Super User
Avropanın ən xoşbəxt yeniyetmələri hansı ölkələrdə yaşayır? XEYİR, HEÇ DƏ VARLI ÖLKƏLƏRDƏ DEYİL!
Kənan Məmmədli, “Ədəbiyyat və incəsənət”
Avropanın ən xoşbəxt yeniyetmələri hansı ölkələrdə yaşayır? Təbii ki, belə bir sıralanmada sizi ilk əvvəl öz azərbaycanlılarımız maraqlandırır, ancaq bəri başdan deyim ki, Azərbaycan coğrafiyası söz açacağım araşdırmanın əhatə etdiyi məkana aid deyil, odur ki, marağınızı boğmalı olacaqsınız.
Gənclərin xoşbəxtliyi üçün nə lazımdır? “2024 Good Childhood Peport”un hesabatı barədə bir neçə azərbaycanlı yeniyetməyə müraciət edib mövzu ilə bağlı onların da fikrini aldıq. Cavabları sonda qeyd edəcəyəm.
İndi isə mövzuya qayıdıram. Euronews kanalı ilə bazar günü axşam izlədiyim proqramın məğzi o idi ki, sən demə ən xoşbəxt gənclər heç də ən varlı ölkələrdə yaşamırlar.
Avropa dünyanın ən firavan regionu hesab edilir, amma nisbətdə burada da daha varlı və daha kasıb ölkələr vardır. Məsələn, Böyük Britaniya, Fransa, Almaniya kimi üç hegemon, Skandinav ölkələri kimi əhalisinin ən təminatlı olanları, Yunanıstan, Albaniya, Balkan ölkələri kimi kasıblar da vardır. Britaniyanın Children’s Society xeyriyyə təşkilatı qitə gənclərinin rifahı barədə dərc etdiyi hesabat adamda fərqli düşüncələr yaradır. “2024 Good Childhood Peport” adlı hesabatda qeyd edilir ki, avropalı yeniyetmələrin cəmi 16,6 faizi öz həyatlarından narazıdır. Ölkələr üzrə götürəndə isə ən narazı bilirsiniz hansı ölkənin təmsilçiləridirlər? Məhz qitənin ən varlı ölkəsinin – Böyük Britaniyanın.
Avropanın 27 ölkəsində 15 yaşlı yeniyetmələr arasında keçirilən rəy sorğusuna görə ən az narazı isə Niderlandda yaşayır.
1.Niderland 6,7
2.Finlandiya 10,8
3.Danimarka 11,3
4.Rumıniya 11,4
5.Portuqaliya 11,6
6.Xorvatiya 12,3
7.Macarıstan 12,6
8.İsveçrə 13,6
9.Litva 14,1
10.İspaniya 14, 6
---------------------
25. Malta 23,6
26.Polşa 24,4
27.B.Britaniya 25,2
Qitənin yeniyetmələrini əsas narazı salan cəhət qiymətlərin baha olması, valideyin mühafizəkarlığı, qadcetlərin real ünsiyyətə xələl gətirməsi, narkomaniyanın tüğyan etməsi, epidemiyaların, təbii fəlakətlərin və müharibələrin tüğyan etməsidir.
İndi isə öz yeniyetmələrimizə qayıdaq. Sorğu 15 yaşlılar arasında keçirilib deyə biz də məhz bu yaşda olan səkkiz yeniyetmə arasında sorğu apardıq.
Sizi nə xoşbəxt edər?
Anar, Elşən, Dadaş, Səbinə və Renat dedilər çoxlu pul. Pərviz və Məryəm dedilər ali məktəbə qəbul olmaq. Tariyel dedi xarici ölkədə yaşamaq.
Sizi nə narazı salır sualına isə cavablar belə oldu:
Anar, Səbinə, Pərviz – təhsilin səviyyəsi.
Elşən, Dadaş, Tariyel – bahaçılıq.
Renat -valideyinlərin ipoteka və kredit öhtəlikləri.
Məryəm – valideyinlərin sərt nəzarəti.
Ümumilikdə isə bizim 8 yeniyetmədən cəmi biri özünü bədbəxt sandığını söylədi, digərləri xoşbəxt olduqlarını bildirdilər, bu xoşbəxtliyin əsas səbəbi isə Azərbaycanın 2020-ci ildə Vətən müharibəsində əldə etdiyi Zəfər, 2023-cü ildə suverenliyinin bərpa etməsidir. Demək, buradan belə nəticə çıxır ki, bizdə çox vətənpərvər bir nəsil yetişir, rəy sorğusuna Azərbaycan da daxil edilsəydi, biz ön sıralarda qərarlaşar, heç də Britaniyaya yoldaş olmazdıq.
