Super User
Milli Muğam Müsabiqəsində bu gün ikinci tur keçiriləcək
Bu gün Heydər Əliyev Fondu, Mədəniyyət Nazirliyi və Elm və Təhsil Nazirliyinin təşkilatçılığı ilə bütün ölkə üzrə keçirilən Milli Muğam müsabiqəsinin ikinci turu keçiriləcək. Dünən birinci tura yekun vurulub.
“Ədəbiyyat və incəsənət” portalı xəbər verir ki, Azərbaycan Milli Konservatoriyasında düzənlən birinci seçim turlarının dünənki -
növbəti mərhələsində əvvəlcə instrumental ifaçılıq üzrə dinləmələr keçirilib. Sözügedən kateqoriya üzrə 8 nəfər ifaçı səhnəyə çıxıb.
Səhnəyə dəvət olunan müsabiqə iştirakçıları Bayraməli Əliyev, Çingiz Əliyev, Samir Əsədli, Aişə Əmrahova, Hüseynağa Səmədov, Soltan Nadirov, Vaqif Təhməzov və Solmaz Rəhimovanın ifaları dinlənilib. Ümumilikdə ifaçılara 2 saat 30 dəqiqə vaxt ayrılıb.
Onları münsiflər heyətinin sədri, Milli Konservatoriyanın rektoru, Xalq artisti Siyavuş Kərimi, Xalq artistləri Fəxrəddin Dadaşov, Möhlət Müslümov, Əməkdar artistlər Şirzad Fətəliyev, Çinarə Heydərova qiymətləndiriblər.
İnstrumental ifaçılıq kateqoriyası üzrə dinləmələrdən sonra günün ikinci yarısında xanəndəlik kateqoriyası üzrə dinləmələrə başlanılacaq.
Turun ikinci günündə 8-i instrumental ifaçılıq, 10 –u isə xanəndəlik üzrə olmaqla 18 ifaçı səhnəyə çıxıb.
Qeyd edək ki, müsabiqənin ilk günündə 9-u instrumental, 10 –u isə xanəndəlik üzrə olmaqla 19 iştirakçı dinlənilib.
Qeyd edək ki, Milli Muğam Müsabiqəsi xanəndə və instrumental ifaçılıq kateqoriyaları üzrə keçirilir. Musiqi yarışmasına yaşı 18-dən 35-dək olan xanəndə və instrumental ifaçılar müraciət edib. Müraciət etmiş şəxslərin ilkin seçim turlarından sonra müsabiqəyə 38 nəfər vəsiqə qazanıb. 38 iştirakçıdan 20-si xanəndəlik, 18-i isə instrumental ifaçılıq üzrə yarışır. Aprelin 30-da müsabiqənin yekun konserti olacaq. Xanəndə və instrumental kateqoriyalarında 1, 2 və 3-cü yerin hər bir qalibi müvafiq olaraq 7 000, 5 000 və 3 000 AZN mükafat qazanacaq.
Milli Muğam Müsabiqəsinin qalibləri-xanəndə və instrumental ifa üzrə birinci yeri tutan iştirakçılar ölkəmizi “Muğam aləmi” 6-cı Beynəlxalq Muğam Festivalında təmsil edəcəklər.
“Ədəbiyyat və incəsənət”
(26.04.2023)
Heydər Əliyevin anadan olmasının 100 illiyinə həsr olunmuş konsert keçirilib
Bakı Şəhər Mədəniyyət Baş İdarəsinin 5 nömrəli Uşaq İncəsənət Məktəbində Ulu Öndər Heydər Əliyevin anadan olmasının 100 illiyinə həsr olunmuş “Muğam dünyamıza səyahət” adlı konsert təşkil olunub.
Tədbirin açılışında Azərbaycan muğamı haqqında məlumat verilib. Bildirilib ki, muğam dünya musiqi xəzinəsinin incisidir. Dünyada mövcud olan musiqi janrlarından fərqli olaraq, muğam bir çox xalqların milli-mədəni irsinin formalaşmasında və bugünkü dövrə qədər gəlib çatmasında mühüm rol oynayır.
