Super User
Rerix paktı və ya bu gün Beynəlxalq İncəsənət Günüdür
Bu gün - aprelin 15-i mədəniyyət təqviminin əlamətdar günlərindən biridir. 1935-ci ilin bu günündə “Bədii, elmi müəssisə və tarixi abidələrin qorunması haqqında” Vaşinqton razılaşması (“Rerix paktı”) imzalanıb.
1998-ci ildə “Mədəniyyətin Müdafiəsi Beynəlxalq Liqası” adlı ictimai təşkilat bu tarixin “Beynəlxalq İncəsənət Günü” kimi qeyd olunması təşəbbüsü ilə çıxış edib. Həmin gündən etibarən, 15 aprel bir sıra ölkələrdə, o cümlədən, Azərbaycanda müxtəlif tədbirlərlə qeyd olunur. Azərbaycan qədim zamanlardan dünya mədəniyyətinin zəngin bir parçası kimi tanınıb və bəşəriyyətin mədəni inkişafına öz töhfələrini verib. Azərbaycan xalqı tarixən öz mədəni özünəməxsusluğunu qoruyaraq, gələcək nəsillərə ərməğan edib. Ölkəmizdəki bu özünəməxsusluq həm də çoxmədəniyyətliliklə bağlıdır. Yəni, tarixən müxtəlif dinə, etnik mənsubiyyətə malik xalqlar Azərbaycanda tolerant şəkildə yaşayıblar. Dünyaya örnək olan bu birgəyaşayış ölkəmizdə problemlərlə, qarşıdurmalarla deyil, mədəni zənginliklə müşayiət olunub. Bu gün Azərbaycan malik olduğu zəngin mədəni irslə beynəlxalq aləmdə məşhurdur. Həmçinin, ölkəmiz dünyanın ən böyük mədəniyyət təşkilatı olan UNESCO ilə sıx əməkdaşlıq edir, Azərbaycanın mədəni dəyərləri bu qurum vasitəsilə dünyada təbliğ olunur.
UNESCO-nun müvafiq siyahılarında çox sayda maddi və qeyri-maddi mədəni irs nümunəmiz yer alır. Mədəni irsimizin qorunması, gələcək nəsillərə çatdırılması və dünyada tanıdılmasında Heydər Əliyev Fondunun prezidenti, UNESCO-nun xoşməramlı səfiri Mehriban xanım Əliyevanın misilsiz xidmətləri var. Heydər Əliyev Fondu Azərbaycan mədəniyyəti ilə yanaşı, dünya mədəni irsinin qorunması və bərpasına da öz töhfələrini verir. Bu da onu göstərir ki, Azərbaycan mədəniyyət məfhumuna qlobal kontekstdə yanaşır, bir bütün olaraq qəbul edir. Bu, eyni zamanda, özünü hər il ölkəmizdə təşkil edilən beynəlxalq festivallarda, rəngarəng mədəni layihələrdə daha aydın göstərir. Dünyaca məşhur incəsənət xadimləri ölkəmizə gələrək, həm öz mədəniyyətlərini nümayiş etdirirlər, həm də Azərbaycandakı mədəni çeşidliliklə tanış olurlar.
Azərbaycan Respublikasının Mədəniyyət Nazirliyinin yeni tərkibinin yorulmaz əmək sərgiləyərək mədəniyyətimizin inkişafına, beynəlxalq mədəniyyətə inteqrasiyasına verdiyi töhfələri də qeyd etmək yerinə düşərdi. Bir baxın, mədəniyyət naziri Anar Kərimov, mədəniyyət nazirinin birinci müavini Elnur Əliyev, nazirliyin digər səlahiyyətli şəxsləri hər gün hansısa bir mötəbər mədəniyyət hadisəsinə şahidlik edirlər, görüşlər keçirirlər, media qarşısında dayanıb açıqlamalar verirlər, beynəlxalq tədbirlərə qatılırlar. Nazirliyin fəaliyyət proqramı, iş qrafiki dedikcə sıxdır.
Bütün bunlar onu deməyə əsas verir ki, bizim mədəniyyətimiz çiçəklənməkdədir, biz dünya mədəniyyəti ilə sıx bağlıyıq və mədəni əlaqələrimiz sərhədlərə sığmır.