Şəkildə: britaniyalı yeniyetmələr.
“Ədəbiyyat və incəsənət”
(30.09.2024)
Tam xoşbəxtlik nədir? - HƏR GÜN KAMAL ABDULLADAN 7 QRANULA
Xalq yazıçısı, akademik Kamal Abdullanın əsəsrlərindən seçilmiş bir sıra qranula – cövhər sayıla biləcək məqamları “Ədəbiyyat və incəsənət” portalı oxucularına təqdim edir.
Kamal Abdulla özü seçilmiş bu cövhərlər barədə yazır: “İllərdən bəri yazdığım müxtəlif şeirlərin, esselərin, pyeslərin, hekayə və romanların, publisistik məqalələrin və elmi əsərlərin, verdiyim intervülərin hər birinin içində yer almış və bu gün də öz məzmunu, tutumu, forması ilə diqqətimi çəkən misralar, cümlələr günlərin bir günü sanki dil açıb mənə dedilər ki, bizim bir-birimizdən zaman və məkanca ayrılığımıza son qoy və bizi bir-birimizin yanında yerləşdir. Sən görəcəksən ki, bu zaman biz tamamilə yeni bir cazibədə zühur etmişik. Onlar qeyri-səlis məntiq dili ilə desək, içində olduqları mətnin qranulaları (ilkin vacib hissəcikləri) idi. Qranula, başqa cür ifadə etsək, cümlədən (mətndən) bütün artıq hissələri siləndən sonra yerdə qalan cövhərdir.”
Çox sevindirici haldır ki, bu günlərdə “Everest” nəşriyyatında müəllifin “Seçmələrin seçməsi-qranulalar” adlı kitabı da işıq üzü görmüşdür.
Beləliklə, Kamal Abdulladan hər gün 7 qranula:
1.
“Vaxt gəlir, hər şeyin yetişir sonu,
Bu nəydi, qurtardı, yox oldu, getdi?!
Bu da bir həyatdı - oynadıq onu,
Bu da bir oyundu - yaşadıq bitdi.”
2.
Taleyində olan həyatında olmaya bilər.
3.
“Mənə deyən gərək nə olub axı
Nə çabalayırsan, söylə nə xəbər?!
Sən çətin tapasan axtardığını,
Sən axtardığını itirməyiblər.
4.
Əvvəlki an olmamışdır və sonrakı an olmayacaqdır. Həm indini, həm sabahı, həm keçmişi öz içinə yağan bir vahid an var. Dolğun an!
5.
“Kitabi-Dədə Qorqud” başdan-başa mağara dərsləridir. “Nəyi etmək olar?!”dan “nəyi etmək olmaz!”a qədər geniş bir didaktik yelpazə Dədə Qorqudun mağara dərslərinin əsas mövzusudur.
6.
Quru çay ola. Üstündən sınıq bir körpü salasan. Keçəndən üç axça, keçməyəndən döyə-döyə dörd axça alasan. Bunu ancaq Dəli Domrul edə bilərdi.
7.
Bəzi adamların tam xoşbəxt olmaları üçün vacib deyil ki, onların bütün arzuları yerinə yetsin. Tam xoşbəxtlik üçün bu adamların qonşuları da gərək bədbəxt olsun.
“Ədəbiyyat və incəsənət”
(30.09.2024)
“Deneyap” texnologiya laboratoriyasında “İlk dərs günü” tədbiri keçirilib
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin təşkilatçılığı ilə "Bilim Bakı” mərkəzinin “Deneyap” texnologiya laboratoriyasında “İlk dərs günü” tədbiri baş tutub.
“Ədəbiyyat və incəsənət” portalı agentliyə istinadən xəbər verir ki, tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Türkiyənin Azərbaycandakı səfiri Cahit Bağçı, “Deneyap” texnologiya laboratoriyasına qəbul olunmuş şagirdlər, onların valideynləri və digər qonaqlar iştirak ediblər.
Öncə şəhidlərimizin əziz xatirəsi bir dəqiqəlik sükutla yad edilib. Ardınca isə hər iki ölkənin dövlət himnləri səsləndirilib.
