiya edib, iki gün öncə rəsmi məlumat yayılıb ki, vaksin olunmuş hər 100 insandan 10 nəfəri yoluxanlar sırasındadır. Bu, katastrofik nəticədir. (Əlbəttə ki, gəlin Azərbaycanda bu sahədəki pripiskanı, guya yoluxanların 99 faizini vaksin olunmayanların təşkil etməsi “faktını” nəzərə almayaq). Belə dönəmdə insan neqativlikdən necə çıxsın, necə pozitiv düşünsün axı? Bundan əlavə, gün-güzəranın yaratdığı problemləri də əlavə etsək, bugünkü statistik insanın durumu tam çılpaqlığı ilə göz önündə dayanar. Bununla belə, bu gün – 13 sentyabr günü insanlığa bir çağırış var, gəlin pozitiv düşünək, kədərə əyilməyək. Cəmi bircə gün bütün dərdi-sərimizi unuda bilərik axı.

13 sentyabr. Super Mario günü

Aman aman, unutmaqmı olar, bu gün həm də Super Mario günüdür. Bəli, məhz həmin o məşhur Dendi, Sega oyunu. O oyun ki, ilk dəfə 1985-ci ildə Yaponiyada yaranıb, həmin il ABŞ-a, iki il sonra da Avropaya təşrif buyurub. Bu oyunun baniləri Famicom komandasının üzvləri Siqeru Miyamoto və Takaşı Tedzukadır, oyun təqdim olunanda onu “möhtəşəm kulminasiya” adlandırmışdılar. Tezliklə bütün dünya əlinə pult alıb Marionu və qardaşı Luidcini Göbələklər krallığı ərazisi ilə təqiblərdən vaz keçirəə-keçirə səyahət etdirməyə, bununla da Odlu çiçək, Super göbələk, Ulduzlu adam kimi bonuslar toplamağa başladı. Bir oyun bütün dünyanın beynini işğal elədi. Azərbaycanı da həmçinin. 90-cı illərdə adi insanlar oyun salonlarına doluşdular, imkanlılar qurğuları alıb evlərində hərəkətə keçdilər. Beləcə, Super Mario gündəmimizi zəbt elədi. Hətta deyilənə görə, kabinet qapılarını kilidləyib, katibələrinə “Məni soruşan olsa de ki, iclasdadır” tapşırığı verib Super Marioya sarmaşan yüksək çinli məmurlarımız da az olmayıb, xalqın taleyini həll etmək əvəzinə Marioyla Luidcinin taleyini həll ediblər.

13 sentyabr. Şokoladlı araxis, bir də şəhid uşaqlar

Amma elə düşünməyin ki, möhtərəm amerikalılar Sem dayının gününü qeyd edirlərsə, yeyib-içmək yaddan çıxıb. Qidalarla bağlı bu gün ABŞ-da düz iki bayram var. Milli şokolad günü və Araxis (yox, bunun qarşısında milli sözü qoyulmayıb) günü. Bu gün üçün daha gözəli araxisin üzərinə şokolad yaxıb yemək olardı əlbəttə. Braziliyalıların bu gündən başlayaraq bir həftə Farrupilya bayramını qeyd etməsini də dilə gətirək. Bu, 1835-ci ildəki bir hərəkatın şəninədir ki, Braziliyada aborogen qəbilə olan qauçosların liderlərinin qələbəsi ilə nəticələnən Farrupilya inqilabı baş verib. Meksikada bu gün uşaq-qəhrəmanlar günüdür, deməzsənmiş, 1847-ci ilin bu günündə Meksika –Amerika müharibəsi zamanı Çapultepeke döyüşündə əsgər heyəti qalmayan meksikalılar düşmənin qarşısına uşaq kursantları çıxarmağa məcbur olublarmış, onlar da hamısı həlak olubmuş. Bu gün dünyanın bir qism ölkələrində xərçəng xəstəliyi ilə mübarizə günü kimi də qeyd ediləcək.

Varisin “11-20 sentyabrın təqvimi” yazısından

Tanınmış şair Rüstəm Behrudinin “Mükəmməl yalan” adlı yeni kitabı işıq üzü görüb. Bu barədə şair öz Facebook səhifəsində məlumat verib.
Yeni kitaba müəllifin müxtəlif illərdə qələmə aldığı ictimai-siyasi məsələlərə münasibətini əks eləyən məqalələri və fəlsəfi düşüncələrini açıqlayan məktubları daxil edilmişdir.