Super User
Sevgi daha şiddətlə mübtəla olmağı arzuladığın bir həzdir, bir gözəllikdir
Yazıçı Varisin “Qırmızı ləçəklər” romanı - müharibənin yarımçıq kəsdiyi gerçək bir sevgi hekayətidir. Azərbaycanlı Əlif Hacıyevlə belarus Qalina Manko arasındakı bu sevgi gedib Xocalıda torpağa gömülür. Dövlət sifarişi ilə yazılan, Heydər Əliyev Fondunun “Xocalıya ədalət” kampaniyası çərçivəsində təbliğ olunan romandan sevgi dolu sətirlərin dərcini “Ədəbiyyat və incəsənət” portalı bu gün də davam etdirir.
Əlbəttə, yüzlərlə tədqiqat var ki, sevənin halını xəstəlik halı ilə uzlaşdırır, ümumən sevgiyə düçar olmağı xəstəlik növü adlandırır. Amma mən həmişə "sevgi" sözünün "xəstəlik" sözü ilə müqayisəsindən çəkinmişəm, hətta diksinmişəm.
Xəstəlik — müalicəsinə çalışdığın, ondan qopmaq istədiyin anormal haldır. Sevgi isə daha şiddətlə mübtəla olmağı arzuladığın bir həzdir, bir gözəllikdir.
Sevgi — sonu sənin iradəndən asılı olmadan, sonunu sənin təyin etmədiyin bir mövcudiyyətdir. Sevgi limiti məhz qum saatının sənə verdiyi vaxt limiti kimidir. Bəxtinə iri qablı qum saatı düşdü, onun ömrü uzun, kiçiyi düşdü, qısa olacaq.
Amma bir gün mənim ağlıma gəldi ki, sevgidə də limitsizlik mümkündür, insan sevgini vaxt diktə etmək qabiliyyətindən büsbütün məhrum edə bilər. Eynən Əliflə Qalinada olduğu kimi. Onların qum saatlarında qumun bir qabdan digər qaba tökülməsi müddəti sadəcə əbədi idi.
“Ədəbiyyat və incəsənət”
(17.03.2023)
“İnancdan mədəniyyətə” Xalça Muzeyində təqdim olunub
Azərbaycan Milli Xalça Muzeyində rəssam, kinorejissor, incəsənət nəzəriyyəçisi Teymur Daiminin “İnancdan mədəniyyətə” (“От Культа к Культуре”) kitabının təqdimatı keçirilib.
Müəllif mədəniyyətin mənəviyyat, iman, ənənə, mistisizm, həmçinin digər müasir problemləri ilə maraqlanan geniş oxucu kütləsi üçün qələmə aldığı kitab haqqında ətraflı məlumat verib.
Teymur Daimi tədbir iştirakçılarını maraqlandıran sualları cavablandırıb, onlarla fikir mübadiləsi aparıb.
Qonaqlara həmçinin “İnancdan mədəniyyətə” (“От Культа к Культуре”) kitabı hədiyyə olunub.
“Ədəbiyyat və incəsənət”
(17.03.2023)
Beynəlxalq Türk Mədəniyyəti və İrsi Fondu Varşava Universiteti ilə əməkdaşlıq edəcək
Beynəlxalq Türk Mədəniyyəti və İrsi Fondunun prezidenti Günay Əfəndiyeva Polşaya səfəri çərçivəsində Varşava Universitetinin rektoru Aloyzi Novak ilə görüşüb.
Fonddan verilən məlumata görə, görüşdə Beynəlxalq Türk Mədəniyyəti və İrsi Fondu ilə Varşava Universitetinin Türk xalqlarının mədəni irsinin təşviqi yönündə qarşılıqlı iş birliyi məsələləri müzakirə olunub. Bu istiqamətdə birgə konfrans, seminar, sərgilərin keçirilməsi, Universitetin Türk dünyası ilə bağlı tədqiqat işləri aparan tələbələri üçün təqaüd proqramlarının ayrılması qeyd olunub.
Universitetdə Fondun himayəsi ilə Türk dünyasının elmi tədqiqat və araşdırmaları mərkəzinin yaradılması ətrafında fikir mübadiləsi edilib.
Görüşün sonunda Beynəlxalq Türk Mədəniyyəti və İrsi Fondu ilə Varşava Universiteti arasında əməkdaşlıq haqqında anlaşma memorandumu imzalanıb.
Sonra Fondun prezidenti Universitetin müəllim heyəti və Türkologiya fakültəsinin tələbələri ilə görüşüb.
