Super User
“Gelişine değil gidişine” - Burhan Sami Benli
“Ədəbiyyat və incəsənət” portalının “Ulduz” jurnalı ilə birgə təqdim etdiyi layihədə Türkiyənin “Genç Yürekler” jurnalının seçimində 51 türk müəllifinin yazıları yer alır. Türkiyə türkcəsində yayılan əsərlərin əsas qayəsi budur: “Dildə, fikirdə, işdə birlik!”.
“Gelişine değil gidişine”
Burhan Sami Benli
Yüzümü, yine gökyüzüne çevirdim; uzak yıldızlara, görkemli, ama bulanık ışıkların titrediği o büyük yalnızlığa. Gözlerimi kapattım karanlığın üzerine. Büyük bir özlemle ve derin bir iç çekişle kapadım gözlerimi. Ilık bir rüzgar saçlarının kokusunu taşır gibi, okşadı gözkapaklarımı. Gökyüzüyle ben, büyük bir yalnızlığı birlikte taşıdık dağ başlarındaki sislerin içine.
İçerimde bir büyük his yumrusu, nasıl anlatılabilir; karnımdan göğüs boşluğuma dek uzanan ve sanki sonra boğazıma yürüyen, sonra orada kördüğümlere bezenip yüreğime tüm ağırlığı ve pervasızlığı ile oturup kalan. Sanki bedenimi ağırlaştırarak toprağa yaklaştıran, ayaklarımdan sımsıkı köklerle tutunan oraya. Ve rüzgar, pencerenin kıvrımlarından tenime sürtünerek daha da ağırlaştıran hislerimi. Çiçek kokusu, şehir gürültüsü, yol sesi, hafif bir türkü ve her şey- bu ağır hissi daha da ağırlaştıran.
Nereye gitsem, hangi caddeye çıksam, hangi uzaklığa baksam yine de bu şehir, sensizliği çevreleyen bir duvar gibi duruyor karşımda. Her şey bu şehirde, bütün lambalar, bütün kaldırımlar, bütün yollarıyla, bütün iyilikleriyle ve bütün olmayan yürekleriyle insanlar, bu duvarın ardına çekilmiş gibi seninle. Rüzgar bile uzun soluklu esemiyordu şehirde bu duvardan ötürü. Sensizliği hatırlatan her dokunuşta her hareket kayboluyor gibi. Bu sensizlik, bozkırdan alışık olduğum düzlüklere bile benzemiyor hiç.
İçim, özlemle üşüdü. Dilim kördüğüm, bacaklarım titrek, gözlerim çivilenmiş gibiyken, teninin kokusunu anımsatan bir kokuyla sarsıldım yeniden. Elim boş... Boş elim, boşluğa uzandı. Siyahlar içinde yanıyormuş gibi gördüğüm bir çift ateşe baktım gözlerimi kısarak. Başımı yana eğdim biraz. Boynunun aya benzeyen kıvrımında gezindim biraz. Bembeyaz ülkene daldım, ben sevdikçe renklere büründün; maviye, pembeye, turuncuya, laciverte büründü bedenin. Ben bir yağmur gibi yağdım sana, mağlup, ama coşkulu, uzak, ama yakın, ışıklı, ama sessiz. Şimdiyse hasretin, üzerine su dökülmüş bir kor, uçurumdan yuvarlanan bir koca taş gibi geldi üzerime.
Sensizlik insan kılığında bir dağ gibi. Bir ses aradım orada içimdeki ateşe dinletecek. Elime değecek bir tutam saç aradım. Üşümüş yerlerine bir candan dokunuş, bakışını hak edecek bir çift söz sevgiye bezenmiş. Onca arayıştan sonra anladım ki, yokluk da, sensizlik de, uzaklık da aşk varsa katlanılırdı, hatta güzeldi ve hatta kolaydı.
