Super User
Uşaqlardan imtina olunma faizi niyə artır?
Bəli, çox təəssüf ki, ölkədə valideyin himayəsindən məhrum olan uşaqların sayı sürətlə artır. Bura valideynin itirilməsi, öcladlıqdan məhrumedilmə, boşanma fəsadları kimi faktorlar daxildir.
Amma yaxşıdır ki, ölkəmizdə uşaqların övladlığa götürülməsi də diqqət mərkəzindədir. Bunun üçün 2019-cu il noyabrın 1-dən etibarən Əmək və Əhalinin Sosial Müdafiəsi Nazirliyi ayrıca bu prosesi idarə edir.
Gəlin rəqəmlərə diqqət edək. 2020-ci ildə uşaq övladlığa götürmə ilə bağlı 157, 2021-ci ildə 378, 2022-ci ildə isə 364 müraciət daxil olub. Həmin dövrdə ümumilikdə 899 müraciət daxil olub. Qeyd edək ki, övladlığagötürmə sahəsində idarəetmə nazirliyə həvalə olunduqdan sonra 355 uşaq valideyn himayəsinə verilib. Onlardan 179-u oğlan, 176-sı qız uşaqlarıdır. Uşaqlardan 207–si bu il övladlığa verilib.
Görülmüş reinteqrasiya tədbirləri nəticəsində ümumilikdə ötən dövrdə 240 uşaq ailəsinə qaytarılıb. Onlardan 94-ü qız, 146-sı oğlandır. Təkcə bu il ərzində 109 uşaq reinteqrasiya edilib. Bu il noyabrın 1-dən sonra 9-u oğlan, 9-u qız olmaqla 18 uşaq valideyn himayəsindən məhrum olan uşaqlar üçün müəssisəyə yerləşdirilib. Hazırda həmin müəssisələrdə 1563 uşaq var. Övladlığa verilməsi mümkün olmayan uşaqların sayı isə 66 nəfər təşkil edir.
Ümumiyyətlə, bu il sosial layihələr çərçivəsində 25 rayon və şəhəri əhatə edən sosial reabilitasiya mərkəzlərində 2500 nəfər 18 yaşınadək əlilliyi müəyyən edilmiş şəxsə, günərzi qayğı mərkəzlərində isə 1350 şəxsə xidmət göstərilib.
Nə deyə bilərik. Dünyada ən şirin nemət övladdır. Övladdan imtina edən valideyinlərə heç bir şey haqq qazandıra bilməz.
(Qeyd: Rəqəmlər Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin İdarə Heyətinin sədri Vüqar Behbudovun 2022-ci ilin yekunlarına həsr olunan mətbuat konfransından götürülmüşdür).
“Ədəbiyyat və incəsənət”
(29.12.2022)
Moskvada azərbaycanlı rəssamın sərgisi açılıb
Yeni İl və Dünya Azərbaycanlılarının Həmrəyliyi Günü ərəfəsində Moskvada, Xalq Təsərrüfatı Nailiyyətləri Sərgisinin (XTNS) “Azərbaycan” pavilyonunda Azərbaycanın və Rusiyanın Əməkdar rəssamı Əsgər Məmmədovun “Nar dastanı” adlı sərgisi açılıb.
“Ədəbiyyat və incəsənət” portalı AzərTAC-a istinadən xəbər verir ki, XTNS-nin “Azərbaycan” pavilyonunun rəhbərliyi tərəfindən təşkil edilmiş sərgidə milli koloritli natürmortlar, portretlər və Moskva vilayətinin peyzajları nümayiş etdirilir.
Pavilyonun direktoru Səadət Qədirova sərginin əhəmiyyəti barədə söhbət açaraq deyib: “Bugünkü sərgi xüsusi əhəmiyyətə malikdir, çünki o, nara həsr edilib. İstedadlı rəssam Əsgər Məmmədovun maraqlı taleyi var. Bildiyimiz kimi, həyatın sınaqları ilə üzləşdiyi insanlar istedadlı olur. Biz “Azərbaycan” pavilyonunda Əsgər Məmmədovun nara həsr edilmiş sərgisini açırıq. Nar bərəkət və sərvət rəmzidir. Mənim fikrimcə, nar dənələrinin bir-birinə bağlılığı biz azərbaycanlıların hamısı üçün birlik rəmzidir”.
