28 noyabr 2025-ci il tarixində Türk Mədəniyyəti və İrsi Fondunun prezidenti Aktotı Raimkulova ilə Qazaxıstan Respublikasının Xarici İşlər Naziri Yermek Koşerbayev arasında görüş baş tutub. Görüş zamanı tərəflər türk dünyasında mədəni irsin qorunması, sistemləşdirilməsi və müasir beynəlxalq platformalarda təbliği istiqamətində aparılan işlər barədə ətraflı fikir mübadiləsi aparıblar.
“Ədəbiyyat və incəsənət” portalına Fonddan verilən məlumata görə, görüş zamanı Türk Mədəniyyəti və İrsi Fondunun prezidenti Aktotı Raimkulova cari ildə Fond tərəfindən həyata keçirilmiş iri miqyaslı layihələr barədə məlumat verib. Görülən işlər nazir tərəfindən yüksək qiymətləndirilib.
Öz növbəsində, cənab Yermek Koşerbayev Qazaxıstanın Türk dünyası ilə humanitar və mədəni əlaqələrin inkişafına daim töhfə verməyə, eləcə də mövcud və yeni əməkdaşlıq imkanları üzrə birgə fəaliyyətə həmişə hazır olduğunu bildirib.
Görüş səmərəli fikir mübadiləsi və qarşılıqlı anlaşma şəraitində keçib, 2026-cı il üçün planlaşdırılan bir sıra layihələr müzakirə edilib.
“Ədəbiyyat və incəsənət”
(01.12.2025)
