Super User
UNESCO gəncləri beynəlxalq fotoqrafiya müsabiqəsində iştirak etməyə dəvət edir
UNESCO-nun “Gənclərin İpək Yollarına baxışı” adlı Proqramı çərçivəsində beynəlxalq fotoqrafiya müsabiqəsinə start verilib.
“Ədəbiyyat və incəsənət” portalı AzərTAC-a istinadən xəbər verir ki, UNESCO-nun İpək Yolları Proqramı çərçivəsində və qurumun Sosial və Humanitar Elmlər Sektorunun UNESCO Gənclər Proqramının məqsədlərinə uyğun olaraq təşkil edilən fotomüsabiqənin 2022-ci il nəşri iyulun 17-dək davam edəcək.
İpək yolları dəniz və quru yolları şəbəkəsindən ibarət geniş regionu əhatə edir. Cənubi Asiya və Cənub-Şərqi Asiya, Orta Asiya yarımadası, Rusiya düzənlikləri, İran və Anadolu yaylaları, Ərəbistan yarımadası, eləcə də Tanzaniyadan Mərakeşə qədər Şimali Afrika və Şimal-Şərqi Afrika, Fransa ilə Pireney yarımadasını birləşdirən, Şərqi və Cənubi Avropa boyunca uzanan İpək yolu ölkələrinin gənclərinə ünvanlanan “Gənclərin İpək Yollarına Baxışı” müsabiqəsi bu bölgələrdə yaşayan və ya oraya səyahət etmiş gənclərə düşüncələrini bölüşməyə, İpək yollarında qarşılıqlı əlaqə və mübadilələrdən qaynaqlanan ümumi mədəni irsi və plüralist kimlikləri daha yaxşı anlamağa imkanı verir. Müsabiqə İpək yollarının əhatə etdiyi müxtəlif insanlar arasında qarşılıqlı anlaşmanı və sülhü təşviq etmək üçün bu qarşılıqlı mədəni əlaqələri və görüşləri müasir dünyaya yaymaq məqsədilə fotoqrafiyadan istifadəni təşviq edir.
Müsabiqə iki fərqli yaş qrupunu əhatə edir: 14-17 və 18-25. Üçüncü dəfə təşkil olunan müsabiqəyə bu il “İnanc və mənəviyyatlar” və “Birlikdə yaşamaq” kimi iki mövzu üzrə fotolar qəbul edilir.
Fotolar seçki komissiyası tərəfindən nəzərdən keçiriləcək və hər yaş kateqoriyası üzrə qaliblər müəyyən olunacaq. Müsabiqə mükafatlandırma mərasimi ilə başa çatacaq. Birinci yerin qaliblərinə professional fotoaparat, ikinci yerin qaliblərinə yarıprofessional kamera, üçüncü yerin qaliblərinə isə rəqəmsal kamera (standart) hədiyyə olunacaq.
Bundan əlavə, COVID-19 məhdudiyyətlərinə uyğun olaraq, qaliblərin mərasimdə iştirakı üçün bütün xərclər ödəniləcək. UNESCO-nun dəvətinə əsasən, yaşı 17-dən az olan laureatları böyüklər müşayiət edə biləcəklər.
Qalib fotolar arasından ən yaxşı 50 fotoşəkil dünyanın müxtəlif ölkələrində sərgilənəcək.
Çüneyt İşıkın filmi İtaliyada mükafata layiq görülüb
İtaliyanın paytaxtı Roma şəhərində keçirilən beynəlxalq qısametrajlı film festivalında türkiyəli rejissor Cüneyt İşıkın çəkdiyi “Quş olsaydım” qısametrajlı filmi “Ən yaxşı xarici qısametrajlı film” nominasiyası üzrə mükafata layiq görülüb.
“Ədəbiyyat və incəsənət” portalı TASS agentliyinə istinadən xəbər verir ki, festival türkiyəli rejissor Ali Atayın “Ölümlü dünya” tammetrajlı bədii filmi ilə başlayıb. Filmlər müxtəlif nominasiyalar üzrə mükafatlandırılıb.