Rəssam Əsgər Məmmədov Qarabağda keçmiş uşaqlıq illərini xatırlayaraq qeyd edib ki, simvolizm baxımından nar azərbaycanlıların həyat tərzini ifadə edir. O deyib: “Buna görə də yaradıcı fəalliyyətimin son illərini nara həsr etmişəm”.
“Ədəbiyyat və incəsənət”
(29.12.2022)
Baxçasaray - iki ilanın döyüşdüyü yer
Aida Eyvazlı ilə Türk ellərinə səyahət davam edir. Bu dəfə yolumuz Baxçasarayadır. Çox şükür ki, bu yurdun adı indiyənədək dəyişdirilməyib və Krımın qədim rus torpağı olduğunu iddia edənlərlə Krımın türk torpağı olduğunu iddia edənlərin çarpışmasında bu ad bir arbitrdir.
Krımın tarixindən danışanda ilk əvvəl, xan sarayı Baxçasarayı da yada salmaq lazımdır. Çünki Gəray xan sülaləsi öz taxt -tacını bu sarayda qurub. Səyahət xatirələrimizi bu tarixlə başlamaq həm də ona görə lazımdır ki, həmin yerlərin türk torpaqları olmasını unutmayaq! Xan sarayı Sahib I Gəray tərəfindən tikilib. Belə rəvayət edirlər ki, Xan bir dəfə ova çıxarkən burada Çuruk su çayının sahilində iki qara ilanın döyüşünü seyr edir. Hər iki ilan - biri o birini məğlub edənə qədər döyüşürlər və qalib gələn ilan taqətdən düşərək halsız şəkildə yerdə uzanılı qalır. Bir qədər keçəndən sonra o, çayın soyuq sularına baş vuraraq, yenə sap-sağlam quruya çıxır. Sahib I Gəray bunu xoş bir hadisənin başlanğıcı kimi dəyərləndirir. İki ilanın döyüşdüyü yerdə yeni Krım xanlığının paytaxtının təməlini qoydurur. Belə hesab edir ki, o, bu çayın sahilində hər zaman qalib olacaq.
Uzun zaman İstanbulda yaşayan Sahib I Gəray xan burada İstanbul xanlarının sarayından geri qalmayan bir saray tikdirməyi qərara alır. 1532-ci ildə inşasına başlanan sarayın tikintisi 1551-ci ildə başa çatır. 21 il ərzində Dövlət I Gəray “Xan türbəsi”ni tikdirir, Qaplan I Gəray isə buraya Qızıl bulağı əlavə etdirir. Krım Gərayın vaxtında isə bu sarayda “Göz yaşı fontanı” tikilir.
1736-cı ildə Rusiya ilə başlanan müharibədə Xan sarayı yandırılır, bir neçə il keçəndən sonra Salamat Gəray tərəfindən yenidən bərpa olunur. Öz vaxtında xan sarayında 150-yə qədər su fontanı olub. Bu fontanların hər biri bir hadisəni, kiminsə doğuluşunu, toyunu, qələbəsini və digər tarixi hadisələri özundə əks etdirib. Baxçasarayda həm də “Xan məzarlığı” var. Bu məzarlıqda Gəray xanlığı sülaləsinin xanları dəfn olunub. Onların ərəb əlifbası ilə bəzədilmiş baş daşları o tarixdən bir nişanədir.
Bu gün Baxçasaraydakı Xan sarayı həm də turistləri və qonaqları qəbul edən bir guşədir. Burada fəaliyyət göstərən yeməkxanalarda, muzeylərdə krım tatarlarının dadlı və rəngarəng mətbəxinin təamları ilə, musiqilər və gözəl , həzin ifalarla , krımlı sənətkarların əl işləri ilə tanış ola bilərsiniz.
