Super User
Napoleon Hillə görə uğurun 13 sirri hansılardır?
Professor Əlibala Məhərrəmzadə “Ədəbiyyat və incəsənət” portalının oxucuları üçün “Ev tapşırığı: Uğur düsturunu tapacağıq” layihəsini təqdim edir. Uğur şərtləri barədə danışmaqda davam edirik.
Napoleon Hillə görə uğurun 13 sirri
Vədimə əməl edərək Napoleon Hillin «Düşün və varlan» kitabından kifayət qədər mükəmməl təlim hesab edilən «Uğur qazanmağın və varlanmağın 13 prinsipi»ni oxucularıma təqdim edirəm:
1.Arzu və məqsəd.
Bu, bütün kapitalların qazanılmasının istinad nöqtəsidir. Əgər nəyisə güclü şəkildə arzulamasan, ona doğru gedə bilməyəcəksən.
Siz pul qazanmaq istəyirsiniz? Onda bu məsləhətlər sizə kömək edəcək:
- İlk öncə qərar verin ki, hansı məbləğ sizi qane edir. «Mən çox pul istəyirəm» kəlamı sizə kömək etməyəcək. Rəqəm çox vacibdir.
- Özünüzə düzünü deyin, varlı olanda nədən imtina edəcəksiniz.
- Qrarlaşdırın, bu pulu hansı müddətə kimi əldə edəcəksiniz.
- Var-dövlətə doğru necə addımlayacağınız barədə konkret plan hazırlayın.
- Öncə söylənilənlərin hamısını – sizə nə qədər pul lazımdır, nədən imtina edəcəksiniz, hansı müddətə pulları qazanacaqsınız, məqsədinizə görə hansı plan üzrə addımlayacaqsınız, bunların hamısını yazın.
- Hər gecə yatmamışdan öncə planınızı ucadan oxuyun! Hiss edin və inanın ki, həmin pulları artıq qazanmısınız.
2. İnam.
Siz arzularınızın reallaşacağına nə qədər çox inansanız onları daha rahat reallaşdıra biləcəksiniz.
3.Özünətəlqinetmə.
Özüntəlqinetmə hisslər vasitəsilə şüurun oyanmasıdır. Bu, bir növ, özlüyündə şüurla təftəlşüurun əlaqəsini idarə edən mərkəz funksiyasını daşıyır. Yəni, özünətəlqinetmənin köməyi ilə fərd öz istəyi ilə arzuolunan fikirləri şüurundan təftəlşüuruna ötürə bilir.
Öz arzularını möhkəm şəkildə gündə heç olmasa 2 dəfə təkrarlamaq həmin arzuların təftəlşüurda möhkəmlənməsinə imkan yaradır.
4. Xüsusi bilgilər.
Sizin dəqiq və qısa planınız olmalıdır ki, bu plan vasitəsilə öz məqsədinizə doğru gedə biləsiniz. Və addımlarınızı da bu plan uzrə atmalısınız.
Və mütləq də, sizə pul gətirəcək iş barədə həddən artıq məlumatlı olmalısınız. Təsadüfi deyil ki, belə bir deyim var, «informasiyalıdır, deməli silahlıdır».
5. Xəyal qurmaq.
Albert Eynşteyn deyib: «Xəyal qurmaq – hər şeydir. Bu, qarşıdakı hadisələrin nümayişidir». Bütün böyük rəssamlar, musiqiçilər, ədiblər, biznes adamları öz xəyallarında özlərini dahi obrazda görüblər. Arzulamaq zərərli deyil, əksinə, faydalıdır. Hər bir var-dövlət fkirdən yaranır, fikirlər isə xəyala söykənirlər. Xəyallar insanın məqsəd enerjisidir. Xəyal qura bilməmək bir çox uğursuzluğun əsas səbəbidir.
6. Planlaşdırma.
Başa düşməlisiniz ki, siz, sizinçün olduqca böyük əhəmiyyət daşıyan bir işlə məşğulsunuz. Və buna görə də mütləq şəkildə sizin hərəkət planınız olmalıdır. Arzu olunur ki, bu plan addımbaaddım hesablanmış plan olsun. Təbii ki, siz təkbaşına hər şeyi bilmədiyinizdən, planı da tək hazırlaya bilməzsiniz. Odur ki, sizdən üstün başqa insanların təhsilini, təcrübəsini, bacarığını, xüsusiyyətlərini mütləq öz işinizə cəlb etməlisiniz.
7. Qərar.
Liderlər öz qərarlarını dərhal və yaxud çox gec vermələrindən asılı olmayaraq heç zaman dəyişmirlər. Odur ki, qərar qəbul edəndə «amma»sız qərar qəbul edin!
