Super User
Böyük Britaniyanın pavilyonu Venesiya ART-Biennalesinin "Qızıl şir"ini qazandı
Müasir incəsənətin ən parlaq nümayişi məkanı illərdir ki Venesiya Biennalesi hesab olunur. Hətta bu koronavirus pandemiyası və Rusiya-Ukrayna müharibəsi dünyanın düzənini pozsa beləVenesiya Biennalesinin düzənini poza bilməyib. Yekun vurduğumuz həftədə 59-cu Venesiya Biennalesi ilk mükafatlarını təqdim edib, dünyanın əsas ART-hadisəsində Böyük Britaniyanın pavilyonu ən yaxşı pavilyon kimi tanınıb. O, "Qızıl şir" mükafatına – Biennalenin baş mükafatına layiq görülüb. Bu barədə “Ədəbiyyat və incəsənət” portalı TASS agentliyinə istinadən məlumat verir.
Britaniya pavilyonunda Afrika-Karib mənşəli xanım rəssam Sonya Boys videoinstalyasiyalardan ibarət cığır yaradıb. “Feeling Her Way ekspozisiyası mozaik divar kağızlarından ibarətdir, eləcə də geometrik strukturlardan və rəngbərəng hərəkətdə olan görüntülərdən ibarətdir. Hansılar ki, azadlıq, güc və zəiflik hisslərini təcəssüm etdirən qaradərili britaniyalı vokalçıların səslərinin bərqərar olmasına yer verir. Mərkəzi iş müğənnilərin ilk dəfə necə görüşdüyünü, improvizə etdiklərini və kapellanın oxuduğunu göstərir, bununla da birgə oyunun innovasiyalara yolu potensialını nümayiş etdirir, bu da Sonya Boysun artistik praktikasının Mərkəzi Prinsipidir", - deyə Venesiya Biennalesinin saytındakı britanların pavilyonunun təsvirində qeyd olunub.
İndi isə digər nominasiyalara keçid alaq.
Ən yaxşı rəssam "Suverenlik" işi ilə ABŞ-dan afroamerikalı Simon Li olub. Münsiflər heyətinin fikrincə, bu iş ciddiyyətlə işlənib və virtuozluqla realizə olunub. Ümumən, münsiflər Fransa və Uqandadan olan ustaların işlərinə xüsusi qiymət veriblər.
Noyabrın 27-dək davam edəcək Biennale kurator Çeçeliya Alemaninin dediyi kimi – o, bu postu tutan ilk qadındır - yazıçı Leonora Carrinqtonun “Xəyalların südü” adlı nağıllar kitabından ad alaraq "xəyalların südü" adlanır. Sərgi, o cümlədən insanlar və texnologiyalar arasında münasibətlərə, həmçinin "cisimlərlə Yer arasında sıx birləşən" əlaqələrə həsr olunub.
Biennaledə 213 ölkədən 58 rəssam iştirak edir. Sərgi meydançaları ənənəvi olaraq qalmaqdadır - Arsenal (tarixi Venesiya tərsanəsi) və Cardini (əfsanəvi bağçalar) - istər milli pavilyonların, istərsə də ayrı-ayrı instalyasiyaların yerləşdiyi məkanlardır.
Yeri gəlmişkən, təşkilatçılar Ukraynada baş verən hadisələr fonunda Rusiyanın rəsmi nümayəndə heyətini qəbul etməyəcəklərini bildiriblər.
Türkiyədə Azərbaycan mədəniyyətinin böyük təbliğatçısı Aygün Attarın “Dostluq” ordeninə layiq görülməsi hamını sevindirib
Türkiyə Prezidenti yanında Təhlükəsizlik və Xarici Siyasət Şurasının üzvü, Türkiyə-Azərbaycan Dostluq, Əməkdaşlıq və Həmrəylik Fondunun rəhbəri, professor Aygün Attar mediaya açıqlamasında “Dostluq” ordeninə layiq görülməsi barədə belə söyləyib: “Azərbaycan Prezidentinin Sərəncamı ilə “Dostluq” ordeninə layiq görülməyimdən qürur duyuram. Bunu dünya azərbaycanlılarına göstərilmiş diqqət və qayğının daha bir təzahürü olaraq görürəm. Həmişə hesab etmişəm ki, Müzəffər Ali Baş Komandan İlham Əliyevin rəhbərliyi ilə, qəhrəman şəhid və qazilərimizin qanı hesabına qazanılan Qarabağ Zəfəri hər birimizin həyatına nəsib olan ən ali mükafatdır”.
