Super User
Fəaliyyətə başlamaq və nəticə əldə etmək!
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir
Bütün uğur formullarını sıxıb şirəsini çıxarsaq, təxminən belə bir nəticə əldə edə bilərik:
Uğur formulu=arzulamaq – qarşıya məqsəd qoymaq – planlaşdırmaq – hazırlaşmaq – fəaliyyətə başlamaq – nəticə əldə etmək.
Fəaliyyətə başlamaq
Fəaliyyətə haçan istədin, başlaya bilməzsən. Sən məqsədə çatmağa tam hazır olsan belə əlverişli zaman və şərait olmasa uğur qazana bilməzsən. Azərbaycanlı yazıçı Varis Yolçuyevin belə bir aforizmi var, «Özünün ən güclü zərbələrini yaşadığın zəmanənin ən zəif vaxtına saxla».
Buna görə də, məqsədyönlü fəaliyyətə başlamaq üçün mütləq əlverişli zamanı, əlverişli şəraiti gözləməyə məcbursan. Elə ki, ideal və ya ideala yaxın şərait yarandı, haydı, məqsədə doğru fəaliyyətinə başla.
Hər gün bircə dənə də olsa belə mütləq addım atmaq, hər gün məqsədə doğru ən azı bir qarış yaxınlaşmaq çox vacibdir.
Və ən əsası, məğlubiyyətdən qorxmadan qələbəyə doğru getməyiniz zəruridir.
Nəticə əldə etmək
Yalnız bütün şərtlərə doğru-dürüst əməl etdikdən sonra siz bir müddət öncə arzu şəklində olan, sonradan məqsədinizə çevrilən bir istəyinizi tam reallaşdıra biləcək, öz uğur formulunuz ilə uğurlu insana çevriləcəksiniz.
Beləliklə, mən uğur formulasının ən çox rast gəlinən formasını sizlərə təqdim etdim. Əlbəttə, kitab boyunca həm bu uğura gedən 6 addım, həm də digər addımlar barədə ən müxtəlif fikirlərlə, mövqelərlə də tanış olacaqsınız.
Hələlik isə bir şey deyim:
Bütün işlərin önündə başlamaq dayanır, tərəddüd etməyin, sadəcə başlayın!
“Ədəbiyyat və incəsənət”
(20.12.2022)
Türk xalqlarının minilliklər boyu qoruyub saxladığı dəyərlərin yaşadılmasına töhfə
Beynəlxalq Türk Mədəniyyəti və İrsi Fondunda “Türk dövlətləri: Şərq və Qərb arasında körpü” adlı dəyirmi masa keçirilib.
“Ədəbiyyat və incəsənət” portalı Beynəlxalq Türk Mədəniyyəti və İrsi Fondunun AzərTAC-a məlumatına istinadən xəbər verir ki, tədbir çərçivəsində Beynəlxalq Türk Mədəniyyəti və İrsi Fondu və Bakı Dövlət Universitetinin əməkdaşlığı ilə təşkil edilən, universitetin Şərqşünaslıq fakültəsinin 100 illik yubileyinə həsr olunmuş “Azərbaycan şərqşünaslığı Şərq-Qərb elmi-mədəni və ictimai-siyasi dialoqu kontekstində” mövzusunda beynəlxalq elmi konfransda iştirak edən qonaqlarla görüş təşkil olunub.
Dəyirmi masa Beynəlxalq Türk Mədəniyyəti və İrsi Fondunun fəaliyyətinin prioritet istiqamətlərini əks etdirən videoçarxın nümayişi ilə başlayıb.
Tədbiri giriş sözü ilə açan Beynəlxalq Türk Mədəniyyəti və İrsi Fondunun prezidenti Günay Əfəndiyeva tədbir iştirakçılarına türk dünyasının qədim mədəni irsinin öyrənilməsi, qorunması, və dünyada təbliği yönündə təşkilatın fəaliyyəti, həyata keçirdiyi müxtəlif layihələr haqqında məlumat verib. Günay Əfəndiyeva Bakı Dövlət Universitetinin Azərbaycanın mədəni-mənəvi inkişafına xidmət göstərən qocaman maarif ocaqlarından biri olduğunu vurğulayaraq, universitet ilə əməkdaşlığın önəmindən söz açıb. Fondun prezidenti türk dövlətlərindən olan elm və mədəniyyət xadimlərinin dəyirmi masada bir araya gətirilməsinin türk xalqları arasında mənəvi bağların möhkəmləndirilməsinə, onların daha da yaxınlaşmasına töhfə verdiyini vurğulayıb. Günay Əfəndiyeva dünya tarixinin önəmli bir parçası olan türk xalqlarının Şərq və Qərb sivilizasiyalarının qovuşduğu coğrafiyada məskunlaşmasından bəhs edərək, onların Avropa və Asiya arasında qarşılıqlı elmi-mədəni mübadilələrdə oynadığı rolun əhəmiyyətinə diqqət çəkib.