Günay Əfəndiyeva Fondun qədim köklərə malik türk xalqlarının zəngin dəyərlərinin qorunması, yayılması və gələcək nəsillərə ötürülməsi üzrə fəaliyyətindən söz açıb. Fondun prezidenti rəhbərlik etdiyi təşkilatın Universitet ilə imzaladığı memorandumun əsas məqsədlərindən, eləcə də səmərəli iş birliyi və gələcək birgə layihələr üçün yaratdığı imkanlardan bəhs edib.
Tədbirdə Universitetin Türkologiya fakültəsində təhsil alan, Türk dövlətlərini təmsil edən tələbələr tərəfindən kiçik konsert proqramı təqdim olunub.
Sonda tədbir iştirakçılarına Novruz xonçası və milli şirniyyatlar təqdim olunub.
“Ədəbiyyat və incəsənət”
(17.03.2023)
İradə və güc nümayişi
“Azərbaycanda Rusiya kinosu günləri” keçiriləcək
Ölkəmizdə fəaliyyət göstərən Rusiya İnformasiya-Mədəniyyət Mərkəzi qonşu dövlətin Ukraynaya təcavüzündən sonra çox fəaldır və mədəni tədbirləri sıralamaqdadır. Bu tədbirlər sırasına daha biri əlavə edilib.
“Ədəbiyyat və incəsənət” portalı Mərkəzə istinadən xəbər verir ki, aprelin 5-dən 8-dək Bakıda “Azərbaycanda Rusiya kinosu günləri” keçiriləcək. Tədbirin ideyası kifayət qədər mötəbər təsisatlardan gəlir, tədbirin təşkilatçısı isə “ELS prodakşn” prodüser mərkəzidir.
“Azərbaycanda Rusiya kinosu günləri” keçirilməsi ideyası Rusiya Prezidentinin mədəniyyətlərarası əməkdaşlıq üzrə xüsusi nümayəndəsi Mixail Şvıdkoy, Rusiya Xarici İşlər Nazirliyi, Rusiya Sülh Fondu, Azərbaycan Mədəniyyət Nazirliyi, Rusiyanın Azərbaycandakı səfirliyi, Bakıdakı Rus Evi, Bank VTB (Azərbaycan), “Savalan “Savalan - ASPI Winery” şirkəti, “Hyatt Regency Baku” və Natalya Naftaliyevanın Moda Evi tərəfindən dəstəklənib.
“Azərbaycanda Rusiya kinosu günləri”nin proqramına Rusiyada istehsal edilmiş dörd yeni tammetrajlı kinofilmin nümayişi, həmin filmlərin müzakirəsi və hər bir filmi təqdim edən bir aktyotla yaradıcılıq görüşü daxildir.
Filmlər “Nizami” kino mərkəzində və Beynəlxalq Muğam Mərkəzində nümayiş etdiriləcək.
“Azərbaycanda Rusiya kinosu günləri”nin təntənəli açılış mərasimi aprelin 5-də “Nizami” kino mərkəzində keçiriləcək. Nümayiş ediləcək filmlər bunlardır:
5 aprel, “Nizami” kino mərkəzi
“On bir susqun kişi”
(rejissor Aleksey Pimanovun bu filmini teatr və kino artisti Pavel Kraynov təqdim edəcək).
6 aprel, Beynəlxalq Muğam Mərkəzi “Suvorov: Böyük səyahət”
(rejissor Boris Çertkovun filmini Rusiyanın Xalq artisti, Yevgeni Vaxtanqov adına Dövlət Akademik Teatrının aktrisası Yuliya Rutberq təqdim edəcək).
“Libereya: Xəzinə ovçuları” (rejissor Qleb Orlovun filmi)
7 aprel, Beynəlxalq Muğam Mərkəzi
Rusiya Federasiyasının Xalq artisti Yuri Nazarov və teatr və kino artisti Polina Neçitaylo ilə yaradıcılıq görüşü keçiriləcək.
8 aprel, “Nizami” kino mərkəzi
“1941. Berlin üzərində qanadlar” (rejissor Konstantin Buslovun filmini teatr və kino artisti, “Dram sənəti məktəbi” teatrının aktyoru Andrey Xarenko təqim edəcək).
Bakı “Azərbaycanda Rusiya kinosu günləri” ilə bağlı bütün tədbirlərin aparıcısı teatr və kino artisti, “Teatr na Taqanke”nin aktrisası Polina Neçitaylo olacaq.
Bu layihənin prodüseri Rusiyanın Əməkdar mədəniyyət işçisi Yelena Lebedevadır.
“Azərbaycanda Rusiya kinosu günləri” aprelin 8-də baş çatacaq.