Sonra musiqi nömrələri başlayıb.
Konsertdə məktəbin xanəndə ixtisası üzrə müəllimləri Təranə Musayeva və Fərhad Ramazanov “Şur dəstgahı”, “Dilkəş təsnifi” ilə çıxış ediblər. Onları tarda Vüqar Təhməzov, kamançada isə Zaur Zamanzadə müşayiət ediblər.
“Ədəbiyyat və incəsənət”
(26.04.2023)
Məmməd İsmayıl Şeir Yarışmasının mükafatları açıqlandı - 1-ci yer 5000 TL
"Güfte Edebiyat" Beynəlxalq Prof. Dr. Məmməd İsmayıl Şeir Yarışmasının mükafatları elan edilib. Bu barədə “Ədəbiyyat və incəsənət” portalına yarışmanın münsiflərindən olan Aysel Xanlarqızı Səfərli məlumat verib.
1. Beynəlxalq Prof. Dr. Məmməd İsmayıl şeir yarışması ildə bir dəfə elan edilən tarixlərdə "Güfte Edebuyat" mədəniyyət, sənət və ədəbiyyat dərgisi tərəfindən türk dünyasının böyük şairi Prof. Dr. Məmməd İsmayıl adına böyük şairin də fikir dünyasının bünövrəsi olan ortaq mədəniyyət və incəsənət bağlarının gücləndirilməsi məqsədi ilə təşkil olunur.
2. Yarışmaya tərdim ediləcək əsərlərin dili türkcədir.
3.Şeirlər vəznli və ya vəznsiz ola bilər.
4. Hər bir iştirakçı ancaq bir şeirlə təmsil oluna bilər.
5. Mövzu sərbəstdir.
6. Əsərlər ən çox 2 A4 həcmində olmalıdır.
7. Təqdim olunan əsər əvvəllər heç yerdə dərc olunmamalıdır. Əks halda, yer tutsa da, nəticəsi ləğv ediləcək.
8. Əsərlər sağ üst küncündə ləqəb yazılmış halda təqdim olunmalıdır.
9. İstirakçılar adının, soyadının, tərcümeyi-halının, ünvanının, ləqəbinin, telefon nömrəsinin və fotosunun olduğu sənədi təqdim etməlidir.
10. Əsərlər kompüterdə, Times New Roman, 12 ölçüsündə və 1.0 sətir aralığında yazılmış olmalıdır.
11. Yarışmaya təqdim olunan əsərlər geri qaytarılmayacaq və müəllif hüquqları "Güfte edebiyyat" da olacaq.
12. Şərtnamədə qeyd olunmamış məqamlarla əlaqədar yaranan fikir ayrılıqlarında təşkilat komitəsinin qərarları əsasdır.
Münsiflər heyəti
Seçim:
1. Fikret Yazıcıoğlu 2. İdris Gürdal 3. Mehmet Özcan Yasdıbaş 4. Rabie Ruşid 5. Ülviyye Ebulfezqızı
Final:
1. Prof. Dr. Abdullah Şengül 2. Talat Ülker 3. Celalettin Kurt 4. Ali Saçıkara 5. Sündüs Arslan Akça 6. Mahmut Hasgül 7. Aysel Xanlarqızı Seferli
Yarışma təqvimi:
Elan: 24 aprel 2023
Son qəbul: 15 oktyabr 2023
Seçim: 15 oktyabr-5 noyabr 2023
Final: 5 noyabr-5 dekabr 2023
Nəticələrin açıqlanması: 10 dekabr 2023
Mükafatlandırma mərasimi: 24 dekabr 2023
Mükafat:
1-ci yer: 5000 TL
2-ci yer: 3000 TL
3-cü yer: 2000 TL
Həvəsləndirici mükafat: 1000 TL
Müraciət:
Этот адрес электронной почты защищен от спам-ботов. У вас должен быть включен JavaScript для просмотра.
“Ədəbiyyat və incəsənət”
(25.04.2023)
Türk dünyası rəssamları Daşkənddə festivalda bir araya gəliblər
Azərbaycanın Xalq rəssamı Sakit Məmmədov Özbəkistan Rəssamlıq Akademiyasının qızıl medalı ilə təltif edilib
Özbəkistanda Beynəlxalq Təsviri və Tətbiqi Sənət Festivalı keçirilib.