Dəyirmi masada çıxış edən Bakı Dövlət Universitetinin rektoru Elçin Babayev Şərq və Qərb mədəniyyətləri arasında körpü funksiyasını daşıyan türk dövlətlərinin həm fiziki, həm də mənəvi baxımdan böyük bir yol olduğunu vurğulayıb. Rektor müasir dövrdə türk dövlətlərinin bütün sahələrdə münasibətlərinin gücləndirilməsinin türk birliyi ideologiyasının inkişafına təkan verdiyini qeyd edib. Elçin Babayev təşkilat tərəfindən Türk Dünyasının inteqrasiyası yönündə aparılan işləri yüksək qiymətləndirərək, Fond ilə əməkdaşlıqdan məmnunluq duyduğunu dilə gətirib.
Tədbirdə çıxış edən Milli Məclisin deputatı Jalə Əliyeva eyni soydan gələn, ortaq milli-mədəni dəyərləri bölüşən dost və qardaş xalqlardan olan elm adamlarının görüşünü bayram adlandıraraq, Türk Dünyasının tarixi və mədəni irsinin beynəlxalq miqyasda tanıdılması məqsədilə Fond tərəfindən həyata keçirilən layihələri təqdirəlayiq hesab etdiyini bildirib.
Milli Məclisin deputatı, akademik Nizami Cəfərov türk xalqlarının məskunlaşdığı coğrafiyanın onların Avropa və Asiya arasında iqtisadi, siyasi, mədəni əlaqələrdə fəal iştirakını şərtləndirdiyini bildirib. Nizami Cəfərov dəyirmi masanın işini türk xalqlarının minilliklər boyu qoruyub saxladığı dəyərlərin yaşadılması və gələcək nəsillərə ötürülməsinə töhfə kimi qiymətləndirib.
Milli Məclisin deputatı Vüqar İskəndərov müasir dövrdə türk dövlətlərinin hərtərəfli münasibətlərin genişləndirilməsinin bütün türk dünyasında aktuallığından bəhs edib. Vüqar İskəndərov Fondun fəaliyyətinin türk xalqlarının mədəni cəhətdən inteqrasiyası yönündə böyük əhəmiyyətini vurğulayaraq, təşkilata uğurlar arzulayıb.
Dəyirmi masada Qazaxıstanın L. Qumilyov adına Avrasiya Milli Universitetinin Türkologiya fakültəsinin professoru Nurila Şahmerdanova, Qırğızıstanın Oş Dövlət Universitetinin Şərqşünaslıq fakültəsinin professoru Baybolot Abitov, Ankara Universitetinin elmi işlər üzrə prorektoru Mustafa Fənər, Özbəkistanın Daşkənd Dövlət Şərqşünaslıq Universitetinin Ərəb filologiyası kafedrasının müdiri, professor Şarustam Şamusarov, Macarıstanın Eotvos Lorand (ELTE) Universitetinin Şərqşünaslıq fakültəsinin müəllimi Andras Czentnar, Varşava Universitetinin Şərqşünaslıq fakültəsinin dekanı, professor Pyotr Taraka çıxış edərək, türk dövlətlərinin Avrasiya məkanında rolu haqqında fikir mübadiləsi aparıb, öz sahələri üzrə fəaliyyətləri haqqında məlumat verib və Fondun ümumtürk mədəniyyətinin təbliği yönündə gördüyü işləri yüksək qiymətləndiriblər.
Dəyirmi masanın sonunda iştirakçılara Fondun hədiyyələri təqdim olunub və xatirə şəkilləri çəkilib.
Tədbirin bədii hissəsində türk dövlətlərindən olan sənətçilərin ifasında türk xalqlarına məxsus mahnılar səsləndirilib, milli musiqilər ifa edilib.