Qeyd edək ki, ibtidai məktəbin ikinci sinif şagirdi Berfinin yenicə köçdüyü İstanbuldakı həyatından bəhs edən “Quş olsaydım” filmi gerçək bir hekayədən götürülüb.
İncəsənət xadimləri təltif olunmuşlar
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “İncəsənət xadimləri üçün Azərbaycan Respublikası Prezidentinin mükafatlarının təsis edilməsi haqqında” Azərbaycan Respublikası Prezidentinin 2002‑ci il 28 may tarixli 707 nömrəli Fərmanına uyğun olaraq qərara alıram:
1. Səhnə fəaliyyəti ilə bağlı aşağıdakı aparıcı incəsənət xadimlərinə Azərbaycan Respublikası Prezidentinin mükafatları verilsin:
Abbasova-Budaqova Afaq Nurəhməd qızı
Abdurahmanov Yusif Fikrət oğlu
Abutalıbov Şirzad Əsəd oğlu
Adıgözəlov Yalçın Vasif oğlu
Ağakişiyev Rauf Fikrət oğlu
Ağaverdiyeva Məsməxanım Aslan qızı
Allahverdiyev Ceyhun Kərim oğlu
Allahverdiyeva Naibə Siyavuş qızı
Arsentyeva Olqa Anatolyevna
Atakişiyeva Mətanət Ağazair qızı
Babayev Allahverən Hacı oğlu
Babayev Əbülfət Məmməd oğlu
Babayeva İnarə Əhməd qızı
Babayeva Töhfə Ağaəli qızı
Bağırov İzaməddin Zeynal oğlu
Bağırova Sənubər Yusufovna
Baliyeva Natalya Gennadyevna
Barateliya Naala Raulyevna
Bayramov Salman Bayram oğlu
Bayramov Təyyar Allahverdi oğlu
Bədəlova Solmaz Əligözəl qızı
Bəşirov Xanlar Əyyub oğlu
Cəbrayılov Elşən Şahin oğlu
Cəfərov Samir Qadir oğlu
Dadaşov Əmrah Balaxan oğlu
Dubovitskaya Mariya Aleksandrovna
Eyvazov Yasəf Alxas oğlu
Eyvazova Ayan Fuad qızı
Eyyubov Musa Eyyub oğlu
Əfəndi Elçin Fərahim oğlu
Əfəndiyeva Xəlilova İlahə Əhsan qızı
Əflaki Ədilə Osman qızı
Əhmədli Bəhruz Vaqif oğlu
Əhmədov Çingiz Əli Əşrəf oğlu
Əhmədov İlyas Əhməd oğlu
Ələkbərzadə Mehriban Zaur qızı
Əlili Hüseyn Azad oğlu
Əliyev Ələkbər Həsən oğlu
Əliyev Əliyar Əlişan oğlu
Əliyev İqbal Adil oğlu
Əliyev Sərvər Bəhlul oğlu
Əliyev Vaqif Səfər oğlu
Əliyeva İlahə Yavər qızı
Əliyeva Münəvvər Sabir qızı
Əliyeva Ülkər Sabir qızı
Əlizadə Əkbər Müzəffər oğlu
Əlizadə Şəhla Seidşah qızı
Əmrahov Rövşən Əbdürəhman oğlu
Əsgərov Əli Rəhim oğlu
Əzizov Əzizağa Ağayar oğlu
Fətullayeva Aygün Bəhruz qızı
Hacıyev Əli Əliyusif oğlu
Hacıyev İlqar Xəlil oğlu
Hacıyeva Sevil İnşalla qızı
Hacıyeva Siddiqə Zakir qızı
Heybətov Anar Mithət oğlu
Həbibov Nicat Əli oğlu
Həsənquliyev Kazım Feyruz oğlu
Həsənov Kərim Abbas oğlu
Həsənov Vidadi İsmail oğlu
Həsənova Natavan Mikayıl qızı
Həşimov Orxan İlqar oğlu
Həşimzadə Xanlar Allahverdi oğlu
Hüseynli Anar Vaqif oğlu
Hüseynov Elnur Bəhrəmxan oğlu
Hüseynov Fizuli İsmət oğlu
Hüseynov Şövqi Ərəstun oğlu
Hüseynova İlahə Həsən qızı
Hüseynova Kamilla Fikrət qızı
Hüseynova Kəmalə Müzəffər qızı