“Bilim Bakı” Mərkəzinin rəhbəri Ahmet Köse şagirdlərə və onların valideynlərinə “Deneyap” proqramı çərçivəsində keçiriləcək təlimlər, laboratoriya konseptləri, tədbirlər, təhsil modeli və dərs planları, tədris müddəti, dərsliklər və s. barədə məlumat verib və iştirakçıları maraqlandıran sualları cavablandırıb.
Qonaqlar “Deneyap” texnologiya laboratoriyasına qəbul olunmuş şagirdləri və valideynləri təbrik edib, onlara uğurlar arzulayıblar.
Sonda xatirə fotosu çəkilib.
“Deneyap” texnologiya laboratoriyasına şagird seçimi imtahanı 2 mərhələdən ibarət olub. 1-ci mərhələ olan yazılı imtahanda iştirak edən Bakı şəhərinin ümumtəhsil orta məktəblərinin 4, 5, 6, 7-ci sinfini bitirən 5000-ə yaxın şagird arasından ən çox bal toplayan 431 şagird 2-ci mərhələ olan praktiki imtahanda iştirak edib. Hər iki mərhələdə ümumi olaraq ən yüksək nəticə göstərən 80 şagird 3 il müddətində “Deneyap” texnologiya laboratoriyasında təhsil almaq hüququ qazanıb.
“Ədəbiyyat və incəsənət”
(30.09.2024)
“YAŞAT” Fondu Anım Günündə şəhid ailə üzvlərini Şuşa və Xankəndidə bir araya gətirib
Cari ilin 27-28 sentyabr tarixində “YAŞAT” Fondunun təşkilatçılığı, “Nar”ın sponsorluğu ilə şəhid ailə üzvlərinin Şuşa və Xankəndi şəhərlərinə səfəri təşkil olunub.
“Ədəbiyyat və incəsənət” portalı “YAŞAT Fondu”na istinadən xəbər verir ki, Anım Günündə reallaşan tədbirin məqsədi şəhid ailələrinə qəhrəman övladlarının fədakarlığı ilə azad edilmiş, Qarabağın döyünən ürəyi olan Şuşa şəhərini, eyni zamanda Xankəndi şəhərini yaxından tanıtmaq olub.
Səfər çərçivəsində şəhid ailələrinə Şuşa və Xankəndidə aparılan bərpa-quruculuq işləri ilə bağlı geniş məlumat verilib.
“YAŞAT” Fondu tərəfindən şəhid ailələri və qazilərə xüsusi diqqətin göstərilməsi və digər sahələrdə dəstək tədbirləri davam etdirilir.
“Ədəbiyyat və incəsənət”
(30.09.2024)
YARAT həyəcanla gözlənilən Muzey Gecəsi 2024-ü elan etdi!
YARAT Müasir İncəsənət Məkanı 12 oktyabr tarixində baş tutacaq Muzey Gecəsi ilə bağlı elanını verdi. Muzey gecəsi iştirakçılara özləri və başqaları ilə necə ünsiyyət qurduqlarını daha dərindən araşdırmağa xidmət edir.
Əvvəlki buraxılışlarda daxili dünyamızı anlamaq və ətrafımızı qəbul etmək mövzularından ilham alan builki tədbir də fikirlərimizi, hisslərimizi və çətinliklərimizi müxtəlif ünsiyyət formaları vasitəsilə necə ifadə etdiyimizə vurğu edəcək.
“Ədəbiyyat və incəsənət” portalının YARAT Müasir İncəsənət Məkanının PR meneceri Nərmin Həsənzadədən aldığı məlumata görə, Muzey Gecəsinin proqramı aşağıdakı kimidir:
1.
YARAT Mərkəzi, 1-ci mərtəbə, sərgi məkanı
İlhamə Babayevanın səs terapiyası
İlhamə Babayevanın rəhbərliyi ilə keçiriləcək seminarda:
* Səs terapiyası və oxuyan kasalar haqqında mühazirə
* Səs terapiya seansı
* Vokal yoqa
* “Sual-cavab”
* Mantra ifası
Seminar iştirakçıları səslə meditativ vəziyyətə çatmağı, sıxılmış duyğuları azad etməyi və sağlam kommunikasiyanı necə qurmağı öyrənəcəklər.
18:00 – 20:00
Yaş məhdudiyyəti: 18+
İştirakçı limiti: 70
2.
