Super User
“Avatar” sürətlə temp yığır
Məşhur rejissor Ceyms Kemeronun “Avatar: Suyun yolu” filmi beynəlxalq kassada “Titanik”i üstələyərək tarixin ən çox gəlir gətirən üçüncü filmi olub. O, xarici bazarlarda 1,538 milyard dollar toplayıb.
Bu barədə “The Variety” məlumat yayıb.
Birinci yerdə isə ekran əsərinin birinci hissəsi (sadəcə “Avatar”)- 2,1 milyard dollarla qərarlaşıb. Hələ ki, xaricdə ən çox gəlir əldə edən film olaraq qalan “Avatar” ikinci olan
“Avengers: Endgame” (1,9 milyard dollar) cüzi fərqlə üstələyir.
Qeyd olunub ki, beynəlxalq kassada Çin (240,6 milyon dollar), Fransa (141,5 milyon dollar), Almaniya (130,7 milyon dollar) və Cənubi Koreya (105,5 milyon dollar) liderlik edir.
“Ədəbiyyat və incəsənət”
(07.02.2023)
Uğur qazanmaq üçün lazım olan 15 keyfiyyət - Yüksək səviyyəli təhsil ala bilmək
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir
Əslində, uğur formulası ümumi olduğu qədər də spesifikdir, yəni bir xalq üçün lazım olan uğur qazanmaq keyfiyyətləri başqa bir xalq üçün aparıcı olmaya da bilər. Məsələn, Azərbaycanda (ümumən Şərqdə) uğur formulasında mental qayda-qanunlara, davranış tərzinə istinadı, möhkəm ailə faktorunun, nümunəvi tərbiyənin rolunun hegemonluğunu, milli kökə və dini mənsubiyyətə bağlılıq faktorunu spesifikliyə aid edə bilərik.
Mən öz şəxsi təcrübəm, eləcə də illərdir ki, davam edən müşahidələrim nəticəsində uğurun qazanılmasında aşağıdakı parametrləri xüsusi olaraq qabardardım:
4) Yüksək səviyyəli təhsil ala bilmək.
Təbii ki, ibtidai təhsil almaq mütləqdir, amma mən ali təhsili də uğur etalonunun bir parçası hesab edirəm. Həyatda bilik qazanmaq təhsilsiz də mümkün ola bilər. Ancaq ali təhsil özündə təkcə biliyi ehtiva eləmir, o, həm də biliyin qavranması tərzidir, düşüncə tərzidir, bilikdən necə istifadə etmək təlimçisidir. Universiteti mühiti insanın dünyagörüşünün formalaşmasında ən başlıca faktorlardandır.
“Ədəbiyyat və incəsənət”
(07.02. 2023)
“Azərbaycan - ərəb dili danışıq kitabçası” nəşr olunub
Dövlət Tərcümə Mərkəzi dil, tərcümə, xalqlararası ünsiyyət və anlaşma sahəsinə yararlı olacaq yeni, daha geniş formatlı “Azərbaycan - ərəb dili danışıq kitabçası” nəşr edib.
Bu kitabçada toplanan söz və ifadələr “Yolda”, “Sərhəddə”, “Hoteldə”, “Şəhərdə”, “Yeməklər və içkilər”, “Rabitə vasitələri”, “Tibbi yardım”, “Alış-veriş və xidmətlər”, “Gündəlik istifadə olunan söz və ifadələr”, “Vaxt və tarix” kimi fəsillər üzrə təqdim edilib.
Sözlüyün tərtibçisi – Mərkəzin ərəb dili üzrə mütəxəssisi Fərid Camalov, redaktorları – Bәhlul Abbasov və Şəfiqə Şəfadır.
Qeyd edək ki, nəşr ərəb ölkələrinə işgüzar və turist səfərinə gedənlər, eləcə də ərəb dilinə şifahi ünsiyyət vasitəsi ilə yiyələnmək istəyənlər üçün nəzərdə tutulub.
“Ədəbiyyat və incəsənət”
(07.02.2023)
“Uşaq ürəyim böyük ağladı!” - güneyli şair Fəriba Mürtəzayinin şeirləri
“Ədəbiyyat və incəsənət” portalının sevilən “Güneydən gələn səslər” rubrikasında portalımızın Güney Azərbaycan təmsilçiləri Əli Çağla və Vida Heşməti oxucularımızı güneyli yazarlarımızla hər həftə tanış edirlər. Bu dəfə sizlərə Fəriba Murtəzayinin şeirləri təqdim edilir.