Xəlilzadə Rüfət Eldar oğlu
İbişov Tahir Fidayə oğlu
İbrahimli Qabil Mahmud oğlu
İbrahimov Fuad Natiq oğlu
İbrahimova Nigar Rəfael qızı
İbrahimova Şəhla İbrahim qızı
İmranova İnna Aleksandrovna
İsmayılov Qurban İbrahim oğlu
İsrafilov Fərhad Ramazan oğlu
Kazımov Nicat Mirəziz oğlu
Kərimduxt Rövşən Ramazan oğlu
Kərimov Elnur Umbay oğlu
Kərimov Loğman Seyfulla oğlu
Kərimova Nərgiz Faiq qızı
Qasımov Məmmədsafa Məmmədəli oğlu
Qasımov Yusif Əli oğlu
Qasımova Sevinc Vahid qızı
Qəhrəmanov Abbas Əhməd oğlu
Qocayev Rəhim Xəlil oğlu
Quliyev Cəmil Elşad oğlu
Quliyev Elxan Əli Bala oğlu
Quliyev Əyyub Ramiz oğlu
Quliyev Hafiz Məhərrəm oğlu
Quliyeva Səbinə Kasumovna
Quliyeva Şəlalə Şahvələt qızı
Qurbanova Pərvanə Yaqub qızı
Makarova Nina Aleksandrovna
Mehrəliyev Vüsal Akif oğlu
Məhərrəmov Firudin Əliməmməd oğlu
Məmmədli Şamil Kamil oğlu
Məmmədov Ayşad Kamal oğlu
Məmmədov Murad Məmməd oğlu
Məmmədov Sabir Novruz oğlu
Məmmədova Günel Əzizağa qızı
Məsimov Qurban Abdulla oğlu
Mirişli Nazim Ramiz oğlu
Mir-Qasım Ayan Oqtay qızı
Mirzəyev Gülağası Ağa Hüseynoviç
Mirzəyev Rafiq İsmayıl oğlu
Mirzəyev Sucəddin Qiyas oğlu
Mirzəzadə Nicat Qərib oğlu
Musabəyli Nuridə Musa qızı
Musayeva Şükufə İmran qızı
Mustafayev Arzu Əhməd oğlu
Mustafayev Vüsal Sədaqət oğlu
Mustafayeva Laləzar Bəşir qızı
Nağıyev Qasım Gəncalı oğlu
Nəzərov İlham İslam oğlu
Orucova Naidə Mülük qızı
Orucova Sevda Nəbi qızı
Osmanov Fuad Tacəddin oğlu
Ömərov Gümrah Rza oğlu
Poladov Əkram Nicad oğlu
Ramazanova Nigar Azər qızı
Rəhimov Səxavət Şərif oğlu
Rəhimova Rəna Hacıyevna
Rəhmanov Rəhman Tofiq oğlu
Rəsulov İsrafil Fərhad oğlu
Rüstəmov Elşən Mərdan oğlu
Rüstəmov Mahir Eldar oğlu
Rüstəmov Rüstəm Qərib oğlu
Rzayeva Elvira Nuca qızı
Rzayeva Vəfa Əliseyran qızı
Rzayev-Sarabski İsfar Aydın oğlu
Sadıqov Anar Babalı oğlu
Salamova Gülcahan Əhməd qızı
Salmanov Nicat Fərhad oğlu
Seyidov Aqib İbrahim oğlu
Seyidova Ceyla Uran qızı
Səlimli Mirbala Seyidəsgər oğlu
Səmədov Samir Səməd oğlu
Səmədov Şükür Hacıbala oğlu
Süleymanova Elmira Süleyman qızı
Şirinov Asif Əhməd oğlu
Şirinov Aslan Adil oğlu
Yahyayev Taleh Saleh oğlu
Zeynalov Azər Zeynalabdın oğlu
Zeynalov Yaqub Oktay oğlu
Zeynalova Zülfiyyə Əsgər qızı
Zülfüqarova Əminə Cahangir qızı.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
3. “İncəsənət xadimlərinə Azərbaycan Respublikası Prezidentinin mükafatlarının verilməsi haqqında” Azərbaycan Respublikası Prezidentinin 2021-ci il 7 may tarixli 2634 nömrəli Sərəncamının (Azərbaycan Respublikasının Qanunvericilik Toplusu, 2021, № 5, maddə 471) 1-ci hissəsi ləğv edilsin.
