Mədəniyyət Nazirliyi Ümummilli Lider Heydər Əliyevin 100, Azərbaycan peşəkar milli teatrının yaranmasının 150 illiyinə həsr edilmiş silsilə tədbirlər çərçivəsində may ayı üçün regionlara təşkil olunan qastrol səfərlərinə start verib. 

Nazirliyin məlumatına görə, qastrol səfərləri çərçivəsində Salyan Dövlət Kukla Teatrının kollektivi bu gün - mayın 26-da Qax Dövlət Kukla Teatrında Rəvan Tohidoğlunun “Bir də etmərəm” tamaşasını nümayiş etdirəcək.

“Ədəbiyyat və incəsənət”

(26.05.2023)

Mayın 27-də İçərişəhərdə V Milli Kitab Sərgisi işə başlayacaq.

İyunun 4-dək davam edəcək sərgidə müxtəlif təqdimatlar, panel müzakirələri, yerli və xarici müəlliflərlə görüşlər, imza günləri, poeziya axşamları keçiriləcək.

Sərgi saat 09:00-dan 20:00-dək Qoşa Qala meydanında təşkil olunacaq.

“Ədəbiyyat və incəsənət”

(26.05.2023)

NƏHAYƏT Kİ, ŞƏRTLƏR AÇIQLANIB

Bəli, şərtlər açıqlanıb. İndi hər bir otel sahibi hansı şərtlər altında ulduz ala biləcəyini dəqiq biləcək. Dövlət Turizm Agentliyinin Kollegiyasının sədri Fuad Nağıyev “Mehmanxanaların (hotellərin) ulduz kateqoriyaları üzrə qiymətləndirmə meyarları”nı təsdiq edib. 

Dövlət Turizm Agentliyi məlumat verir ki, təsdiqlənmiş meyarlarda ümumi müddəalar, mehmanxanaların ulduz təsnifatı, ulduz kateqoriyaları üzrə qiymətləndirmə meyarları, ulduz kateqoriyaları üzrə qiymətləndirmə qaydası detallı şəkildə əksini tapıb.

Mehmanxanaların ulduz kateqoriyaları üzrə qiymətləndirilməsi zamanı aşağıdakılar zəruridir:

Meyar üzrə bal mehmanxananın həmin meyar üzrə tələblərə tam uyğunluğu müəyyən edildiyi halda verilir. Meyara qismən uyğunluq müəyyən edildiyi halda həmin meyar üzrə bal verilmir.

Ulduz kateqoriyasının müəyyən edilməsi üçün mehmanxananın yerləşdiyi binada yerində qiymətləndirmə aparılmalı və nəticə aktlaşdırılmalıdır.

Eyni sahibkarlıq subyekti tərəfindən idarə olunan və müxtəlif ünvanlarda eyni ad ilə fəaliyyət göstərən mehmanxanaların hər birinin yerləşdiyi binalarda ayrı-ayrılıqda qiymətləndirmə aparılmalı və obyekt sertifikatlaşdırılmalıdır.

Parametrlər üzrə ayrıca təsnifatı təbii ki, otellər agentlildən əldə edə biləcəklər. 

“Ədəbiyyat və incəsənət”

(26.05.2023)

UNESCO İcraiyyə Şurasının qərarı ilə Dünya Yaddaşının Beynəlxalq Reyestrinə daha 64 sənəd və irs nümunəsi daxil edilib. Beləliklə, siyahıya alınan kolleksiyaların sayı 494-ə çatıb. 

AzərTAC təşkilatın rəsmi saytına istinadla xəbər verir ki, reyestrə daxil edilən yeni nümunələr arasında Azərbaycan və türk tarixinə aid irs əsərləri və sənədlər də var. Onların arasında “Xurşidbanu Natəvanın “Gül dəftəri” – illüstrasiyalı şeirlər albomu”, Qacarlar hakimiyyəti dövründə beynəlxalq münasibətlərə dair sənədlər, Şeyx Səfiəddin Ərdəbili türbəsinin kitabları, türkmən, qırğız və özbək xalqlarının əlyazma və qədim irs yadigarları da var. 

Yeni qərarla bağlı fikirlərini ifadə edən UNESCO-nun baş direktoru Odri Azulay deyib: “Sənədli irs bəşəriyyətin ümumi yaddaşıdır. Yazılı və səsli irs nümunələri tədqiqat məqsədləri üçün qorunmalı və mümkün qədər çox insanla paylaşılmalıdır. Bu sənədlər bizim kollektiv tariximizin tərkib hissəsidir”. 