Fəriba Murtəzayi Təbrizdə anadan olmuşdur. İqtisad fakültəsində təhsil etmişdir. İlk Farsca şeir kitabından sonra, "Dilim ağzımda ağlayır" adlı şeir kitabı 2014-cü ildə Urmiya şəhərində nəşr edilmişdir.
Fəribanın şeirləri İran, İraq, Azərbaycan və müxtəlif ölkələrin qəzetələrində çap olunmuşdur.
BİR TİKƏ YAŞAM
Bir tikə yaşam üçün
Ölümün qucağında
Qan bəllələrin boy-boy udub
Və gecənin incə yerindən qopartdıq
Qalın-qalın haraylarımızı!
Və nisgil dolu istəklərimizi
Baş örtülərin ortasına buraxıb
Qorxmadan, qurşunların önündə
Saçlarımızı uzun-uzun havalandırdıq!
Və yıxılıb, yıxılıb yenidən ayaqlandıq
Və illər boyu udqunduğumuz qışqırıqlar!..
Gec boğazlardan çıxdı!
Haray-haray,
Mən burdayam
Sən burdasan
Biz burdayıq.
Gəlin,
Gəlin qızlar
Gəlin qızlar qorxmayaq!..
Və qan tər içində islanan gəncliyimizi
Azadlıq döngələrinə səpək,
Bəlkə hər gələn, gedəndən toz qoparmasın!..
Göyçək qızlar ağlamasın, ölməsin
Uzun-uzun saçları ipək yolunu tutmasın!..
Gəlin
Gəlin
Gəlin qızlar qorxmasın!..
YAŞADIĞIM HEKAYƏ
Mən heç sevincimi gülmədim ki!
Görüncə də ağladım, gedincə də,
Doğurdan sevinc nədir?
Hüzün nədir?
Öylədir yanılmamışam, ağlamaqdan ibarətdir!
Mən duyğularımı ağladım,
Diqqət ilə atamın gözlərinin içinə baxardım,
Nədir bala, nə istəyirsən?!
Dərindən bir ah çəkdim
Uşaq ürəyim böyük ağladı!
Bir uşaq nə istər?
Anadan savayı nə istər?!
QƏDƏMLƏRİN GÖZÜM ÜSTƏ
Sənə olan sevgim,
Ürəyimdən
Boğazıma yol açıb.
Xımır-xımır
Baxışımda yol tapıb.
Gözümdə
Bir dam söz yığışıb.
Gəl dam üstə
Sənə söyləmişdim:
"Qədəmlərin gözüm üstə"
REYHAN
Baxdım sətirlərə
Adım yoxdur!
Kaşki reyhan olaydım,
Bir axşam üstü.
Ürəyinin süfrəsində
Bağ-bağ açılaydı,
Bir tikə çörək
Bir az da pendir.
Bəlkə,
Məni yeyib
Udub qurtaraydın!
BAL BAXIŞLAR
Gözlərinin rəngini,
Bal baxışlarını yalamışam.
Dilim boğazıma yapışıb
Sevginin ölçüsü olmaz
Bilirəm,
Gəl bağrıma
Son ölçüdür,
Danışa bilmirəm!
Qeyd: Orfoqrafiyaya toxunulmamışdır.
“Ədəbiyyat və incəsənət”
(07.02.2023)
Günün fotosu: Türkiyə və Suriyadakı zəlzələ gündəmdədir
Günün fotosu: Türkiyə və Suriyadakı zəlzələ gündəmdədir
Türkiyənin Cənub-Şərq hissəsində baş verən dağıdıcı - 7,8 ballıq zəlzələ qonşu Suriyada da öz gücünü göstərib. Zəlzələ Qahirədə, Beyrutda, Dəməşqdə belə hiss edilib.
Bütün dünyadan, o cümlədən Azərbaycandan fəlakət zonasına yardımlar göndərilməkdədir.