İlham Əliyev
Azərbaycan Respublikasının Prezidenti
Bakı şəhəri, 10 may 2022-ci il
Sabah “Xarıbülbül” festivalı başlayacaq
12-14 may tarixində Azərbaycanın mədəniyyət paytaxtı Şuşa şəhərində Mədəniyyət Nazirliyi, Heydər Əliyev Fondu və Şuşa Şəhəri Dövlət Qoruğunun təşkilatçılığı ilə V “Xarıbülbül” Beynəlxalq Folklor Festivalı keçiriləcək.
“Ədəbiyyat və incəsənət” portalı xəbər verir ki, Şuşa şəhərində ilk “Xarıbülbül” festivalı məşhur xanəndə, pedaqoq, Xalq artisti Seyid Şuşinskinin (1889-1965) 100 illik yubileyi ilə əlaqədar 1989-cu ildə keçirilib. Tədbir həmin ilin mayında – Şuşada xarıbülbülün çiçəklənmə dövründə düzənlənib. İlk festivalda yerli ifaçılarla yanaşı, keçmiş ittifaq respublikalarından Qırğızıstan, Qazaxıstan, Rusiya (Başqırdıstan), Litva və Belarusdan da musiqi qrupları iştirak edib. Ümumilikdə 100-ə yaxın qonağın iştirak etdiyi konsertlər Cıdır düzündə qurulmuş 7 məkanda keçirilib. Tədbirin ilk günü Qarabağ atları üzərində yarışlar və güləş yarışları ilə də yadda qalıb. Birinci festivalın tamaşaçıları əsasən Şuşa sakinləri olub.
1990-cı ildən “Xarıbülbül” festivalı beynəlxalq status alıb. İkinci festivala Hollandiya, Almaniya, İsrail və Türkiyədən də folklor qruplarının dəvət edilməsi böyük marağa səbəb olub. Qarabağ münaqişəsinin başlaması ilə əlaqədar Şuşada ağır vəziyyət yarandığından əsas konsertlər Ağdamda təşkil edilib. Festivalın bir sıra konsertləri Bərdə və Ağcabədidə də keçirilib. Ümumilikdə ikinci festivalda müxtəlif ölkələrdən 170-ə yaxın nümayəndə iştirak edib.
1991-ci ildə keçirilən III “Xarıbülbül” festivalına 25 ölkədən 300-ə yaxın nümayəndə qatılıb. ABŞ və Avstraliyadan olan rəssamlar da festivala təşrif buyurublar. Tamaşaçıların çoxluğu səbəbindən festivalın əsas konsertləri stadionlarda keçirilib.
II və III festivalların yekun konsertləri Bakıda indiki Heydər Əliyev Sarayında təşkil olunub.
Dördüncü festival 1992-ci il mayın 15-də başlamalı, o zamanadək keçirilənlərin ən möhtəşəmi olmalı idi. Dünyanın 30-dan çox ölkəsindən 500 nəfərin iştirakı nəzərdə tutulmuşdu. Lakin həmin ilin 8 mayında Şuşa şəhəri Ermənistan hərbi birləşmələri tərəfindən işğal edildiyindən “Xarıbülbül” festivalını burada təşkil etmək mümkün olmayıb. Festival yalnız qısa müddətdə Ağdam şəhərində, İmarət kompleksində keçirilib.