8. İnadkarlıq.
Mütləq inadkar olmalısınız. Məqsədi reallaşdırmaq üçün inadkarlıq çox vacib faktordur. İradənin gücü, fundamenti inadkarlıqdan ibarətdir.
Özündə inadkarlıq xüsusiyyəti yetişdirmək üçün sizə heç də böyük beyin, Oksford təhsili və olduqca böyük zaman da lazım deyil, bunun fərqinə varın.
9. Beyin mərkəzi.
Siz heç vaxt hər şeyi bilə bilməzsiniz, ona görə də sizə lazım olan informasiyanı bilən insanlar sizə çox vacibdir. Bu, sizin həm də kreativ ideyalarla təchiz olunmanıza bir vasitədir.
İnsan ağlı özlüyündə ruhi enerji formasındadır. İki intellektin işi harmonik şəkildə koordinə olunursa, onda bu iş onların psixiki enerjisinin vəhdəti fazasına daxil olur. Beyin mərkəzinin iş prinsipinin psixiki aspekti də məhz bundan ibarətdir.
10. Seksual istəklərin transferi.
Sirr deyil ki, seks – ən güclü insan arzusudur. Mütləq bu arzunu digər produktiv fəaliyyətə transfer etmək lazımdır. Seksual enerjini dəyişdirib öz məqsədinə çatmana yönəltmək vacib şərtdir. Kreativlik, cəsarət, qətiyyət – bütün bu xüsusiyyətlər bizdə həm sekslə məşğul olanda olur, həm də bir şeyi şiddətlə arzulayanda. Pul toplamaq, böyük kapitala malik olmaq – bax bu, bizim ən şiddətli arzularımızın əsas obyektidir.
11. Təftəlşüur.
Bu 11-ci addım birbaşa 3-cü addım ilə bağlıdır. Dünyada hər il daha çox insan bu addımdan istifadə edir. Öz şüuruna və təftəlşüuruna nəzarət edə bilmək çox vacibdir və olduqca vacibdir ki, pozitiv düşünəsən, özünü yaxşı şeylərə proqramlaşdırasan.
Təftəlşüur şüurun əsasında fəaliyyət göstərir. Yəni ki, şüurumuz səviyyəsinə yüksəlmiş fikir orada qeyd edilməklə, fiksə edilməklə təftəlşüura yazılır. Şüurumuzda isə hər bir fikir yox, yalnız ən dominant fikirlər qeyd edilə bilir.
Təftəlşüur həmişə hərəkətdədir. Əgər siz onu pozitiv fikirlərlə yükləmirsinizsə, onda o, mütləq özünə neqativləri toplayacaq, bunlar da sonradan sizinçün baş ağrısına çevriləcək.
Mexanizm bax bu cür sadədir.
12. Beyin.
Beyin on trillion xırda hüceyrədən ibarətdir ki, bunların da hamısı sizə uğur qazanmaq, pul əldə etmək üçün xidmət etməlidir. Ona görə də, beyini səmərəli və effektiv işlətməyi bacarmaq lazımdır.
Nə qədər ki, sənin beynin anlayır və inanır, sən hər şeyə çata biləcəksən!
13. Altıncı hissiyyat.
Bu, özünə inanmağın çox unikal imkanıdır. Çox vaxt olur ki, beyninizə çox gözəl bir fikir, ideya gəlir, ancaq bir saniyə sonra siz onu unudursunuz. Amma «altıncı hissiyyat» bax bu fikirləri, ideyaları yadda saxlayıb sonradan həyata keçirməyə imkan yaradır.
“Ədəbiyyat və incəsənət”
(22.05.2023)
Türkiyənin tanınmış müğənnisi Çelik Bakıda konsert verəcək
İyunun 10-da Heydər Əliyev Sarayında Türkiyənin sevilən müğənnisi Çelikin konserti təşkil olunacaq.
İndiyədək iyirmidən çox albom müəllifi olan və ifaları ilə milyonların qəlbini fəth edən müğənni öz repertuarında olan mahnılarla pərəstişkarları qarşısında çıxış edəcək.
Biletləri iTicket.az saytı və şəhərin kassalarından əldə etmək mümkündür.
“Ədəbiyyat və incəsənət”
(22.05.2023)
Əcnəbilərin Bakıdakı konsertinə münasibət: Vəsait çatışmazlığı, hörmətsizlik, yoxsa zövqsüzlük?
Azərbaycana son zamanlar xarici ölkələrdən konsert vermək üçün gələn müğənnilərin sayı artıb. Konsertlərin ardı-arası kəsilmir. Bunu səbirsizliklə gözləyənlərlə yanaşı, etiraz edənlər də var. Hətta yerli müğənnilərin solo konsert verməməyindən şikayətlənənlər də var.