Azərbaycan mütərəqqi mədəni ideyalara, beynəlxalq konvensiyalara qoşulmaqla qalmır, eyni zamanda, onların gerçəkləşməsinə real dəstək verir.
Demək ki, Nizami yurdu haqlı olaraq dünyanın mədəniyyət beşiklərindən biri sayılmağa iddialıdır.
Biz Beynəlxalq İncəsənət Günü münasibətilə bütün mədəniyyət və incəsənət xadimlərimizi səmimi qəlbdən təbrik edirik!
Uşaq incəsənət məktəbində Tofiq Quliyevin xatirəsi anılıb
Bakı Şəhər Mədəniyyət Baş İdarəsinin 5 nömrəli uşaq incəsənət məktəbində Xalq artisti, Azərbaycan caz və estrada musiqisinin banilərindən biri olan Tofiq Quliyevin anadan olmasının 105 illiyinə həsr olunmuş konsert keçirilib.
Baş İdarədən AzərTAC-a bildirilib ki, tədbirdə vokal ixtisası üzrə müəllim Xəyalə Hüseynova Tofiq Quliyev haqqında geniş məlumat verib.
Vurğulanıb ki, Azərbaycan bəstəkarlıq məktəbinin tanınmış sənətkarlarından söz açarkən, qeyri-ixtiyari olaraq daxili dünyamızda iz salan Tofiq Quliyev musiqisini xatırlayırıq. Tofiq Quliyevin uzun illərdən bəri ölkəmizdə və onun sərhədlərindən uzaqlarda səslənən, ilkin təravətini itirməyən mahnıları, həyatımızın salnaməsinə çevrilib. Tofiq Quliyev hər şeydən əvvəl fərdi üslub xüsusiyyətlərinə malik mahnıların müəllifi kimi tanınıb.
Vokal sinfi şagirdlərinin ifasında bəstəkarın "Əziz surət", "Kamilin mahnısı", "Qızların mahnısı", "Sənədə qalmaz", "Axşam oldu", "Məhəbbət çırağı" və başqa mahnıları səsləndirilib.
Sonra şagirdlər konsertmeyster Samirə Eyvazovanın müşayiətilə Azərbaycan, rus və Avropa bəstəkarlarının əsərlərini ifa ediblər. Konsertin sonunda şagirdlərə həvəsləndirici diplomlar təqdim edilib.
Günün fotosu: Co Bayden Putini yenidən “genosid müəllifi” elan edib
Günün fotosu: Co Bayden Putini yenidən “genosid müəllifi” elan edib
ABŞ prezidenti Co Bayden Rusiya prezidenti Vladimir Putinin Ukrayna ilə bağlı siyasətini "soyqırımı" hesab etdiyi barədə fikirlərini təkrarlayıb. Bu barədə o, çərşənbə axşamı Ayova ştatının paytaxtı de-Moyna hava limanında onu qarşılayan jurnalistlərə bildirib:
– Bəli, mən bunu soyqırımı adlandırdım, çünki getdikcə daha aydın olur ki, Putin, sadəcə, ukraynalı olanları məhv etməyə çalışır.
Foto: Euronews
Əlibala Məhərrəmzadənin “Çovdar çörəyi” Özbəkistanı fəth edir
Özbəkistanda çıxan “Darakçi” nəşrində Azərbaycan yazıçısı Əlibala Məhərrəmzadənin “Çovdar çörəyi” romanı hissə-hissə dərc edilir. Roman həm də “Yenigün” nəşriyyatında kitab kimi çıxacaq.
“Ədəbiyyat və incəsənət” portalı xəbər verir ki, atalar və oğullar arasında ənənəvi ziddiyyət mövzusuna toxunan bu roman Azərbaycanda 2019-cu ildə nəşr edilib və böyük uğur qazanıb. Azərbaycan ədəbi tənqidinin görkəmli nümayəndələri Nizami Cəfərov, Vaqif Yusifli, tanınmış yazıçı İlqar Fəhmi roman barədə müsbət rəylər vermişlər.