Otuz ildən çoxdur ki, Türkiyədə yaşadığını və orada Azərbaycanın tarixi və mədəniyyətinin təbliği istiqamətində yorulmadan fəaliyyət göstərdiyini söyləyən Aygün Attar elmi işləri, məqalələri, siyasi platformadakı çıxışları ilə hər zaman Vətəninə sonsuz bağlı olduğunu bildirib: “Demək olar ki, bütün fəaliyyətim Türkiyə və Azərbaycan münasibətlərinin inkişafına xidmət edir. Amma hər zaman bütün bu çalışmaların mərkəzində nüvə olaraq Qarabağ həqiqəti yer alıb. Mənin üçün “Qarabağ Azərbaycandır” həqiqətinin dünyanın elmi ictimaiyyətinə çatdırılması hər zaman mühüm məsələsi olub. Şükürlər olsun ki, çəkilən zəhmət hədər getmədi və torpaqlarımız düşmən tapdağından azad olundu və bizlər Şuşada Zəfər Qurultayında iştirak etdik. Orada Müzəffər Ali Baş Komandan İlham Əliyevin çıxışı bütün diaspor fəalları üçün əsl yol xəritəsi oldu. Orada keçirdiyimiz görüşlər, dinlədiyimiz çıxışlar bizim məsuliyyətimizi daha da artırdı. İnanıram ki, bizlər bundan sonra da Azərbaycanı dünyada daha yaxşı təmsil edəcəyik”.
Ümummilli lider Heydər Əliyevin “Bir millət, iki dövlət!” ifadəsini xatırladan professor Aygün Attar qardaşlıq ideologiyasının Prezident İlham Əliyev və Türkiyə Prezidenti Rəcəb Tayyib Ərdoğan tərəfindən çox uğurlu bir şəkildə davam etdirildiyini bildirib: “Bu gün söyləyə bilərəm ki, Türkiyə ilə Azərbaycan arasında münasibətləri ən yüksək səviyyədədir”.
Müəllifi olduğu “Qarabağ Zəfəri – 44 günün pərdəarxası” kitabı haqqında danışan Aygün Attar vurğulayıb ki, hadisələrin döyüş səhnələri ilə təsvir olunduğu əsər, münaqişənin yaranma səbəblərinin geosiyasi kontekstdə araşdırılması ilə yanaşı, Zəfərə aparan yolun gedişatını, qardaş Türkiyənin Azərbaycana böyük siyasi və mənəvi dəstəyini, Prezident, Müzəffər Ali Baş Komandan İlham Əliyevin siyasi iradəsi ilə rəşadətli Ordumuzun müharibədə qazandığı tarixi Qələbənin təfərrüatlarını xronoloji ardıcıllıqla əks etdirir.
Biz Aygün xanım Attarı səmimi qəlbdən təbrik edir, belə həmyerlimizin olması ilə qürur duyuruq.
Anar Kərimovun Naxçıvana səfəri başa çatıb
Anar Kərimov Naxçıvan Muxtar Respubliksına davam edən səfəri çərçivəsində “Naxçıvanqala” Tarix-Memarlıq Muzey Kompleksinə baş çəkib.
“Ədəbiyyat və incəsənət” portalı xəbər verir ki, nazirə bildirilib ki, Kompleksdə yaradılmış arxeoloji-etnoqrafik sərgidə tarixi əşyalar xronoloji ardıcıllıqla nümayiş etdirilir. Eramızdan əvvəl V minilliyə aid təsərrüfat küpü, eramızdan əvvəl V-III minilliyə aid müxtəlif məişət əşyaları, Tunc və Erkən Dəmir dövrünə aid keramika məmulatları, mis qab və alətlər, qəbirüstü abidələr, silahlar muzeyin eksponatları sırasındadır.
Ziyarət zamanı “Şərur” Xalq Yallı Ansamblının ifasında təqdim olunan “Köçəri” və “Tənzərə” yallıları alqışlarla qarşılanıb.
