“Sənə inanıram” teleserialı ilə məşhurlaşmış sevilən aktyor Ruslan Sabirli yeni serialda əsas rol alıb. Söhbət “Coşqun Dəniz” serialından gedir. Aktyor öz sosial media hesabında iddia edir ki, yeni serialda canlandırdığı obrazı da tamaşaçılar “Sənə inanıram”ın Həmidi qədər sevəcəklər.
O yazır: “Sənə inanıram”ın Həmidindən sonra “Coşqun Dəniz”in Coşqununu da səvəcəksiniz.”
Serialda Coşqun obrazını canlandıran Ruslan Sabirli ilə yanaşı digər baş rolu - Dənizi Səhər Əkbər oynayır.
Dəyərli oxucular, sizinlə yeni serialın vaxtını paylaşmaq istəyirik. “Coşqun Dəniz” serialı sabah - 12 oktyabr 19:00-da Space TV kanalında start götürəcək.
Yaradıcı komandaya uğurlar, tamaşaçılara isə xoş seyrlər arzulayırıq.

Milli Məclisin Mədəniyyət Komitəsinin sədri Qənirə Paşayeva istedadlı gənc yazar Sevinc Yunuslu ilə  Mədəniyyət Komitəsində görüşüb, onu ilk şeirlər kitabının çıxması münasibəti ilə təbrik edib, ürək sözlərini bölüşüb.
Q.Paşayeva S.Yunusluya Qarabağ motivli xatirə hədiyyəsi təqdim edib.
S.Yunuslu gənc yazarlara, ümumən  yarıdıcı insanlara göstərdiyi diqqət üçün Komitə sədrinə təşəkkür edib, ilk şeirlər kitabını onunçün imzalayıb.

Azərbaycanın ilk beynəlxalq televiziyası olan CBC telekanalının yaradıcı və texniki potensialı ən müxtəlif janrlarda keyfiyyətli və reytinqli proqramlar hazırlamağa imkan verir. Məlumdur ki, telekanalın uğurlu fəaliyyətinin vacib göstəricilərindən biri də onun internet platformasında mövcud olan müxtəlif sosial şəbəkələrdəki auditoriyasının baxış sayıdır. Məhz bu səbəbdən də hazırlanan verilişlərin populyarlığı artdıqca, telekanalın yutub platformasındakı “CBC TV Azerbaijan” kanalının Top 10-luğu yaradılıb.

1. “Это Азербайджан”
2. “Служу Родине”
3. “Артефакты Кавказа”  
4. “Актуально сегодня”
5. “На этом точка”
6. “Экономика дня”
7. “Специальный выпуск”
8.”Белые пятна истории”,
9.“English News”
10.“Глобальная дискуссия”

Həmin Top 10-luğun ilk pilləsində, 80 video və 16 min 60 izləyicisi olan “Это Азербайджан” verilişi yerləşir. Verilişdə Azərbaycan və onun tarixi-mədəni irsindən bəhs edilir. Verilişin müəllifi və aparıcısı CBC telekanalının kəşf etdiyi potensiallı kadrlardan biridir. O, telekanalda əvvəl səs rejissoru kimi fəaliyyətə başlayıb. Daha sonra fərqlənməyi bacardığı üçün hazırda müxbir – aparıcı kimi fəaliyyətini davam etdirir.
İkinci yerdə 32 videosu və 14 min 374 izləyici sayı ilə, hərbi-vətənpərvərlik mövzusuna həsr olunan, ölkəmizin hərbi gücünü nümayiş etdirməyə xidmət edən “Служу Родине” verilişi yerləşib.
Üçüncü pillədə, Azərbaycanın arxeoloji və tarixi abidələrinə həsr edilən “Артефакты Кавказа” adlı veriliş durur. Verilişin yutub platformasında cəmi 14 buraxılışı mövcud olsa da, onların baxış sayı artıq 12 min 505-ə çatıb. 529 videosu və 11 min 75 izləyicisi olan “Актуально сегодня” adlı ictimai-siyasi veriliş isə TOP 10-luğun dördüncü pilləsində yer alıb. Onun ardınca 179 buraxılış videosu və 9 min 613 nəfər izləyici sayı ilə “На этом точка” siyasi analitik veriliş, 9 videosu və 8 min 599 baxış sayı ilə iqtisadi mövzulara həsr edilən “Экономика дня”, 760 buraxılış və 7 min 659 baxış sayı ilə “Специальный выпуск” adlı analitik veriliş, tarixi hadisələrə həsr olunan “Белые пятна истории”, həmçinin ingilis dilində xəbərlər - “English News” və 5 min 783 izləyicisi ilə 10-cu yerdə dünyada baş verən prosesləri müzakirəli əks etdirən “Глобальная дискуссия” verilişi gəlir.
Məqsəd hər bir tamaşaçıya özünün şəxsi fikrini formalaşdıra bilmək üçün operativ və keyfiyyətli formada informasiya təqdim etməkdir.