Romanın mövzusu kinossenarilər yazılmasına da rəvac vermişdir. Görkəmli kinodramaturq Ramiz Fətəliyevin yazdığı ssenari xüsusilə diqqətçəkəndir.
Məşhur fransalı bloger və komediya ustası Patrik Veiseller Azərbaycana niyə gəlib?
Eşidəndə ki, sosial mediada yüz minlərlə izləyicisi olan, eləcə də komedik stand-up-ları ilə böyük izləyici auditoriyasına malik olan fransalı Patrik Veiseller bir müddətdir ki, Azərbaycandadır, qəribə dizaynlı pikap avtomobillə magistrallarımızda şütüyür, düşündük, görək nə məsələdir? Dərhal deyək ki, xoşməramlı səfərdir və xeyrimizədir.
Mədəniyyət Nazirliyinin dəvəti ilə ölkəmizə gələn Patrik Veiseller çəkilişlər aparır, bundan sonra isə sosial media hesablarından və həmçinin "Netflix" platforması üzərindən Azərbaycan mədəniyyətinin təbliğatına yönələn layihəni təqdim edəcək.
“Ədəbiyyat və incəsənət” portalı xəbər verir ki, avtomobil turu formatında həyata keçirilən layihədə Fransanın komediya ustası və bloggeri “Patrick le Chinois” ləqəbi ilə tanınan Patrik Veiseiller Azərbaycanın tarixi, milli-mədəni irsi, tolerant və multikultural mühiti barədə verilişlər hazırlamaq məqsədilə Mədəniyyət Nazirliyinin əməkdaşlarından ibarət qrupla Naftalan, Göygöl, Şəki, Bakı və digər bölgələrə səfər etməkdədir.
Naftalan Şəhər İcra Hakimiyyəti tərəfindən yüksək səviyyədə qarşılanan qonağa şəhər barədə ətraflı məlumat verilib və Naftalanın əsas görməli mədəni-tarixi yerlərində çəkilişlərin aparılmasına şərait yaradılıb.
Qeyd edək ki, bloger, həmçinin, paytaxt Bakı və şəhərin memarlığı, mədəni mühiti ilə bağlı da çəkilişlər
aparıb, bu reportajları da təqdim edəcək.
Sırada isə adlarını çəkdiyimiz digər rayonlar dayanır.
Yunus Oğuzun yeni kitabı çapdan çıxıb
"Hökümət o zaman özünə potensial üsyançılar hazırlayır ki,cəmiyyətdə xurafatlaşma, cahilləşmə, zombiləşmə sürətlənir, riyakarlıq, saxtakarlıq baş alıb gedir. Bu zaman milli-mənəvi və maddi dəyərlərin, vətənpərvərliyin təbliği effekt vermir, dövlətçilik anlayışı isə məmur və ictimai status anlayışı ilə eyniləşdirilir".
“Ədəbiyyat və incəsənət” portalı xəbər verir ki, yazıçı-publisist Yunus Oğuzun yeni çapdan çıxan "Keçmişdən gələcəyə nə daşıyırıq- Tarix İbrətdir" adlı kitabı bu epiqrafla başlayır.
Kitabda müstəqillik uğrunda mübarizə illərindən günümüzə qədər olan proseslər oxucunun diqqətinə çatdırılır.
Bu dəfə Seyid Şuşinski!
Bildiyiniz kimi, Beynəlxalq Muğam Mərkəzi (BMM) muğam sənətimizin elmi-nəzəri və praktiki məsələlərini "Dəyirmi masa" ətrafında müzakirə edir. Layihədə növbəti tədbirin görkəmli xanəndə Seyid Şuşinskiyə həsr olunduğunu bildirmişdik. Bu dəfə daha ətraflı.
Beləliklə, qeyd edək ki, layihənin ideya müəllifi BMM-in direktoru, Xalq artisti Murad Hüseynov, koordinatoru isə fəlsəfə doktoru, tədqiqatçı Gülhüseyn Kazımlıdır.
“Seyid Şuşinski – ustad xanəndə, böyük müəllim” adlı tədbir xanəndənin ad günündə reallaşıb.