Şuşada “Xarıbülbül” Beynəlxalq Folklor Festivalı mədəniyyət paytaxtımızın 28 il sürən işğaldan azad edilməsindən sonra bərpa olundu. Azərbaycanın mədəniyyət paytaxtı 29 ildən sonra yenə doğmalarını, qonaqlarını qarşıladı. 2021-ci il mayın 12-13-də Şuşanın Cıdır düzündə Heydər Əliyev Fondunun təşkilatçılığı keçirilən sayca IV festivalın ilk günündə milli rəqs, muğam sənəti təqdim olundu. Azərbaycanın müxtəlif regionlarını və milli azlıqları təmsil edən folklor kollektivlərinin konsertləri keçirildi, müxtəlif illərdə Şuşada lentə alınmış Azərbaycan xanəndələrinin ifalarından ibarət videoçarxlar nümayiş etdirildi. Festivalın ikinci günündə Azərbaycan bəstəkarlarının klassik musiqi əsərləri təqdim olundu. Konsertdə Azərbaycan Dövlət Simfonik Orkestrinin və Azərbaycan Dövlət Xoru, həmçinin tanınmış vokal ifaçıları və digər solistlər çıxış etdilər.
V “Xarıbülbül” Beynəlxalq Folklor Festivalı mədəniyyət paytaxtımızın yeni növrağını, səsini dünyaya duyuracaq.
Azərbaycan mədəniyyət xadimlərinə Azərbaycan Respublikası Prezidentinin fərdi təqaüdünün verilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “Azərbaycan Respublikası Prezidentinin fərdi təqaüdünün təsis edilməsi haqqında” Azərbaycan Respublikası Prezidentinin 2002-ci il 11 iyun tarixli 715 nömrəli Fərmanına uyğun olaraq qərara alıram:
1. Azərbaycan mədəniyyətinin inkişafında xidmətlərinə görə aşağıdakı şəxslərə Azərbaycan Respublikası Prezidentinin fərdi təqaüdü verilsin:
Abdullayev Kyazım Ənvər oğlu
Balayev Məmmədəli Bəşir oğlu
İmanova Gülbacı Əliəkbər qızı
Qarayev Fərəc Qara oğlu
Novruzova Nubar Qulu qızı
Sadıqov Faiq Əbülfəz oğlu
Verdiyev Fikrət Süleyman oğlu.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
İlham Əliyev
Azərbaycan Respublikasının Prezidenti
Bakı şəhəri, 10 may 2022-ci il
Mədəniyyət Nazirliyi YAŞAT fonduna ianə etmək üçün xeyriyyə konserti təşkil edib
Azərbaycan Respublikası Mədəniyyət Nazirliyinin təşkilatçılığı, Azərbaycan Dövlət Akademik Filarmoniyasının və Heydər Əliyev Sarayının dəstəyi ilə Heydər Əliyev Sarayında Azərbaycan Dövlət Rəqs Ansamblının “Mənim Azərbaycanım” adlı Xeyriyyə konserti keçirilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, konsertdə Mədəniyyət Nazirinin birinci müavini Elnur Əliyev, Müdafiə Sənayesi Naziri Mədət Quliyev, YAŞAT Fondunun rəhbəri Elvin Hüseynov, bir qrup qazilər, incəsənət xadimləri və başqa qonaqlar iştirak etmişdir.
Konsertdən öncə çıxış edən Nazir müavini Elnur Əliyev, ölkəmizin əldə etdiyi tarixi zəfərdən sonraki dövrdə mədəniyyətimizin keyfiyyətcə yeni mərhələyə qədəm qoyduğunu vurğulamış, mədəni ənənələrimizin yaşadılması və inkişaf etdirilməsinin əhəmiyyətindən bəhs edərək milli rəqsimizin bu baxımdan xüsusi əhəmiyyətini qeyd etmişdir.
Daha sonra Azərbaycan Dövlət Rəqs Ansamblının ifasında “Mənim Azərbaycanım” və “Koroğlu” milli balet-tamaşası təqdim olunmuşdur. Ansamblın bədii rəhbəri Xalq artisti Rüfət Xəlilzadə, direktoru Əməkdar artist Elçin Qədimov, ansamblın baletmeysterləri Əməkdar artist Xanlar Bəşirov, Saina Əhmədova, ansamblın məşqçiləri, Əməkdar artist Fərid Əliyev, Alina Qontareva, solistlər Anar Məmmədov, Orxan Səfərli, Toğrul Şərifov, Aytən Alxasova, Valeriya Konkina, Rifan Qəhrəmanov, İsmayıl Məmmədzadədir
Böyük anşlaqla keçən konserti izləyən tamaşaçılar hər nömrədən sonra sürəkli alqışlar səsləndirmişdir.
