Rəsm qalereyası: “Günəşdə Ruan kilsəsi”, Klod Mone.

Mayın 5-6-da Azərbaycan Milli Xalça Muzeyində Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş “Mədəniyyətlərarası dialoq və etnik özünəməxsusluq” adlı beynəlxalq elmi konfrans keçiriləcək.

“Ədəbiyyat və incəsənət” portalı Muzeyə

İstinadən xəbər verir ki, konfrans Mədəniyyət Nazirliyi və Azərbaycan Milli Xalça Muzeyinin təşkilatçılığı, UNESCO üzrə Azərbaycan Respublikasının Milli Komissiyası və Bakı Yunus Əmrə İnstitutunun dəstəyi ilə baş tutacaq.

Çağdaş dünyada hər bir xalqın mədəni özünəməxsusluğunu, milli-mənəvi dəyərlər sistemini, maddi irsini, tarixi yaddaşını qoruması qarşıda duran mühüm vəzifələrdəndir. Görkəmli dövlət xadimi Heydər Əliyev bu sahədə, o cümlədən Azərbaycan xalqının milli kimliyinin mühafizəsi, adət-ənənələrinin yaşadılmasında muzeylərin rolunu nəzərə alaraq, onların inkişafı istiqamətində mühüm işlər görüb, sözügedən məsələləri siyasi fəaliyyəti müddətində daim ön planda saxlayıb.

Bunu nəzərə alaraq, “Heydər Əliyev İli” çərçivəsində keçiriləcək konfransda “Ümummilli Lider Heydər Əliyevin milli-mənəvi dəyərlərin dirçəldilməsində rolu”, “Etnik müxtəliflik və mədəniyyətlərarası dialoq”, “Xalq sənətkarlığının dirçəlməsində etnoqrafik muzeylərin rolu”, “Qloballaşma dövründə etnik mədəniyyətin əksi”, “Lokal etnik qrupların ənənəvi mərasim mədəniyyəti” mövzularını əhatə edən məruzələr dinləniləcək, müzakirələr aparılacaq.

Beynəlxalq tədbirə Azərbaycan, Türkiyə, Gürcüstan, Qazaxıstan, Macarıstan, Özbəkistan, Polşa, Rumıniya, Cənubi Koreya və Yaponiyadan muzey rəhbərləri və tədqiqatçılar qatılaraq elmi məruzələrlə çıxış edəcək.

İkigünlük konfransda akademik sessiyalarla yanaşı, qonaqlar üçün xüsusi mədəni proqram da nəzərdə tutulub.

“Ədəbiyyat və incəsənət”

(05.05.2023)

Dünya Gənc Türk Yazarlar Birliyinin və "Fərqanə ədəbi məclisi"nin birgə təşkilatçılığı ilə Yunus Əmrə İnstitutunda mərhum şairə Fərqanə Mehdinin xatirə gecəsi və xatirəsinə həsr olunmuş gənclər arasında ənənəvi şeir müsabiqəsi keçirildi. 

“Ədəbiyyat və incəsənət” portalı xəbər verir ki, çıxış edən hər kəs "Söz dünyamızın mənəvi anası Fərqanə Mehdiyevaya” rəhmət diləyərək böyük ehtiramla, dərin hüznlə andı. 

Müsabiqə qaliblərinə, müsabiqə iştirakçılarına Fəxri Fərman və müxtəlif hədiyyələr verildi. Mükafatçıları təqdim edirik:

Arzu Hüseyn  1-ci yer,

Gülnar Hüseynova  2-ci yer,

Səddam Laçın 3-cü yer.

Belə gözəl tədbirin araya-ərsəyə gəlməsində başda Dünya Gənc Türk Yazarlar Birliyinin başçısı  İntiqam Yaşar və Fərqanə Ədəbi Məclisinin təsisçisi Qabil Ədalət olmaqla, bütün əməyi olan hər kəs  dərin təşəkkürlər qazandı.

Əkbər Qoşalı, Ibrahim İlyaslı, Kənan Hacı, Vahid Aslan, Rəsmiyə Sabirdən ibarət Münsiflər heyəti bu ağır və olduqca məsuliyyətli işi öz üzərlərinə götürdükləri üçün, çəkdikləri əməyə görə bütün müsabiqə iştirakçıları adından alqışlar qazandılar. 

İştirakçılar bir ağızdan dedilər ki, bir daha Fərqanə Mehdini böyük ehtiramla anır, mərhum şairimizin övladlarına dərin hüznlə başsağlığı veririk!