“Ədəbiyyat və incəsənət” portalı filmlərin biri barədə fikir söyləməklə ümumi təsəvvür yarada bilər. İlk nümayiş olunan “On bir susqun kişi” filmi soyuq müharibə şəraitində - 1945-ci ildə Moskvanın “Dinamo” futbol klubunun Britaniyaya səfərindən bəhs edir. Film sadəcə futbol klubunun timsalında rus insanının necə iradə və güc sahibi olmasını sübut edir.
Kim deyər ki, bu, güc nümayişi deyil?
Şəkildə: filmdən kadr
“Ədəbiyyat və incəsənət”
(17.03.2023)
Parisdə Novruz bayramı təntənəli şəkildə qeyd edilib
Azərbaycanın Fransadakı səfirliyinin və Mədəniyyət Nazirliyinin birgə təşkilatçılığı ilə xalqımızın milli adət-ənənələrini və mənəvi dəyərimizi özündə ehtiva edən Novruz bayramı Parisdə səfirliyimizin Mədəniyyət Mərkəzində qeyd olunub.
“Ədəbiyyat və incəsənət” portalı AzərTAC-a istinadən xəbər verir ki, bayram şənliyində Azərbaycanın Fransadakı səfiri Leyla Abdullayeva çıxış edərək Novruz bayramının fəlsəfəsi, bu bayramla bağlı adət-ənənələrimizdən danışıb. Mart ayında Azərbaycanın ən qədim, ən sevimli bayramlarından biri olan Novruzu təntənə ilə qeyd etdiyini deyərək, onun xalqımızın ənənəvi dəyərlərini özündə ehtiva etdiyini vurğulayıb.
Qeyd edib ki, ölkədə Novruz bayramı həmişə yer üzünün, təbiətin dirçəlməsinin, mənəvi saflığın, bərabərliyin təntənəsi olub. Bu gün qədim günəş təqviminə görə yazın və yeni ilin başlanğıcı bayram edilir. Novruzun 3 min ildən artıqdır planetimizin müxtəlif məkanlarında qeyd olunduğunu söyləyən səfir bu bayramın nəsillər, insanlar arasında sülhü, barışığı və həmrəyliyi nümayiş etdirdiyini diqqətə çatdırıb.
Leyla Abdullayeva bildirib ki, Novruz bayramı bəşəriyyətin mədəni müxtəlifliyini əks etdirir, müxtəlif ölkələrin xalqları və icmaları arasında dostluğa töhfə verir.
Bolluğun, bərəkətin və xeyirxahlığın təcəssümü olan Novruz bayramı artıq beynəlxalq səviyyədə qeyd olunur. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın böyük zəhməti nəticəsində bu bayram UNESCO-nun Qeyri-Maddi Mədəni İrs Siyahısına daxil edilib.
Novruz fəlsəfəsinin əsasında birliyik və dialoq yaratmaq, insanlar arasında körpü qurmaq olduğunu nəzərə alaraq, müxtəlif ölkələrin Fransada akkreditə olunmuş səfirləri, diplomatları, Parisdəki beynəlxalq təşkilatların, Fransa XİN-nin, eləcə də yerli mədəniyyət nümayəndələri, bu ölkədəki Azərbaycan icmasının üzvləri bayram tədbirində iştirak ediblər.
Azərbaycanın Novruz adət-ənənəsi əks etdirən xonçalar tədbirə xoş əhvali-ruhiyyə qatıb.
“Ədəbiyyat və incəsənət”
(17.03.2023)
“Yazıçı üçün zaman suyun axını, keçənin geri dönməyəcəyi, düşüncənin alt qatdır” - Sabir Alim
Adətən çox tanınmışlardan müsahibələr alınır və oxucu da buna adət edib. Amma “Ədəbiyyat və incəsənət” portalının “Tanıdaq” rubrikası tanınmağa layiq olanları üzə çıxarıb təqdim edir. Əməkdaşımız Habil Yaşar bu dəfə pedaqoq, şair Sabir Alim ilə söhbətləşir.
1. Öncə özünüz haqqda məlumat verərdiniz.