Bilet satışından əldə olunan vəsait Azərbaycan Respublikasının ərazi bütövlüyünün müdafiəsi uğrunda yaralananlara və şəhid ailələrinə dəstək məqsədilə YAŞAT fonduna ianə ediləcəkdir.
Ən çox oxunan xəbər həbsxanadan residivistlə həbsxana rəhbərinin birlikdə yoxa çıxmaları olub
Son günlərin ən çox oxunan xəbəri ABŞ-ın Alabama ştatında ölüm hökmü alması gözlənilən cinayətkar residivistlə həbsxana rəisinin müavini olan xanımın həbsxanadan birgə yoxa çıxmaları xəbəridir.
“Ədəbiyyat və incəsənət” portalı Euronews-a istinadən xəbər verir ki, bütün hüquq-mühafizə orqanlarının axtardıqları, haqlarında məlumat verəcək şəxslərə böyük mükafat vəd edilən bu cütlük ötən gün İndiana ştatında ələ keçiblər. Düzdür, quldurun xanımı qorxudaraq onun qaçmasına vasitə eləməsi, özünü də girov götürməsi ehtimalı da var. Amma daha inandırıcısı sevgi motivləridir. Olsun ki, qadın kişiyə vurularaq öz həyatını riskə atıb ki, onunla birgə olsun.
Məhəbbət, sən nələrə qadirsən!
“Bir səssiz gecəni bələdçi tutub, qaçasan ayağın dəyməyən yerə”
“Ədəbiyyat və incəsənət” portalı istedadlı şair Zaur Ərmuğanın şeirlərini təqdim edir.
Zaur Ərmuğan (Əsgərov) 1979-cu ildə Neftçala rayonunun Həsənabad qəsəbəsində anadan olub. 2002-ci ildə BDU-nun filologiya fakültəsini bitirib. 2006-cı ildən dövri mətbuatda çap olunur. "Ədəbiyyat qəzeti", "Ədalət", "Kredo" və digər qəzetlərdə, "Mədəni-maarif", "Sözün işığı", "Xəzan" kimi jurnallarında çap olunub. Şeirləri özbək dilinə də tərcümə edilib, "Mənəviyyat çeşməsi" qəzetində və "Müasir Azərbaycan şeirləri" antologiyasında dərc olunub.
“Muğanın səsi", "Türk dünyası şeir seçkisi", "Xəzər nəğmələri ədəbi birliyi", "Xarıbülbül", "Zirvə", "Şərqin səsi", "Rəvan" kimi müxtəlif toplu, məcmuə, antologiya və almanaxlarda, ədəbi-bədii nümunələrlə çıxışlar edib.
2012-ci ildə "Günəş ömrü istəyirəm" adlı şeirlər kitabı ilə oxucularla görüşə gəlib.
2017-ci ildə Dünya Gənc Türk Yazarlar Birliyinin Fəxri Fərmanı ilə təltif edilib. 2019-cu ildən Azərbaycan Jurnalistlər Birliyinin üzvüdür.
ÇIXIB GEDƏSƏN
Bir səssiz gecəni bələdçi tutub
Qaçasan bir ayaq dəyməyən yerə.
Bütün olanları elə unudub
Gedəsən gümanın gəlməyən yerə.
Gedəsən, gözündə ümid solmaya,
Gedəsən, gedəsən axıra kimi.
Gedəsən, qəmlənib könlün dolmaya,
Gedəsən, nə deyim, yol hara kimi?!...
Saxta sifətlərdən, süni nəfəsdən
Canını qurtaran addımın ola.
Boşboğaz ağızdan, hay-küylü səsdən
Uzaqda balaca bir damın ola.
Ağzı açıq qala yalançı dostlar,
Yalançı qonşular, yalançı qohum.
