Super User
Kukla Teatrı yanvar repertuarını bu gün açır
Abdulla Şaiq adına Azərbaycan Dövlət Kukla Teatrı yanvar ayı üçün nəzərdə tutulan repertuarını açıqlayıb. İlk tamaşa bu günə təyin olunub.
6, 7, 8 yanvar – “Qar kraliçasının Yeni il sərgüzəştləri”
13 yanvar – “Oyaq gözəl” ( iki dəfə, rus və Azərbaycan dilində)
14, 30 yanvar – “Qoğal”
15, 28 yanvar – “Məlikməmməd”
15, 27 yanvar – “Düyməcik”
21 yanvar – “Turp”, “Karlson” ( rus dilində)
22 yanvar – “Qırmızı papaq”
31 yanvar – “Maşa və Ayı”
22, 31 yanvar – “Maşa və Ayı” (rus dilində)
29 yanvar – “Üç donuz balası”, “Çipallino” (rus dilində)
30 yanvar – “Ağca və yeddi cırtdan”
“Ədəbiyyat və incəsənət”
(06.01.2023)
“Kimsə söz çeynəyir burda acından... ” –Faiq Hüseynbəylinin şeirləri
Ötən ilin əsas ədəbiyyat hadisələrindən biri də Qubada keçirilən SilkWay Beynəlxalq Ədəbiyyat Festivalının Azərbaycan turu oldu ki, 32 finalçının əsərlərindən ibarət Antologiya bu il “Azərkitab” Yayınlarında nəşr olunacaq. Festivalın rəsmi media dəstəkçisi olan “Ədəbiyyat və incəsənət” portalı antologiyaya daxil ediləcək əsərlərlə oxucularını tanış edir.
Faiq Hüseynbəyli
Hüseynbəyli Faiq Bilal oğlu 1983-cü il, dekabr ayının 20-də Cəlilabad rayonunun Alar kəndində anadan olub. 2004-cü ildən Azərbaycan Yazıçılar Birliyinin üzvüdür. Yaradıcılığına görə 2006-cı ildə “Gənclik, İdman və Turizm” nazirliyi tərəfindən “İlin ən yaxşı gənc şairi” kimi təltif olunub. 2007-ci ildə Prezident mükafatına layiq görülüb. Səkkiz poetik toplunun müəllifidir.
Faiq Hüseynbəyliyə çox rahatca peşəkar şair demək olar. Sözü cilalamaq, sözlə oynamaq, sözün nazını çəkmək, sözün qədrini bilmək onun şeirlərinin görünən tərəfləridir. Faiq Hüseynbəyli hər şeirində sözə bir abidə ucaldır sanki və deyir:
İlbəil yandıqca köz olur şair,
Hərf-hərf birləşib söz olur şair.
***
Bir səhər müharibəyə açıldı gözüm,
Gördüm, hər tərəfi
bürümüş vətən qoxusu.
Bir səhər müharibəyə açıldı gözüm,
Sən demə, qarışıb gecənin yuxusu,
Sən demə, qarışıb Gəncənin yuxusu.
Oyanıb otuz illik həsrətdən
Qocaman Murovdağ.
İlahi, möhtəşəmliyə bir bax!
Silkələnib, töküb üstündən yad izləri,
Şuşaya doğru səsləyir bizləri!
Səsləyir qədim abidələr -
Şuşa qalası,
Azıx mağarası,
Cıdır düzü.
Qaldığı yerdən boy atır
Xanın səsi, Vaqifin sözü.
Bir səhər müharibəyə açıldı gözüm,
Əmr verilib: - İrəli!
Üzülüb düşmənin
özgə ətəyindən əli.
Amma, lakin, ancaq,
dəyişməyib xisləti.
Atəşkəs istəyir müvəqqəti,
Aman diləyir,
girib heyvan cildinə çaqqallar,
Quzu kimi mələyir...
Döyüş meydanında dizini yerə atdı yağı,
Atəşə tutdu sivilləri, qız-gəlini, uşağı...
Məsum uşaqların ahı tutsun düşməni,
Xəbərlərə baxıb o ki var ağlamışam,
İçimdə bu əclaflığa qarşı
Bir ömürlük qisas hissi saxlamışam!
Daha sülh ola bilməz,
Axar sular durula bilməz!
Cənab Ali Baş Komandan,
Hörmətli zat ailləri,
Zəfər xəbərlərin xalqın ürəyinə su səpir,
Hərf-hərf, söz-söz, sətir-sətir.
Təşnə könüllərə məlhəmdi
Bütün çıxışların!
Rusiyadan, Fransadan eşidilir
Erməninin yalvarışları!
Bir səhər müharibəyə açıldı gözüm,
Bütün vücudumu bürüdü bu nida:
Qarabağ Azərbaycandır!