“Ədəbiyyat və incəsənət”
(20.12.2022)
Azərbaycan və Türkiyə Mədəniyyət nazirlikləri arasında protokol imzalanıb
Bu gün Bakıda Azərbaycan Türkiyə birgə Mədəniyyət Komissiyasının ikinci iclası keçirilib.
“Ədəbiyyat və incəsənət” portalı AzərTAC-a istinadən xəbər verir ki, iclasda Azərbaycan və Türkiyə Mədəniyyət nazirlikləri arasında protokol imzalanıb.
Sənəddə iki ölkə arasında mədəni əlaqələrin gücləndirilməsi və əməkdaşlığın genişləndirilməsi məsələləri əks olunur.
“Əədbiyyat və incəsənət”
(19.12.2022)
Burak Özçivit Qətərdə izdihamla qarşılanıb
Dünya çempionatının final matçını izləmək üçün Qətərə gedən məşhurlar sırasında türkiyəli aktyor Burak Özçivit də yer almışdı.
“Ədəbiyyat və incəsənət” qafqazinfo"-ya istinadən xəbər verir ki, aktyor bu barədə sosial media hesabında paylaşım edib.
Bildirib ki, o, Adelali Binəlinin dəvəti ilə Qətərə gedib.
Qeyd edək ki, final matçını izləyənlər arasında Fransa Prezidenti Emmanuel Makron, Tviterin rəhbəri İlon Mask, "Milan"ın futbolçusu Zlatan İbrahimoviç və digərləri də yer alıb.
“Ədəbiyyat və incəsənət”
(19.12.2022)
Devid Linçin “Göy məxmər”ini bizlər də görə biləcəyik
Hazırda amerikalı məşhur rejissor Devid Linçin “Göy məxmər” filmi kassa gəlirlərinə görə öncül mövqelər tutur. Nədir filmə uğur gətirən? Nəfəskəsici süjet xətti.
Tələbə Ceff atasının insult keçirdiyini eşidərək, doğma Lumberton şəhərinə qayıdır. Xəstəxanadan evə gedərkən Ceff boş bir ərazidə kəsilmiş insan qulağı tapır. O, polis bölməsinə yollanaraq, bu barədə xəbər verir. Bölmədə uşaqlıq dostu, polis zabitinin qızı Sendi ilə də rastlaşır və ondan öyrənir ki, ilk baxışdan sakit, təhlükəsiz görünən şəhərdə gizli cinayətkar dəstə fəaliyyət göstərir. O, Ceffə deyir ki, launc-müğənnisi Doroti Vallensin həmin cinayətlə əlaqəsi ola bilər. Ceff öz araşdırmasına başlayır. Araşdırmanın izləri gözəl, müəmmalı qadın Dorotiyə və onun sevgilisi olan narkotik ticarətçisinə gedib çıxır.
Dekabrın 22-də paytaxtımızda - “Artım” layihə məkanında “Göy məxmər” filmi nümayiş olunacaq. “SAFEZONE” qrup sərgisi çərçivəsində göstəriləcək film ingilis dilində Azərbaycan subtitrləri ilə təqdim ediləcək.
Müddəti 120 dəqiqə olan ekran əsərinə hər kəsin baxa bilmək imkanı olacaq.
“Ədəbiyyat və incəsənət”
(19.12.2022)
Görkəmli bəstəkarın 100 illiyi bölgələrdə də qeyd edilir
Bu il görkəmli bəstəkar Fikrət Əmirovun 100 illiyinə ilidir, il boyu müxtəlif tədbirlər keçirilib. Sevindirici haldır ki, bölgələr də bu sayaq tədbirlərə qucaq açırlar. Növbəti ünvan Şəki olub.
Qara Qarayev adına Mərkəzi İncəsənət Məktəbi Şəki şəhərində yerləşən Heydər Əliyev Mərkəzində Şəki şəhər Uşaq İncəsənət Məktəbi ilə birgə yubileyə həsr edilmiş "Azərbaycan ətirli bəstəkar" adlı tədbir keçirib.
Qara Qarayev adına Mərkəzi İncəsənət Məktəbindən mediaya verilən məlumata görə, məktəbin müəllimi, musiqişünas Nərgiz Kərimova tədbir boyunca Fikrət Əmirovun yaradıcılığını işıqlandıraraq, bəstəkarın sehrli musiqi dünyasından söhbət açıb.