Anar Kərimovun rəhbərlik etdiyi nümayəndə heyəti daha sonra Naxçıvan Şəhər Uşaq Musiqi və İncəsənət Məktəbində olub. Qeyd olunub ki, gənc nəslə milli musiqi sənətinin öyrədilməsi istiqamətində ardıcıl tədbirlər həyata keçirilir. Musiqi məktəblərində şagirdlərdən ibarət müxtəlif ansambllar, orkestrlər və başqa musiqi kollektivləri fəaliyyət göstərir. Yaradılan şəraitin nəticəsidir ki, bu gün muxtar respublikada uşaq musiqi, incəsənət və bədii sənətkarlıq məktəblərinin şagirdləri ölkəmizdə, eləcə də beynəlxalq miqyasda keçirilən müsabiqələrdə uğurla iştirak edir.
Səfər çərçivəsində qədim, orta əsrlər və yeni dövr tariximizi özündə əks etdirən nadir memarlıq abidələrindən biri olan Yusif Küseyir oğlu türbəsinə ziyarət zamanı türbənin yeraltı sərdabədən və yerüstü türbədən ibarət olduğu barədə məlumat verilib. Qeyd olunub ki, türbə ölkəmizin qülləvari türbələri içərisində üst piramida örtüyü olduğu kimi bu günə qədər qalan yeganə abidədir.
Daha sonra Naxçıvan Muxtar Respublikasının əsas mədəniyyət ocaqlarından biri olan Heydər Əliyev Sarayına ziyarət zamanı Anar Kərimov Naxçıvan Muxtar Respublikasının mədəniyyət naziri Natəvan Qədimovaya “Yallı (Köçəri, Tənzərə): Naxçıvanın ənənəvi qrup rəqsləri”nin UNESCO-nun Bəşəriyyətin qeyri-maddi mədəni irsi üzrə Reprezentativ siyahısına daxil olunduğunu təsdiqləyən sertifikatı təqdim edib.
Mədəniyyət nazirinin rəhbərlik etdiyi nümayəndə heyətinin növbəti baş çəkdiyi məkan Ordubad Cümə Məscidi olub. Anar Kərimova Ordubad şəhərindəki qədim Cümə məscidində aparılan bərpa işləri barədə məlumat verilib. Bildirlib ki, məscidin memarlıq görkəmi XVII-XVIII əsrlərə aid abidələrin başlıca cəhətlərini özündə əks etdirir. Muxtar respublikada dini-mədəni dəyərlərimizə qayğı ilə yanaşılır və bərpa zamanı milli memarlıq elementlərindən istifadə olunur.
Anar Kərimov səfər çərçivəsində 1982-ci ildə fəaliyyətə başlayan Ordubad Rayon Tarix-Diyarşünaslıq Muzeyinə baş çəkib. Muzey 1990-cı ilin may ayından etibarən XVII əsrə aid tarixi-memarlıq abidəsi olan “Qeysəriyyə” binasında fəaliyyətini davam etdirir. 2011-ci ildə muzeyin yerləşdiyi “Qeysəriyyə” binası əsaslı şəkildə bərpa olunub. 150 eksponatla fəaliyyətə başlayan Tarix-Diyarşünaslıq muzeyində hazırda 4 mindən artıq eksponat mühafizə və nümayiş olunur. Muzeydə Ordubadın qədim tarixini, zəngin mədəniyyətini, özünəməxsus adət ənənələrini özündə əks etdirən və bu yurdun yetirdiyi tarixi şəxsiyyətlər barədə eksponatlar ziyarətçilərin böyük marağına səbəb olub.
Nazirliyin nümayəndə heyəti daha sonra Azərbaycan elminin görkəmli nümayəndələrindən biri, dünya şöhrətli kimyaçı alim Yusif Məmmədəliyevin həyat və fəaliyyətini əks etdirən ekponatların toplandığı Ev Muzeyini ziyarət edib. Bildirilib ki, ev muzeyi 1975-ci ildə ümumilli lider Heydər Əliyevin təşəbbüsü ilə, alimin qazandığı misilsiz elmi naliyyətlərinin uğuru nəticəsində Akademikin 75 illiyi münasibətilə Ordubadda yaradılmışdır.