Əsədov Sabir Alim oğlu, ədəbi təxəllüsüm Sabir Alim. 1980-ci il 18 sentyabrda Neftçala rayonunun Dördlər kəndində anadan olmuşam. 1997-ci ildə qonşu Astanlı kənd orta məktəbinin 11-ci sinfini, 2002-cu ildə isə Azərbaycan Dövlət Pedaqoji Universitetinin filologiya fakültəsini bitirmişəm. 2011-ci ildə Azərbaycan Müəllimlər İnstitutunun filologiya fakültəsinin magistraturasını, 2021-ci ildə isə Azərbaycan Milli Elmlər Akademiyası Məhəmməd Füzuli adına Əlyazmalar İnstitutunun Doktoranturasını bitirmişəm. "Müasir Cənubi Azərbaycan Poeziyasında Milli- Mənəvi Dəyərlərin Bədii İnikası (1979- 2019) mövzusunda fəlsəfə üzrə fəlsəfə doktoru elmi dərəcəsi almaq üçün dissertasiya işim bitmək üzrədir. Elmi əsərlərim Azərbaycanda və xaricdə çap olunub. 2002-ci ildən Azərbaycan Yazıçılar Birliyinin üzvüyəm. 2005-ci ildə " İlin ən yaxşı şeiri" nominasiyası üzrə təltif olunmuşam. 2008-ci ildə Prezident təqaüdünə layiq görülmüşəm. 3 şeir kitabının müəllifiyəm.
2. İlham mənbəyiniz nədir?
Bu gün üçün ilham mənbəyim 44 günlük Vətən müharibəsində vətən övladlarının göstərdiyi şücaətlər və qəhrəmanlıqlar, Ali Baş Komandanın verdiyi qərarlar və dünya miqyasında uğurlu siyasət, tarixi və siyasi qələbəmizdən soğan məmnunluq hissidir.
3. Xəyal dünyanızın bu qədər genişlənməsinə səbəb olan hadisələr hansılardır?
44 günlük Vətən müharibəsində qazandığımiz qələbə, ölkəmizdəki quruculuq və yenidənqurma işləri, gələcəyə inam hissi və s.
4. Əsərlərinizi ən çox harada yazmağı sevirsiniz?
Əsərlərimi , əsasən, evdə yazmağı xoşlayıram.
5. Yazmaq sizin üçün nə deməkdir?
Yazmaq, hər bir yaradıcı insan üçün,
məncə, yaşamaq, nəfəs almaq, yenidən doğulmaq kimi bir hissdir. Bəzən mənə elə gəlir ki, yazdıqlarımiz da bizim övladlarımız kimidir. Odur ki, çalışıram keyfiyyətli və səviyyəli bir əsər yazım. Bir də, yazdığımı tərbiyə edə bilim.
6. Yazıçı üçün zaman nə deməkdir?
Yazıçı üçün zaman suyun axını, keçənin geri dönməyəcəyi, düşüncənin alt qatdır. Zaman keçir, əsər qalır. Zaman keçici, söz qalıcıdır. Amma elə söz yazmalı, elə əsər yaratmalısan ki, zamanı qabaqlaya bilsin.
7. Ümumiyyətlə hansı janrda kitablar oxuyursunuz və niyə bu janra üstünlük verirsiniz?
Ən çox roman, dram oxumağı sevirəm. Bir də yaxşı yazılan əsərlərin janr fərqi önəmli deyil.
8. İlk dəfə nə vaxt “yazıçı olacağam” demisiniz?
Bir az inandırıcı gəlməyəcək. Onda heç məktəbə getmirdim. Hərfləri tanımırdım. İlk şeirim "Dağlar" şeiri olub. Bir dəftərə dağ şəkilləri çəkmişdim. Elə bilirdim şeir belə olur. Sonradan hərfləri öyrəndim. Yazdıqlarımı bibimə oxuyardım. Sonra Azərbaycan dili və ədəbiyyat müəllimim Raqif Həsənova oxuyardım. İndi dünyasını dəyişib. Allah rəhmət etsin.
9. Sizcə, kitab oxumaq vərdişini qazanmaq üçün nə etmək lazımdır?
Mütaliə hər kəs üçün vacibdir. İstər söz adamı ol, istərsə olma. Mütaliə edək vacibdir.
10. Yeni bir kitab yazmaq planınız varmı?
Şuşa haqqında kitab yazmaq istəyirəm. Həm də, bayaq dediyim kimi, 44 günlük müharibə və qələbəmizi canlandırmaq üçün çalışmaliyam. Amma bu, çox məsuliyyətli bir işdir. Düşünurəm ki, bacara bilərəm.
11. Yazıçı olmaq istəyən gənclərə hansı məsləhətləriniz var?
İstər yaşlı nəsil, istər cavan nəsil, mən düşünürəm ki, hamımızın daim məsləhətə ehtiyacımız var. Atalar sözü var: Məsləhətli don gen olar. Çox mütaliə etmək, tarixi hadisələri dərindən izləmək lazımdır. Bir də, klassiklərimizdən bəhrələnmək lazımdır.
