Super User
Günün fotosu: Qəhrəman Ukrayna bayraq gününü qeyd etdi
Günün fotosu: Qəhrəman Ukrayna bayraq gününü qeyd etdi
Dünən - avqustun 23-də Ukraynada bayraq günü qeyd edilib. Bu münasibətlə Kiyevin mərkəzi Kreşatikdə hərbi qənimətlər - ruslardan ələ keçirilmiş hərbi texnika nümayiş olunmuşdur.
Foto: Euronews
Səmərqənddəki Katta Kurqan teatrında Azərbaycan əsərləri səhnəyə qoyulacaq
Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov Səmərqənd şəhər Katta Kurqan Teatrının rəhbəri, tanınmış rejissor Batır Tuqalov ilə görüşüb.
AzərTAC xəbər verir ki, görüşdə Özbəkistan-Azərbaycan arasında teatr sənəti sahəsində əməkdaşlıq, Azərbaycan əsərlərinin Səmərqənd teatrında səhnələşdirilməsi, Azərbaycan teatr müəssisələri ilə əlaqələrin genişləndirilməsi, rejissor və artistlərin qarşılıqlı təcrübə mübadiləsi, birgə layihələrin reallaşdırılması məsələləri razılaşdırılıb.
Bu il oktyabrın 18-də Səmərqənd şəhər gününə həsr olunmuş tədbirlərdə Azərbaycan Mədəniyyət Mərkəzinin iştirakı, azərbaycanlı sənətçilərin çıxışı və s. barədə fikir mübadiləsi aparılıb. Samir Abbasov Azərbaycan Mədəniyyət Mərkəzi, onun fəaliyyəti, həyata keçirdiyi layihələr barədə məlumat verərək, Mərkəzin binası, muzeyləri ilə qonağı tanış edib.
Bakıda bluz gecəsi keçiriləcək
Avqustun 26-27-də “27qm-Tarana's small gallery and cafe”də Bluz gecəsi keçiriləcək.
Və bu gecədə Natiq Kamilov öz stratokasterində bluz dünyasının populyar mahnılarını ifa edəcək.
Həmin gün bluz həvəskarları kiçik qalereyada səslənəcək musiqidən həzz ala biləcəklər.
“Səni sevə-sevə öldürdüm dünən“– Güneyli şair Əbasət Purhəsənin şeirləri
“Ədəbiyyat və incəsənət” portalının “Güneydən gələn səslər” rubrikasında Güney Azərbaycan təmsilçimiz Əli Çağla sizləri şair Əbasət Purhəsənin şeirləri ilə tanış edəcək.
Əbasət Purhəsən 1982-ci il avqust ayının 21-də Qaradağın Əhər şəhərində dünyaya göz açıbdır. İllərdir çarpara şeirləri ilə tanınan Əbasət Əhərin Bariz Ədəbi Dərnəyinin (BƏD) başqanıdır.
SƏNDƏN SONRA
Qəlbimin ağrısı toxtamaq üçün,
Darıxmayacağam səndən ötəri.
Özümə toy tutub ögey şəhərdə,
Kefləndirəcəyəm bekef şəhəri.
Elə sevəcəyəm aldığım qızı,
Döyünə-döyünə giciyin gələ.
Verdiyim ürəyi qaytardığına,
Özünün özündən acığın gələ.
Yəqin gözlərindən damcı axacaq,
Bir vaxt həsrət idin bir damcıya sən!
O gün yaxşı olar dərinə getsən,
Bilərsən nə çəkdim dünənlərdə mən.
Dünənlər sovuşdu, bu gün sovuşur,
Dünənlər bu günə bəhanə imiş.
Qürurum qüruru, quru qürurun,
Bilmədim bu qürur səndə nə imiş?!
Nə deyim, bilmirəm, bəlkə də bir gün,
Yenidən doğuldum səni sevməyə.
Bilmirəm bəlkə də son dünyamızda,
Tanrı gəldi bizə kəbin kəsməyə.
BİRİNCİ SUAL
Ölümlər şirindi, ölümlər acı,
Yoxsulluq ölümün biridi bəlkə.
Biz hələ dünyadan nə bilirik ki,
O qız, o oğlanın əridi bəlkə?!
Ağaclar köynəyin dəyişir nədən?
Küçədən, küçəyə min sualım var.