Günəş Ərgünəşdən doğdu bu yurda,
Əmr dəyişməyib: "İrəli!".
Qisas vaxtıdır,
Qana qan, cana candır!
Kəndbəkənd, oba-oba nəfəs alır,
Geri qayıdır torpaqlar
qarış-qarış, addım-addım...
Mənə zəfər verin,
Qələbə verin,
Azadlıq verin,
Bütün ağrılarımı-acılarımı unudum!
Ulu Babam, Dədəm Qorqud,
vaxt həmin vaxtdır,
An həmin andır -
Qarabağ Azərbaycandır!
***
İlbəil qocalır güzgülər,
Dərinləşir üzündəki cizgilər.
İlbəil qocalır yollar,
Enişdən yoxuşa ucalır yollar.
İlbəil quruyur ağaclar,
Qolsuz-budaqsız çürüyür ağaclar.
İlbəil əriyir sular,
Göylərə yeriyir sular.
Səmtini dəyişir çaylar,
Eyni fəslə dönür
Payızlar, qışlar,
Yazlar, yaylar.
İlbəil ayrılır o qız məndən,
Uzaqlaşır Günəş məndən,
Ay məndən, ulduz məndən.
İlbəil böyüyür qayğılar,
Bütün vücudumu bürüyür qayğılar.
İlbəil tanımır məni doğmalar, yadlar,
İlbəil süstləşir inadlar.
İlbəil çoxalır rəqəmlər,
İlbəil ömürdən çıxılır rəqəmlər.
Böyüyür addımlar, izlər,
Sükutun lal diliylə danışır sözlər.
İlbəil kar olur xəbərlər,
İçimdəki müharibəyə
uduzur bütün zəfərlər.
İlbəil uzaqlaşır hər şey adamdan,
Çıxmaq istəmirəm tənha odamdan.
İlbəil illər də azalır,
İlbəil bənizlər sozalır.
İlbəil yandıqca köz olur şair,
Hərf-hərf birləşib söz olur şair.
***
Salam, Tanrım mənim, salam, İlahi,
Mən gülü burnumda solan bəndənəm.
Çətin tanıyarsan bu qəmi, ahı,
Filankəsin oğlu filan bəndənəm.
Qarada itirdim bütün rəngləri,
O asan rəngləri, çətin rəngləri.
Atadan-anadan yetim rəngləri,
Həyat tablosuna salan bəndənəm.
Milçəklər qaynaşır söz pətəyində,
Nə kökündə dad var, nə kötəyində.
Həqiqət, azadlıq, haqq ətəyində,
Zühur namazını qılan bəndənəm.
Bəlkə də xitabım sənə xoş deyil,
Həmin adam deyil, vətəndaş deyil –
Heçdən yaratsan da, içim boş deyil,
Sən özün "Ol!" dedin, olan bəndənəm.
Çətin tanıyarsan... əyər tanısan,
Sən özün bu ruhun tərcümanısan.
Bütün şeirlərin qəhrəmanısan,
Min ildi qeydinə qalan bəndənəm.
Kimsə söz çeynəyir burda acından,
Qaçır ömrü boyu ehtiyacından...
Göstər ağ rəngini, tutum ucundan,
Mən yalan bəndənəm, yalan bəndənəm.
Sağ ol, Tanrım mənim, İlahim mənim,
Səndən öz payımı alan bəndənəm.
Sözün yorğunu
Yüyənə sığmayır dəli at kimi,
Ruha bax, dərənin-düzün yorğunu.
Min ildi Günəşdən nur içir əllər,
Min ildi ayaqlar izin yorğunu.
Həyat bir oyundu, yarışdan keçər,
Sevgidən, sevdadan, barışdan keçər.
Alın yazıları qırışdan keçər,
Alın yazıları... üzün yorğunu.
Tanrı, gəl sahib çıx bu ruha, cana,
Bir addım yaxın ol qulun insana.
Gündüzlər atadır, gecələr ana,
Oğulun yorğunu, qızın yorğunu.
Şimşəklər oynaşır qayada, dağda,
Rənglər yoxa çıxır qarada, ağda...
Qopmasın kökündən bircə budaq da,
Sən özün hifz elə, özün, yorğunu.
Ulayır səbrimi kəsən küləklər,
Torpaqdan, dənizdən küsən küləklər.
Bu yağan yağışlar, əsən küləklər,
Yar gələn yollarda tozun yorğunu.
Tanrı, sirlərini açan bəndəyəm,
Mən haçan Tanrıyam, haçan bəndəyəm?
Sözlə qanadlanıb uçan bəndəyəm,
Sözün yorğunuyam, sözün yorğunu.