“Ədəbiyyat və incəsənət”

(05.05.2023)

Mayın 7-də Üzeyir Hacıbəyli adına Bakı Musiqi Akademiyası nəzdində Opera Studiyasının konsert salonunda Azərbaycan Kinematoqrafçılar İttifaqının sədri, Xalq artisti Rasim Balayevin yaradıcılıq gecəsi təşkil ediləcək.

Yaradıcılıq gecəsi Rasim Balayevin 75 illiyinə həsr olunur.

Qeyd edək ki, 1948-ci ilin avqustun 8-də Ağsu rayonunda anadan olan Rasim Balayev elə orada orta məktəbi bitirib və 1969-cu ildə Azərbaycan Dövlət İncəsənət İnstitutunun məzunu olub. Rasim Balayev ilk dəfə Bakı kinostudiyasında "Ulduzlar sönmür" əsərində kiçik bir rolda çəkilib. Oynadığı "Nəsimi", "Babək" və "Dədə Qorqud" filmlərindəki rollarla tamaşaçıların sevgisini qazanıb. O, həmçinin "Azərbaycanfilm" kinostudiyasının nəzdində fəaliyyət göstərən kinoaktyor teatr studiyasında da çalışıb. Böyük və çətin rollardan əlavə Rasim Balayev kiçik rollarda da oynayıb. "Bu şirin söz, azadlıq", "Sənin birinci saatın", "Xoşbəxtlik səhnəsi", "Mən hələ qayıdacağam", "Birisigün gecəyarısı" kimi filmlərdə o, epizodik rollarda çəkilib. Eyni zamanda, "Özbəkfilm", "Mosfilm" və başqa studiyalarla əməkdaşlıq edərək, onların da filmlərində çəkilib.

Biletləri iTicket.az saytı və şəhərin kassalarından əldə etmək mümkündür.

“Ədəbiyyat və incəsənət”

(05.05.2023)

Cəfər Cabbarlı adına Respublika Gənclər Kitabxanasında “Əhməd haradadır?” filminin 60 illik yubileyi ilə əlaqədar filmdə baş rollardan birini ifa edən Əməkdar artist, rejissor Elxan Qasımovla görüş təşkil edilib. Görüş kitabxana ilə “Dünya Azərbaycanlılarının Həmrəyliyinə Dəstək” İctimai Birliyinin birgə təşkilatçılığı ilə keçirilib.

“Ədəbiyyat və incəsənət” portalına kitabxanadan bildirilib ki, tədbirdə elm və mədəniyyət sahəsində fəaliyyət göstərən ictimai birliklərin nümayəndələri, aktyorlar, rəqqaslar, mətbuat işçiləri, Elxan Qasımovun sənətinin pərəstişkarları iştirak ediblər.

Tədbiri giriş sözü ilə açan kitabxananın İnformasiya və media ilə iş şöbəsinin müdiri Günay Həsənova tədbir iştirakçılarını salamlayaraq, millətimizin sevilən aktyoru olan Elxan Qasımovun müasir Azərbaycan kinematoqrafiyasının tanınan simalarından biri olduğunu, kino sənətinin inkişafında müstəsna xidmətləri olan sənətkar kimi sevildiyini, xalqın rəğbətini qazandığını bildirib. Bu gün Elxan müəllim kimi canlı korifeylərin iştirakı ilə təşkil edilən görüşlərin əhəmiyyətindən danışaraq, bu səpkili tədbirlərin məhz mədəniyyət ocağı olan kitabxanalarda keçirilməsinin əhəmiyyətini vurğulayıb. 

“Dünya Azərbaycanlılarının Həmrəyliyinə Dəstək” İctimai Birliyinin sədri Tofiq Əlizadə Elxan Qasımov ilə olan şəxsi tanışlığından daim qurur duyduğunu, onun böyük sənətkar olması ilə yanaşı, gözəl dost, həmkar olduğunu da qeyd edib. 1969-cu ildən “Azərbaycanfilm” kinostudiyasında işləyən, ömrünün demək olar ki, yarıdan çoxunu bu sənətə həsr edən Elxan müəllimin filmoqrafiyasında 40-dan çox filminin olmasını, “Biz qayıdacağıq”, “Qocalar, qocalar” kimi filmlərə isə rejissorluq etməsi haqqında məlumat verib.

T.Əlizadə Elxan Qasımova “Dünya Azərbaycanlılarının Həmrəyliyinə Dəstək” İctimai Birliyinin Fəxri fərmanını təqdim edib.