“Ədəbiyyat və incəsənət”
(17.03.2023)
Süsən Nəvadə Rəzini itirdik
“Ədəbiyyat və incəsənət” portalının Güney təmsilçiliyindən üzücü xəbər aldıq. Böyük təəssüf hissi ilə bildiririk ki, ikiyə bölünmüş Azərbaycanın cənub hissəsində Azərbaycan məfkurəsinə xidməti ilə tanınan işıqlı bir şəxs - “Sancaq" qəzetinin baş redaktoru, şair, publisist Susən Nəvadə Rəzi vəfat edib.
Güney Azərbaycanın mədəni hərəkatında çox böyük əməyi olan bir qadını itirdik, Allah rəhmət eləsin!
“Ədəbiyyat və incəsənət”
(17.03.2023)
İçərişəhərdə “Bayram qalası” qurulacaq
Azərbaycanın tarixi ənənələrini və mədəniyyətini özündə əks etdirən, yerli sakinlərin və ziyarətçilərin asudə vaxtının bayram günlərində maraqlı və səmərəli keçməsi məqsədilə paytaxtımızda “Bayram qalası” günləri keçiriləcək.
Tədbirlərə ilk olaraq martın 19-da saat 13:00-da Qoşa Qala meydanında quraşdırılacaq səhnədə konsert proqramı ilə start veriləcək. “Bayram qalası” günləri martın 26-da saat 12:00-dan 22:00-dək davam edəcək.
Həmin günlər ərzində qurama, rəssamlıq, nano-art, keramika kimi sənətkarların əl işləri nümayiş etdiriləcək, ustad dərsləri keçiriləcək və həmin məhsullardan ibarət yarmarkalar təşkil olunacaq. Tədbirlərdə, həmçinin milli mətbəx nümunələri hazırlanacaq və milli kinomuzun incilərindən səhnəciklər nümayiş olunacaq.
“Ədəbiyyat və incəsənət”
(17.03.2023)
“Yad qadının məktubu” bazar günü oxunacaq
Martın 19-da müstəqil “M.Teatr”ın (“Mənim teatrım”) səhnəsində dünyaşöhrətli yazıçı Stefan Sveyqin “Yad qadının məktubu” adlı məşhur novellası əsasında hazırlanmış eyniadlı tamaşa nümayiş olunacaq.
Tamaşanı səhnələşdirən və quruluşçu rejissoru Xalq artisti Vidadi Həsənov, bəstəkarı Röya Hüseynova, rəssamı Ülkər Əliyeva, rejissor köməkçisi Səbinə Süleymanovadır.
Qeyd edək ki, “Yad qadının məktubu” Ştefan Svayqın ən məşhur novellalarından biridir. Bu əsər dünyanın bir çox ölkələrində tərcümə olunub. Əsərdə məşhur romançı tanımadığı, bəlkə də xatırlamadığı yad bir qadından məktub alır. Məktubu oxuduqca məlum olur ki, bu qadın bütün ömrü boyu yalnız onu sevib. Qadın həyatda romançı ilə qarşılaşdığı bütün məqamları xırdalığına kimi təsvir edir.
Biletləri iTicket.az saytı və şəhərin kassalarından əldə etmək mümkündür.
“Ədəbiyyat və incəsənət”
(17.03.2023)
Bazar günü “Cırtdan” Opera və Balet Teatrında peyda olacaq
Budur, Novruz tətillərinə yetişdik. Azərbaycan Dövlət Akademik Opera və Balet Teatrının balaca tamaşaçılara hədiyyəsi var. Uşaqlar martın 19-da sənət ocağının səhnəsində “Cırtdan” operasını izləyə biləcəklər.
Həmin gün uşaqların zövqünü oxşayacaq səhnə əsərində əsas rolları Əməkdar artistlər İnarə Babayeva, Səbinə Vahabzadə, Tural Ağasıyev, teatrımızın solistləri Mahir Tağızadə, Aynel Mehdiyeva, Mələk İsrafilova, Dilarə Mustafayeva, Esmira Məmmədova və Elmira Qafarova ifa edəcək.
Opera balacaların bədii-estetik zövqünün formalaşması və onlarda kiçik yaşlarından akademik sənətə məhəbbət və maraq aşılamaq məqsədilə hazırlanıb. Bəstəkarı Nazim Əliverdibəyov olan səhnə əsəri Əməkdar incəsənət xadimi Sevil Hacıyeva tərəfindən idarə olunacaq. Operanın quruluşçu rejissoru Əməkdar incəsənət xadimi Hafiz Quliyevdir.
“Ədəbiyyat və incəsənət”
(17.03.2023)