Bəs görəsən, xarici müğənnilərin konsertinə tələbatın çoxluğu nə ilə əlaqəlidir? Azərbaycanlı müğənnilərin buna münasibətləri necədir?
Mövzu ilə bağlı Oxu.Az-ın əməkdaşı azərbaycanlı müğənnilər arasında sorğu keçirib.
Əməkdar artist Cavanşir Məmmədov sənət adamlarına hörmət edilmədiyindən şikayətlənib:
“Öz sənətçilərimizə qoyduqları hörmət göz önündədir. Ümumiyyətlə sənətkarlara qiymət verilmir”.
C.Məmmədov ötən günlərdə ölüm xəbərinin yayıldığını da dilə gətirib:
“Xəcalət çəksinlər. Mənim ölüm xəbərimi də yazmışdılar. Yazanlar cəzalarını alacaqlar”.
Müğənni Mətanət Əsədova konsert vermək üçün gələnlərin canlı ifa oxuya bilmədiklərini deyib:
“Kənardan gələn şirin olur. Ancaq bunu deyə bilərəm. Xaricilərə ödənilən pulun yarısını mənə versələr, 3 saat canlı oxuyaram. Onlar canlı oxumurlar. Oxuya da bilmirlər. Vəsait versinlər, 3 saat canlı oxuyum. Mənim vəsaitim olmadığı üçün konsert verə bilmirəm”.
M.Əsədova qeyd edib ki, xalqımızın musiqi zövqü korlanıb:
“Millətin musiqi zövqü korlanıb. Sənətkarlarımızı unudurlar”.
Müğənni Elnarə Xəlilova konsert biznesinin sırf təşkilatçılarla bağlı olduğunu söyləyib:
“Təşkilatçı sponsor tapır, konserti təşkil edir və ifaçını dəvət edir. İfaçıdan yalnız qonorarın nə qədər olacağı, audio, video və məişət rayderi öyrənilir və konsert təşkil edilir. İfaçı da, təşkilatçı da qazanır. Bizim təşkilatçıların yalnız bir qorxusu ola bilər. O da bilet sata bilməmə qorxusudur. Xarici ifaçıların biletlərinin yüz faiz satılacağından əmindirlər. Çünki bizim tamaşaçı xarici ifaçıları nə toyda, nə də restoranda görmür. Ancaq nə qədər ki, Azərbaycan ifaçıları toylarda və restoranlarda ifa edəcəklər, bir o qədər də onların konsertini təşkil etmək bilet satışı baxımından çətinləşəcək”.
Xalq artisti Mənsum İbrahimov normal münasibət bəslədiyini deyib:
“Mənim münasibətim normaldır. Çünki dünya artıq kiçik deyil. İstər biz gedib xarici ölkədə çıxış edək, istərsə də onlar gəlsinlər. Tələbat olduğu üçün onlar gəlirlər. Daha çox qardaş Türkiyədən gəlirlər. Bu da bizim türk musiqisinə olan yaxınlığımızla bağlıdır. Normaldır”.
M.İbrahimov yerli müğənnilərin ölkəmizdə konsert verməyə meyilli olmadığını qeyd edib:
“Musiqi inteqrasiyadır. Onlar gəlib buradan nəsə öyrənirlər. Bizimkilər də gedib öyrənirlər. Mən də tez-tez gedirəm. Müğənnilər burada konsert verməyə meyilli deyillər. Çünki xeyir görmürlər. O baxımdan xaricə gedirlər”.
2014-cü ildə “Start a fire” mahnısı ilə Danimarkada ölkəmizi “Avroviziya” mahnı müsabiqəsində təmsil edən estrada müğənnisi Dilarə Kazımova qeyd edib ki, tamaşaçılar yerli sənətçiləri sevsələr, çox yaxşı olar:
“Əslində bu barədə heç bir fikrim yoxdur. Bu barədə heç düşünməmişəm. Amma konsertlər varsa, insanlar gedirlərsə, konsert zalları dolursa, niyə də olmasın?! İnsanlar sevdiyi üçün gəlirlər. Amma yaxşı olardı ki, bizimkilər də tez-tez konsert versin. Kaş bizi də sevərdilər. Bizi də sevsəydilər, yaxşı olardı”.
“Ədəbiyyat və incəsənət”
(22.05.2023)
“I Bakı Müasir Musiqi Günləri” festivalına start verilib
Ötən gün Elm və Təhsil Nazirliyi və Mədəniyyət Nazirliyinin dəstəyi ilə “I Bakı Müasir Musiqi Günləri” festivalına start verilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, beş gün davam edəcək festivalın əsas məqsədi müasir Azərbaycan bəstəkarları ilə Avropa və Amerikan bəstəkarlıq məktəbləri arasında qarşılıqlı əlaqələr mövzusunu işıqlandırmaqdır.