Yadımda babamın nağıllarında,
Bir nağıl deyirdi: “Axtaran tapar.”
Axtardım, tapdığım bu gün sən oldun,
Ah qundaq, sənin də dərdin çox imiş.
Inqıltı səsinə analar gəldi,
Heç elə bil sənin anan yox imiş!..
Gözlərimdə yollar, içimdə dağlar,
Səni evlərinə kimlər aparar?
Atalı, analı yetim qundağın,
Bələyin kim açar, başın kim dadar?
Günəş də küsürdü dağın dalından,
Quşlar da göylərdən yığışırdılar.
Sızıltı səsinə can-can deyənlər,
Sadağa tullayıb soruşurdular.
Sən qucağımdaydın, mən oturmuşdum,
Kiçik əllərini üzümə çəkdin.
Dilənçi deyildik, biz qərib idik,
Beynimdə nə varsa gözümə tökdün.
Yolun qırağına kim qoyub səni,
Bəlkə də yenidən Həvva doğubdur!
Bizi göydən yerə gətdiyi kimi,
Səni də cənnətdən yerə qovubdu.
Biz hələ dünyadan nə bilirik ki,
Bir uşaq qolumda, ana olmuşam.
Atası kim ola, anası kimdi?
Birinci sualda hələ qalmışam...
BƏZƏKLİ MANKƏN
Bazar qabağında bəzəkli mankən,
Hər gələn əl atır donuna sənin.
Yaşamağın üçün açılmır donu,
Soyuq şəhrimizdə geydiyin donun.
Əllərin əlimdə, əlin əlimi,
Əlinin içində saxlaya bilmir,
Nə çəpik çalırlar qabağımızda?!
Nə üçün görənlər ağlayır, gülmür?
Mən səni sevdiyim qıza oxşatdım,
Ya şəhər ağılsız, ya da mən dəli!
Bir dəyqə özümü sevindirməyə,
Sənin də abrına toxundum, bəli.
Səndən ayrılıram, bilirəm ancaq,
Əynindəki donu götürəcaqlar.
Bilmirəm bəlkə də oğlan paltarın,
Geydirib əyninə, toy tutacaqlar.
Bəlkə də bazardan, bazara köçüb,
Gözdən düşəcəksən, gic qalacaqsan.
Bilmirəm, sabahın heç kimsə bilmir,
Bəlkə də sevdiyim qız olacaqsan!..
BİZ BEŞ YOLDAŞIYDIQ
Biz beş yoldaşıydıq məhəlləmizdə,
İtlər ulayırdı küçələrində.
Biz beş yoldaşıydıq, biz beş beyni qan,
Əhərin dumanlı gecələrində.
Gündüzlər, gecəyə fikirləşirdik,
Gecələr, gündüzə fikirləşirdik.
Bizi aldadırdı matikli qızlar,
Yenə aldanmağa hazırlaşırdıq.
On beş yaşındaydıq həyatımızda,
Həyat bizdən qoca, arzumuz Təbriz.
Hələ fikirimiz böyüməmişdən,
Günlər sovuşurdu, böyüyürdük biz.
Fəsillər sovuşdu, illər sovuşdu,
Nə oynaya bildik, nə gülə bildik!
Beş oğlan Əhərdən dünyadan köçüb,
Dörd oğlan Təbrizdə dünyaya gəldik!
Bizlər yerimizi dəyişə bildik,
Nədən fikrimizi dəyişənmədik?
Görən bu dünyanın dalında nə var?
Qaranlıqlarınan güləşənmədik!
Qəfələr bucağı yerimiz idi,
Ürəyi doluyduq, beyni boşuyduq.
Aldadırdı bizi bəzəkli Təbriz,
Biz beş yoldaşıydıq, biz beş daşıydıq.
UŞAQLIQ YOLDAŞIM
Hava ağlayırdı ağırlığından,
Elə anlayırdım çırpınırsan sən.
Əlimi uzaldıb əlimə aldım,
Sənə layla çaldım doyunca dünən.
Ovcumun içində yuxuya keçdin,
Körpə uşaq kimi, ətsan quş kimin.
Ağzını yumurdun lal dünyamıza,
Ya sona çatırdı sənin də qəmin.
Sən elə ovcumu qucaqlamışdın,
Səni ovucumdan ata bilmirdim.
Yuxu gözlərimi alırdı, ancaq –
Sənsiz yuxularda yata bilmirdim.