Ankara şəhərində tanınmış türkiyəli telejurnalist Fulya Öztürkün 44 günlük Vətən müharibəsindəki fəaliyyətindən bəhs edən “Fulya” filminin qala gecəsi keçirilib.
AzərTAC-ın Türkiyə müxbiri xəbər verir ki, qala gecəsində rəsmi şəxslər, diplomatlar, paytaxt ictimaiyyətinin tanınmış nümayəndələri, media təmsilçiləri, eləcə də filmin baş qəhrəmanı Fulya Öztürk iştirak edib.
Film Vətən müharibəsi ilə bağlı həqiqətlərin media vasitəsilə dünya birliyinə çatdırılmasında Fulya Öztürkün fəaliyyəti əsasında çəkilib.
Müharibə kadrları və çəkilişlər Gəncə, Bərdə, Tərtər, Ağdam və Şuşada aparılıb. Böyük zəfərə aid kadrlar isə Bakı şəhərindəki izdihamlardan götürülüb.
Qeyd edək ki, 44 günlük Vətən müharibəsində qazandığımız qələbə, Ordumuzun qəhrəmanlığı, eləcə də işğalçı Ermənistanın mülki əhalimizi hədəf alması Türkiyənin aparıcı kütləvi informasiya vasitələri tərəfindən geniş şəkildə dünya ictimaiyyətinə çatdırılıb. Bu prosesdə telejurnalist Fulya Öztürkün reportyorluğu ilə “CNN Türk” telekanalının rolu adıçəkilən filmdə əksini tapır.

Storyfox insan təəccübünə səbəb olan fotolar təqdim edib. Onların ən aktuallarını oxucularımıza təqdim edirik. Hamısı həvəskarlar tərəfindən lentə alınıb və real fotolardır. Yəni ki, heç bir quraşdırıımış səhnə yoxdur.

1-ci foto.
“Dimdik qayaya çıxan cəsur”

“Ədəbiyyat qəzeti”nin AMEA Nizami Gəncəvi adına Ədəbiyyat İnstitutu və “Ulduz” jurnalı ilə birgə hazırladığı bu sayı böyük Azərbaycan şairi Nizami Gəncəvinin 880 illiyinə həsr olunmuş “Xüsusi buraxılış”dır.
 