Festivalda yerli musiqiçilərlə yanaşı, İsveçrə, Macarıstan, Almaniya, Fransa, Rusiya və Qazaxıstandan dəvət olunmuş ifaçıların da iştirakı nəzərdə tutulur. Dəvətli ifaçılar sırasında Avital Cohen (fleyta), Daniel Veissberq (bəstəkar), Szilard Benes (klarnet), Qleb Xoxlov (violin), Aleksandr Xubeyev (bəstəkar), Yulia Miqunova (violonçel), Andrey Yurgenson (klarnet) da var.
Eyni zamanda tanınmış macar bəstəkar György Ligetinin (1923-2006) 100 illiyinə təsadüf edən festivalın proqramı ölkəmizdə ilk dəfə ifa olunacaq və dünya musiqi ədəbiyyatı üçün vacib hesab edilən əsərlərlə zəngindir. Musiqisevərlər G.Ligeti, G.Scelsi, K.Stockhausen, M.Feldman, B.Furrer, S.Qəni, P.Dusapin, H.Holliger, J.Cage, T.İbişov, A.Sısoyev, T.Qasımzadə, D.Veissberq, A.Qəmbərli kimi bəstəkarların əsərlərini dinləmək imkanı qazanacaqlar.
“I Bakı Müasir Musiqi Günləri” Azərbaycanda konsert-ifaçılıq fəaliyyətindən əlavə, müasir musiqi maarifçiliyi və təhsilinə hesablanmış festivaldır. Layihə çərçivəsində ustad dərsləri, məşğələlər, mühazirələr də təşkil olunacaq.
Festivalın açılış konserti Beynəlxalq Muğam Mərkəzində gerçəkləşib. Müasir musiqi layihəsi Nizami Kino Mərkəzində “Ligeti: portret” filminin nümayişi (25 may, 19:00) ilə başa çatacaq.
Layihə haqqında daha ətraflı məlumat almaq üçün festivalın rəsmi saytına (www.baku-contemporary-music-days.com) keçid etmək, eləcə də sosial şəbəkələrdə (facebook: facebook.com/profile.php?id=100091963675094, instagram: https://www.instagram.com/baku_music_society/) izləmək mümkündür.
Aşılış mərasimi barədə daha geniş - növbəti buraxılışlarımızda.
“Ədəbiyyat və incəsənət”
(22.05.2023)
IV Sevil Beynəlxalq Qadın Sənədli Film Festivalına film qəbulu davam edir
IV Sevil Beynəlxalq Qadın Sənədli Film Festivalının keçiriləcəyi tarix məlum olub. Eyni anda Bakı, Şəki, Lənkəran şəhərlərində təşkil olunacaq festival sentyabrın 15-dən 22-dək keçiriləcək.
Festivala film qəbulu davam edir. Belə ki, xarici rejissorlar üçün film qəbulu yekunlaşsa da, yerli rejissorların müəllifi olduqları filmlər iyunun 30-dək “FilmFreeway” platforması vasitəsilə qəbul edilir.
Seçki komissiyası tərəfindən seçiləcək filmlər festivalın müsabiqə mərhələsində iştirak haqqı qazanacaq. Qaliblər festivalın bağlanış mərasimində elan ediləcək.
Qeyd edək ki, “Sevilfest”in 2022-ci il proqramı çərçivəsində Almaniyanın “goEast” film festivalı ilə əməkdaşlığı nəticəsində festivalın ötənilki qalibi “goEast” festivalı nəzdində keçirilən “East-West Talent Lab”da iştirak haqqı qazanıb. Festivalın bu ilki yerli qalibini də xüsusi mükafat gözləyir.
Adını Cəfər Cabbarlının “Sevil” pyesindən götürmüş Sevil Beynəlxalq Qadın Sənədli Film Festivalı 2020-ci ilin sentyabrında fəaliyyətə başlayıb. Festival müstəqil yerli sənədli film sahəsinin inkişafına töhfə vermək, sənədli film üzrə yerli və xarici peşəkarlar arasında təcrübə mübadiləsi üçün platforma yaratmaq, yeni yerli sənədli filmlərin, eləcə də beynəlxalq müştərək məhsulların yaradılmasını təşviq etmək, eyni zamanda, sənədli filmlər vasitəsilə gender məsələlərinə diqqət çəkmək məqsədilə yaradılıb.
