Super User
Anarın “Söz dünyası” çapdan çıxıb
Azərbaycan Yazıçılar Birliyinin sədri Anarın "Söz dünyası" kitabı işıq üzü görüb. Kitaba kitabın üz qabığında şəkilləri həkk olunmuş 22 nəfər haqda yazılar və onların müxtəlif vaxtlarda Anar haqda yazdığı yazılar və ya yazılardan, müsahibəlrədən parçalar daxil edilib.
Burada kimlər yoxdur? Yazıçılardan Kamal Abdulla, Mövlud Süleymanlı, Çingiz Abdullayev, Natiq Rəsulzadə, İlqar Fəhmi, Elçin Hüseynbəyli, Pərvin, şairlərdən Nüsrət Kəsəmənli, Ramiz Rövşən, Sabir Rüstəmxanlı, Vaqif Bayatlı Önər, Rəşad Məcid, Səlim Babullaoğlu, tənqidçilərdən və alimlərdən Nizami Cəfərov, İsa Həbibbəyli, Rəfael Hüseynov, Əsəd Cahangir...
Əsəd Cahangir qeyd edir ki, “Kitabı son 30 ilin ədəbi-bədii prosesinin güzgüsü adlandırmaq olar. Bu güzgüdə hər kəs öz dəqiq əksini tapır. Kitaba daxil edilən materiallarda müəllifin sərt, güzəştsiz obyektivliyi və ədaləti aydın görünür”.
Kitabın işıq üzü görməsi münasibətilə həm müəllifi, həm də onun 22 həmmüəllifini təbrik edirik.
Top-10: Yay fəslinin ən çox oxunan detektivləri və trillerləri
Sirr deyil ki, bədii ədəbiyyat nümunələri arasında detektivlər çoxoxunma statistikası ilə öyünürlər. Elə bizim ölkədə ən çox satılan kitablar listəsinə baxanda orada Çingiz Abdullayevlə Elxan Elatlının detektivləri həmişə ön sıralarda olur. Bu yay günlərində istirahət zamanı təbii ki, yüngül ədəbiyyat janrı hesab olunan bu janrlara müraciət edənlər çoxdur. Bəs indi ən çox hansı detektiv və triller nümunələri oxunur? Dünyanın ən populyar kitab platformalarından biri olan “Litres”in bu sahədə araşdırmasını “Ədəbiyyat və incəsənət” portalı sizlərə təqdim edir.
1. Aleksandra Endryus, "Mod Dikson kimdir?"
Florens Mod Dikson təxəllüsü altında gizlənən bir yazıçının köməkçisi olaraq çalışır. Bir gün qadınlar Mərakeşdə qəzaya uğrayırlar. Mod itir və Florens xəstəxanada özünə gəldikdən sonra özünü Mod kimi qələmə verməyə qərar verir. Patrisiya Haysmitin milyonlarla oxucusu olan "İstedadlı Mister Ripli" romanı ruhunda yazılmış psixoloji trillerdir.
2. Viktor Metos, "Gecə məxluqatları”
Bu, “Qatilin arvadı" adlı bestsellerin davamıdır. Jessika Yardli - Federal prokurorun köməkçisidir. Onun həyat yoldaşı isə seriya qatilidir və o, bunu başa düşməkdə acizdir. Cesika layiq olduğu vəzifəni daşıdığını sübut etmək üçün şəhəri lərzəyə gətirən növbəti manyakın tutulmasında iştirak etməyə başlayır. Manyak qurbanlara hədsiz əzablar verir və cinayətlərin yerlərində Sarpong rəsmləri ruhunda iz qoyur. Jessika növbəti qanlı bir qurban olmağa risk edir. Və görəndə ki, manyak onun həyat yoldaşıdır... Gerisini sadəcə oxumaq gərəkdir.
3. Meri Kubik, "Digər xanım"
Netflix-in ekranlaşdırmağa hazırlaşdığı, The New York Timеs-ın bestsellerləri sırasında qərarlaşan bu roman dedikcə maraqlı və çəkicidir, həyəcan verir və nəfəs kəsir. Uill və Seydi Foust uşaqlarıyla birlikdə Uillin dədə-babadanqalma köhnə evində məskunlaşıblar. Uillin bacısı illər öncə çardaqda özünü asaraq öldürüb, qardaşsa keçmişin mistikasına qapanmaq haqda düşünmək istəmir. Amma nahaq. Gələcəkdə bu evdə yaşadıqca ailəni yaxşı bir şey gözləməyəcək. Bir gün Seydi bir mesaj alacaq: "Ölməlisən". Başqa bir gün kimsə onların qonşusunu öldürəcək...