Məşhur türk səyyahı Övliya Çələbi Baxçasarayı belə təsvir edirdi: “ Möhtəşəm sarayda 4500 otaq var. Evlərin damları kərpiclə örtülüb, daş divarlardan istilik boruları çıxır, dəmirdən olan darvazaları çox gözəldir... Sarayın 4 tərəfində belə darvazalar var. Dörd tərəfi də cənnət bağları ilə əhatə olunub. Ona görə də bu yeri Baxçasaray adlandırırlar”.
**
Çox əfsuslar olsun ki, 2014-cü ilin mart ayının 14-də Rusiya Federasiyasının prezidenti Vladimir Putinin sərəncamı ilə Krımda qondarma referendum keçirildi və yalançı statistik göstəricilərlə guya rusların bu torpaqlarda çoxluq təşkil etdiyi yazıldı. O gündən etibarən krlm tatarları yenə də Krımda hüquqsuz və sahibsiz vətəndaşa çevrildilər. Rusiyanın Ukrayna ilə başladığı dağıdıcı müharibənin əsası, elə Krım yenidən Rusların əlinə keçəndən sonra qoyuldu. Bu gün isə Krımda nə təbiətin gözəlliyi gözə görünür, nə də ki, tarixi abidələrin bundan sonra qalacağına kimsə zəmanət verə bilir. Krım yenə əldən gedib.
İnanaq ki, müvəqqəti.
“Ədəbiyyat və incəsənət”
(29.12.2022)
Bu gün “ASAN xidmət” 10 yaşını qeyd edir
Bu gün işlərimizi asanlaşdıran “ASAN xidmət” işçilərinin peşə bayramıdır.
Prezident İlham Əliyev 2012-ci il dekabrın 29-da ilk “ASAN xidmət” mərkəzinin fəaliyyətə başladığını nəzərə alaraq, 2017-ci il dekabrın 29-da hər il həmin günün ölkəmizdə “ASAN xidmət” işçilərinin peşə bayramı günü kimi qeyd edilməsi barəsində Sərəncam imzalayıb.
On il əvvəl fəaliyyətə başlayan “ASAN xidmət” ölkəmizdə ictimai xidmətlər sahəsində köklü dəyişikliklərə səbəb olub. İlkin mərhələdə bu konsepsiya ölkə daxilində vətəndaş-dövlət qurumu münasibətlərinin keyfiyyətcə yeni mərhələyə qaldırılmasını nəzərdə tuturdusa, indi o, ölkə hüdudlarından kənarda da uğurla tətbiq olunur.
Bir məkanda bir neçə məsələnin həll edilməsi, əlavə xərcə düşməmək, vaxt itkisinin minimuma endirilməsi “ASAN xidmət”i fərqləndirən ən başlıca xüsusiyyətlərdəndir. Prezident İlham Əliyevin təşəbbüsü ilə yaradılan bu xidmətin uğur qazanmasının əsas sirlərindən biri milli cəmiyyətin xüsusiyyətlərinin nəzərə alınmasıdır. Burada xüsusi fəaliyyət normaları tətbiq olunur. “ASAN xidmət” dünyada bu qəbildən olan yeganə strukturdur və milli intellektual brenddir.
Bu il “ASAN xidmət” mərkəzləri fəaliyyətini uğurla davam etdirib və xidmət şəbəkəsini genişləndirib. Hazırda ölkəmizdə 24 “ASAN xidmət” mərkəzi fəaliyyət göstərir. Onlardan 7-si paytaxtda olmaqla, digərləri Sumqayıt, Gəncə, Sabirabad, Bərdə, Qəbələ, Masallı, Quba, Mingəçevir, İmişli, Şəki, Şamaxı,Tovuz, Ağcabədi, Kürdəmir və Balakəndədir.
Prezident İlham Əliyevin sərəncamları ilə “ASAN xidmət”in funksiyaları ilbəil genişləndirilir. “Azərişıq”, “Azərsu” və “Azəriqaz” tərəfindən xidmətlərin təqdim olunduğu “ASAN Kommunal”, eləcə də “ASAN Viza”, “ABAD” mərkəzləri bu sıradandır.