“Ədəbiyyat və incəsənət”
(22.05.2023)
Kukla Teatrı “Gəzən teatr” silsiləsini davam etdirir
Azərbaycan Dövlət Kukla Teatrı növbəti maraqlı aksiyasını uğurla davam etdirir. Sənət ocağı peşəkar Azərbaycan milli teatrının 150 və teatrın nəzdindəki “Oyuq” teatr-studiyasının 10 illiyi münasibətilə başladığı ölkə miqyaslı qastrollarının yeni mərhələsini - “Gəzən teatr” silsiləsini davam etdirir.
Bu barədə teatr rəsmiləri mətbuata açıqlama veriliblər. Açıqlamada deyilir:
“Ümumilikdə respublikanın müxtəlif şəhər, rayon, qəsəbə və kəndlərini əhatə edən “Kukla teatrı eldən-elə” şüarlı aksiyanın məqsədi yerlədə yaşayan uşaqlarda kukla tamaşaları haqqında təsəvvür yaratmaq, onların zövqünün formalaşmasına kömək etmək, həmçinin oradakı teatr sənəti təmsilçiləri, həvəskar dram dərnəkləri və xalq teatrları ilə yaradıcılıq əlaqələri qurmaqla onlara dəstək verməkdir. Bu il mart ayının 10-da – Milli Teatr Günündə işğaldan azad olunmuş Zəngilan rayonunun Ağalı kəndində başlayıb mayın 6-da Tərtər rayonunun Talış kəndində davam edən aksiya ilin sonunadək ümumilikdə 10 rayonu əhatə edəcək. Layihənin növbəti dayanacağı kimi Quba və Şabran rayonları seçilib. İyunda reallaşacaq səfərdə kuklaçılar hər iki rayonun Mədəniyyət mərkəzi səhnələrində tamaşa, ardınca isə “Oyuq”çuların təqdimatında dolğun konsert proqramı ilə çıxış edəcəklər”.
“Ədəbiyyat və incəsənət”
(22.05.2023)
“Azərbaycanfilm”in direktoru Kazanda kinematoqrafiya sahəsində beynəlxalq layihələrin perspektivlərindən danışıb
Rusiya və Tatarıstan mədəniyyət nazirliklərinin təşkilatçılığı ilə Kazan şəhərində “Bölgənin iqtisadi inkişafinda kino istehsalının rolu” adlı tədbir keçirilib.
“Azərbaycanfilm” kinostudiyasının mətbuat xidmətinin yaydığı məlumata görə, tədbirdə Cəfər Cabbarlı adına “Azərbaycanfilm” kinostudiyasının direktoru Nazim Hüseynov da iştirak edib.
Tədbirin təşkil olunmasında məqsəd bölgənin iqtisadi inkişafının əsas faktoru kimi milli kino istehsalının inkişaf strategiyalarının müəyyən edilməsi və bu istiqamətdə müzakirələrin aparılmasıdır.
Tədbirdə Nazim Hüseynov çıxış edərək kinematoqrafiya sahəsində beynəlxalq layihələrin perspektivlərindən danışıb, həmçinin milli kino sənayesinin köməyi ilə yaranan ənənələrin regionun inkişafındakı rolunu diqqətə çatdırıb.
Tədbirdə eyni zamanda Belarus, Qazaxıstan, Qırğızıstan, Hindistandan, Rusiya və digər ölkələrin kino xadimləri də iştirak ediblər.
“Ədəbiyyat və incəsənət”
(22.05.2023)
Sual-cavab: AYB-nin İdarə Heyətində kimlər var?
Hörmətli redaksiya. Azərbaycan Yazıçılar Birliyinin İdarə Heyətində təmsil olunan yazıçıların siyahısında kimlərin olması bizlər üçün çox maraqlıdır. Mümkünsə siyahını təqdim edərdiniz.
Hörmətlə: Zakir Bünyadov, Sumqayıt şəhəri.