AzərTAC xəbər verir ki, Kəmaləddin Behzad adına Özbəkistan Rəssamlıq Akademiyası və Beynəlxalq Türk Mədəniyyəti Təşkilatı – TÜRKSOY-un birgə təşkil etdiyi festivalda Azərbaycan, Qazaxıstan, Qırğızıstan, Türkiyə, Türkmənistan, eləcə də Macarıstan, Cənubi Koreya, Rusiya, Belarus və digər ölkələrdən rəssamlar iştirak ediblər.
Azərbaycandan festivala Xalq rəssamları Sakit Məmmədov, Arif Əziz və tanınmış fırça ustası Fikrət İbrahimli qatılıblar.
Festival çərçivəsində Daşkənddə iştirakçı rəssamların əsərlərindən ibarət sərgi açılıb.
Həmçinin Türk dünyası rəssamlarının toplantısı keçirilib. Toplantıda Türk Dünyası Rəssamlıq Akademiyasının təsis olunması barədə qərar qəbul edilib.
Tədbirdə rəssamlara TÜRKSOY-un sertifikatları və Özbəkistan Rəssamlıq Akademiyasının mükafatları təqdim olunub.
Azərbaycanın Xalq rəssamı Sakit Məmmədov təsviri sənət sahəsində səmərəli fəaliyyətinə görə Özbəkistan Rəssamlıq Akademiyasının qızıl medalı ilə təltif edilib.
Rəssam festivala dəvətə və yaradıcılığına göstərilən diqqətə görə TÜRKSOY-un baş katibi Sultan Raevə və Özbəkistan Rəssamlıq Akademiyasının prezidenti Akmal Nureddinova təşəkkürünü bildirib.
“Ədəbiyyat və incəsənət”
(25.04.2023)
Milli rəqslərimiz İsveçdə beynəlxalq festivallarda tanıdılıb
Azərbaycan milli rəqsləri İsveç paytaxtında keçirilən beynəlxalq festivallarda nümayiş etdirilib.
AzərTAC-ın xüsusi müxbiri xəbər verir ki, SAF- İsveç Azərbaycan birliyin nəzdində fəaliyyət göstərən və bu ölkədə yaşayan gənc həmvətənlərimizdən ibarət “Qarabağ” rəqs qrupu, paytaxt Stokholm şəhərində keçirilən iki böyük festivallarına çıxış edib.
"TUF" Türk Gənclər Federasiyanın tərəfindən təşkil olunan ilk festival Türkiyənin Milli Suverenlik və Uşaq Bayramına həsr olunub. İkinci festival isə IBN RUSHD İsveç Tədqiqat Birliyin tərəfindən müqəddəs Ramazan bayramı münasibəti ilə təşkil olunub.
Bir çox yerli ictimaiyyət nümayəndələrinin, siyasətçilərin və müxtəlif ölkələri təmsil edən iştirakçılarının qatıldığı festivallar çərçivəsində Azərbaycan mədəniyyətini də nümayiş etdirmək üçün “Qarabağ” milli rəqs qrupu çıxış edərək, “Şuşanın dağları” və “Naz eləmə” rəqsləri ilə yadda qalan çıxış ediblər. Böyük marağa səbəb olan “Qarabağ” rəqs qrupunun gənc rəqqasları hədiyyələrə layiq görülüb.
“Ədəbiyyat və incəsənət”
(25.04.2023)
Rəsm qalereyası: Vinsent Van Qoq, “Tunc gülqabında çiçəklər”
Rəsm qalereyası: Vinsent Van Qoq, “Tunc gülqabında çiçəklər”
"Mən vətənəm" kitabı Gədəbəy rayon Heydər Əliyev mərkəzində təqdim olunub
Dünya Gənc Türk Yazarlar Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirdiyi "Cəbhədən cəmiyyətə" Müharibə iştirakçısı yazarlarla səngər yoldaşlarının görüşləri adlı layihə çərçivəsində 44 günlük Vətən müharibəsi iştirakçısı olan yazarların müxtəlif janr və məzmunlu yaradıcılıq örnəklərindən ibarət yeni nəşr olunmuş kitabın Gədəbəy rayon Heydər Əliyev mərkəzində təqdimatı keçirilib.