Bu adam sensizliği unuttu, yokluğunu unuttu, bir çırpıda, yıldırım gibi bir öpücükle gidişini de unuttu. Acılarını, gelişinin haberiyle yıkayıp, evini, yurdunu, canını yani seni istedi; hırsla, hüzünle biraz ve umutla çokça istedi seni. Bu adam saatine baka baka, her nefesinde daha da ağırlaşa-ağırlaşa, her arayışında daha da fazla öğrenerek katlanmayı, büyüterek bekledi sevgisini, seni.
“Ədəbiyyat və incəsənət”
(10.12.2024)
Məqsəd təlim prosesinin peşəkar səviyyədə qurulmasıdır
Şəfa Vəli, “Ədəbiyyat və incəsənət” portalının Şəki-Zaqatala təmsilçisi
Azərbaycan Respublikasının görkəmli bəstəkarı, Xalq artisti Şəfiqə Axundovanın 100 illik yubileyi çərçivəsində Şəki şəhər uşaq musiqi və incəsənət məktəblərində tar və kamança ixtisasları üzrə ustad dərslərinə start verilib.
Ustad dərsləri Mədəniyyət Nazirliyi Mədəniyyət üzrə Elmi-Metdiki və İxtisasartırma Mərkəzi tərəfindən 10.12.2024-cü il tarixdə Şəki-Zaqatala Regional Mədəniyyət İdarəsinin tabeliyində fəaliyyət göstərən 4 nömrəli Uşaq Musiqi məktəbində başlayıb.
2024-cü il üçün nəzərdə tutulmuş Azərbaycan Respublikası Mədəniyyət Nazirliyinin Fəaliyyət Planına uyğun olaraq, Xalq artisti Şəfiqə Axundovanın 100 illik yubileyi çərçivəsində keçirilən ustad dərslərinin məqsədi, musiqi və incəsənət məktəblərində təlim prosesinin peşəkar səviyyədə qurulması, eləcə də bu sahədə fəaliyyət göstərən müəllim və şagirdlərin peşəkarlığının, bilik səviyyəsinin artırılmasının təmin edilməsi, yerlərdə lazımi metodiki köməkliyin göstərilməsidir.
Qeyd edək ki, ustad dərsləri Şəki şəhərində bir neçə gün davam edəcək.
“Ədəbiyyat və incəsənət”
(10.12.2024)
IV Azərbaycan Vokalçıları Festivalı keçiriləcək
Dekabrın 20-dən 24-dək IV Azərbaycan Vokalçıları Festivalı keçiriləcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, festival nazirliyin dəstəyi, Azərbaycan Dövlət Akademik Opera və Balet Teatrı və Bülbül Vokal Məktəbinin təşkilatçılığı ilə keçiriləcək.
Bu layihə çərçivəsində bir çox tədbirlərin keçirilməsi planlaşdırılıb. Bu sıraya Azərbaycan Milli Konservatoriyasının müəllim və tələbələrinin iştirakı ilə konsert və elmi seminar, Xalq artisti Şahlar Quliyevin xatirəsinə həsr olunmuş konsert, Fikrət Əmirov adına Gəncə Dövlət Filarmoniyasında Xalq artisti Sevinc İbrahimovanın solo konserti, Kamera musiqisi axşamı, Rus bəstəkarlarının ariya və romanslarından ibarət gecə daxildir.
Festivalın bağlanış mərasimi dekabrın 24-də Müslüm Maqomayev adına Azərbaycan Dövlət Akademik Filarmoniyasında keçiriləcək. Tədbir Azərbaycan vokal sənətinin parlaq simalarını bir araya gətirəcək.
“Ədəbiyyat və incəsənət”
(10.12.2024)
“ASAN xidmət” ölkə üzrə növbəti ilkə imza atıb!
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi İSO 56002:2021 “İnnovasiyalar üzrə İdarəetmə Sistemi” beynəlxalq sertifikatına layiq görülüb.
“Ədəbiyyat və incəsənət” portalı xəbər verir ki, sözügedən sertifikatı ölkəmizdə ilk dəfə Dövlət Agentliyi əldə edib. Standartın alınması Dövlət Agentliyində innovasiya ekosisteminin beynəlxalq standartlara uyğun formalaşdırılmasının göstəricisidir.