4. Cennifer Mikmaxon, "Məni qorxutmayın”
“Qış insanları” və "Məni içəri dəvət edin" trillerlərinin müəllifindən yeni bir şedevr. Neptun ləqəbli seriya qatili kiçik bir şəhəri qorxu içində saxlayır. O, qadınları oğurlayır, sonra isə cəsədləri polis binasının yaxınlığında qoyur. Reginanın anası beləcə itir, lakin 20 il sonra onu evsizlər üçün sığınacaqda sağ tapırlar. Bu bir mesaj deyilmi? Neptunun yeni məqsədi Taranı ovlamaqdır, Reginanın dostunu.
5. Nita Prouz, "Qulluqçu"
Kanadalı ədəbi redaktorun debüt romanıdır. Molli Grey erkən valideynlərini itirib və nənəsinin nəzarəti altında böyüyüb. Qız qapalıdır, insanlardan qaçır, amma tapmacaları sevir. Bəli, bəli. Tapmacaları sevir. Oteldə qulluqçu işləyən Molli bir dəfə iş növbəsi zamanı otelin nömrələrindən birində Mister Blekin meyitini aşkar edir. Polis Mollini əsas şübhəli hesab edir. O, təqsirsizliyini necə sübut etsin?
6. Jan-Kristof Qrange, "Tanrıların vədləri"
Berlində, 1939-cu ildə yüksək zümrədən olan qadınları öldürməyə başlayırlar. Onların hamısı qapalı kluba gedirlərmiş və hansısa Mərmər insan barədə yuxu görürmüşlər. İşi gizli polisə və mülki psixiatrlara verirlər, çünki ənənəvi təhqiqat üsullarına bu cür işdə etibar etmək olmaz. Nəticə başgicəlləndirici olur...
Tarixi dekorasiyalarda triller yazmaq tanınmış Fransa detektiv ustası Qrange üçün bir sınaq olub. Deyək ki, çox maraqlı və canlı çıxıb.
7. Tani Frenç, “Feytful-Pleys”
Məşhur müəllifdən çoxdan gözlənilən daha bir yenilik. Frenç janrın pərəstişkarlarına "Arxasında kölgə" və "Gizli yer" kimi bestsellerlər hədiyyə edib. Buna görə də bu növbəti romanı çoxları oxumaq həsrətində olublar. Feytful-Pleys küçənin adıdır və buradakı tərk edilmiş evlərdən birindən bir köhnə çamadan tapılır. Dublində yaşayan detektiv Frenk Makki çamadandakı ilk sevdiyi qızın əşyalarını tanıyır. 20 il əvvəl o, səhərə qədər Rozini gözləmişdi. Sevgililər birlikdə xoşbəxtliklərinin ardınca qaçmaq istəyirdilər, amma qız gəlməmişdi. Nə baş verdiyini anlamaq üçün Frank keçmişə qayıtmaq məcburiyyətində qalır...
8. Stiven Kinq, "Billi Sammers"
Qəhrəman – Billi Sammers ABŞ dəniz piyadalarının keçmiş snayperidir, eləcə də əxlaq kodeksinə malik muzdlu qatildir. O, yalnız pis insanları təmizləyir. Sammers bu işdən uzaqlaşmağa qərar verir, amma son əmri yerinə yetirmək lazımdır – prinsipsiz killer Alleni öldürmək.
9. Kamilla Lekberq və Henrik Fekseus, "Mentalist".
Stokholmda qılınclarla deşilmiş sirk qutusu tapılır. İçində də qadın cəsədi. Kim özündən dəhşətli bir sehrbaz obrazı təsəvvür edib?
Müfəttiş Mina Dabiri məsləhətçisi qismində illüzionçu Vinsenti cəlb edir. Hər ikisi komandada işləməyə öyrəşməyiblər, amma indi ortada çox məsuliyyətli bir iş var: günahsız həyatın qırılması.