Ziyarət zamanı mədəniyyət nazirinin müavini, Yusuf Məmmədəliyevin qızı Sevda Məmmədəliyeva Akademikin uşaqlıq, tələbəlik illəri, həyat və yaradıcılığı, elmi araşdırmaları barədə məlumat verib.
Anar Kərimov məscidlərlə zənginliyi cəhətdən nəinki Naxçıvan bölgəsində, bütövlükdə Azərbaycanda əvvəlinci yerlərdən birini tutan Ordubad şəhərinin əsas məscidlərindən biri olan Sərşəhər məscidinə də baş çəkib. Həmçinin Naxçıvanın incilərindən sayılan XVII əsrdən yadigar qalan Sərşəhər çeşməsi və Xan Kəhrizi də ziyarət olunan məkanlar sırasında yer alıb.
Nazirin Naxçıvana rəsmi səfəri “Əlincəqala” Tarix-Mədəniyyət Muzeyi və Azərbaycan orta əsr memarlığının ən qiymətli yadigarlarından biri olan Qarabağlar Türbə Kompleksinə ziyarəti ilə yekunlaşıb.
30 (+2) finalçının adı açıqlandı
Nəhayət ki, ədəbiyyatın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun müsabiqə mərhələsi başa çatdı.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən və devizi “Sonda ədəbiyyat qalib gələcək” olan festivalın ekspertləri tərəfindən 30 (+2) finalçı müəyyənləşdirildi. Festivalın Əsasnaməsinə görə ekspertlərin ən yüksək balla qiymətləndirdiyi 30 finalçıya olduqca istedadlı 2 Vətən müharibəsi qazisi olan gənc şair də müsabiqədənkənar əlavə edildi.
Beləliklə, “Ədəbiyyat və incəsənət” portalı Beynəlxalq Silkway ədəbiyyat festivalının Azərbaycan turunun final mərhələsinin 32 iştirakçısının siyahısını diqqətinizə çatdırır:
1. Ələsgər Əhmədov (Ələsgər Əhməd). Poeziya.
2. Elroman Əlizadə (El Roman). Poeziya.
3. Mehdi Dostəlizadə. Poeziya.
4. Nərgiz İsmayılova (Nargis). Nəsr.
5. Aypara Mehmanova (Aypara Ayxan). Poeziya.
6. Murad Muradov. Nəsr.
7. Cavid Qasımov. Poeziya.
8. Bahəddin Salman. Nəsr.
9. İntiqam Cavanşir (İntiqam Yaşar). Poeziya.
10. Ümid Nəccari. Poeziya.
11. Tural Cəfərli. Poeziya.
12. Ulucay Məmmədov (Ulucay Akif). Poeziya.
13. Orxan Həsənov (Orxan Həsəni). Nəsr.
14. Ayxan Ayvaz. Nəsr.
15. Emin Əlizadə (Eminquey). Poeziya.
16. Ramil Əhməd. Poeziya.
17. Fərid Hüseyn. Poeziya.
18. Gülnar Hüseynova (Gülnar Ümid). Poeziya.
19. Rəvan Cavid. Poeziya.
20. Emin Piri. Poeziya.
21. Elvin Əlizadə. Poeziya.
22. Günel Ağayeva (Günel Balakişi). Poeziya.
23. Nadir Rzalı (Nadir Yalçın). Nəsr.
24. Faiq Hüseynbəyli. Poeziya.
25. Cavid Zeynallı. Nəsr.
26. Nigar Ağalarova (Nigar Arif). Poeziya.
27. Ruslan Cahangirli (Ruslan Dost Əli). Poeziya.
28. Gülmalı Məmmədov (Səddam Laçın). Poeziya, nəsr.
29. Gülay Tahirli. Poeziya.
30. Təvəkgül Boysunar. Nəsr.
31. Həsən Zeynallı (Həsən Kür). Poeziya.
32. Elvin İntiqamoğlu. Poeziya.
Ekspertlər tərəfindən yüksək bal almış daha 3 iştirakçı – Oğuz Ayvaz, Nərminə Ələkbərova (Jasmin) və Vüqar Babazadə isə növbəti – 2023-cü il festivalında seçim mərhələsində iştirak etmədən birbaşa finala qatılmaq şansı əldə etmişlər.