Sertifikat Beynəlxalq Standartlar Təşkilatında (İSO) akreditasiya olunmuş Türkiyə Standartlar İnstitutu tərəfindən verilib.
Dövlət Agentliyində formalaşdırılan innovasiyalar “ASAN xidmət” mərkəzlərində vətəndaşlara göstərilən dövlət xidmətlərinin daha effektiv və keyfiyyətli təşkili, həmçinin vətəndaşların dövlət xidmətlərinə əlçatanlığının təmin edilməsi məqsədilə tətbiq olunur.
“Ədəbiyyat və incəsənət”
(10.12.2024)
Respublika Gənclər Kitabxanasında 10 Dekabr – Beynəlxalq İnsan Hüququları Günü ilə əlaqədar silsilə materiallar hazırlanıb
Dekabrın 10-u dünyada Beynəlxalq İnsan Hüquqları Günü kimi qeyd olunur. “Bütün insanlar azad və bərabərdir” tezisinə əsaslanan Birləşmiş Millətlər Təşkilatının (BMT) Baş Assambleyası 10 dekabr 1948-ci ildə bu günü Beynəlxalq İnsan Hüquqları Günü olaraq qəbul etmişdi.
Beynəlxalq İnsan Hüquqları Günü münasibətilə Cəfər Cabbarlı adına Respublika Gənclər Kitabxanasının əməkdaşları tərəfindən eyniadlı biblioqrafik icmal, ənənəvi və virtual sərgi hazırlanıb.
“Ədəbiyyat və incəsənət” portalına kitabxanadan verilən məlumata görə, materiallarda Beynəlxalq İnsan Hüquqları Gününün təsis edilməsi haqqında məlumat, ölkəmizdə bu istiqamətdə imzalanan rəsmi sənədlərin tam mətni təqdim edilir. Dünyada və ölkəmizdə insan hüquqlarının müdafiəsi istiqamətində görülən işlər, aparılan islahatlar, Azərbaycanda 1998-ci ildə Ulu Öndər Heydər Əliyevin təşəbbüsü ilə Şərqdə ilk dəfə olaraq ölüm cəzasının ləğv edilməsi, Ombudsman təsisatının yaradılması, Azərbaycanın bir sıra hüquqi aktlara qoşulması haqqında məlumat verilir.
Kitabxananın rəsmi saytında yerləşdirilən https://ryl.az/funds/biblioqrafik-icmal biblioqrafik icmalda “Müstəqilliyimiz əbədidir : çıxışlar, nitqlər, bəyanatlar, müsahibələr, məktublar, məruzələr, müraciətlər, fərmanlar”, “Demokratiya dərsləri”, “Azərbaycan Respublikasında beynəlxalq müqavilələrin implementasiyasının konstitusiya əsasları”, “İnsan Hüquqları Komitəsi : nəzəri və praktiki problemlər: dərs vəsaiti”, “İnsan hüquq və azadlıqları ümumbəşəri dəyərlər sistemində: müasir çağırışlar və təhdidlər”, “Qadın hüquqlarının müdafiəsi: beynəlxalq və milli aspektlər”, “Beynəlxalq insan hüquqları hüququnun implementasiyası və tətbiqi sistemləri: orqanlar və mexanizmlər” kimi Azərbaycan, ingilis və rus dillərində 30-dan artıq kitabın biblioqrafik təsviri və qısa annotasiyası təqdim edilir.
“Ədəbiyyat və incəsənət”
(10.12.2024)
Ankarada Şah İsmayıl Xətai irsinə həsr olunmuş tədbir keçirilib
Türkiyə-Azərbaycan Dərnəkləri Federasiyasının (TADEF), “Azaflı” Azərbaycan Sosial Dəstək və Mədəniyyət Dərnəyinin və Türk Dünyası Mədəniyyət Mərkəzinin təşəbbüsü ilə Ankarada “Şah İsmayıl Xətai: ömür yolu və irs” mövzusunda tədbir keçirilib.