Anar – Nizami bizimlədir, burdadır...
Həmid Herisçi – Dastançılığın estetik təsiri – mühüm keçid
Nizaminin müasiri olan Avropa şairləri: Parisli Aleksandr – O həm də böyük Nizami kimi Makedoniyalı İskəndərdən yazırdı (Səlim Babullaoğlunun təqdimatında)
Xəlil Yusifli – “Xosrov və Şirin” poeması ilə bağlı bəzi uydurmalar və həqiqətlər
Azər Turan – Altun Çağın şairi
İsa Həbibbəyli – Ədəbiyyat fatehi və əbədiyyətin fəthi
Deyir: “O Keyxosrovdursa, biz Əfrasiyabıq” – “Ədəbiyyat qəzeti”nin müsahibi İlqar Fəhmidir (Söhbətləşdi: Günel Musa)
Cavanşir Yusifli – Ey şeyx Nizami...
Səadət Şıxıyeva – Türklüyü ilə qürurlanan Şirin (Nizaminin “Xosrov və Şirin”i əsasında)
Nizami Cəfərov – Dahinin portreti
Elnarə Akimova – “Oğlum Məhəmmədə nəsihət” – uşaq ədəbiyyatının ilk örnəyi
“Bizim Nizamini anmağa deyil, anlamağa ehtiyacımız var” – “Ədəbiyyat qəzeti”
Siracəddin Hacı ilə söhbəti təqdim edir.
Mətanət Vahid – Nizami yaradıcılığında sənətlərarası əlaqə bədii dünyagörüş modeli kimi
Elçin – Cism ilə ruhun vəhdəti (Nizami Gəncəvi haqqında söz)
Sevinc Elsevər – Yer altında günəş (“Nizami” metrosundan reportaj)
Nəzakət Məmmədli – Nizami yaradıcılığında təsəvvüf
Abid Tahirli – Məhəmməd Əli Rəsulzadə: “Gəncəli şair, heç bir mübaliğəyə meydan verməmək üzrə ancaq və ancaq türk olmuşdur” (“Azərbaycan yurd bilgisi”nin bir məqaləsi haqqında)
Zəhra Allahverdiyeva – Nizami Gəncəvinin nəsil şəcərəsi haqqında
Seyfəddin Rzasoy – Nizami Gəncəvi və türk mifologiyası
Nəriman Həsənzadə - Akademik Y.E.Bertels yazıçı Mir Cəlalın evində
Ataəmi Mirzəyev – Azərbaycan epik şeirində qəzəl: Nizamidən Füzuliyə doğru
Əsəd Cahangir – Nizamidə məntiq və intuisiya
İmamveri Həmidov – Nizami Gəncəvi irsi ərəb alimlərinin araşdırmalarında
Namaz Manafov – Turandot – Turan qızı – Türk qızı
Şəfəq Əlibəyli – Nizaminin “Sirlər xəzinəsi”ndə “Təzadlar sirri”
Aygün Bağırlı – Nizami Gəncəvinin ictimai idealı
Yaqub Babayev – Nizami yaradıcılığında rəmzi-metaforik anlayış və əhvalatlar
Eynulla Mədətli – İranda Nizami Gəncəvi irsinə münasibət: iddialar və həqiqətlər
Hacı Firudin Qurbansoy – “Sirlər xəzinəsi”ndən iki beytin tərcüməsi haqqında
Mayıl İsmayılov – Nizaminin Amerika tədqiqatçısı
Mehdi Kazımov – Nizami “Xəmsə”si və Şərq ədəbiyyatı
İlham Abbasov – Nizaminin türk ruhu
Kamil Hüseynoğlu – İran nizamişünaslığındakı bəzi təhriflərə dair
Nizami Tağısoy – Nizami əsərlərinin rus tərcümələri və rus nəşrləri ilə bağlı qeydlər
Ceyhun Mirzəli – “Nizami”nin ekran həlli
Sərvaz Hüseynoğlu – Nizaminin duaları

Mənbə: Edebiyyatqazeti.az

Vinsent Van Qoqun 50-dən çox rəsm  əsəri və məktubu Amsterdamda, rəssamın Muzeyində ictimaiyyətə təqdim olundu. Bu barədə cümə günü The Guardian qəzeti məlumat verib.
Eskizlər Van Qoqun 1885-ci ildə orijinal versiyası yazılmış "Kartof yeyənlər" rəsminin davamı kimi nəzərdə tutulmuş, lakin sonradan həyata keçirilməmiş şəkillərə aiddir. Kətan üzərində kəndli ailəsinin şam yeməyi səhnəsi təsvir edilib. Ölümündən qısa bir müddət əvvəl rəssam şəklin motivlərinə qayıtmaq qərarına gəlib və yəqin ki, əvvəllər geniş auditoriyaya təqdim olunmayan eskizlər yaradıb.

"1890-da Van Qoq müalicə üçün Saint - Remyeyə gedir, o zaman ruhi xəstələr üçün bir tibb müəssisəsi vardı, orada müalicə alır, şimala qayıtmaq üçün ağrılı-acılı bir istək yaşadır içində, çünki beş il evdə olmamışdı. Rəssam “Kartof yeyənlər"in şəkillərinə qayıdır və yemək masasında interyer və fiqurların eskizlərini yaradır. Bizim arxiv yazılarımıza əsasən, bu eskizlərin bəziləri o qədər çoxdan nümayiş etdirilmirdi ki, onların, çox güman, heç zaman ictimaiyyətə nümayiş etdirilməməsi təxmin olunur", - deyə sərginin kuratoru Breqye Gerrits bildirib.
Qeyd edək ki, Van Qoq özünün ən əhəmiyyətli işləri sırasında "Kartof  yeyənləri"n adını çəkib. Amma şəkil yaradıldıqdan dərhal sonra sərt tənqid olunmuşdu. O dövrün art-Cəmiyyəti icra texnikasını kifayət qədər mükəmməl hesab etməmişdi. Rəssamın sağlığında əsər əsla tanınmamışdı. Bu gün isə rəsm müəllifin şah əsərlərindən biri sayılır.