“Ədəbiyyat və incəsənət”
(06.01.2023)
Minimum əməkhaqqının artırılması üçün 440 milyon manata yaxın vəsait ayrılır
“Minimum əməkhaqqının artırılması üçün 440 milyon manata yaxın vəsait ayrılması nəzərdə tutulur. Və minimum əməkhaqqı artırılacaq şəxslərin 440-450 mini dövlət sektorunda çalışanlardır”
Sitatı əmək və əhalinin sosial müdafiəsi nazirinin müavini Anar Əliyev Prezident İlham Əliyevin imzaladığı “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncamla əlaqədar nazirlikdə keçirilən brifinqdəki nitqindən gətiririk.
“Ədəbiyyat və incəsənət”
(06.01.2023)
Azərbaycanın qış gözəllikləri nümayiş edilir
Ötən gün Bakı Fotoqrafiya Evində “Sehrli Qala” festivalı çərçivəsində ölkəmizin qış mənzərələrini əks etdirən fotosərgi açılıb. Sərgi “Azərbaycanın qış gözəllikləri” adlanır.
Sərginin açılış mərasimi xeyli təntənəli olub. İçərişəhər Muzey Mərkəzinin direktoru Əminə Məlikova sərgini açıq elan edərək çıxış edib. O, sərginin əhəmiyyətini qeyd edib, Mərkəzin təşkilatçılığı ilə açılan bu sərginin 2023-cü il üçün ilk tədbirlər sırasında olduğunu bildirib.
“Azərbaycanın qış gözəllikləri” adlı sərginin təşkilində bəs məqsəd nədir?
Hər şeydən öncə, ölkəmizin qış gözəlliyini nümayiş etdirmək, əhalinin diqqətini Azərbaycanın təbiətinə yönəltmək, gənclərin mənzərə fotoqraflığına marağını artırmaq və bu istiqamətdə istedadlı müəlliflərə dəstək olmaq!
Tədbirin kuratoru, fotoqraf Rüstəm Hüseynov və fotoqraf Aydın Mehdiyev sərgidə iştirak edən bütün fotoqrafları təbrik edərək, bu cür sərgilərin açılmasının gözəl və vacib iş olduğunu vurğulayıblar.
Rüstəm Hüseynov bildirib ki, layihənin ideyası adətən isti mövsüm mənzərələrini əks etdirən sərgiləri ziyarət edərkən yaranıb. Düşünülüb ki, həmin sərgilərdə qış mənzərələrini də əks etdirən fotoların yer alması daha maraqlı ola bilər.
Əlbəttə ki, isti cənub ölkəsinin qış mənzərələrinin də öz gözəlliyi var.
Qeyd edək ki, sərgi yanvarın 12-dək davam edəcək.
“Ədəbiyyat və incəsənət”
(06.01.2023)
Ötən il 353 nəfər gəncimiz xaricdə təhsil almaq hüququ qazanıb
Ötən il Dövlət Proqramı çərçivəsində 353 nəfər azərbaycanlı xaricdə təhsil almaq hüququ əldə edib. Bu barədə mediaya Elm və Təhsil Nazirliyi açıqlama verilib.
Açıqlamada bildirilir ki, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı” çərçivəsində 2022-ci ildə keçirilən müsabiqələr nəticəsində 15 prioritet ixtisas istiqaməti üzrə dünyanın 18 ölkəsinə aid 111 ali təhsil müəssisəsində 80 nəfər bakalavriat, 273 nəfər isə magistratura səviyyəsində təhsil almaq hüququ qazanıb.
“Ədəbiyyat və incəsənət”
(05.01.2023)
Məşhur türkiyəli aktyor Hollivud ulduzu ilə qarşı-qarşıya gələcək
Məşhur ingilis rejissor Qay Ritçinin Hollivud istehsalı olan yeni filmi tezliklə ekranlara gələcək. "Sherlock Holmes", "Rocknrolla", "Transporter" və "Snatch" kimi işləri ilə aksiyon janrına yeni nəfəs gətirən rejissorun yeni filmində məşhur türkiyəli aktyor Kaan Urgancıoğlu da rol alıb.
“Ədəbiyyat və incəsənət” oxu.az-a istinadən xəbər verir ki, baş rollarda Ceyson Stethem, Hyu Qrant, Obri Plaza və Joş Hartnetin yer aldığı filmin aktyor heyətində həmçinin son illərdə İspaniyada ən yaxşı aktyor mükafatını alan və Tim Seyfi adı ilə tanınan türk-alman aktyor Timur Seyfəddin Ölmez, Ozan Ayhan, Ergün Kuyucu və Aksel Üstün kimi adlar da var.
Filmin daha əvvəl nümayiş olunan treyleri sosial mediada milyondan çox baxış toplayıb, həmçinin türkcə dublyajlı treyleri də yayımlanıb.
Çəkilişləri Antalyada gerçəkləşdirilən filmdə şəhərin möhtəşəm görüntüləri ilə yanaşı türk mədəniyyətindən bəhs edən səhnələr və türkcə dialoqlar da yer alıb.