“Ədəbiyyat və incəsənət” portalına Diasporla İş Üzrə Dövlət Komitəsindən verilən məlumata görə, tədbirdə iki qardaş ölkənin diplomatları, alimləri, ekspertləri və ictimaiyyət nümayəndələri iştirak edib.
Türk Dünyası Mədəniyyət Mərkəzinin və “Azaflı” Azərbaycan Sosial Dəstək və Mədəniyyət Dərnəyinin rəhbəri Arzuman Azaflı çıxışında Şah İsmayıl Xətai şəxsiyyətinin uzun müddət Türkiyədə səhvən İran və farslarla əlaqələndirildiyini qeyd edib. Onun sözlərinə görə, vahid Azərbaycan dövlətinin əsasları Səfəvilər dövlətinin banisinin adı ilə bağlıdır. “Şah İsmayıl Azərbaycan dilinin statusunu dövlət dili səviyyəsinə qaldırdı, ana dilində Xətai təxəllüsü ilə lirik və epik şeirlər yazdı”, - deyən Arzuman Azaflı tarixi həqiqətləri təhrif etməməyə çağırıb.
Ankara Universitetinin professoru Abdulla Gündoğdu Şah İsmayıl Xətaini bütün bölgənin tarixində dərin iz qoymuş şəxsiyyət adlandırıb.
Tədqiqatçı-yazar Dilqəm Əhməd Səfəvilər dövlətinin irsinə görkəmli Azərbaycan ziyalılarının münasibətindən danışıb. Qeyd edib ki, Azərbaycan Xalq Cümhuriyyətinin qurucularından olan Məhəmməd Əmin Rəsulzadə Səfəvilər dövlətinin özəyini türklərin təşkil etdiyini vurğulayıb. “Səfəvilər dövlətində rəsmi yazışmalar Azərbaycan dilində aparılırdı. Türk dili həm də hökmdarlar arasında ünsiyyət vasitəsi olub”, - deyə tədqiqatçı bildirib.
Tədbir Şah İsmayıl Xətainin sözlərinə yazılmış musiqili kompozisiyaların ifası ilə başa çatıb.
“Ədəbiyyat və incəsənət”
(10.12.2024)
“YAŞAT” Fondunun yaranmasından 4 il ötür
“YAŞAT” Fondunun 4 illik fəaliyyətinə dair mətbuat konfransı təşkil olunub.
“Ədəbiyyat və incəsənət” portalı xəbər verir ki, öncə Fondun 4 illik fəaliyyətinə dair videoçarx nümayiş etdirilib.
Ardınca “YAŞAT” Fondunun rəhbəri, Qarabağ qazisi Elvin Hüseynov hesabat xarakterli təqdimatla çıxış edib.
Təqdimatda “YAŞAT” Fondu tərəfindən müvafiq istiqamətlərdə şəhidlərimizin ailə üzvləri və yaralılarımız üçün həyata keçirilən dəstək tədbirləri, reallaşdırılan layihələrə dair statistik məlumatlar əks olunub.
Sonda media nümayəndələrinin sualları cavablandırılıb.
Azərbaycan Respublikasının Prezidenti İlham Əliyevin 8 dekabr 2020-ci il tarixli Fərmanı ilə “YAŞAT” Fondu yaradılıb. Fondun əsas məqsədi şəhid ailələrinin və hərbi əməliyyatlar nəticəsində əlilliyi müəyyən olunmuş şəxslərin sosial müdafiəsi sahəsində dövlət tərəfindən həyata keçirilən tədbirlərə əlavə dəstək verilməsi istiqamətində vətəndaş cəmiyyəti təşəbbüslərinin reallaşdırılması üçün müvafiq platformanın yaradılması, bu sahədə şəffaflığın, hesabatlılığın və ictimai nəzarətin təmin edilməsidir.
“YAŞAT” Fondunun hesabatları və xərclənən vəsaitlərlə bağlı ətraflı məlumatı yashat.gov.az rəsmi internet saytının Hesabatlar (https://yashat.gov.az/report/tableau) bölməsindən əldə etmək mümkündür.