Qeyd: Vinsent Van Qoq (1853-1890) - postimpressionist rəssamdır, onun əsərləri XX əsrin rəssamlığına böyük təsir göstərmişdir. Onun ən məşhur əsərləri arasında "Günəbaxan", "Ulduzlu gecə", "Kartof yeyənlər" qeyd edilir. Ustadın əsərlərindən biri - "Trenktayda körpü" bu il mayın 13-də Christies-in Nyu-Yorkdakı hərracında 39,2 milyon dollara satılmışdır.
“Kartof yeyənlər" sərgisi Amsterdamda rəssamın Muzeyində 13 fevral 2022-ci il tarixinədək davam edəcək.

Şəkildə: “Kartof yeyənlər” tablosu

10 oktyabr. Ümumdünya psixiki sağlamlıq günü

1992-ci ildən qeyd edilən bu gün diqqəti psixiki xəstəlikdən əziyyət çəkən insanlara yönəltmək məqsədi güdür. Hazırda dünyada 450 milyon insan bu cür xəstəliklərdən əziyyət çəkir. Qərb ölkələrində hər yeddinci adam ya paranoiddir, ya şizofrenikdir, ya da depressiya, yaxud alkoqolizmdən müalicə alır. Psixiki xəstəliklərin əsas səbəbkarı isə stress adlı düşməndir, o düşmən ki, günümüzün əsas mənfi qəhrəmanıdır.

10 oktyabr. “Barabançını qucaqla günü”

Bu gün musiqi ansambllarının barabançılarına ehtiram əlaməti olaraq onları qucaqlamaq lazımdır. Barabançı – bizim təbirimizcə nağaraçalanlar. İndi durub həqiqətən gedəsən, “Natiq” ritm qrupunun nağaraçılarından birini, lap elə Natiqin özünü qucaqlayasan ki, qardaş, təqvim belə deyir. Düşünərlər, yəqin bunun ağlı gedib.

10 oktyabr. Ermənilərin bugünkü bayramı

İndi sizə bir şey deyim, ancaq gülməyin. Bu gün Ermənistanda kimyəvi qoşunlar günüdür. Bunlar yəni belə dərinə gediblər ki, hətta ABŞ, Rusiya kimi hərbi derjavalar belə ayrıca qeyd etmədiyi kimyəvi qoşunlar gününü qeyd edirlər? Hanı bunların kimyəvi silahları, poliqonları, hanı xüsusi hazırlıq məktəbləri? Neçə mütəxəssisləri var bu sahədə? Gülünc və absurddur, gözə kül üfürmək buna deməzlərmi?

Sizdən kim lətifə söyləməyi xahiş etsə ona bax bu lakonik lətifəni söyləyin: 10 oktyabr - Ermənistanda kimyəvi qoşunlar günüdür.

10 oktyabr. Digər əlamətdar hadisələr

Bu gün Ümumdünya evsizlər günüdür. Bomj adlandırdığımız belələrinə bu gün mərhəmət göstərməyiniz yetər. Ölüm hökmü ilə ümumdünya mübarizə günüdür. Ümumdünya sıyıq günüdür. (Mannı sıyığını kim sevməyib ki, uşaqlığında?) Finlyandiyada milli ədəbiyyat günüdür. Ukraynada rəssamlar günüdür. Pakistanda, Honkonqda və Almaniyada babalar və nənələr günüdür. Polşada ağacəkmə, Kubada müstəqillik günüdür. Və ən nəhayət, bu gün Amerikada tortun bəzədilməsi günüdür. Üstəlik, mələk-biskvit günüdür həm də. Ay maşallah!

1963-cü ilin bu günündə məşhur türk aktrisası Hülya Avşar dünyaya gəlib. 1943-cü ilin bu günündə ingilis yazışısı Corc Oruel ilk dəfə “soyuq müharibə” terminindən istifadə edib. 1933-cü ilin bu günüdə ABŞ universamlarında ilk dəfə yuyucu vasitə - “poroşok” gözə görünüb. Dreft adlı bu vasitənin üzərinə də belə yazılıbmış: “Möcüzə molekulun sayəsində parçadan çirki sovurub çıxarır”. 1919-cu ildə Antanta RSFSR-ə qarşı iqtisadi sanksiyalar elan edib. 1875-ci ildə rus yazıçısı Aleksey Tolstoy (Lev yox a) dünyasını dəyişib. 1813-cü ildə dünyaşöhrətli italyan bəstəkarı Cüzeppe Verdi dünyaya gəlib. 680-ci ildə Məhəmməd peyğəmbərin nəvəsi  - Əli ibn Abu Talibin oğlu, 3-cü şiyə imamı Hüseyn ibn Əli işıqlı dünyadan köçüb.

Varisin “1-10 oktyabrın təqvimi” yazısından