YARAT Mərkəzi, 2-ci mərtəbə, MFZ
Saint Twins Detective
İntellektual oyun: “Döngədəki yaradıcı”
“St. Twins” detektiv oyunu sizə film-nuar üsulunda həyəcan dolu bir macəra yaşadacaq. Məhdud zaman ərzində müəmmalı bir cinayət işini həll etməlisiniz. İş materialları, polis hesabatları, qəzet məqalələri və şahid ifadələri ilə sübutları toplayaraq cinayətkar(lar)ı yaxalayın. Özünüzü ötən əsrin 50-ci illərin Amerikasında dark-cazı ab-havasında və yağışlı küçələrində əsl detektiv kimi hiss edin!
18:00 – 22:00
Yaş məhdudiyyəti: 18+
İştirakçı limiti: 85
Dil: Rus
3.
Teatr O2
Performans: “5”
Beş hissədən ibarət bu performans, kommunikasiya çətinliklərini və canlı ünsiyyət ehtiyacını araşdırır.
Performans iştirakçıların əməkdaşlığı ilə problemləri göstərir və sosial şəbəkələrin məhdudiyyətlərini vurğulayır.
22:30 – 23:30
Yaş məhdudiyyəti: 18+
İştirakçı limiti: 150
4.
XX-XXI əsrlər Azərbaycan Rəngkarlığı Muzeyi, 1-ci mərtəbə, sərgi məkanı
Leyla Qabulovanın ustad dərsi: “Danışılmamış hekayətlər”
Ustad dərsi iştirakçıları fərdi təcrübə və qavrayışın subyektivliyini araşdırmağa dəvət edir.
İştirakçılar cütlüklər halında işləyərək, onlara təqdim edilən emosiyaları öz baxışlarına uyğun təsvir edəcəklər. Daha sonra onlar bu əsərləri bir-birləri ilə bölüşərək, eyni duyğuların fərqli qavranmasını müzakirə edəcəklər. Bu proses qarşılıqlı anlaşmanı və başqalarını daha yaxşı qəbul etməyi təşviq edəcək.
21:30 – 23:30
Yaş məhdudiyyəti: 18+
İştirakçı limiti: 30
5.
XX-XXI əsrlər Azərbaycan Rəngkarlığı Muzeyi, 2-ci mərtəbə
DEWAR, Şəhriyar İmanov, Pünhan Əzim, Rəşad Rəyyan
Performans: “XİTAB”
Bu tədbir iştirakçılara DEWAR-ın elektron musiqisi, Şəhriyar İmanovun tar ifası və Pünhan Əzim ilə Rəşad Rəyyanın təqdim etdiyi qəzəllərin dərin emosiyaları vasitəsilə sənət ünsiyyətin ən saf formasını hiss etmə imkanı yaradacaq.
20:00 – 21:00
Yaş məhdudiyyəti: 18+
İştirakçı limiti: 300
6.
Bakı Bulvarı (“Suraxanı” gəmi-muzeyinin yanı)
Canlı çıxış: Okaber
Ön səhnə: Neocortex
Tamaşaçılar ritmik və emosional ifadələrin gücünü hiss edərək, müasir poeziya sənətinin dinamikasına qərq olunacaqlar.
Bu unikal tədbir, rep musiqisinin ünsiyyətə necə təsir etdiyini və emosional ifadəni necə formalaşdırdığını nümayiş etdirəcək.
00:00 – 01:05
Yaş məhdudiyyəti: 18+
İştirakçı limiti: 600
Qeyd edək ki, tədbir bir sıra tərəfdaşların – Bakı Bulvar İdarəsi, iTicket platforması, Meatadore və United Coffee Beans-in dəstəyi ilə həyata keçirilir.
Tədbirlərə giriş ödənişsizdir.
Qeydiyyat iTicket vasitəsilə aparılır.
Əlavə məlumat üçün: 050 246 92 92
“Ədəbiyyat və incəsənət”
(30.09.2024)
Rəsm qalereyası: Karl Milner (Almaniya), “Dağ mənzərəsi”
Rəsm qalereyası: Karl Milner (Almaniya), “Dağ mənzərəsi”
POETİK QİRAƏTdə Əlizadə Nurinin “Payız havası üstə...” şeiri
Təqdim edir: Könül, “Ədəbiyyat və incəsənət”
Poetik qiraətdə sizlərlə yenidən daimi müəllifimiz Əlizaəd Nuridir. Bu dəfə şair payızdan danışacaq. Axı ömrün ömrün növbəti payızındayıü.