UNESCO tərəfindən 1992-ci ildən həyata keçirilən “Dünya yaddaşı” proqramının əsas məqsədi kağız üzərində, audiovizual, rəqəmsal və ya hər hansı digər formada mühüm və böyük dəyərə malik sənədlər və ya sənədlər kolleksiyalarının geri qaytarıla bilməyən itkisinin qarşısını almaqdır. Təşkilata üzv ölkələr arasında 2017-ci ildə yaranmış fikir ayrılığı səbəbindən Dünya Yaddaşının Beynəlxalq Reyestrinə sənədlərin daxil edilməsi prosesi dayandırılmışdı və bu il mayın 24-də UNESCO İcraiyyə Şurasının qərarı ilə altı il davam edən fasilədən sonra reyestrə 64 sənəd salınıb. Bunu alqışlayan təşkilatın baş direktoru Odri Azulay qeyd edib ki, üzv ölkələr bu prosesə böyük maraq göstərib. Belə ki, 56 ölkə və təşkilatın bu yeni əlavələri ilə indi reyestrdə dünyanın bütün regionlarından 494 sənədli irs kolleksiyası var. Daşdan sellüloidə, perqamentdən metal disklərə qədər müxtəlif formalarda saxlanılan bu ümumbəşəri dəyərə malik simvolik irs nümunələri indi gələcək nəsillər üçün qorunur.

UNESCO bildirir ki, sənədli irs nümunələri bütün dünyada təhlükə altındadır. Dünyanın bir çox yerlərində, xüsusən də inkişaf etməkdə olan ölkələrdə sənədli arxivlər bərbad vəziyyətdədir. Daşqınlar və yanğınlar illər ərzində minlərlə kağız qeydləri məhv edib, audiovizual materiallar yoxa çıxıb. Maqnit lentləri zaman keçdikcə pisləşir və onları oynada bilən cihazlar sıradan çıxır. Bu materialları qorumaq və rəqəmsallaşdırmaq üçün kollektiv səylərə ehtiyac duyulur, əks halda, onlar həmişəlik itirilə bilər. UNESCO bu məqsədlə Afrika ölkələrində kitabxanalara, arxivlərə və muzeylərə dəstək verir.

Son üç onillikdə UNESCO 94 ölkədə “Dünya yaddaşı” proqramı çərçivəsində milli komitələr yaradıb. Təşkilat ötən ilin əvvəlindən sənədli irsin inventarlaşdırılması, qorunması və hamı üçün əlçatan olmasını təmin etmək üçün 40-a yaxın ölkəyə kömək edib.

“Ədəbiyyat və incəsənət”

(26.05.2023)

Ötən gün dünyaşöhrətli Azərbaycanlı cərrah-alim, ünlü "Varlıq" dərgisinin təsisçisi, türkologiyaya aid yeddi cildlik kitabın müəllifi, Türk Dil Qurumunun fəxri başqanı, bir neçə universitetin fəxri doktoru, İranda ilk dəfə açıq ürək əməliyyatını (koronar şuntlama) gerçəkləşdirən, Beynəlxalq Cərrahlar Cəmiyyətinin İdarə heyətinin, daha bir neçə elmi cəmiyyətin üzvü Cavad Heyətin doğum günü idi. 

Cavad Mirzə Əli oğlu Heyət 24.05.1925 tarixində Təbrizdə doğulub, 12.08.2014 tarixində Bakıda vəfat edib. 

Onlarca insan onun abidəsini ziyarət etdi dünənki gün. 

Ocağı sönməsin, ruhu şad olsun!

“Ədəbiyyat və incəsənət”

(26.05.2023)

Günün fotosu: Rus dezertirləri artmaqdadır

Foto: Musa Sadulayev/AP

Rus ordusunda dezertirlik məsələsi qloballaşır. Böyük Britaniyanın Müdafiə Nazirliyi konkrer faktlara əsaslanaraq xəbər verir ki, buna səbəb işğalçı müharibəyə görə 2022-ci ildə elan edilmiş səfərbərlikdir. Müstəqil Rusiya jurnalistlərinə istinadla britanlar bildirir ki, 2023-cü ilin yanvar - aprel dövründə RF Hərbi məhkəmələrində 1053 sayda hərbi hissəni özbaşına tərketmə işinə baxılıb. Bu, bütöv 2022-ci ildəkindən az qala iki dəfə çoxdur.

Bəli, xalqı zorla haqsızlığa cəlb etmək olmaz!

“Ədəbiyyat və incəsənət”

(25.05.2023)

Fransanın Azərbaycandakı səfirliyində soydaşımız, tanınmış musiqiçi, Azərbaycanın Əməkdar artisti Adilə Əliyevaya bu ölkənin “Fəxri Legion” ordeninin təqdim olunması mərasimi keçirilib.