Son zamanlar layihələri ilə adından söz etdirən uğurlu aktyor Kaan Urgancıoğlu filmdə "Casa" adlı mafiya liderini canlandırır və Ceyson Stethem ilə çəkilmiş aksiyon səhnələrində heyranedici aktyor oyunu nümayiş etdirir.
“Ədəbiyyat və incəsənət”
(05.01.2023)
Məhəmmədəminlərin sayı artmaqdadır
Ötən 2022-ci ildə Azərbaycanda yeni doğulan 4 körpəyə Məhəmmədəmin adı qoyulub. Bu barədə Ədliyyə Nazirliyinin məlumatında bildirilir.
Məlimatda o da bildirilir ki, ümumilikdə son 4 ildə Məhəmmədəmin adı verilən körpələrin sayı 20 nəfər olub.
Əlbəttə, bir xalqa istiqlaliyyət verən şəxsin adı xalq arasında daha populyar olmalıdır, rəqəmlər yüz dəfə artmalıdır.
Amma buna da şükür.
“Ədəbiyyat və incəsənət”
(05.01.2023)
Azərbaycandan, sizcə, neftdən sonra ən çox nə ixrac edilib?
Sualın cavabı İqtisadi İslahatların Təhlili və Kommunikasiya Mərkəzinin “İxrac icmalı”nın noyabr sayında verilib. Azərbaycanda cari ilin yanvar-noyabr aylarında ixrac edilən qeyri-neft məhsulları siyahısında liderlik karbamidə, pambıöa və qızıla aiddir. İndi isə təfərrüatı.
On bir ayda ixrac edilən qeyri-neft sektoruna aid malların siyahısında karbamid (198,6 milyon ABŞ dolları) birinci olub. Bu siyahıda pambıq mahlıcı (161,1 milyon dollar) ikinci, qızıl (156,1 milyon dollar) isə üçüncü yerdədir.
Bu ilin noyabr ayında ixrac edilən qeyri-neft sektoruna aid malların siyahısında emal olunmamış aşqarlanmamış alüminium (19,8 milyon dollar) birinci, karbamid (16,9 milyon dollar) ikinci və pomidor (tomat) (13,7 milyon dollar) üçüncü olub.
“Ədəbiyyat və incəsənət”
(05.01.2023)
AŞPA-nın qış sessiyasının gündəliyi açıqlanıb
Avropa Şurası Parlament Assambleyasının (AŞPA) 2023-cü il qış sessiyası yanvarın 23-dən 27-dək Strasburqda keçiriləcək. Azərbaycan nümayəndə heyətinin üzvləri qış sessiyasında iştirak edəcək və müzakirə olunan məsələlərə dair fikirlərini bildirəcəklər.
“Ədəbiyyat və incəsənət” portalı AzərTAC-a istinadən xəbər verir ki, Rusiya-Ukrayna münaqişəsinə dair hüquqi məsələlər, eləcə də insan hüquqlarının pozulması ilə bağlı təcili debatlar, həmçinin İslandiyanın Baş naziri və Almaniya xarici işlər nazirinin çıxışları qış plenar iclasının əsas məqamlarındandır. Sessiyada Avropa Şurası Baş katibi də çıxış edəcək.
Qış sessiyası çərçivəsində Parlament Assambleyası, həmçinin yenilənmiş, təkmilləşdirilmiş və gücləndirilmiş Avropa Şurası üçün dördüncü Sammitə dair hesabatı müzakirə edəcək. Avropa Şurasının dövlət və hökumət başçılarını bir araya gətirəcək Sammit may ayında Reykyavikdə keçiriləcək.
Qadınlara qarşı zorakılığın aradan qaldırılmasına dair İstanbul Konvensiyası, qadınlar və qızlara qarşı zorakılığın aradan qaldırılmasında kişilərin və oğlanların rolu və məsuliyyəti, ər-arvad əsarətinin həlli yollarının tapılması ilə bağlı birgə müzakirələr diqqət mərkəzində olacaq.
“Ədəbiyyat və incəsənət”
(05.01.2023)
Mahsun Kırmızıgül Bakıya gəlir
Türkiyənin ən reytinqli müğənniləri sırasında yer alan Mahsun Kırmızıgül Bakıya gəlir. Fevralın 12-də Bakı Konqres Mərkəzində Türkiyənin sevilən müğənnisinin konserti təşkil olunacaq.
Və o da var ki, məşhur pop müğənni 17 illik fasilədən sonra yenidən Bakıda öz sevilən ifaları ilə pərəstişkarları qarşısında çıxış edəcək.
Biletləri iTicket.az saytı və şəhərin kassalarından əldə etmək olar.
“Ədəbiyyat və incəsənət”
(05.01.2023)