Tədbirdə Qara Qarayev adına Mərkəzi İncəsənət Məktəbinin müəllimləri, “Zirvə” folklor instrumental ansamblı (bədii rəhbər Şəki şəhər Uşaq İncəsənət məktəbinin direktoru Eldar Rəcəbov) və Şəki şəhər Uşaq İncəsənət məktəbinin orkestri tərəfindən səsləndirilən bir-birindən gözəl ifalar dinləyicilərə musiqi bayramı yaşadıb.
Sonda Şəki Regional Mədəniyyət İdarəsinin rəisi Azər Yusubov, Qara Qarayev adına Mərkəzi İncəsənət Məktəbinin direktoru, Əməkdar artist Əziz Qarayusifliyə və Şəki şəhər Uşaq İncəsənət Məktəbinin direktoru Eldar Rəcəbova, eyni zamanda bütün tədbir iştirakçılarına belə bir möhtəşəm konsertə görə öz minnətdarlığını bildirib.
“Ədəbiyyat və incəsənət”
(19.12.2022)
Rəsm qalereyası: Fərhad İbrahimli, “Bakı etüdləri” silsiləsindən
Rəsm qalereyası: Fərhad İbrahimli, “Bakı etüdləri” silsiləsindən
Bu ilin sonunadək Azərbaycana gələn turistlərin sayı 1,5 milyonu keçəcək
Qarşıdan Yeni il bayramı gəlir. Bu isə ölkəmizə turist axını olacağı deməkdir. Bu ilin sonunadək Azərbaycana gələn turistlərin sayı 1,5 milyonu keçəcək.
Dövlət Turizm Agentliyi sədrinin müşaviri Kənan Quluzadə deyir ki, bu ilin yanvar-noyabr aylarında Azərbaycana 1,4 milyon xarici vətəndaş gəlib. Pandemiyanı nəzərə alsaq bu, müsbət rəqəmdir. Bu, əvvəlki illə müqayisədə 2 dəfə çox olsa da, 2019-cu illə müqayisədə 2 dəfə azdır. Məqsədimiz pandemiyadan əvvəlki ilə qayıdıb, ondan bir addım da irəli getməkdir. Planlarımıza görə, yaxın 4 ildə Azərbaycana 4 milyon turist axını olacaq.
Onun sözlərinə görə, Turizm Agentliyi bu ilin yay aylarından yeni paketlər hazırlayır, Azərbaycanın tanıtım işlərini aparır: “Daha çox Asiyadan turistləri cəlb etməyə çalışırıq. Regionda geosiyasi dəyişiklər baş verdiyi üçün Rusiyadan gələnlərin sayı kəskin azalıb. Qış turizmi ilə bağlı təbliğat işini ənənəvi bazardan kənar - Avropa, ən çox da almandilli ölkələrdə aparmışıq”.
Turizm büdcəyə əlavə vəsait deməkdir. Bu vəsait də nə qədər çox olsa o qədər yaxşıdır.
“Ədəbiyyat və incəsənət”
(19.12.2022)
Özbək mədəniyyəti günləri davam edir
Ölkəmizdə Özbəkistan mədəniyyəti günləri davam edir və oxucularımızı iki maraqlı tədbir barədə bilgiləndirmək istəyirik.
Dekabrın 17-də Sumqayıtda - Heydər Əliyev Mərkəzində “Daşkənddən Qarabağa könül körpüsü” proqramı təşkil olunub.
Dekabrın 19-da - bu gün isə bu dəfə paytaxtda - Beynəlxalq Muğam Mərkəzində Yəsəvi Divanının təqdimatı baş tutacaq.
“Ədəbiyyat və incəsənət”
(19.12.2022)
O biri dünyada isə, insanın atı onun yanında olmalıdır ki…
Aida Eyvazlı yazır
Yenə də əzəli türk torpaqları olan Saxa - Yakutiya barədə yazıram. Yakutiyanı fəth etməyə gələn missionerlər 1634-cü ildə I rus çarı Mixail Fedoroviç Romanova yazırdılar: “Yakol torpağı çox genişdir, intəhasızdır. Burada əhali çoxdur, atlarının sayı bilinmir”.