10. ANONUMİS layihəsindən ikinci roman, "Mixail Bulqakovun gizli gündəliyi” Bu layihənin kitabları ikiqat xəfiyyəçilik vərdişləri tələb edir. Müəllifliyi göstərilmədən çıxan kitabları oxuyan oxucular yalnız cinayətkarın kimliyini deyil, müəllifin də kimliyini axtarmış olurlar. Orest Volinin yeni istintaqı - Moskva Muzeyindəki bir qətldir. Bıçaqlanmış bir naməlumun cəsədi aşkar edildikdən sonra mistik bir şəkildə yoxa çıxıb. Bunun arxasında kim dayanır və Bulqakovun qeydlərinin bura nə dəxli? Oxuduqca heyrətlənir və heyrətlənirsən.
“Şair və yazıçılarımızı necə tanıyırıq?” - kitabxanada bu adda tədbir keçirilib
Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin 1 nömrəli filialında “Şair və yazıçılarımızı necə tanıyırıq?” adlı tədbir təşkil olunub.
Baş İdarədən bildirilib ki, kitabxananın daimi oxucuları Azərbaycan ədəbi aləminin zəngin irsini və poeziya nümunələrini ətraflı müzakirə ediblər.
Kitabxana əməkdaşı Dilşad Əliyeva oxuculara şair və yazıçılarımız, eləcə də onların əsərləri haqqında geniş məlumat verib. “Azərbaycan ədəbiyyatının görkəmli simaları hər biri ayrı-ayrılıqda gələcək nəsillər üçün böyük yadigardır. Onlar dünənimizin qədim ənənələrini, eləcə də bu günümüzün yenilikçi fikirlərini öz qələmi ilə Azərbaycan ədəbiyyatının tarixinə qızıl hərflərlə həkk edib. Hər bir azərbaycanlı gəncin borcudur ki, ədəbiyyatımıza hərtərəfli bələd olub, şair və yazıçılarımızı yaxşı tanısın”, - deyə kitabxana əməkdaşı bildirib.
Conni Depp əsərlərini 3,65 milyon dollara satıb
Dünyaca məşhur aktyor, “Karub dənizinin quldurları” fiımi ilə məşhurlaşmış Conni Depp bu dəfə sevənlərinin qarşına rəssam kimi çıxıb. O, özünü portret ustası kimi tanıda bilib.
“Ədəbiyyat və incəsənət” portalı xarici KİV-ə istinadən xəbər verir ki, Londonda “Castle Fine Art” onlayn mağazasında əsərlərini satışa çıxaran Deep ümumilikdə 3,65 milyon dollar pul qazanıb.
Qeyd edək ki, Conni Deepin portretlərdə çəkdiyi məşhurlar arasında müğənni Bob Dilan, aktyor Al Paçino, aktrisa Elizabet Teylor var.
Conni Deepin ümumilikdə 780 əsəri satılıb.
Beyons altı ildən sonra “Renaissance” adlı yeni albomunu buraxıb
Ölkəmizdə Amerikalı dünyaşöhrətli müğənni Beyonssevərlər hədsiz çoxdur. Onlar üçün xoş xəbər: Beyons altı illik fasilədən sonra “Renaissance” adlı albom buraxıb. Hadisə dünən - iyulun 29-a təsadüf edib. Bu, dünyaşöhrətli müğənninin sayca yeddinci albomudur. Və bu hadisə dünya mədəniyyətində həftənin ən əsas hadisəsi hesab olunur.
“Ədəbiyyat və incəsənət” portalı Lenra.ru-ya istinadən xəbər verir ki, bu barədə ifaçı öz saytında məlumat verib.
Üç ildir albom üzərində işlədiyini söyləyən müğənni yeni albomuna 16 mahnı daxil edildiyini bildirib. Albomun səslənmə müddəti 62 dəqiqədir. Mahnılar müxtəlif stildədir: fankdan hip-hopa qədər. Onun sözlərinə görə, həmin mahnılar rəqəmsal platformalarda da əlçatan olacaq.
Qeyd edək ki, 40 yaşlı Beyons qadın müğənniləri arasında ən çox “Qremmi” musiqi mükafatı sahibidir. Onun hesabında 28 mükafat heykəlciyi var.