Bu barədə “Ədəbiyyat və incəsənət” pprtalına layihə rəhbəri, Dünya Gənc Türk Yazarlar Birliyinin başqanı İntiqam Yaşar məlumat verib. Tədbirdə Dünya Gənc Türk Yazarlar Birliyinin Məsləhət Şurasının üzvü, şair Elşən Əzim, Dünya Gənc Türk Yazarlar Birliyinin üzvü, şair Elməddin Nicat, Vətən müharibəsi iştirakçısı, Dünya Gənc Türk Yazarlar Birliyinin üzvü Həsən Kür, rayon İcra Hakimiyyətinin nümayəndələri, Vətən müharibəsi iştirakçıları, gənclər və ictimaiyyət nümayəndələri iştirak edib.
Tədbiri giriş sözü ilə Gədəbəy rayon Heydər Əliyev Mərkəzinin direktoru Pərviz Bayramov açaraq, vətənimizin müstəqilliyi, ərazi bütövlüyü və suverenliyi uğrunda canından keçmiş şəhidlərin əziz xatirəsinin bir dəqiqəlik sükütla yad edilməsini təklif edib. Daha sonra fikrini davam etdirən Pərviz Bayramov kitabın əhəmiyyətini, ümumiyyətlə layihənin vətənpərvərliyin təbliği istiqamətində önəmli əhəmiyyət kəsb etdiyini vurğulayıb.
Sonra söz layihənin rəhbəri şair, Prezident təqaüdçüsü, Dünya Gənc Türk Yazarlar Birliyinin başqanı İntiqam Yaşara verilib. İntiqam Yaşar layihə və kitab haqqında, Dünya Gənc Türk Yazarlar Birliyinin fəaliyyəti haqqında geniş məlumat verərək tədbirin təşkil edilməsinin əhəmiyyətini tədbir iştirakçılarının diqqətinə çatdırıb. Təqdimatı təşkil olunan kitabın aktuallığı, kitabda yer alan Vətən müharibəsi iştirakçısı olan yazarların yazılarının xüsusi əhəmiyyətə malik olduğu qeyd olunub.
Daha sonra şair, Dünya Gənc Türk Yazarlar Birliyinin Məsləhət Şurasının üzvü Elşən Əzim, şair, Vətən müharibəsi iştirakçısı və kitabda şeirləri yer alan Həsən Kür, Gədəbəy rayon İcra Hakimiyyətinin nümayəndəsi Qədir Bağırov, Gədəbəy rayon Dövlət arxivinin müdiri Rüfət İmanquliyev, Gənclərin İnkişaf və Karyera Mərkəzinin əməkdaşı Cavid Dumanlı, Heydər Əliyev Mərkəzinin əməkdaşı
Sevər Tağıyeva, Vətən məüharibeləsi iştirakçısı, qazi Etibar Əliyev, Vətən müharibəsi iştirakçısı, qazi Elnur Sarıyev və başqaları kitab haqqında çıxış edərək kitabdakı şeir və hekayələrin bədii xüsusiyyətlərindən, gənclər üçün faydasından söz açıblar.
Çıxışlardan sonra məktəblilərin ifasında "Mən Vətənəm" kitabından ayrı-ayrı qazi şairlərin şeirlərindən parçalar səsləndirilib.
Tədbirə dəvət olunmuş Vətən müharibəsi iştirakçılarının cəbhə ilə bağlı təəsürüatları, gənclərə tövsiyələri dinlənilib. Yekunda müzakirələrdə aktiv iştirak edən iştirakçılar diplomlarla təltif edilib. Tədbirə xatirə şəkli çəkilməklə yekun vurulub.