2019-cu ilin may ayında “ASAN xidmət” mobil tətbiqi istifadəyə verilib. Mobil tətbiqin əsas məqsədi vətəndaşlar üçün çevikliyi təmin etməklə, onların əlavə vaxt itkisinin, məsrəflərinin qarşısını almaq və “ASAN xidmət” mərkəzlərinin idarəedilməsində effektivliyi artırmaqdır.
“ASAN xidmət”in işçi heyətinin əksəriyyəti gənclərdən ibarətdir və fəaliyyət göstərdiyi on il ərzində minlərlə könüllü bu konsepsiyanın ayrılmaz hissəsinə çevrilib. Hazırda 30 mindən çox könüllü “ASAN xidmət” mərkəzlərində fəaliyyət göstərir. Bu günə kimi könüllülər tərəfindən 3 000-dən çox təlim, 700-dən çox layihə həyata keçirilib və 2700-dən çox könüllü “ASAN Kadr” portalı vasitəsilə işlə təmin olunub.
Mərkəzlərdə dövlət orqanı, həmçinin özəl şirkət və müəssisələr tərəfindən ümumilikdə 300-dən çox müxtəlif xidmət göstərilir. İndiyədək “ASAN xidmət” mərkəzlərində 50 milyondan çox müraciət qeydə alınıb.
“ASAN xidmət” işçilərini təbrik edirik!
“Ədəbiyyat və incəsənət”
(29.12.2022)
Türkiyəli aktyor siyahıda 1-ci oldu
Türkiyəli aktyor Can Yaman "IMDb Starmetre"də (kinematoqraf haqqında dünyada mövcud olan ən nəhəng göstəricilər bazası) ilk sırada yer alıb.
“Ədəbiyyat və incəsənət” axşam.az-a istinadən xəbər verir ki, siyahıda ikinci yerdə isə "Sen çal kapımı" serialında birgə rol alan Kərəm Bürsinlə keçmiş sevgilisi aktrisa Hande Erçel qərarlaşıb.
İlk onluqda Demet Özdəmir, Kıvanç Tatlıtuğ, Tuba Büyüküstün, Hazar Ergüçlü, Pınar Dəniz, Hazal Kaya və Ayça Ayşin Turan kimi məşhur aktyorlar da var.
“Ədəbiyyat və incəsənət”
(29.12.2022)
“Ay sizi xoş gördük, Fantomas məllim”
“Ədəbiyyat və incəsənət” portalı yazıçı-dramaturq Əyyub Qiyasın tanınmış teatr və kino xadimlərinin həyatlarından qələmə aldığı maraqlı anları təqdim edir.
MƏMMƏDSADIQ NURİYEV
(1919-1975)
***
Kinorejissor Arif Babayev məni “Uşaqlığın son gecəsi” filminə Davud roluna çəkəndən sonra küçədə-bayırda uşaqlar, cavanlar məni görən kimi “Fantomas” deyirdilər. Buna artıq öyrəşmişdim.
Bir dəfə Bayıl tərəfə getmək üçün MUM (mərkəzi univermaq) tərəfdə avtobusa mindim. Ön qapıdan qalxdığım üçün sürücü məni görəndə sevincək:
– Ay sizi xoş gördük, Fantomas məllim. Nə var nə yox? – deyib, xəbər aldı. Alışqan idim, dilucu təşəkkür etdim:
– Xoş gününü görək. Sağlıqdır, çox sağ ol, – deyib, arxaya çəkildim.
Məni gərən kimi avtobusa pıçhapıç düşdü. Bir qədər basabas idi. “Azneft” meydanına çatanda yaşlı bir qadın əlini mehribanlıqla çiynimə toxundurub:
– Fantomas, oğlum, yol ver düşüm, – dedi.