“Ədəbiyyat və incəsənət”
(10.12.2024)
Azərbaycan filmi Beynəlxalq Buddist Film Festivalında Qran-Pri mükafatına layiq görülüb
Rejissor Kseniya Laqutinanın çəkdiyi “Ayıpəncəsi tarlasında torağaylar” Azərbaycan filmi Tuvanın paytaxtı Qızılda keçirilən Buddist Beynəlxalq Film Festivalında Qran-Priyə layiq görülüb.
AzərTAC xəbər verir ki, film mühüm seçim etməli olan bir neçə qəhrəmanın taleyindən bəhs edir.
Tuvalı Orlan Oyun “Sarbaşkınnar” filminə görə ən yaxşı rejissor seçilib, Qırğızıstandan “Yer” filmi isə münsiflər heyətinin xüsusi mükafatına layiq görülüb.
Anuparna Roy “Çaya tərəf qaç” (Hindistan) filminə görə “Ən yaxşı ssenari” nominasiyasının qalibi olub.
Buddist Beynəlxalq Film Festivalı 2022-ci ildən Tuvada keçirilir. Bu il festivalda doqquz ölkədən nümayəndələr iştirak edib.
“Ədəbiyyat və incəsənət”
(10.12.2024)
TÜRKSOY-a üzv ölkələrin məktəbliləri arasında keçirilən rəsm və inşa müsabiqələrinin qalibləri mükafatlandırılıb
Türk dünyasının ortaq dəyərlərini və mədəni irsini gənc nəslə tanıtmaq məqsədilə TÜRKSOY-a üzv ölkələrin məktəbliləri arasında rəsm müsabiqəsi keçirilib. Dekabrın 9-da Vaqif Mustafazadə adına 2 nömrəli Uşaq İncəsənət Məktəbində müsabiqə qaliblərini mükafatlandırma mərasimi olub.
AzərTAC xəbər verir ki, qonaqlar əvvəlcə gənc rəssamların sərgilənən əsərləri ilə tanış olublar.
Tədbirdə çıxış edən TÜRKSOY-un Baş katibi Sultan Raev Türk dünyasının gələcəyinin memarları olacaq gənclərə xüsusi diqqət yetirildiyini vurğulayıb. O, bu istiqamətdə həyata keçirilən layihələrin gənclərin milli dəyərlərə və incəsənətə marağını artırmağı hədəflədiyini bildirib.
Sultan Raev TÜRKSOY tərəfindən Türkmənistanın Anev şəhərinin 2024-cü il üçün “Türk dünyası mədəniyyət paytaxtı” elan edildiyini və böyük türkmən şairi Məhtimqulu Fəraqinin 300 illiyi münasibətilə xüsusi tədbirlərin keçirildiyini diqqətə çatdırıb. O, Azərbaycan, Qırğızıstan, Qazaxıstan, Özbəkistan, Türkmənistan və Türkiyədən məktəblilərin qatıldığı müsabiqələrin gənclərin yaradıcılıq potensialını üzə çıxarmaq və milli dəyərləri gələcək nəsillərə çatdırmaq baxımından əhəmiyyətli hesab edildiyini qeyd edib.
TÜRKSOY-un Baş katibi diqqətə çatdırıb ki, görkəmli türkmən şairi Məhtimqulu Fəraqini əks etdirən kompozisiya və “Türk dünyası və Türkmənistan gənc rəssamların gözü ilə” mövzusunda keçirilən rəsm müsabiqəsi gənclərin mədəni irsə olan marağını artırmaqla yanaşı, Türk dünyasının vəhdətinə xidmət edən mühüm addımlardandır.
Bakı Şəhər Mədəniyyət Baş İdarəsinin rəisi İbrahim Əliyev TÜRKSOY-un artıq ikinci ildir ki, gənc rəssamlarla bağlı müsabiqələr keçirdiyini bildirib. O, builki tədbirin Şərqin böyük mütəfəkkiri və şairi Məhtimqulu Fəraqinin anadan olmasının 300 illiyinə həsr edildiyini diqqətə çatdırıb.