Xoş mütaliələr.
Payızı geyinib bu yol, bu səki,
Çağır, o buluddan təzə su gəlsin.
Payız yağışından üstünə səp ki-
Səndən göy üzünün qoxusu gəlsin...
O yağış canımdan yuyarmı pası,
Yuyarmı bu qəmi, yuyarmı dərdi?
Ay da göy üzündə gecə lampası
Ulduzlar yanında pərvanələrdi...
...Axşamın altından götür səhəri,
Günəşlə oynayaq uşaqlar kimi.
Ömür də beləcə əriyir, pəri
Qışda çətirinə yağan qar kimi...
Evdə darıxmaqdan evi də üzdüm,
Görən neynir indi sənin əllərin?
Gəl, çıxaq səhərə bu axşamüstü
Gedib danışdıraq o heykəlləri...
Sevincdi... hərəyə bir qırıq düşüb,
Bir ömür bəs etmir indi adama.
Bizim arxamızca ayrılıq düşüb
Gəl, gedib qoşulaq o izdihama...
Hərə bir ümidin əlindən tutub,
Onu çağırmayan bir səsə gedir.
Bəlkə gedəcəyi yeri unudub
Amma ki, tələsə-tələsə gedir...
...Çıxaq bu payızdan səssiz-səmirsiz,
Payız yola salsın bir ana kimi.
Yerdə min adamı itiririk biz
Göydə bir Allahı tapana kimi...
“Ədəbiyyat və incəsənət”
(30.09.2024)
BİR SUAL, BİR CAVAB İqbal Nəhmət ilə
Ülviyyə Əbülfəzqızı, “Ədəbiyyat və incəsənət”
SUAL
Bu gün cümə, sabah şənbə,
Həftənin neçəsindəyəm?
Gecəni gündüz etmişəm.
Gündüzün gecəsindəyəm.
Mən necə darıxım sənsiz?
İlin, günün bu vaxtında.
Söylə necə yaşayırsan?
Həsrətimin paytaxtında?
İqbal bəy, şeirinizdən anladıq ki, darıxmağın zamanı yox..
İqbal bəy üçün "darıxmaq" sözünün sinonimi nədir?
CAVAB
Bunlar darıxmağın lügətimizdə olan sinonimləridir: Bezikmək, sıxılmaq, əsəbiləşmək.
Mənim üçünsə darıxmaq, dağılmaqdır, parçalanmaqdır.
“Ədəbiyyat və incəsənət”
(30.09.2024)
GÜLÜŞ KLUBUnda emo
Sərtyel, “Ədəbiyyat və incəsənət”
1.
AYNA üçzolaqlı yolun solunun otuz-qırx velosipedçiyə, sağının otuz-qırx avtobusa verilməsi və otuz-qırx min avtomobilə tək orta zolağın ayrılması səbəbindən şikayət edən avtomobil sürücülərinə xəbərdarlıq etdi:
-Elə eləməyin ki, orta zolağı da it və pişiklərə ayıraq!
2.
Dərdayıl bol yeyib içir. Sərxoş halda ofisiantı səsləyir:
-Mənə bir şey ver ki, ayılım.
Ofisiant ona 542 manatlıq hesabı uzadır:
-Buyurun.
3.
Heç kim olanlar hər şeyə sahib olmaqdadırlar.
4.
Bir emo barda, qarşısında da bir parç pivə oturub dərdli-dərdli pivəsinə baxır. Bu vaxt bir pank gəlib onun qarşısından pivəni götürüb başına çəkir.
Emo hönkürtüylə ağlayanda pank deyir:
-Nə gözünün qorasını sıxırsan, bir pivənin söhbətidir?
Emo deyir:
-Yox e. Mən çox bəxtsiz adamam. Özümü qatarın aıtına atmaq istədim, reysi təxirə saldılar. Özümü asmaq istədim, kəndir qırıldı. İndi də pivəyə zəhər qatdım ki içib bu mənfur həyatdan qurtuıam, ona da sən sahibləndin.
5.
Vaxtı gələcək, indiki balacalar böyüyüb estafeti daha böyüklərdən alacaqlar. Alacaqlar ki, indi də onlar əziyyət çəksinlər.