Daha səslənməyə yalançı tostlar,
Bir məclis qurasan, keflənə ruhun.
Arxanca qarğıyıb üzə gülənin
Üzü də, gözü də yada düşməyə.
Bir yerə gedəsən, gəlib gedənin
Heç tapılmaya da bir görüşməyə.
Hər dedi-qodudan gen dolanasan,
Düşüb daban-daban güdənin ki yox!
Onda nəfəs alar rahatlıqla can,
Səni səndən özgə görənin ki yox!
Düzünü min yerə əyri yozanlar,
O yaman ağızlar, o bəd çənələr,
Sənə diri-diri qəbir qazanlar
Elə yox ola ki, nə var dinələr?!
Gecə sübhə kimi yol yorğunutək
Ulduzlar, bir də ay işığın, nurun...
Başını götürüb lap o başadək
Qaşasan, təki bu qurğudan qorun!
Qovub ömürlərdən çəni, dumanı,
Zülmətdə qalana gün bağışladım.
Olmadım əllərin nəsnə umanı,
Mən səsə səs verdim, ün bağışladım.
Əritdim canımı yanar şam kimi,
Yanıram, üstümə su tökənim kim?!
İçildim bir dolu qızıl cam kimi,
Görmədim, gözümə mil çəkənim kim.
Aldanıb fəndgirə saflıq ucundan,
Hiyləgər məkriylə tora düşdüm hey.
Çoxunu qurtardım dar ağacından,
Özüm də çıxılmaz dara düşdüm hey.
Hənirsiz ürəkdir odsuz adamlar,
Titrədər köksümü buz soyuqluğu.
Hələ adından da adsız adamlar
Elə pay yedilər, oğru ki oğru!
Nə deyim, kimlərə tutum üzümü?
Mənim göz yaşımı silsin içimdən?
Bircə bu düyünün budur çözümü,
Allah! Bir bəxt doldur bu bir içimdən.
Gedəsən bir yolluq, çıxıb gedəsən,
Sevdiyin o qız da unuda səni.
Qəlbin nə deyirsə, onu edəsən,
Səsin sığal-sığal ovuda səni.
Dönüb geriyə də baxmaya gözün,
Gedəsən bulaqlar ağlayan yerə.
Qəlbə sirdaş olan sirr daşın özün,
Gedəsən çağları çağlayan yerə.
O yerin nə yolu, cığırı ola,
O yerin adını kimsə bilməyə.
Getdiyin o yolda uğurun ola,
Arzular sönməyə, ümid ölməyə.
Dünyanın bir dağı, çölü, meşəsi,
Dünyanın quşqonmaz daşı deyimmi?
Dünyanın elə bir rahat guşəsi
Ola, bir çıxasan başa deyimmi?
Bir səssiz gecəni bələdçi tutub
Gedəsən ayağın dəyməyən yerə.
Nə varsa, nə varsa, daha unudub
Gedəsən dönməyin gəlməyən yerə.
QONAĞAM
Dünya dərin bir dəryadır,
Toruna düşən balığam.
Yeri, göyü də səhradır,
Yolundan keçən çarığam.
Əlimdədir əl ağacım,
Duamdan yetə əlacım.
Məzara gedir bir ucum,
Beşikdəki o uşağam.
Ömür ucuzmuş, gün baha,
Gördüyümü gördüm daha.
Diş altındadır iştaha,
Dişi ağrıyan damağam.
Hərə öz bəxtini yeyir,
Ağız dediyini deyir.
Dünyadan umum nə xeyir?!
Yola verilən qonağam.
DÜNYA
Dünya tərsinə fırlanır,
Cızından çıxıbdır dünya.
Sınıb çarxı, sınıb oxu,
Özündən çıxıbdır dünya.
Düşdük bu yollar ardına,
Tapıb gətirək yurduna.
Tapşıraq dağda qurduna,
Düzündən çıxıbdır dünya.
Bu göyərən, bu solanı,
Niyə saldı bu talanı?
Üzə duran ağ yalanın
Yüzündən çıxıbdır dünya.
Vədələri nağıl imiş,
Bəxtimiz nə ağır imiş?!