İbrahim Əliyev tədbirin gənc nəslin milli ruhda tərbiyəsinə, onların milli dəyərlərimizi daha dərindən mənimsəməsinə mühüm töhfə verdiyini vurğulayıb. O, belə tədbirlərin türk dövlətlərinin birliyini möhkəmləndirmək və milli irsimizi qorumaq baxımından əhəmiyyətli olduğunu vurğulayıb.
Sonra şagirdlərin ifasında konsert proqramı təqdim edilib.
Daha sonra TÜRKSOY-a üzv ölkələrin məktəbliləri arasında keçirilən rəsm və inşa müsabiqələrinin qaliblərini mükafatlandırma mərasimi olub. Qaliblər xüsusi diplom və qiymətli hədiyyələrlə mükafatlandırılıb.
Tədbirin yekununda çıxış edənlər müsabiqənin yüksək səviyyədə təşkilini və gənclərin yaradıcılıq sahəsində göstərdikləri nailiyyətləri təqdir ediblər. Bildirilib ki, bu cür tədbirlər gənclərin milli-mədəni dəyərlərimizə bağlılığını artırmaqla yanaşı, Türk dünyasının birliyinə xidmət edən mühüm təşəbbüslərdən biridir.
Müsabiqə iştirakçıları və qaliblər Türk dünyasının ortaq dəyərlərinə həsr olunmuş belə tədbirlərdə iştirak etməyin onlar üçün böyük stimul və fəxr hissi yaratdığını qeyd ediblər.
“Ədəbiyyat və incəsənət”
(10.12.1024)
Görkəmli Qırğız yazıçısı, TÜRKSOY-un Baş katibi Sultan Rayevin “Daşqın” kitabının təqdimatı keçirilib
Dekabrın 9-da Bakıda Beynəlxalq Türk Mədəniyyəti və İrsi Fondunda görkəmli Qırğız yazıçısı, TÜRKSOY-un Baş katibi Sultan Rayevin “Daşqın” kitabının təqdimatı keçirilib.
AzərTAC xəbər verir ki, tədbirdə çıxış edən Beynəlxalq Türk Mədəniyyəti və İrsi Fondunun prezidenti Aktotı Raimkulova qurumun fəaliyyəti barədə ətraflı məlumat verib. O bildirib ki, Fond ümumtürk irsinin, xüsusilə maddi və qeyri-maddi mədəni irs nümunələrinin qorunması istiqamətində fəaliyyət göstərir.
“Bu, Türk Mədəniyyəti və İrsi Fondu tərəfindən hazırlanmış 17-ci kitabın təqdimatıdır. Kitabı Rəbiqə Nazimqızı tərcümə edib. Təşkilatın prioritet istiqamətlərindən biri də türk xalqlarının görkəmli şəxsiyyətlərinin zəngin irsinin gələcək nəsillərə ötürülməsidir. Fond bu yöndə “Türk dünyasının görkəmli şəxsiyyətləri”, “Türk dünyasının ədəbi inciləri”, “Türk dünyasının elmi inciləri” adlı 3 kitab seriyası təsis edib. Parisdə dekabrın 13-də Mahmud Kaşğarinin “Divanü lüğat-it-türk” əsərinin 950 illiyi UNESCO səviyyəsində qeyd olunacaq. Konfransda Azərbaycan, Qazaxıstan, Qırğızıstan, Türkiyə, Özbəkistan, Türkmənistan, Macarıstan və digər ölkələrdən alimlər, tədqiqatçılar, dövlət və beynəlxalq təşkilatların nümayəndələri bir araya gələcəklər”, - deyə A.Raimkulova əlavə edib.