Xatırladaq ki, aprel ayının 30-da 32 nəfər iştirakçı, eləcə də görkəmli ədəbiyyat və incəsənət xadimlərindən ibarət münsiflər heyəti və fəxri qonaqlar səfalı Quba bölgəsinə səfər edərək üç gün iki gecə beşulduzlu “Şahdağ” otelində yaşayacaq, final mərhələsinə qatılacaqlar.
Final mərhələsində iştirakçılar öz əsərlərini özləri səsləndirməklə münsiflərdən 10 ballıq qiymətləndirmə yolu ilə qiymət alacaqlar.
Ayrıca, xalq yazıçılarının və xalq şairlərinin ustad dərsləri, Quba bölgəsinin yazarları ilə tanışlıq, bölgənin görməli yerlərinə ekskursiyalar da təşkil olunacaq.
May ayının 1-də “Şahdağ Quba – Truskavets” sanatoriyasının “Konsul” zalında təşkil olunacaq Qala gecədə musiqinin, təbrik nitqlərinin, zəngin banket süfrəsinin müşayiəti ilə bütün iştirakçılar “Festivalın finalçısı” Fəxri Diplomları ilə, 3 ən yüksək bal toplayan iştirakçı isə 1-ci, 2-ci və 3-cü yerləri tutmaqla qiymətli hədiyyə və Sertifikatlarla mükafatlandırılacaqlar. Daha bir iştirakçı-qalib isə 32 iştirakçının səsverməsi nəticəsində müəyyənləşəcək.
Növbəti mərhələlərdə festivalın qalibinin kitabının nəşri, piarı, beynəlxalq miqyasda tanıdılması, eləcə də finalçıların əsərlərindən ibarət antologiyanın dərci də nəzərdə tutulur.
Əlbəttə ki, nə olursa olsun, sonda ədəbiyyat qalib gələcək!
Daşkənddə “Arşın mal alan” musiqili komediyası yeni quruluşda göstərilib
Daşkənddəki “Didor” teatr studiyası Üzeyir Hacıbəylinin “Arşın mal alan” musiqili komediyasını yeni quruluşda tamaşaya qoyub.
“Ədəbiyyat və incəsənət” portalı AzərTAC-a istinadən xəbər verir ki, tamaşada Özbəkistanın ədəbiyyat, mədəniyyət və incəsənət xadimləri, diasporumuzun üzvləri, jurnalistlər iştirak ediblər.
Tamaşanın quruluşçu rejissoru Özbəkistanın Xalq artisti Bahadur Yuldaşev, bədii rəhbər Babur Yuldaşevdir. Əsərin musiqi tərtibatçısı isə Özbəkistanda tanınan saz ifaçısı, soydaşımız İlham Abdullayevdir.
Tamaşada əsas rolları Ulmaz Urayev, İroda Kasimova, Adiz Racabov, Nazokat Narziyeva,Yulduz Racabova, Maxliye Askaraliyeva və başqaları ifa ediblər.
Xatırladırıq ki, “Arşın mal alan” ilk dəfə Özbəkistanda 1919-cu ildə Daşkənddəki “Kolizey” teatrında tamaşaya qoyulub. Elə həmin il Bakıdan gələn rejissor Mirzə Həbib Axundzadə Səmərqənddə yaşayan azərbaycanlılardan ibarət teatr truppası yaradıb və əsər bu qədim şəhərdə səhnələşdirilib.
1921-ci ildə bu əsərə Buxarada səhnə həyatı verilib. 1922-ci ildə isə Daşkəndin “Raxat bağçası” teatrında Sidqi Ruhullanın rəhbərliyi ilə Azərbaycandan gələn aktyorlar bu əsəri təqdim edib. Sonrakı illərdə “Arşın mal alan” dəfələrlə Daşkənd, Fərqanə, Buxara, Kokand, Xarəzm, Səmərqənd şəhərlərində tamaşaçılara təqdim olunub.
Üzeyir Hacıbəylinin bu ölməz əsəri 100 ildən artıqdır ki, Orta Asiyada ən məşhur tamaşa kimi səhnədən düşmür. Teatrlar zaman-zaman bu əsərə müraciət edirlər. Bir neçə il əvvəl isə Daşkənddəki Operetta Teatrı “Arşın mal alan”ı rus dilində tamaşaya qoymuşdu.