Ovcumun içindən ayrılmadın heç,
Səni sevə-sevə öldürdüm dünən.
Uşaqlıq yoldaşım, bayram balığı,
Daha çırpınmayır nə mən, nə də sən...
Qeyd: Şeirlərin orfoqrafiyasına toxunulmamışdır.
“Qonağımız var" layihəsi çərçivəsində növbəti görüş Təranə Muradova ilə olub
Avqustun 23-də Bakı Şəhər Mədəniyyət Baş İdarəsinin təşkilatçılığı ilə Mərdəkan Mədəniyyət Sarayında "Qonağımız var" layihəsi çərçivəsində Xalq artisti, Bakı Xoreoqrafiya Akademiyasının prorektoru, dosent Təranə xanım Muradova ilə görüş keçirilib.
“Ədəbiyyat və incəsənət” portalı AzərTAC-a istinadən xəbər verir ki, tədbirin aparıcısı, Azərbaycan Dövlət Akademik Musiqili Teatrının aktrisası Gültac Əlili qonaqları salamlayaraq, Xalq artistinin həyat və yaradıcılığı haqqında geniş məlumat verib.
Görüşün əsas məqsədi gənclərdə estetik zövqün formalaşması, onların dünyagörüşünün genişlənməsi, xüsusən incəsənətlə məşğul olmaq istəyənlərin düzgün istıqamətləndirilməsidir.
Mədəniyyət sarayında xoreoqrafiya sənəti ilə məşğul olan gənc rəqqaslara ustad dərsi keçməklə yanaşı, tanınmış rəqqasə onun sənətinə pərəstiş edən sevimli tamaşaçılarını maraqlandıran suallara cavab verib.
Görüşdə Mərdəkan Mədəniyyət sarayının "Lalələr" və "Azad" rəqs kollektivlərinin və Şüvəlan qəsəbə Mədəniyyət evinin "Səma" rəqs qrupunun gənc rəqqasları iştirak ediblər.
Ardınca Xalq artisti "Uzundərə", "Yallı" və digər milli rəqslərin nümunələrindən gənc rəqqaslara ustad dərsi keçib.
Görüş maraqla qarşılanıb və yüksək əhval-ruhiyyə ilə başa çatıb.
Sonda Xalq artisti Təranə xanım Muradova tədbirin əsas təşkilatçısı Bakı Şəhər Mədəniyyət Baş İdarəsinə və görüşə gələnlərə öz təşəkkürünü bildirib.
Mədəniyyət Nazirliyi Şuşada “Şuşa yaradıcılıq emalatxanası” layihəsi keçirəcək
Mədəniyyət Nazirliyinin təşkilatçılığı, Şuşa Şəhəri Dövlət Qoruğu İdarəsinin dəstəyi ilə 26-28 avqust tarixində Mədəniyyət paytaxtımız Şuşa şəhərində yaradıcı insanların iştirakı ilə “Şuşa yaradıcılıq emalatxanası” adlı layihəsi həyata keçiriləcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, layihə çərçivəsində müxtəlif peşə istiqamətləri üzrə Azərbaycandan və Türkiyədən olan yaradıcı sahənin təmsilçiləri Şuşa qalasına, Üzeyir bəyin dağıdılmış evinə, Bülbülün ev muzeyinə, Vaqifin məqbərəsinə, Güllələnmiş abidələrə, Cıdır düzünə səfər edəcəklər.
Layihənin keçirilməsində məqsəd tarixi və əzəli torpaqlarımızda həyata keçirilmiş barbarlıq, dağıdılmış abidələrimiz haqqında dünya və yerli ictimaiyyəti incəsənət əsərləri vasitəsilə daha ətraflı məlumatlandırmaq, mədəni irsimiz, zəngin tariximiz və ənənələrimizi layihə iştirakçısı olacaq bəstəkar, şair, musiqişünas, misgər, keramika rəssamı, fotoqraf, qiraətçi və bir çox sahəni təmsil edən 30-a yaxın yaradıcı insanların təqdim edəcəyi əsərlər vasitəsilə daha yaxından tanıtmaqdır.
Belə ki, səfər təəssüratlarından ilhamlanaraq ərsəyə gələcək əsərlər bir müddət sonra Bakıda təşkil olunacaq qala tədbirdə geniş auditoriyaya təqdim olunacaq.