Foto: Euronews
“Ədəbiyyat və incəsənət”
(07.02.2023)
Qahirə Beynəlxalq Kitab Sərgisində azərbaycanlı müəlliflərin kitabları təqdim edilib
Yaxın Şərq, Afrika və Asiyadan 53 ölkənin 1047 nəşriyyatın iştirak etdiyi 54-cü Qahirə Beynəlxalq Kitab Sərgisində azərbaycanlı müəlliflərin kitabları təqdim edilib.
“Ədəbiyyat və incəsənət”
AzərTAC-a istinadən xəbər verir ki, Qahirə Universitetinin professoru Seymur Nəsirovun “Ərəb elminin inkişafında azərbaycanlı alimlərin rolu” adlı kitab sərgiyə gələnlərin böyük marağına səbəb olub. Tədqiqatçı alimin bu əsərində orta əsrlərə aid ərəb mənbələrində azərbaycanlı alimlərin fəaliyyəti barədə müfəssəl məlumatlar yer alıb.
Sərgidəki Azərbaycan stendində ərəbdilli oxuculara daha bir kitab - "Discover Azerbaijan" layihəsi çərçivəsində nəşr olunmuş "Azərbaycan sədası" adlı əsər təqdim edilib. Doktor Sədaqət Əliəşrəf, Azərbaycan Respublikası Diasporla İş üzrə Dövlət Komitəsinin Ərəb Ölkələri üzrə Koordinasiya Şurasının Misir üzrə əlaqələndiricisi Səbinə Sultan və Ayn-Şəms Universiteti tibb fakültəsinin tələbəsi Sandi Ənvərin müəllifi olduqları və Misirin 10 kitabxanasına təqdim olunmuş kitabda Azərbaycanın şəhərləri (Bakı, Gəncə, Şamaxı, Lənkəran, Şəki, Şuşa, Laçın) haqqında geniş məlumat verilib.
“Ədəbiyyat və incəsənət”
(07.02.2023)
Müğənni Zeynəb Dostəliyeva dəfn olunub
Xəbər verdiyimiz kimi, Xalq artisti Nazpəri Dostəliyevanın müğənni bacısı Zeynəb Dostəliyeva dünyasını dəyişib.
“Ədəbiyyat və incəsənət” axşam.az-a istinadən xəbər verir ki, onunla vida mərasimi ötən gün Nazpəri Dostəliyevanın evində keçirilib.
Mərhumun nəşi dəfn olunmaq üçün Səngəçal qəbiristanlığına aparılıb və orada dəfn olunub.
Qeyd edək ki, Z.Dostəliyeva uzun müddətdir xəstəxanada müalicə alırdı.
Allah rəhmət eləsin!
“Ədəbiyyat və incəsənət”
(07.02.2023)
Bəhram Bağırzadə: “Qaranlıq enerjinizi atmaq üçün özünüzə başqa bir yer tapın!”
Məşhur bakılı oğlan, Əməkdar artist Bəhram Bağırzadə sosial şəbəkələrdə ünvanına yazılanlara öz instaqram səhifəsində etiraz edərək yazıb:
"Hörmətli olmayan qeyri-dostlar! Sizin qəzəbiniz o qədər əvvəldən bilinəndir ki, hətta sizinlə həqiqətən darıxdırıcıdır. Bəlkə sosial mediamı oxumağı dayandırasınız? Niyə özünüzə belə işgəncə verirsiniz? Yoxsa o qədər intellektdən məhrumsunuz ki, öz neqativinizi kiməsə tökmək üçün sadəcə fizioloji istəkləriniz var? Düzünü desəm, bundan bezmişəm... Tək mən yox... Çingiz Abdullayev, Anar, Həmid Həmidov və bir çoxları da daimi çirkab şəlalələrinə və çirkli sellərə məruz qalırlar.
Səhifələrimdə nə etdiyimi, hansı dildə yazdığımı, hansı fikirləri paylaşdığımı və necə kreativ olduğumu bəyənmirsiniz? Onda buradan gedin! Daha yaxşısı, psixoloq və ya psixiatrın yanına gedin. Mənimlə eyni dalğada olan bütün həmfikirlərimə şadam. Qalanları üçün sosial şəbəkələrdəki səhifələrim bağlıdır. Qaranlıq enerjinizi atmaq üçün özünüzə başqa bir yer tapın. Buradan xoş getdiniz!".