Qeyd edək ki, musiqili komediya dünyanın 76 ölkəsinin 187 teatrında səhnələşdirilib. 1945-ci ildə çəkilən “Arşın mal alan” filmi isə 136 ölkədə nümayiş olunub.
Azərbaycan Finlandiyada keçirilən mədəniyyət günündə təmsil olunub
Finlandiyanın Espoo şəhərindəki Etelä-Tapiola liseyində müxtəlif ölkələrin mədəniyyət günü keçirilib.
Diasporla İş üzrə Dövlət Komitəsindən AzərTAC-a bildiriblər ki, liseyin 17 yaşlı tələbəsi Mona Savojifarın təşkilatçılığı ilə yaradılan Azərbaycan guşəsində ölkəmizin qədim tarixini və zəngin mədəniyyətini əks etdirən kitablar, rəsm əsərləri, xalçalar, geyimlər və suvenirlər nümayiş etdirilib.
Milli geyimli soydaşımız tədbir iştirakçılarına ölkəmizin tarixi barədə ətraflı məlumat verib, milli rəqs ifa edib, milli mətbəx nümunələrimiziin hazırlanması qaydalarını göstərib.
Qeyd edək ki, Mona Savojifar Finlandiyada fəaliyyət göstərən Azər-Türk Gənclər Təşkilatin üzvüdür.
Azərbaycan ilə İsrail arasında diplomatik əlaqələrin qurulmasının 30 illiyi konsert proqramı ilə qeyd edilib
Üzeyir Hacıbəyli adına Bakı Musiqi Akademiyasının (BMA) böyük zalında Azərbaycan ilə İsrail arasında diplomatik əlaqələrin qurulmasının 30 illiyinə və “Aziz” Azərbaycan-İsrail Beynəlxalq Assosiasiyasının yaranmasının 15 illiyinə həsr olunan konsert keçirilib.
Baş İdarədən bildirilib ki, tədbirdə Niyazi adına 22 nömrəli uşaq musiqi məktəbinin şagirdi, beynəlxalq müsabiqələr laureatı Elmira Dadaşovanın çıxışı alqışlarla qarşılanıb. Onu beynəlxalq müsabiqələr laureatı Fəqan Həsənli müşayiət edib.
Qeyd edək ki, istedadlı şagirdlərin müəllimi musiqi məktəbinin direktoru, Əməkdar müəllim İlhamə Ağayevadır.
Siyavuş Kərimidən milli musiqimizə daha bir töhfə
Azərbaycan Milli Konservatoriyasında (AMK) Kamança festivalı başlayıb. “Şuşa İli” münasibətilə ölkəmizdə ilk dəfə gerçəkləşən festivalda peşəkar kamança ifaçıları iştirak edir.
Festivalın bədii rəhbəri AMK-nın rektoru, Xalq artisti, professor Siyavuş Kərimidir.
Festivalın ilk günündə təhsil ocağının böyük zalında tanınmış kamança ifaçıları – Xalq artisti Fəxrəddin Dadaşov, Əməkdar artistlər Toğrul Əsədullayev, İsmayıl Həmidov, Elnur Əhmədov, ifaçılar Toğrul Orucov, Oqtay Şərifovun çıxışları təqdim olunub.
Festival aprelin 28-dək davam edəcək.
Qeyd edək ki, AMK-da bundan əvvəl, “Şuşa İli” çərçivəsində Tar festivalı keçirilib.
“İçimdəki müharibəyə uduzur bütün zəfərlər” (Faiq Hüseynbəyli) - SW ekspertlərinin seçimi
Ədəbiyyatımızın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun müsabiqə mərhələsi artıq başa çatıb.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən və devizi “Sonda ədəbiyyat qalib gələcək” olan festivalda 30 finalçının adları bu gün açıqlanacaq.
Əsas favoritlərin adlarını da məlumdur: Fərid Hüseyn, Mehdi Dostəlizadə, Eminquey, Ulucay Akif, El Roman, İntiqam Yaşar, Ramil Əhməd, Cavid Zeynallı, Nargis İsmayılova, Tural Cəfərli, Bahəddin Salman, Ayxan Ayvaz, Orxan Həsəni, Aypara Ayxan, Ələsgər Əhməd, Ümid Nəccari, Murad Muradov, Rəvan Cavid, Nigar Arif, Ruslan Dost Əli, Faiq Hüseynbəyli və digərləri...