Geri çəkilib qadına yol verdim. Sonra özüm də avtobusdan düşüb Bayıla qədər piyada getdim. Özü-özümə fikirləşirdim: “Məncə elə sənətə verilən dəyər budur…”
“Ədəbiyyat və incəsənət”
(29.12.2022)
“Qoca qırışlar kimi, beli bükülən, ömür,” –Nigar Arifin şeirləri
Yola salmaqda olduğumuz ilin əsas ədəbiyyat hadisələrindən biri də Qubada keçirilən SilkWay Beynəlxalq Ədəbiyyat Festivalının Azərbaycan turu oldu ki, 32 finalçının əsərlərindən ibarət Antologiya üzümüzə gələn il “Azərkitab” Yayınlarında nəşr olunacaq. Festivalın rəsmi media dəstəkçisi olan “Ədəbiyyat və incəsənət” portalı antologiyaya daxil ediləcək əsərlərlə oxucularını tanış edir.
Nigar Arif ( Ağalarova İlqar qızı)
1993-cü il 20 yanvarda Mingəçevir şəhərində anadan olub.
2003-2009- cu illərdə Mingəçevir şəhər Üzeyr Hacıbəyov adına 3 saylı “Uşaq Musiqi Məktəbi”ndə piano üzrə təhsil alıb.
2010-2014- cü illərdə ADPU- nun filologiya fakultəsində “ingilis dili müəllimliyi” üzrə təhsil alıb.
2016–2018- ci illərdə fəaliyyət göstərən Azərbaycan YazıçılarBirliyi və Mədəniyyət Nazirliyinin birgə layihəsi olan III "Gənc Ədiblər Məktəbi"nin məzunudur.
2017-ci ildən “Dünya Gənc Türk Yazarlar Birliyi”nin üzvüdür.
2020- ci ildən Mərakeşdə “Beynəlxalq İnsanlıq və Yaradıcılıq Forum”unun üzvüdür. Dünyada sülhün təminatında yaradıcılıq xidmətlərinə görə bu forum tərəfindən 2022-ci ildə “Dünyanın ən yaxşı medalı”na layiq görülüb.
2021-ci ildən Özbəkistanda “Orta Asiya Yazarlar Birliyi”nin üzvüdür. Həmçinin bu birlik tərəfindən ‘Yangi Ovoz” ordeni ilə təltif olunub.
2022-ci ildən Çində “CHINA POETRY CIRCLE” beynəlxalq jurnalının redaksiya heyətinin üzvüdür. Çin festivalında “Mükəmməl Gənc Yazar “ adına layiq görülüb.
2022-ci ildən Qırğızıstanda “Beynəlxalq Yazarlar Birliyi”nin üzvüdür.
2019-cu ildə Bakıda ədəbiyyat üzrə IV LİFT Festivallar Festivalının, 2020- ci ildə Kolumbiyada keçirilən məşhur “Medelyin Dünya Şeir Festivalı”nın iştirakçısı, eləcə də Hindistan, Çin, İtaliya üzrə bir çox dünya şeir festivalları və layihələrinin iştirakçısı olub, mükafat və sertifikatlarla təltif edilib. Şeirlərindən bəziləri türk, rus, ingilis, ispan, ərəb, fars, çin, hind, portuqal, italyan, urdu kimi dillərinə tərcümə edilərək dünyanın bir çox ölkələrində dərc olunub, “ Barış” şeirinə İtalyada mahnı bəstələnib.
Həqiqətən də xanım yazarların şeirləri daha səmimi, daha kövrək, daha duyğusal olur. Yalnız onlar deyə bilərlər ki, div boyda arzuların cırtdan ayaqları var...
Gecikmiş görüş
Bax belədir, əzizim,
Yol uzundur, zaman dar,
Hardan biləydik axı
Div boyda arzuların
cırtdan ayaqları var...
Xəyallar qura-qura
Ağlımız kəsmədi heç
arzular da gecikər,
birdən bizə çatammaz.
Bir gün şirin yuxular
daha yalan satammaz...
Böyüməyə tələsdik
uşaqlıq dura-dura
Nə gənclik yaşadıq ki,
özümüzü o dağdan
bu daşa vura-vura...
Bir vaxt fil qulağında,
oyandıq qəh-qəhəylə,
Elə bil dan söküldü
əlimizdə qədəhlə...