Tədbirdə çıxış edənlər bildiriblər ki, zəngin yaradıcılıq yolu keçmiş, Qarabağ xanəndəlik məktəbinin ən böyük simalarından biri Xalq artisti Seyid Şuşinski musiqi xadimi, pedaqoq, müəllim kimi Azərbaycan milli musiqi mədəniyyətinin inkişafında çox mühüm rol oynayıb.
Xalq artisti, professor Möhlət Müslümov Seyid Şuşinskinin tələbəsi olmuş Əməkdar müəllim Nəriman Əliyevlə birgə çalışdığı dövrdə xanəndənin öz ustadından öyrəndiyini tələbələrinə olduğu kimi ötürdüyündən danışıb. Bildirib ki, bu gün də muğam dərslikləri həmin dövrdə Seyid Şuşinski tərəfindən tərtib edilən tədris proqramı əsasında çap olunur.
Bakı Musiqi Akademiyasının professoru Arif Əsədullayev diqqətə çatdırıb ki, “Ağa” deyərək müraciət olunan Seyid Şuşinski uzun illər dayısı Nəriman Əliyevin evində yaşayıb. O, 14 yaşından xanəndəni tanıdığını vurğulayaraq xatirələrini bölüşüb.
Əməkdar artist, tarzən Valeh Rəhimov Seyid Şuşinski ilə ilk dəfə tanışlığından danışaraq həmin gün eşitdiyi ifa ilə bağlı fikirlərini bölüşüb.
Seyid Şuşinski haqqında lentə alınan sənədli filmin rejissoru Kəmalə Musazadə filmin çəkilişlərindən danışıb.
Filmdə xanəndənin obrazını yaradan Əməkdar müəllim Qəzənfər Abbasov rolunun məsuliyyəti ilə bağlı təəssüratlarını bölüşüb.
Layihənin konsert hissəsində Xalq artisti Aygün Bayramova, BMM-in solistləri Əməkdar artist İlkin Əhmədov və xanəndə Məmməd Nəcəfovun ifaları təqdim olunub. Xanəndələri Xalq artistləri Möhlət Müslümov (tar) və Fəxrəddin Dadaşov (kamança) müşayiət edib.
Teatr Muzeyində Xalq artisti Məbud Məhərrəmovun 65 illiyi qeyd edilib
Aprelin 13-də Cəfər Cabbarlı adına Azərbaycan Dövlət Teatr Muzeyində tanınmış teatr və kino aktyoru, Xalq artisti Məbud Məhərrəmovun 65 illiyinə həsr olunmuş tədbir keçirilib.
AzərTAC xəbər verir ki, tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq, yubilyara təbriklərini çatdırıb, onun yaradıcılıq yolu haqqında məlumat verib.
Muzeyin əməkdaşı Suğra Niftullayeva aktyorun sənət fəaliyyətindən ətraflı danışıb.
Tədbirdə iştirak edən qonaqlardan Xalq artistləri Ramiz Həsənoğlu, Hacı İsmayılov, Xalq rəssamı Arif Hüseynov, Əməkdar incəsənət xadimi Adil Abbas, rejissor Oleq Səfərəliyev, Əməkdar artist Həcər Ağayeva və başqaları yubilyarı ad günü münasibətilə təbrik ediblər və onunla bağlı öz ürək sözlərini bölüşüblər. Təbriklərə, eyni zamanda aktyorun ailə üzvləri və dostları da qoşulub.
Tədbir çərçivəsində muzey əməkdaşları tərəfindən hazırlanmış və M.Məhərrəmovun həyat və yaradıcılığını əks etdirən videoçarx nümayiş olunub.
Həmçinin aktyorun oynadığı tamaşalardan və çəkildiyi filmlərdən fraqmentlər izlənilib. Eləcə də, Azərbaycan Dövlət Akademik Opera və Balet Teatrının solistləri Xalq artisti xanəndə Gülyaz Məmmədova “Nə gözəldir”, “Dilkəş təsnifi”, Fatimə Cəfərzadə və Prezident təqaüdçüsü Atəş Qarayev “Arşın mal alan” operettasından “Axtarıb tapdım səni”, “Aşiq oldum”, “Arşın mal alan” ariyalarını ifa ediblər.