Bu sualın cavabı təbii ki, tək oxucumuz Zakir Bünyadovu deyil, çoxlarını maraqlandırır. Sualı cavablandırması üçün “Ədəbiyyat və incəsənət” portalı AYB-nin mətbuat katibi Xəyal Rzaya müraciət edib. Xəyal Rza AYB-nin İdarə Heyətində və Təftiş Komissiyasında təmsil olunanları diqqətinizə çatdırır:
İDARƏ HEYƏTİ
Aqil Abbas
Azad Yaşar
Azər Mustafazadə
Azər Turan
Baba Vəziroğlu
Bəsti Əlibəyli
Cavanşir Yusifli
Çingiz Əlioğlu
Dəyanət Osmanlı
Elçin Mirzəbəyli
Elmar Şeyxzadə
Əsəd Cahangir
Elxan Zal
Eyvaz Borçalı
Əli Əmirli
Əkbər Qoşalı
Elşad Barat
Fəxri Uğurlu
Firuzə Məmmədli
Gülxani Pənah
Hamlet İsaxanlı
Hidayət
Hüseynbala Mirələmov
Xanəmir
Xəyal Rza
İntiqam Qasımzadə
Jalə Əliyeva
Qulu Ağsəs
Məqsəd Nur
Məmməd Oruc
Musa Urud
Mübariz Cəfərli
Nigar Həsənzadə
Ofelya Babayeva
Paşa Qəlbinur
Pərvin Nurəliyeva
Rahid Ulusel
Rafiq Həşimov
Rüstəm Behrudi
Rüstəm Kamal
Sayman Aruz
Seyran Səxavət
Solmaz İbrahimova
Sona Xəyal
Şirindil Alışanlı
Tofiq Məlikli
Vaqif Bayatlı
Vaqif Bəhmənli
Vaqif Əlixanlı
Vaqif Yusifli
Varis
Vidadi Babanlı
Vilayət Quliyev
Yunus Oğuz
Yusif Həsənbəy
Zahid Xəlil
TƏFTİŞ KOMİSSİYASI
Qəzənfər Paşayev
Aydın Tağıyev
Arif Buzovnalı
Dayandur Sevgin
Elnarə Akimova
Əlizadə Nuri
İsmayıl İmanzadə
Maarif Soltan
Mətanət Vahid
Oqtay Şamil
Südabə Əsədullayeva
Südabə Sərvi
Şəlalə Həsənova
Telman Vəlixanlı
Vaqif Aslan
“Ədəbiyyat və incəsənət”
(22.05.2023)
“Könlüm güman içindədir…” - Ələddin İncəli
Qazax həm yazarlar oylağıdır, üstəlik, həm də uzunömürlü yazarlar oylağıdır. Vidadi Babanlı 96-nı, Nəriman Həsənzadə 94-ü yola salıb 100-ə doğru yürüyürlər. Çox təəssüf ki, onlarla daban-daban gələn Ələddin İncəli haqq dünyasına qovuşdu. Bu həftəsonu ustad şairin anadan olmasının 92-ci ildönümünü yaxınları və şeirsevərlər yenə də onsuz qeyd etdilər.
“Ədəbiyyat və incəsənət” portalı şair, publisist, jurnalist, Azərbaycan Yazıçılar Birliyinin üzvü, müxtəlif illərdə " Əməkdə fərqlənməyə görə", " Rəşadətli əməyə görə", "Əmək veteranı" medalları ilə təltif olunmuş Ələddin İncəlinin şeirıərini diqqətinizə çatdırır.
İÇİNDƏDİ
Dərə keçib, dağ aşıram,
Dağlar duman içindədir.
Mən könlümlə danışıram,
Könlüm güman içindədi.
Dağlar-dağın qoynundadı,
Gül-yarpağın qoynundadı,
Zər-torpağın qoynundadı
Yaxşı-yaman içindədi.
Nə gur seləm, nə gurşadam,
Nə şagirdəm, nə ustadam,
Hələ naşı bir səyyadam,
Oxum kaman içindədi.
Gah yad oldum dərdə-qəmə,
Gah da endim zildən bəmə,
"Ay İncəli, çox yaz" - demə,
Söz də zaman içindədi.
QƏLƏMDƏN ÖPƏRƏM
Əgər təmizdisə, boyasızdısa,
Üzündən öpərəm buxaq qarışıq.
Məsun baxışların riyasızdısa,
Gözündən öpərəm yanaq qarışıq.
Alqış almısansa, elindən, gözəl,
Xəta çıxmayıbsa, əlindən, gözəl,
İnciyən yoxdusa, dilindən, gözəl,
Dilindən öpərəm dodaq qarışıq.
Sürüşdür çiyninə, gülüm, şalını,
Barı aydın görək gül camalını,
Telərin örtməsə qara xalını,
Telindən öpərəm daraq qarışıq.
Ələddin gəncləşib yenidən coşsa.
Qəlbinin sevdası qaynayıb daşsa.
Hüsnünə yaraşan bir şeir qoşsa,
Qələmdən öpərəm varaq qarışıq.
CEYRANI
Vurğun kimi sevsən, məha eləməzsən,
Sözlə gətirərsən yola ceyranı.
Bir az uzaqlaşsa, səhv eləməzsən-
Bənzətsən üfüqdə xala ceyranı.
Yanı gah balalı, gah təkəlidi,
Qorxaqdı, hürkəkdi, səksəkəlidi,
Gözəllik özü də təhlükəlidi,
Odur ki, tez tapır bəla ceyranı.