“Hər kitab öz oxucusunu tapmalıdır” layihəsi kitabın təbliğatına xidmətdir
Bakı Şəhər Mədəniyyət Baş İdarəsi Səbail rayon Mərkəzləşdirilmiş Kitabxana Sisteminin Mərkəzi Kitabxanası “Hər kitab öz oxucusunu tapmalıdır” adlı tədbir keçirib.
Baş İdarədən verilən məlumata görə, tədbirin məqsədi fondda olan sənədlərin elmi, tarixi, bədii dəyəri haqqında kitabxananın əməkdaşlarına ətraflı məlumat verməklə onlara oxuculara kitabla xidmət işində yaxından kömək etməkdir.
Kitabxananın əməkdaşı, Moskvada çap olunan “Vətən çağırır” qəzetinin baş redaktoru, yazıçı-publisist Gülsüm Adilqızının Aprel döyüşlərində şəhid olan vətənimizin mərd, mübariz oğulları haqqında çap etdirdiyi “Murad ömrü” və “Şəhidlik zirvəsinin fatehləri”, Ş.Sultanov və K.Sultanovun “Görkəmli adamların səyahəti” seriyasından “Ömər Xəyyam”, o cümlədən “Azərbaycan Xalq Cümhuriyyəti və Qafqaz İslam Ordusu” kitablarının təqdimatını edib.
Kino Günü ənənəvi mükafatının qaliblərinin adları açıqlanıb
Azərbaycan Kinematoqrafçılar İttifaqı (AKİ) kino xadimlərinin peşə bayramı olan 2 Avqust – Milli Kino Günü münasibətilə ənənəvi olaraq mükafatlandırdığı kinematoqrafçıların builki siyahısını açıqlayıb.
Bu barədə AKİ-nin rəsmi internet səhifəsində məlumat paylaşılıb.
Azərbaycan Kinematoqrafçılar İttifaqının katibliyinin qərarına əsasən, 2022-ci il üçün İttifaqın ənənəvi mükafatı ilə aşağıdakı kinematoqrafçılar təltif olunublar: İlkin Yusif – “Mən qəhrəman axtarıram” sənədli filminin uğurlu rejissor həllinə görə, Rəşid Ağamalıyev – Azərbaycan animasiyasının beynəlxalq əlaqələrinin inkişafında xidmətlərinə görə, İntiqam Hacılı – Müstəqil kinonun inkişafında və bölgələrdə kino mühitinin canlandırılmasında xidmətlərinə görə diplom və pul mükafatına layiq görülüblər.
Azərbaycan Kinematoqrafçılar İttifaqının mükafatı hər il milli kinematoqrafiyanın inkişafında xidmətləri ilə fərqlənmiş yaradıcı şəxslərə ünvanlanır. Mükafatı təsis etməkdə məqsəd milli kinoda müsbət tendensiyaları diqqət mərkəzinə gətirməkdir. Nominantların seçimini apararkən İttifaqın katibliyi ötən kino mövsümü ərzində gedən prosesi diqqətlə müşahidə və təhlil edir, kinematoqrafiyanın müxtəlif sahələrindəki xidmətləri qeyd edir və açıq səsvermə yolu ilə laureatları seçir.
Xatırladaq ki, bu vaxta qədər Xalq yazıçısı Anar, kino rəssamı Firəngiz Qurbanova, diplomat və ictimai xadim Ramiz Abutalıbov, kino və televiziya rejissoru Nazim Rza İsrafiloğlu, mərhum aktyor Fuad Poladov, səs rejissoru Əsəd Əsədov, aktyor Fərhad İsrafilov, kinorejissor Murad İbrahimbəyov, kinorejissor Cahangir Zeynallı, operator Yuri Varnovski, bəstəkar Rauf Əliyev, rejissor Mirbala Səlimli, kinoşünas Sevda Sultanova, aktrisa Zülfiyyə Qurbanova və başqa peşəkarlar bu nüfuzlu mükafata layiq görülüblər.
2 avqust - Milli Kino Günü silsilə tədbirlərlə qeyd ediləcək
2 Avqust – Milli Kino Günü münasibətilə silsilə tədbirlər təşkil olunacaq.
Cəfər Cabbarlı adına “Azərbaycanfilm” Kinostudiyası avqustun 1-də “Azərbaycan Kinosu Günü” adlı tədbir təşkil edəcək.