“Ədəbiyyat və incəsənət”
(25.04.2023)
Günün fotosu: Əcnəbilər Sudanı tərk edir
Günün fotosu: Əcnəbilər Sudanı tərk edir
Sudanda əcnəbilərin ölkəni tərk etmələri intensivləşib. Buna səbəb ölkədə baş verən silahlı çevrilişdən sonra ordu ilə xüsusi təyinatlıların sülhə gələ bilməməsi və atəşin kəsilməməsidir. Bazar ertəsi Səüdiyyə Ərəbistanının burada missiya həyata keçirən 157 vətəndaşı ölkəni tərk edib.
Foto: Marwan Ali/Copyright 2023 The AP. All rights reserved. Euronews
“Ədəbiyyat və incəsənət”
(25.04.2023)
Mədəniyyət Nazirliyinin əməkdaşı vəfat edib
Sumqayıt Regional Mədəniyyət İdarəsinin rəisi Rəşad Əliyevin həyat yoldaşı, Mədəniyyət Nazirliyinin əməkdaşı, Azərbaycan Prezidentinin fəxri diplomu ilə təltif olunmuş Günay Əliyeva vəfat edib.
“Ədəbiyyat və incəsənət”in əldə etdiyi məlumata görə, mərhum xərçəng xəstəliyindən dünyasını dəyişib.
Günay Əliyeva ötən gün "Qurd qapısı" qəbiristanlığında dəfn olunub.
Allah rəhmət eləsin!
Xatırladaq ki, az öncə Mədəniyyət Nazirliyinin daha bir əməkdaşı vəfat etmişdi, nazirliyin Biləsuvar Regional Mədəniyyət İdarəsinin baş məsləhətçisi və Cəbrayıl rayonu üzrə nümayəndəsi Kamran Quliyev 63 yaşında dünyasını dəyişmişdi. O, bir müddət əvvəl COVID-19 infeksiyasına yoluxubmuş. Kamran Quliyev əslən Cəbrayıl rayonundan idi. Biləsuvardakı Cəbrayıl qəsəbəsində yaşayırdı.
“Ədəbiyyat və incəsənət”
(25.04.2023)
Baku TV-nin bir süjetinə şərh
Memarlıqla, milli mədəni irsimizin qorunmasıyla bağlı ən həssas məqamlara toxunan Baku TV-nin növbəti süjetində Balakəndə yerləşən, inşa tarixi V-IX əsrlərə aid olan erkən xristian məbədinin baxımsız vəziyyəti barədə idi. Süjetə baxdıq və ürək ağrısı keçirdik.
“Ədəbiyyat və incəsənət” portalı xəbər verir ki, məbəd Gürcüstanla sərhəddə, Poçtbinə kəndi ərazisində yerləşir. Düzbucaqlı formalı, zəng qülləsi olmayan, tək girişli məbədin uzunluğu 7, eni isə 5 metrdir.
Məbəd ciddi erroziyaya uğrasa da, günümüzə qədər gəlib çıxıb.
Baku TV-nin sözügedən məbəddən hazırladığı süjetdə tarixçi alim Akif Məmmədli qeyd edir ki, məbədin qapı və pəncərəsi çox alçaqa 40-50 sm hündürlükdə yerləşir, demək məbədin ən azı 2 metri yerin altında qalıb.
Üst örtüyü tam dağıdılan məbədin ən yaralı yeri heç də bu deyil. Hər bir tarixi abidənin onun hansə mədəniyyətə mənsub olmasını bildirən portal daşı olur. Mənsubiyyət bildirən portal daşları bu məbəddən götürülüb.
Akif Məmmədli qeyd edir ki, bu işin bədxah Qərb qonşularımız tərəfindən həyata keçirilməsi güman edilir. Amma bir həqiqət var, sən öz malına sahib çıxmırsansa onunla yadlar istədikləri kimi rəftar edəcəklər.
Süjetdə deyilənlərə onu əlavə edək ki, Mədəniyyət Nazirliyinin Mədəni İrsin Qorunması, İnkişafı və Bərpası Agentliyi məsələyə münasibət bildirib. Agentlik qeyd edib ki, məbədlə bağlı hazırda moniyorinq aparılır.
Tariximizi birlikdə qorumalıyıq.
“Ədəbiyyat və incəsənət”
(25.04.2023)