AzərTAC xəbər verir ki, özünün tarixi vətəninin hüdudlarından kənarda də şöhrət qazanmış fortepiano ifaçılığı sənətinin tanınmış nümayəndəsi Adilə Əliyeva artıq 30 ildən çoxdur ki, Fransada yaşayır. 

Tanınmış pianoçu Fransa Prezidenti Emmanuel Makronun 2022-ci il 13 iyul tarixli Fərmanı ilə milli bayram və yubileyi ərəfəsində dünyada klassik musiqinin təbliğinə görə bu ölkənin ən yüksək hərbi və mülki dövlət mükafatı olan “Fəxri Legion” ordeni ilə təltif olunub. Ondan bir neçə gün əvvəl isə Adilə Əliyeva Azərbaycan Prezidenti İlham Əliyevin Sərəncamı ilə Azərbaycan musiqisinin dünyada tanıdılması, gənc nəsil musiqiçilərin hazırlanmasında xidmətlərinə, habelə Fransada onun adını daşıyan mötəbər beynəlxalq müsabiqənin təşkilinə görə “Dostluq” ordeni ilə təltif edilib. 

Mərasimdə çıxış edən Fransanın ölkəmizdəki səfiri Ann Buayon bildirib ki, bu mükafat Napoleon Bonapart tərəfindən 1802-ci il mayın 19-da cəngavər ordenləri nümunəsində təsis olunub. Onun statusu və ordenin kavaleri titulu Fransada general rütbəsindən yüksəkdir və böyük xidmətlərə görə verilir. 

Azərbaycanda bu yüksək mükafatla cəmi üç nəfər təltif olunub. Onlardan birincisi fransız müqavimət hərəkatının qəhrəmanı Əhmədiyyə Cəbrayılovdur. General Şarl de Qoll ordeni əfsanəvi azərbaycanlıya təqdim etmək üçün xüsusi olaraq SSRİ-yə gəlmişdi. Azərbaycanın Birinci vitse-prezidenti Mehriban xanım Əliyeva da “Fəxri Legion” ordeni ilə təltif olunub. 

Usta pianoçu Adilə Əliyeva pianoçuların bir çox mötəbər beynəlxalq müsabiqələrinin laureatıdır. Onun solo konsertlərinin səs yazısı, o cümlədən Ulu Öndər Heydər Əliyevə və BMT-də Azərbaycan Gününə həsr etdiyi ifaları müxtəlif ölkələrin televiziya və radio arxivlərində saxlanılır, habelə kompakt-disk və DVD şəklində buraxılıb. 

Adilə Əliyeva konsert fəaliyyəti ilə yanaşı, BMT-nin sülh elçisi qismində Azərbaycan musiqi sənətini dünyada təbliğ edərək böyük işlər görür. Onun sülh elçisi kimi ideyalarından biri Azərbaycan və Fransanın şəhərləri arasında çoxtərəfli münasibətlərin inkişafıdır. Pianoçu Fransa nümayəndə heyətinin tərkibində öz əcdadlarının vətəni olan Şamaxıda olub, onun səyləri nəticəsində bu şəhərlə Fransanın Qayar şəhəri qardaşlaşıb. 

Pianoçunun daha bir təşəbbüsü “Adilia Alieva International Music Competition” beynəlxalq musiqi müsabiqəsidir. Artıq ənənə halını alan və populyar olan bu tədbir Fransanın mədəni həyatının ayrılmaz hissəsinə çevrilib. Adilə Əliyeva, həmçinin Fransada Ali Musiqi Akademiyasını da təsis edib, burada özünün görkəmli müəllimlərinin prinsiplərini həyata keçirərək və malik olduğu zəngin təcrübəyə əsaslanaraq, öz məktəbini və müxtəlif səviyyədə və yaşda olan tələbələrin hazırlanmasının effektiv təhsil sistemini yaradıb. 

“Nyu-York Tayms” qəzetinin nüfuzlu musiqi tənqidçilərindən biri, “Motsartdan bizim zamanımıza qədər” ensiklopediyasının müəllifi Harold Şonberq “American Record Guide” nəşrinin səhifələrində yazıb ki, “Adilə Əliyeva müstəsna barmaqları, mükəmməl zövqü və heyrətamiz emosiyaları olan gözəl pianoçudur. O, musiqidə ən yüksək zirvəyə yüksəlib”. 

Adilə Əliyevanın xidmətləri Fransa hökuməti tərəfindən yüksək qiymətləndirilib, “Fəxri Legion” ordeni isə onun fransız mədəniyyətinə verdiyi töhfənin ən yüksək mükafatıdır.

“Ədəbiyyat və incəsənət”

(25.05.2023)