Bunlardan əlavə, tədbir yubilyarın şərəfinə təşkil olunmuş xoş sürpriz ilə yadda qalıb. Məbud Məhərrəmovun U.Şeksprin “Kral Lir” tamaşasında yaratdığı Təlxək obrazında Xalq rəssamı Arif Hüseynov tərəfindən çəkilmiş portretinin təqdimatı olub.
Əsər Cəfər Cabbarlı adına Azərbaycan Dövlət Teatr Muzeyinin kolleksiyasına daxil edilib.
SW ekspertlərinin seçimi –“Sənə də heyifdir, mənə də heyif” (El Roman)
Beynəlxalq Silkway ədəbiyyat festivalının (Silkway International Literary Festival) Azərbaycan turunun müsabiqə mərhələsi davam edir. Festival ədəbiyyatımızın həm ölkə daxilində, həm beynəlxalq miqyasda təbliğinə yönəlib, gənc yazarların yaradıcılığına dəstək məqsədi güdür.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən festivalın devizi belədir: Sonda ədəbiyyat qalib gələcək!
Festivalın ekspertləri final mərhələsinə adlayacaq 30 iştirakçı seçimində əsas favoritlərin adlarını da açıqlayıblar. Bunlar Fərid Hüseyn, Mehdi Dostəlizadə, Eminquey, Ulucay Akif, El Roman, İntiqam Yaşar, Ramil Əhməd, Nargis İsmayılova, Tural Cəfərli, Bahəddin Salman, Ayxan Ayvaz, Orxan Həsəni, Aypara Ayxan, Ələsgər Əhməd, Ümid Nəccari, Murad Muradov, Rəvan Cavid və digərləridir.
“Ədəbiyyat və incəsənət” portalı əsas favoritlərlə oxucularını tanış etməkdədir.
Elroman Əlizadə Elçin oğlu (El Roman)
2000-ci il sentyabrın 2-də Yevlax şəhərində anadan olub. 2007-ci ildə Bakı şəhəri 129 nömrəli orta məktəbinə daxil olub. Azərbaycan Dillər Universitetinin Filologiya fakültəsinin alman dili və ədəbiyyatı fakültəsində təhsil alır.
Ciddi yaradıcılığa 2014-cü ildən etibarən başlayan Elroman "Sənsizliyin baş hərfi" (2020) adlı şeirlər kitabının müəllifidir. Azərbaycan Dillər Universitetində fəaliyyət göstərən Yazarlar Klubunun sədridir. Azərbaycan Yazıçılar Birliyinin üzvüdür.
2020-ci ildən "525-ci" qəzetdə müxbir vəzifəsində çalışır.
El Roman təxəllüsü ilə yazdığı şeirlər "525.az", "Kulis.az", "Manera.az" və digər saytlarda, eyni zamanda "Ulduz" və "Azərbaycan" jurnallarında, iki müxtəlif şeir antologiyasında dərc edilib. 2021-ci ildə üç şeiri ingilis dilinə tərcümə edilərək Nyu-Yorkda "Punjabi Writer Weekly" qəzetinin yanvar nömrəsində dərc edilib.
El Roman Dünya Gənc Türk Yazarlar Birliyinin təşkil etdiyi şeir müsabiqəsində ikinci yeri tutub. 2021-ci ildə Prezident təqaüdünə, 2022-ci ildə Gənclər və İdman Nazirliyinin “İlin gənci” mükafatına layiq görülüb.
Ekspertlərin fikrincə, El Roman elə ustalıqla poetik lövhələr qurur ki, bunların püxtələşmiş, on illərlə poeziyada olan bir peşəkarın qələmindən çıxdığını zənn edirsən. Halbuki o, hələ şox gəncdir.
Bir gün dərdiyin çiçək səni içinə çəksə,
Sevdiyin həmin adam deyəcək ki, çiçəksən...
Həmin gecə yuxuda özünü görəcəksən-
Dodaqların qırmızı, saçın uzun, laap uzun...
Yarasalar
Bir qoca dedi ki, hələ diriydi
dünən gömüləndə o qız torpağa.