Əməkdar artist Elxan Qasımov 60 illik yubileyi qeyd edilən “Əhməd haradadır?” filminin onun ilk aktyor işi olduğunu qeyd edərək, 18 yaşında filmə çəkilmək üçün təklif aldığını bildirib. Ssenari müəllifi Sabit Rəhman, quruluşçu rejissoru Adil İsgəndərov olan filmdə bir sıra görkəmli sənət ustadları ilə yanaşı, gənc aktyorların da yer aldığını söyləyərək, çəkiliş zamanı baş verən maraqlı hadisələri, yaddaqalan xatirələri tədbir iştirakçıları ilə bölüşüb. 

Xalq artisti Şamil Süleymanlı Elxan müəllimlə dostluq münasibətlərindən danışaraq, onun istedadlı həmkar, gözəl və etibarlı dost olduğunu qeyd edib. 

Xalq artistləri, Dövlət rəqs ansamblının bədii rəhbəri Rüfət Xəlilzadə və Əməkdar artist Xanlar Bəşirov Elxan Qasımovun Azərbaycan milli rəqsinin bütün incəliklərinə bələd olan gözəl rəqqas, qayğıkeş müəllim, canlı əfsanə olduğunu qeyd ediblər. 

Tədbir boyunca “Əhməd haradadır?” filmindən fraqmentlər nümayiş olunub. 

Sonda Elxan Qasımov tədbirin təşkilinə görə əməyi keçən hər bir kəsə öz dərin təşəkkürünü bildirib.

“Ədəbiyyat və incəsənət”

(05.05.2023)

İjevskdə nəşr olunan nüfuzlu udmurt ədəbi jurnalı “Keneş”in bu ilki IV (aprel) sayında Azərbaycan şairi Əkbər Qoşalının şeirləri dərc olunub. Dərginin redaksiya heyəti, onun baş redaktoru Anastasiya Şumilova həmkarını apreldə 50 yaşının tamam olması münasibəti ilə təbrik edib.

Bu barədə “Ədəbiyyat və incəsənət” portalına “Literaturnaya qazeta”nın Günbatar Sibir üzrə müxbiri Knyaz QOÇAQ məlumat verib. Məlumatda daha sonra deyilir ki, Əkbər Qoşalının şeirlərinin udmurt dilinə tərcüməsini Udmurtiyanın Xalq şairi Vyaçeslav Ar-Sergi edib. Azərbaycan şairinin şeirlərinə giriş sözü də ona məxsusdur. “Azərbaycanlı qardaş” – yalnız Udmirtiyanın deyil, ümumən çağdaş rusdilli ədəbiyyatın aparıcı ustadlarından olan Vyaçeslav Ar-Sergi öz yığcam önsözünü belə adlandırıb.

Burada o, Saxa-Yakutiyada, ünlü Saxa şairi Semyon Danilovun xatirəsinə həsr olunmuş “Böyük qarın kəraməti” Poeziya festivalında Əkbər Qoşalı ilə yaxından tanışlığından, yolyoldaşı danışıb.

Vyaçeslav Ar-Sergi qeyd edir ki, “Əkbər Qoşalının yaradıcılığında poetik yeniliklər faktı Azərbaycanın tərcümeyi-halı ilə, sağlam ədəbi ənənələrlə ustalıqla – üzvi surətdə bağlanıb. “Şair Əkbər Qoşalının ədəbiyyatda yaxşı bu günü və əmin gələcəyi var”.

Tərcüməçi Azərbaycanlı yazarın poeziyasındakı özəl alqoritmi, ruhi-mənəvi enerjini oxucuya çatdırmaqçün udmurt dilinin ən uyğun ifadə vasitələrini tapmağı bacarıb.

Onu da vurğulayaq ki, Vyaçeslav Ar-Sergi Azərbaycan ədəbiyyatının udmurtcaya, ruscaya çevrilməsinə böyük diqqət yetirir.

Udmurt oxucuları onun sayəsində Nizami Gəncəvinin “Leyli və Məcnun” poemasını, Xalq şairi Sabir Rüstəmxanlının və b.-nın şeirlərini öz ana dilində oxuyur. Öz növbəsində Azərbaycan ədəbi nəşrləri onun şeirlərini, nəsr əsərlərini yayınlayıb. Vyaçeslav Ar-Seginin yaradıcılıq örnəklərini azərbaycancaya Siyavuş Məmmədzadə və Məmməd Oruc çevirib.