Azərbaycan nümayəndə heyəti Beynəlxalq Muzeylər Şurasının 26-cı Baş Konfransında iştirak edir
Çexiyanın paytaxtı Praqa şəhərində Beynəlxalq Muzeylər Şurasının (ICOM) 26-cı Baş Konfransı işə başlayıb.
AzərTAC xəbər verir ki, bu mötəbər tədbirdə ölkəmizi ICOM Azərbaycan Milli Komitəsi böyük nümayəndə heyəti ilə təmsil edir.
“Muzeylərin gücü” devizi altında keçirilən baş konfransın birinci günündə ICOM Azərbaycan Milli Komitəsinin sədri, Azərbaycan Milli Xalça Muzeyinin direktoru Şirin Məlikova milli komitənin üç illik fəaliyyəti barədə hesabatı təqdim edib. O, həmçinin ICOM-un Etnoqrafiya muzeyləri və kolleksiyaları üzrə Beynəlxalq Komitəsinin konfransında “İnklüziv muzey” mövzusunda çıxış edib.
Şirin xanım üçillik hesabatda 2019-2021-ci illərdə ICOM Azərbaycan Milli Komitəsinin təşkilatçılığı ilə ölkəmizin muzey həyatında baş verən yeniliklər, təşkil olunan tədbirlər, beynəlxalq konfranslar, 2020-2021-ci illərdə karantin dövründə muzeylərin onlayn fəaliyyəti, virtual tur layihələrinin hazırlanması, 44 günlük Vətən müharibəsi zamanı aparılan təşviqat kampaniyaları haqqında ətraflı məlumat verib.
“İnklüziv muzey” mövzusunda çıxışında isə Azərbaycan Milli Xalça Muzeyinin ölkəmizin ilk inklüziv muzeyi kimi zəngin təcrübəsi, bu sahədə tətbiq olunan yeniliklər, reallaşdırılan layihələr barədə danışıb. Rəhbərlik etdiyi müəssisənin inklüziv fəaliyyətinin xarici muzey və təşkilatlar tərəfindən yüksək qiymətləndirildiyini diqqətə çatdırıb.
Milli Komitənin sədrinin çıxışları konfrans iştirakçıları tərəfindən böyük maraqla qarşılanıb. Onlar Azərbaycan Milli Xalça Muzeyinin nəfis çap məhsullarını da yüksək qiymətləndiriblər.
Qeyd edək ki, Şirin xanımın növbəti çıxışı ICOM-un Fəlakət risklərinin idarə olunması üzrə Beynəlxalq Komitənin konfransında “Qarabağın timsalında müharibə və hərbi münaqişələr dövründə mədəni-tarixi abidələrin və muzeylərin dağıdılması” mövzusunda olacaq.
Bununla yanaşı, Ş.Məlikova INTERCOM və CIMAM-ın birgə sessiyasına qatılaraq, bir sıra ölkələrdən olan mütəxəssislərlə muzey idarəetməsi sahəsində mövcud vəziyyət və problemlər ətrafında fikir mübadiləsi aparacaqlar.
Beynəlxalq Muzeylər Şurasının (ICOM) 26-cı Baş Konfransı avqustun 28-də öz işini yekunlaşdıracaq.
Qeyd edək ki, 1948-ci ildən etibarən hər üç ildən bir keçirilən bu konfrans beynəlxalq muzey ictimaiyyətini əhəmiyyətli bir mövzu ətrafında fikir mübadiləsi aparmaq üçün toplayır və beynəlxalq əməkdaşlığın genişləndirilməsi məqsədi daşıyır.
Qazax yurtasında “Kobız sarını” folklor-etnoqrafik ansamblının çıxışı olub
Xəbər verdiyimiz kimi, Qazaxıstan və Azərbaycan arasında diplomatik münasibətlərin qurulmasının 30 illiyi münasibətilə Qazaxıstan mədəniyyətini nümayiş etdirmək üçün dost ölkənin musiqiçiləri Azərbaycana gəliblər. Bununla əlaqədar Milli Parkda - Bakı Dəniz Vağzalının yaxınlığında yurta quraşdırılıb.
Yurtada çıxış edən növbəti musiqi kollektivi Süyunbay adına Almatı Vilayət Filarmoniyasının “Kobız sarını” folklor-etnoqrafik ansamblı olub.