Gəldiyi yerlərə qayıtdı hər şey-
adamlar torpağa, kağız torpağa...
Göyərsə göylərdə bir ağ göyərçin
Bu işə göylər də gülərdi, gərçi...
Sonra da darıxıb bu boz şəhərçün
Gəlib bulaşardı o toz-torpağa.
İstəsən, küləyə çevrilərəm
və
Saçların tərəfə çevrilərəm,
gəl.
Sən kimin olmusan min illər əvvəl?
adını oxudum cam kasalardan...
Deyən olmadımı vaxtı dayandır?
Tanrıyam, bilmirəm yerin hayandır...
Mağara ağzında cığara yandır,
məni də bir dəfə yada sal orda...
Mağara?!
görəsən, nəyin nəsidir?
Mağara - dağların əsnəməsidir.
Tərsinə asılmış quş qəfəsidir
Belə eşitmişəm yarasalardan...
Bir qoca dedi ki, hələ diriydi
dünən gömüləndə o qız torpağa.
Sonra...
Gəldiyi yerlərə qayıtdı hər şey-
adamlar torpağa, kağız torpağa...
Qızım
Bir gün dərdiyin çiçək səni içinə çəksə,
Sevdiyin həmin adam deyəcək ki, çiçəksən...
Həmin gecə yuxuda özünü görəcəksən-
Dodaqların qırmızı, saçın uzun, laap uzun...
Çöldə eşidəcəksən çirkinliyin səsini,
Evdə atan yeyəcək tikənin yekəsini.
İçində hiss edəndə təklik təhlükəsini,
Səndən soruşacaqlar, kimin qızısan, qızım?
Getmək istəyəcəksən, yolun tən yarısında
Ətirini, donunu, onu unutmasan da,
O gün unudacaqsan bir kitabı masanda
Bir də açılmayacaq otağının qapısı...
Bir az qocalacaqsan, bir az əsəcək dizin,
Bir az huşun itəcək, bir az əlinin duzu,
Yollara baxacaqsan, belə laap uzun-uzun...
Öləndə belə ölür qadınların yarısı.
Bir də açılmayacaq otağının qapısı...
Öləndə belə ölür qadınların yarısı...
"Saçın uzun, laap uzun, dodaqların qırmızı...
Üzüntün tanış gəlir, kimin qızısan, qızım?"
Canıyeva Göyərçin
Yerek...
Ratsiyadan səs gəlir:
-Canıyev, yerini de!
-Təpənin “A” nöqtəsi!
Ratsiyadan səs gəlir:
-Əbdülov, yerini de!
-Təpənin "B" nöqtəsi!
Erku...
On üç yaşlı Göyərçin
giley tökür kağıza:
"Ehh, bu riyaziyyat da
yığıb məni boğaza!
"A"-dan "B"-yə məsafə
Nə bilim, nə qədərdi?
atam olsa, bilərdi..."
"Canıyev,
aradakı məsafəni xəbər ver!" - Ratsiya hələ susmur...
İnsanlar özlərinə yaxşı təsəlli verir:
"Ordu müharibəni nə olsun, hələ udmur?
əsas odu, uduzmur..."
Mek!
Bu vaxt bir mərmi deşir
buludların bağrını.
Silahlar da diksinir
Partlayışın səsinə…
O partlayış,
əsgəri tutub “A” nöqtəsindən
atır “B” nöqtəsinə…
"Tapdım, anacan, tapdım!
Məsafə əlli metr!" - bərk qışqırır Göyərçin...
"Canıyev, nə baş verir?!" - Ratsiya ağı deyir...
birdən
əlaqə itir...
sonuncu nəfəs ilə,
Canıyev ratsiyanı dodağına gətirir.
Xırıltılı səs ilə:
"Komandir, əlli metr..."
Qonaq
Mən səni sevməsəm, başqası sevsə,
Sənə də heyifdir,
mənə də heyif.
Sarı dimdiyini mənə uzadıb
Çiyninin üstündə öpüş gözləyən
Buğda saçlarından ovucladığım
O quşa atdığım
dənə də heyif.