“Ədəbiyyat və incəsənət”
(30.09.2024)
Müasir İncəsənət Muzeyində “15 fırçanın simfoniyası” adlı sərgi açılıb
Sentyabrın 28-də Müasir İncəsənət Muzeyinin 15 illik yubileyinə həsr olunmuş "15 fırçanın simfoniyası" adlı sərgi açılıb.
Bu barədə “Ədəbiyyat və incəsənət” AzərTAC-a istinadən xəbər verir.
“15" adı Azərbaycanda müasir incəsənətin yaranması yoluna toxunan 15 modernist ustadın əsərlərini ifadə edib. Sərgidə həm yaşlı, həm də gənc nəslin nümayəndələrinin yaradıcılıq ekspozisiyası yer alıb.
Sərginin açılışından əvvəl Xalq rəssamı Cəlil Hüseynov sərgidə onun beş əsərinin nümayiş edildiyini bildirərək deyib: "Burada nümayiş olunan əsərlərim Abşeron mənzərələri barədədir. Həmin əsərlərdə yarımadanın gözəl görüntüləri, Xəzər dənizi əks olunub. Sərginin təşkilində əməyi keçən hər kəsə öz minnətdarlığımı bildirir və uğurlar arzulayıram".
Xalq rəssamı Səlhab Məmmədov rəssamların emalatxanalarda qalmış əsərlərinin nümayiş olunması üçün Müasir İncəsənət Muzeyində çox gözəl şəraitin yaradıldığını qeyd edib. O, bildirib ki, bu muzey məhz Birinci vitse-prezident, Heydər Əliyev Fondunun prezidenti Mehriban xanım Əliyevanın təşəbbüsü ilə fəaliyyətə başlayıb. Xalq rəssamının sözlərinə görə, sərgidə nümayiş edilən əsərlər onu göstərir ki, ölkəmizdə müasir incəsənət sahəsində böyük nəticələr əldə olunub. Səlhab Məmmədov, həmçinin muzeydə üç əsərinin nümayiş olunduğunu da diqqətə çatdırıb.
Sərginin açılışında çıxış edən Xalq rəssamı Fuad Salayev bu il Müasir İncəsənət Muzeyinin 15 illiyinin tamam olduğunu bildirib. Qeyd edib ki, qısa zamanda muzey çox inkişaf edib. “Mən 15 il bundan qabaq bu binada olmuşdum. Amma o vaxt burada heç nə yox idi. Bu muzey gözümün qabağında formalaşdırılıb. Muzeydə Azərbaycan təsviri sənəti rəssamların yaşadıb yaratdıqları bu əsərlərlə ortaya çıxıb. Ölkəmizin tanınmış, həmçinin gənc rəssamları Müasir İncəsənət Muzeyində yer tapıblar. Hər bir rəssam əsərlər üzərində özü düşünüb, onları özü yetişdirib ki, elə bu əsərlərin dəyəri də ondadır", - deyə Fuad Salayev diqqətə çatdırıb.
Daha sonra qonaqlar Müasir İncəsənət Muzeyinin 15 illiyinə həsr olunmuş "15 fırçanın simfoniyası" adlı sərgi ilə tanış olublar.
İncəsənətsevərlərə hər biri özünəməxsus texnikası, müxtəlif rəng çalarları, kölgələri və cizgiləri ilə seçilən əsərlərdən ibarət sərgi təqdim olunub. Eyni zamanda, sərgidə modernizm cərəyanının yaranmasına yol açmış həm rəssamların, həm də heykəltəraşların sənət əsərləri nümayiş etdirilib.
Təqdim olunan əsərlər 15 incəsənət ustasının XX əsrin ikinci yarısından bu günə qədər olan dövr ərzində yaratmış olduqları sənət nümunələridir.
Muzeyin sərgi zalında toplanmış əsərlərin kolleksiyası, eyni zamanda, rəng sıçrayışının və forma incəliyinin cəlbedici məkanı olmaqla, xalqın mədəni irsinin məcmusunu özündə ehtiva edir.
Sərgiyə gələn qonaqlar sənətkarların 40-a yaxın sənət əsərlərindən ibarət ekspozisiyaya tamaşa ediblər.
Qapaq şəklində: Muzeydən görüntü; iç şəkildə Səlhab Məmmədov.
“Ədəbiyyat və incəsənət”
(30.09.2024)