Boylandı arxamızca
yük dolu karusellər,
Gülümsədi uzaqdan,
Londonlar, Brüsellər...
Öyrəşdik uçaqlara,
Kim nə deyə bilər ki,
indi bu qoçaqlara?
Gəzdik bütün dünyanı,
Nə sən bezdin, nə də mən
O cırtdan ayaqların
ümidindən yapışdıq,
Gec olsa da neyləyək
əsas odur,ölmədik,
evvəl-axır tapışdıq...
Bəstəsi mən, sözü sən
Bir dənizə dönmüşəm,
Ləpəsi sətir-sətir.
Dalğaların altında,
Balıqlar yallı gedir.
Bir dənizə dönmüşəm,
Şeirimin sahilində.
Kövrəlib sərt qayalar,
Günəş tutur əlindən.
Bir dənizə dönmüşəm,
Göyün üzünə qaçır.
Gəmi boyda arzular,
Sinəmdə yelkən açır.
Bir dənizə dönmüşəm,
Dəniz bəbəklərində.
Çaxılıram daş-qaşa,
İncə biləklərində.
Bir dənizə dönmüşəm,
Saçları yosun-yosun.
Zaman dodaqlarında,
Dincəlir uzun-uzun.
Bir dənizə dönmüşəm,
Bu dənizin özü sən.
Oxuduğu nəğmənin,
Bəstəsi mən, sözü sən.
İçimdəki səs
Bir səs gəlsə uzaqdan,
çağırsa gedənləri...
Axtarıb tapsa bir-bir
gözümdən itənləri,
qəlbimdə susanları,
dilimdə bitənləri...
Bir səs gəlsə uzaqdan,
Gəlsə, lap yaxın olsa...
İllərin dostu kimi,
Könül yoldaşı kimi
Keçmiş qayğılarımdan
Təzə qayğılaradək
gəlib dadıma çatsa,
əl tutsa bacım kimi,
Əlim çatmayanlara,
uzansa ümidlərin
boyu qardaşım kimi,
Bir səs gəlsə uzaqdan,
Gəlsə, lap yaxın olsa,
Evimdə-eşiyimdə,
Xoş günlər keşiyində,
dayansa atam kimi.
Arzular beşiyimdə
həzin bir layla çalsa,
oxusa anam kimi...
Bir səs gəlsə uzaqdan,
gedənləri çağırsa,
Gedənlər eşitməsə,
gedənlər qayıtmasa,
Bu səs məni də alıb,
kaş özüylə aparsa...
Sən də mənim kimisən
Kaşlardan corab hördün,
günlərimin başına,
Bir ayağın ilişib
bəlkələrin daşına,
Gözlərimdən, əllərimdən sürüşüb,
vərəqlərin üstünə
söz-söz tökülən ömür..,
Ovcumun içində
qoca qırışlar kimi,
beli bükülən, ömür,
Sən də mənim kimisən...
sən də mənim kimisən,
Bir az cılız, balaca,
Əynimə geyindiyim,
bu köhnə pencəyimdə,
düymələrin yerindən
yersiz sökülən, ömür..,
Eh... Daha bir-birimizə
dar gəlirik dəyəsən,
Əl dayayıb ağaca,
dincəlmək istəyirsən,
Duz olub dizlərimə,
vaxtsız çəkilən ömür...
Ciblərimdə gizlənən,
beş qəpiklər kimisən,
Beş qəpik qalan, ömür,
Əlim sənlə doludu,
Saydım qəpiklərimi,
bir çörəyin puludu...
Indi sol yanımda
dərin bir nəfəs dərib,
az əvvəl yandırdığın siqaretin közünü
ayağınla əzirsən...
Dodağın yana qaçır,
Gülməkdən çox elə bil,
gülüşündən bezirsən,
başı dikələn ömür,
Bilirəm, düşünürsən:
"buna da şükür",
buna da şükür...