Sən mahir ovçusan, maşından əl çək,
İnsafsız, motorla birdimi ürək?!
Kişisən, piyada düzə çıx, görək,
Qovmaqla tuturmu tula ceyranı.
Səyyad, bir şiş kabab can verməz sana,
O zərif xilqəti bir an duysana,
Ayaq saxlayır ki, yormasın ana
Dalınca tövşüyən bala ceyranı.
Yoxsa, elə uçar, süzgün ox olar,
Bir göz qırpımında qaçıb yox olar,
Nəfsi cilovlasaq-artar, çoxalar,
Görərik gözləri ala ceyranı.
Eşit, ay ocağın-közün sahibi,
Nə deyər Ələddin-sözün sahibi,
Muğan düzü kimi düzün sahibi,
Məgər istəməzmi ola ceyranı?!
BİLMƏDİM
Yarım köçən gündən bəri
Gülə bilmədim - bilmədim!
Aramsız axan yaşımı
Silə bilmədim-bilmədim!
Yaşamaq olarmış yarsız,
Yaşayırsan ixtiyarsız!..
Yaşadım da arsız-arsız,
Ölə bilmədim-bilmədim!
Açsan ömür kitabımı,
Görərsən dərdə tabımı.
Fələklə haqq-həsabımı
Bölə bilmədim-bilmədim!
Rast oldum çox nanəcibə,
Acgözə, paxıla, bicə!..
Onlarla "ortaq məxrəcə"
Gələ bilmədim-bilmədim!
Qayğılar qatdı başımı,
Düşünüb çatdım qaşımı!
Necə yaşadım yaşımı.
Bilə bilmədim-bilmədim!
Bəxtin oxu dəydi daşa!.
Azmı-çoxmu qalıb qışa,
Yetişibmi ömür başa?
Hələ bilmədim-bilmədim!
İncəli pirmi-ocaqmı?
Yaddaşlarda qalacaqmı,
Öz haqqını alacaqmı?
Lələ, bilmədim-bilmədim!
GÖNDƏR
Tanrım, ərzə nə davakar,
Nə cığal bəndələr göndər.
Nə lovğa, nə təkəbbürlü,
Nə dağal bəndələr göndər.
Nə "dünya mənimdi" - deyən,
Nə kasıb-kusubu döyən,
Nə zəhmət çəkməyib yeyən,
Nə kahal bəndələr göndər.
Görməyək tələ-torları,
Görməyək qəlbi korları.
Yer tutmur haramxorları,
Pak, halal bəndələr göndər.
Bir də yonmağa codları
Kəsərli rəndələr göndər.
BƏXTƏVƏR
Zəhmət çəkib, zəhmətinin haqqını
Alan varsa - bəxtəvərdi, bəxtəvət.
Mayasına heç vaxt haram qatmayan
Kalan varsa - bəxtəvərdi, bəxtəvər.
Nə qədər ki, gəlib-gedir nəfəsin,
Olaydı kaş yaşamağa həvəsin.
Üzündə nur, dodağında təbəssüm
Plan varsa - bəxtəvərdi, bəxtəvər.
İncəli, çək sən də sözün nazını,
Atma hələ qələmini, yazını.
Ulu Qorqud dədəmizin sazını
Çalan varsa - bəxtəvərdi, bəxtəvər.
BƏNÖVŞƏNİ
Bəlkə ölüb getdim, yazı görmədim,
Gülüm, o dağlardan dər bənövşəni.
Nazik əllərinlə seçib-oxşayıb
Qəbrimin üstünə sər bənövşəni.
Bəlkə incə ruhum xoşahal ola,
Bəlkə yaman dillər susa, lal ola.
O güllər üç rəngdə: ağ, göy, al ola,
De, şair sevməzmi hər bənövşəni.
Gərdiş dövranımı devirdi, deynən,
Vurub iqbalımı çevirdi - deynən.
Əllədin İncəli sevirdi - deynən,
Şehli bənövşəni, tər bənövşəni.
ONUNLA GETDİ
Səmada bir ulduz parlayıb söndü,
Gözəl Məlahətim onunla getdi.
Elə bil taleyim tərsinə döndü,
Bəxtim, səadətim onunla getdi.
Yarım məndən ötrü nur - işığıydı,
Gülün səhəriydi, gur işığıydı.
Bu şair ömrümə yaraşığıydı,
Şerim, şeriyyətim onunla getdi.
Ələddin İncəli, desən qürurum,
Şeirdə uğurum, işdə uğurum,
Qolumda qüvvətim, gözümdə nurum,
Dizimdən taqətim onunla getdi.