Doğrudan da, şairlərin dostluğu həm də ədəbiyyat dostluğudur.

“Ədəbiyyat və incəsənət”

(05.05.2023)

Mayın biri “YayLand Fest” xeyriyyə yarmarkası qapılarını Bakı sakinləri və qonaqları üçün açıb.

AzərTAC xəbər verir ki, 2023-cü ildə “Nargis” Fondu tarixində bir ilkə imza atdı və Fəvvarələr meydanında nağıllar aləminə bənzər “YayLand Fest” yarmarkasını təşkil edərək Bakının mərkəzinə yay əhval-ruhiyyəsi gətirdi. Ən önəmlisi isə, “YayLand Fest” sponsorlarının maliyyə dəstəyi və yarmarkada qurulan evlərin kirayəsindən toplanan bütün vəsait müxtəlif xəstəliklərdən əziyyət çəkən bir qrup uşağın müalicə və əməliyyat xərclərinin qarşılanmasına sərf edilir. Yarmarka başa çatdıqda maliyyə hesabatı və ətraflı məlumat Fondun rəsmi www.nargisfund.com vebsaytı və sosial şəbəkə hesablarında paylaşılacaq. 

Mayın 1–dən iyunun 15-dək Fəvvarələr meydanında keçiriləcək “YayLand Fest” 62 böyük və 20 kiçik ev, 3 ədəd iki mərtəbəli restoran, müxtəlif köşklər və tematik guşələrdən ibarətdir. Yarmarka qonaqları münasib qiymətə Qərbin və Şərqin ləzzətli təamlarını, eksklüziv suvenirlər, sərinləşdirici içki və desertlər əldə edə, həmçinin ənənəvi yarmarka əyləncələri ilə yanaşı bədii instalyasiya, fotozona, 4D kinoteatr, qorxu otağı, yeni oyunlar və labirint otağını kəşf edə bilərlər. 

“YayLand Fest”də balacadan böyüyə hər bir qonaq nağıllar aləminə qərq olur. Belə ki, yarmarkanın müxtəlif yerlərində və yarmarkanın ümumi konseptində məşhur ingilis yazıçısı Luis Kerolun “Alisa möcüzələr aləmində” əsərinin elementlərinə rast gəlmək mümkündür. 

Yarmarkanın unudulmaz açılış günündə qonaqları nağıl qəhrəmanları, animatorlar, rəqqaslar qarşılayıb. Günün xüsusi qonağı Azərbaycanın Xalq artisti Natiq Şirinov olub. Rəhbəri olduğu "Natiq" ritm qrupu və Ümid Şirinovla birlikdə ifa etdiyi əsərlər yerli və xarici qonaqları heyran edib.

Tədbirin rəsmi tərəfdaşları Bakı Şəhər İcra Hakimiyyəti, “Azərişıq” ASC, Bakı Abadlıq Xidməti, Azərbaycan Dövlət Reklam Agentliyi, “Azərbaycan Hava Yolları” QSC, “PAŞA Holding” təhlükəsizlik xidməti, “Strafor Kəsim” şirkətidir. “YayLand Fest” xeyriyyə yarmarkası sponsorlar “PAŞA Holding”, “Coca-Cola”, M-10, “Azercell”, “Xırta-Xırt”, “Atabey Çiğ Köfte”, “Xırdalan”, “Milla”, “Chocolatier”, “Azergold”, “ASCO”, “Şəhərdən Kəndə” aqroturizm layihəsi, “BirBank”, “Yango”, “Coffee’n Joy”, “Bizim Tarla”, “Azərçay” və Anadolu Universiteti Azərbaycan Proqramlarının əvəzolunmaz dəstəyi ilə keçirilir. 

Xeyriyyə yarmarkası iyunun 15-dək hər gün saat 11:00-dan 23:00-dək fəaliyyət göstərəcək. Yarmarkaya giriş sərbəstdir.

Qeyd edək ki, “Nargis” Fondu 2013-cü ildən etibarən Bakıda təşkil olunan ən böyük qış yarmarkası olan “Soyuq əllər, isti ürək” xeyriyyə yarmarkasının təşkilatçısıdır. 10 il ərzində yarmarka sayəsində toplanan vəsaitlərin hesabına Azərbaycanın müxtəlif bölgələrində yaşayan və ağır xəstəliklərlə mübarizə aparan yüzlərlə körpə yenidən sağlamlığa qovuşub.

“Ədəbiyyat və incəsənət”

(05.05.2023)