“Ədəbiyyat və incəsənət”
(29.12.2022)
Bakı Şəhər Mədəniyyət Baş idarəsi qalibləri mükafatlandırıb
Xəbər verdiyimiz kimi, Bakı Şəhər Mədəniyyət Baş İdarəsinin təşkilatçılığı ilə Səbail rayon Mərkəzləşdirilmiş Kitabxana Sisteminin Mərkəzi Kitabxanasında Azərbaycan ədəbiyyatının görkəmli nümayəndəsi, şair, dramaturq Hüseyn Cavidin 140 illiyinə həsr olunmuş şeir müsabiqəsi keçirilirdi. Budur, müsabiqənin qaliblərinin təltifolunma mərasimi keçirilib.
“Ədəbiyyat və incəsənət” portalı Baş İdarəyə istinadən xəbər verir ki, təltifolunma mərasimində Bakı Şəhər Mərkəzləşdirilmiş Kitabxana Sistemlərinin rayonlar üzrə təşkil olunmuş final mərhələsində fərqlənən qalib və iştirakçılar Baş İdarənin diplom, fəxri fərman, eləcə də hədiyyələri ilə mükafatlandırılıblar. Münsiflər heyətinin ümumi qərarına əsasən müsabiqənin qalibləri Hüseyn Cavid yaradıcılığından parçalarla çıxış ediblər.
Hüseyn Cavidin yaradıcılığına və onun sürgün həyatına həsr olunmuş videoçarxların nümayişi, kitab sərgisi tədbirə əlavə rəng qatıb.
“Ədəbiyyat və incəsənət”
(29.12.2022)
2022-ci ilin ən yaxşı filmləri və serialları
Kinoindustriyanın nəhəngi sayılan “Netflix” yayım platforması həqiqətən də kinoda dəbi diqtə edir. Odur ki, bu platformanın sifariş etdiyi kinematoqraf məhsulları daim ən tələbedilən sayılır.
Budur, “Netflix” 2022-ci il üçün ən uğurlu film və serialların reytinqini açıqlayıb. “Ədəbiyyat və incəsənət” portalı TASS-a istinadən bu reytinqi sizin diqqətinizə çatdırır.
İngilis dilində ən çox baxılan bədii filmlərin siyahısında ilk beşliyin vəziyyəti belədir:
1.Kris Evans və Rayan Qoslinqin baş rollarda çəkildikləri “The Grey Man” filmi. Yayımlandığı ilk üç həftədə film 253,87 milyon saat izlənilib.
2. “The Adam Project” (233,16 milyon saat), 3. “Purple Hearts” (228,69 milyon saat),
4.”Hustle” (198,31 milyon saat)
5.”The Tinder Swindler” (172,13 milyon saat)
Ən yaxşı teleseriallar reytinqində isə liderlər beşliyi aşağıdakı kimidir:
1.Daffer qardaşlarının “Stranger Things” filmi premyeradan sonra 28 gün ərzində dördüncü mövsüm 1,35 milyard saatdan çox baxış toplayıb.
2.”Wednesday” (1,237 milyard saat), 3.“Monster: The Jeffrey Dahmer Story” (856,22 milyon),
4.”Bridgerton” serialının ikinci sezonu (656,26 milyon)
5.”Inventing Anna” (511,92 milyon).
Şəkildə: “The Grey Man” filmindən kadr
“Ədəbiyyat və incəsənət”
(29.12.2022)
Türk teatrının ilk tamaşası Azərbaycan dramı olub
Türkiyə ədəbiyyatında parlayan Avrasiya Yazarlar Birliyi maraqlı bir eksperiment edərək Birliyinin Teatrını yaradıb. Və bu günlərdə Teatr öz pərdələrini açıb.
“Ədəbiyyat və incəsənət” portalı Birliyin başqanı Yaqub Öməroğluya istinadən xəbər verir ki, ilk tamaşa Azərbaycandan seçilib. Əbdürrəhim bəy Haqverdiyevin “Həyalət” dramı. Tamaşa görkəmli Azərbaycan dramaturqu Mirzə Fətəli Axundzadənin 210 illiyinə həsr edilib.
“Ədəbiyyat və incəsənət”
(29.12.2022)