Hətta küçənizə raket də düşsə,
Ağappaq çiynindən jaket də düşsə,
Birinci vətənçün, sonra səninçün
Narahat olacaq adamlar ki var,
Onların gözünə qəm qonaq gedə.
Mənim də bəxtimə o səngər düşə...
Allahın əlindən bir çəngəl düşə,
Göylərə bu dəfə mən qonaq gedəm.
Daha ikimizdən oldu, olmadı,
Yenə də heyifdir,
yenə də heyif...
Mən səni sevməsəm, başqası sevsə,
Sənə də heyifdir,
mənə də heyif.
Şuşa İli”nə həsr olunmuş “Zəfər duyğuları”nda çağdaş poeziyamız təmsil olunur
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Türk Dünyası İnfo” İctimai Birliyi tərəfindən həyata keçirilən “Zəfər duyğularının ədəbiyyatda və nəşrlərdə təzahürü” adlı layihəsi əsasında “Zəfər duyğuları” poeziya antologiyası nəşr olunub. Kitab “Şuşa İli”nə həsr edilib.
Sözügedən antologiyada ümumilikdə 46 tanınmış şairin şeirləri yer alıb. Nəfis şəkildə, 300 tirajla çap olunmuş 220 səhifəlik nəşrin məsləhətçisi akademik, Milli Məclisin deputatı Nizami Cəfərov, “Ön söz”ün müəllifi AMEA-nın şöbə müdiri, filologiya elmləri doktoru, professor Bədirxan Əhmədli, redaktorları, Sumqayıt Poeziya Evinin direktoru, şair İbrahim İlyaslı və filologiya üzrə fəlsəfə doktoru, Atatürk Mərkəzinin şöbə müdiri İlahə Abdullayevadır.
Layihə ilə bağlı fikirlərini AzərTAC-a açıqlayan “Türk Dünyası İnfo” İctimai Birliyinin sədri Dəyanət Osmanlı deyib: “Tariximiz, cəmiyyətimiz üçün daimi gündəmdə olan ümdə məsələlərdən biri də ədəbiyyat vasitəsilə qələbəmizin ruhunda dayanan ictimai əhəmiyyətli faktların, milli-tarixi gələnəklərimizin, vətənpərvərlik tariximizin, o cümlədən milli-mənəvi dəyərlərimizin təbliğinin gücləndirilməsidir. Layihəmizin adından da bəlli olduğu kimi, Zəfər tariximizin təbliğinə yönələn əsərlərin, kitabların yazılmasına böyük ehtiyac vardır. Ona görə də layihənin məqsədinə uyğun olaraq ölkəmizdə, Türkiyədə, Gürcüstanda və digər bölgələrdə Vətən müharibəsindəki Zəfər tariximizi vəsf edən poetik əsərləri toplayıb dəyərləndirərək antologiya halında çap etmişik”.
Dəyanət Osmanlı xüsusi olaraq vurğulayıb ki, 44 günlük haqq savaşında əzəli və əbədi torpağımız Qarabağın kənd-kənd, rayon-rayon, şəhər-şəhər 30 illik erməni işğalından azad olunması hər bir Azərbaycan insanının həyatına yeni bir möhtəşəm qürur qatmışdır. Vətən müharibəsinin ədəbi-bədii, mədəni, tarixi-ictimai düşüncədə təsirləri təkcə Qarabağ mövzusu ilə kifayətlənmir, həm də yeni tarix yazılır. Bu amil yeni nəslin keçmişə, bugünə və gələcəyə baxışlarının optimallaşmasında mühümdür.
O, antologiyanı tərtib edərkən bir sıra məqamlara toxunulduğunu söyləyib: “Ədəbiyyat yeni nəsillərin milli ruhunda, dilində, adət-ənənəsində, vətənpərvərlik duyğularında, eləcə də müasir dünyada yaşayan bütün azərbaycanlıların bugünkü həyatının, gələcəyinin ən aktual stimulverici qüvvəsi kimi çıxış edir”.
Qeyd edək ki, kitabın kitabxanalara, ziyalılara və gənclərin daha çox təmsil olunduğu müxtəlif auditoriyalara, QHT nümayəndələrinə paylanılması nəzərdə tutulub.