Tarixi mənbələrdə yakut atları eramızdan 30 min əvvəl də mövcud oluğu yazılır. Tayqada, Sibirdə qədim buzlaqlar əriyib, yerin alt qatında saxladıqlarını üzə çıxaranda, mütləq oradan at sümüklərini də insan oğlunun qarşısına çıxarır. Qışın oğlan çağında Yakutiyanın şimalında şaxtalar mənfi -60 dərəcədən də aşağını, yayda isə müsbət +40 dərəcədən yuxarını göstərəndə, yakut atları dözümlülük nümayiş etdirirlər. Buna görə də yakut atları dünyada ən güclü atlar sayılır. Tanrı bir canlıya yaraşa biləcək bütün gözəllikləri bu heyvanın simasında cəmləşdirib. Gözlərinin üstündən uzanan birçəkləri də başqa bir aləmdir. Dərilərinin üstündə olan qalın yun örtüyünə görə şaxtalı-ayazlı qış günlərində böyük məsafələri problemsiz qət edə bilirlər. Qalın dərilərinin altında çoxlu piy qatı yığılır. Piy qatı, isti yun qatı onları soyuqdan qoruyur.
Bu atların yunlarının uzunluğu 15 santimə çatır. Yakut atları dırnaqları ilə buz qatını yarıb, qidalanırlar.Buna görə də onlara yarımvəhşi atlar deyirlər. Çünki yakutlar qışda atı tövləyə bağlamır, elə ana təbiətin ixtiyarına verirlər. Bu atlar yaz aylarına qədər mənsub olduğu kəndin və ya ulusun ətrafında özləri üçün yem axtara-axtara dolaşırlar. Yazda isə sahibinin həyətinə qayıdırlar. Öz ünvanlarını itirməz, sahibini unutmaz, verilən əmri yerinə yetirərlər.
Hər bir ilxıda, at sürüsündə adətən 25 baş, çox olanda isə 5 mindən çox ayğır və dayça at olur. Onlar həm də uzun zaman bir ailə kimi yaşayırlar. Yakut atları insanlara qarşı aqressiv deyillər. Onlar özləri insana qarşı mehribanlıq nümayiş etdirir, insandan məhəbbət və sevgi umurlar. Çox davamlı və qalın dırnaqları ilə buz qatının üstündə heç bir maneəsiz gəzə bilirlər. 3000 metr məsafəni çaparaq 5 dəqiqəyə qət etməyi bacarırlar. Öz sahibinə 20-25 il xidmət edəndən sonra, atlar qoca sayılırlar. Qocaldıqdan sonra onları ağır iş görməyə götürmürlər. Qocalıqda istirahət edilər.
At əti ekoloji təmiz ət sayılır, özünün müalicəvi əhəmiyyəti vardır. Atın əti qaraciyər, mədəaltı vəzi və mədə-bağırsaq xəstələrinə məsləhət görülür. Atın südü isə şəkərlə , C vitamini ilə zəngindir. Ona görə də at südündən hazırlanan kumıs həm də antibiotik sayılır. Kumısdan və at südündən dizenteriya, tif, vərəm xəstəliyinin müalicəsində istifadə olunur. Çünki atın südündə olan yod, kalsii və askorbin turşusu isə anemiya və zob xəstəliyində istifadə olunur.
Yemək üçün istifadə edilən atları bir qayda olaraq heç vaxt minmirlər, işlətmirlər. Kəsimə ancaq 2 yaşlı dayçaları verirlər.
Yakutların təqvimindəki mart ayı atın adına hörmətlə “Kulun tutar”, yəni dayça doğulan ay adlanır.
Bütün türkdilli xalqlarda olduğu kimi, yakutlar da atlarının çulunu, yəhərini ən gözəl işləmələr, parçalar, örtüklər və gümşlə bəzərdilər. Çula “Çeprak”, böyürlərindən asılan muncuqlar və gümüşlə tikilən bəzəkili xurcuna isə “Kıçımı” deyirlər. Atın yəhərinə isə müxtəlif rəngli at dərilərindən toplanıb tikilən “dalabara” ilə bəzəyərlər.
Beləliklə bütün bunlardan da belə nəticəyə gəlinir ki, yakutların öz dini inanclarına görə göyün yuxarı qatında hər bir insanın taleyini , özünü qoruyan at ruhu dolaşır. Başqa bir dünyanın olduğuna inanan və yakut türkləri belə hesab edirlər ki, insan öldükdən sonra yeni dünyaya köçür, o biri dünyada isə, insanın atı onun yanında olmalıdır ki, ruhu rahat gəzə bilsin.
“Ədəbiyyat və incəsənət”
(19. 12.2022)