“Ədəbiyyat və incəsənət” portalı əsas favoritlərlə oxucularını tanış etməkdədir.
Faiq Hüseynbəyli
Hüseynbəyli Faiq Bilal oğlu 1983-cü il, dekabr ayının 20-də Cəlilabad rayonunun Alar kəndində anadan olub. 2004-cü ildən Azərbaycan Yazıçılar Birliyinin üzvüdür. Yaradıcılığına görə 2006-cı ildə “Gənclik, İdman və Turizm” nazirliyi tərəfindən “İlin ən yaxşı gənc şairi” kimi təltif olunub. 2007-ci ildə Prezident mükafatına layiq görülüb. Səkkiz poetik toplunun müəllifidir.
Faiq Hüseynbəyliyə çox rahatca peşəkar şair demək olar. Sözü cilalamaq, sözlə oynamaq, sözün nazını çəkmək, sözün qədrini bilmək onun şeirlərinin görünən tərəfləridir. Faiq Hüseynbəyli hər şeirində sözə bir abidə ucaldır sanki və deyir:
İlbəil yandıqca köz olur şair,
Hərf-hərf birləşib söz olur şair.
***
Bir səhər müharibəyə açıldı gözüm,
Gördüm, hər tərəfi
bürümüş vətən qoxusu.
Bir səhər müharibəyə açıldı gözüm,
Sən demə, qarışıb gecənin yuxusu,
Sən demə, qarışıb Gəncənin yuxusu.
Oyanıb otuz illik həsrətdən
Qocaman Murovdağ.
İlahi, möhtəşəmliyə bir bax!
Silkələnib, töküb üstündən yad izləri,
Şuşaya doğru səsləyir bizləri!
Səsləyir qədim abidələr -
Şuşa qalası,
Azıx mağarası,
Cıdır düzü.
Qaldığı yerdən boy atır
Xanın səsi, Vaqifin sözü.
Bir səhər müharibəyə açıldı gözüm,
Əmr verilib: - İrəli!
Üzülüb düşmənin
özgə ətəyindən əli.
Amma, lakin, ancaq,
dəyişməyib xisləti.
Atəşkəs istəyir müvəqqəti,
Aman diləyir,
girib heyvan cildinə çaqqallar,
Quzu kimi mələyir...
Döyüş meydanında dizini yerə atdı yağı,
Atəşə tutdu sivilləri, qız-gəlini, uşağı...
Məsum uşaqların ahı tutsun düşməni,
Xəbərlərə baxıb o ki var ağlamışam,
İçimdə bu əclaflığa qarşı
Bir ömürlük qisas hissi saxlamışam!
Daha sülh ola bilməz,
Axar sular durula bilməz!
Cənab Ali Baş Komandan,
Hörmətli zat ailləri,
Zəfər xəbərlərin xalqın ürəyinə su səpir,
Hərf-hərf, söz-söz, sətir-sətir.
Təşnə könüllərə məlhəmdi
Bütün çıxışların!
Rusiyadan, Fransadan eşidilir
Erməninin yalvarışları!
Bir səhər müharibəyə açıldı gözüm,
Bütün vücudumu bürüdü bu nida:
Qarabağ Azərbaycandır!
Günəş Ərgünəşdən doğdu bu yurda,
Əmr dəyişməyib: "İrəli!".
Qisas vaxtıdır,
Qana qan, cana candır!
Kəndbəkənd, oba-oba nəfəs alır,
Geri qayıdır torpaqlar
qarış-qarış, addım-addım...
Mənə zəfər verin,
Qələbə verin,
Azadlıq verin,
Bütün ağrılarımı-acılarımı unudum!
Ulu Babam, Dədəm Qorqud,
vaxt həmin vaxtdır,
An həmin andır -
Qarabağ Azərbaycandır!
***
İlbəil qocalır güzgülər,
Dərinləşir üzündəki cizgilər.
İlbəil qocalır yollar,
Enişdən yoxuşa ucalır yollar.
İlbəil quruyur ağaclar,
Qolsuz-budaqsız çürüyür ağaclar.