Yurtanın önündə “Kobız sarını” folklor-etnoqrafik ansamblı Qazaxıstan milli musiqisindən nümunələr səsləndirib.
Yurtanın təqdimatı çərçivəsində Bakı sakinlərinə qazaxların adət-ənənələri, tarixi abidələri, musiqisi və turistik məkanları barədə məlumat verilib.
Qeyd edək ki, avqustun 31-dək davam edəcək aksiya çərçivəsində bir sıra tədbirlər təşkil olunacaq.
Xalq şairi Zəlimxan Yaqubun şeiri "Hece Taşları" dərgisində işıq üzü görüb
Azərbaycan Jurnalistlər Birliyi Sumqayıt şəhər təşkilatı tərəfindən gerçəkləşdirilən “Azərbaycan Aşıq sənətinin inkişafına dəstək” layihəsi çərçivəsində çağdaş Azərbaycan ədəbiyyatının görkəmli nümayəndəsi, Azərbaycan Yazıçılar Birliyinin üzvü, xalq şairi, mərhum Zəlimxan Yaqubun "Zarafat gəlməsin sənə bu dünya" adlı şeiri qardaş Türkiyə Cümhuriyyətinin Kahramanmaraş şəhərində fəaliyyət göstərən "Hece Taşları" aylıq şeir dərgisinin 90-cı sayında dərc olunub.
Bu barədə “Ədəbiyyat və incəsənət” portalına şair, jurnalist Kamran Murquzov məlumat verib. “Azərbaycan Aşıq sənəntinin inkişafına dəstək” layihəsinin rəhbəri və müəllifi Azərbaycan Aşıqlar Birliyinin katibi, “Ozan dünyası” jurnalının Baş redaktoru, Əməkdar mədəniyyət işçisi Musa Nəbioğludur.
Koordinatoru və məsul katibi Kamran Murquzovdur.
Qeyd edək ki, bundan öncə gerçəkləşdirilən eyniadlı layihə çərçivəsində sevimli Xalq şairimiz Zəlimxan Yaqubun şeirləri "Usare" (Ebrar Vakfı Kültür yayın organı) və "Kardelen" üçaylıq mədəniyyət, ədəbiyyat və sənət dərgisində dərc olunaraq Türkiyə oxucularına çatdırılıb.
“İtirilmiş vicdanı tapan olmayıb hələ” – Əyyub Türkayın təmsilləri
İndi təmsillər demək olar ki, yazılmır. Halbuki, alleqoriya qədimdən bəri lirik janrın ən populyar növü sayılıb.
“Ədəbiyyat və incəsənət” portalının poçtuna gənc şair Əyyub Türkayın təmsilləri daxil olub. Deyək ki, çox maraqlı və kifayət qədər də ustalıqla qələmə alınmış təmsillərdir. Onları oxucularımıza təqdim edir, Əyyub Türkaya yaradıcılıq uğurları arzulayırıq.
XƏSTƏ TÜLKÜ
Bərk xəstələndi Tülkü,
Ölümlə pəncələşdi.
Pələng ilə Şir ona
Kömək üçün əlləşdi.
Tülkü dedi: – A dostlar,
Yaman xarabdır halım.
Mənə kömək olmasa,
Çətin həyatda qalım.
Pələng və Şir topladı
Meşədəki dostları.
Dəstək olsun Tülküyə,
Qoy çəkməsin qubarı.
Bir aydan artıq yatdı
Xəstə Tülkü yataqda.
Tanrı onu qoymadı
Ağır, çətin sınaqda.
Sağalıb xəstəlikdən,
Tülkü ayağa durdu.
Çox keçmədi dostlara
Pislik etdi – qudurdu.
Yenə hiyləgərliklə
Dedi yalan-böhtanı.
Ona əl tutanlarla
Pozdu əhdi-peymanı.
Xisləti pis olanlar
Çətin düz yola gələ.
İtirilmiş vicdanı
Tapan olmayıb hələ.
QUZĞUNUN TÖVBƏSİ
Bir gün Quzğun and içdi
Uzunboğaz Leyləyə.
Dedi: -Leş yemərəm mən,
Daha gəldim tövbəyə.
Qoy mənim də hörmətim
Bundan sonra çox olsun.
Keçmişdə etdiklərim
Unudulub yox olsun.
Artıq mən utanıram
İylənmiş ət yeməkdən.