“Ədəbiyyat və incəsənət”
(07.02.2023)
Gənclər tarixi abidələri qoruyacaqlar
“Qoru” Gənclər Təşəbbüs qrupunun təqdimatı olub
“İçərişəhər” və Qala qoruqlarının ərazisində yaşayan sakinlərin layihəsi olan “Qoru” Gənclər Təşəbbüs qrupunun təqdimatı keçirilib. Məqsədi çox ali bir məqsəd olan “qoruçulara” bundan sonra qəhvəyi uniformada tez-tez rast gələcəksiniz.
“Ədəbiyyat və incəsənət” xəbər verir ki, “Qoru” Gənclər Təşəbbüs qrupunun əsas məqsədi tariximizin yadigarı olan qoruqların qorunmasına yönəlib. Qrupun əsas fəaliyyət istiqamətlərinə - əhali arasında könüllük fəaliyyətinin aşılanması, qonşuluq ənənələrinin möhkəmlənməsi, qoruqların fəaliyyətində sakinlərin iştirakının təmin edilməsi, sakinlərdə qoruqlara və Qoruq İdarəsinə loyallığın artırılması, icmanın inkişaf etdirilməsi (bilik, savadlılıq, sosial bacarıqlar, dünyagörüşü), qoruğun qorunmasında maraqlı tərəflərin birgə fəaliyyətinin təşkil edilməsi kimi istiqamətlər daxildir.
Sözügedən təqdimat mərasimində “İçərişəhər” qoruğu İdarəsinin İdarə Heyətinin sədri Şahin Seyidzadə, Milli Məclisin deputatı Nigar Arpadarai, Azərbaycan Respublikası Gənclər Fondunun icraçı direktorunun müavini Orxan Ərəbov və Azərbaycan Dövlət İqtisad Universitetinin prorektoru, İçərişəhər Ağsaqqallar Şurasının üzvü Səadət Qəndilova çıxış edərək gənclərə uğurlar arzulayıblar.
Sonda “Qoru” Gənclər Təşəbbüs qrupunun fəaliyyətinə həsr edilmiş kiçik videoçarx nümayiş olunub.
Və uğurlu yol arzulayanlarla “qoruçular” xatirə fotosu çəkdiriblər.
“Ədəbiyyat və incəsənət”
(07.02.2023)
Özlərini vəzifəli şəxs kimi təqdim edərək vətəndaşların pulunu ələ keçirənlər həbs olunub
Kriminal xəbərlər müxtəlif cür olur. Bəzilərində onu törədənlərdən qəddarlıq, vəhşilik, amansızlıq, bəzilərində isə aktyorluq, savadlılıq, elmlilik tələb olunur. İndi haqqında sizə danışacağımız cinayət işində isə qəhrəmanlarımız məhz aktyorluq qabiliyyətlərini ortaya qoyublar. Təfsilatı xəbərdə.
Baş Prokuror yanında Korrupsiyaya Qarşı Mübarizə Baş İdarəsinin həyata keçirdiyi əməliyyat-axtarış tədbirləri ilə qabaqcadan əlbir olan İlkin Babayev, Eldar Muradov və digərlərinin özlərini dövlət orqanlarının əməkdaşları kimi təqdim edərək işlə təmin edilməsinə kömək göstəriləcəyi barədə yalan vəd verməklə şəxslərə məxsus 150 min manatdan çox pul vəsaitini dələduzluq yolu ilə ələ keçirmələrinə əsaslı şübhələr müəyyənləşdirilib.
Baş Prokurorluğun mətbuat xidmətinin məlumatına görə, faktla bağlı başlanmış cinayət işi üzrə qrup üzvləri Cinayət Məcəllənin 178.3.2-ci (dələduzluq külli miqdarda törədildikdə), 310-cu (vəzifəli şəxsin səlahiyyətlərini mənimsəmə) və 32.4, 312-ci (rüşvət verməyə təhrik etmə) maddələri ilə təqsirləndirilən şəxs qismində cəlb edilərək barələrində məhkəmənin qərarı əsasında həbs qətimkan tədbiri seçilib.
İş üzrə digər qanunazidd halların müəyyənləşdirilməsi istiqamətində tədbirlər davam etdirilir.
“Ədəbiyyat və incəsənət”
(07.02.2023)