İlbəil əriyir sular,
Göylərə yeriyir sular.
Səmtini dəyişir çaylar,
Eyni fəslə dönür
Payızlar, qışlar,
Yazlar, yaylar.
İlbəil ayrılır o qız məndən,
Uzaqlaşır Günəş məndən,
Ay məndən, ulduz məndən.
İlbəil böyüyür qayğılar,
Bütün vücudumu bürüyür qayğılar.
İlbəil tanımır məni doğmalar, yadlar,
İlbəil süstləşir inadlar.
İlbəil çoxalır rəqəmlər,
İlbəil ömürdən çıxılır rəqəmlər.
Böyüyür addımlar, izlər,
Sükutun lal diliylə danışır sözlər.
İlbəil kar olur xəbərlər,
İçimdəki müharibəyə
uduzur bütün zəfərlər.
İlbəil uzaqlaşır hər şey adamdan,
Çıxmaq istəmirəm tənha odamdan.
İlbəil illər də azalır,
İlbəil bənizlər sozalır.
İlbəil yandıqca köz olur şair,
Hərf-hərf birləşib söz olur şair.
***
Salam, Tanrım mənim, salam, İlahi,
Mən gülü burnumda solan bəndənəm.
Çətin tanıyarsan bu qəmi, ahı,
Filankəsin oğlu filan bəndənəm.
Qarada itirdim bütün rəngləri,
O asan rəngləri, çətin rəngləri.
Atadan-anadan yetim rəngləri,
Həyat tablosuna salan bəndənəm.
Milçəklər qaynaşır söz pətəyində,
Nə kökündə dad var, nə kötəyində.
Həqiqət, azadlıq, haqq ətəyində,
Zühur namazını qılan bəndənəm.
Bəlkə də xitabım sənə xoş deyil,
Həmin adam deyil, vətəndaş deyil –
Heçdən yaratsan da, içim boş deyil,
Sən özün "Ol!" dedin, olan bəndənəm.
Çətin tanıyarsan... əyər tanısan,
Sən özün bu ruhun tərcümanısan.
Bütün şeirlərin qəhrəmanısan,
Min ildi qeydinə qalan bəndənəm.
Kimsə söz çeynəyir burda acından,
Qaçır ömrü boyu ehtiyacından...
Göstər ağ rəngini, tutum ucundan,
Mən yalan bəndənəm, yalan bəndənəm.
Sağ ol, Tanrım mənim, İlahim mənim,
Səndən öz payımı alan bəndənəm.
Sözün yorğunu
Yüyənə sığmayır dəli at kimi,
Ruha bax, dərənin-düzün yorğunu.
Min ildi Günəşdən nur içir əllər,
Min ildi ayaqlar izin yorğunu.
Həyat bir oyundu, yarışdan keçər,
Sevgidən, sevdadan, barışdan keçər.
Alın yazıları qırışdan keçər,
Alın yazıları... üzün yorğunu.
Tanrı, gəl sahib çıx bu ruha, cana,
Bir addım yaxın ol qulun insana.
Gündüzlər atadır, gecələr ana,
Oğulun yorğunu, qızın yorğunu.
Şimşəklər oynaşır qayada, dağda,
Rənglər yoxa çıxır qarada, ağda...
Qopmasın kökündən bircə budaq da,
Sən özün hifz elə, özün, yorğunu.
Ulayır səbrimi kəsən küləklər,
Torpaqdan, dənizdən küsən küləklər.
Bu yağan yağışlar, əsən küləklər,
Yar gələn yollarda tozun yorğunu.
Tanrı, sirlərini açan bəndəyəm,
Mən haçan Tanrıyam, haçan bəndəyəm?
Sözlə qanadlanıb uçan bəndəyəm,
Sözün yorğunuyam, sözün yorğunu.
Anons: Beynəlxalq Silkway ədəbiyyat festivalının Azərbaycan turunun müsabiqə mərhələsinin yekun siyahısı saat 16.00-da açıqlanacaq.
Anons: Beynəlxalq Silkway ədəbiyyat festivalının Azərbaycan turunun müsabiqə mərhələsinin yekun siyahısı saat 16.00-da açıqlanacaq.
30 xoşbəxt iştirakçı kimdir? Onlarla tanış olacaqsınız.