Həmin gün kinostudiyanın yeni loqo və saytının təqdimatı keçiriləcək. Eyni zamanda kinostudiyanın 100 illiyi (2023) münasibətilə elan olunan Qarabağ mövzusunda ssenari müsabiqəsi qaliblərinin adları açıqlanacaq, mükafatlandırma mərasimi olacaq. Bundan əlavə, tədbirdə “Azərbaycanfilm”in rəhbərliyi tərəfindən qarşıdan gələn 100 illik yubileylə bağlı tədbirlər planı haqqında da ictimaiyyətə məlumat veriləcək.
Avqustun 1-də həmçinin Azərbaycan Dövlət Film Fondunun həyətində Milli Kino Günü münasibətilə sərgi keçiriləcək. Sərgi Cəfər Cabbarlı adına “Azərbaycanfilm” Kinostudiyası və Dövlət Film Fondunun birgə təşkilatçılığı ilə reallaşacaq.
Sərgidə kinomuzun səssiz mərhələsindən başlamış sovetlər dönəmi bitənə qədər film çəkilişlərində istifadə edilmiş texnika və avadanlıqlar nümayiş olunacaq. Təqdim ediləcək eksponatlar “Azərbaycanfilm” və Film Fondunda qorunan avadanlıqlardır.
Azərbaycan Respublikası Kinematoqrafçılar İttifaqı (ARKİ) da Milli Kino Gününə xüsusi hazırlaşıb. Avqustun 2-də təşkil ediləcək bayram tədbirində Milli Kino Mükafatı təqdim ediləcək. Həm gənc, həm də yaşlı nəsil kinematoqrafçılara mükafatlar təqdim olunacaq. Yubileyi olan kino xadimləri, il ərzində bu sahədə uğur qazananlar da diqqətdən kənarda qalmayacaq. Qeyd edək ki, builki Milli Kino Mükafatına 75 illik yubileyini qeyd edən Xalq rəssamı Rafiq Nəsirov layiq görülüb.
Azərbaycan Kinematoqrafçılar İttifaqı (AKİ) isə Milli Kino Günündə ənənəvi olaraq özünün üç nominasiyada kino mükafatını sahiblərinə təqdim edəcək. İyulun 28-də AKİ 2022-ci il üçün mükafatçıları elan edib.
“Mən qəhrəman axtarıram” sənədli filminin uğurlu rejissor həllinə görə” İlkin Yusif, “Azərbaycan animasiyasının beynəlxalq əlaqələrinin inkişafında xidmətlərinə görə” Rəşid Ağamalıyev, “Müstəqil kinonun inkişafında və bölgələrdə kino mühitinin canlandırılmasında xidmətlərinə görə” İntiqam Hacılı diplom və pul mükafatına layiq görülüblər.
Avqustun 1-də AKİ-nin bu ilin fevralında elan etdiyi “Mən qadınam” qısametrajlı ssenari müsabiqəsinin qalibləri də elan olunacaq.
Günün fotosu: Bağdadda şiyə imamı əs-Sadranın tərəfdarları dövlət çevrilişini rəsmiləşdirməkdədirlər
Günün fotosu: Bağdadda şiyə imamı əs-Sadranın tərəfdarları dövlət çevrilişini rəsmiləşdirməkdədirlər
Onlar tutduqları İrak Parlamentinin binasını hələ də tərk etməyiblər. Əs-Sadra tərəfdarları hakim rejimi İranpərəstlikdə ittiham edirlər.
Foto: Euronews
“Leyli"nin ifaçısında xərçəng aşkarlandı
Xəbərlər tək şirin olmur ki, acıları da bəzən ardıcıl sıralanır. Müğənni Zeynəb Həsənidə xərçəng xəstəliyi aşkarlanıb.
“Ədəbiyyat və incəsənət” olay-a istinadən xəbər verir ki, sənətçi hazırda Türkiyədə əməliyyat olunur.
İfaçı özü də İnstaqramda xəstəliyi barədə məlumat verib.
"Allahın izni ilə sən mənə yox, mən sənə qalib gələcəm", - deyə, Zeynəb yazıb.
Bizə də “Allah şəfa versin” demək qalır.
