Nigar Xanəliyeva, “Ədəbiyyat və incəsənət”
Dünən Beynəlxalq Muğam Mərkəzi qonaqlı-qaralı idi, burada Türk Mədəniyyəti və İrsi Fondunun təşkilatçılığı və Azərbaycan Respublikası Mədəniyyət Nazirliyinin dəstəyi ilə Şanlı Zəfərin 5-ci ildönümünə həsr olunmuş ədəbi-bədii tədbir və miniatür sənətinin incəliklərini əks etdirən “Kölgəsiz dünya” adlı sənədli filmin təqdimat mərasimi keçirilirdi.
Beynəlxalq Muğam Mərkəzinin əsrarəngiz binasına daxil olanda ilk olaraq diqqəti sərgi – çoxsaylı portretlərdən yönələn insanların baxışları cəlb edir, furşet masaları ətrafındakı şirin söhbətlər, televiziyaçıların və fotoqrafların sərasər əməyi diqqət çəkirdi...
Tədbirin açılışında Azərbaycan Respublikasının Dövlət Himni səsləndirildi. Şəhidlərimizin əziz xatirəsi bir dəqiqəlik sükutla yad edildi.
Tədbirə açılış nitqi ilə başlayan Türk Mədəniyyəti və İrsi Fondunun prezidenti xanım Aktotı Raimkulova qonaqları salamladı, Şanlı Zəfərin Azərbaycan xalqının birlik və iradəsinin təcəssümü olduğunu vurğuladı.
O qeyd etdi ki, 44 günlük Vətən müharibəsi zamanı əldə olunan Qələbə bütün Türk dünyası üçün ortaq qürur mənbəyidir.
Türk xalqlarını birləşdirən mənəvi körpünün təməlində mədəniyyətin dayandığını vurğulayan Fondun prezidenti, bu gün təqdimatı keçiriləcək “Kölgəsiz Dünya” sənədli filminin miniatür sənəti irsinin qorunması və yaşadılmasında xüsusi əhəmiyyət kəsb etdiyini qeyd etdi. Filmin ərsəyə gəlməsində əməyi keçən hər kəsə təşəkkürlərini bildirdi. Azərbaycan xalqını Şanlı Zəfərin 5-ci il dönümü münasibətilə təbrik etdi.
Azərbaycan Yazıçılar Birliyinin Gənclər Şurasının sədri Fərid Hüseynin aparıcılığı ilə keçirilən tədbir bədii proqramla davam etdirildi.
Proqram çərçivəsində Əməkdar artist Bəyimxanım Vəliyeva “Xudayar təsnifi”ni, gənc müğənni Xasay Şıxıyev “Ey vətən” mahnısını, tanınmış xanəndə Ayşən Mehdiyeva isə “Qarabağ” şərqisini ifa etdilər. Ramiz Qusarçaylının “Azərbaycan bayrağı” şeirini isə aktyor Tural Əhməd səsləndirdi. Həmçinin 3 nömrəli Uşaq-Gənclər İnkişaf Mərkəzinin rəqs qrupunun çıxışı nümayiş olundu.
Tədbirin ikinci hissəsində “Artel” şirkətinin art direktorları, “Kölgəsiz Dünya” sənədli filminin müəllifləri Afaq Məmmədova və Cəmilə Həşimova çıxış edərək ekran işinin ideya xətti, miniatür sənətinin bədii-estetik məqamları və filmin yaradılma prosesinə dair qeydlərini bölüşdülər.
Ardınca tamaşaçılara Azərbaycan miniatür sənətinin incəliklərini müasir kino dili ilə əks etdirən “Kölgəsiz Dünya” filmi nümayiş etdirildi.
Tədbirdə hökumət nümayəndələri, Azərbaycan Respublikasında akkreditə olunmuş diplomatik korpus təmsilçiləri, beynəlxalq təşkilatların, elmi qurumların və ali təhsil müəssisələrinin rəhbərləri, eləcə də müxtəlif nüfuzlu qurumların yüksək səviyyəli təmsilçiləri iştirak edirdilər.
Tədbir, Azərbaycanın Şanlı tarixinin təbliği və təşviqi istiqamətində atılan mühüm addımlardan biri kimi dəyərləndirilə bilər.
Tədbir sonu Türk Mədəniyyəti və İrsi Fondunun prezidenti xanım Aktotı Raimkulovadan ayaqüstü müsahibə almaq istəyim isə baş tutmadı. Xanım hava limanına tələsirdi, Fondun Qazaxıstanda keçirəcəyi növəbti tədbirə yola düşəcəkdi. Bəli, Varşavada layihə icra et, gəl, bir günlük Bakıda bu tədbiri başa çatdır, dərhal da Qazaxıstana – digər layihənin icrası üçün üç. Fondun, onun rəhbərinin iş qrafiki belədir. Türk birliyi naminə atılan bu addımlar əlbəttə ki lazımınca qiymətləndirilməlidir.
“Ədəbiyyat və incəsənət”
(20.10.2025)