Etiraf eləyirəm,
Çəkinmirəm deməkdən.
Leylək dedi: -Mən kimi
Ye qurd, balıq, qurbağa.
Bəlkə, quşlar içində
Ola bilərsən ağa.
Quzğun bir həftəyədək
Başın qatdı beləcə.
Qarşısına leş çıxdı,
Xəlvəti, sakit gecə.
Acgözlüklə başladı
Ölmüş heyvan yeməyə.
Bunu görüncə Leylək,
Söz tapmadı deməyə.
Bilin ki, xasiyyəti
Çox çətindir dəyişmək.
Mayası pis olana
Sərf eləməyin əmək.
ÖZÜNDƏNRAZI ÇAQQAL
Çaqqalın mənəmliyi
Lap son həddə çatmışdı.
Bu minvalla aləmi
Bir-birinə qatmışdı.
İnadkar, cılız Çaqqal
Bilmirdi böyük-kiçik.
Onun peşəsi idi
Hamı ilə qərəzlik.
Bir neçə xəbərdarlıq
Edilmişdi Çaqqala.
İkiüzlü, bu xəbis
Çəkilmirdi heç dala.
Axır bir gün Canavar
Onu kənara çəkdi.
Ləyaqətsiz canlının
Təpəsində turp əkdi.
GÜNƏŞ VƏ YAĞIŞ
Günəşlə Yağış
Mərcləşdi bir gün.
Öz güclərini
Göstərmək üçün.
Yağış elədi
Yekəxanalıq.
Dedi, mən yağsam,
Gərəkdir qayıq.
Düzü, aləmi
Mən su edərəm.
Həyət-bacaya
Sellə gedərəm.
Günəş dilləndi,
Bu ki güc deyil.
Əməlli-başlı
Bu pislikdir, bil.
Gücünü göstər
Sən yaxşılıqla.
Özünü öymə
Hey paxıllıqla.
Yaxşı əməlin
Məgər ki, yoxdur?
İçində pislik
Bu qədər çoxdur?
Məsləhətim var,
Sən yağ çöllərə.
Qoy bolluq gəlsin
Bizim ellərə.
Bağlar göyərsin,
Yamyaşıl olsun.
Bol məhsul ilə
Çuvallar dolsun.
Yaxşını qoyub
Pisliyə qaçma.
Şər işlər görüb
Oyunlar açma.
Yağış utanıb
Yaman pərt oldu.
Həyat dərsini
Günəşdən aldı.
KÖRPÜ VƏ ÇAY
Körpü Çaya söylənib,
Elədi giley-güzar.
Dedi: -Görürəm mənə,
Heç olmursan havadar.
Sənə əziyyət deyil,
Sakit-sakit axırsan.
Mən çəkirəm əzabı,
Sən kənardan baxırsan.
Mənim üstümdən keçir
Maşınlar, həm insanlar.
Axı mənim dərdimi
Heç bilmirəm kim anlar.
Bəlkə, sel yaradasan,
Bir daşqın eləyəsən.
Suya qərq edib məni,
Yuyub aparasan sən.
Çay dedi: -Yadımdadır
Sənin qurulduğun gün.
İnsanlar sevincindən
Eləyirdi toy-düyün.
Sən həyatda hər kəsin
Ümid, güman yerisən.
Var olmana söyləyir
Hamı ürəkdən “əhsən”.
Çayın nəsihətləri
Körpüyə çox xoş gəldi.
Özünün dəyərini
İndi yaxşıca bildi.
DAĞ VƏ TƏPƏ
Bir gün Dağ qürrələnib,
Baxdı kiçik Təpəyə.
Dedi: -Mənim yanımda,
Oxşayırsan körpəyə.
Mənim başım ucadır,
Buludlardan nəm alır.
Sənə isə həyatda,
Balaca olmaq qalır.
Təpə bir söz demirdi,
Sakit qalıb baxırdı.
Dağın kəskin sözündən,
Yamanca darıxırdı.
Elə bu an səs gəldi,
Silkələndi obalar.
Dağı tez partlatdılar,
Dinamitli bombalar.
Dağ oldu bir düzənlik,
Yerində yol saldılar.
Uca dağın vüqarın,
Belə əldən aldılar.
Bütün bu olanlara
Təpə heyrətlə baxdı.
Lovğalığın axırı,
Dağı yandırıb yaxdı.