Gör bir necə cığal imiş,
Sözündən çıxıbdır dünya.
ÜMİD PUÇ OLANDA
Tale yüküm dağdan ağır,
özümü daşıyıram çiynimdə.
Kədərim
təzələnən dərdim kimi
həmişə geyindiyim
köhnə libasımdır əynimdə.
Ümidimin qaralıb nəfəsi,
Başı üstə dayanıb
tutmuşam üzünü qibləyə.
Allahımdan səs çıxmır.
Bağlanıb qapılar sabaha.
Əl-ələ tutub dayanmışıq ölməyə.
SƏNƏ SARI
Elə duyuram səni,
günəşi
kor öz içinin nurunda görən kimi,
işığı sevən kimi.
Xoşbəxtliyin yaşanırkən
görünməz olduğu qədər,
bilinməz olduğu qədər
bir həsrətsən.
Sevgin
yalnız ruhumun yetişəcəyi əlçatmazlıq.
Hələ də axtarıram səni
qəlbin qəlbimdə var ikən
əllərini əlimdə tapmağa.
Sənə yol gəlirəm
daha bu sənsizlikdən qopmağa.
Qarşıla məni.
ÜRƏYİMƏ
Gözümdən axır göz yaşı,
Nəmi yığdım ürəyimə.
Dərdin mənə yol yoldaşı,
Qəmi yığdım ürəyimə.
Ərşə çəkdin sən yuxumu,
Həm azımı, həm çoxumu.
Əkdin bircə dərd toxumu,
Zəmi yığdım ürəyimə.
Bir gileyin min havası,
Bir talanam, eşq yuvası.
Köklənmişəm, var havası,
Dəmi yığdım ürəyimə.
Məni məndən alan aldı,
Məni məndə oda saldı.
Kimim getdi, kimim qaldı?
Kimi yığdım ürəyimə?
Ərmuğan, bil, dərdim çoxdur,
Başım üstə şimşək çaxdı.
Vayıma el şərik çıxdı,
Cəmi yığdım ürəyimə.
ƏBƏDİ BAHAR
Bir zülmət içindən çıxıb günəşə,
Özümlə gətirdim dünyama səni.
Telinə taxdığım bircə bənövşə
Əbədi bağladı yazına məni.
DARLIQ
Ayaqlarım ilişib
Yer kürəsi tələsinə.
Təpiklərimlə döyəcləyirəm
divarlarını dünyanın.
Nə qaça bilirəm,
Nə uça bilirəm
bu darlıqdan.
“Azərkitab” 5 yaşını mənzilsiz qeyd edir
Azərbaycanda kitabın təbliğində müstəsna rol oynayan “Azərkitab” kitab təbliğatı mərkəzi ötən gün öz 5 illiyini qeyd etdi. Özü də mənzilsiz. Bir müddətdir ki, Mərkəz Yasamal rayonu, Akim Abbasov 78 ünvanında kirayələdiyi binanı icarə haqqının qaldırılması səbəbindən təhvil veribdir.
Əlbəttə ki, acınacaqlı haldır.
5 illik yubileydə hansı hissləri keçirməsi ilə bağlı “Ədəbiyyat və incəsənət” portalının əməkdaşına “Azərkitab”ın rəhbəri Mir İsrafil Həsənov belə cavab verib: “Çox təəssüf ki, bu gün "Azərkitab" 5 yaşını "Azərkitab"sız qeyd edir. "Azərkitab" müvəqqəti də olsa öz fəaliyyətini dayandırıb. Lakin biz inanırıq ki, o yenə də öz qapılarını oxucuların üzünə açacaqdır. Əziz “Azərkitab”! Adın da, günün də mübarək! Sən həmişə yaşayacaqsan! Yaşa ki, mənəvi dünyamız yaşasın!”
Biz də ümid edək ki, “Azərkitab” yenidən ölkənin kitabçılıq həyatına bir canlanma gətirəcək.
Rəsm qalereyası: Səttar Bəhlulzadə, “Natürmort”
Rəsm qalereyası: Səttar Bəhlulzadə, “Natürmort”