“Ədəbiyyat və incəsənət”
(22.05.2023)
“Ömür kitabı”nı yazanın ömrünün 77-ci baharı münasibətilə
Həftəsonu Xalq şairi, Respublikanın Müstəqillik Aktının müəlliflərindən biri, Millət vəkili Sabir Rüstəmxanlının doğum günü idi, 77 yaşı tamam oldu. Bu münasibətlə “Ədəbiyyat və incəsənət” portalı Tapdıq Əlibəylinin təbrik məqaləsini diqqətinizə çatdırır.
Ziyalı məslək-məramı Vətən sevgisindən yoğrulmuş istiqlal şairi, xalqın mənəvi aləminin tərcümanı məqamında olan Ustad, dünyaya təşrif buyurduğunuz gün, ömür təqviminizin yeni ili mübarək!
İllər öncə, gənclik çağında qələmə aldığınız “Yardımlı yollarında” adlı şerin son bəndində bir arzu olaraq yazmısınız:
Min illik palıdlardan bir ömür borc alaydım,
Kecilməz dərələrə özüm körpü olaydım,
Buz sulu, saf aynalı bulaq olub qalaydım
Yardımlı yollarında.
İllər keçdi və Sabir Rüstəmxanlı fikir daşıyıcısı, SÖZ ADAMI olaraq kecilməz dərələrə körpü, buz sulu, saf aynalı bulaq olaraq təkcə Yardımlı yollarında deyil, Quzeyli-Güneyli Azərbaycanın, böyük Türk dünyasının körpüsünə döndü.
Öz təbirinizcə desəm: "Rüstəmxanlı şəlaləsi" yenə gur və ilhamlıdır..."
Mənsə bu gur və ilhamlı şəlalədən vəcdə gəlib sozə üz tutdum:
Ulutürkün həvaləsi,
Əsrlərin yaddaş səsi,
Bir şairin “əfsanəsi”
Rüstəmxanlı şəlaləsi.
Sanki göydən siyrilərək...
Sözlə süslü, şövqlü ürək,
Sabir bəyin ilhamı tək
Rüstəmxanlı şəlaləsi.
Yardımlının sədasıdır,
Ərənlərin sevdasıdır...
Sabir bəyin təb-səsidir
Rüstəmxanlı şəlaləsi.
AYB-nin fəxri üzvü, Almaniyada yaşayan tanınmış yazar və qəzetçi Orxan Aras haqlı olaraq yazır: “...O çətinliklər, o qaçhaqaçlar, o əməklər boşa getmədi. İki il sonra ikimizin də röyaları gerçək oldu və onun Türk və Altayların gülü, çiçəyi qoxan şeirləri ilə Azərbaycanın igid övladlarının cəsarəti birləşdi və Azərbaycan müstəqilliyini qanıyla qazandı. O istiqlalın isbatı bəyannamənin altında da Sabirin qələminin izi vardı.
Parisdə 1789-cu il Fransız Çevrilişi üçün bir güllə atanın belə, bir yerlərdə ismi və ya heykəli vardır. Amma qələmiylə, şeiriylə, cəsarətiylə Azərbaycanın müstəqilliyinə imza atan Sabir Rüstəmxanlının Azərbaycanda bir heykəli yoxdur. Amma onun heykəli Asiyanın ən uzaq və soyuq guşəsindən Avropanın ən soyuq bölgəsinə qədər bütün türklərin ürəyində vardır.”
Yol gedənindir, deyib müdriklər... Sözün işığında ustad yolunuza rəğmən yazıram:
"Tanımaq istəsən" - şair xitabı,
"Xəbər gözləyirəm" - əsrlər tabı,
"Qan yaddaşı"na yol -"Ömür kitabı"...
Şair, söz ünvanlı yoluna alqış!
"Salam, ana dilim", "Sevgim, sevincim"!
"Atamın ruhu"dur özüm, söz incim.
"Ol"dan üzü bəri hikmətim, gücüm...
Şair, şeir deyən dilinə alqış!
"Bütövlük həsrəti" - "Xətai yurdu",
"Gəncə qapısı"nın ruhu da yoldu.
"Dərdə əyilmə"yən yolları yordu...
Şair, qələm tutan əlinə alqış!
"Göy tanrı" ruhunda "Əbədi sevda",
"Zaman məndən keçir"- gələn hurr səda...
"Bu sənin xalqındir", işıq var soyda,
Şair, ər-ərənli eline alqış!
Şair, söz ünvanlı yoluna alqış!
Şair, şeir deyən dilinə alqış!
Şair, qələm tutan əlinə alqış!
Sabir Rüstəmxanlı, elinə alqış!
“Ədəbiyyat və incəsənət”
(22.05.2023)