Azərbaycan Respublikasının mədəniyyət naziri Adil Kərimli çıxışında qeyd edib ki, Azərbaycan xalqı Türk dünyasının böyük oğlu Çingiz Aytmatovun yaradıcılığına dərin hörmətlə yanaşır. “Bu il Bakıda artıq ikinci dəfə Qırğızıstanın görkəmli ədəbiyyat nümayəndəsi TÜRKSOY-un Baş katibi Sultan Rayevin kitabının təqdimatına toplaşmışıq. Azərbaycan Mədəniyyət Nazirliyi və Beynəlxalq Türk Mədəniyyəti və İrsi Fondu birgə bir sıra layihələr reallaşdırır. Bu bizim birgə həyata keçirdiyimiz növbəti layihədir. Əminəm ki, gələcəkdə belə layihələrin sayı daha çox olacaq”, - deyə nazir vurğulayıb.
Tədbirdə Azərbaycan Milli Elmlər Akademiyasının prezidenti akademik İsa Həbibbəyli, Qırğızıstanın Azərbaycandakı səfiri Maksat Mamıtkanov, Xalq yazıçısı Çingiz Abdullayev, Azərbaycan Atatürk Mərkəzinin direktoru akademik Nizami Cəfərov çıxışlarında Sultan Rayevin “Daşqın” əsəri barədə fikirlərini bölüşüblər.
Bildirilib ki, Azərbaycanda Türk dünyasının yazıçılarının əsərlərinə daim maraq olub. Bu günlərdə Bakıda türk xalqları ədəbiyyatının yeni məzmun və ideyalarla zənginləşməsində böyük xidmətləri olan, ümumtürk dünyasının parlaq simalarından biri Çingiz Aytmatova həsr olunmuş böyük görüş keçiriləcək.
Diqqətə çatdırılıb ki, Sultan Rayevin “Daşqın” əsərində “Nuhun tufanı yeni dövrdə baş versə nələr olar” axtarışında fikirlər irəli sürülüb. Kitabda əslində Nuhun tufanın müasir zamanda baş verdiyini göstərilir. Belə ki, hazırda insanlar suya deyil, internetə qərq olub boğulurlar. Kitabda, həmçinin süni intellektin gətirdiyi problemlər araşdırılır.
Milli Məclisin deputatı Cavanşir Feyziyev çıxışında deyib ki, Manas kimi min yaşlı zəngin ədəbi-bədii irs üzərində boy atmış müasir qırğız ədəbiyyatı XX əsr dünya ədəbiyyatına Çingiz Aytmatov kimi nəhəng düha sahibini bəxş etdi. “Düşünmək olardı ki, qırğız ədəbiyyatı artıq öz sözünü deyib. Ən azı Ç.Aytmatovdan sonra müasir qırğız ədəbiyyatında yeni söz demək çox böyük cəsarət tələb edəcəyindən yeni möcüzə gözləmək ağıllara gəlməzdi. Amma möcüzə baş verdi, Sultan Rayev özündə bu cəsarəti tapdı və kifayət qədər uğurlu bir şəkildə öz ədəbi dəst-xətini Türk dünyası ədəbiyyatının rəqabət meydanına çıxara bildi. Sultan Rayev nə Manas yazdı, nə də Aytmatov üslubunu təkrar etdi. O yazdığı romanlarla hörmətli akademik İsa Həbibbəylinin “magik realizm” adlandırdığı ən müasir ədəbi trendinin altında öz imzasını atdı. Bu imza olduqca möhtəşəmdir və bütün Türk dünyasına Sultan Rayevlə fəxr etmək imkanı qazandırıb", - deyə Cavanşir Feyziyev əlavə edib.
“Daşqın” əsərinin müəllifi Sultan Rayev çıxışında kitabın ərsəyə gəlməsində dəstəyi və əməyi keçən hər kəsə təşəkkür bildirib.
Daha sonra Bakı Bələdiyyə Teatrının aktyoru, Əməkdar artist Hüsniyyə Mürvətova “Daşqın” romanından bir parçanı oxuyub.
Tədbirdə Azərbaycanın dövlət və hökumət rəsmiləri, deputatlar, Qırğızıstan səfirliyinin, eləcə də ölkəmizdə akkreditə olunmuş diplomatik korpusun təmsilçiləri, elm, mədəniyyət xadimləri və ictimaiyyət nümayəndələri iştirak ediblər.
“Ədəbiyyat və incəsənət”
(10.12.2024)
